امریکہ نا پٹ و پول کروک ادارہ فیڈرل بیورو آف انویسٹی گیشن (ایف بی آئی) نا ڈائریکٹر کرسٹوفر رے نا پاننگ ءِ کہ او تدوکا ہفتہاوغانستان ئٹی امریکہ نا ڈرون جلہو ئٹی القاعدہ نا سروک ایمن الظواہری ءِ خلنگ آن گڈ اوفتا ٹولی نا کنڈ آن امریکہ آ مننگ کروک جلہونا بابت ئٹ فریشان ءِ۔

وائس آف امریکہ نا مسعود فاریور نا رپورٹ نا رد ئٹ سینیٹ نا جوڈیشری کمیٹی نا مونا پنچ شمبے نا دے بیان تریسہ کرسٹوفر رے ناپاننگ ئس کہ القاعدہ و داعش تون اوار اوفتا سنگت آک ”امریکہ ٹی بھلو کچ اسیٹ جلہو کننگ یا اونا اُست بڈی کننگ نا ارادہ تخرہ۔”

یات مرے کہ 11 ستمبر 2001 ئنا جلہو آتا خاص منصوبہ جوڑ کروک القاعدہ نا سروک ایمن الظواہری یک شمبے نا دے کابل ئٹی مروکاسہ امریکی ڈرون جلہو ئسے ٹی خلنگاسس۔

کرسٹوفر رے آن ہرا وخت سوج کننگا کہ انت القاعدہ یا داعش ءِ وار رسینگا تو او امریکہ آ جلہو کرور، اونا پاننگ ئس کہ ”جی، ہان!”

ولے اونا پاننگ ئس کہ بروکا وخت ئٹ گمان ارے کہ القاعدہ زوت تینا کم مروکا قیادت تون قطبی و جاندمی افریقہ نا ڈول انگا علاقہ آتیٹ تینا ”جہانی تفوک ٹولی تے گیش کننگ و چنکا چنکا جلہو آتا مخ تفی” کننگ آ پام ایتو۔

یاتی مرے کہ ایمن الظواہری اسامہ بن لادن نا 2011 ٹی امریکی کارروائی ئٹ کہنگ آن گڈ القاعدہ نا ذمہ واری تے ارفیسس و ایف بیآئی نا کُل آن زیات خواست مروکا بندغ آتا لسٹ ئٹ ہم ئس۔

الظواہری آ جلہو بائیڈن بست و بند نا کوالخواہ تا دا مؤقف ءِ سوگو کرینے کہ امریکہ اوغانستان ئٹی تینا ساڑی مفننگ آن بیدس ہم داوڑ ئنا آپریشن برجاء تخنگ کیک۔

رے ئنا پاننگ ئس کہ نن وا ہم اغانستان آن امریکہ نا پیشتمنگ نا رد ئٹ “انٹیلی جنس معلومداری و مننگ کروک نسخان” نا بابت ئٹفریشان اُن۔ اونا پاننگ ئس کہ اندا سوب آن ننا زیات مروکا انٹیلی جنس خلا ٹی ودکی مننگ ءِ۔

محکمہ مُد ئنا ردئٹ سندھ و بلوچستان تون اوار ایلو علاقہ آتیٹ تُرند تہو و ہورہ گروک تون پِر ئنا گمان ءِ۔ پِر ئنا دا رِد سینزدہ اگست اسکان برجاء مرو۔

دا نیام ئٹ سندھ و بلوچستان نا شیف علاقہ غاتے دیر ارفنگ نا خلیس ءِ۔

بلوچستان ئٹ ژوب، خضدار، بولان، کوہلو، قلات، لسبیلہ، آواران، زیارت، بارکھان و دفتا ایب کیب نا علاقہ آتیٹ تُرند تہو و ہورہ گروک تون پِر ئنا گمان ءِ۔ کہی ہند آتیا زیات شنزہ نا گمان ءِ۔

یاتی مرے کہ این ڈی ایم اے نا ردئٹ بلوچستان ئٹ سیلاب آن پین چار مرک آن گڈ جمعی کچ 170 مسونے۔ سیلاب نا سوب آن کوہلو، کیچ، مستونگ، ہرنائی، قلعہ سیف اللّٰہ و سبی ئٹ مرک آک مسر۔ چمن آن ہلیس گوادر اسکان بشام نا پِرک بُھس کاری کریر۔

بھس کاری تیان گڈ دائسکان کہی علاقہ آتیٹ خلقت بے اُرا تولوک ءِ ہرافک کُن و خور نا ویل نا گواچی ءُ ایلو پارہ غان کہی ناجوڑی خلقت ءِ پلویڑ کرینو۔

