بلوچ لٹریسی کیمپئن نا رد ئٹ بھلو پروگرام اس اڈ تننگ مرو۔ سیاسی لبزانکی و تعلیمی مراگش آتا اڈ تننگ نا روانی برجا مرو، و ہنکین آتیکن لیڈر شپ کلاس اڈ تننگ مرو، علم و اواری نا خاطران سنگت آک جہد ءِ اندا وڑ روان تخر ۔ بُنجاہی کماش
بلوچ اسٹوڈنٹس ایکشن کمیٹی نا مسٹمیکو بنجاہی دیوان بنجاہی کماش نا کماشی ٹی کراچی ٹی اڈ تننگا، دیوان ٹی گدرینگوکا رپورٹ، نغد کاری نشست، تنظیمی امور، عالمی و ہندی سیاسی ساڑی حالیت آگپ و تران کننگ آن پد بروکا لائحہ عمل ٹی پوسکُنو فیصلہ ہلنگا۔
پوسکن ہلوکا فیصلہ غا تا رد اٹ بلوچ لٹریسی کیمپئن نا کارم تیٹی ترندی ہتنگو و لٹریسی کیمپئن نا باروٹ کوئٹہ ٹی بھلو پروگرام اس اڈ تننگ مرو، لبزانکی و علمی مراگش تا ہمو روانک کہ گل نا کنڈان مسونے اندا روانی بروکا چار تو ٹی اندُن روان مرو۔ بلوچستان یونیورسٹی آن گُم و بیگواہ مروکا سنگت آک فصیح و سُہیل نا آجوئی کن ایلو تینظیم آتون اوار جہد زیات کننگ مرو۔
دیوان ٹی ہیت کریسہ بنجاہی کماش پارے کہ بلوچستان نا تعلیمی جاگہ تیٹی حالت آک دے پہ دے آن خراب مننگ ءُ۔ اسے کنڈا بلوچ ہند و ڈیہہ تیٹی تعلیمی جاگہ غاک چُنکو کچ ئسے اٹ اریر، و ارٹیمیکو کُنڈا ہندافتیٹی خوانوکو ماحول اس خن ئٹی بفک، بلوچستان نا کل علاقہ تیٹی تعلیمی جاگہ آتا اسکول آتے ماڑی ہم اف۔ باز جاگہ غا اسکول تیٹی استاد آک ساڑی افس و بھاز جاگہ غا چُناک آسمان نا شیف آ خواننگو۔ ایلو کُنڈا اگہ کالج آتا خواننگ نا ماحول ءِ اوننگ مرے گُڑا بلوچستان ٹی شال و تربت آن بیدس ایلو جاگہ تیٹی کالج آک کاریمی افس و ہچ وڑ ئنا خواننگ اف اوڑے یا اگہ ارے تو نِزور ءِ۔ اندا خاطران بلوچستان نا ایلو جاگہ تا نودربر آک خواننگ کن شال ئنا کُنڈا بریرہ۔ ہمو نودر بر آک بلو کچ اسیٹ کوئٹہ نا کالج و اکیڈمی تیٹی خواننگ کن بیوس کننگ مننگ ءُ۔
او پارے حکومت اسے کُنڈا تعلیمی ایمرجنسی نا ہیت ءِ کیک و ایلو کُنڈا بلوچستان نا ایلو شار تیٹی تعلیمی جاگہ غاک سال تا سال بند ءُ و دا رد ئٹ ہچو وڑ ئنا کارم کننگ افس۔
او مُسی پارے بلوچستان نا بُنی تعلیمی جاگہ تا خرابی نا وجہ غان نودر بر آک چنکو کچ اسیٹ یونیورسٹی اسکان رسینگنگ ءُ، او ایلو کُنڈا یونیورسٹیک خوانفنگ و ریسرچ نا زیہا جوانی ئٹ کارم کننگ افس۔ ہندا خاطران دا یونیورسٹی تیان خوانوکا پیشتموکا نودر بر آک چاگرد ٹی اسے جوانو رنگ اسیٹ کارم کننگ افس۔ یونیورسٹی تیان نودر بر آتا گم و گاری اسے بھلو ڈکھ ئسے، و دا وڑ ئنا کاریمک ورنا تے خلیس نا آماچ کننگو۔ اگہ خوڑتی ئٹ اوننگ مرے گُڑا گدرینگوکا سال ٹی یونیورسٹی تیان نودر بر آتا کور گم کننگ ٹی ترندی ہتنگ مسونے، و سد آتا کچ اٹ نودر بر آک بیگواہ کننگ مسونو۔ دا نا بھلا مثال 1 نومبر 2020 بلوچستان یونیورسٹی آن ارفنگوکا اِرا ورنا سہیل بلوچ و فصیح بلوچ ءُ کہ اوڑے سد آتا حساب اٹ سی سی ٹی وی کیمرہ تا ساڑی مننگ تون اوار ہاسٹل آن نودر بر آک ارفنگرہ و بیگوا کننگ مریرہ و دا حوالہ اٹ یونیوسٹی نا انتظامہ چُپ و گنگ ءِ۔ نودر بر آتا مُسے ہفتہ نا احتجاج ءِ تولنگ آن ہم داسکان ہڑتوما ورناک گُم و گار ءُ۔
