حوال تا رد ئٹ کوئٹہ ٹی بندغی حق، سول سائٹی و وکیل آتا پارہ غان زالبول تے تنگ کننگ نا بر خلاف برانزی مچی کننگا، اوفک پلے کارڈ ارفیسر ہراتیا نعرہ نوشت کروک اس، برانز ٹی دزگیر کروک ڈودار تے سخت سزا تننگ نا خواست کننگا۔

گیشتر حوال تا رد ئٹ نروک ڈودار آتا دزگیری کن خواست کننگا، رکھ کبو رکھ کبو زالبول تا نعرہ خلینگا، برانز کروک آک پاریر کہ حکومت ڈودار تا بر خلاف سخت ایکشن الے۔

کوئٹہ ٹی اسے اُرا سے ٹی گیس لیکیج نا سوب آن تراک ئٹی 2 زالبول و 5 چُنا تو اوار 7 بندغ ہشنگیسہ ٹپی مسُر۔

گیس لیکیج نا ویل پشتون آباد نا علاقہ اسہ اُرا ئسے ٹی مس، ریسکیو حوال تا رد ئٹ 7 بندغ ہشنگار و ٹپی مسُر۔

تراک آن ٹپی بندغ آتے ریسکیو کارندہ غاک بی ایم سی اسپتال آ سر کریر۔

حوال تا رد ئٹ ٹپی تیٹ چُنا ہم اوار ء ہرافتا سن 8 سال آن شیف ءِ، اوفتٹ مسٹ نا حالیت خلیس نا ہد اسکان ء۔

احوال تا رد ئٹ کوئٹہ نا ایب کیب نا علاقہ مارگٹ ٹی کولا کانڑ ٹی ویل ئنا سوب آن مسہ  کانکن مرگ نا گواچی مسونو۔

گیشتر حوال تا رد ئٹ ویل ٹھیلہ نا چٹ ئنا کشکنگ نا سوب آن مس۔ مسٹ آ  کانکن تا تعلق سوات نا علاقہ میاندم نا اسہ خاہوت آن ءِ، کان کن لیبر یونین مچھ نا صدر محمد اقبال یوسفزئی نا رد ئٹ منہ گھنٹہ آن گڈ کانکن آتا جونک کشینگار کولا کانڑ ٹیٹ ہر وخت ویل آک آسراتی مفرینگ نا سوب آن مریرا۔

اندن پین حوال ئسے نا رد ئٹ ناصر آباد نا علاقہ ٹی تبلیغی امیر حاجی عبدالوہاب حریفال نا ارا ٹی کڈی ٹی خاخر لگنگ نا سوب آن 10 تو ئنا چنکو چناس مرگ نا گواچی مسونے اندن ارا نا گڑاک ہم ہشنگیسہ بھس مسونو۔

گیشتر حوال تا رد ئٹ تدوکا دے دکی نا علاقہ ناصر آباد ٹی تبلیغی امیرحاجی عبدالوہاب نا ارا ٹی اسہ کڈی ئٹی خاخر لگنگ نا سوب آن محمد امین نا 10 تون ئنا چنکا چنا ہشنگیسہ بیران مس، اندن خاخر لگینگ نا سوب آن کڈی ٹی ساڑی فرنیچر، پچ و ایلو گڑاک ہشنگیسہ بھس مسر خاخر لگینگ نا سوب آن داسکان سما تمتنو۔

حوال تا رد ئٹ جھل مگسی نا علاقہ گدھا گاڑا ٹی ارا قبائل نا نیام ئٹی جیڑہ ئٹ سم کاری نا سوب آن لیویز فورس نا کارندہ تون اوار مسہ بندغ مرگ نا گواچی مسر۔ لیویز فورس تون اوار  بڑز ضلعی آفیسر آک ہند آ سر مریسہ حالیت ءِ سمبالار۔

گیشتر حوال تا رد ئٹ چِک و تاڑ نا بناء لیویز فورس نا رد ئٹ  جھل مگسی نا علاقہ ٹی سم کاری نا سوب آن اسہ لیویز کارندہ عبدالفتاح تون اوار  لعل جان و اونا سنگت مرگ نا گواچی مسر، سم کاری نا سوب آن تیوہ آ علاقہ ٹی خلیس تالان مسونے ویل ئنا حوال رسینگتون لیویز فورس و ضلعی آفیسران ہند آ سرمسر حالیت ءِ سمبالار، ویل ئنا رد ئٹ لیویز فورس پین پٹ و پول کننگ ءِ۔

انڈین آرمی نا اولیکو ڈیفنس جنرل بپن روات نا ہیلی کاپٹر تمیسہ بھس مس۔

بھارت نا میڈیا نا رد ئٹ چیف آف ڈیفنس اسٹاف جنرل بپن روات نا ملٹری ہیلی کاپٹر ریاست تامل ناڈو ٹی کونور آن خڑک تمیسہ بھس مس، ویل آن گڈ سرچ اینڈ ریسکیو آپریشن بناء کننگا۔

بھارت نا میڈیا رپورٹس تا رد ئٹ ہیلی کاپٹر ئٹ چیف آف ڈیفنس اسٹاف جنرل بپن راوت، اونا زائیفہ، خاہوت و کارندہ غاک سوار ئسر۔

بھارتی فضائیہ نا پارہ غان ہم دا رد ئٹ سوشل میڈیا آ پک کننگا کہ چیف آف ڈیفنس اسٹاف جنرل بپن راوت نا ایم آئی 17 وی فائیو ہیلی کاپٹر تمیسہ بھس مسونے۔

انڈین ائیر فورس نا پارہ غان شینک مروکا بیان ئٹ پاننگانے کہ ہیلی کاپٹر نا ویل ئنا سوب آتے درست کننگ کن پٹ و پول نا بناء کننگانے۔

ایلو پارہ غان بھارتی میڈیا رپورٹس ٹی ہیلی کاپٹر ویل ئٹ اِرا بندغ نا کہنگ نا پک مسونے داسکان دا درست متنے کہ کہوک آتیٹ دیر دیر اوار ء۔

بھارتی خبر تروکا ادارہ غاک این آئی نا رد ئٹ ہیلی کاپٹر نا ویل ئنا ہند آن خننگوکا جون آک ملٹری اسپتال آ دننگانو۔

یاتی مرے کہ بھارت نا فوج ئنا راہشون جنرل بپن راوت تینا وخت ئنا کاریم تے ایسر کننگ آن گڈ 31 دسمبر 2019 ٹی ریٹائر مسوسس ولے سرکار مودے اودے بھارت نا اولیکو چیف آف ڈیفنس اسٹاف تخاس۔