اومیت
نوشت: درناز رحیم
درگہ نا توار مس۔ لمّہ نماز آن فارغ مننگ آن گڈ نمازی آ تولوک تسبیح آ وظیفہ اس کننگ ئس۔ درگہ نا توار آ چک خلک اُرا آمنہ درگہ نا باہ آ چپل آتے کشنگ ئس۔ لمّہ وظیفہ ءِ ایسر کریسہ بش مس “ بسوس آمنہ، اینو اُرے کریس”
“ جی لمّہ۔۔۔ مچے اُرے تما اینو”۔ توار تہ گیمرینگوک ئس۔ لمّہ چُپ کرے و جٹ اس آمنہ ءِ اُرا۔ دا سال ئسے ٹی لمّہ ءِ دا گیمرینگوک آ توار، پوشکنا مون و مونجھا آ خن تا عادت مسس۔ ولے رد پارہ بندغ آک کہ اسہ گڑا سے نا عادت تمنگ آن اونا تکلیف کم مریک۔ بھلا تکلیف نا ہم کس ءِ عادت مننگ کیک؟
“ چُناک داسکان بتنو لمّہ؟ دا وخت اسکان تون بریرہ ہڑدے۔ و ادی نور بانو ہم خننگپک”۔ آمنہ نا گیمرینگوکا توار داسا فکر و فریشانی نا درشانی کننگ ئس۔
“ ہان، اینو اُرے آ برور چُناک۔ نور بانو ہنانے چُنا تے اسکول آن ہتنگ کن اینو سوب ئنا رکشہ والا بشخنداری کرے کہ اینو آن گڈ بفرو چُنا تیکن۔ داسا ایسکان پین رکشہ سے نا بندو بست مفک ایسکان چُناک پیادہ ہنور و برور۔ اونا ہم ردی اف، ہرا وخت اسکان مسکین ننا چُنا تے مُفت دننگ ہتنگ کریکہ۔ تو ئسے نا کرایہ تتوسن تہ و دا اِرٹمی تو ہم ہنا۔ ای پاریٹ تا منَہ دے ٹی برے تینا پیسہ آتے ہلے اِرا تو ئنا”۔ لمّہ نمازی ءِ الماری آ تخنگ ئس۔ اینو آمنہ نا فریشانی تیٹ اسہ پین فریشانی اس وداسس و داسا دا ہڑدے نا کاریم ئس۔ ہڑدے پوسکنو ویل اس، پوسکنو فریشانی اس۔
“ جی ہئو لمّہ راست ءِ۔۔۔ او ہم مسکین ءُ بندغ ئسے اودے ہم تینا روزی کھٹوئی تمک۔ او ہم تینا اُرا نا آسراتی و چُنا تا پڈ کن خوار ءِ۔ اسہ مسکین و بیوس ئسے آن انت گلہ”۔ آمنہ دمدرینگوکا خن تیٹ پیشن سلوکا اُلاخ ءِ ہُرا۔ اونا خن تا مونا آن اسہ ندارہ اس گدرینگا، ہرا وخت اونا ایلم تینا چُنا تے ہڑدے اندا اُلاخ آ اسکول آ دریکہ۔
“ چُنا تیکن خُڑک ئنا اسکول ئٹی داخلہ ہلین آمنہ۔ دا نا فیس ہم داخس اف و رکشہ والا نا کرایہ ہم تروئی تمپرو”۔ لمّہ خوڑتی ئٹ آمنہ ءِ اوننگ ئس۔ اودے سما ئس کہ آمنہ اخس کوشست کننگ ءِ اُرا نا ذمہ واری تے ارفنگ نا ولے دا غٹ ذمہ واریک اوڑکن پوسکن ءُ۔ او مُست دنو بھلو ذمہ واری ارفتنے، او تو تینا خواننگ آن بیدس پین ہچ گڑا سے آ پامداری تتنے۔ اونا باوہ، و باوہ نا کذیت آن گڈ اونا ایلم اودے ہر آسراتی ءِ تسونو۔ او تینٹ ہم داکان مُست دنیا و دنیاداری آن تینے مُر توریسس۔