او پارے کہ ورنا تا بیگواہی آن پد حکومت نا کنڈان بلوچستان یونیورسٹی نودربر آتا بازیابی اسکان ہر وڑ ئنا کارم تیکن بند مس۔ دا رد ئٹ یونیورٹی تون تفوک نودر بر آتا کلاس و امتحان آک مننگ افس و بھازی ورنا تا کیرئر ٹی اڑاند ودی مننگ ءِ۔ گل نودر بر آتا جیڑہ و جنجال آتے جوانی ئٹ پوہ مریک، و چائک کہ یونیورسٹی نا بند مننگ آن امتحان و کلاس آتا ویل ودی مریک، ولے نودربر آتے پوہ مروئی ءِ کہ اسے کُنڈ آ کلاس و امتحان آتا ویل ءِ گُڑا ایلو کُنڈا اِرا ورنا نا زند نا سوال ءِ، و دا وڑ نا تعلیمی جاگہ و امتحان آتے امر کین کہ ہراڑے زند ءِ اہمیت اف۔ وختس کہ بلوچستان نا ورناک وڑ وڑ نا جیڑہ غاتا آماچ ءُ گڑا ہندا جنجال تیٹی کلان بھلا ورنا تا گُم و بیگواہی ءِ، ہندا خاطران دا وڑ ئنا حالت آتیٹی نودر بر آک تینا جند آن پیشتمسہ اواری نا سوچ ءِ زیات اہمیت ایتر و گار ءُ بیگواہی وڑ نا غیر انسانی ءُ غیر قانونی کارم تا خلاف جہد کیر۔
گُڈ سر ء کماش ہیت کریسہ پارے کہ بیساک نا باسک آک اسے سوگوْ ءُ نظریہ اسیٹ گل نا کاریم تے مونا دننگو، گل نا کنڈان گدرینگوکا چار توہ نا تہٹی کوئٹہ، حب چوکی، ڈیرہ خازی خان و لیاری ٹی بھلو سیاسی و ادبی پروگرام آتا اڈ تننگ ہندا پاش کیک کہ گل نا کاریمک محکمی اٹ مونا ہنیسہ ءُ، گل نا کارم تیٹی بھازی و جوانی نا بُنیادی وجہ گل نا سنگت آتا مخلص آ جوزہ و گل نا سوگوْ آ نظریہ “راج دوستی” ءِ کہ دا نا سوب آن گل ہمو جاگہ تیا مراگش اڈ تننگے ہرا جاگہ غاک بلوچستان آن انتظامی رد اٹ مُر کننگانو، گل نا سنگت آک بلوچستان ٹی ہندا وڑ ئنا مراگش اڈ تننگ نا کوشست کیر، و علم و اواری نا خاطر کن فکری ءُ نظریاتی سنگت آک تینا جہد ءِ ہندا وڑ برجا تخر، و ایلو بلوچ نودر بر آتے جہد تون اوار مننگ نا ہمت ایتر۔
گدرینگوکا رپورٹ تنقیدی نشست، تنظیمی امور و عالمی او علاقائی سیاسی صورت حال آ ہیت کننگ آن پد بروکا لائحہ عمل نا اینجنڈا ٹی پوسکنو فیصلہ ہلنگا ہراتا رد اٹ بلوچ لٹریسی کیمپئن نا باروٹ کوئٹہ ٹی بھلو مراگش اس اڈ تننگ مرو، نودر بر آتا سیاسی و علمی بالاد نا بُڑزی نا خاطرآن مرکز نا کُنڈان لیڈر شپ کلاس اڈ تننگ مرو، سیاسی علمی و ادبی مراگش آتا تسلسل ہندُن روان مرو ءِ، دیوان ٹی بنجائی کمک کار کشاد خالد بلوچ ءُ، بنجائی کمیٹی نا باسک یاسر بلوچ نا ذاتی دست گھٹی نا سوب ئٹ تروکا استعفی قبول کننگار، بنجاہی کمیٹی نا باسک رفیق بلوچ بنجائی کمک کار کشاد گچین کننگا، و تربت ھنکین نا کارگشاد محمد جان بلوچ، و کراچی ھنکین نا کارکشاد معراج بلوچ بنجاہی کمیٹی نا باسک گچین کننگار۔
