بلوچستان نا ضلع کیچ آن پاکستانی فورسز پنج بندغ ء دزگیر کننگ آن گڈ بیگواہ کرینے۔
گیشتر حوال تا رد ئٹ تدوکا مسہ دے ئنا سے ضلع کیچ نا علاقہ زامران دشتک ٹی فوجی آپریشن برجاہ ء ہراڑے فورسز پنج بندغ ء دزگیر کننگ آن گڈ بیگواہ کرینے۔
بیگواہ مروک آتا چائنداری فتح محمد نا مار ریاض، فتح محمد نا مار نثار، کہدہ سہراب نا مار مدی و بشام نا پن تیٹ مسونو اندن بیگواہ مروک آتیان اسہ بندغ ئسے نا چائنداری داسکان متنے۔
ایسری حوال تا رد ئٹ فورسز بھلو کچ اسیٹ علاقہ ٹی ساڑی ء و علاقہ ٹی فوجی آپریشن داسکان برجاہ ء۔
دوشنبے نا دے اونا ملخڑ مدیحہ رضوی انسٹاگرام آ وفات نا حوال ءِ تس کرے۔
رشید ناز نا عمر 73 سال اس و او 1971 ٹی ٹی وی ڈرامہ غاتیان تینا کیریئر نا بنا کریسس۔ رشید ناز پاکستان نا پنی آ فلم ’خدا کے لیے‘ ٹی ہم کارم کریسس ہرادے بندغ آک باز دوست کریسر۔ او اندڈین فلم آتیٹی ہم کارم کریسس۔
رشید ناز سنہ 1948 ٹی پشاور ٹی ودی مسوسس و پشتو، ہندکو و اردو ڈرامہ تیٹی کاریم کریسس۔ رشید ناز نا اولیکو اردو ڈرامہ ’ایک تھا گاؤں‘ پاکستان ٹیلی ویژن آ نشر کننگا۔ ’ناموس‘ ڈرامہ ٹی اونا کڑدار ءِ بھاز دوست کننگا۔
2009 ٹی شینک مروکا فلم کندھار بریک ٹی ہم کارم کریسس ہراٹی اونا کڑدار عاشق خان ءِ۔ دا فلم ئٹ بلوچ مخلوق و بلوچستان ءِ ہم نشان تننگاسس ہرادے مخلوق بھاز دوست کرے۔
2015 ٹی رشید ناز انڈین فلم ’بے بی‘ ٹی اکشے کمار تون اوار کارم کریسس۔ سرکاری ٹی وی نا رد ئٹ رشید ناز نا اولیکو پشتو فلم ’زما جنگ‘ و اولیکو اردو فلم ’ڈکیت‘ اس۔
پاکستان نا سرکاری و نجی ٹی وی چینل آتیا نشر مروکا ساز و زیمل وڈیو ’عشق محبت اپنا پن‘ ٹی ہم رشید ناز نا کردار ءِ بندغ آک دوست تخار ۔
حوال تا رد ئٹ بلوچستان نا بھاز آ ضلاع آتیٹ مُد بارون و یخ اندن شمالی ضلاع آتیٹ بھاز یخ ء محکمہ مُد نا رد ئٹ دوشمبے آ بلوچستان نا بھاز ضلاع آتیٹ مُد بارون و یخ مرو۔
گیشتر حوال تا رد ئٹ شمالی ضلاع آتیٹ بھاز یخ مننگ نا گمان ء داسکان کوئٹہ، زیارت ، پشین ، لورالائی،چمن،قلعہ عبداللہ،قلعہ سیف اللہ،ژوب ٹی منہ جاگہ آتیا مچے پر و برف نا امیت ء۔
اندن دا رد ئٹ تعلقدار کوالخوا الرٹ برجاہ کرے گیشتر حوال تا رد ئٹ تعلقدار عملے و مشنری اسٹینڈ بائی کننگا۔
حوال تا رد ئٹ حق ایتبو تحریک نا سر کماش مولانا ہدایت الرحمن بلوچ گوادر ایئر پورٹ روڈ آ پرہجوم پریس کانفرنس کرے پریس کانفرنس ٹی تولوک برانز و کوسٹل ہائیوے ء بند کننگ نا پڑو کرے۔
او پارے کہ تدوکا تو حکومت تون مزاکرات آن گڈ تولوک برانز ایسر کننگا، وزیر اعلی تولوک برانز ٹی ننا خواست آتا عمل کننگ نا یخین تسوسس، اسہ تو گدرینگا ولے ننا خواست آتا عمل کننگتو۔
