حوال تا رد ئٹ خضدار نا ایب کیب ئٹ زمین جمب نا چنڈیک درک کننگار، زلزلہ پیما مرکز نا رد ئٹ ہفتہ و یک شمبے نا نیامی شام چار بجہ بیست و سہ منٹ آ شاندار و ایب کیب ئٹ زمین جمب نا چنڈیک درک کننگار۔
ہرانا ترندی ریکٹر اسکیل آ 8 – 2 ریکارڈ کننگانے، زمین جمب ئنا مرغنی زمین ٹی 80 کلو میٹر اسکان اس اندن اونا مرکز خضدار آن 32 کلو میٹر قطبی دے کہی اس، زمیں جمب نا سوب آن اسہ ڈول ئنا ہم نسخان نا حوال رسینگتنے۔
منی لانڈرنگ و دہشت گرد آتا مالی کمک ءِ توننگ کن جہانی ادارہ فائنینشل ایکشن ٹاسک فورس( ایف اے ٹی ایف) متحدہ عرب امارات (یو اے ای) ءِ گرے لسٹ ٹی شاغانے اندن پاکستان ءِ گرے لسٹ ئٹ تخنگ نا فیصلہ ءِ کرینے۔
جہانی حوال تروکا ادارہ نا رپورٹ نا رد ئٹ ایف اے ٹی ایف متحدہ عرب امارات ءِ تینا نظام ٹی بھلو و بنماسی بدلی ہتنگ نا ٹاسک ءِ تسونے۔
ایف اے ٹی ایف نا پیرس ٹی برجاہ مجلس ٹی امارات نا بخت ئنا فیصلہ مس۔
جمعہ نا نن ایف اے ٹی ایف نا کنڈ آن شینک مروکا بیان ئٹ پاننگا کہ پاکستان نا پن ہم گرے لسٹ ٹی مرو۔ ایف اے ٹی ایف نا رد ئٹ پاکستان 2018 ٹی نیشنل ایکشن پلان نا 27 آن 26 ٹک آتیا کاریم کرینے۔
ایف اے ٹی ایف نا مجلس یک مارچ آن چار مارچ اسکان پیرس ٹی برجاء اس۔
ایف اے ٹی ایف نا پاننگ ءِ کہ پاکستان جون 2021 آن منی لانڈرنگ و دہشت گردی نا مالی کمک ء تورنگ نا بابت گام ہرفینے ولے داسکان اودے پین جوانی ہتنگ نا ضرورت ءِ۔
بیان نا رد ئٹ پاکستان ءِ 2021 نا ایکشن پلان ٹی رہینگوکا اسہ نکتہ آ کاریم کننگ نا ضرورت ءِ۔
پاکستان جون 2018 ٹی گرے لسٹ ئٹ شاغنگاسس۔
یاتی مرے کہ گرے لسٹ ٹی اوار ملک آتے ایف اے ٹی ایف نا ودکی رکھ، ساکھ ءِ نسخان رسینگنگ، جہانی درجہ بندی، غٹ جہان آن مڈی نا دو بننگ ٹی دشواری و مالیاتی لین دین ٹی زیات خرچہ تون مون تروئی تمِک۔
حوال تا رد ئٹ پی ڈی ایم اے بلوچستان نا ہفت ضلع ٹی پنچ آن ہشت مارچ اسکان طوفانی پر ئنا الرٹ شینک کرینے، ہر ہفت ضلع نا ضلعی بست و بند ءِ تیوہ ئی وڑ ئٹ الرٹ مننگ نا پنت کننگانے۔
پی ڈی ایم اے بلوچستان نا پارہ غان شینک کروک الرٹ ٹی پاننگانے کہ صوبہ نا ہفت ضلع کوئٹہ، زیارت، قلعہ سیف اللہ، پشین، ژوب، موسیٰ خیل و ڈیرہ بگٹی ئٹ ہشت مارچ اسکان ہورہ تون اوار ترند پر ئنا گمان ءِ۔
