“سیخائی عقیدہ غاک” راجی آ آزموندہ یا مخلوق نا ردیک؟
نوشت: منتظر بلوچ
دی بلوچستان پوسٹ
تدوکا نوشت ئٹ ای دا ہیت ءِ لکھاسُٹ کہ سیخاتا گُم مننگ یا اوفتا خراب پاننگ آ عربیت/اسلام ازم نا تالان کروکا تا بھلو دُو ئس مسونے۔ عرب آن پیشن اسلام نا دامُن آن ایلو جاگہ تا، راج آتا اثر تیان صفا کننگ کہ چندی تحریک آک چلینگانو۔ جہی آ دود ربیدگ آتے شیف خلّنگ نا دا کاریم اینو ہم جتاء جتاء وڑئٹ تُرندی ئٹ برجا ءِ۔ اندا عربیت ننا بھلو مخلوق اس دز گیر کرینے و ننا بندغاک ننا جہی دود آتے خراب پاننگ آ کوچرا مفسہ۔
دیوبند مدرسہ تون تعلق تخوکا مُلا اشرف علی تھانوی اسے کتاب اس ” اغلاط العوام” نا پِن ئٹ نوشتہ کرینے۔ ہرانا پُوسکنا شینگکار “ادارۃ المعارف کراچی ئے”۔ دانا پوسکنا ایڈیشن دسمبر 2003ء آ شینک مسونے۔ دا کتاب ئٹ ننا سد آ سال تا راجی آ آزموندہ غاک ہرافک عقیدہ نا دروشم ئٹ مونا بسر اینو ہم کہی ہندنو عقیدہ ارے ہرافک اُرا تیٹی تینا ہمو دروشم ئٹ زندہ ءُ۔ بھازا عقیدہ غاک زند و مرگ ئنا چِشخ سمجھنگرہ۔ نن ہندافتیان گڑا سینا درشان ءِ تینا نوشت ئٹ ہتنگ نا کوشست ءِ کینہ۔
تھانوی تینا کتاب نا “بنائی لوز” ئٹ لکھک :
“مخلوق ئٹ بھاز ہندنو رد ءُ ویل ویل پنی ءُ ہرافتا شریعت تون ہچ کاریم اف ولے مخلوق ہندن یقین کرینے کہ اوفتا پک کننگ کہ ملا غا ہم اِمپسہ”۔
داکان مونی کتاب نا پنہ 14 ٹی لکھک:
“مشہور ءِ کہ دے آن کسہ پاپہ بو نہ تو بندغ کسرے گیرام کیک، دا غُٹ ہیتاک سٹی پٹی ءِ بے بنیاد ءُ۔ دُنو عقیدہ تِخنگ گُناہ ءِ۔” (ویل 23)
بُڑز لکھوکا ‘ویل’ آ مُلا تھانوی تُرندی ئٹ “واہیات” نا لوز ءِ نوشتہ کرینے ہرانا معنہ پاش ءِ۔ ایلو ہیت دادے کہ دا عقیدہ آزموندہ غان ہندن بِسّونے کہ اینو ہم دے آن کسہ خلپسہ۔
پنہ 96 آ خواجہ نوشتہ کیک :
“بھاز مخلوق دا سرپد مریک کہ نرینہ نا چَپی آ خن و نیاڑی نا راستیکو خن پرپٹنگ آ ویل، مصیبت اس و دا چَپ آ خوشی بریک، دا تیوی رد ءُ گمان ئسے۔”(ویل 3)
دا جیڑہ (مُلا دادے جیڑہ اس سرپد مریک) ہم تینا ہندا دروشم ئٹ زندہ ءِ خن ئنا پِرپٹنگ مہمان ئسے نا بننگ تو تفوکے (مطلب خوشی تون) بھاز جاگہ نیاڑی نا راستی آ خن ئنا پِرپٹنگ ویل ئسے نا ڈس ءِ ایتک۔
ہندن پنہ 99 آ لکھک
” داڑے رواج ءِ کہ بندغ اس جاگہ ئسے آ ہننگے، تو اودے پد آن توار خلیر تو او جنگ آ تیار مریک کہ کنے پد آن انت ئسے کن توار کریس۔ داسا کنا کاریم مفک تو دا ہیت ئنا شریعت تون ہچ کاریم اف۔”
دا اسے بھاز زیات رواج ہرفوکو عقیدہ ئسے ہرادے بھاز جاگہ “پدگُوانک” و گڑاس جاگہ “مکن” پارہ۔ بیرہ دا اف کہ ہرا بندغ ءِ پد آن توار خلکُنو او جنگ آ تیار مریک بلکہ پد آن توار کننگا اُرا والاک، لمہ، ہیڑ غُٹ دا گِڑاغا اسٹ ایلو آ تُرند مریرہ کہ پدگُوانک کپبو۔