اونا پین پاننگ اس کہ خواست آتا عمل نہ کننگ آ مولانا ہدایت الرحمن نا کوسٹل ہائیوئے آ تولوک برانز نا پڑو کینا 20 جنوری و ماڈہ کوسٹل ہائیوے آ تولوک برانز مرو 3 فروری آ پسنی نا ہند آ مکران کوسٹل ہائیوے بند کننگو۔
اندن 10 فروری آ سر بندن کراس آ مکراب کوسٹل ہائیوے بند مرو،27 فروری آ اوتھل زیروہ پوائنٹ آ تولوک برانز مرو، کوئٹہ و مکران نا ٹریفک ء جام کرون، اول مارچ آ نادرست وخت اسکان واپس گوادر ٹی تولوک برانز کننگو۔
حوال تا رد ئٹ بلوچستان نیشنل پارٹی نا باسک صوبائی اسمبلی ثناء بلوچ یک شمبے نا دے ورنا ڈاکٹرز ایسوسی ایشن و پیرامیڈیکل اسٹاف فیڈریشن نا سول ہسپتال کوئٹہ ٹی ہڈ تروک برانزی کیمپ آ ہنیسہ ڈاکٹر تون است اسونی نا درشانی کرے۔
گیشتر حوال تا رد ئٹ ثناء بلوچ ورنا ڈاکٹر تا پیرامیڈیکل اسٹاف،فیڈریشن نا جائز خواست آتا امنائی نا پڑو کرے و یخین تس کہ ورنا ڈاکٹرز ایسوسی ایشن بلوچستان، پیرامیڈیکل اسٹاف فیڈریشن نا ویل و خواست آتے اسمبلی فلور آ افو۔
اندن دا وخت ورنا ڈاکٹرز ایسوسی ایشن بلوچستان نا چیئرمین ڈاکٹر حفیظ مندوخیل ایم پی اے ثنا بلوچ نا نسخان و امنائی آ اودے منتوار پارے۔
حوال تا رد ئٹ بلوچستان ٹی نُت ئنا نرخ ئٹی 2 رپئی اسہ کلو آ ودکی مسونے۔ مارکیٹ آن رسینگوک حوال تا رد ئٹ صوبہ ٹی 20 کلو نُت نا گوڑی 1400 رپئی آن زیات مریسہ 1440 رپئی نا مسونے۔
اندن دا رد ئٹ صوبائی وزیر خوراک زمرک خان اچکزئی نا پاننگ ءِ کہ نُت ئنا نرخ ئٹی ودکی نا سوب غلہ نا آف سیزن ءِ۔
گیشتر حوال تا رد ئٹ سندھ و پنجاب ٹی غلہ تننگ افس صوبائی وزیر خوراک زمرک خان اچکزئی نا پاننگ ءِ کہ اپریل اسکان پوسکنا فصل بننگ آن حالیت جوان مرو۔
صومالیہ ٹی حکومتی ترجمان محمد ابراہیم تینا ارا نا مونا مروکا خود کش تراک ٹی ٹپی
پیشن ملکی حوال تروک ایجنسی نا رد ئٹ صومالیہ نا دارالحکومت موغادیشو ٹی خودکش تراک اس مس ہرانا سوب ئٹ حکومتی ترجمان محمد ابراہیم ٹپی مس۔
حوال تروک ایجنسی نا رد ئٹ خودکش تراک حکومتی ترجمان نا ارا نا مونا کننگا، تراک ئٹ ٹپی مروکا حکومتی ترجمان محمد ابراہیم ء اسپتال آ دریر ۔
جاندمی کوریا نا سرکاری میڈیا نا رد ئٹ جاندمی کوریا اِرا ریلوے ٹیکٹیکل گائیڈڈ میزائل فائر کرینے۔
جاندمی کوریا نا سرکاری میڈیا نا رد ئٹ میزائل آزمودہ ریلوے بورن رجمنٹ نا کارروائی نا لائخی ءِ اوننگ کن کننگانے۔
پیشن ملکی خبر تروک ایجنسی تا رد ئٹ جاندمی کوریا اولیکو وار ریلوے آن مطلق ستمبر 2021ء ٹی میزائل آزمودہ کریسس، جاندمی کوریا نا دا تو ئٹی دا مسٹمی میزائل آزمودہ ءِ۔
پیشن ملکی خبر تروک ایجنسی نا پاننگ ءِ کہ جاندمی کوریا دا تو ٹی 5 و 11 جنوری آ ہائپر سونک میزائل نا آزمودہ کرینے۔ دا میزائل آزمودہ آ تیان پد امریکہ جاندمی کوریا غا رکھ خلکونے۔
