کوہ سلیمان ئٹ اسہ وڑ پر مننگ نا سوب آن جاندمی پنجاب نا ضلع راجن پور ئٹی نوکاپ نا دیر سر مس، کہی خلق آتے نوکاپ نا دیرارفے۔

نوکاپ نا دیر آن یک صد و نود خلق زیمی مسنو۔ ضلعی بست و بند نا کنڈ آن بندغ آتے رکھوک جاگہ غا تیا سر کننگ نا کاریمک برجاءءُ۔

بلوچستان نا جتا ضلع آ تیٹ پرک دوارہ بناء مسنو، پشین ئٹ ڈیم ئنا پِننگ آن کہی خلق آتے دیر ارفینے۔

اندن نوکاپ نا دیر ئٹ ٹبیسہ ہفت بندغ بیران مسنو۔ خشنوب ئٹ یک صد آن زیات اُرا، ڈغار، ٹیوب ویل و ایلو کُل گڑا تے دیر ارفینے۔

پر و نوکاپ نا دیر ئنا سوب آن بلوچستان و پنجاب تون تفوک علاقہ آ تیکن فلڈ وارننگ تننگانے۔

ساکران، کنراج، وندر، لاکھڑا، بیلہ و اُتھل ئٹی ہم شنزہ مسنے، اندا وڑ بیلہ نا جل ئٹ ہم دیر ئنا ودنگ آن شال آ ہنوکا کسر زیمیمسنے۔

ہرنائی کھوسٹ تدینی نا بر خلاف پشتون جماعت آتا کنڈ آن برانز آتا چرجوئی اینو ہم برجاء ئس، برانز کروک آک خالق داد نا جون ءِکوئٹہ ہرنائی نا بنجائی کسر آ تخیسہ برانز آ تولوک ءُ۔

کھوسٹ تدینی نا برخلاف برانز ئٹ علاقہ نا بھلا، زالبول و چنا تا بھلو کچ ئس اوار مس ہراڑے زالبول و چناک برانز کریر۔ ہرنائی تدینی نابرخلاف برانزی تا دو تیٹ مونو بیرک ئس و ہرنائی آن فوج و ایف سی نا دمدستی کشنگ نا خواست کننگ ئسر۔

پنچمی دے ہم برانز کروکا فورسز آتا سم کاری آن بیران مروکا پشتون باسک خالق داد نا جون ءِ کسر آ تخیسہ انصاف نا خواست کننگءُ و برانز کروکا خالق داد نا جون ءِ ہمو وخت اسکان دفن کننگ آن نمن مسنو ہرا وخت اسکان کہ سکیورٹی فورسز آتا برخلاف مقدمہخلنگپک ہرافتیا سُم کاری کننگ نا دوبہ ارے۔

یاتی مرے 13 و 14 اگست نا نیامیکو نن سکیورٹی فورسز آتا کیمپ آن ہندی آبادتی تیا سُم کاری نا سوب آن مُسہ بندغ ٹپی مسوسر ہرانا برخلاف چانڑدہ اگست نا سہب آ ہندی بندغ آک مُچ مریسہ ایف سی کیمپ ئنا مونا برانز کننگ خواہسُر تو مُچی آ ہم سکیورٹی فورسزآک سُم کاری کریر ہرا ٹی اسہ بندغ اس بیران و شش ٹپی مسر۔

کھوسٹ ئٹی ہندی بندغ آتا برانز آ سکیورٹی فورسز آتا سُم کاری نا ویڈیوک ہم سوشل میڈیا غا تالان مسر۔

ہرنائی کھوسٹ تدینی نا برخلاف تولوک برانز ئٹ اوار مروکا حکومت ءِ تینا خواست آتے پارینو، خواست آ تیٹ سُم کاری نا تدینی ٹی تُدسکیورٹی کارندہ آتا برخلاف مقدمہ خلنگ، کھوسٹ تدینی نا پٹ و پول کن جوڈیشل انکوائری اڈ تننگ، ضلع ہرنائی ٹی غٹ اختیار آتےسویلین بست و بند نا حوالہ کننگ نا خواست و آباتی تا تہٹی ساڑی سکیورٹی فورسز آتا چیک پوسٹ آتے مُر کننگ ہم اوار ءِ۔