ہندا بابت ئٹ اسے کسہ ئس پنی ءِ کہ ہراتم دودا جنگ ئکے تینا لشکر تون پیشتماکہ۔ او غُٹ ءِ رخصت کریسس تو بالاچ پارے ای ہم جنگ ئکے بریوہ ولے دودا اودے ہڑسا پارے کہ نی ہُراٹی مر داسکانے چُنک اُس۔ پیش تمنگ نا وخت آ دودا ءِ نیاڑی اس پد آن توار خلک تو دودا نا اُست شک کرے او واپس اڑسینگا بس بالاچ ءِ پارے کہ ای جنگ ئٹ خلینگیوہ کنا بیرے نی ہلیس۔
“ارمان پہ تو باگاڈ چم
منی موت ءِ را نشانے داتے
زند ءَ را جت ئے چامپولے”
(ارمان نیکے گروشک خنی، کنا مرگ ئنا ڈس ءِ تسوس، زند ءِ چپانٹ ئس خلکُس۔)
ہندن خُواجہ پنہ 101 آ بومب ئنا بابت ئٹ پاہک کہ دا ساہدار ہراڑے تُولے۔ مخلوق پاہک کہ شار سُنسان مریک یا بندغ ئس کہیک دانا راستی تو تعلق اف۔” دا بابت ئٹ ننا راج داسکانے آبادی ئٹ بومب ئس خنے تو مِڑرہ تا اودے روادار مفسہ کہ توار خلک تو شار ئٹ بندغ اس کہیک یا خلق سُنسان مریک۔ ہندا وڑ کُکُڑ نا بانگ تننگ آن گُڈ اودے تڑنگ ءِ ہم خراب پاہک یا شام ئنا روفہ خلنگ نا خرابی پاہک کہ شریعت آن ثابت متنے۔ ہندا سوب آن دافتے آن تینے تورِن نا تو گناہگار مرینہ۔
دا گِڑاتے نن بیرہ ردی پان او منیپن تا یا دافتیا مسخرہ خلین کنا خیال پاہک تینا گڑا ءِ پین نا پاننگ آ رد کننگ یا تینا گِڑاتیا مسخرا خلّنگ ایلو نا گِڑا ءِ خنتیا تخنگ نوآبادیاتی ذہنیت نا کاریمے اسے آزات و ملی سے نا کاریم اف۔
داڑے دا سوج مونا برو ءِ کہ دافک بیرہ اتفاق مسونو ہرافک پدان یقین ئٹ بدلینگانو و عقیدہ جوڑ مسونو؟ دافتا راستی تون انت تعلق ئے؟ ورندی دادے کہ دافک ننا راج ئنا کہی زمانہ غاتا آزموندہ غاک مسونو ہرافک مونا یقین نا دروشم ئٹ بدلینگانو۔ او راستی تا دادے کہ ننا تاریخ، راج، چاگرد و ننا شعوری سفر نا بشخ مسونو و اریر۔ دافتے دون ارزانی ئٹ رد کننگے ای تینٹ جاہلی ئس سرپد مریوہ کہ تینا آزموندئی آ یخین آتے رد پا ایلو نا بغیر آزموندہ کروکا یقین آتے تینا زی آ تِرِپ کر۔ دافتے سرپد مروئی ءِ نہ تو دا بَھلَاک کیدِرہ ننے۔
ارٹمیکو سوج دا مننگ کیک کہ ملا تھانوی دا گپ آتے ہندوستان نا چاگرِد نا رِد ئٹ مونا آ ایسونے اودے داڑے امر لِچّفِن۔ دانا ورندی دادے کہ بھازا سیخائی عقیدہ غاک ننا و ہمسایہ راج آتا اِسٹ ءُ۔ (دا اثرات آک مننگ کیرہ کہ اسٹ ایلو آ تمّانو) ہرافک اینو ہم آزموندہ مرسا ءُ۔
یاتی:
(دودا و بالاچ بلوچ تاریخ نا اِرا پِن گدرینگانو۔ ہڑتوماک ایلم مسونو۔ ہرافک سمی ءِ باہوٹ کریسر ولے بیبگر سمی نا ساہدار تے لُٹّاسس۔ اوڑا باہوٹ نا رکھ اکن جلہو کریر۔)
