بلوچ بیگواہ تا خاہوت آک بیان شینک کریسہ پاریر کہ 30 اگست تیوہ جہان ئٹ زوراکی نا بیگواہی تیان زیمی مروکا بندغ آتا دے ءِ. دادے ءِ بیگواہ آ بندغ آتا پِنا کننگ نا مسخت اندادے کہ زوراکی نا بیگواہی تیان زیمی مروکا بندغ آتا ڈکھ، دڑد، اذیت آتے جہان نا موناپاش کننگ مرے تاکہ تیوہ جہان ءِ سما تمے کہ او بندغ آک ہرا خالیت و سختی تیان گدرینگرہ۔

اوفتا پاننگ ئس کہ اندن دا ڈیہہ ٹی ایلو قوم آتتون اوار بلوچ آک ہم کہی سال تیان زوراکی نا بیگواہی تا گواچی مریسہ ءُ۔ بیگواہ مروکابندغ اتتون اوار اوفتا خاہوت آک ہم جتا وڑ ئنا ذہنی و بدنی سختی، دڑد و اذیت آن گدرینگیسہ ءُ۔ نن ہم اسہ چرجوئی اسیٹ تینا بندغآتا آجوئی کن غٹ رہبندی و قانودی کسر تے کاریم ئٹ ایسونن ولے داسکان ہزار آ تا کچ ننا بندغ آک زوراکی نا بیگواہی تا گواچی ءُ۔

تینا بیان نا ایسر ئٹ اوفتا پاننگ ئس کہ تدوکا 38 دے آن نن تینا بندغ آتا آجوئی کن کوئٹہ نا خاص ہند، وزیر اعلیٰ، گورنر و چیفجسٹس نا ماڑی تا مونا تولوک برانز کننگ اُن ولے مجال ءِ اختیار دار تون اوار حکومتی نمائندہ آتے بوڈ اس کُنے و نئے اوفتے ننا ڈکھ دڑدئنا پرواہ ءِ۔ نن تینا برانز ءِ برجاء تخیسہ 30 اگست آ زوراکی نا بیگواہی تیان زیمی مروکا بندغ آتا جہانی دے ئنا موقع آ تولوک برانز ناہند آ اسہ سیمینار اس ہڈ ایتون ہرا ٹی سیاستدان، قانود دان، صحافی و چاہندار آ تون اوار جتا فکری تپہ آتا بندغ آک تینا خیال آتادرشانی کرور۔

جمعہ نا دے پنی آ اردو بازار کراچی آن پاکستانی لشکر نا کارندہ غاک علم و ادب پبلشرز نا منیجر ءِ دزگیر کریسہ تینتون دریر ہراکان گڈ اونا بابت ہچو حوال اس رسینگتنے۔

شابیتی حوال تا ردئٹ کراچی نا علاقہ اردو بازار آن جمعہ نا دیگر وخت آ علم و ادب پبلشرز نا منیجر لالہ فہیم بلوچ ءِ پاکستانی ڈھکوک ادارہ و فورسز کارندہ غاک چاہنداری کننگ آن گڈ تینتون دریر۔ خن خنوک شاہد آتا ردئٹ سندھ پولیس و سادہ پُچ آتیتون کارندہ غاک سر و سوج و چاہنداری کننگ آن گڈ دکان ءِ بند کرفسہ اودے تینتون دریر۔

علم و ادب پبلشرز پاکستان نا پِڑ آ اسہ پنی ءُ شینکار ئسے ہرا بلوچی ادب و ایلو بولی تیٹ پٹ و پولی کتاب شینک کیک۔

تدینی نا برخلاف جتا تپہ نا بندغ آک سوختئی تون خُلیس نا درشانی کرینو۔ نیشنل ڈیموکریٹک پارٹی تدینی نا مذمت کریسہ پارینے کہ لالہ فہیم اسہ علم دوست بندغ ئسے ہرا بلوچی ادب و صحافت نا خوانندہ ئسے، اونا دُن بیدس قانود دزگیری نا مذمت کینہ و اودے زوت آجو کننگ مرے۔

نیشنل پارٹی نا سروک جان محمد بلیدی پارینے کہ فہیم اسہ ادبی و عملی بندغ ئسے و شینکاری نا کاریم اٹ مسونے۔ لالہ فہیم ءِ زوراکی ئٹ بیگواہ کننگ افسوسناک و قابل مذمت ءِ۔ زوت آجو کننگ مرے۔

