بلوچستان نا بنجائی شار کوئٹہ ٹی بیگواہ آ بندغ آتیکن اوفتا خاہوت آتا نیمہ غان تولوک برانز اینو سی و سئے میکو دے ہم برجاء ءِ۔خاہوت آک اینو برانز ءِ شابیتی تریسہ گورنر ہاؤس چوک تون اوار جی پی او چوک ءِ ہم ہن و بر کن بند کریر۔

خاہوت آتا پاننگ ءِ کہ تدوکا اسہ تو آن برجاء تولوک برانز نا بابت ئٹ حکومت داسکان سوبر خننگپک ہرا خاہوت آتے بِننگ و اوفتا ویل آتےایسر کننگ نا جاگہ غا برانز ءِ ایسر کننگ آ زور تننگ ءِ۔

چاگڑدی حوالکاری ویب سائٹ ٹوئٹر آ وی بی ایم پی نا سروک سمی دین بلوچ تینا ٹوئیٹ ئسے ٹی پارے کہ گورنر ہاؤس نا مونا سی وسئے دے تولنگ آن گڈ نن تینا برانز ءِ شابیتی تسونن۔

او پارے کہ وزیر اعلیٰ قدوس بزنجو 32 دے آن گڈ تینا وفد ءِ دا پاننگ کن رادہ کرے کہ ہار و ساتئو نا سوب آن تینا برانز ءِ ایسر کریسہتینا اُرا تیا انبو۔ اینو نن جی پی او چوک ءِ ہم بند کرینن اگہ حکومت سوبری نا درشانی کتو گڑا نن اسمبلی چوک ءِ ہم بند کرون۔

یاتی مرے کہ تدوکا دے خاہوت آتون اوار حکومتی وفد ہیت کننگ کِن بسوسس، و خاہوت آتے برانز ءِ ایسر کننگ و تینا اُرا تیا واپس ہِننگکِن زور تخاسر ولے خاہوت آتون حکومتی وفد نا ہیت و تران بیدس ہچو بھرم ئسے آن ایسر مس ۔

حکومتی وفد نا پاننگ ئس کہ خاہوت آک برانز ءِ ایسر کریسہ تینا اُرا تیا کار اوکان گڈ اوفتا خواست و ویل آتا ایسری کن گام ارفنگ مرو۔اوفتا ودیک پاننگ ئس کہ بلوچستان نوکاپ نا بھس کاری تا گواچی مسنے، بیم بش کروک حالیت آتیٹ خاہوت آک تینا اُرا تیا کار۔

بلوچستان نا ضلع قلات و کیچ ٹی اِرا جتاء حالیت نا تدینی تیٹ نیاڑی تون اوار اِرا بندغ کسفنگار اندن اسہ چُنا تون اوار اِرا بندغ ٹپی مسُنو۔

شابیت حوال تا ردئٹ قلات نا علاقہ ریج آن اسہ بندغ ئسے نا جوْن خننگانے ہرادے اسپتال آ دننگ آن گُڈ اونا چاہنداری عبدالقدوس ولد الف خان نا پِن آن مسُنے۔ لیویز ذرائع تا ردئٹ کسفنگوک اِرا دے مالو تینا اُلاخ تون اوار بیگواہ مسوسس۔

لیویز نا پاننگ ئس کہ کسفنگوک نا گاڑی ءِ نا درست بندغ بکنگ آ دریسر۔ خُلیس ءِ کہ او گاڑی ءِ پُلنگ آن گُڈ ڈرائیور ءِ کسفیسہ جون ءِ گیاوان ئٹ بِٹینو۔

جوْن ءِ ڈی ایچ کیو آ دننگا۔ اسپتال ذرائع تا پاننگ ءِ کہ کسفنگوک بندغ ءِ گُٹ ئٹ چِٹ شاغیسہ کسفنگانے۔

ایلو پارہ غا ضلع کیچ نا علاقہ کولواہ ئٹ درے نن ڈنڈار نا علاقہ نِگور ٹی نا درست سلاء بند بندغ آک بنجائی کسر آ کورولا اُلاخ ءِ توننگ نا کوشست کریر وے نہ سلینگ آ سُم کاری کریر ہراڑان اسہ نیاڑی ئس مرگ نا گواچی و چُنا تون اوار اسہ بندغ ئس بھاز ٹپی مسُنے، ہرافتے تربت آ دننگانے۔

