رسینگوک حوال تا رد ئٹ طالبان حکومت افغانستان ٹی اقتدار ء سمبھالنگ آن گڈ تینا اولیکو  بجٹ ء مننا  پیشن ملکی میڈیا نا رد ئٹ سال 2021 ٹی اقتدار بننگ آن گڈ طالبان نا منوکا بجٹ ٹی اسہ ہم پیشن ملکی کمک نا ذکر ساڑی اف۔

گیشتر حوال تا رد ئٹ طالبان نا وزارت خزانہ نا ترجمان احمد ولی حقمل پارینے کہ 2 سال آن گڈ دا اولیکو وخت ء ہرا وخت نن دن ءُ بجٹ اس جوڑ کرین ہرانا ہڷ و تس پیشن ملکی کمک آ اف و دا نن کن بھلو سر سہبی ئسے۔

او پارے کہ ہرا زالبول آتے کاریم آن توریسر اوفتے  نوکری تیان کشوفس بلکن تنخواہ تننگو و ہرا سرکاری ملازم آتے بھاز تو ئنا سے تنخواہ رسینگتنے اوفتے جنوری نا ایسری اسکان تنخواہ تننگ بناء کننگو۔

طالبان حکومت 2022 کن اول آن  توئی بجٹ کن موکل تسونے 9۔ 53 بلین افغانی یا 508 ملین امریکی ڈالرز نا تقریباً تیوہ بجٹ سرکاری ادارہ آتا فنڈنگ کن  ہتنگو افغان بجٹ ٹی 7۔ 4 بلین افغانی ٹرانسپورٹ نا انفرااسٹرکچر تون اوار  دیمروی منصوبہ آتا خڑچ کننگو۔

جاندمی کوریا نا کنڈ آن کروکا میزائل آزمودہ غاک، ہرافتیٹی ہنوکا ہفتہ آن پد ئنا ہم اِرا آزمودہ اوار ءُ، دافتیان گڈ اولیکو وار اونا سلاء تا آزمائشی آزمودہ آتا پروگران آ امریکہ رکھ خلکنے۔

خبر تروک ادارہ روئٹر نا امریکی حکام نا بارو ئٹ پاننگ ءِ کہ، شش کوریائی و اسہ روسی فرم اس رکھ آتا زد ئٹی برور ہرا فتے روس و چین آن پروگرام تیکن مڈی دو بننگ ءِ۔

امریکی وزارت خزانہ نا رد ئٹ دا گام جاندمی کوریا ءِ میزائل پروگرام و سلاء نا تالان کننگ آن توننگ کن ہرفنگانے۔
امریکہ نا کنڈ آن دا پنت ہم تننگانے کہ دا پنچ بندغ ءِ اقوام متحدہ نا سلامتی کونسل ہم بلیک لسٹ کے ہرافتا شمالی کوریا غا رکھ خلنگ کن پانزدہ رکنی کمیٹی ٹی متفقہ معاہدہ کن خواست مرو۔

ہنوکا سال جنوری ٹی اقتدار ٹی بننگ آن پد جوبائیڈن انتظامیہ پیانگ یانگ ءِ جوہری بم و میزائل تیان توننگ و مذاکرات نا کنڈ آ ہتنگ کن کوشست کریسہ کرینے، وا ہم سرسہب متو۔

امریکی وزارت خارجہ نا ترجمان نیڈ پرائس نا دا بارو ئٹ پاننگ ءِ کہ امریکہ شمالی کوریا تون سفارت کاری برجا تخنگ کن پرعزم ءِ۔

اسہ نیوز بریفنگ اسیٹی اوفتا پاننگ اس کہ ”نن ہنوکا دے تیٹی انت خنان، غٹ آن اہم دا کہ اگہ نن مستی ہننگ ان گڑا مذاکرات نا کنڈا بروئی تمو”

وزارت خزانہ نا پاننگ ءِ کہ رکھ ستمبر آن پد شش بلیسٹک میزائل نا آزمودہ آ تیان پد خلنگانے ہرافتیان ہر اسٹ ئٹی اقوام متحدہ نا سلامتی کونسل نا قرارداد آتا خلاف ورزی مسونے۔

بلوچ اسٹوڈنٹس ایکشن کمیٹی نا بنجائی ترجمان تینا شینک کروک آ بیان ئٹی لیاری ادبی و سیاسی فیسٹیول نا ہڈ تننگ نا پڑو کریسہ پارے کہ 23 جنوری 2022 آ بلوچ اسٹوڈنٹس ایکشن کمیٹی نا پارہ غان  لیاری ٹی گرینڈ ادبی و سیاسی فیسٹیول ہڈ تننگو ہراٹی سیاست، ادب و کراچی نا ویل آتون اوار جتا سرحال تیا بلوچ دانشور، سیاسی جماعت آتا راہشون و طلبا تنظیم آتا اوغدیدار پینلسٹ نا دروشم اٹ اوار مرور داڑان بیدس فیسٹیول ٹی بلوچستان کتاب کاروان نا پن ئٹ  کتب مُچی ہم ہڈ تننگو و زیمل دیوان ہم ہڈ تننگو۔