برانز کروکا تا پاننگ ءِ کہ اگہ ننا خواست آتے حکومت منیتو گُڑا برانزیک جون تون اوار کوئٹہ نا کنڈ آ مارچ کرور و خواست آتا پورومننگ اسکان وزیراعلی ہاؤس نا مونا تولوک برانز کرور ۔

ہرنائی کھوسٹ تدینی نا خلاف بلوچستان نا ایلو شار کوئٹہ، چمن، قلعہ عبداللہ، لورالائی، مسلم باغ، قلعہ سیف اللہ ٹی ہم برانز کننگاو ہرنائی ٹی ہڑتال نا پڑو ہم کننگانے۔

سیو اسٹوڈنٹس فیوچر نا ترجمان تینا شینک کروک بیان ئٹ پارے کہ ایچ ای سی نا کنڈ آن بناء کروک ” USAT test” ءِ مخصوصسیٹ آتیا داخلہ ہلنگ نا اومیتوار بلوچستان نا خوانندہ آتیکن رجسٹریشن نا ایسری تاریخ آن بیرہ اِرا دے مالو چٹی کننگ نا کوشست ءِنمن کینہ۔

اونا پاننگ ئس کہ بلوچستان نا پد تموک و بد حالی نا گواچی خواننگ جاہ تا خوانندہ آتے بنجائی حکومت و پنجاب نا خوانندہ آتون مونپہ مون کریسہ میرٹ نا خواست آتے پورو کننگ افس۔

ذمہ وار ادارہ آتے ٹیسٹ ءِ خوانندہ آ تیا چٹی کننگ آن مُست دا ہیت ءِ ہم نظر ئٹ تخوئی ءِ کہ بلوچستان نا خوانندہ آک پنجاب ناخوانندہ آتیان چپ آسرات آ خواننگ جاہ، لیپ ٹاپ و ایلو اسکیم و انٹرنیٹ نا دوئی مننگ آن ہم اسہ وڑ پد تموک ءُ۔

ترجمان نا پاننگ ئس کہ ڈائریکٹوریٹ نا کنڈ آن ہلنگوکا داخلہ ٹیسٹ و اونا وڑ و ڈول آ خوانندہ آک باور کیرہ، برجاء ٹیسٹ، تاریختنسیخ، رجسٹریشن نا وڑ و ڈول و فیس خوانندہ آ تیکن فریشانی نا سوب جوڑ مننگ ءِ۔

اوفتا ودیک پاننگ ئس کہ تنظیم خوانندہ آتا اکیڈمک کمک و سروکی نا بابت ئٹ کاریم کننگ ءِ و پن کروک گام ئنا سوب آن خوانندہ تپہ ٹیہڑ دُڑ و بے چینی ءِ نظر ئٹ تخیسہ دا گام ءِ ہچ وڑ ئٹ ہم تعلیم دوست تکپنہ و دادے منپنہ ہم۔

ایسر ئٹ ترجمان نا پاننگ ئس کہ اگہ ذمہ وار آک دا فیصلہ آ زوت گام ارفتور و خوانندہ آ تیکن اسہ مثبت ءُ کسر اس کشتور تو تنظیم ناخوانندہ آتا ہم کوپئی ٹی سخت ءُ گام ارفنگ آ بیوس مرون ہرا نا ذمہ وار ایچ ای سی مرو۔

بلوچستان نا ضلع لورالائی نا علاقہ رباط ئٹی نیاڑی و چنا تون اوار مُسہ بندغ خون کننگار۔

ایس پی دکی غلام حسین نا ردئٹ ہر مُسہ بندغ  اُراٹی تھڑِنگانو۔ ہرافتیٹ سیف اللہ ، اونا زائیفہ و شش سال ئنا چُنا ہم اوار ءِ۔