یاتی مرے بلوچستان ئٹ زوراکی ئٹ بیگواہی تا ویل کل آتیان بھلا ویل ءِ۔ کہی ہزار بندغ آک بیگواہ ءُ و ہزار آتا کچ بندغ آتا بیگواہی آن گڈ جشوک جوْنک خننگانو ہرافتیٹ زیات خوانندہ ءُ۔ اندن ادیب و صحافی تا جوْنک ہم خننگانو۔

ایلو پارہ غان کوئٹہ نا ریڈ زون ئٹ گورنر نا ماڑی نا مونا سی و ہشت دے آن بلوچ بیگواہ تا خاہوت آتا برانز برجاء ءِ ہرافک زیارت آپریشن و دروغ نا مونتس نا جوڈیشل کمیشن تون اوار ایلو خواست آتیکن برانز کننگ ءُ۔

کوئٹہ ٹی اِرا دے آن برجاء ترند پر تا سوب آن شار ئنا گیشتر علاقے آتے دیر درینے، کچہ آ اُراک تمیسہ بھس مسنو۔

شابیتی حوال تا رد ئٹ کوئٹہ ٹی اِرا دے اسکان اسہ وڑ ترند پر مننگ نا سوب آن اوڑک، دے کہی بائی پاس، ہزارہ ٹاؤن، پشتو باغ،اسپنی روڈ، رئیسانی روڈ، بروری روڈ، سبزل روڈ، سریاب روڈ، نواں کلی، سرہ خلہ، سرہ غڑگئی، چشمہ اچوزئی، سمال آباد، تون اوارپین کہی علاقہ آتے ارب فلڈنگ نا سوب آن نوکاپ نا دیر درے۔

نوکاپ نا دیر اُرا تیٹ بننگ نا سوب آن بندغ آتے سخت ہڑاند آتون مون تروئی تما اندن سمال آباد، کلی اصرا، تون اوار کہی علاقہ آتاآباتی تے رکھوک جاگہ غا تیا و پی ڈی ایم اے نا دفتر آ رادہ کننگا و شار ئنا جتا علاقہ آ تیٹ کچہ انگا اُراک تمیسہ بھس مسر۔

کوئٹہ ٹی ہار ئنا سوب آن نماز جمعہ نا وختا کہی علاقہ آ تیٹ مسجد آ تیٹ ہم نوکاپ نا دیر بس ہرا نا سوب آن نمازی تے ہڑاند آ تونمون تروئی تما۔

ایلو نیمہ غان ترند پر تا سوب آن کوئٹہ و بارکھان ئٹی 9 بندغ ٹپی مسر۔ ٹراما سینٹر سول اسپتال کوئٹہ نا ایم ڈی ڈاکٹر یاسر نا رد ئٹتدوکا نن پر تا سوب آن سول ہسپتال ئٹی کوئٹہ آن ہشت و بارکھان آن اسہ ناجوڑ ئسے ہتنگ مس۔ ٹپی مروکا تیان کہی بندغ نا حالیتباز خراب پاننگک۔

سعودی عرب ٹی چُنک سنی ٹی ناول نگار جوڑ مننگ نا شرف اسہ دوانزدہ سالی مسڑ غنیٰ خلیل القریبی ءِ رسینگا۔ اونا اولیکو ناول’دیڈیزرٹ روڈ‘ داسا مارکیٹ ئٹی ساڑی ءِ۔ غنا نا پاننگ ءِ کہ او ناول نگاری ٹی جہانی ریکارڈ جوڑ کننگ خواہک۔

’العربیہ ڈاٹ نیٹ‘ تون ہیت کریسہ غنا نا پاننگ ئس کہ کنے اولیکو ناول ءِ لکھنگ نا خیال ہمو وخت آ بس ہرا وخت آ کنا سن یانزدہ سالئس و ای دا ناول ءِ انگریزی بولی ٹی ’ The Dessert Road‘ نا سرحال آ نوشتہ کریٹ۔

غنا نا پاننگ ئس کہ دا پڑ آ بننگ کن اودے غٹ آن زیات اونا باوہ حوصلہ تس۔ ناول نا بناء و کڑدار آتا سیم ئنا گچین کننگ، خیال آتےریکارڈ کننگ و کاغد آ شابیتی ئٹ بیان کننگ نا عمل آ کاریم کننگ کبین ئس۔ اندا سوب آن کنے دا کن اسہ سال اس لگا۔ اخیر دا ناولپنچ باب ئٹی ایسر مس۔

