بلوچستان نا ضلع پنجگور ٹی پِر مننگ نا سوب آن دیوال نا تمنگ آن چار چُنا بیران مسُر۔

شابیت حوال آتا ردئٹ پنجگور نا علاقہ سوردو حاجی غازی ٹی پِر کننگ نا سوب اُرا نا کچا دیوال نا تمنگ آن اسہ اُرا نا چار چُنا کذیت کریر۔

اُرائی حوال تا ردئٹ چُناک چار دیوالی نا مونا گوازی کننگ ئسُر کہ ناگمان دیوال تما و زمین ٹی بُھس مس، دیوال نا تمنگ آن پنچ سال ئنا طلال، ہفت سال ئنا عدیدہ ولد مجاہد ، اِرا سال ئنا نعمان، چار سال ئنا شاہد ہمو وخت آ بیران مسُر۔

چُنا تا جون آتے دیوال نا مِش تیان کشیسہ اُرا غا دریر۔ تدینی آن گُڈ اُرا ٹی افسوز کننگا، ہندی بندغ آک بھلو کچ ئسیٹی اوار مریسہ دمدستی کمک کن کاریم تیئٹ بشخ ہلکر۔

یاتی مرے کہ پنجگور ٹی تدوکا مُسہ دے آن طوفانی پِر پنجگور و اونا ایب کیب ٹی تباہی بش کرے، سد آ اُراک و دیوال آک بھس مسُنو۔

 علاقائی بندغ آتا پاننگ ءِ کہ دائسکان حکومت نا پارہ غان اسہ ہم دمدستی کمک کن کاریم ئس مونا بتنے۔

تمبو نا علاقہ ڈولاونگا ٹی مننگ کروک وڑ ئٹ زالبول وتکشی کرینے۔

گیشتر حوال تا رد ئٹ سب تحصیل تمبو نا علاقہ ڈولاونگا ٹی علی حیدر پنی ءُ بندغ اس بست و بند کوالخوا ءِ حوال تسونے کہ اونا زائیفہ گٹ ئٹی چٹ اس شاغیسہ وتکشی کرینے –

لیویز ٹیم ویل ئنا ہند آ سر مریسہ حوال تروک زالبول نا پاننگ آ  کہوک آ زالبول نا ارغ علی حیدر ءِ دزگیر کرے و زالبول نا جون ءِ پوسٹ مارٹم کن  ہسپتال آ سر کرے۔

مننگ کروک وڑ ئٹ وتکشی کروک زالبول نا ارغ  پولیس ءِ پارے کہ او پین برام اس کرے اونا زائیفہ اوڑان خوش الو اندا سوب آن تینے کسفے ایلو پارہ غان زالبول نا خاہوت  تہمت خلیسہ  لیویز ءِ پارے کہ زالبول وتکشی کتنے اونا خون کننگانے-

کوہلو اسپتال بست و بند نا پاننگ ءِ   پوسٹ مارٹم رپورٹ نا رد ئٹ زالبول نا لخ ئٹی چٹ ئنا رند آک پاش خننگیرا  داسکان زالبول نا خاہوت نا پاننگ آ  پولیس پین سر و سوج کننگ ءِ-

یاتی مرے کہ بلوچستان ٹی اُرائی جنگ و  غیرت نا پن آ زالبول تا خون ئنا ویل آک رپورٹ مریسہ کرینو  اندن امو ویل آتیٹ اوار بندغ آتیان بھاز کم کچ اسیٹ قانود نا مونا اتینگانو۔

حساب نا رد ئٹ  پاکستان ٹی ہر سال اسہ ہزار آن زیات زالبول نا خون مریک ہرافتیٹ بھازی غیرت نا پن آ  کسفینگانو-

کراچی پریس کلب نا مونا جتا وخت آ تیٹ کراچی آن بیگواہ مروکا بندغ آتا خاہوت آتا برانز اینو نوہمیکو دے ہم برجاء مس، ہرا ٹی چُنا نیاڑیک ہم اوار مسر۔

