بلوچستان نا ضلع نوشکی ٹی پیرا ملٹری فورس ایف سی سُم کاری کریسہ اسہ بندغ ئسے بیران و اِرٹ ءِ دزگیر کریسہ بے ڈس ءُ جاگہ سے آ درینے۔

سُم کاری آن بیران مروکا بندغ نا چاہنداری نور اللہ ولد خالق داد سکنہ چمن نا پنا مسنے ہرا نا خاہوت نا پاننگ ءِ کہ پن کروک بندغ آک اوغانستان آن پاکستان آ مڈی ہتنگ ئسر کہ فورسز آک سُم کاری کریسہ اسٹ ءِ بیران و اِرا بندغ دزگیر کریر۔

خاہوت آتا رد ئٹ درو ننکان بیران مروکا بندغ نا جون ءِ کوئٹہ ٹی اونا خاہوت نا حوالہ کننگانے، ولے کوالخواک دا بابت ئٹ داسکان ہچو ہیت کتنو۔

یاتی مرے کہ بلوچستان ئٹی بندغ آتا اسہ بھلو کچ اس اوغانستان و ایران نا سیم آ کاروبار کیرہ۔

تدوکا دے تیٹ چاغی نا علاقہ دالبندین ئٹی ایف سی کارندہ آک اسہ اُلاخ ئسے آ سُم کاری کریسہ زالبول ئسے ٹپی کریر۔

تدینی آن گڈ مخلوق برانز کریسہ فورسز آتا برخلاف نعرہ خلکر و ایف سی نا اسہ اُلاخ ئسے خاخر تسر۔ ہمو وختا برانز کروکا بےدادی کریسہ اسہ ایف سی کارندہ سے ہم کسفیر۔

بلوچستان نا دریابی شار گوادر آن پاکستانی لشکر ورنا خوانندہ تون اوار اِرا بندغ ءِ دزگیر کریسہ بے ڈس ءُ جاگہ سے آ درینے۔

بیگواہ مروکا ورنا تا چاہنداری خلیل ولد جلیل و جیئند ولد خلیل، دشت جان محمد بازار نا ہندی تا پنا مسنے۔

بیگواہ مروکا تیٹ 17 سالی خلیل تربت یونیورسٹی ٹی بلوچی لٹریچرل نا خوانندہ ئسے و 18 سالی جیئند سیم آ ڈیزل نا کاروبار تون تفوک ءِ ہرافتے فورسز آک گوادر نا علاقہ گٹھی ڈور آن 23 جون آ دزگیر کریسہ بیگواہ و کرینو۔

حوال تا رد ئٹ پن کروک بندغ آتے دزگیر کننگ نا وختا فورسز آتا بھلو کچ ئسے آن بیدس سادہ پُچ بینوکو بندغ و پولیس کارندہ ہم تُد ئس۔

بیگواہ مروکا ورنا تا بابت ئٹ بلوچ نیشنل موومٹ نا ہیومن رائٹس ڈپارٹمنٹ پانک چاگڑدی حوالکاری ویب سائیٹ ٹویٹر آ اسہ بیان ئسے ٹی پارے کہ ہڑتوما بندغ آتے فورسز آک پاکستانی وزیر اعظم شہباز شریف نا گوادر نا دورہ نا وختا دزگیر کننگ آن گڈ بے ڈس ءُ جاگہ سے آ درینو۔

یاتی مرے کہ گوادر ئٹی پاکستانی وزیر اعظم شہباز شریف نا دورہ نا وختا بندغ آتا بھلو کچ اس روڈ آ تیا برانز کریسس ہرافتیٹی زالبول ہم بھلو کچ ئسے ٹی اوار ئس۔

ایلو نیمہ غان وائس فار بلوچ مِسنگ پرسنز نا بین برانزی کیمپ ءِ اینو 4684 دے پورو مس۔

کیمپ آ بریسہ اواری نا درشانی کروکا تتون تران کریسہ ماما قدیر بلوچ نا پاننگ ئس کہ بیگواہ غا بندغ آتا خاہوت آتا توار مہذب جہان و امریکی ایوان تسکان سر مسنے۔

اونا پاننگ ئس کہ پاکستانی ریاست و ہندی اڈ تروک پارٹی تا موہکش آتا بے آرامی ٹی ودکی مسنے و او اندا پارہ کہ نن پارلیمنٹ ئٹی تینا حق آتے دوئی کرون ولے ورناک اوفتا ہیت ءِ ہلنگ کن تیار افس۔ بلوچ ورناک ہر سختی تون مون تننگ کن تیار ءُ و پر امن جہد آن دوکشنگ نا جاگہ غا تینا موقف آ اینو ہم سلوک ءُ۔

