“بلوچ نیشنلسٹ آرمی” دیر ءِ؟
ٹی بی پی تیدری
یاران دیار
یانزدہ جنوری آ اِرا بلوچ آجوئی دوست سلاء بند جماعت بلوچ ریپبلکن آرمی و یونائیٹڈ بلوچ آرمی آڑتوما سلاء بند جماعت آتا اوار مننگ و اسہ پوسکنو مزاحمتی سلاء بند جماعت بلوچ نیشنلسٹ آرمی نا ہڈ تننگ نا پڑو کریسہ پارے کہ “بی آر اے و یو بی اے نا کمانڈ کونسلز نا اسہ اوار میٹنگ اس مقبوضہ بلوچستان ٹی ہڈ تننگا، ہراڑے راجی مزاحمتی جنگ ءِ شابیتی تننگ و فوجی فاشزم نا مقابلہ ٹی بلوچ مزاحمتی طاغت آتے اوار کننگ کن ہڑتوما جماعت آتے تحلیل کریسہ، اسہ جماعت، بی این اے نا پن آ مزاحمتی جنگ برجاہ تخنگ نا فیصلہ کننگانے۔”
دا پڑو ٹی پین پاننگا کہ “مرید بلوچ، میڈیا ٹی بلوچ نیشنلسٹ آرمی نا ترجمان مرو و تنظیم نا میڈیا چینل نا پن باسک مرو۔”
پڑو نا اسہ گچین آ بشخ دادے کہ ہڑتوما جماعت آتیٹ اواری آن گڈ جوڑ مروک پوسکنا جماعت بی این اے، بلوچ سلاء بند جماعت آتا شابیت انگا امبریلا آرگنائزیشن بلوچ راجی آجوئی سنگر یا براس نا بشخ مرو۔
یاتی مرے کہ براس بلوچستان نا اِرا بھلو آجوئی دوست سلاء بند جماعت آک بلوچ لبریشن آرمی، بلوچستان لبریشن فرنٹ تون اوار بلوچ ریپبلکن آرمی و بلوچ ریپبلکن گارڈز نا اسہ سیوت ءِ، ہرا پاکستانی فوج تون اوار، اہم تنصیبات آ بھلو کچ اسیٹ جہلو آتا سوب آن پنی ءِ ۔ زوت دا سیوت ٹی سندھی مزاحمتی تنظیم سندھو دیش ریوولشنری آرمی ہم اوار مسوسس۔
بلوچ ریپبلکن آرمی
بی آر اے نا ہڈ تننگ سنہ ۲۰۰۶ ٹی پنی آ بلوچ راج دوست راہشون نواب اکبر خان بگٹی نا اسہ فوجی آپریشن اسیٹی شہادت آن گڈ عمل ٹی بس۔ بنائی سال آتیٹ بی آر اے زیات بگٹی قبیلہ نا مزاحمتکار آتیا تالان اس ولے بھاز زو دادے بلوچستان نا شاری علاقہ آتیٹ و خاص وڑ ئٹ تعلیم یافتہ تپہ آتیٹ پن رسینگا، ہراڑان گڈ تیوہ بلوچستان آن مزاحمتکار “پاکستانی کوزہ نا” بر خلاف جہد کن داٹی اوار مریسہ کریر۔
بی آر اے ہچ وخت رسمی وڑ ئٹ تینا سرکماش نا پڑو کتو، ولے حکومت پاکستان دا تہمت ءِ خلیسہ کرینے کہ بی آر اے نا سرکماش نواب اکبر خان بگٹی نا نواسہ و بلوچ ریپبلکن پارٹی نا صدر براہمداغ بگٹی ءِ۔ براہمداغ بگٹی دا وخت سوئیٹزر لینڈ ٹی تینٹ باہوٹی نا زند گدریفنگ ءِ و حکومت پاکستان نا دا تہمت آتے نمن کیک۔
اکتوبر ۲۰۱۸ ٹی بلوچ ریپبلکن آرمی ہو وخت اِرا کُڑدہ تیٹ بشخ مس، ہرا وخت بی آر اے نا اسہ ترجمان سرباز بلوچ میڈیا ٹی بیان اس شینک کریسہ پارے کہ “تنظیم نا ریجنل کمانڈر گلزار امام عرف شمبے نا باسک ئی ءِ ایسر کننگیک۔
بلوچ مزاحمتی سیاست آ نظر تخوک آ تجزیہ کار آتا رد ئٹ، دا ڈھکوک اختلاف آتیان گڈ تنظیم نا مزاحمت کار آتا بھازی گلزار امام نا سر کماشی ٹی جتا کاروائی تا بناء کریر۔