اینو برانز ئٹی کراچی آن بیگواہ مروک شعیب بلوچ نا خاہوت ہم اوار مریسہ پارے کہ خوانندہ شعیب احمد ولد اعظم خان ءِ سندھ پولیس و  فورسز آک دزگیر کریسہ بیگواہ کرینو۔ شعیب احمد نا تعلقداری ضلع خضدار نا علاقہ نال آن ءِ۔ او کراچی یونیورسٹی ٹی داخلہ ہلنگ نا اومیت وار ئس۔

دا وختا بلوچ یکجہتی کمیٹی کراچی نا آرگنائزر آمنہ بلوچ نا پاننگ ئس کہ اندن گمان مریک کہ سندھ حکومت بیگواہ غا بندغ آتا آجوئی نا بابت ئٹ مروکا مذاکرات ءِ سوبری ئٹ ہُپک۔

اونا پاننگ ئس کہ اِرا دے گدرینگ آن پد ہم اسہ بیگواہ ءُ بندغ اس ہم آجو متنے حالانکہ مذاکرات نا بناء ءِ ہم تینٹ سندھ حکومت سندھ پولیس نا کوالخواہ تا ذریعہ ئٹ کریسس ہرادے نن ہم بخیرٹ پارین انتئے کہ نن جمہوری بندغ اُن و ہیت و گپ آ یخین تخینہ۔

 اونا پاننگ ئس کہ دا ہیت ساف مسنے کہ زرداری حکومت جمہوریت نا نعرہ تو خلیک ولے اودا عمل کپک اگہ مذاکرات اسہ چم اس ئس تو نن دا چم ئتون سیاسی حکمت عملی ئٹ مون ایتون۔

آمنہ بلوچ نا پاننگ ئس کہ خاہوت آتے بےوس کننگپ کہ او دوارہ سندھ اسمبلی یا وزیراعلیٰ ہاوس نا مونا تولوک برانز کیر، ننا پرامن تحریک ءِ ننا نزوری سرپند مفس۔

اینو برانزی کیمپ ئٹ کراچی نا علاقہ گلستان جوہر آن بیگواہ مروک عبدالحمید زہری، کراچی نا علاقہ ملیر آن سعید احمد ولد محمد عمر، ماری پور آن بیگواہ مروک محمد عمران، لیاری آن بیگواہ مروک شوکت بلوچ، کراچی نا علاقہ گلستان جوہر آن بیگواہ مروک شعیب احمد و رئیس گوٹھ کراچی آن بیگواہ مروک نوربخش ولد حبیب نا خاہوت آک ہم اوار ئسر۔

ایلو نیمہ غان وائس فار بلوچ مِسنگ پرسنز نا بین برانز کیمپ اینو 4691 می دے ہم برجاء مس۔ اینو اواری نا درشانی کننگ کن سول سوسائٹی آن نرینہ و زالبول آک اوار مسر۔

دا وختا وی بی ایم پی نا کمک کماش ماما قدیر بلوچ نا پاننگ ئس کہ بیست سال آن بلوچستان ئٹی زوراکی نا بیگواہیک برجاء ءُ و اوفتا آجوئی کن بلوچ لمّہ و ایڑ تا دا پرامن جہد ہمے وخت آن برجاء ءِ۔

فوجی حکومت آتا وختا ہزار آ بلوچ ورنا تے زوراکی ئٹ بیگواہ کننگانے، 2001 آن 2022 اسکان پنجاہ و پنچ ہزار نا کچ بندغ بلوچستان آن زوراکی ئٹ بیگواہ کننگانو۔

سیو اسٹوڈنٹس فیوچر نا کنڈ آن خضدار ئٹی ڈاکٹر مبارک علی نا “تاریخ اور سیاست” پنی کتاب آ جاچی و تبصراتی اسٹڈی سرکل اڈ تننگا۔

اسٹڈی سرکل تنظیم نا ایجوکیشنل سیکریٹری سلیم بلوچ و ایلو زمہ وار آتا ساڑی گری ٹی اڈ تننگا ہرا ٹی تران کروک نعمان بلوچ ئس۔