اندن کوئٹہ، زیارت، قلعہ عبدالله و پشین نا مش تیا برف ہم مننگ کیک، پی ڈی ایم اے ہر ہفت ضلع تا بست و بند ءِ تیوہ وڑ ئٹ الرٹ مننگ و بھلا مشین تے تیار تخنگ نا پنت کرینے اندن شاری تے ڈیمز و کڑمب دیر ئنا پکنک پوائنٹس تیان مُر مننگ نا ہم پنت تننگانے۔
بلوچ ایکشن کمیٹی (بساک) نا پارہ غان زالبول تا جہانی دے نا رد ئٹ مجلس اس “بلوچ زالبول کانفرنس” نا پن ئٹ کوئٹہ اٹ جامعہ بلوچستان ئٹ ہڈ تننگو۔
پڑو اٹ پاننگانے کہ دا مجلس ئٹ زالبول و خوانندہ غاتا سیاسی، چاگڑدی و خوانندئی جیڑہ آتا بابت جتا آ بخش آک اوار مرور۔
اوفتا رد ئٹ بلوچ چاگڑد تینا تہٹی پورہ ءُ چاگڑد ئس مسونے، ہراٹی زالبول نرینہ غا تون اوار مریسہ تینا چاگڑد ءِ جوڑ کرینے، ولے ترندی ئٹ بدل مروکا جہان زوراک آتا دو تا شیفہ ہنیسہ زالبول ءِ نرینہ غا تیان پد کننگا و چاگڑد بے پورو مس۔
اوفک پاریر کہ اوفتا مجلس نا مسخت اندادے کہ زالبول آتا چاگڑدی، سیاسی و خوانندئی جیڑہ تا بابت گپ تران مرے تاکن بلوچ چاگڑد پورو مرے۔
تدوکا دے پاکستان نا بُنجاہ اسلام آباد ٹی بلوچ خوانندہ آ تا برانز ئٹ اوار مننگ آ پاکستان نا وزیر برائے انسانی حقوق شیریں مزاری نا مسِڑ ایمان زینب مزاری و ایلو تا بر خلاف بغاوت نا مقدمہ درج کننگانے۔
یاتی مری کہ اسلام آباد ٹی تعلیم دوئی کروک بلوچ خوانندہ غاک یکم مارچ آ نیشنل پریس کلب نا مونا برانز کریسُر ہراڑے پولیس اوفتے لٹ کُٹ کرے و برانز ٹی اوار خوانندہ آتا موبائل آتے پُھلار۔
حوال تروک آتا رد ئٹ رکن پاکستان اسمبلی محسن داوڑ تون اوار برانز ٹی ساڑی پین کہی خوانندہ آتا پن دا مقدمہ ٹی شاغنگانے۔
پولیس ذرائع نا رد ئٹ بغاوت و ایلو دفعہ آک ریاست نا برخلاف نعرہ خلنگ نا سوب ئٹ خلنگانو۔ اسلام آباد نا تھانہ کوہسار ٹی بغاوت نا ایف آئی آر درج کننگانے۔
تربت نا علاقہ ھوشاپ نا مخلوق تینا بندغ آتا یلہ نہ کننگ و مونا نہ ہتننگ نا بر خلاف تولوک برانز کریسہ سی پیک روٹ ءِ گاڑی تا ہن و بر کن بند کرے۔
ھوشاپ برانز کروک آک اسہ تو اس مالو ھوشاپ آن فورسز نا دو آن زوراٹ بیگواہی نا گواچی مروک دوستین نا مار ناصر، عبدالرحمان نا مار مراد بخش، چارشمبے نا مار پسن نا سلامتی ئٹ یلہ کننگ نا خواست کریر۔
برانز کروک آتا پاننگ ءِ کہ اوفتا بندغ آتے اسہ تو اس گدرینگ آن گڈ ہم مونا اتننگ افس و نہ ننے اوفتا ڈو ءِ پاننگ ءُ-
ھوشاپ سی پیک روٹ آ تولوک برانز نا سوب آن ہڑتوما پارہ غان گاڑی تا مرغنو لیک اس لگا اندن ھوشاپ آن بیگواہ بندغ آتا خاہوت آک داکان مست ہم تینا بندغ آتا یلہ کننگ کن سی پیک روٹ آ تولوک برانز کریسر-