کوئٹہ ٹی زوراکی نا بیگواہی تا برخلاف بیگواہ غا بندغ آتا خاہوت آتا تولوک برانز برجاء، اوار مروکاک بلوچ زالبول آ جلہو نا برخلاف وزیراعلیٰ ہاؤس نا مونا برانز کریر۔

بیگواہ غا بندغ آتا خاہوت آک تدوکا پانزدہ دے آن کوئٹہ ٹی گورنر بلوچستان نا اُرا نا مونا تولوک برانز کننگ ءُ۔ بیگواہ غا بندغ آتا خاہوتآک زیارت تدینی نا ساف پٹ و پول، تینا بیگواہ غا بندغ آتا آجوئی و دروغ ئنا مونتس آتا توننگ نا ہم خواست کننگ ءُ۔

کوئٹہ ٹی تولوک برانز تون اوار مروکا مسکوہی بلوچ خوانندہ سروک رضا جہانگیر نا اُرا گودی آ جلہو نا برخلاف وزیر اعلیٰ ہاؤس نا مونابرانز کریر و تدینی نا برخلاف بلوچ یکجہتی کمیٹی پریس کانفرنس ہم کرے۔

صحافی تتون تران کریسہ برانز کروکا پاریر کہ بلوچستان ئٹی تدوکا اِرا دہائی آن خاخر و دتر نا ہولی گوازی برجاء ءِ ہرا نا شر آنداسکان دنو اسہ اُراس ہم اف کہ رکھوک مرے۔ ہار ئنا دیر تیان بلوچستان ٹپی ءِ، زیارت تدینی آن زیمی مروکا داسکان انصاف ناچاری ءُ ولے دافتے ایسر کننگ نا جاگہ غا تدوکا دے زہرہ بلوچ آ جلہو کننگا ہراٹی او تینا خوش بختی نا سوب آن رکھوک تو ارے ولےجلہو آن دا پاش مریک کہ اشتماعی سزا نا رد ئٹ زیمی مروکا خاہوت آتے ٹک کننگ نا عمل برجاء ءِ ہرا باز بیم بش کروک و فریشانی ناساہت ئسے۔

صحافی تے بریفنگ تریسہ برانز کروکا تا پاننگ ئس کہ زہرہ بلوچ نا خاہوت تدوکا کہی سال آن اشتماعی سزا نا گواچی ءِ، سیکورٹی ناپنا بلوچستان ئٹی سیکورٹی فورسز و سلاء بند ٹولی تے جاگہ، تاغت و اختیار تننگانے کہ او بلوچستان ئٹی بندغی حق آتے لتاڑنگ توناوار داڑے سیاسی و چاگڑدی دود آتے ہم لتاڑر۔

اوفتا پاننگ ئس کہ جلہو کروکا تے بھازی آن دا ہیت ئنا سما اف کہ بلوچ چاگڑد زالبول تا بابت ئٹ باز حساس ءِ و زالبول تیا دُننگا جلہوآتے بلوچ چاگڑد تینا وجود آ جلہو پوہ مریک و بلوچ زالبول تیا جلہو کننگ آن و بندغی نا برخلاف ءُ گام ہرفنگ آن بلوچستان ئٹی برجاءخاخر ءِ پین ایندھن تننگ نا بریبر مرو و دا نا پَد مُدامی نا ڈول یقیناً باز خطرناک مرو۔

اوفتا ودیک پاننگ ئس کہ دا پریس کانفرنس نا کمک ئٹ غٹ بلوچستان نا سیاسی تپہ، چاگڑدی تنظیم، وکیل برادری، خوانندہ تنظیم وزند ئنا غٹ شعبہ آ تیان تعلقداری تخوکا بندغ آتے دا کلہو ءِ سر کننگ خواہنہ کہ انت او اینو ہم دا تدینی آ مدامی نا ڈول چُپ مرور یامذمتی بیان آ تیان بیدس عملی گام ہم ارفور۔

بلوچ یکجہتی کمیٹی کوئٹہ نا سروک آتا ودیک پاننگ ئس کہ اینو سیاسی وڑ ئٹ زیمی مروکا بندغ آتا خاہوت آک ٹک مننگ ئٹی ءُ اگہ دانا برخلاف ترندی ئٹ مزاحمت کننگ متو گُڑا او وخت مُر اف ہرا وخت زالبول تے ٹک کننگ نا عمل سیاسی وڑ ئٹ متحرک خاہوت آتیانپیشتمیسہ لس مخلوق اسکان سر مرو۔

ایران ئٹ دہشت گردی نا منصوبہ بندی کروک داعش نا گمانی دئے باسک دزگیر کننگانو۔

تہران ئٹ ایرانی وزارت نا ردئٹ دزگیر مروک گمانی دہشت گرد آک محرم نا جلوس و مجلس آتیا جلہو کننگ خوائسرہ۔