اونا پاننگ ئس کہ مطالعہ نا باریم و اولیکو درجہ دوئی کننگ کن دا است خواہی آن بیدس اودے تینا استاد اسریٰ حمدان الصحبی نا مختفی و کمک رسینگا۔

اونا پاننگ ئس کہ ای لکھنگ و درشانی نا لائخی ءِ مونی دننگ کن کاغد و قلم کاریم ئٹ ہتنگ خواوہ۔

غنا نا ودیک پاننگ ئس کہ جہانی اسکول آ تیٹ انگریزی نا مطالعہ اودے دا بولی ٹی نوشتہ کننگ نا لائخ جوڑ کرے۔ اونا پاننگ ئس کہ اوعربی، انگریزی و جاپانی کتاب آتے ہم خواننگ و ہُننگ دوست تخک۔

اونا پاننگ ئس کہ ڈیزرٹ روڈ نا سرحال دا ناول کن غٹ آن زیات جوان ئس۔ او گرافکس و پدا اسہ خاص ڈرائنگ اس کارمرز کرے، ہرااونا نظریہ آتے باز زیبداری ئٹ تھیٹرک ڈرائنگ ٹی مٹ کرے۔

او پارے کہ ای چُنک و مرغن ءُ ناول و کسہ نوشتہ کریسہ گنیز ورلڈ انسائیکلوپیڈیا ٹی تینا ریکارڈ ءِ جوڑ کننگ خواوہ۔

غنا نا باوہ خلیل القریبی، العربیہ ڈاٹ نیٹ ءِ پارے کہ او تینا مسڑ ءِ ہمو وخت مطالعہ کننگ نا کنڈ آ پام تس ہرا وخت اونا سن ہفت سالئس۔ اونا پاننگ ئس کہ غنا نا سوج آ تیان اونا علم دوئی کننگ نا بابت ئٹ شوق و تجسس نا گمان مسکہ۔ اونا اندا شوق اونا سرسہبینا ذریعہ جوڑ مس۔

بلوچستان نا ضلع ہرنائی ٹی چانڑدہ اگست آ پاکستانی فورسز آتا سم کاری آن ورنا خالق داد نا خون و کم سن چُنا تتون اوار کہیبندغ آک ٹپی مسر ہراڑان گڈ ہندی مخلوق برانز بناء کرے ہرا دئے دے گدرینگ آن پد ہم برجاء ءِ۔

اینو برانز کروک آک تینا برانز ءِ شابیتی تریسہ خانوزئی نا خُڑک آ زیارت کراس ءِ بند کریر، ہرا نا سوب آن کوئٹہ و ژوب آ ہِن و بر سلیسو کسر نا ہڑتوما کنڈ آن اُلاخ آتا مرغن کشک لگا۔ برانز کروک آک تدینی نا بابت ئٹ عدالتی کمیشن جوڑ کننگ و فورسز آتے علاقہ آنکشنگ نا خواست کننگ ءُ۔

ایلو نیمہ غان حکومت بلوچستان نا پاننگ ءِ کہ تولوک برانز نا خواست آتا بابت ئٹ وزارت داخلہ نا کنڈ آن اسہ کمیٹی اس جوڑ کننگانے۔

اسسٹنٹ کمشنر کریزات تون گپ و تران آن گڈ اُلاخ آتا ہِن و بر کن کسر ملنگا ولے برانز کروک آک زیارت کراس نا رہا عارضی کیمپخلکنو۔ 

یاتی مرے کہ ہرنائی نا علاقہ خوست ئٹی 14 اگست آ سیکیورٹی فورسز آتا برخلاف برانز نا وختا عوامی نیشنل پارٹی نا اسہ باسکخالق داد فورسز آتا سم کاری آن بیران و اسہ چُنا سے تون اوار 7 بندغ ٹپی مسوسر۔

ہندی بندغ آتا رد ئٹ برانز نا وختا ایف سی نا سم کاری آن دا تدینی مونا بس ولے ایف سی دا دوبہ آتے سختی ئٹ رد کرے ہراڑان گڈ15 اگست آ ہرنائی نا مخلوق خوست ئٹی ایف سی نا کیمپ ئنا مونا تولوک برانز بناء کریر ہرا داسکان برجاء ءِ۔

حوال تا رد ئٹ یورپی یونین ہار و نوکاپ آن زیمی مروکا خاہوت آتے بندغی کمک تننگ کن پاکستان ءِ 7 کروڑ 60 لکھ روپئی تننگ نا پڑوکرینے۔

