حوال تا رد ئٹ کوئٹہ ورنا ڈاکٹرز ایسوسی ایشن بلوچستان تینا اسہ بیان اسیٹ پارے کہ حکومت بلوچستان نا بے وسی برجا ءِ، بیست دے گدرینگ آن گڈ ہم دزگیر کروک سنگت آتا یلہ کننگ و خواست آتے منینگ افس۔
او پاریر تینا دزگیر سنگت آتا یلہ کننگ و تینا خواست آتے منفنگ کن سول ہسپتال کوئٹہ ٹی برانزی کیمپ خلینگا و تولوک برانز اسہ وڑ برجاہ ءِ، حکومتی بے لائخی تا سوب آن اوپی ڈیز، انڈور سروسز و ایلیکٹیو سروسز آن بائیکاٹ برجاہ ء ولے غریب مخلوق نا سختی تے اریسہ اسہ وڑ ئنا ہم ایمرجنسی سروسز نا بائیکاٹ کننگپرو۔
حوال تا رد ئٹ قلات ٹی یخ ئنا ترندی ٹی پین ودکی مسونے، پارہ منفی 12 ڈگری سینٹی گریڈ اسکان تما، مخلوق نا زند شل مریسہ سلیس، بازار و مارکیٹ آک گیاوان مخلوق ارا تیٹ بند مریسہ سلیسر، گیس ئنا پوروی وڑ ئٹ بند و بجلی نا ٹرپنگ آن ہم مخلوق نا سختیک ودینگار، مخلوق باسن آ علاقہ آتا ہننگ کن بیوس مسونو ۔
گیشتر حوال تا رد ئٹ بلوچستان نا تیوہ آتیان زیات یخ انگا علاقہ قلات و منگچر ٹی دتر تفوک آ یخ ئنا سوب آن مخلوق ارا تسکان رینگار محکمہ مد قلات انچارج شیراحد مینگل نا پاننگ ءِ تدوکا بیست و چار گھنٹہ نا نیام ئٹی باسنی نا کچ منفی بارہ ڈگری سینٹی گریڈ ریکارڈ کننگانے۔
اونا پین پاننگ اس دا ترند آ یخ ئٹی ہم گیس پریشر تیوہ گم ءِ، اندن بجلی نا ہن و بر ہم اسہ وڑ برجاہ ءِ۔ ایلو پارہ غان ترند یخ ئٹی گیس پریشر نا پورو بند مننگ مخلوق ءِ باسن علاقہ آتیا ہننگ آ بیوس کرینے۔ لس حلقہ آک چیف جسٹس آف پاکستان، وفاقی محتسب اعلیٰ و ایلو ذمہ وار تیان نوٹس الینگ نا خواست کرینو۔
حوال تا رد ئٹ مستونگ نا اسٹ آ ہسپتال نواب غوث بخش رئیسانی ہسپتال ویل تا گواچی حالیت دے پہ دے بد مریسہ ءِ۔ تدوکا دے سہب ئنا 6 بجہ آ ہسپتال ٹی اسہ ناجوڑ اس بیران مس ارا گھنٹہ آن زیات جون ءِ دننگ کن ہسپتال کوالخوا تا پارہ غان ایمبولنس تننگتو۔
خوہت کہوک آ جون ء افیسہ بھلا روڈ آ سلیس جون مین گیٹ آ سر کننگا گڑا ایمبولنس تننگا، جون ءِ اسٹریکچر آ دروک آ ویڈیو وائرل مس ہسپتال ٹی تدوکا بھاز تو ئنا سے سی او نا جاگہ خالی ءِ۔
ہرانا سوب آن ہسپتال مینجمنٹ و دوائی تا کمی تون اوار جتا ویل تا گواچی ء ایلو پارہ غان ہسپتال ترجمان پارینے کہ ایمبولنس شفٹ نا بدلی نا سوب آن المی کاروائی ٹی مس، داسکان اوفتے ایمبولنس تننگتنے۔
بلوچستان نا ضلع کیچ آن پاکستانی فورسز ہشت بندغ ءِ دزگیر کننگان آن گڈ بیگواہ کرینے، دا بندغ آتے فورسز ضلع کیچ نا علاقہ ہوشاپ آن ارا تیا چھاپہ خلیسہ دزگیر کریسہ بیگواہ کرینے۔