ماما قدیر نا پاننگ ئس کہ 2001 آن ہلیس داسکان 60000 نا کچ بلوچ زالبول، چنا، پیر و ورنا زوراکی نا بیگواہی تا گواچی مسنو و داسکان زوراکی ئٹ بیگواہ مروک بلوچ آتا 20000 آن گیش جشوک جون ہم خننگانے، اوفتیان کہی بندغ ءِ ٹارگٹ کریسہ شہید کننگ آن گڈ جالی مقابلہ پاننگانے۔

بلوچستان ئٹی بندغی حق آتا لتاڑ ئٹی ہر بروکا دے ترندی ئٹ ودکی مننگ ءِ۔ زوراکی نا بیگواہی و جشوک جون تا تدینی تیٹ کمبوتی نا جاگہ غا ودکی مننگ ءِ۔ بیگواہ غا بلوچ آتا خاہوت آتے سخت وڑ ئنا تڑی ہم تننگ ئٹی ءُ۔ سیکورٹی فورسز و ڈھکوک ادارہ آک ہچو قانود و ریاستی راہبند نا پابند افس۔

حق دو تحریک نا سروک مولانا ہدایت الرحمان دعویٰ کرینے کہ گوادر نا جاگہی، بیگواہ جنید ولد اللہ بخش ءِ پاکستانی فورس آک دزگیری ٹی کسفینو و جون ءِ ہم اونا خاہوت نا حوالہ کتنو۔

بلوچستان نا دریابی شار گوادر نا ہندی جُنید بلوچ ولد اللہ بخش ءِ 12 اکتوبر 2012 آ اوتھل زیرو پوائنٹ آن زوراکی ئٹ بیگواہی نا گواچی کننگاسس۔

مولانا ہدایت الرحمان دا ہیت ءِ پاکستانی وزیراعظم شہباز شریف نا اینو نا دورہ گوادر نا وختا اونا کسر آ اڈ تروک تولوک برانز ئٹی میڈیا باسک آ تتون تران کریسہ پارے و اونا پاننگ ئس کہ ننے دا ہیت اوفتا تہہ ئنا بندغ آ تیان خبر تمانے۔

خیال مرے کہ پاکستانی وزیر اعظم شہباز شریف اینو گوادر نا دورہ آ بسونے و گوادر نا بندغ آک تینا خواست آتا حق ئٹی اونا کسر آ تولوک برانز کننگ ءُ۔

بلوچستان نا دریابی شار گوادر ئٹی حق دو تحریک نا سروک مولانا ہدایت الرحمان بلوچ و حسین واڈیلہ ہندی مچھی ہلوک آتتون اوار تدوکا دے پاکستانی وزیر اعظم شہباز شریف نا دورہ گوادر نا وختا برانز کننگ نا پڑو کریسہ پاریر کہ گوادر پورٹ نا مونا وزیر اعظم نا برانزی بخیرٹ مرو، اوفتا پاننگ ئس کہ ہزار آ لمّہ آتا جغر نا ٹکر آک بیگواہ ءُ مخلوق نہاد تا ودکی آن فریشان ءِ، سیمی کاروبار آک بند کننگانو و سیکورٹی فورس آتا روشت ہچ بدل متنے۔

تدوکا دے مولانا ہدایت الرحمان پاریسس کہ گوادر، مکران و بلوچستان نا ویل آتے اسہ وڑ نظرانداز کننگ و بیگواہ آ بندغ آتا آجو مفنگگ آ حق دو تحریک وزیراعظم میاں شہبازشریف نا دورہ گوادر نا وختا جون ئنا 24 تاریخ، جمعہ نا دے سہب ئنا 11 بجہ غا پورٹ روڈ آ برانز کرو، وزیراعظم نا برانزی بخیرٹ کننگو و او گوادر نا غٹ مخلوق ءِ اوار مننگ نا صلاح ہم خلکر۔

اوفتا پاننگ ئس کہ بنجائی و صوبائی حکومت نا کنڈ آن بلوچستان اسہ وڑ نظرانداز مننگ ئٹی ءِ۔ گوادر و مکران نا ویل آک ایسر مننگ افس۔ بڑز ئنا کوالخواک تینا دورہ غا تیٹ بیرہ خاص تپہ آ تتون اوڑدئی کیرہ، اندہ سوب آن الس ئنا جائز بنماسی ویل آ تیا اوفتا خنک تر ءُ۔ حاشیہ بردار آتے خوش تخنگ نا پالیسی داسا اوفتے کاریم تفرو۔

ایلو نیمہ غان وائس فار بلوچ مسنگ پرسنز نا بین برانز کیمپ اینو 4682 می دے ہم برجاء مس۔