برانز کروک آک خواست کرینو کہ سیاسی پارٹیک و صوبائی کوالخواک اوفتا بندغ آتا سلامتی ئٹ یلہ کننگ و مونا اتننگ کن تینا کڑدار ایسری ایتر۔
ژوب نا تعلیمی ادارہ تیٹ استاد آتا کمبوتی و آسودئی تا نیستی ءِ۔ پوسکُنا سال نا بناء مننگ آ محکمہ تعلیم اسکول آتیٹ داخلہ مہم و سیمینار ہڈ ایتک ہرا کہ فوٹوسیشن و اخباری بیان ئسکان سلوک ءُ۔ داخلہ مہم بیرہ پن اسکان ءِ و کاریمک اف ئنا برابر ءُ۔
سرکاری خواننگ جاہ تیٹ استاد آتا کمی، خوانندہ غا تا کچ گیشتر ءِ۔ جماعت آ تیٹ جاگہ نا نیستی نا سوب آن چُنا تیان ٹیسٹ ہلنگ مریک و دا سوب آن کہی چُناک داخلہ ہلنگ آن پد سلوک مریرہ۔ غریب آ لمّہ باوہ تینا چُنا تے کن پرائویٹ خواننگ جاہ تا داخلہ ہلنگ آ بیوس مریرہ ہرا کہ حکومت و محکمہ تعلیم نا زی آ سوج ئسے۔
ژوب نا لس مخلوق نا حلقہ غاک حکومت نا پام ءِ دا کُنڈا ہتیسہ پارہ کہ ژوب نا آبادی مُسے نیم لکھ آ سر مسونے ولے خواننگ جاگہ غاک انگریز نا زمانہ نا ءُ، استاد آتا کچ کم ءِ و گیشتر چناک تعلیمی آسودئی تیان پد سلوک ءُ۔
اوفتا پاننگ اس کہ حکومت ہر سال مہم و سیمینار ہڈ ایتک ولے کمرہ جماعت ئٹ چُنا تے تولنگ نا جاگہ اف، محکمہ تعلیم نا مہم و سیمینار آک فوٹوسیشن و اخباری بیان تا حد ئسکان سلوک ءُ۔ خواننگ جاہ تیٹ جاگہ نا نیستی نا سوب آن کہی چناک داخلہ ہلنگ آن سلوک ءُ ۔
اوفتا پین پاننگ اس کہ پاکستان نا آئین ئٹ تعلیم ہر بندغ نا بنجائی حق ءِ ولے ننا چُناک تعلیم آن محروم ءُ ہرا حکومت و محکمہ تعلیم کن سوالیہ نشان ئسے۔ او وزیر اعلیٰ قدوس بزنجو، گورنر بلوچستان ظہور آغا آن خواست کریر کہ ژوب ٹی استاد آتا کمی و خواننگ جاگہ غا تیٹ آسراتی تا تننگ و خواننگ جاگہ غا تیٹ اپ گریڈیشن تون اوار پوسکنو تعلیمی ادارہ تا جوڑ کننگ ءِ عمل ئٹ ہتیر نہ تو ژوب نا لس مخلوق سخت برانز نا حق تخِک۔
حول تا رد ئٹ پشاور نا ایب کیب نا علاقہ تھانہ داودزئی نا ہد ہویل ئٹ سُم کاری آن ڈیوٹی آن گُڈ اُرا غا ہنوکا پولیو تروک زالبول مرگ ئنا گواچی مس۔
پولیس نا پاننگ ءِ کہ زالبول پولیو ڈیوٹی ءِ ایسر کننگ آن گُڈ اُرا غا ہننگ اس کہ نا درست موٹر سائیکل سوار بندغ آک سُم کاری کریسہ زالبول ءِ کسفیر۔
یاتی مرے کہ برجاء تو ئٹ افغانستان نا جتا علاقہ آتیٹ بھاز آ پولیو تروک آتا خون مننگ آن گُڈ خیبر پختونخوا ٹی ہم پولیو تروک آتا سیکیورٹی ٹی ودکی کننگاسس، ولے دا تدینی نا بابت داسکا کوالخوا نا ہچ ء بیان مونا بتنے۔