گلزار امام بلوچستان نا ضلع پنجگور آن تعلق تخیک، او اسہ خوانندہ ءُ ورنا ئسے و بلوچ اسٹوڈنٹس آرگنائزیشن آزاد نا زونل صدر ہم مسونے۔ طلبا سیاست آن گڈ او بی آر اے ٹی اوار مس و بھاز زوت تنظیم نا خاص کمانڈر آتیٹ حساب مریسہ کرے۔ حوال تا رد ئٹ گلزار امام نا بی آر اے ءِ بلوچستان نا شاری علاقہ آک و مکران ریجن ٹی اسرورسوخ رسینگا اندن ایلو کڑدہ نا گمانی سر کماش براہمدغ بگٹی نا بی آر اے ءِ ڈیرہ بگٹی و کچھی نا علاقہ آتیٹ رسوخ رسینگا۔
بی آر اے نا دا بشخ مننگ آن گڈ گلزار امام بلوچ تحریک ٹی ساڑی سردار آتیا نغد کاری کریسس کہ “بلوچ تحریک نا ہمو راہشونک ہرا سردار خاہوت آ تالان ءُ، اوفتے باسک آتون قبائلی رویہ ءِ پد بٹوئی تمو و تنظیم نا تہٹی ساڑی ویل تا ایسری قبائلی نہ بلکن سیاسی طریقہ کار تون پٹوئی تمو۔” اندا وڑ بی آر اے نا پوسکن جوڑ مروک کڑدہ نا ترجمان بیبگر بلوچ نومبر ۲۰۱۸ ٹی اسہ بیان اس شینک کریسہ پارے کہ ” تنظیم نا تیوہ آ سینئر کمانڈ سرباز بلوچ نا پارہ غان شینک کروک بیان ءِ اوار وڑ ئٹ نمن ءِ کرینے۔” گلزار امام دا ہم تہمت خلکوسس کہ “نہ بیرہ پاکستان بلکن آجوئی خواہوک قبائلی سردار ہم اندا وڑ ننے پرغنگ خوائرہ۔” بی آر اے نا دا بشخ مننگ نا ایلو سال گلزار امام نا سر کماشی ٹی بی آر اے، بلوچ راجی آجوئی سنگر (براس) آنبار انگا شابیت آ سیوت نا بشخ جوڑ مس۔
یونائیٹڈ بلوچ آرمی
یوبی اے سنہ ۲۰۱۰ ٹی بلوچ لبریشن آرمی آن پنیسہ ہو وخت اسہ جتا تنظیم اس جوڑ مس، ہرا وخت گمانی بی ایل اے سرکماشی حیربیار مری تینا چنکا ایلم مہران مری آ دا تہمت ءِ خلکوسس کہ اونا ساڑی مفرنگ آ ہڈ تروک ہند آ سرکماشی نا فرائض تے ایسر تننگ نا نیام ئٹی مہران مری (ہرا داسا گمانی وڑ ئٹ یو بی اے نا سر کماش ءِ) زر کُننگ نا ڈوہدار مسونے۔ کرپشن نا دا تہمت ہچ وخت ثابت مننگ کتو۔ داسکان یو بی اے نا گمانی سر کماش مہران مری دا تہمت آتے دروغ پن کریسہ پارینے کہ اختلاف تا سوب حیربیار مری نا آمرانہ رویہ و تنظیم نا سینئر کمانڈر تے بے پام کننگ اس۔ دا لس تاثر ہم پاننگیک کہ مہران مری ءِ اونا باوہ پنی آ آجوئی دوست راہشون ایماندار سردار خیربخش مری نا ہمکوپئی رسینگاسس۔
ولے مونی ہنیسہ تدوکا سال اکتوبر نا تو ئٹی یوبی اے ءِ پین اِرا کُڑدہ ٹی بشخ مس ہرا وخت یو بی اے نا ترجمان سرفراز بنگلزئی عرف مرید بلوچ و تنظیم نا سرکماش تون اوار مرکزی کمانڈر آتیٹ اختلاف ودی مس۔ اکتوبر ۲۰۲۱ آ یوبی اے نا ایلو ترجمان مزار بلوچ اسہ بیان اس شینک کریسہ پاریسس کہ تنظیمی اصول تا برخلاف ورزی نا رد ئٹ سرفراز بنگلزئی ءِ کشنگک و یو بی اے نا اسٹ آ ترجمان مزار بلوچ مرو۔
اندن دانا ردعمل ٹی تنظیم نا ایلو ترجمان مرید بلوچ میڈیا ٹی دا پڑو کریسس کہ اودے دا ہیت ئنا سزا تننگا کہ انتیکن او یو بی اے آ دا زور شاغنگ اس کہ شابیت انگا راجی مفاد آ بلوچ راجی آجوئی سنگر نا سیوت ٹی اوار مرے ولے مہران مری سیوت آ یخین تخپک۔”