“ آخہ لمّہ، پیسہ نا غم ءِ کپہ، ای کیوہ وڑ اس۔ ایہُن ہم ای اندا سوچنگ اسُٹ کہ ہمسایہ تا چُنا تے ٹیوشن خوانِفو۔ اسکول نا چُنا تیان ہم منَٹ اس پارینو کہ ٹیوشن خواننگ کن برینہ۔ اسکول نا تنخواہ آن بیدس ٹیوشن آن ہم مچے پیسہ برو تو گزارہ مرو۔ کنا ایلم نا چُناک اندا سکول ئٹ خوانور۔ اوفتے دنو اسکول ئسے ٹی خواننگ نا بکار اف ہراڑے اوفتا ہچو آخبت اس اف”۔ بیدس جزباتیت آمنہ تینا ہیت ءِ کرے
” پگہ پیشی ءِ ” لمّہ تولیسہ آڑسندہ اس کشا۔
” ہئو۔۔۔ ” جہان نا غٹ تکلیف آتے اُست ئٹ سگیسہ آمنہ بس انداخس پاننگ کرے۔ اودے گمان مس کہ کسس اونا اُست ءِ پلࣿا۔
” ہرا وخت اسکان دُن خوار کروس تینے آمنہ۔ بس کر داسا۔ اللہ ارے نن کن او تینٹ رحم کرو ننے آ، حیات ءِ ظالم تا دو آن کشو، اودے آجو کرو۔ مُسہ سال گدرینگار دا پیشی، برانز و کوکار آ تیان ہچ اس دو بتو داسا الے دا غٹ جیڑہ آتے۔ ایہُن اُرا نا ذمہ واریک نا کاٹُم آ تمار۔ حیات دا اُرا نا اسٹ انگا آسرہ ئس اونا بیگواہی آن پد اونا غٹ ذمہ واری تے نی ارفیس بس داسا دا پیشی و برانز آتا خواری ءِ ارفپہ”۔ لمّہ نا خنک غُل غُل کریر ولے او آمنہ نا مونا ہوغنگ خواہتوکہ و آمنہ نا اُست ءِ چُنک کننگ خواہتوکہ۔
“ ای نتے نتا تخیسہ تولنگ کپرہ۔ کنے دا پاپبو کہ ای کوشست کپر۔ اخس کنا وس ارے ای تینا ایلم ءِ تہارمہ غا زندان آ تیان کشنگ کن کوشست کروٹ۔ ای انت کننگ کیوہ انت کنا دو ٹی ارے ای کیوہ۔ ای امر تینا اومیت آتا گُٹ ئٹ پھاؤ شاغو و چُپ کیو تولیو۔ بس اسہ اندا اومیت ارے کنتو، دا ہم متو ای ہچبر دا اذیت تون زندہ مننگ کپروٹ کہ کنا ایلم سما اف اَرا زندان ئٹ انت اذیت سگنگ ءِ۔ اللہ راستی مہربان ئسے۔ ولے ہمو مہربان آ رب دا پائک کہ ظلم ئنا برخلاف ہیت کبو، بش مبو۔ اللہ تو تینٹ ظلمُ ئنا برخلاف بش مننگ نا حکم ایتک”۔ آمنہ ہڑدے نا ڈول لمّہ ءِ پوہ کننگ ئس کہ اندنی ٹی درگہ نا توار مس۔
“ چُناک بسر بھازی آن”۔ آمنہ بش مس درگہ نا ملنگ کن۔ درگہ ءِ ملنگ تون ہشت سالی مسڑ و دہ سالی مار ادی نور بانو نا موہہ ئٹ اُرا ٹی پیہار۔ آمنہ نا جوڑ تیا اسہ دم بشخندہ اس تالان مس۔ ہڑتوما چُناک دمدرینگوک ئسر۔ ولے ہڑدے نا ڈول اوفتا جیڑہ برجاء ئس۔