بست و بند جون تے ہسپتال آ درے ہراڑے ودک پٹ و پول بناء کننگا۔

حوال تا ردئٹ تدینی تدوکا نن مسنے۔ خون مروک و خونی الّہ ملࣿ ءُ۔

پولیس ڈوہدار عباس ءِ کچلاک آن دزگیر کرینے، سوب پٹ و پول کننگ آن گُڈ سما تمو۔

اندا وخت بلوچستان نا صنعتی شار حب ٹی سُم کاری نا اسہ تُدینی سے ٹی نیاڑی اس مرگ نا گواچی مس ۔

شابیت حوال تا ردئٹ امیر آباد نا علاقہ ٹی سُم کاری نا سوب آن پنجا سالی ءُ نیاڑی اس بیران ، جِدمادر  آ مسڑ زیات ٹپی مسُنے ۔

پولیس نا ردئٹ نیاڑی و اونا جِدمادر آ مسڑ گلیکسی ٹاؤن حب نا ہندی ءُ ہرافتے گلشن آباد ئٹ ٹِک کننگا تدینی نا سوب ذاتی جیڑہ اسپاننگ و جون و ٹپی مروک مسڑ ءِ جام میر غلام قادر ہسپتال حب آ دننگا ہراڑے پولیس تدینی نا پٹ و پول بناء کرے۔

اوغان طالبان دعویٰ کرینے کہ ہزارہ کمیونٹی آن تعلقداری تخوکا کمانڈر مولوی مہدی سئے شمبے نا نن ایران آ ہِننگ نا کوشست کننگئس و کسر ئٹ ہرات و ایران نا سیمی علاقہ ٹی خلنگا۔

طالبان نا وزارت دفاع نا پاننگ ءِ کہ طالبان تون بغاوت آن گڈ تینا منَہ سنگت تون تدوکا دے تیٹ فرار مننگ نا کوشست کننگ ئس کہ ہراتو ایران نا سیمی آ علاقہ ٹی تدوکا نن خلنگا۔

ولے وزارت دفاع داسکان میڈیا آ اونا جون یا ایلو شاہدی تے پاش کتنے کہ ہراڑان دا پک مرے کہ گواچنی او خلنگانے۔

انڈیپنڈنٹ فارسی نا رد ئٹ اوفتے اسہ حوال تروک اس تینا پن ءِ پاش کپننگ نا شڑت آ حوال تسنے کہ مولوی مہدی دو شمبے نا دےڈغاری کسر ئٹ ایران آ ہناسس و سئے شمبے نا دے ایرانی فورسز آک اودے دزگیر کریسہ طالبان نا دوٹی تسوسر۔

حوال تروکا نا پاننگ ءِ کہ مہدی زندہ ءِ و طالبان اوڑان اونا سلاء بند ٹولی نا بابت ئٹ سر سوج کننگ ءِ ہرا داسکان ہم بلخاب نا مش تیٹساڑی ءُ و اوفتے چُٹفنگ آن گڈ مہدی ءِ پاہو تننگ نا ارادہ تخرہ۔

حوال تروکا نا ودیک پاننگ ئس کہ اسلام قلعہ و تائباد نا نیام ئٹ سیمی آ ہند آ تیا ساڑی فورسز آتا کمانڈر آک سئے شمبے نا نن نیمہغا وزارت دفاع، وزارت داخلہ و طالبان انٹیلی جنس ءِ حوال تسر کہ او مولوی مہدی ءِ خلکنو۔ اوفتیان منٹ اس دا ہم پاریر کہ او مہدی ءِدزگیر کرینو و اودے کابل آ ہتنگ ءُ۔

طالبان نا بازنگا باسک آک ٹوئٹر آ مولوی مہدی نا عکس ءِ پوسٹ کریر و لکھار کہ اودے زندہ دزگیر کننگانے۔

ایلو نیمہ غان مولوی مہدی نا خڑک ئنا بندغ آک پک کرینو کہ طالبان نا کنڈ آن شینک مروکو اسہ عکس ئسے ٹی او طالبان نا قیذ ئٹی ءِ۔