او پارے کہ اسہ ہم چاگڑد ٹی دیمروی ٹی خوانندہ آتا اسہ عظیم کڑدار اس مسونے ہراڑے خوانندہ آک اسہ پوسکنو سوج و فکر نا شیف چاگڑد کن پوسکنو کسر پاش کرور گڑا ایلو پارہ غان چاگڑد ٹی پوسکنو دیمروی دوست ہیت و شرہ آتا بناء کریسہ اوفتے اشتماعی عمل نا پارہ آ پامدار کیرہ۔ بلوچ اسٹوڈنٹس ایکشن کمیٹی بلوچ خوانندہ آتا راہشونی کریسہ بلوچستان تون اوار بلوچ بھاز آ علاقہ آتیٹ برجاہ وڑ ئٹ جتا مجلس و فیسٹیول ہڈ تریسہ کرینو۔ اندنآ فیسٹیول و مجلس نا بنماسی مسخت خوانندہ آتون اوار چاگڑد نا ہر ذی شعور تپہ نا دیمروی دوست سوج ءِ مونی دریسہ اوفتیٹ سیاسی، ادبی و علمی شعور ءِ مونی دروئی ءِ تاکن ورنا تون اوار ہر تپہ آن تعلقدار بندغ اشتماعی عمل نا بشخ جوڑ مرے۔

اوفک پین پاریر کہ بلوچ اسٹوڈنٹس ایکشن کمیٹی نا پارہ غان تدوکا سال ئٹی کوئٹہ، حب چوکی و تونسہ شریف ٹی گرینڈ فیسٹیول ہڈ تننگا و اندا وڑ ءِ برجاہ تخیسہ لیاری ادبی و سیاسی فیسٹیول ہڈ تننگ نا پڑو کننگانے۔ دا فیسٹیول ٹی جتا سیاسی جماعت آتیان تعلق تخوک آ بلوچ سیاسی راہشون تے خوایفنگ ءُ ہرا بلوچ سیاست نا تاریخی اندا ندارہ و ساڑی سیاسی سرگڑدانی تون اوار کراچی نا سیاست آ ہیت آتا درشانی ءِ کرور۔

او پین پاریر کہ کتاب آک چاگڑد ٹی پوسکنو سوج اس مونی دننگ و مجلس تننگ ٹی خاص کڑدارایسر کیرا، بلوچ اسٹوڈنٹس ایکشن کمیٹی خوانندہ تنظیم آتا رد ئٹ یخین تخیک کہ بلوچ چاگڑد نا دیمروی و ترویج علم و شعور آن مننگ کیک بلوچ چاگڑد ٹی کتابی ماحول ءِ تالانی بشخنگ کن تنظیم نا پارہ غان بلوچستان کتاب کاروان نا پن آن بلوچستان نا کنڈ کنڈ ئٹی کتب میلہ ہڈ تننگو۔ اندا وڑ ءِ برجاہ تخیسہ لیاری ادبی و سیاسی فیسٹیول ٹی ہم بلوچستان کتاب کاروان نا بابت ئٹ اسہ کتب مُچی اس ہڈ تننگو ہراڑے جتا پبلشر تا کتاب تخنگو۔ داڑان بیدس بلوچ فنکار آتا  فن ئنا ترویج کن آرٹ ایگزیبشن تون اوار زیمل دیوان ہم ہڈ تننگو۔

بلوچستان نا علاقہ دکی و مچھ ئٹ سم کاری و روڈ شکست آتیٹ جتا تدینی تیٹ 2 بندغ مرگ نا گواچی اندن پنج چنا ٹپی مسونو۔

حوال تا رد ئٹ بلوچستان نا ضلع دکی ٹی ٹرائبل کول ایریا ٹی سلاء بند بندغ آک سم کاری کریسہ کولا کانڑ نا انجن ڈرائیور ءِ کسفیر و نرار۔ ایس ایچ او دکی انور جلالزئی نا رد ئٹ  تدوکا دے ٹرائبل کول مائنز نا ہد و ہویل ئٹ سلاء بند بندغ آک سم کاری کریسہ کانڑ نا انجن ڈرائیور اوغانستان آن تعلقدار راج ہوتک ملا عبدالرشید نا مار لوط الرحمان ءِ کسفیر و نرار۔