“ اخس وار پارینُٹ نے مہرین زو پیشتم کلاس آن۔۔۔ چھٹی مریک انگہ گھنٹہ اس نیکن سلوئی تمک کہ میڈم ہراتم پیشتمک” احسان درگہ آن پیہسہ پارے۔ مہرین ہم ورندی کن تیار ئس”۔ ای تو ہمو وختا پیشتموٹ ہرا وخت کنا ہیڑکوک پیشتمور”۔ احسان و مہرین نا دا ہڑدے نا جیڑہ ئس۔ “و انت کیرہ نا ہیڑکوک۔۔۔ سیر کپسہ پنچ گھنٹہ اسکول ئٹی، اُراغا ہنوئی مفک تا انت”۔ نور بانو تہٹی پیہیسہ درگہ ءِ بند کرے۔ اسہ تو باسُن آ دے و پدا سوختئی آن مہرین نا کلک آک خیسُن اڑسینگاسر۔
“ تاتو احسان ءِ ہُر، ہر وخت کنتو جنگ کیک۔” مہرین آمنہ تون احسان نا گلہ ءِ کرے۔ “ احسان انتئے ہیڑ ءِ تنک کیسہ۔ و مہرین نی ہم احسان ءِ تنک کپہ مالو پیشتم کلاس آن”۔ آمنہ مہروان آ لہجہ تون تومکا تے پوہ کننگ ئس۔ مہرین چُپ مس ولے احسان نا شیطان آ ملی دُن زو ہراکا بس کننگ کریکہ۔ “ہئو بئی ای تو اللہ آن جوانو ہیڑ اس خواہاٹ ولے خیر اگہ اللہ دنو ہیڑ اس تسنے تو خیال ءِ تہ تخوئی تمو، امر کین پین”۔ بشخندہ ءِ توریسہ مہرین آ اُرا ولے مہرین ورندی تتو۔
آمنہ تومکا تا بستہ آتے ہلک و ہڑتوما رمبیسہ کوٹی ٹی پیہار۔ آمنہ پدا تینا خیال آ تیٹی ہنا۔ اونا خن تا مونا پدا اسہ ندارہ اس گدرینگا۔ ہرا وخت اود و حیات اندن چُھنک ئسر و اندا ڈول چُھنکا چُھنکا ہیت آتیا میڑینگارہ۔ داسا تو اندن گمان مسکہ کہ بیدس یات آتیان آمنہ تون ہچس سلتنے، ولے اومیت۔۔۔ بس اومیت بچاسس۔۔۔ او ہم دمدرینگوک ءُ، گیمرینگوک و نزور ءُ اومیت اس، کہ اونا ایلم، اونا ہمبل، اونا اسٹ انگا سنگت تہارمہ غا کوٹی تیان آجو مریسہ واپس برو۔
آمنہ بستہ آتے ٹنگیسہ دالان ئٹی ہِنا۔ نور بانو احسان و مہرین نا پد ئٹ کوٹی ٹی ہِنا۔ “ زو اس پُچ بدل کبو و مون دو کبو ببو بھلا لمّہ نا کوٹی ٹی۔ ای اِرغ آتے ہموڑے ہتیوہ” نور بانو تومکا چُناتے پاریسہ دالان ئٹی ہِنا۔ زرہ سے آن گڈ آمنہ، لمّہ، نوربانو و چُناک کوٹی ٹی اِرغ کُننگ ئسر۔
“ اما۔۔۔ پگہ بازار آ کان” مہرین باخو ءِ خسالیسہ معصومیت ئٹ نوربانو ءِ پارے۔ “ بازار؟ انتئے؟ “ نوربانو سوج کرے۔ “ کنا اسکول نا ہیڑکو اف۔۔۔ ماہ وش۔۔۔ اونا سالگرہ ءِ۔ غٹ پارینو کہ اوڑکن ٹیکی ہتور۔ ای ہم خواہوہ ماہ وش کن ٹیکی اس دیو” مہرین داسا آمنہ ءِ اوننگ ئس۔