ایران نا کوالخواک مالو آن مولوی مہدی و بلخاب نا جنگ ءِ “امریکہ نا فتنہ” پاریسر۔

ایرانی صدر نا خصوصی ایلچی برائے اوغانستان حسن کاظمی قمی تقریباً اسہ تو اس مالو اسہ ٹوئٹ ئسے ٹی لکھاسس کہ بلخاب ناجنگ امریکہ نا اڈ تروک ئسے و دا نا مسخت ہڑ دُڑ تالان کننگ و خانہ جنگی بناء کننگ ءِ۔

مہدی مجاہد، ہرا مولوی مہدی نا پنا چاننگک، جولائی نا بنائی دے تیٹ تینا کہی سلاء بند سنگت آ تون طالبان تون جھڑپ نا سوب آنجتا مریسہ مش تیا ہناسس۔

او دعویٰ کریسس کہ طالبان حکومت اوغانستان ئٹ ہزارہ و شیعہ تا حق آتے اسُل خن ئٹ ہتنگ اف و تاغت نا زور آ شیعہ تا پوزیشن ءِنزور کننگ نا کوشست کننگ ءِ۔

جولائی نا بناء ٹی بلخاب نا مشی آ علاقہ آ تیٹ مولوی مہدی نا عکس شینک مسس ہراٹی اوڑتون اوغانستان نا مسکوہی حکومت ناحوالکاری و دود ربیدگی وزیر و بامیان نا گورنر طاہر ظاہر ءِ ہم شان تننگاسس۔ اوغانستان آ طالبان نا حکومت ان بیدس ہم ڈیھ ءِ یلہکپروک طاہر ظاہر اسہ تو ئسے اسکان بلخاب ئٹی ئس ولے داسا کس ءِ سما اف او ہرانگ ءِ۔

بلوچستان نا ضلع پشین نا علاقہ آن بیگواہ مروک وکیل نا جون خننگانے ۔

پولیس نا ردئٹ پشین نا علاقہ بوستان ٹی اسہ جون ئسے نا حوال رسینگ آن گڈ جون ءِ دوئی کریسہ کوئٹہ آ دننگا،  ہراڑے اونا چاہنداری پشین نا جاگہی صدام خان کاکڑ نا پنا مس۔ پولیس نا رد ئٹ دا بندغ ءِ سُم خلیسہ خون کننگانے۔

تدینی نا حوال رسینگ آن گُڈ وکیل آتا بھلو کچ اس سول اسپتال کوئٹہ آ رسینگا، اندن جون ءِ المّی کاروائی آن گُڈ خاہوت نا حوالہ کننگا۔

بست و بند نا ردئٹ صدام خان کاکڑ اسہ وکیل اس ئس ہرادے تدوکا نن نا درست آ بندغ آک اُرا آن بیگواہ کریسہ تینتون دریسُر ، بست وبند تدینی نا گیشتر پٹ و پول کننگ ءِ ۔

بلوچستان بار کونسل نا پارہ غان تدینی نا برخلاف تیوہ بلوچستان و عدالت آتا بائیکاٹ کننگ نا پڑو کننگانے۔ بلوچستان بار کونسلحکومت و بست و بند وکیل نا خونی تا دزگیر کننگ  نا خواست کرینے ۔

بلوچستان نا جتا علاقہ آتیٹ پِر آن گڈ اُست و پڈ ئنا دین  تالان مسنے، ہرا نا سوب آن کیچ، پنجگور و خضدار تون اوارجتا علاقہ آتیٹکہی بندغ آک مرگ ئنا گواچی مسنو۔

تربت نا کیب ئنا علاقہ گوگدان ٹی اینو اسہ چُنا سے تون اوار مُسہ بندغ کذیت کریر، علاقائی حوال تا ردئٹ گوگدان ٹی گیسٹرو دین ئناتالان مننگ آن آباتی نا اسہ بھلو بشخس اس زیمی مسنے اندن گیسٹرو نا باروٹ اخبار و سوشل میڈیا آ حوال آک ہم مونا بسنو ولےمحکمہ جانجوڑی نا پارہ غان داسکان دا بارو ئٹ ایکشن ہلنگ متنے۔

