ژوب ئنا جتا غا علاقہ آ تیٹ اُست و پڈ ئنا ناجوڑی تالان مننگ آن کہی شاریک زیمی مسنو ہرافتیان اِرا چُنا مرگ ئنا گواچی ہم مسنو۔

کوالخواہ تا رد ئٹ عئید ئنا اولیکو دے اُست و پڈ ئنا ناجوڑی آن زیمی 30 بندغ ءِ اسپتال آ ہتنگ مس۔

ڈاکٹر آتا پاننگ ءِ کہ پِر ئنا مُد، سیلاب و دیر مُچ مننگ نا سوب آن ناجوڑی تالان مننگ نا خلیس ءِ اندا خاطر آن شاریک کُننگ نا گِڑا و صفائی نا بابت ئٹ خیال کیر۔

ضلع نا ہیلتھ آفیسر نا پاننگ ءِ کہ ہر وڑ ئنا ہلہلی حالیت تون مون تننگ کن تیار اُن۔

سری لنکا ئٹ ہزار آتا کچ ئٹ برانز کروک آتا پارہ غان صدر نا سرکاری ماڑی آ شولنگ آن گڈ صدر گوٹابایا راجاپکسے تینا عہدہ غاناستعفیٰ تننگ نا پڑو کرینے۔ برانزیک سروزیر نا اُرا ءِ ہم خاخر تسر۔

سری لنکا ئٹ کوالخواک پڑو کرینو کہ صدر گوٹابایا راجاپکسے بروک ہفتہ غان استعفیٰ ایتو۔ اسپیکر مہندا پاپا ابی وردینا اسہ ویڈیوتران اسیٹی پارے کہ راجاپکسے اودے تینٹ اقتدار یلہ کننگ نا فیصلہ آن معلومدار کرینے۔

ابی وردینا پین پارے کہ 13 جولائی آ عہدہ یلہ کننگ نا فیصلہ امن ایمنی تون اقتدار ءِ مٹ کننگ ءِ یخینی کننگ کن کننگانے۔ اونا پاننگ ءِکہ “اندا خاطر ای خلقت آن خواست کیوہ کہ او قانود نا شرف و امن ایمنی ءِ برجا تخر۔“

داڑان مالو سری لنکا نا دارالحکومت کولمبو ئٹ ہزار آ برانزیک صدر نا ماڑی آ شولنگاسر۔ داڑان منہ گھنٹہ آن گڈ صدر گوٹابایاراجاپکسے پڑو کرے کہ او تینا اوغدہ آن استعفیٰ تننگ ءِ۔ حوال تا ردئٹ راجاپکسے اسہ رکھوک ہند ئسے آ ہندی کننگانے۔

بلوچستان نا ساحلی علاقہ آتیٹ تُرند تہو و ہورہ گروک تون بروک بیست و چار گھنٹہ ئٹ پین تُرند پِر ئنا گمان ءِ۔ منہ دے ئٹ برجاء تُرندپِر آن تدینی تیٹ 60 آن زیات بندغ بیران مسونو۔

محکمہ مُد ئنا رد ئٹ بلوچستان نا جتا علاقہ آتیٹ اینو ہم مدان و تُرند پِر ئنا لڑ برجاء مس، تیوہ غاتیان زیات پِر اورماڑہ ئٹ 27 ملی میٹرریکارڈ کننگا اندن بارکھان ئٹ 11، تربت ئٹ 7، پسنی و لسبیلہ ئٹ 5 و پنجگور ئٹ 2 ملی میٹر پِر مس۔

محکمہ مُد ئنا ردئٹ بلوچستان نا جہندمی شار آتیٹ بیست و چار گھنٹہ ئٹ پین پِر ئنا گمان ءِ اندن ساحلی شاد گوادر، اورماڑہ و ایلوعلاقہ آتئٹ تُرند تہو و ہورہ گروک تون ترند پِر ئنا گمان ءِ۔

سندھ و بلوچستان ئٹ جون نا گڈیکو ہفتہ آن جاگہ اس مدان و جاگہ اس تُرند بشام نا پِرک برجاء ءُ۔

بلوچستان نا ضلع نوشکی آن پنچ ورنا بیگواہ کننگار۔

نمائندہ ٹی بی پی نا ردئٹ نوشکی شار آن خڑک علاقہ قادر آباد آن تدوکا نن پاکستانی لشکر اُرا تیا چھاپہ خلیسہ دا نیام ئٹ پنچ ورنا دزگیر کرے و نا درست ءُ جاگہ سے آ درے ہرافتا بابت ئٹ داسکان ہچو حوال مونا بتنے۔

ہندی بندغ آتا پاننگ ءِ کہ تدوکا نن دو بجہ نا وختا پاکستانی لشکر فرنٹیئر کور و سادہ پُچ بینوک کارندہ آک بھلو کچ ئسے ٹی اُرا تیا چھاپہ خلکُر، دا نیام ئٹ نیاڑی و ایلو بندغ آتے بےدادی نا گواچی کریر۔

زوراکی ئٹ بیگواہ مروک بندغ آ تیٹ چانڑدہ سالی ادریس ولد حاجی اکبر، چانڑدہ سالی بلال ولد صاحب خان، پانزدہ سالی جلیل ولد صاحب خان، ہوّدہ سالی زبیر ولد میر احمد، بیست سالی خالد ولد منیر اوار ءُ۔