“ انت انت سُجھک دا اینو پگہ نا چُناتے۔ انت خواست ءِ داسا دا سالگرہ و ٹیکی تا، او ہم دا چُنا تے۔ نن تو اینو اسکان نہ تینا سالگرہ ءِ کرین نہ پین ئنا۔” نوربانو چھڑیسہ مہرین ءِ پارے۔ مہرین نا خنک غُل غُل کریر۔ “ ادی چھڑپہ کنا گودی آ۔ ہلینہ تینا گودی ءِ ایتنہ اونا ہیڑکو کن ٹیکی۔ اگہ اونا ہیڑکو ءِ غٹ ٹیکی ایترہ تو مہرین ہم ایتک” آمنہ مہرین ءِ دلاسہ کریسہ پارے۔ او داسا دا چُنا نا مونا وے افّی نا انت گلہ ءِ کریکہ۔ او دا بہشتی ءِ پاننگ کتوکہ کہ اونا باوہ نا بیگواہی آن گڈ اوفتا دو اخس تنک ءِ۔ و آمنہ اخس جہد کننگ ءِ کہ اونا خاہوت و اونا ایلم نا چُناک آسودہ مریر۔ آمنہ غٹ ڈھکیائی تے ڈھکیسہ مہر ئٹ مہرین ءِ اُرا۔ مہرین بش مریسہ آمنہ تون دو لخی کرے۔ غٹ اِرغ آن فارغ مسر تو آمنہ و نوربانو رزان تے ارفِسہ دالان آ ہنار۔
“ ای باز کوشست کیوہ کہ چُناک بے سوب و بے کاٹم ءُ فرمائش کپس۔۔۔” نور بانو پُر انگا گُٹ ئٹ پارے و خڑیک آتا پھاو اونا گٹ ئٹ اندن ہلک کہ مونی ہچ پاننگ کتو۔
“ اوفتا فرمائش آک ساندہ پورو مسنو۔ حیات جان ہچبر ہچ گڑا سے آن اوفتے تورتوکہ۔ انت فرمائش کریرہ ہڑموما، او پورو کریکہ تا۔ اوفتے عادت اف تینا اُست خواہی تے ڈھکنگ نا۔ ای ہم باز کوشست کیوہ تینے آن۔ ادی نی فریشان مفَہ دا گڑا کن کہ ای اوفتا فرمائش آتے پورو کننگ کپروٹ۔” آمنہ مہروانی ئٹ اودے دلاسہ تننگ ئس۔
“ ای اگہ خوانندہ اس مسوٹہ نا ڈول کاریم کریٹہ تو نے کمک کننگ کریٹہ۔ بس دوچگری آن مچے باز پیسہ دو ٹی بریک ولے او بس مفسہ اُرا نا چلفنگ کن۔ ای باز ملامت مریوہ کہ ای نے ہچ کمک کننگ کپرہ۔ نے یکہ اُرا نا ذمہ واری ءِ ارفوئی تمک۔ حیات نا بیگواہی نا ڈکھ کم الو کہ وے افّی تون ہم نن مون ایتنگ اُن”۔ نور بانو اندن کہ تینے آن گلہ کننگ ئس۔
” ہچ فریشان مفہ ادی۔ ایلم واپس برو و نا اُرا پدا آبات مرو۔ ننا غٹ ئنا خوشیک واپس برور۔ بے اومیت مفہ اللہ آ یخین تخ۔” اودے تینٹ ہم سما الو کہ او نوربانو ءِ تسلی تننگ ءِ یا تینے۔
“ بیگواہ مروکا تون اوار اونا خاہوت نا خوشیک و سکون ہم بیگواہ مریرہ۔ مہرین و احسان ءِ ای ورندی تننگ ئٹ دمدرینگانٹ کہ اوفتا باوہ آجو مرو۔ نن خرما تا ڈیہہ ئٹ زند کننگ اُن دا کنے مُست سما الو۔ آخر ظالم ءِ انتئے ارمان بفک ننے آ۔” نوربانو نا خن تیان خڑینک آن روان مسر۔