پن کروک کتاب نا بابت تران کریسہ نعمان بلوچ نا پاننگ ئس کہ اسہ کتاب ئسے خواننگ آن مُست اونا نوشتکار نا بابت ئٹ چاہنداری المی ءِ انتئے کہ نوشتکار غیر جانبداری یا گواچنی نا جانبداری نا درشانی کپک۔

 پن کروک کتاب نا توشتکار بھاز کتاب جتا سرحال آ تیا لکھانے ہرافتے خواننگ آن خوانوکا ءِ دا سما تمک کہ او غیر جانبدار و گواچنی تے بیان کیک، ڈاکٹر مبارک علی اسہ محقق و تاریخ نوشتوک ئسے ہرا تاریخ نا جتا سرحال آ تیا کتاب لکھانے۔

دا کتاب اسہ مستند کتاب ئسے ہرا تدوک وخت ئنا درغ آ تیان سیاست و چاگڑد نا ہمو پاسو تے نظر ئٹ تخیسہ لکھنگانے ہرافتے الس ءِ اقتدار پسند طاغت آک ساندہ سیاسی حوالہ ئٹ یا تو تاریخ ءِ پرغیسہ و تاب تریسہ یا تو تاریخ ءِ محدود کریسہ و گواچنی تے ڈھکیسہ الس ءِ چادی جوڑ کننگ نا کوشست کرینو۔

اونا پاننگ ئس کہ تدوک وخت ئٹی ئٹی دا نا مثیال دادے کہ گیشتری ریاست و ایلو جاگہ غا تا تاریخ ءِ بے چاننگی نا سوب آن تینے طاغت دار پوہ مریسہ نرگسیت نا گواچی مریسہ تاریخی عمل نا بشخ جوڑ مننگ کیر۔

ہنوکا وخت ئٹی بادشاہی بست و بند و اینو نا وخت ئٹی جمہوریت نا چادر ئٹی ڈھکوک اقتدار نا بین ئنا خلوک تینا اُست خواہ تاریخ لکھیسہ یا لکھفیسہ تاریخی عمل ئٹی جانبداری کننگ خواہرہ ولے جہان کیہی وار دا ہیت ءِ عملی وڑ ئٹ چکاسانے کہ تاریخی عمل ہچبر ہم جانبدار مننگ کپک چائے فطرت آن چپ دا عمل ءِ کتابی پنّو آ تیٹ اخس کہ جانبدار پاش کیر۔

بیرہ پن ئنا تاریخ توشتوک آک تاریخ ءِ تینا خواجہ غا تا مسخت نا ایسری ٹی کارمرز کریسہ خار و تعصب ءِ مونی دننگ نا کاریم کرینو، خواننگ جاہ تیٹ زہن سازی کن سرمایہ دار و اقتدار پسند طاغت آک بیرہ ہمو مواد نا کمک ہلیرہ ہرا ساڑی سیاسی خواست آتا بشخ ءِ، یورپی قوم آک محکوم قوم آتے مغربی تہذیب ئٹی اوار شاغیسہ اوفتا یکئی آ کاری ضرب خلیسہ وفتا تہزیبی چاہنداری ءِ ایسر کریسہ اوفتا تاریخ ءِ لتاڑا۔ سامراج جہان ئٹی اینو ہم جتا وڑ ئٹ ئٹ پد تموک قوم آتا تاریخ ءِ لتاڑنگ نا عمل ءِ برجاء تخانے۔

دا خطہ ٹی تاریخ لکھوکا تا کنڈ آن تاریخ ئٹی وڑنگ و بے وڑنگ و مذہبی عقیدہ آتے کارمرز کریسہ تاریخ ءِ لتاڑنگ نا اندازہ نن اندا ہیت آن ارزانی ئٹ خلنگ کینہ کہ امر داڑے تاریخ ءِ محمد بن قاسم آن پد ئنا دور ئٹ لکھیسہ مُست ئنا دور آتیان خن تے ہڑسیرہ، یا مغلیہ دور ئٹی تاریخ ءِ اشوک و اکبری دور ئٹی ونڈ کیرہ، اسلامی تاریخ ئٹی تاریخ ءِ دور جاہلیت و ایلو دور آ تیٹ ونڈ کننگ نا سوب آن دور جاہلیت نا تصور مسلمان چاگڑد نا تاریخی شعور ءِ باز نسخان تسنے۔ دا گمان ءِ بنیات جوڑ کریسہ تدوکا عہد نا مطالعہ ءِ بیکار پاننگا و دا دور ئنا علمی کارنامہ آتے کافر آتا ودی کروک پاننگا۔