ایلو پارہ غان خضدار نا تحصیل وڈھ آن ہم حوال ارے کہ تدوکا پِر تیان گُڈ غُٹ تحصیل آڑینجی نا کہی علاقہ زانبری ، جلاب ، نلی ،ٹیبی ، بوہر ، ماس ، کشاری ، سیلوڈن ، کھوروی ، سورنارو ، باسنکانی تون اوار گیشتر علاقہ آک گیسٹرو و ڈائریا تون اوار پین بیماریتا گواچی ءُ ۔

آڑینجی ٹی چُنا سے تون اوار چار نیاڑی بیران مسُنو ۔ تدینی آن گُڈ زیمی مروک علاقہ آتیٹ محکمہ جانجوڑی نا میڈیکل ٹولیگِدرینگاسس ولے دین ئنا زیاتی علاقہ ٹی ساڑی ءِ ۔

یاتی مرے کہ داکان مالو پنجگور ٹی گیسٹرو دین ئنا تالان مننگ آن چار چُنا بیران اندن کہی بندغ آک زیمی مسوسر ۔

بلوچستان نا ضلع موسٰی خیل ئٹ کمکی کارندہ آک نوکاپ نا دیر آن 9 جون کشار۔

بلوچستان نا جتا ضلع لسبیلہ، کلعہ عبداللہ، خضدار، کیچ، بارکھان، پشین، موسٰی خیل و ایلو جاگہ آ تیٹ پر و نوکاپ نا دیر تا بھسکاریک داسکان برجاء ءُ اندن ضلع موسٰی خیل آن 9 بندغ نا جونک خننگانو۔

موسٰی خیل نا اسسٹنٹ کمشنر عمران مندوخیل نا پاننگ ءِ کہ “ نو بندغ نا جون نوکاپ نا دیر ئٹ خننگانے۔”

اونا پاننگ ئس کہ ہار و نوکاپ نا دیک ضلع نا جتا ہند آ تیٹ بھس کاری کرینو، دا ضلع مالو آن بلوچستان نا پد تموک ضلع آ تیان اسٹءِ۔

یک شمبے نا نن مروکا ہار آن ضلع نا جتا ہند آک نوکاپ نا دیر ئنا گواچی مسنو۔ ضلعی بست و بند زیمی مروک ہند آ تیٹ حال حوال ناکوشست کننگ ءِ۔

اسسٹنٹ کمشنر عمران مندوخیل نا پاننگ ءِ کہ “ ننا لیویز فورس باز انگا بندغ آتے کمک کرینے ہرا دا ویل آن زیمی مسوسر۔”

بلوچستان نا سی و چار ضلع آن بیست و شش ضلع ہار و نوکاپ نا دیر تا بھس کاری تیان زیمی مسنو۔ دا بابت ئٹ میر ضیاء اللہ لانگونا پاننگ ءِ کہ غٹ ڈپارٹمنٹ و بست و بند آتے دا حالیت تون مون تننگ نا الرٹ تننگانے۔

جانی نسخان آن بیدس مخلوق مالی نسخان تون ہم مون تننگ ءِ۔ بیست و شش ضلع ٹی 5,00,000 ایکڑ ڈغار نوکاپ نا دیر آن زیمیمسنو۔

کلعہ عبداللہ نا ہندی سعید علی اچکزئی نا پاننگ ءِ کہ کنا باغ آتے دیر درینے، کنے سال تا سال لگاسس دا باغ آتے درفنگ کن۔ ولے منَہساہت ئٹی دیر کنا غٹ باغ آتے بھس کرے۔”