مونی ہنیسہ مرید بلوچ نا یو بی اے و گلزار امام بلوچ نا بی آر اے اوار مریسہ بلوچ نیشنلسٹ آرمی ہڈ تسر و براس سیوت نا بشخ جوڑ مسر۔
بلوچ راجی آجوئی سنگر (براس)
سنہ ۲۰۱۷ ٹی بلوچ لبریشن آرمی ءِ اسہ وار واپس ڈھکوک بست و بندی اختلاف آتیان گدرینگوئی تما، ہرانا سوب آن تنظیم نا سرکماشی اولیکو وار سردار خاہوت آن پیش تمیسہ اسہ لس بلوچ مزاحمتکار اسلم بلوچ عرف جنرل نا دوٹی بس۔ تدوکا سرکماش نا پن ءِ ہلینگ آن بیدس بلوچ لبریشن آرمی نا ترجمان جیئند بلوچ اگست ۲۰۱۸ آ اسہ بیان اس شینک کریسہ پاریسس کہ ” اینو آن گڈ بی ایل اے نا اسہ خاص اناپرست بندغ و اونا چنکا ٹولی تون ہچ ءُ تعلق اف و اینو آن گڈ تنظیم نا لندن، یورپ یا امریکہ ٹی ہچ ءُ نمائندہ مروف۔”
اسلم بلوچ بی ایل اے نا تیوہ آتیان زیات گچین آ کمانڈر اس و اوکان گڈ دا اس وخت اسکان بی ایل اے نا بھلا سرکماش مس ہرا وخت اودے دسمبر ۲۰۱۸ ٹی اسہ وت کش جہلو اسیٹ پنچ سنگت تون اوار ٹک کننگا۔
اسلم بلوچ، بلوچ مزاحمتی تحریک نا مہلک انگا گروپ مجید بریگیڈ نا خالق و سر کماش ہم اس۔ مجید بریگیڈ تینا وت کش جہلو تا سوب آن پن تخیک، ہراتے تنظیم فدائی جہلو پائک۔ مجید بریگیڈ نا اسہ فدائی اسلم بلوچ نا فرزند ریحان بلوچ اس ہرا یانزدہ اگست ۲۰۱۸ آ چینی انجنیئر تا اسہ قافلہ آ بلوچستان ٹی دالبندین نا ہند آ فدائی جہلو کریسس۔
اسلم بلوچ ءِ امبریلہ آرگنائزیشن و بلوچ سلاء بند جماعت آتا شابیت سیوت بلوچ راجی آجوئی سنگر نا خالق ہم پارہ، ہرادے ۱۰ نومبر ۲۰۱۸ آ بلوچستان نا ارا بھلو سلاء بند جماعت آک بلوچ لبریشن آرمی و بلوچستان لبریشن فرنٹ نا اواری عمل آن ہڈ تننگاسس، اوکان گڈ داٹی بلوچ ریپبلکن آرمی، بلوچ ریپبلکن گارڈ و سندھی مزاحمتی تنظیم سندھو دیشن لبریشن آرمی اوار مسوسر۔
براس پاکستانی آرمی و ایلو پاکستانی پیراملٹری فوجی تیا بھلو کچ اسیٹ تُرند آ جہلو آتا سوب آن پن تخک۔ دا سیوت آن گڈ پاکستان فوج آ جہلو تا ترندی و کچ ئٹی بھاز ودکی خننگ کن رسینگیک۔
بلوچستان نا زیات علاقہ آتیٹ بلوچ مخلوق دائسکان قبائلی اسرورسوخ تا شیف آن زند گدریفنگ ءِ، اندا سوب زیات سردار خاہوت آک بلوچ سیاست نا مون ئٹ خننگیرہ۔ دا قبائلی زہم بلوچ مزاحمت نا مون آ ہم پاش خننگک۔ اگہ بلوچ مزاحمتی تحریک نا دا تیوہ آ اختلاف آک اوننگر گڑا تیوہ آک اسہ قدر اوار خننگیرا کہ سردار دا مزاحمتی جماعت آتیا تینا زہم ءِ برجاہ تخنگ خوائک اندن خوانندہ لس کارکن دا قبائلی زہم تیان پیش مریسہ سیوت نا پارہ غا گام خلنگ نا جستجو کننگ ءِ۔ تجزیہ کار اندا وڑ بلوچ مزاحمتی تحریک نا ردوم و اسہ پوسکن وخت ئٹی بننگ نا وڑ ئٹ اوننگ ءُ۔