ایرانی وزارت نا مُستی پاننگے کہ دہشت گرد آک عراق و ترکی نا کسر آن ایران ئٹ پیہاسُر۔ اوفتا پاننگ ءِ کہ دہشت گرد آتے تدوک مُسہ دے ئٹ ایران نا دے کہی و جہاندمی علاقہ آتیان دزگیر کننگانے۔

یاتی مرو تدوکا دے اوغانستان ئٹ ہم داعش نا گمانی باسک آتیا آپریشن طالبان فورسز نا پارہ غان کابل شار ئٹ آپریشن اس کننگا۔

دا ردئٹ طالبان ترجمان ذبیح اللہ مجاہد نا پاننگ ئس کہ “کارتہ سخی نا علاقہ ئٹ طالبان آپریشن ئٹ چار خوارجی ءِ مرگ ئنا گواچی کریر و اسٹ ءِ زندہ دزگیر کننگا۔ دہشت گرد آک محرم ئٹ شیعہ مخق نا مُچی تیا جلہو کننگ خوائسرہ۔”

بلوچستان نا ضلع نوشکے ئٹ نادرست بندغ آتا سُم کاری آن حافظ نثار بادینی بیران مس۔

شابیتی حوال تا ردئٹ نوشکے بازار ئٹ عین الدین روڈ آ سجاد ہوٹل نا خڑک نادرست سلاء بند بندغاک حافظ نثار بادینی ءِ سم کاری کاریسہ کسفیر۔ ڈوہدار آک نرنگ ئٹ سرسہب مسر۔

نوشکے پولیس دا ردئٹ مُستی پٹ و پول کننگے ولے تدینی نا سوب آک دائسکان درست متنو۔

حافظ نثار نوشکے تون اوار تیوی بلوچستان ئٹ اسہ علم دوست و چاگڑدی شرحالی کن گام ارفوک بندغ ئسے نا دروشم ئٹ چاہنگاکہ۔ او بھلو وخت ئسے آن نوشکے ئٹ درخت خلنگ نا جہد ئٹ ہم اس، داڑان بیدس شہید صباء دشتیاری نا خڑک سنگت آتیان ئس۔۔

بلوچ لبریشن آرمی نا ترجمان جیئند بلوچ نادرست ہند آن شینک کروک بیان ئٹ پارے کہ بی ایل اے نا سرمچار آک تدوکا نن کوئٹہ و تربت ٹی اِرا جتاء جلہو تیٹ پاکستانی لشکر و پولیس کارندہ آتے ٹِک کریسہ اِرا چوکی ءِ بُھس و چار کارندہ ءِ ٹپی کریر۔

اونا پاننگ ءِ کہ سرمچار آک اولیکو جلہو ءِ کوئٹہ ٹی قمبرانی روڈ آ پولیس کارندہ آتیا کریر، ہرانا سوب آن  اِرا کارندہ ٹپی مسُر۔

اونا گیشتر پاننگ ئس کہ اندا وخت تربت نا علاقہ آپسر ٹی فرنٹیئر کور نا آبدروک چوکی آ چغلی بمب ئٹ جلہو کننگا، چوکی نا تہہ ئٹ تراک نا سوب آن اِرا دژمن کارندہ بھاز ٹپی مسُر۔

جیئند بلوچ نا پاننگ ئس کہ بلوچ لبریشن آرمی ہڑتوم آ جلہو تا ذمہ واری ءِ ارفک۔ آزات ڈیہہ نا دوئی کننگ اسکان جنگ برجاء مرو۔

بلوچ یکجہتی کمیٹی کراچی نا رضاکار آک سیلاب آن زیمی مروکا بندغ آ تیکن کمکی مڈی نا اولیکو کھیپ بلوچستان نا ضلع لسبیلہ نا علاقہ وندر، لاکھڑا، لیاری تون اوار ایلو علاقہ آ تیٹ سر کرینو۔ ولے منَہ علاقہ آ تیٹ کسک بند مننگ نا سوب آن زمینی رابطہ پنانے ہرا نا سوب آن کمکی مڈی تیان لوڈ ٹرک آک گٹ مسنو۔

بلوچ یکجہتی کمیٹی کراچی نا آرگنائزر آمنہ بلوچ ہست انگا بندغ آتیان بلوچستان ئٹی ہار و پر تیان زیمی مروکا بندغ آتا کمک نا خواست کرسہ پارے کہ او گیش آن گیش کمکی کاریم تیٹ بشخ ہلیر و اُست ءِ بھلن کرسہ زیمی مروکا تا کمک ءِ کیر۔ اونا پاننگ ئس کہ پر و ہار بلوچستان ئٹی بھس کاری کننگ ءِ و دا سخت انگا وختا بایدے نن زیمی مروکا تتون اوار مرین۔