بیران مروک و ٹپی بندغ آتا تعلق آشال نیک محمد بازار آن ءِ او ڈنڈار آ ڈاکٹر آ ہننگ ئسُر کہ نا درست بندغ آک اوفتے ٹِک کریر۔ علاقائی مخلوق نا پاننگ ءِ زالبول پڈ پُر اس ہرادے سُم تا گواچی کننگا۔

پنی آ خلقی شئر پاروک وہاب بگٹی نیستی تا گواچی مس۔ پِر و ہار اُرا ءِ تا دریر، چُنکا چنا تیتون پاش آسمان نا مونا زند گدریفنگ آ بیوس۔

بلوچی بولی ئٹ شئر پاروک وہاب بگٹی نا اُرا ءِ نصیر آباد ئٹ دیر درے ہراکان گڈ بیدس چھت و زند گدریفنگ نا ایلو آسراتی تیان بیدس پاش آسمان نا مونا بیوس زند گدریفنگ ءِ۔

وہاب بگٹی تینا جتا لہجہ و وڑڈول نا سوب آن پنی ءِ داڑان بیدس پنی آ جہانی تلہ کوک اسٹوڈیو ئٹ تینا فن ئنا درشانی ءِ کرے ہراڑان گڈ اودے جہانی پڑ آ ہم چاہنداری رسینگا۔

مخلوق حکومت آن خواست کرینے کہ وہاب بگٹی نا کمک ہلہلئی اٹ مرے۔ یاتی مرے داکان مالو بلوچستان آن تعلقدار فن کار آک بیماری و ایلو ویل آتا گواچی مسونو ہرافتا ہچ ءُ کمک نا ڈول اس مننگ کتنے۔

بلوچستان نا جتاء علاقہ آتیٹ پِر و نوکاپ نا سوب آن بُھس کاریک برجاء ءُ، پوسکنا حوال تا ردئٹ ڈیرہ بگٹی و اوستہ محمد ٹی اُرا تاچھت آتا تمنگ آن نیاڑی و نرینہ تون اوار ہشت بندغ بیران مسنو۔

شابیتی حوال تا رد ئٹ اوستہ محمد نا اسہ اُرا سے نا چھت تمنگ آن نیاڑی و چُنا تون اوار اسہ خاہوت نا پنچ بندغ اندن اسہ پین تدینیاس ڈیرہ بگٹی ٹی ہم مسنے ہراڑے نیاڑی و چُنا تون اوار مُسہ بندغ بیران مسنو۔

یاتی مرے کہ تدوکا اسہ تُو آن بلوچستان نا جتاء علاقہ آتیٹ نوکاپ و پِر تا سوب آن بھُس کاریک برجاء ءُ بلوچستان ٹی پِر و نوکاپ نادیر آن بیران مروکا تا کچ 200 آن زیات مسنے۔

پی ڈی ایم اے نا پاننگ ءِ کہ پِر تیان 670 کلو میٹر آ ساڑی جتا ءُ 6 کسر باز زیمی مسُنو اندن جتاء ہند آتا 18 پوہل پِنانے۔ پی ڈی ایماے نا پاننگ ءِ کہ تیوہ وڑ ئٹ اسہ لکھ 98 ہزار 461 ایکڑ ڈغار آ ساڑی کشت و کشار، سولر پیلٹ، ٹیوب ویل و بورنگ آتے ہم نسخانرسینگانے ۔

پی ڈی ایم اے نا رد ئٹ بلوچستان ٹی تیوہ وڑ ئٹ 22 ہزار 692 اُرا تے نسخان رسینگانے، 690 کلو میٹر آ ساڑی جتا ءُ 6 کسر زیمیمسُنو۔ پِر و نوکاپ آن 18 ان و بر نا پوہل آک پِنانو ۔ اسہ لکھ 7 ہزار 377 ہیٹ و میل ہم بیران مسُنو ۔

ای اُٹ شال ءِ تصویر اے نا
تین تو تولک تنیا تولک
بیرہ ای اُٹ
ای اُٹ ای اُٹ کسف
بیرہ ای اُٹ

ھو__ جاہیکہ تصویرے نا
تصویر ئٹ نی بشخندہ اُس
بشخندہ ٹی آڑسندہ اُس
آڑسندہ ٹی گواہندہ اُس
گوہندہ اُس تو زندہ اُس
زندہ اُس تو آہندہ اُس
آہندہ ٹی بشخندہ اُس
اھو جاہیکہ تصویرے نا
تصویر ئٹ نی بشخندہ اُس