ودیک اونا پاننگ ئس کہ توشتکار نا پاننگ نا رد ئٹ ننا تاریخ نوآبادیاتی دور آن باز زیمی مسنے مُچا تاریخ ءِ مذہبی نقطہ نظر نا رد ئٹ بیان کننگانے، پوسکنا تاریخ ءِ دا وڑ ئٹ ترتیب ایتنگ مرے کہ چاگڑد ئٹی فرقہ واریت و تنگ نظری نا مارشت آک کھٹیر۔

پن کروک کتاب نا خواننگ آن دا ہیت پاش مریک کہ حکمران آک تینا تاریخ نویس آتا کمک ئٹ تاریخ ءِ ساندہ لتاڑنگ نا کوشست آ تیا زور تسنو، تاریخ ءِ اندن نشان تننگانے اندن کہ تاریخ شخصیت آتا ملکیت ءِ، مصنف دا ردی تا وضاحت دا لوز آ تیٹ کیک، ” تاریخی عمل ہرا وخت مونی کائک تو او اسہ خاص شخصیت ئسے نا محتاج مفک انتئے کہ حالیت آتا زور داخس در ترند مریک کہ اسہ کاریم اس المی ایسر مریک۔ ہرا وخت یورپ نا چاگڑد ئٹی پانزدمی صدی آن در و بدل بناء مس تو او حالیت ئٹی او تجارت کن دریابی کسر تا پٹ و پول کریر و اندا خواست ئنا رد ئٹ واسکوڈی گاما و کولمبس پوسکنو کسر و ڈیھ تے دریافت کریر۔ ولے اگہ دا متورہ ہم دا کسر تا دریافت المی مسکہ انتئے دا حالیت و وخت ئنا خواست ئس۔ و ہراڑے حالیت آک اوفتے ودی کریر ہموڑے دا پین کس ءِ ہم ودی کننگ کریرہ۔”

اونا پاننگ ئس کہ بلوچ تاریخ ہم اندا زوراکی نا گواچی مسنے۔ ڈنی تاریخ توشتوک آک تینا اُست خواہ تاریخ لکھسہ و تاریخی گواچنی تے پرغیسہ و تاب تریسہ بلوچ قوم ءِ لسانی کنفیوژن، نصب العین وغیرہ ٹی سرگیچ کرینو، بلوچ تاریخ توشتوک آک اسہ ہد اسکان تو تاریخی گواچنی تیا سائنسی و تحقیقی کاریم ساڑی ارے ولے وا ہم باز انگا گمان آک داسکان ساڑے ءُ ہراڑ کن ورنا تپہ خاص وڑ ئٹ خوانندہ تپہ ءِ تاریخ آ سائنسی بنیات آ تیا پٹ و پول کریسہ دا گمان آتے مُر کننگ نا بکار ءِ۔

اسٹڈی سرکل نا گڈ سر ئٹی اوار مروکا ہم سرحال نا بابت ئٹ تینا مثبت خیال آتا درشانی کریر و اوار مروکا تا سوج آتا شابیتی ورندی تننگا۔

پاکستانی لشکر حمزہ ولد شکاری پنی ءُ کماش اس دزگیر کریسہ بے ڈس ءُ جاگہ سے آ درینے۔ کماش لیس، بولان نا ہندی اس پاننگک۔

حوالکار آتا رد ئٹ پن کروک بندغ ءِ تدوکا دے مچھ ڈگاری کراس آن پاکستانی لشکر مسافری اُلاخ ئسے آن ہمو وختا دھڑفیسہ دزگیر کرے ہرا وختا او کوئٹہ آ ہننگ ئس۔

بلوچستان ئٹی زوراکی نا بیگواہی تا لڑ برجاء ءِ ہرا نا برخلاف زیمی مروک خاہوت آک برانز کریسٹ ءُ۔