سوشل میڈیا آ شینک کروک اسہ ویڈیو کلہو ئسے ٹی حکومت آ سخت نغدکاری کرسہ اونا پاننگ ئس کہ حکومت سیلاب آن زیمی مروکا تے بے یار و مدد گار اِلانے۔آمنہ بلوچ بلوچستان نیشنل پارٹی (مینگل) نا سروک سردار اختر مینگل آن دا سخت انگا وخت ئٹی الس ئنا کمک نا خواست کرسہ پارے کہ او حکومت نا بشخ ئسے ءُ و دا وخت آ حکومت نا دا ذمہ واری جوڑ مریک کہ او سیلاب آن زیمی مروکا تا کمک ءِ کے۔

کراچی نا جتا علاقہ آ تیٹ کمکی کیمپ آک مسٹمی دے ہم ساڑی ءُ، دا کیمپ آک بلوچ یکجہتی کمیٹی کراچی نا کنڈ آن خلنگانو، دا وختا کراچی ٹی بیست آن گیش کمکی کیمپ خلنگانے۔

بنجائی کیمپ آک سلمان ٹاور، نزد ملیر کورٹ ئنا خڑک آ ساڑی ءُ و جمعہ گوٹھ، ملا عیسیٰ گوٹھ، غازی ٹاؤن، نیو شفیع گوٹھ، فقیر کالونی، کلری، میمن گوٹھ، جوہر موڑ، ابراہیم حیدری، صائمہ گرین سٹی، فائیو اسٹار ٹاور لیاری، کوہی گوٹھ، شرافی گوٹھ و صالح محمد گوٹھ ئٹی ہم کمکی کیمپ خلنگاے ہراڑے زیمی مروکا تیکن بیرُم ،پُچ، سی، برنج، دال، بورہ، تون اوار پین گڑا و نقدی رقم ہم جمع کننگ ئٹی ءُ۔

خضدار ٹی سیو اسٹوڈنٹس فیوچر نا سالانہ چاہنداری مجلس “داخلہ و اسکالرشپس” نا پن ئٹ اڈ تننگ مس، ہرا ٹی استاد، تعلیم دوست شخصیت آ تتون اوار زالبول و نرینہ خوانندہ آک بھلو کچ ئسیٹ اوار مسر۔

مجلس ئٹ بلوچ چاگڑد و خاص وڑ ئٹ ورنا تپہ ٹی بے جاراتی، فریشانی و خودکشی نا ودوکا تدینی و اوفتا کسر شونی، سائیکالوجیکل کیریئر کاؤنسلنگ، خواننگ جاہ تیٹ داخلہ پالیسی، داخلہ نا وڑ و ڈول، پوسکنا لائخی کورس آتا خواست و سواد، جتا شعبہ آتا اہمیت و خواست و بلوچستان نا خوانندہ آ تیکن جتا اسکالرشپ و دا بابت ئٹ تنظیم نا مثبت کڑدار آ شابیتی گپ و تران کننگا۔

مجلس ٹی اسٹیج نا ذمہ واری تے بنجائی کمیٹی باسک محسن بلوچ و انعام بلوچ ایسری تسر، و تلاوت کلام پاک نا شرف تنظیم نا باسک بانک یاسمین بلوچ دوئی کرے۔

مجلس تون تران کرسہ مسکوہی کماش فضل بلوچ پارے کہ ایس ایس ایف اسٹ ءُ دنو تلہ ئسے ہرا خوانندہ آتا سواد آ تیکن گچین کروک ءِ و تینا وڑ ئنا دا اولیکو تنظیم ءِ ہرا اُست و جان ئٹ ایجوکیشنل پِڑ آ کاریم کننگ ءِ و ہرا نا سر سہبی ءِ خنیسہ ایلو تلہ غاک ہم تنظیمی موقف تون امنائی کننگ ءُ۔

مسکوہی کماش نعمان بلوچ خوانندہ آ تیٹ ودوکا بے جاراتی، فریشانی و خودکشی نا تدینی تیا تران کرسہ پارے کہ بروقت کیریئر کاؤنسلنگ مفننگ، جتا شعبہ، داخلہ پالیسی نا بابت ئٹ چاہنداری نہ مننگ، معاشی پدماندگی و ایلو سوب آتا رد ئٹ خوانندہ آک نفسیاتی ناجوڑی تا گواچی مریسہ خودکشی نا ڈول ءُ گام ارفِرہ، ایس ایس ایف خوانندہ آتے دا سختی تیان کشنگ و چاہنداری تننگ کن تینا کمک تینٹ نا پالیسی آ عملاً کوشست کننگ ءِ، لمّہ باوہ و استاد آ تیان ہم خواست ءِ کہ او دا بابت ئٹ تینا کڑد ءِ ایسری تریسہ خوانندہ آتے نفسیاتی دباو نا گواچی مننگ آن رکھیر و اسہ گچینو چاگڑد ئسے نا جوڑ کننگ ٹی تنظیم نا ہم کوپہ تینا کڑد ءِ ایسری ایتر۔

