ای جنگ کروٹ و الّمی جنگ کروٹ
نوشت: ریاست خان بلوچ | مَٹ: سمعیہ بلوچ
دی بلوچستان پوسٹ
شام ئنا اندن سئے بجہ مسونے، لکھ آتا آباتی والا دا شار ئٹی چارسد چپی، چپ چپانی و تارمئی تینا ڈیرہ خلکنو، کسر آ خلوک اسٹریٹ لائٹس ہم بند ءِ، خڑک ئنا اُرا تیٹ بلف آتا روشنائی ءِ ولے اوفتا روشنائی نا زیم شار ئنا چوک اسکان بریسہ بریسہ گم مریک، تیوہ آ شار اسہ وڑ چُپی ئٹ ڈُب ہلوک ءِ، بنجائی چوک آن بھاز مُر اوار کچک آتا غوْکنگ نا توار دا چُپی ءِ مچے بھاز الٰم چنڈک ولے اندن اوفک غوْکنگ ءِ بند کیرا، چُپی واپس پک مریک، و تیوہ آ شار چُپی ٹی ڈبینگیک۔
دا چپی و تارمئی ءِ شام ئٹی شار ئنا نیام کسر آ ساڑی اسہ روشن بلف اس خالی اندا جاگہ آ تارمئی ءِ مچے بھاز پدی دکہ تیک۔
دا بلف ئنا کیرغ آن ترند آ یخ ئٹی اِرا پیر ءُ بندغ میر مہراب و میر سردو چُپ تولوک ءُ، ہڑتوماک تینا بیننگ و وڑ آن ہندی آباتی آن جتا خننگیرہ، ہڑتوماک کاٹم تیا بلوچی خیری نا دستار تفوک ءُ، ہرا بھاز لوڑ لگیرا، اندن کہ ہڑتوماک اسہ مِشی ءُ کسر ئسے آن بھاز گھنٹہ نا سفر کریسہ داڑے بسونو، ہندی آباتی آن چھپ ہڑتوما آتا نت تیٹ دکان آن رسینگوک بوٹ آتا جاگہ غا دو ئٹ جوڑ کروک پازوار بینانو، دا اِرا پیر انگا بندغ تا مونا ارا تابوت تخوک ءُ ہرافتیٹ اِرا یخ ءُ جوْن تخوک ءُ، جوْن تے خراب مننگ آن بچفینگ کن اوفتیا کیمیکل ہم شاغنگانے۔
ہڑتوما جوْن تا راستیکو پارہ غا تولوک بندغ میر مہراب قبائلی چاگڑد ٹی بھلن و پیر مسونے، قبائلی چاگڑد اوڑا بھاز ضابطہ تخانے ہرافتیٹ اسٹ تینا ڈکھ و تکلیف آتا ایلو تیا پاش کننگ یا اسہ ویل ئنا رد ئٹ اوغنگ نزوری ءِ پاش کیک ہراڑا رکھ ءِ، میر مہراب تون اوار وخت گدریفوک آک جوان پوہ مرور کہ او اخہ در بہادر مہمان دار و قبائلی اصول آتیا سلوک بندغ ئسے، اونا زند ئٹی بھاز ویل آک گدرینگانو ولے واپس ہم اسہ وخت اونا خن تیٹ خڑینک نا اسہ پڑینگ اس ہم تمے۔
ولے داسا او ورنا اف، و نزوری نا عمر ئٹی پد ما پد ویل آتیان گڈ اِرا دے مست مروکا ویل اونا مُخ ءِ پرغا، او ہرا وخت رمب کروک آ نت تیٹ اسپتال نا مردہ خانہ ٹی پیہا و تینا مونا تینا پُھل آن بارانگا نواسہ آتا جون تے اسٹریچر آ تموک یخ خنا گڑا تینے توننگ ہم کتو و بھاز اوغا۔