بیگواہ مروک آتیٹ پنچ بندغ نا چائنداری نیک سال نا مار ایاز،حسین نا مار عویض، ہاشم نا مار نبیل، جمعہ نا مار سفر، صالح نا مار لطیف نا پن ئٹ مسونے اندن ایلو تا چائنداری مننگ کتنے۔
گیشتر حوال تا رد ئٹ چھاپہ نا وخت آ فورسز ارا تیٹ ساڑی زالبول و چنا تون ہم بے دادی کرینے، داسکان دا بابت کوالخوا تا پاننگ مونا بتنے۔
بلوچستان نا ساحلی شار گوادر ٹی تینا خواست آتا حق ئٹی بلوچستان حق ایتبو تحریک نا تولوک برانز اینو 33 میکو دے ایسر مس۔
اینو سروزیر بلوچستان قدوس بزنجو، صوبائی وزیر ظہور بلیدی، سید احسان شاہ و ڈپٹی کمشنر گوادر تولوک برانز آ بریسہ تلہ غا نوٹیفکیشن ءِ مولوی ہدایت الرحمان بلوچ نا دوٹی تس-
دا وخت ڈپٹی کمشنر اوڑدئی کروک آتا مونا منوکا آ تیوہ آ خواست آتے بنفے۔
حکومت و تولوک برانز کوالخوا تا ٹرالرنگ نا توننگ کن دا ہیت آ امنا مسر کہ سمندر ٹی محکمہ فشریز و مچی ہلوک آتا اوار ٹولی خیال کرو۔
نان ٹیچنگ ٹیچرز، شراب خانہ تا بابت خواست آتیا عمل کننگ آن بیدس مچی ہلوک آتیکن اسہ پیکچ، ایکسپریس وے زیمی تے زر آتے زوت تننگ نا یخین تننگ تون اوار اوار سیم نا کاروبار و غیر المی چیک پوسٹ تا بابت اسہ تو ئسے نا وخت حکومت خوائس۔
دا وخت آ سروزیر قدوس بزنجو تولوک برانز ٹی اوڑدئی کروک آتون ہیت کریسہ پارے کہ نما تیوہ آ خواست آک مننگانو و نن امیت تخینا کہ نن داکان اوار بش مریسہ ارا تا ہنون، ہرادے برانز کروک آک منیتوس۔
اوکان گڈ حسین واڈیلہ پارے کہ شام نماز آن گڈ مولوی ہدایت الرحمان بلوچ برانز کروک آتون ہیت کرو۔
حوال تا رد ئٹ بلوچستان نا ضلع کوہلو نا علاقہ باریلی ٹی کڈ کروکا بمب تراک آن اسہ بندغ اس ہند آ ساہ تسونے اندن زالبول و چنا اس ٹپی مسونو۔
گیشتر حوال تا رد ئٹ بلوچستان نا ضلع کوہلو نا علاقہ باریکی ٹی اسہ بندغ اس تینا زائیفہ و چنا تون اوار موٹر سائیکل آ ہننگ ئس کہ کڈ کروکا بمب آ موٹر سائیکل بس ہرانا سوب آن کڈ کروکا بمب تراک کرے۔
تراک نا سوب آن موٹر سائیکل آ سوار بندغ ہند آ مرگ نا گواچی مس و اسہ زالبول و چنکو چنا اس ٹپی مسر ہراتے دمدستی دوا درمان کننگ کن خڑک ئنا ہسپتال آ سر کننگا۔ ویل آن گڈ جاگہ آ سیکورٹی فورسز داپار ایپار الیسہ سر و سوج بناء کرے۔
حوال تا رد ئٹ قلات شار و ایب کیب نا دتر تفوک آ یخ آن ہڑدے ئی زند بھاز خراب زیمی مسونے، سائبیریا آن بروک یخ و یخ تفوک آ تہو تا سوب آن باسنی نا کچ منفی 9 ڈگری سینٹی ریکارڈ کننگانے، اندن تروند انگا یخ ئٹی بجلی و سوئی گیس مفرینگ نا سوب آن قلات نا شاریک لڑزینگ آ بیوس مسونو۔
گیشتر حوال تا رد ئٹ قلات شار و ایب کیب ئٹ دتر ءِ تفوک آ یخ شاری تے اُرا ٹی بندی جوڑ کرینے، ترند یخ آن کاروباری مرکز بند و کسرک گیاوان مسونو مخلوق تینا اُرا تیٹ بندی مننگ آ بیوس مسونو۔