دا وختا وی بی ایم پی نا کمک کماش ماما قدیر بلوچ نا پاننگ ئس کہ بلوچ نا ڈیھ عظیم ءُ جہد ئسے کن تینا ساہ تے ندر کننگ ءُ۔ بلوچستان نا ہزار آ شہید آک اسہ عظیم ءُ مسخت ئسے کن رخصت مسنو و تینا زند آتے دا اومیت و ارمان ئٹ ندر کرینو کہ اوفتا شہادت اوفتا عظیم مسخت ءِ پورو کرو۔ بروکا زنک ءِ اوفتا قربانی تے نظر ئٹ تخیسہ اوفتا کسر آ پند خلیسہ اوفتا کاریم ءِ مونی دروئی ءِ۔

او ودیک پارے کہ اینو ہم ہزار آ بلوچ فرزند آک زندان تیٹ بند ءُ و سما اف ہراڑے و انت حالیت ٹی ءُ۔ اوفتا لمّہ آک اوفتا مُری آن سخت فریشانی آن گدرینگ ءُ، دا نا اندازہ ہمو لمّہ غا تے ارے ہرافتا چُناک کیہی سال تیان بیگواہ ءُ۔

حوال تا رد ئٹ بلوچستان نا ضلع خضدار ئٹی درو ننکان نادرست ءُ بندغ ہندی سڑدار نا اُرا آ جلہو کرینو۔

جلہو خضدار نا علاقہ زہری چشمہ نا ہند آ مسونے۔ ہندی حوال تا رد ئٹ درو ننکان 40 :1 منٹ آ زہری چشمہ ثمری ٹی نادرست ءُ سلاء بند بندغ حاصل خان جتک نا اُرا نا چارمہ کنڈ آ جلہو کریسہ سُم کاری کرینو۔

حوال تا رد ئٹ اسہ گھنٹہ اسکان ہڑتوما کُنڈ آن سُم کاری برجاء مسوسس، اندن دا نیام ئٹ راکٹ آتے ہم آزاتی ئٹ کاریم ئٹ ہتنگاسس۔

تدینی ٹی ہچ وڑ ئنا جانی نسخان نا حوال رسینگتنے ولے حاصل خان جتک نا اُرا ءِ نسخان مسونے و تدینی نا سوب داسکان سما اف۔

بلوچستان نا بنجائی شار کوئٹہ ٹی وائس فار بلوچ مسنگ پرسنز نا کنڈ آن زوراکی نا بیگواہی و بیگواہ غا بندغ آتا آجو مفننگ نا برخلاف برانزی کیمپ ءِ 4679 دے پورو مس۔

اندن بلوچستان آن جتا وخت آ تیٹ زوراکی نا بیگواہی تا گواچی مروک ہشت بندغ پاش کننگانو ہرافتیان چار بندغ نوشکی سی ٹی ڈی نا دزگیری ٹی ءُ و چار بندغ آجو مریسہ تینا اُرا تیا سر مسنو۔

کوئٹہ ٹی زوراکی نا بیگواہی تا برخلاف وی بی ایم پی نا کیمپ ئٹی تنظیم نا کمک کماش ماما قدیر بلوچ تون بیگواہ راشد حسین نا لمّہ و ایلو بیگواہ غا بندغ آتا خاہوت آک اوار ئسر۔

دا وختا خاہوت آ تتون بی ایس او، بی ایس او پجار و ایلو سیاسی و چاگڑدی باسک آک اواری نا درشانی کریر۔

ماما قدیر بلوچ نا پاننگ ئس کہ بلوچستان تون اوار کراچی ٹی تدوکا اسہ اِرا تو ئٹی بلوچ آتا زوراکی نا بیگواہی تیٹ باز ترندی بسنے۔

اونا پاننگ ئس کہ پاکستانی ریاست جہانی بندغی حق آتا قانود آتا لتاڑ کننگ ءِ، ولے اوفتے سوج کروکو کس اف، بندغی حق آتا تنظیم آتا دعویٰ و بیان آک بس لوز آ تسکان رہینگانو، بلوچستان بندغی حق آتا بابت ئٹ بلیک ہول جوڑ مریسٹ ءِ، نیشنل و انٹرنیشنل میڈیا بلیک آؤٹ ءِ، غٹ خن تے تر تخانو۔

بندغی حق آتا ادارہ آتا کنڈ آن کیہی نوٹس ہلنگ و اعلامیہ شینک مننگ آن بیدس ہم بندغی حق آتا سخت لتاڑ ئٹی ہچو کمبوتی متنے نئے دافتیا عمل مننگ ئٹی ءِ۔

اونا پاننگ ئس کہ نن غٹ بیگواہ غا بندغ آتا خاہوت آ تیان خواست کینہ کہ او تینا بندغ آتا آجوئی کن تینٹ بریر برانز ریکارڈ کرفر۔