مرگ نا گواچی مروک انجن ڈرائیور نا جون سول ہسپتال دکی آ سر کننگا جون دو ٹی الینگ نا کاروائی آن گڈ خاہوت نا دوٹی تریسہ باوہ پیرہی آ وطن افغانستان آ رادہ کننگا۔

ویل ئنا برخلاف کولا کانڑ نا کانکن آک برانزی وڑ ئٹ کاریم ءِ بند کریسہ ڈودار آتے دزگیر کننگ نا خواست کریر۔ ایس ایچ او نا رد ئٹ ویل دزی نا تدینی اس لگیک۔ اندن پولیس نادرست ڈودار آتا بر خلاف ٹھیکیدار عبدالمجید نا خواست آ مقدمہ نوشت کریسہ پٹ و پول ءِ بناء کرینے۔

اندن پین حوال ئسے نا رد ئٹ  لونی آباد نا خڑک سلاء بند بندغ آک ٹرک آ سم کاری کریسہ ٹائر تے ترخفیر و نرار۔ پولیس نا رد ئٹ امو ٹرک دکی پنجاب کن کولا لوڈ کریسہ دننگ اس کہ سلاء بند بندغ اوڑا سم کاری کریسہ ٹائر ءِ ترخفیر اندن سم لگینگ نا سوب آن ٹرک نا آئل ٹینکی ہم نسخان مس پولیس ویل ئنا مقدمہ نوشت کریسہ ڈودار تا پٹ و پل ء بناء کرے۔

اندن پین حوال ئسے نا رد ئٹ مچھ ئٹ ٹرک و رکشہ نا ڈک لگنگ آن اسہ بندغ اس مرگ نا گواچی و اسہ ارا نا پنچ چنا بھاز ٹپی مسر، ٹپی مروکا چناک سول اسپتال مچھ ئٹ بنائی دوا درمان آن گڈ پین دوا درمان کن کوئٹہ غا دننگار۔

اندن پولیس نا رد ئٹ مچھ پل آن خڑک بولان نا بھلا روڈ آ کوئٹہ آن سبی کن ہنوکا رکشہ و مون آن بروکا ٹرک اسٹ ایلو تون ڈک لگار ہرانا سوب آن رکشہ ئٹ سوار  کوئٹہ نا ہندی  نظر محمد نا مار سعد اللہ جاگہ غا مرگ نا گواچی مس و پنچ چنا ٹپی مسر۔

گیشتر حوال تا رد ئٹ ٹپی چنا تیٹ محمد عارف خان، شاہد خان، شاہ زیب خان، ادریس خان اوار ء اندن کہوک و ٹپی آ چنا تا تعلقداری اسہ ارا آن پاریسہ ءِ، ٹپی مروکا چناک مچھ اسپتال ئٹ بنائی دوا درمان آن گڈ پین دوا درمان کن کوئٹہ غا دننگار، اندن جون المی کاروائی آن گڈ خاہوت نا دو ٹی تننگا۔

کوئٹہ ٹی ورنا ڈاکٹر آک ریڈ زون ہننگ نا کوشست کریر ہراڑا پولیس اوفتے لٹ کٹ کرے و 20 ڈاکٹر آتے دزگیر کرے اندن 6 پولیسں کارندہ ہم ٹپی مسر۔ ورنا ڈاکٹر آک اینو خواست آتا حق ئٹی ریڈ زون ٹی وزیراعلیٰ ہاؤس نا مونا برانز نا پڑو کریسر۔

ورنا ڈاکٹر آک خواست آتا حق ئٹی تدوکا یک و نیم تو آن زیات وخت آن ہڑتال و برانز ئٹی ءُ، ورنا ڈاکٹر تا سنڈیمن اسپتال آن انسکمب روڈ آ دپ درشانی ٹی ورنا ڈاکٹر تیان بیدس پیرا میڈیکل اسٹاف و نرس آک ہم اوار ئسر، ورنا ڈاکٹر تا ریلی نا وخت آ پولیسں نا بھلو کچ اس ہند ءِ ہلوک اس اندن ریڈزون آ ہننک آ کسر پتی ءُ تار خلیسہ بند کننگاسس۔

ترجمان وائی ڈی اے نا رد ئٹ  پولیسں نا بے دادی آن 10 آن زیات ورنا ڈاکٹر و پیرامیڈیکل باسک آک ٹپی مسونو، کوئٹہ نا سرکاری اسپتال آتیٹ ورنا ڈاکٹر تا ہڑتال نا سوب آن ان ڈور سروسز و اوپی ڈبیز بند ءُ ورنا  ڈاکٹر تا ہڑتال نا سوب آن ناجوڑ آک پریشانی تا گواچی مننگ ءُ۔