داکان بیدس بلوچستان نا جتا ہند آ تیٹ کسر، ڈیم و پہل آتے ہم دیر درینے۔

ازمکار و پنی آ شئر پاروک مسلم حمل پارینے کہ بلوچستان تینا وخت ئنا سخت حالیت آن گدرینگ ءِ۔ بلوچستان ئٹ دنو اُراس یا ہنکیناس اف ہرا تینا بندغ آتا جون تا زی آ ماتم کننگ اف۔ ہر اسہ اُرا ٹی اسہ نا اسہ بندغ اس کہی سال تیان بیگواہ ءِ۔ اوفتا لمّہ و ہیڑکشال، کراچی و اسلام آباد نا کسر تیا عکس آ تتون اوار برانز کننگ ءُ۔ دا حالیت آتا خننگ آن گڈ اسہ بلوچ ئسے نا میار ءِ کہ اگہ نن بلوچلمّہ و ہیڑ تا خن تا خڑینک آتے ارپن و آجوئی کن خوشی کین گُڑا دا اوفتا ٹپ آ تیا بے چھٹ تننگ نا وڑو کاریم اس مرو۔ و فن ئناسوداگری مرو۔

او پارے استو آن پنی آ شئر پاروک عارف بلوچ و شہجان داؤدی ءِ مخلوق شیف خلنگ ءِ کہ او امر دُن دا حالیت ٹی خوشی کننگ کیرہ۔اینو بلوچستان آ زور آور نا جبر کُل ئنا مونا ٹے۔ اوفتا خف توپننگ نا ہیت و تران ہم مننگ ءِ۔

مُستی پاننگ اس ولے خف توروک و شئر پاروک آک دا ہیت و گمان آن بے خیال ءُ کہ اسہ نیمہ غا کراچی یونیورسٹی نا خوانندہ حیاتبلوچ نا جون اونا لمّہ نا کُٹ آ تخوک ئس و ایلو نیمہ غا اندا بندغ آک شئر پاروکا تتون خوشی کننگ ئسر۔

مسلم حمل پارے کہ ننا پن و ننا شرف ننا سرزمین تون تفوک ءِ۔ اگہ ڈیھ و ننا بولیک مفس گُڑا ننے میار اف۔ کنے ہم دننگا مجلس تیٹخوائفنگ مسنے ولے تینا فن و بولی ءِ بہا کننگ کپرہ۔ اندا سوب آن دننگا مجلس تیٹ اوار مفرہ۔ اگہ دُنی آ کنا زند ہم کائک کنے افسوزاف۔

بلوچی بولی نا پنی آ شئر پاروک منہاج مختار چاگڑدی حوالکاری میڈیا ٹوئٹر آ تینا اسہ ٹوئیٹ ئسے ٹی پارے کہ ہمو بلوچ شئر پاروکآک کہ پاکستان نا دروغ ئنا خوشی نا دے آ ہڈ تروک مجلس تیٹ شئر پارہ او بلوچ افس انتئے کہ اوفتے بلوچ لمّہ و ہیڑ تا فریات، جشوکجون و بلوچ راج ئنا غلامی تون ہچ چکار اف۔ بلوچ راج دننگا شئر پاروکا تیان مون ہڑسے۔

منہاج مختار دا ہیت آتے اسہ ویڈیو اس شینک کریسہ پارے ہرا ٹی بلوچی بولی نا پنی آ شئر پاروک شاہجان داودی چانڑدہ اگست نا ردئٹ اڈ تروکو اسہ مجلس ئسے ٹی شئر پاننگ ئس۔

دا مجلس استو ننکان کیچ ئنا بنجائی شار تربت ٹی ایف سی نا کنڈ آن اڈ تننگاسس ہرا ٹی شاہجان داودی بلوچی بولی ئٹ شئر پاننگئس ولے شینک مروک وڈیو ٹی پاش خننگ مریک کہ مجلس ئٹ اوار مروکا بندغ آتا کچ باز کم ءِ و زیات کڑسیک خالی ءُ۔

یاتی مرے داکان مالو ہم دننگا مجلس آتیٹ ہنوک شئر پاروک و ادیب آتیان مخلوق مون ہڑسانے و اوفتیا نغد کاری کرینے۔