ضلعی بست و بند داسکان دا بابت ئٹ ہچو ہیت و گپ کتنے۔

یاتی مرے کہ اِرا دے مالو دشت ئنا علاقہ سورک آن پاکستانی فورسز آک اِرا ورنا تنویر شوہاز ولد ملا منیر و قیوم ولد جماعت ءِ دزگیر کریسہ نا درست ءُ جاگہ سے آ دریر ہرافتے کہی گھنٹہ آن گُڈ آجو کننگا۔

بلوچستان نا بنجائی شار کوئٹہ و قلات نا علاقہ منگچر ٹی سلاء بند بندغ آک سُم کاری کریسہ مُسہ بندغ ءِ کسفیر ۔

کوئٹہ ٹی سُم کاری نا تدینی ہفتہ نا دے کلی گوہر آباد لانگو چوک نا ہند آ مس ہراڑے خون مروک بندغ نا چاہندای بیست و پنچ سالی وقاص احمد ولد بشیر احمد نا پِن آ مسنے۔

سُم کاری نا سوب مونا بتنے، ڈوہدار آک سُم کاری آن گُڈ نرنگ ئٹ سر سہب مسر۔ تدینی نا حوال رسینگ آن گڈ پولیس کارندہ آک کسر ءِ بند کریسہ ڈوہدار آتا پٹ و پول ءِ بناء کریر۔

بست و بند جون تے سول اسپتال آ سر کرے ہراڑے المی کاروائی آن گُڈ جون تے وارث آتا حوالہ کننگا۔

ایلو پارہ غان منگچر ٹی سُم کاری نا اسہ تدینی سیٹی اِرا بندغ خلنگانو، حوال تا رد ئٹ رحم دین ولد شہباز خان بنگلزئی و قادر بخش ولد عبدالفتاح لہڑی سکنہ جوہان منگچر آن جوہان موٹر سائیکل آ ہننگ ئسُر کہ پینزئی ڈیم منگچر نا ہند آ نا درست ءُ سلاء بند بندغ آتا سُم کاری آن مرگ ئنا گواچی مسر۔ جون تے قلات اسپتال آ دننگا، گیشتر پٹ و پول بست و بند کننگ ءِ۔

بلوچستان نا ضلع خضدار ٹی جمعہ نا دے سُم کاری نا اسہ تدینی ئسیٹی اِرا بندغ مرگ نا گواچی مسُر۔

شابیت حوال آتا رِد ئٹ نادرست سلاء بند بندغ آتا سُم کاری آن عبدالکریم چنال، چاکر خان نا مار و رسول بخش، عبدالکریم نا مار جاگہ غا مرگ نا گواچی مسُر۔

تدینی باغبانہ لونڈو کراس نا ہند آ مس۔ کہسفنگوکا ہڑتوماک باوہ مار ءُ ہرا موٹرسائیکل آ ئسُر۔ اوفتا تعلقداری ضلع سوراب آرچونو آن پاننگسہ ءِ۔ عبدالکریم لیویز فورس نا کارندہ ئس ءِ۔

ہندی بست و بند جون آتے المّی کاروائی کننگ آن گُڈ خاہوت ءِ تس و گیشتر سر و سوج بنا کننگانے دائسکان نا حوال آتا رِد ئٹ تدینی نا سوب مونا بتنے۔

جاپان نا مسکوہی وزیراعظم شنزو ایبے اسپتال ئٹی ٹپ آتیان نگیگ مریسہ دم تس۔

جاپان نا چیف کیبنٹ سیکرٹری ہیروکازو ماٹسونو نا رد ئٹ مسکوہی وزیر اعظم آ نارا شار ئٹی جمعہ نا دے یانزدہ نیم نا وختا سُم کاریکننگا۔ اوڑا اِرا وار سُم خلنگ مس، اِرٹمیکو سُم ئنا لگنگ آن پد شنزو آبے ڈغار آ تما۔

یاتی مرے کہ شنزو آبے جاپان نا کُل آن گیشتر وخت اسکان رہینگوکا وزیر اعظم ءِ ہرا 2006 ئٹی اسہ سال اسکان وزیر اعظم رہینگا وپدا 2012 آن 2020 اسکان ہشت سال نا وخت اسکان وزیر اعظم رہینگا۔ شنزو آبے پدان تینا طب ئنا خرابی نا سوب آن استعفی تس۔

ہندی حوال تا رد ئٹ اولیکو سُم بھازی آن شنزو آبے ءِ لگتوسس ولے ارٹمیکو سُم اونا پُٹھی آ لگاسس ہراڑان گڈ او ڈغار آ تماسس۔

سکیورٹی دمدستی جلہو کار ءِ دزگیر کریسس ہرا نرنگ نا ہچ کوشست ہم کتوسس۔

اندن پاننگک کہ ہرا سلاء ئٹ جلہو کار مسکوہی جاپانی وزیر اعظم آ سُم کاری کریسس او اُرا ٹی جوڑ کننگاسس۔ پولیس نا رد ئٹ سُمشنذو ایبے نا لخ ئٹی لکاسس ہرا اودے کسفے۔

جاپان نا مسکوہی وزیر اعظم شنزو آبے نا استعفیٰ آن گڈ اونا خُڑک ئنا سیوتی یوشیڈے سوگا وزیر اعظم مسس ہرا نا جاگہ ءِ گڈ سر ئٹفومیو کشیڈا ہلکسس۔