اسلام آباد ئٹ یورپی یونین نا مشن نا شینک مروک بیان ئٹی پاننگانے کہ دا کمک صوبہ بلوچستان ئٹ جھل مگسی و لسبیلہ نا کُل آنزیات زیمی مروکا ضلع آ تیٹ زیات زیمی مروکا خاہوت آتا دمدستی خواست آتے پورو کننگ آ پام ایتو۔

پاکستان ئٹ یورپی یونین نا بندغی ہمدڑدی نا پروگرام آتا نگرانی کروک طہینی تھمناگوڈا نا پاننگ ئس کہ بیم بش کروک ہار پاکستانئٹ بھس کاری نا اسہ کسہ اس اِلانے، ہرا نا سوب آن باز آ بندغ آتے تینا اُرا، معاش و مڈی تا نسخان تون مون تروئی تمانے۔

اونا پاننگ ئس کہ یورپی یونین نا مالی کمک دا سخت انگا وخت ئٹی غٹ آن زیات نزور آ بندغ آتا کمک کن کاریم کرو۔یورپی یونین ناودیک پاننگ ئس کہ دا کمک جہانی ریسکیو کمیٹی نا ہم المی کمک نا رسیفنگ کن کاریم کرو۔

بیان ئٹ پاننگا کہ دا ٹی نوکاپ آن زیمی مروکا خاہوت آتا دمدستی خواست آتے ایسر کننگ و کمک کن نقد رقم تننگ، و ہار آن پد نوکاپنا دیر ئنا سوب آن تالان مروکا ناجوڑی تیا ہم پام ایتیسہ بنیاتی جانجوڑی نا بابت ئٹ خذمت آک ہم اوار ءُ۔

اوفتا پاننگ ئس کہ دا پروگرام زالبول، کم سن مسڑ و چُنا تا ڈول انگا نزور آ بندغ آتے نفسیاتی کمک ہم ایتو۔

بیان ئٹ ودیک پاننگا کہ یورپی کمیشن نا یورپی سول پروٹیکشن اینڈ ہیومینٹیرین ایڈ آپریشنز (ای سی ایچ او) نا کمک ئٹ یورپی یونیننا فنڈنگ اونا چُنک ہد اسکان رسپانس میکانزم نا ذریعت ئٹ تننگ مننگ ئٹی ءِ۔

ای سی ایچ او نا چُنک ہد ئنا ریسپانس فنڈ اسہ جہانی وڑ و ڈول ئسے ہرا قدرتی و بندغی ودی کروک آفت آتیان زیمی مروکا ملک آ تیٹبندغی کمک کن 5 لکھ یورو اسکان دمدستی فنڈنگ نا موکل ایتک۔

حوال تا رد ئٹ تحصیل نال ئٹی ڈکھیائی ءُ اسہ کسر ویل ئسے ٹی اسہ زالبول اس بیران اندن پین ہشت زالبول و چُنا ٹپی مسنو۔

ٹپی مروکا تے اسپتال آ سر کننگانے ہرافتیان اِرا زالبول و اسہ نرینہ اس باز ٹپی ءُ۔

شابیتی حوال تا رد ئٹ نال آن گریشہ آ ہنوکا پک اپ ڈرائیور نا وس آن پیشتمیسہ کھڈ ئسے ٹی تما، ہرا نا سوب آن زالبول اس بیران وایلو زالبول و چُنا تتون اوار ہشت بندغ ٹپی مسر۔

ٹپی آتے سول ہسپتال نال آ سر کننگا ہراڑے اوفتا جانجوڑی کمک برجاء ءِ و زیات ٹپی مروکا تے سول ہسپتال خضدار آ رادہ کننگ ءُ۔

بلوچستان ئٹی زوراکی نا بیگواہی تا لڑ اسہ وڑ برجاء ءِ۔ پوسکن آ حوال تا رد ئٹ فورسز آک بلوچستان نا دریابی شار گوادر آن پین دئےبندغ دزگیر کریسہ بیگواہ کرینو۔

بیگواہ مروکا بندغ آتا زوراکی ئٹ بیگواہی نا برخلاف حق دو تحریک نا کماش مولانا ہدایت الرحمن نا کماشی ٹی بھلو کچ ئسیٹ مکرانکوسٹل ہائی وے آ برانز اڈ تننگانے۔