جنرل سیکریٹری شمس بلوچ تعلیم نا اہمیت آ گپ کرے و مجلس تون ایم فل اسکالر ڈاکٹر ادریس بلوچ سائیکالوجیکل کیریئر کاؤنسلنگ آ تران کرسہ پارے کہ خوانندہ آک جتا سوب آتا رد ئٹ تینا پگہ و کیرئیر نا گچین کننگ ئٹی باز ہڑاند آتا گواچی مرسہ نفسیاتی حساب آ ہم شل مریرہ۔

مجلس ئٹ پینلسٹس جنرل سیکریٹری شمس بلوچ، ایجوکیشنل سیکریٹری سلیم بلوچ و ترجمان شفیع بلوچ اوار ئسر و ماڈریٹر نا ذمہ واری تے مسکوہی ڈپٹی جنرل سیکریٹری فیاض بلوچ ایسری تس، پینلسٹ آک خوانندہ تپہ کن تنظیم نا خواست اہمیت و افادیت، تنظیم نا پوسکنا لائبریری نا فوائد، غیر نصابی و فنی علم نا اہمیت و ایلو سرحال تیا شابیتی ئٹ تران کریر۔

داخلہ و اسکالرشپس، پوسکنا ہنر مند کورس، جتا شعبہ بشمول میڈیکل سائنسز، انجینئرنگ سائنسز، سوشل سائنسز ، لاء، جتا ڈپلومہ و ڈیجیٹل کورس آتا بابت ئٹ تنظیم نا باسک آصف بلوچ، بانک کائنات بلوچ، مسکوہی کمک کماش نعمان بلوچ و مجلس سیکریٹری عرفان بلوچ شابیتی ئٹ خوانندہ آتے چاہندارہ تسر۔

ایسر ئٹ تنظیم نا کماش نعیم بلوچ تران کریسہ پارے کہ ایس ایس ایف تینا کمک تینٹ خوانندہ آتے علمی حوالہ ئٹ آگاہی تننگ تون اوار خواننگ جاہ تیٹ داخلہ پالیسی، اسکالرشپس دوئی کننگ، پوسکنا ہنرمند کوسسز، فنی و غیر نصابی علم و کتابی کلچر ءِ لس کننگ ئٹ تینا کڑد ءِ ایسری تننگ ءِ۔

مجلس نا ایسر ئٹ تنظیم نا نیمہ غان مہمان و تنظیم نا باسک آتے اعزازی ٹیکی ٹی کتاب تننگ مس و خوانندہ آتا سوج آتا ورندی تننگ آن بیدس اوفتے باور کرفنگ مس او ہرا وخت خواہر علمی بابت ئٹ رہنمائی کن تنظیم نا نمائندہ آتیان کمک ہلنگ کیرہ۔

لمّہ و لمّہ وطن

نوشت: درناز رحیم

آواران نا ٹاک دے نیمروچ، آسمان نا مونا جھمر نا اسہ اسہ شینک سمندر ئٹ مچھی نا ڈول تار کننگ ئسر۔ باسُنی نا ہُب ئٹی ہر کنڈ آ زیست ئنا چُپی تالان ئس۔ بیست یا بیست و دو اُرا غا ساڑی چنکو خلق اس، غٹ دا وختا تینا اُرا تیٹ زند ئنا سختی و سوری تتون آختہ ئسر۔ خلق آن زرس مُستی مُلک آ تیٹ بزغر آک تینا کاریم تیٹ آختہ ئسر۔ خلق ئٹ اسہ کوٹی آ ساڑی پرائمری سکول اس ہم ئس ہرانا اسہ ماشٹر اس ئس و آخریکو کلاس ءِ چُھٹی تریسہ او ہم تینا خلق آ روان مسس۔

لمّہ ماہ جان تینا کوٹی نا باء آ تولوک ئس۔ دو ٹی کشیدہ خن تیا ہولُن ءُ چشمک اس و خُش آن تہ کشیدہ نا دسک آک تالان ئسر۔ کوٹی ٹی بَڑزی سے آ جھوکہ ہانی نا دو ٹی کتاب اس ئس و باز خوڑتی ئٹ کتاب ءِ خواننگ ئس۔ ہانی پنچمی کلاس ئٹ خواناکہ و تینا کلاس نا لائخ آ چُنا ئس۔