ایلو نیمہ غان نوشکی ٹی سی ٹی ڈی نا حوالہ مروکا بندغ آ تیٹ پیرجان ولد سردو سکنہ ایرو، پسند علی ولد چار شمبے سکنہ کساک بلیدہ، عبدالصمد ولد رحیم بخش سکنہ ایریکان، پھلان حان ولد خدا بخش اوار ءُ۔ ولے پولیس نا کنڈ آن دا بندغ آتیا لگوکا کیس آتا ہچو شابیت حوال مونا بتنے۔

اندن پنجگور آن بیگواہ مروک اِرا حقی ءُ ایلم ارشاد و شرافت ولد محمد عوض آجو مریسہ اُراغا سر مسنو۔

اندا وڑ برجاء سال تربت آن بیگواہ مروکا خوانندہ حفیظ بشیر و ابرار بلوچ تدوکا دے آجو مریسہ تینا اُراغا سر مسنو۔

جنگ یوکرین نا سوب آن روس آ جہانی رکھ آ تیان گڈ روس چین ءِ ارزان نرخ آ تیا غٹ آن زیات خام تیل بہا کروکا ملک جوڑ مسنے۔

تدوکا سال ئنا مقابلہ ٹی دا سال ئنا مئی اسکان چین روس آن 55 درسد زیات خام تیل بہا ئٹ ہلکنے۔ اندن سعودی عرب نا جاگہ غا روس، چین ءِ آئل بہا کروکا غٹ آن بھلا ملک جوڑ مسنے۔

کووِڈ نا رکھ و معیشت ئٹی سست روی نا سوب آن خواست کم مننگ آن بیدس چین روسی تیل ءِ بہا ئٹ ہلنگ ئٹی ودکی کرینے۔ فروری ٹی چین و روس سنگتی نا پڑو کریسر و پاریسر کہ سنگتی نا ہچو سیم اس اف۔

چینی کمپنیک، ہرافتیٹی سائنوپیک و ژینوا آئل ہم اوار ءُ، اندا تو تیٹ گیشتر کچ ئٹ و رعایتی نرخ آ تیا روسی تیل بہا ئٹ ہلکنو انتئے کہ یوکرین آ جلہو نا سوب آن امریکہ و یورپ روس آ رکھ خلکنو۔

چینی جنرل ایڈمنِسٹریشن آف کسٹمز نا ڈیٹا نا رد ئٹ تدوکا تو 8.42 ملین ٹن تیل بہا ئٹ ہلنگ مسنے۔ دا نا مقابلہ ٹی چین سعودی عرب آن 7.82 ملین ٹن تیل ہلکنے۔ اندن سعودی عرب ہرا چین ءِ غٹ آن زیات تیل بہا کریکہ ارٹمی نمبر آ بسنے۔

دے کہی ڈیہہ آک یوکرین آ روسی جلہو نا ورندی معاشی پڑ آ تننگ ءُ۔ مارچ ئٹی امریکہ و برطانیہ پڑو کریسر کہ او روسی تیل آ رکھ خلور، و یورپ نا پاننگ ئس کہ او روسی گیس ئنا کارمرز ءِ کم کننگ کن گام ارفنگ ءِ۔

بی بی سی نا گلوبل ٹریڈ کارسپانڈینٹ، دھارشینی نا پاننگ ءِ کہ بیرہ چین دا وخت آن سواد ارفنگ اف بلکن انڈیا ہم روسی تیل بہا ئٹ ہلنگ ئٹی ودکی کرینے۔

روسی تیل ئنا خواست ئٹی ودکی آن روس ئنا کھٹیائی زیات زیمی متنے ہرا نا خلیس یوکرین آ جلہو آن پد ودی مسوسس۔ ولے اوفتا پاننگ ءِ کہ ’تیل آن مروکا دا کھٹیائی داسا کم مننگ ءِ، و یورپی قوم آتا روسی تیل ئنا جاگہ غا توانائی کن پین وڑ و ڈول ارفنگ آن گڈ داٹی پین ترندی بسنے۔

روسی تیل آ رکھ ئنا بابت ئٹ امریکی صدر جو بائڈن نا پاننگ ئس کہ ’دا گام ئنا مسخت روسی معیشت نا ساہ رغ‘ ءِ ٹک کننگ ئس۔

دو شمبے نا کچ و حساب آن اندا گمان مریک کہ چین تدوکا تو ایران آن ہم 260,000 ٹن تیل بہا ئٹ ہلکنے۔ دسمبر آن پد دا اونا مسٹمی شپمنٹ ئس۔ تہران آ امریکی رکھ آ تیان بیدس چین ایرانی تیل بہا ئٹ ہلیسہ بسنے۔