ای اُٹ ایلو تصویرے نا
ای دیر اُٹ__؟

سمی اُٹ دین جان نا تینا
ندر اُٹ آبا جان نا تینا
درڈد آتو زندان نا تینا
ارمان اُٹ ارمان نا تینا

شال ئٹ جاہی تُولوکُٹ
ای اُٹ شال ءِ تصویرے نا

شال ئٹ چلتن مہردارے
کوچہ کوچہ بازارے
کورے نیکہ بیمارے
بندغ بندغ بیدارے
ماڑی پیسہ زر دار آکو
گاڈی گاٹ ءِ سڑدار آکو
کاٹم تے آ دستار اکو
شال ئٹ بلا شلوار آکو

وا ہم انتے بیرہ ای اُٹ
کنتو انتے کس بفک
انتے داڑے تولک اُس
انتے کس اریفپک کہ

اینو نے ئٹ سال مریک
اینو نے ئٹ سال مریک

اعجازسنگت

کوئٹہ و بلوچستان نا ایلو جاندمی علاقہ غاتے گیس تروکا بیست و چار قطر نا پیپ ءِ جمعہ نا دیگر آ دیر درے۔ پیپ ءِ دیر دننگ آن گڈ گیس بھازا علاقہ آتیا سرمننگ بند مس۔

سوئی سدرن گیس کمپنی (ایس ایس جی سی) نا سینئر افسر نا ردئٹ ضلع بولان نا علاقہ بی بی نانی ئٹ دریائے بولان آن گدرینگوک 24 انچ قطر نا گیس پیپ لین سیلابی دیر تون ہنا ہرانا سوب آن کوئٹہ تون اوار مستونگ، قلات، پشین و ایلو علاقہ آتے گیس تس بند مس۔

ایس ایس جی سی نا ملک موسیٰ پارے کہ دیر زیات مننگ نا سوب آن دائسکان پیپ ءِ جوڑ کننگ نا کاریم بناء مننگ کتنے۔ او پین پارے کہ ٹیم آک علاقہ ٹی سرمسونو ہرا زوت کاریم ءِ بناء کرور۔

چاہنداری تخوک ذرائع تا ردئٹ گیس واپس ہتنگ ئٹ 24 آن 48 لگو واہم زیمی علاقہ تے ایلو ڈول تیان گیس تننگ نا کوشست مننگے۔

بلوچستان ئٹ نوکاپ آن زیمی مروکا تا کمک کن کراچی ٹی خلوک اِرا کیمپ ءِ کلفٹن کنٹونمنٹ بورڈ نا کارندہ آک لُڑفنگ نا کوشست کریرو کیمپ خلنگ آ کنٹونمنٹ بورڈ نا کارندہ آک رضاکار آتا بےشرفی ءِ کریر، سی بی سی نا کارندہ آک ڈی سی ساؤتھ نا احکام آتے مننگآن نمن مسر۔

جمعہ نا دے کراچی نا پوش علاقہ تین تلوار کلفٹن و گزری نا علاقہ پنجاب چورنگی آ اِرا جتا ءُ کمکی کیمپ خلکر دا کیمپ آتا منظوریڈی سی ساؤتھ تسوسس ولے کلفٹن کنٹونمنٹ بورڈ نا کوالخواک ڈی سی ساؤتھ نا موکل نامہ آن نمن مسر و تین تلوار کلفٹن آ ساڑیکمکی کیمپ ءِ کاریم کننگ آن توریر۔

ایلو نیمہ غان گزری نا علاقہ پنجاب چورنگی آ ساڑی ارٹمیکو کیمپ ءِ بند کننگ آ بی وائی سی نا رضا کار آک سوگو سلیسر و کمکیکاریم تے برجاء تخار۔

کمکی کمیپ آتا اڈ تننگ ئٹی بی وائی سی ءِ کراچی بچاؤ تحریک، ویمن ڈیمو کریٹک فرنٹ، عوامی ورکرز پارٹی و پروگریسو اسٹوڈنٹسفیڈریشن نا تعاون تُد ءِ۔