جاندمی کوریا نا وزارتِ خارجہ نا ترجمان نا دا بارو ئٹ پاننگ ءِ کہ امریکہ رکھ خلنگ آن پینش حالیت ءِ خراب کننگ ءِ۔
اونا پاننگ اس کہ جاندمی کوریا ءِ ملکی دفاع نا حق ارے۔
سندھ ئنا بنجائی شار کراچی ٹی پریس کلب نا مونا بلوچ بیگواہ بندغ آتا یلہ کننگ کن ہڈتروک آ کیمپ ٹی عبدالحمید زہری نا خاہوت اِرا دے علامتی بین ہڑتال آ توسنے۔
دا وخت آ سعیدہ حمید پارے کہ ای تینا باوہ عبدالحمید زہری نا سلامت یلہ کننگ کن تینا خاہوت تون اوار وائس فار بلوچ مسنگ پرسنز نا کیمپ ئٹی اِرا دے علامتی بین ہڑتال آ توسونٹ۔
او ریاستی ادارہ آتیان خواست کرے کہ اونا باوہ ءِ پاش کیر و اگہ او ڈودار ئسے گڑا اودے عدالت ٹی ہتیر۔ سعیدہ پارے کہ کنا باوہ ءِ دا وڑ بیگواہ کننگ دا ملک ئنا قانود و آئین نا برخلاف ورزی ءِ۔
او دا وخت بندغی حق ئنا تنظیم آتیان ہم خواست کرے کہ کنا باوہ نا یلہ کننگ کن تینا کڑدار ءِ ایسری ایتر و ننا ڈکھ ئی آ خاہوت نا خوشی تے واپس ہتیر۔
اندن خاہوت نا پارہ غان اینو راجی حوالکاری تا سائٹ آ عبدالحمید زہری نا یلہ کننگ کن #ReleaseAbdulHameedZehri تون کمپئین کننگور، خاہوت ہر تپہ آن تعلق تخوک بندغ آتیان برانز ٹی اوار مننگ نا خواست کرینے۔
بلوچستان نا ضلع خضدار نا تحصیل زہری نا ہندی عبدالحمید زہری نا خاہوت نا رد ئٹ تدوکا سال 10 اپریل آ ہندی پولیس و سادہ پچ بینوک کارندہ آک کراچی ٹی اونا ارا آ نن نیما آ چھاپہ خلیسہ ارا ٹی ساڑی شکر خان نا مار عبدالحمید زہری ءِ تینتون دریر۔ خاہوت نا پاننگ ءِ اینو اسکا اوفتے عبدالحمید زہری نا جانجوڑی و زند ئنا بابت ہچ حوال رسینگتنے۔
پاکستان ٹی کرونا نا پنچمیکو ودھ ئنا وختا کیس آتے ٹی ودکی مننگ ءِ۔
محکمہ جانجوڑی سندھ نا کنڈ آن پاننگانے کہ کراچی ٹی مثبت کيس آک اسہ وار پدا بڑز ترين سطح سی و پنچ اعشاريہ مسٹ صفر نا شرح غا رسینگانو۔
محکمہ جانجوڑی نا رد ئٹ کراچی ٹی ہنوکا 24 گھنٹہ ٹی 2846 کیس رپورٹ مسونو و کرونا نا 24 آن ہلیس 23 کیس ٹی اومی کرون پک مسونے۔
کراچی ٹی اومی کرون نا دائسکان 430 کیس رپورٹ مسونو۔ محکمہ جانجوڑی نا رد ئٹ ضلع شرقی ٹی غٹ آن زیات کیس مونی بسونو و وسطی اور غربی ٹی ارٹمی و مسٹمی نمبر آ غٹ آن زیات کیس رپورٹ مسونو۔
سندھ ٹی کرونا وائرس نا تالان مننگ ءِ توننگ کن صوبائی ٹاسک فورس نا اجلاس اینو مننگ ءِ ہرا ٹی کرونا نا تالان مننگ ءِ توننگ کن پنت پیش کننگو۔
این سی او سی نا پاننگ ءِ کہ ملک ٹی کرونا آن پین 4 ناجوڑ وفات کرینو و کل وفات کروکا تا تعداد 29 ہزار3 مسونے۔
این سی اوسی نا مستی پاننگ ءِ کہ 24 گھنٹہ ٹی کرونا نا پین 4 ہزار286 پوسکنو کیس رپورٹ مسونے۔ دا نیام ئٹ کرونا نا 52 ہزار 522 ٹیسٹ کننگانے و مثبت کیس آتا شرح 8.16 فیصد ریکارڈ کننگانے۔