ناجوڑ تا پاننگ ءِ کہ صوبائی حکومت و محکمہ جانجوڑی ورنا ڈاکٹر تا ہڑتال آ بے پامی و بے وسی نا گواچی ءِ، اوفک لس مخلوق نا اسہ ہم ویل ئسے نا سوج اف، او خواست کرینو کہ حکومت ورنا ڈاکٹر تا ہڑتال نا نوٹس الیسہ  اودے دمدستی وڑ ئٹ ایسر کرفے تاکن لس مخلوق ءِ آسراتی رسینگہ۔

پشاور نا علاقہ تہکال ٹی اُرا نا متکنا چت ئنا تمنگ آن پنچ نیاڑی کسکر و اِرا چنا ٹپی مسر۔

کمکی ٹیم آتا پاننگ ءِ کہ دا تدینی انقلاب کالونی نا علاقہ تہلکال ٹی مسونے، ہراڑے اُرا نا چت پر آن پد متکن مسوسس و سہہ شنبے نا نن ناگمان آن چت و دیوال اُرا ٹی ہندی ٘مخلوق نا زی آ تمار۔ تدینی ٹی اُرا ٹی ساڑی پنچ نیاڑی کسکر و اِرا چنا ٹپی مسر۔

پولیس نا پاننگ ءِ کہ اُرا ٹی ہندی بندغ آک اوغان باہوٹی ئسر، ہرافتا جوْن آتے بنائی کارروائی کن خیبر ٹیچنگ اسپتال آ درینو، ہراکان اوفتے اوغانستان نا شار جلال آباد آ درو۔ کہوک آتیٹ لمہ و مسڑ اوار ءُ۔

سہہ شنبے نا دے امریکہ اوغانسان کن بندغی ہمدڑدی ٹی 30 کروڑ 80 لکھ ڈالر کمک تننگ نا پڑو کرینے۔ ایلو نیمہ غا اقوام متحدہ ہم باسک ملک آتیان پنچ ارب ڈالر نا کمک نا خواست کرینے ہرا کہ اینو اسکان اسہ ملک اسیکن کروکو کل آن بھلو خواست ئسے۔

امریکہ نا کنڈ آن پڑو اندنو وخت ئسے آ کننگانے ہرا وخت اقوام متحدہ اوغانستان نا خلقت کن ریکارڈ خواست کننگ ءِ و خبردار کننگ ءِ کہ ملک ئنا نیم آباتی شابیت پڑ آ خوراک نا نیستی و لنگڑی تون مون تننگے۔

امریکہ نا سلامتی کونسل نا ترجمان ایملی ہورن اسہ بیان اسیٹی پارے کہ اوغانستان کن پڑو کروک کمک مون پہ مون یو ایس ایجنسی فار انٹرنیشنل ڈیویلپمنٹ آن بندغی کمک نا غیر سرکاری تنظیم آتے رسینگو۔

یو ایس ایڈ ہم سہہ شنبے نا دے تینا بیان ئٹ پارے کہ اوغانستان کن کمکی زر خوراک و ایلو غذائی مڈی، جانجوڑی بنجا نا کمک و جانجوڑی نا موبائل آسراتی تا زی آ خڑچ کننگو، و دا ہیت یخینی جوڑ کننگو کہ کمک کروک بندغ آک و سرکننگ سخت انگا علاقہ غاتے رسینگے۔ داڑان بیدس دا کمک ہمو پروگرام آتیا خڑچ کننگو ہرافتا رد ئٹ بندغ آتے یخ آن بچنگ کن شیلٹر کٹ، ہیٹر، کمبل و باسن ءُ پچ رسینگنگ ءِ۔

یو ایس ایڈ نا پاننگ ءِ کہ امریکہ افغانستان نا خلقت نا کمک کن پر عزم ءِ۔ وا ہم دا کمک نا موثر مننگ کن المی ءِ کہ غٹ کاریم کروک بالخصوص کارم کروکا نیاڑی تے آزاتی ئٹ و رکھوک وڑئٹ کارم کننگ نا موْکل رسینگے و اوفتے دا قابل مروئی ءِ کہ او نیاڑی و مسن تے آسراتی ئٹ رسینگر۔

اقوام متحدہ نا سلامتی کونسل دسمبر نا ایسر ئٹ اسہ قرارداد اس منظور کریسس ہراٹی بھاز وڑ ئنا بندغہ کمک آتے امریکہ نا کنڈ آن طالبان نا بھازا شخصیت آتے پابندی تے آن جتا کننگا۔ دا قرارداد نا مسخت اوغان عوام ءِ اندن کمک تننگ ءِ کہ اوڑان طالبان ءِ ہم فائدہ رسینگپ۔