دے پوسکُن ہڑسینگ ئس تینے و کوٹی نا مونا چنکو اڈ اس ئس ہراڑے درو نا ودی مروکا دغر تینا لمّہ نا خُش آن خاچوک ئس۔ ایلو مال تے کُھریا خوافنگ کن دریسس۔ خلق ئنا گیشتری مالک یا تو اندن یلہ ئسر یا کھُریا خوافنگ کن دریکہ و شام نماز نا وختا ہیسکہ تا۔

زیست ئنا چُپی ءِ پرغِسہ موٹر سائکل ئسے نا توار مس، اندن گمان مسکہ موٹر سائکل لمّہ ماہ جان نا اُرانا نیمہ غا بننگ ءِ، ہانی کتاب ءِ تخیسہ زو زو بش مس کہ اُرے دیر بننگ ءِ۔ ہانی درغ آ سلیسہ پیشن اُرا، موٹر سائکل خُڑک کریسس و موٹر سائکل آ دودا ئس۔ ہانی نا چہرہ نا تاثر آک اسہ دم بدل مسُر۔ و گُڑینگوکا توار تون لمّہ ءِ پارے “ لمّہ ایلم دودا ءِ”۔ ضعیف آ چہرہ غا پیری نا کوسک ایہُن ئسر وا دا حوال آن پیشانی آ کوسک گیشتر مسر۔ اُست نا درپہ غا اسہ وار بے ڈول شیف بڑز مسر ولے ہچ پاتو۔ ہانی انگہ ہُننگ ئس کہ لمّہ امر کیک ولے لہجہ ٹی ہچ وڑ ئنا سختی ہتنگ آن بیدس لمّہ ہانی ءِ پارے “ہِن مُہہ آ تہ و ہیمون نا کوٹی ٹی در تہ، حوال کر تہ انتئے بسونے، اودے ای پاریسُٹ کنا زندی ٹی دا اُراغا مون کپ؟”

“ ننا خننگ کن بروئے لمّہ، مگہ نا اُست پاپک تینا چُنا ءِ خننگ کن، مگہ نی زہیری افیس ایلم کن؟ ” ہانی نا خنک غُل غُل کریر۔

“ ای پارینُٹ اودے ای اونا لمّہ افٹ او کنا مار اف۔ ہن پار تہ کائے داکان۔ کنا اُرا ٹی اوڑکن جاگہ اف، او کنا اُرا نا پارہ غا مون کپ ” لمّہ کشیدہ ءِ لوتھ ئٹ شاغسہ بش مس۔ نظر نا چشمک ءِ خن تیان دڑفے و برونک آ تخا وا بس تینا جاگہ غا توس۔ او تینا لمئی آ مہر ءِ امر اُست ئٹ کھڈ کریسس ہانی اسُل سرپند مننگ الو۔

لمّہ و ہانی ہیت کننگ ئسر کہ موٹر سائکل سر مس و ایمون نا کوٹی نا مونا سلیس۔ ہانی گُد ءِ جوڑ کرسہ دودا نا مونا ہِنا، دودا ءِ بخیر کرسہ کوٹی ٹی تولنگ نا پارے۔ دودا چُنکا ہیڑ ئنا کاٹُم آ مہر ئٹ دو ءِ تخیسہ سوج کرے “لمّہ اندا کوٹی ٹی ءِ؟” ہانی مون ءِ شیف کرے و سرغ ئٹ آخہ ٹی ورندی تس۔ دودا پوہ مس کہ لمّہ ایلو کوٹی ٹی مرو و دا ہم پوہ مس کہ لمّہ اودے بخیر کننگ خواہپک۔ دودا ہمو کوٹی نا نیمہ غا مون کرے ہراڑے لمّہ ئس ولے ہانی توار کرے “لمّہ پارے کہ نی واپس ہِن ایلم، او نے خننگ خواہپک، لمّہ نا لمئی آ مہر نے کن ایسر مسونے؟” ہانی نا توار کبین مس کس پائے تینا خڑینک آتے زور ئٹ توننگ ئس ولے دودا پدی چک خلتو ہانی ءِ ہُرتو۔

کوٹی نا باہ آ دودا سلیس ولے تہٹی ہنتو، لمّہ بَڑزی آ جھوکہ خلوک تولوک ئس، “مگہ اندن ارزانی ئٹ لمّہ و چنا نا رشتہ ایسر مریک؟ نی کنے تینا مار کپہ تینا اُرا ٹی جاگہ تفہ ولے ای داخس وخت آن پد بسونُٹ کنے انداخس موکل ایت کہ ای جَھٹ اس نا رہا تولو، نتّا باسُن آ کنے واپس ہننگ نا پاسہ لمّہ؟“