اندن محکمہ مد قلات تدوکا بیست و چار گھنٹہ نا نیام ئٹی کم آن لم باسنی نا کچ منفی 9- ڈگری سینٹی گریڈ ریکارڈ کرینے، ایلو پارہ غان تربد یخ ئٹی سوئی گیس نا بند مننگ و بجلی نا مرغن شانزدہ گھنٹہ نا لوڈ شیڈنگ آن شاری تا سختی تیٹ ودکی مسونے۔
اندن ہشنگ کن پاٹ ودی مفرنگ نا سوب آن قلات نا شاریک عزابی تا گواچی ءُ، شاریک ترند یخ ئنا زہم ءِ کم کننگ کن متکن آ بوٹ و پچ آتے ہشنگ آ بیوس مسونو ہراڑان شاری تیٹ گٹ و خنتیٹ ناجوڑیک تروند ئٹ تالان مننگ ء۔
بلوچستان نا دارالحکومت کوئٹہ ٹی سم کاری و خاخر لگینگ نا جتا ویل آتیٹ چنا تون اوار اِرا بندغ مرگ نا گواچی مسونو۔
حوال تا رد ئٹ بلوچستان نا علاقہ کوئٹہ ٹی کمبل ٹی خاخر لگینگ نا سوب آن اسہ چناس مرگ نا گواچی مس۔ گیشتر حوال تا رد ئٹ چار شمبے نا دے کوئٹہ نا علاقہ کواری روڈ آ اُرا ٹی ہیٹر نا مونا کمبل اوشنگنگ نا سوب آن ریحان اللہ پنی ءُ چناس مرگ نا گواچی مسونے ۔
اندن پین حوال ئسے نا رد ئٹ کوئٹہ ٹی نادرست بندغ آتا سم کاری آن اسہ بندغ اس مرگ نا گواچی مسونے۔
گیشتر حوال تا رد ئٹ کوئٹہ سریاب مل نا خڑک نادرست بندغ آتا سم کاری آن اسہ بندغ اس مرگ نا گواچی مسونے، جون ہسپتال آ سر کننگانے و مرگ نا گواچی مروکا نا چاہنداری مینگل راج آن تعلقدار سریاب مل نا ہندی حاجی ابراہیم نا مار عبدالمنان نا پن ئٹ مسونے۔
حوال تا رد ئٹ پاکستان نا جتا علاقہ آتیٹ زمین جُمب نا چنڈیک درک کننگانو، زمین جُمب پیما مرکز نا رد ئٹ پاکستان نا جتا ضلع آتیٹ زمین جُمب نا چنڈیک درک کننگانو۔
زمین جمب نا ترندی ریکٹر اسکیل آ 3 اعشاریہ 6 ریکارڈ کننگانے، زمین جُمب نا چنڈیک بالا کوٹ و ایب کیب و وادی کاغان ٹی ہم درک کننگانو۔
اندن زمین جُمب پیما مرکز نا رد ئٹ زمین جُمب نا مرکز جہندمی دے کہی کشمیر اس، و زمین جُمب نا چیر زمین کڑمبی 30 کلو میٹر ریکارڈ کننگانے۔
حوال تا رد ئٹ مستونگ ٹی ارا جتا ویل آتیٹ مسہ بندغ مرگ نا گواچی و اسہ بندغ اس ٹپی مسونے۔
گیشتر حوال تا رد ئٹ مستونگ ٹی بھلا روڈ آ کھڈ کوچہ نا علاقہ ٹی بدرنگ نا ہند آ ترند ہننگ نا سوب آن گاڑی کلٹی مننگ آن ارا بندغ ہند آ مرگ نا گواچی مسر۔
اندن ایلو ویل ئٹی مستونگ شار نا ایب کیب نا علاقہ کلی کڑک ٹی دوشمبے و سہ شمبے نا شام ارا ٹولی نا نیام ئٹی جیڑہ مس ہرانا سوب آن اسہ بندغ اس مرگ نا گواچی و اسٹ بھاز ٹپی مسونے ۔
گیشتر حوال تا رد ئٹ لیویز جون تے و ٹپی آتے دمدستی وڑ ئٹ ہسپتال آ سرکرینے ہراڑے المی کاروائی آن گڈ جونک خاہوت نا دوٹی تننگانو پین کاروائی برجاہ ءِ۔