“ کنے ہم داسا سما تما، ہرا وخت دا خرما تا پنجہ آک ننا خاہوت نا زیہا تمار۔ دیچہ انتئے ایسکان ننے آ ظلم متنے نن ایلو نا زیہا مروکا ظلم ءِ ظلم پوہ مفنہ و بے چکار مرینہ۔ خرما ءِ تو ارمان بفک و نن ہم تو تینے میلࣿ ئنا ڈول معصوم جوڑ کریسہ تولینہ۔ ظالم ءِ ظلم کننگ کن ہلینہ تو او پین ظلم کریسہ کیک۔ خرما تون خرما جوڑ مریسہ مون پہ مون مرون گُڑا ظلم ئنا دا خاخر آن نن و ننا بروکا نسل آک رکھینگور۔” آمنہ دالان نا گڑا تے مُچ کریسہ پاننگ ئس
“ مون پہ مون ہی تو ارین سال آتیان۔ تینا حق ئنا جنگ ءِ کننگ تو ارین۔ نن غٹ جنگ ئٹی اُن، نی تینا ایلم کن، ای تینا اَرغ کن، کنا چُناک۔۔۔ او تینا باوہ کن و لمّہ تینا مار کن۔ نہ یکہ اونا آجوئی کن اسہ ظالم ئسے تون، بلکن تنگدستی تون ہم جنگ تننگ اُن، چاگڑد نا ڈنگ خلوکا سوج آ تتون، بے ایسر مروکا زند ئنا خواست آ تتون، پین انت انت اف ننا مونا۔ نی باز دلیر و مزہ جغر ئسے اُس آمنہ، تینا ایلم نا ڈول۔ ولے ای افٹ، کنے ٹی داخس سگ اف ای امر کیو”۔ حسینہ تون گلہ آتا اسہ مرغن ءُ فہرست اس ئس۔ ولے آمنہ۔۔۔ او چُپ ئس۔ اوڑتون ہم گلہ آتا مرغن ءُ، بے کھٹوکو لڑ اس ئس۔ ولے دا وختا او تینا خاہوت نا اسٹ انگا کمک ئس، غٹ ئنا ہمت ئس۔ او اندا مارنگ ئس کہ اودے بس ہر حال ئٹ تینا و تینا خاہوت نا اومیت و سگ ءِ سوگو کروئی ءِ۔
او ہچبر دا گمان کتوسس کہ دنو دے اس ہم برو کہ او تینا ایلم نا جاگہ غا سلوک مرو و دا خاہوت ءِ سمبھالو۔ اوڑکن تو دنیا یونیورسٹی آن اُرا اسکان ئس۔ دا ہیت اونا گمان آن پیشن ئس کہ او اسہ ایٹمی طاغت ئسے نا خواجہ ءُ ڈیہہ ئسے تون مون پہ مون مرو و اوڑان تینا ایلم نا زوراکی نا بیگواہی نا بابت ئٹ سوج کرو۔ ولے اینو او ہر ہمو گڑا، ہر ہمو کاریم ءِ کننگ ئس ہرا اونا ایلم نا آجوئی نا ضمانت ءِ تسکہ، ہرا اونا ایلم نا آجوئی ءِ یخینی جوڑ کریکہ۔ او دلیر اس الو نہ کہ مزہ اُست و مزہ جغر اس، ولے وخت اودے دلیر جوڑاسس۔ اودے سما الو کہ اونا جہد ہرا وخت ایسر مرو، او تینا جہد ئٹ سر سہب مرو ہم یا آخہ، اونا ایلم آجو مرو، یا ساندہ کن بیگواہ مرو یا۔۔۔۔ یا اونا چشوک جون اوفتے دو برو۔ نتیجہ چائے انت کہ مرے بس اودے سما اس کہ اودے چُپ تولوئی اف، جہد کروئی ءِ تینا گیمرینگوکا اومیت ءِ سوگو تخوئی ءِ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