“ گواچنی دن ارزانی ئٹ لمّہ و چنا نا رشتہ ایسر مفک۔ نی کنا چنا اُس، دا گواچنی ءِ قدرت ہم مٹ کننگ کپک۔ ای نے نوہ تو پڈ ئٹ تخانُٹ، تینا بدن نا دتر تسونُٹ و ودی کرینُٹ۔ ہمر کہ کنا ایلو چناک کنے دوست ءُ نی ہم کنے دوست اُس۔ ولے دودا، نا کسر کنے و نے اسٹ ایلو آن باز مُر کرینے و دا ہیت ءِ نی ہم چاسہ۔ نی وختس لکھ مرادی آ لمئی ڈغار نا مننگ کپیسہ گُڑا نی کنا امر مننگ کیسہ۔ سال تا پند کنا و نا نیام ئٹ ارے و نے ہم سما ءِ دُن ارزانی ئٹ نی دا پند ءِ ایسر کننگ کپیسہ۔” لمّہ تینا اُست ءِ سوگو کرسہ ہانی نا خڑینکی خن تیٹ ہُرا، ہرا ڈن آ سلوک لمّہ نا ہیت آتے بِننگ ئس۔ ہانی نا خڑینک آک اونا اُست ءِ کپ کننگ ئسر ولے لمّہ تینے ڈڈ توریسوس۔

“ لمّہ نا اُست اندن سخت مسونے کہ تینا حقی آ مار آن ہم مونے ہڑسانُس؟ ” ہانی دودا نا پد ئٹ سلوک ئس و ہزار ارمان ئٹ لمّہ غان سوج کننگ ئس۔ دودا لمّہ نا دا ہیت آتے کہی وار بنگوسس اودے اینو ہم لمّہ آن اندا ہیت آتا اومیت ئس، اندا سوب آن او چُپ سلیسس۔

“ ہئو کنا اُست سخت ءِ و تینا ہم اُست ءِ بھلن کہ۔ اگہ ای دا ہیت آن شرمندہ اُٹ کہ کنا پڈ آن وطن نا غدار اس ودی مسونے تو دا ہیت کنا مون ءِ بڑزا کننگ کن بس ءِ کہ کنا پڈ آن وطن نا اِرا فرزند و وطن نا رکھوک ہم ودی مسُنو۔ دودا وطن نا غدار مس دا ہیت کنا اُست ءِ کپ کیک، ای نن تیٹ پھُر انگا تُغ آن سما کیوہ و اندا جیڑوہ کہ دودا امر دُن مس، کنا دتر اس دنو الو، کنا پال٘ اس دنو الو گُڑا اخر انتئے دودا لغور مس۔ ولے کنا اُست مطمئین مریک وختس ای دا جیڑوہ کہ کنا ایلو مل٘، شازیب وطن نا رکھ ءِ کننگ ءِ و زباد جان وطن کن شہید مسنے، دا ہیت کنا مون ءِ بڑزا کیک۔ دودا ٹی اگہ دنو جغر الو کہ او وطن نا رکھ کن توفک ہرفیکہ تو کم اس کم چُپ کریکہ اُرا ٹی توسکہ ولے او انداخس لغور مس کہ ہنا تینا ایلم نا خونی تتون ہم کوپہ مس، وطن غدار مس۔ نی ہم تینے آ فخر کر کہ نی شازیب و زباد جان نا ہیڑ اُس۔”

“ کنا کسر اخس رد مرے، ای اخس کہ خراب مریو ولے ای نا مار اُٹ نی کنا لمّہ اُس، نی امر کنے ٹی و شازیب و زباد جان ٹی فرخ کننگ کیسہ، بیرہ دا خاطر آن کہ ننا کسر آک اسٹ افس؟ اسہ لمّہ اس امر تینا چنا تیٹی فرخ کننگ کیک؟ نا مہر آ کنا ہموخس حق ارے اخس شازیب و زباد جان نا ارے” دودا انگہ درغ آ سلوک ئس۔ لمّہ اودے انداخس صلہ خلتوکہ کہ او کوٹی ٹی برے تولے۔

“ لمّہ چنا تیٹ فرخ کپک، غٹ چُنا تیکن اونا اُست ئٹ اسہ وڑ مہر مریک، ولے نی امر دُنو اومیت کننگ کیسہ کہ ای وطن نا غدار و وطن نا فرزند آ تیٹ فرخ کپر؟ امر دنو اومیت کننگ کیسہ کہ ای حق و باطل ئٹ فرخ کپر؟ زباد جان نا خونی تتون تولوک اوفتیان زر کنوک و زباد جان ہرا کہ ڈغار کن ندر مس، امر فرخ کپر ای نمے ٹی۔ نی تو ڈغار کن ندر مننگ مُر تینا ایلم نا ہم دتر ءِ اِرا روپئی کن بہا کریس۔ ” سال ئسے آن گڈ او دودا ءِ خننگ ئس و اودے دنو ہیت کننگ ئس۔ لمّہ نا اُست آن دا وختا پاک انگا رب آن بیدس کس ءِ ہم سما الو۔ اسہ لمّہ اس امر لمّہ وطن کن تینا دتر تون مون پہ مون مریک دا گڑا نا گمان ہم بھازی آن کس ءِ مفرو۔