میر مہراب دا چوک آن سد آ کیلومیٹر مُر کیلکور پنی ءُ مَشی ءُ علاقہ ئسے آن تعلق تخیک، او قبائلی سردار ئسے نا اُرا ٹی ودی متنے ولے تینا علاقہ ٹی اودے واپس ہم میر ئنا پِن ئٹ توار کننگک، او اندا خاطر کہ او تینا علاقہ ٹی ایلو تیان بلکن مچے زیات معاملہ سرپد مروک و طاغت برداشت کروک ءُ بندغ ئسے، اندا خاطر بندغ آک اوفتے تینا ویل و جنگ آتے ایسر کننگ کن خوائفرہ، او ایلو تیان بلکن اندا خاطر ہم جتا ءِ کہ او مچے بھاز اردو پوہ مریک، و ریڈیو آ ہڑدے حوال آتے بنیک، و ایلو ہرا اردو پوہ مننگ کپسا اوفتے جہان ٹی مروک بدلی تا رد ئٹ پائک۔
او میڷ ہیٹ سامبک و اندا اونا بروکا وخت ئٹ کاریم ایتک و دا اودے تینا باوہ پیرہ تیان میرات ٹی رسینگانے۔
داڑان بیدس اودے خاہوتی میرات ٹی رسینگوک گڑاس ڈغار آ او بزغری ہم کیک، ہرافتا کشت و کشار خشکاوہ نا دیر آ مریک اندا خاطر تینا تیوہ آ زند ئٹ اونا خوشی و فکر مندی پِر ئنا دیر تا بننگ و بفرنگ تون ہمگرنچ ءِ۔
اگہ پِر کیک گڑا بئے بوچ، خرّسی مریک، ہراڑے او تینا کُر ءِ خوافیرہ، و ملک آتیٹ کشت کشار نا بزغری کننگیک و اگہ پِر مف گڑا دعا کننگیک و خیرات کننگیک تاکن اوفتا خدا اوفتیان راضی مرے و ڈغال ایسر مرے۔
ولے تدوکا منہ سال آن زندگیک اسہ وڑ بدل مسونو، اونا خلق ئٹی نادرست بندغ آتا بننگ مس ہرا تینا بولی، بیننگ، دروشم و وڑ و مزاج ئٹ میر مہراب و اونا علاقہ نا ایلو بندغ تیان اسل جتا ئسر۔
او بننگ تون اولیکو دک ءِ میر مہراب ءِ خلکر، ہمو دے سہب ئنا 10 بجہ اسکان ہڑدے آن بارو دے اس ئسوک ولے 10 بجہ آن گڈ ناگمان کیلکور نا چُپ انگا تئو تیٹ اسہ پین وڑ ءُ ہڑدُڑ اس بناء مس، آسمان آن چار کنڈا سم شلنگ تون گن شپ ہیلی کاپٹر پاش کرے، ہرا نرار او بچار و ہرا پدی سلیسر او وحشی تا بے دادی تا گواچی مسر، انت چنا انت پیر انت زالبول انت نرینہ، او ہرکس ءِ خنار اوفتے سم تیٹ بُھس کریر، ہرا وخت اسکان او واپس ہنار او وخت اسکان تیوہ آ خلق ٹپی آتا آہ و بکا نا توار آن بش مس، چارمہ کنڈ جون اس، میر مہراب ءِ جوان یات ءِ کہ ہرا وخت آ خیر جان نا اُراغا ہنا گڑا او گنوک آتیانبار کوک خلیسہ اوغاکہ انتیکہ کن سم تیان اونا چنکا چناتا روتینک آک ہم پیش تماسر، تیوہ آ اسہ ہفتہ ئسے اسکان خلق ئٹی دتر و بارود نا گند تالان ئس۔
میر مہراب ءِ او دے ہم جوان یات ءِ کہ اسہ اندن ءُ ویل اسیٹ او حال حوال سوج کننگ کن ہرا وخت شیزدان پنی ءُ خلق ئسے آ ہنا گڑا خنا کہ شمس پنی ءُ زالبول چنا ہرادے او مسڑ پاریسہ اوڑدئی کریکا او ٹپی آ حالیت ئٹ تینا ایسری ساہ ءِ ہلکوکا و اونا مون آ سم لگینگ آن اونا تیوہ آ خیسن مسوسس۔