بلوچستان ئٹی بیگواہ مروکا بندغ آتا آجوئی کن کاریم کروک تنظیم وائس فار بلوچ مسنگ پرسنز گوادر آن زوراکی ئٹ بیگواہی نا تدینی ءِپک کریسہ چاگڑدی حوالکاری ویب سائیٹ آ تینا اسہ بیان ئسے ٹی پارینے کہ گوادر نا جتا غا علاقہ آتیٹ اسہ شمبے نا تہٹی دئے آنزیات ورنا تا بیگواہ مننگ نا غاو رسینگانے۔

وی بی ایم پی نا رد ئٹ بیگواہ مروکا تیٹ ہفت بندغ نا چاہنداری مسنے ہرافتیٹی ساحل امین، سمیر حمزہ، بالاچ حاجی سلیمان، مزمل،کچکول، علی جما و احسان فقیر اوار ءُ۔

ایلو پارہ غان حق دو تحریک نا برانز کوسٹل ہائی وے آ برجاء ءِ ۔ برانزی تا پاننگ ءِ کہ تدوکا دے تیٹی گوادر آن ورنا تے دزگیر کریسہبیگواہ کننگانے۔ ایسکان کہ اوفتے آجو کننگ متنے برانز برجاء مرو۔

ہندی حوال تا رد ئٹ پن مروک ورنا تے تدوکا دے تیٹی پاکستانی فورسز آک گوادر نا علاقہ ملا بند، فقیر کالونی، نیا آباد، ٹی ٹی سیکالونی، مونڈی، سُر، نگور تون اوار جتا غا ہند آتیا چھاپہ خلیسہ دزگیر کرینو۔

بلوچستان نا ضلع نوشکے نا علاقہ ڈاک ءِ دیر ارفے، دیر کہی بند آتے پرغا و آبادی تیکن مون کرے۔

افغان سیم تون لگوک علاقہ ڈاک ئٹ ہشتاد درسد رکھوک بند آتا پننگ نا خُلیس ءِ۔ تُرند پِر و ہار آن بھازا خلق آتے دیر ارفینے۔

ٹی بی پی نمائندہ نا ردئٹ زیمی مروک علاقہ آتیٹ بیدی، درزی چاہ، ملک جنگی خان، سردار عبدالصمد و ایلو خلق آک اوار ءُ۔ خلق آتے دیر ارفنگ آن گڈ مخلوق بڑز ہند آتیا لڈ و ہنپ کننگے۔

علاقہ ئٹ موبائل و ایلو حوالکاری آسراتی ایسری آن گڈ فریشانیک زیات مسونو۔ بھاز آ بندغ آتا حوال مننگ اف۔

ایلو پارہ غان تیوہ بلوچستان تون اوار سبی ئٹ پِر ئنا بُھس کاریک برجاء ءُ۔

سبی نا علاقہ بختیار آباد ئٹ کہی اُراک دڑانو، اینو چکھڑا نا ہند آ تُرند پِر تیان دھنی بخش سیال و ایلو مخلوق نا اُراک دڑار۔

کیچ ئنا بنجائی شار تربت ئٹی بلوچی بولی نا ازمکار وارث بزنجو نا اُرا و دکان آ سمکاری، جلہو کار آک دزگیر متور نئے ایف آئی آرکننگا، ادبی و چاگڑدی تپہ آتا کنڈ آن تدینی نا مذمت کننگا۔

تدوکا نن نادرست آ سلاء بند بندغ آک بلوچی بولی نا گلوکار وارث بزنجو نا اُرا آ سمکاری کریر و خاہوت ءِ خُلیفیر و ولدا اندا سلاء بندٹولی خُڑک آ وارث بزنجو نا دکان نا شٹر آ ہم سمکاری کرے۔

ہندی مخلوق نا رد ئٹ سمکاری نا لڑ 20 منٹ اسکان برجاء مس و سلاء بند بندغ آک بیدس ہچو خُلیس ئسے آن سمکاری کریسہ ئسر وپدا ارزانی ئٹ نرار ہم، پولیس یا ایلو ادارہ آتا نیمہ غان اوفتا دزگیری کن ہچو گام ارفنگتو و نئے قانود نافذ کروکا ادارہ آک سمکاری ناوختا دا کنڈ آ بسر۔

چاگڑدی و ادبی تپہ آک دا تدینی آ سخت ردعمل شان تریسہ بلوچی میوزک و بولی ادب تون دادے اسہ چم اس پاریر و ضلعی بست وبند و پولیس نا چُپی آ ہم بیم ئنا درشانی کریر۔