اندا زوراکی نا بیگواہی تا برخلاف بیگواہ غا بندغ آتا خاہوت آک بنجائی کسر ڈی بلوچ آ تولوک برانز کننگ ءُ۔

شابیتی حوال تا رد ئٹ بلوچستان نا ضلع کیچ ئنا علاقہ تربت نا ہند آ بیگواہ خوانندہ آتا خاہوت آتا کنڈ آن ڈی بلوچ آ تولوک برانز برجاء ءِ و روڈ ءِ برانز کریسہ تیوہ بند کننگانے۔

برانز ئٹ بیگواہ غا بندغ آتا خاہوت آک، سول سوسائٹی، سیاسی و چاگڑدی تنظمیم آتا باسک آک اوار ءُ۔

تربت ڈی بلوچ روڈ آ تولوک برانز نا سوب آن ہڑتوما نیمہ غان اُلاخ آتا ہن و بر بند ءِ و اُلاخ آتا مرغن کشک لگوک ءِ۔

برانز کروکا تا رد ئٹ پاکستانی لشکر خوانندہ نعیم ولد رحمت بلوچ و شفیق ولد دلدار ءِ برجاء سال 17 مارچ آ دزگیر کریسہ نادرست ءُ جاگہ سے آ درینے و دا وخت ئٹی تربت تون اوار ایب کیب آن درزن آتا کچ بندغ آک زوراکی نا بیگواہی تا گواچی مسنو ہرا پاش کننگتنو۔

برانز کروکا تا رد ئٹ علاقہ ٹی زوراکی نا بیگواہی تا لڑ برجاء ءِ، داکان مُست بیگواہ مروکا ورنا تا رکھوک آجوئی کن ہندی بندغ آک برانز کریر تو بست و بند اوڑدئی کریسہ منَہ دے نا مہلت ہلک ولے مہلت نا وخت گدرینگ آن بیدس ورنا تا آجوئی کن ہچ گام ارفنگتو ہرا نا برخلاف اینو دوارہ نن برانز کننگ آ بیوس اُن۔

اوفتا پاننگ ئس کہ ننے تینا بندغ آتا زدن ئنا بابت ئٹ خلیس ارے، برانز آن بیدس ننتو پین ہچ کسر اف ننا بندغ اتے بیدس ڈوہ آن بیگواہکریسہ بندی کننگانے ہرا وخت نن انصاف کن بست و بند آ ہنان تو تسلی تننگا کہ تینا برانز ءِ ایسر کبو ولے دا مرغن آ انتظار آن پد ہم ننا بندغ آتے پاش کننگتو و اندا سوب آن نن دوارہ برانز کننگ آ بیوس اُن۔

بست و بند ءِ جبڑدار کریسہ اوفتا پاننگ ئس کہ او دا وار خاہوت آتے ریفنگ ءُ برانز ءِ ایسر کننگ نا کوشست کریر تو سخت برانز نا دروشم ئٹ ردعمل مونا برو۔

یاتی مرے کہ ڈی بلوچ کسر تربت تون اوار ضلع کیچ ءِ گوادر تون اوار سندھ و ایلو علاقہ آ تتون اوڑدہ کروکا کسر ءِ۔ دا کسر نا بند مننگ آن ضلع کیچ ئنا کیہی علاقہ آ تتون زمینی رابطہ بند مریک۔

ایلو نیمہ غان کوئٹہ ٹی وی بی ایم پی نا بین برانز کیمپ اینو ہم برجاء مس۔ اندن کراچی ٹی علامتی بین برانزی کیمپ بیگواہ غا بندغ آتا خاہوت و بلوچ یکجہتی کمیٹی نا کنڈ آن تدوکا چار دے آن برجاء ءِ، برانزی کیمپ ئٹی بیگوا عبدالحمید زہری نا زائیفہ و مسِنک، بیگواہ سعید عمر نا لمّہ، لاپتہ عمران بلوچ نا لمّہ و ڈاکٹر دین محمد نا مسڑ سمی دین تون اوار ایلو بیگواہ غا بندغ اتا خاہوت آک اوار ئسر۔