بلوچ یکجہتی کمیٹی کراچی نا آرگنائزر آمنہ بلوچ کلفٹن کنٹونمنٹ بورڈ نا کنڈ آن کمکی کیمپ آتے لُڑفنگ آ فریشانی نا درشانی کریسہپارے کہ اوفتتون ڈی سی ساؤتھ نا موکل نامہ مننگ آن بیدس کلفٹن کنٹونمنٹ بورڈ نا کارندہ آک بی وائی سی نا رضاکار آتا بے شرفی ءِکریر و اوفتا کیمپ آتے لُڑفیر۔

آمنہ بلوچ کلفٹن کنٹونمنٹ بورڈ نا روشت نا مذمت کریسہ پارے کہ اندن گمان مریک کہ کراچی نا باز علاقہ آک بنجائی ادارہ آتا کالونیجوڑ مسنو۔ ہرا نا اخس کہ مذمت کننگ مرے کم ءِ۔

آمنہ بلوچ وزیراعلیٰ سندھ سید مراد علی شاہ آن خواست کرے کہ کمکی کیمپ آتے لُڑفنگ نا نوٹس ہلے۔

بلوچستان نا جتا علاقہ آ تیان پاکستانی فورسز و ڈھکوک ادارہ آک شش ورنا ءِ دزگیر کریسہ بے ڈس ءُ جاگہ سے آ درینو۔

حوال تا رد ئٹ کوئٹہ نا علاقہ سریاب روڈ آ نن نیمہ غا فورسز آک ہاسٹل آ چھاپہ خلیسہ چار ورنا خوانندہ ءِ بے دادی آن گڈ تینتو درینو۔

سریاب ہاسٹل آن زوراکی ئٹ بیگواہ مروک اسہ ورنا ئسے نا چاہنداری محمد امین ولد ممتاز حسن نا پنا مسنے ہرا سوراب نا ہندی سےولے ایلو مُسہ بندغ نا چاہنداری داسکان متنے۔

اندن ضلع کیچ ئنا بنجائی شار تربت آن یوسف ولد نثار پنی ءُ خوانندہ سے پنچ دے مُست زوراکی ئٹ بیگواہ کننگانے۔

بیگواہ مروک ورنا نا خاہوت نا پاننگ ءِ 11 اگست 2022 نا نن 9 بجہ آ جوسک فٹبال گراؤنڈ نا ہند آ پاکستانی فورسز آتا شش اُلاخ آساڑی کارندہ آک چھاپہ خلیسہ اولیکو سال ئنا خوانندہ یوسف نثار ءِ دزگیر کریسہ بیگواہ کرینو ہرا داسکان بیگواہ ءِ۔

اوفتا پاننگ ئس کہ اگہ یوسف نثار ڈوہداری اس کرینے تو اودے قانود نا ردئٹ پاش کریسہ عدالت ئٹ کیس خلیر و سزا ایتر۔

دانگان نوشکی آن اسہ ورنا سے نا بیگواہ مننگ نا حوال ہم رسینگانے۔ نمائندہ ٹی بی پی نا رد ئٹ نوشکی نا علاقہ قادر آباد آنتعلقداری تخوک حبیب ولد محمد عظیم ءِ بھلا عئید آن اسہ دے مُست پاکستانی فورسز آک زوراکی ئٹ بیگواہ کریسر ہراکان گڈ پن کروکورنا نا بابت ئٹ ہچو حوال رسینگتنے۔

یاتی مرے کہ بلوچستان ئٹ زوراکی نا بیگواہی تا تدینیک اسہ وڑ مونا بننگ ءُ، داکان مُست اندا زوت ئٹ آواران، خاران، کیچ، مستونگ وکراچی آن شش بندغ زوراکی ئٹ بیگواہی نا گواچی مسوسر۔

ایلو نیمہ غان مُسہ سال مُست پنجگور آن زوراکی ئٹ بیگواہ مروک اِرا ورنا قاسم و حسام بلوچ آجو مسنو و سال 2021 ئٹی کوئٹہ آنبیگواہی آن گڈ سی ٹی ڈی نا دو ٹی مروک ورنا خضدار نا ہندی بلال بلوچ ہم آجو مسنے۔

اندن بنجائی شار شال ئٹی بیگواہ آ بندغ آتا خاہوت آتا برانز برجاء ءِ۔ خاہوت آک تدوکا اسہ تون آن کوئٹہ ریڈزون ئٹی گورنر ہاؤس نامونا برانزی کیمپ خلیسہ تولوک برانز کننگ ءُ۔

زیارت تدینی آن پد گورنر ہاؤس نا مونا ریڈ زون آ برجاء زوراکی ئٹ بیگواہ مروک بلوچ آتا خاہوت آتا تولوک برانز ءِ اینو بیست و نوہ دےپورو مس۔