اینو بلوچستان و پیشن ملک آتیٹ بلوچ دود ربیدگی دے ئنا مجلس آک برجاء ءُ۔ دا مجلس آتیٹ مخلوق بلوچی پچ، پازوار آتے بینسہ بشخ ہلنگ ءِ۔
ہر سال دو مارچ آ تیوی جہان ئٹ بلوچ دود و ربیدگی دے ہڈ تننگک۔ دا دے آ بلوچ ربیدگ نا درشانی جتا دروشم آتیٹ کننگک۔ دا مجلس آتیٹ گوازی، خوراک، دوچ، سلاء و ایلو بشخ آتے نشان تریسہ بلوچ ربیدگ ءِ نشان تننگک۔ اندن باگل دیوان دا مجلس آتا گچین آ بشخ مریرہ۔
دا سال بلوچ خوانندہ گل بساک بلوچستان و کراچی ئٹ دا ردئٹ مجلس ہڈ تننگ ءِ۔ اندن فرسٹ اسٹیپس اسکول نا پارہ غان کوئٹہ ئٹ مجلس ہڈ تننگانے، داڑان بیدس تیوہ غا بلوچستان ئٹ جتا دروشم نا مجلس آک برجاء ءُ۔
دو مارچ بلوچ ربیدگی دے اولیکو وار 2010 ئٹ بناء کننگا ہرانا بنماس ءِ بلوچ خوانندہ گل بی ایس او آزاد تخا۔ اندا دے خضدار ئٹ بلوچ دود ربیدگ دے ئنا مجلس آ جلہو مس ہراڑے چغلی بمب نا تراک آن خوانندہ سکندر بلوچ و جنید بلوچ بیران مسر و ہژدہ خوانندہ ٹپی مسر۔
دو مارچ بلوچ دود و ربیدگ دے ئنا رد ئٹ “نن بلوچ اُن” باگل شینک مس۔ دا باگل “دی فرسٹ اسٹیپس” اولیکو گام اسکول نا پارہ غان شینک کننگانے ہراٹی چُنک سن آ سیمک بلوچ تینا فن ئنا درشانی کرینے۔ و اوڑتون اوار فن کار آتا بھلو کچ اس ساڑی ءِ۔
باگل بلوچ ربیدگی دے ئنا ردئٹ جوڑ کننگانے ہرانا ویڈیو ئٹ ہم بلوچ دود ربیدگ نا ندارہ غاتے نشان تننگانے۔
دی فرس اسٹیپس اسکول نا یوٹیوب چینل آ شینک مروک ویڈیو ءِ مخلوق دوست کننگے و باگل چاگردی حوالکاری میڈیا غا زیات آن زیات تالان مننگے۔
دا ردئٹ دی فرسٹ سٹیپس نا چیف اگزیکٹو آفیسر ڈاکٹر امداد بلوچ پارے کہ تیوہ غا جہان ئٹ تاریخ، لسانیات، انتراپولوجی anthropology و اوڑتون تفوک علم آتیا کاریم کروک آ تیوہ غا چاہندار آک دا ہیت آ زور ایترہ کہ دا جہان ئٹ وجود تخوک تیوہ غا ربیدگ و بولیک تیوہ غا انسانیت نا میرات ءُ، و اوفتا رکھ و دیمروی و تالانی نا ذمہ واری تیوہ غاتیٹ ءِ۔ دُںکہ ہر ربیدگ ننے دا جہان و قدرت ءِ پوہ مننگ نا جتاو چمشانک اس ایتک و اسہ ہم ربیدگ و بولی ئسے نا ایسر مننگ آ ننے آن بندغی علم و چاہنداری نا چمشانک اس اودیم مریک۔
او پارے کہ بندغی ربیدگ و بولی تیٹ خننگوک اندا diversity ءِ علمی شرہ تا سرحال کننگ نا کوشست نا بناء ءِ نن دو مارچ آ بلوچ ربیدگی دے آ جتا مجلس تا ہڈ تننگ آن کننگ اُن۔