“ زباد جان نا خونی اسہ بندغ اس اف اسہ ریاست ئسے لمّہ، و کسس اسہ ریاست ئسے آن امر بیر ہلنگ کیک؟” دودا اسُل پوہ مننگ الو کہ او لمّہ ءِ انت پائے کہ لمّہ نا اُست خلکن مرے۔

ولے لمّہ اسُل اُست ءِ خل کریسس و المّی اس کہ او تینا اُست ءِ خل کریکہ۔ “ اندا تو ننا بد بختی ءِ کہ خونی اگہ نزور اس مرے اوڑان نن ہفت پشت اسکان ہم بیر ہلینہ، ولے اگہ خونی ڈن آن بروکو ظالم، قوضہ گیر ءُ ریاست اس و تاغت ور اس مرے نن اودے اندن ارزانی ئٹ بشخنہ کہ او تاغت ور ءِ اوڑا ننا وس چلپک و اوڑا ننا ایلم، ایڑ، لمّہ و چنا تا خون معاف ءِ؟

دودا دا غٹ ہیت آتے اولیکو وار بِننگ الو، ہمو وخت آن کہ او دژمن نا ہم کوپہ جوڑ مسس لمّہ اوڑان مون ءِ ہڑساسس و دا لمّہ کن ہم ارزان الو ولے او دژمن آن زر کنوک ئسے نا حوصلہ ءِ بڑز کننگ کتوکہ۔ دودا سال ئسے آن گڈ اندا سرپند مریسہ بسوسس کہ نوا لمّہ نا اُست خُلکن مرے ولے لمّہ نا اُست ہمو وڑ سخت ئس اوڑکن۔

دودا بے اومیت مرسہ پدی مس و اسہ وار پدا ہانی نا کاٹُم آ دو ءِ تخیسہ اودے مہر تس، و تینا موٹر سائکل آ سوار مرسہ تینا بے اومیتی تون روان مس۔ لمّہ مُدامی نا ڈول اینو ہم دو تے بڑز کریسہ خُدا آن دعا کرے کہ او دودا ءِ حق ئنا کسر آ بننگ نا ہمت ایتے، و اگہ دُن متو اونا مرگ اونا جند ئنا ایلم تا دو آن مرو و دودا مُدامی کن اسہ غدار اس پاننگو۔ لمّہ کن دا دڑد ءِ سگنگ ارزان مفرو کہ اونا مل٘ اسہ غدار ئسے نا پن ئٹ چاننگے و اسہ غدار ئسے نا موت ئٹ کہے۔

ہانی نا خن تیٹ کہی سوج آک ئسر ہرافتے لمّہ خننگ ئس، اونا سن داخس الو کہ او دا غٹ گڑا تے پوہ مسکہ، ولے او داخس وخت ئٹ دا پوہ مسوسس کہ لمّہ نا مہر لمّہ ڈغار کن ءِ و لمّہ نا مہر لمّہ ڈغار نا رکھوک آ مل٘ آ تیکن چائے او اونا پڈ آن ودی مفس ہم، لمّہ نا مہر ہچ بر لمّہ ڈغار نا غدار آ تیکن اف، چائے او اونا پڈ آن ودی مرے۔

بلوچستان نا ضلع چاغی اٹ نوکاپ نا دیر ئٹ اسہ خاہوت نا مُسہ چنا بیران مسر۔ ہرافتا جوْنک اینو دوئی کننگار۔

حوال تا ردئٹ چاغی نا علاقہ دشت گوران ئٹ اسہ خاہوت نا مسہ مسڑ چُنا حفیظہ، نائلہ و عاصمہ پِر نا دیر آن پُر کھڈ اٹ ڈوبینگار۔

لیویز فورس چُنا تا جوْن تے کشیسہ خاہوت ءِ تس۔ کوالخوا تا ردئٹ روڈ جوڑ کروک ٹھیکیدار آک ریتی کشیسہ بھلا کھڈ آتے ہلاسر ہرا پِر ئنا دیر آن پُر مسر۔

ایلو پارہ غان واپڈا کارندہ زاہد امام دالبندین ئٹ کاریم نا وختا بجلی نا تمبہ آن تمیسہ بھاز زیات ٹپی مسونے ہرادے بدحالیت ئٹ کوئٹہ دننگا۔