اینو ضلع کیچ ئنا جاگہی و 5 فروری 2015 آ کوئٹہ آن زوراکی ئٹ بیگواہ مروک اسرار برکت نا خاہوت تولوک برانز ئٹ اوار مس و برانزنا بشخ جوڑ مسر۔

اسرار برکت نا ہیڑ عائشہ برکت راجی حوالکاری میڈیا آ شینک کروک تینا اسہ ویڈیو بیان ئسے ٹی تینا ایلم نا آجوئی نا خواست کرے۔

بلوچ بیگواہ تا خاہوت آتا تولوک برانز ءِ اسہ تو اس پورو مس ولے داسکان اوفتا خواست آتا ایسری کن ہچو گامگیج متنے۔ تدوکا دےخاہوت آک ایلو سیاسی جماعت و خوانندہ تنظیم آتا باسک آ تون اوار اسہ برانزی ریلی اس ہم کشار۔

تولوک برانز ئٹ اینو ہم سیاسی و چاگڑدی باسک آک اواری نا درشانی کننگ کن بسر۔ و اینو ہم تیز پر ئنا چرجوئی برجاء ئس، ہراڑانتمبو تیٹ ساڑی برانز کروکا تے سخت ہڑاند تون مون تروئی تما۔

بلوچستان ئٹی تدوکا کہی دے آن برجاء ہار و نوکاپ نا دیر ئنا سوب آن جتاء تدینی تیٹ بیران مروکا بندغ آتا کچ 205 اسکانرسینگانے۔

بست و بند نا غُٹ کوشست آتیان بیدس کوئٹہ و ایلو علاقہ آتا نیام ئٹ ریلوے ٹریک و کسر تا زیمی مننگ نا سوب آن بلوچستان نا ڈغاریحوال بند مسُنے ۔

صوبائی حکومت بنجائی حکومت آن خواست کرینے کہ او بلوچستان نا علاقہ آتیٹ کمکی مڈی، انفراسٹرکچر نا بحالی و نوکاپ نا دیرآن زیمی مروک خاہوت آتا کمک کِن 60 ارب روپئی نا خاص پیکج ایتے۔

کوالخواک بیران مروکا بندغ آتا کچ 205 پاننگ ءُ و دو شمبے نا نن ضلع پشین نا علاقہ سرانان نا خڑک پنچ بندغ ءِ دیر دریسس ہرافتیٹ5 سالی چُنا نا جون سرانان نا علاقہ سید حمید ریور آن خننگاسس ۔

صوبائی ڈیزائنر مینجمنٹ اتھارٹی سئے شمبے نا نن اسکان بلوچستان ٹی بیران مروکا بندغ آتا کچ ئنا بابت ئٹ حساب شینک کتویسس۔

بلوچستان ءِ ایلو علاقہ آتون تفوکا ریلوے ٹریک تدوکا کہی دے آن نوکاپ نا دیر ئٹی ٹُبانے ہرانا سوب آن مسافر ریل و مال گاڑی سروسبند ءِ، و ریلوے کوالخواک اندا سرپند مریرہ کہ ٹریفک نا یلہ کننگ ٹی داسکان منہ دے پین لگو ۔

ریلوے کوالخواہ تا پاننگ ءِ کہ تدوکا مُسہ دے آن کوئٹہ آن کراچی ، پنچاب و خیبرپختونخواہ کِن ہِچو ریل اس رادہ کننگتنے ۔

بلوچستان حکومت صوبائی اسمبلی ٹی منوک اسہ قرارداد اس اسلام آباد آ رادہ کرے ۔

صوبائی اسمبلی آن منَوک قرارداد ئٹی پاننگانے کہ مڈی تا کمبوتی نا سوب آن بلوچستان نوکاپ آن بُھس مروکا علاقہ آتا بحال کننگ وزیات نسخان ارفوکا بندغ آتے مالی کمک کننگ کپک۔

قرارداد ٹی صوبائی حکومت نا پاننگ اس کہ او بلوچستان نا 32 بُھس مروک ضلع آتا بحالی کِن کم و ود 50 آن 60 ارب روپئی ناخصوصی پیکج کن بنجائی حکومت تون ہیت کیر و زیمی مروک علاقہ آتا غُٹ یوٹیلیٹی بل و زرعی وام تے بخشر۔