بلوچستان نا جتاء علاقہ آتیٹ تُرند پِر مننگ نا لڑ برجاء ءِ ۔
تدوکا دے طوفانی پِر ضلع کیچ سیف اللہ نا تحصیل مسلم باغ ءِ بُھس کرے ، ہرانا سوب آن کہی اُراتے ہم نسخان مس۔
ضلع لسبیلہ نا ہند آ لُنڈا جو کراچی آن کوئٹہ آ ہنوکا کسر ءِ ہم سیلابی دیر درے ہرانا سوب کوئٹہ آن کراچی آ ہِنوک زمینی کسر بندمس۔
پِر و نوکاپ نا دیر تیان پین شش بندغ بیران مسُر ، بیران مروکا تا کچ 182 مس۔
کوئٹہ تون اوار بلوچستان نا جتاء علاقہ آ تیٹ جاگہ اس کم تو جاگہ اس تیز پِر تا لڑ برجاء ءِ ۔ محکمہ مُد ئنا ردئٹ لسبیلہ ، بارکھان ،دکی ، زیارت ، سنجاوی و چمن ٹی تُرند پِر مسنے۔
قلعہ سیف اللہ نا تحصیل مسلم باغ ٹی طوفانی پِر تا سوب آن کہی علاقہ آ تیٹ دیر بسنے، آرگس خلق ، سلطان آباد ، جان آباد ، شینخڑ نا علاقہ آتے نوکاپ نا دیر بھُس کرینے ۔
زیمی مروکا تا غاو ءِ کہ سیلاب تیوہ خلق ءِ بُھس کرینے، پی ڈی ایم اے و ضلعی بست و بند نا پارہ غان داسکان زیمی مروکا علاقہ آتیٹریسکیو آپریشن بناء کننگتنے ، حکومت زیمی مروکا تے زُوت کمک کے ۔
کمشنر قلات داؤد خلجی نا پاننگ اس کہ لنڈا جو پُل سیلاب ٹی بُھس مسُنے ، الس کوئٹہ کراچی کسر تیا سفر کننگ آن پہریز کیر ۔
ایلو پارہ غان پی ڈی ایم اے نا شابیت حوال تا ردئٹ بلوچستان ٹی پِر و سیلاب آن پین شش بندغ ئنا گواچی مسر، بیران مروکا بندغ آتاحساب 182 مس ، 18 ہزار آن زیات اُرا تے نسخان مس ۔
صوبائی ڈیزاسٹر مینجمنٹ اتھارٹی ( پی ڈی ایم اے ) کوالخواہ تا پاننگ اس کہ مروک پِر تا سوب آن زیمی علاقہ آتیٹ کمکی کاریمکبناء کننگانو ۔