اندا لڑ تدوکا بھاز سال تیان برجاء ءِ، اندا نیام ئٹی میر مہراب نا نیمہ خاہوت ءِ دا ظالم آک کنگر، ولے میر مہراب و اونا بندغ آتا حوصلہ ہچ وخت ہم نزور متو، او پوہ مسوکا کہ دافتا مخصد اوفتے تینا خلق آن کشنگ ءِ ولے او تینا خلق تینا مش و اوفتیٹ گدرینگوک آ دیر تا دوست تخوک اس ئس ہراڑے او عزت نا زند گدریفنگ ہیل کریسس، ہراڑے اونا چنکی گدرینگانے و ہراڑے اونا ورنائی گدرینگانے، او اسہ وڑ اسیٹ ہم تینا ڈغار ءِ یلہ کننگ آ خوش الو اوڑکن دا خالی اسہ ڈغار نا ٹکر اس الو بلکن اونا جند ئنا اسہ بشخ اس ئسوک ہراڑے اونا باوہ پیرہ کڈ ئسر، ہراڑے گدرینگوکا دے خوش انگا یات آک تفوک ئسر۔
ولے منہ تو مُست اوڑے مروک آ قیامت آن بارانگا ویل آک میدان کربلا ٹی یزیدی لشکر نا بے دادی تے ہم پدی ہلار۔
میر مہراب نا خلق، اونا تلاف آک و مش تیا ہفتہ دے اسکان بارود خسینگا، زالبول تا آبرو تیا دو شاغنگا، تیار کشت و کشار آک ہشنگار، و معصوم بولا ہرادے میر مہراب تینا مار آن بار اُراکا اوفتے سم تیٹ کسفیر و اوفتے فوجی ٹرک آتا پد ئٹ تفیسہ خل تیا گرار، و اوفتا کہوکا جون آتا دتر تیان کسر ئٹ مخسیہ ہنار۔
تیوہ آ علاقہ ءِ دتر ئٹ غسل تننگ آن گڈ اوفک علاقہ ءِ خالی کننگ نا پرمان ہم تسر، میر مہراب و اونا علاقہ نا سد آ بندغ آتا اُست الو واہم اوفتا تلاف، اوفتا مش و اوفتا خلق آتیان اوفتے بے ونڈ مروئی تما۔
میر مہراب و اونا خاہوت تدوکا بھاز تون ئنا ئسے بے دوست و باہوٹی نا زند ءِ گدریفنگ آ بیوس مسونو ولے اوفک ہچ وخت کس ئنا مونا دو تور توس ولے ہوشاب ویل تابوت ٹی ایسری میخ ثابت مس ہرا میر مہراب ءِ دو تورینگ آ بیوس کرے و سال تیان سخت قبائلی ویل تا گواچی اونا خڑینک آتے آجو کرے۔
داسا اونا خڑینک آک کہ سلپسہ، شام ئنا دا سخت انگا یخ ئٹی او شار ئنا نیام کسر آ مونا تخوک ہڑتوما تابوت آتا و تینا خنتے خلسہ شار ئنا چپی بیوسی ءِ اُرینگ ءُ اوڑکن دا زند ئنا مرغنا شام ءِ ہرا ہچ گدرینگپک۔
او ہرا وخت تابوت آتیٹ یخ تموک تینا معصوم نواسہ آتا رد ئٹ سوج کیک کہ او امر سخت ءُ وخت اس مرو ہرا وخت بارود آک نازرک آ بدن ٹی لگور، او اخس کوک خلور، اوفتے اخس دڑد مرو، او کنے توار کرور، تینا لمہ نا پن ءِ ہلیسہ اودے توار کرور، وا دیر آن پیشن مروک مچی تا باپستی و بھاز اوغیسہ مرور، دڑد ئنا سختی آن او ڈغار آ لتڑی خلیسہ کرور۔
او تینا خنتے بڑز ارفیک و تینا خدا آن است ئٹ گلہ کیک کہ ای تینا عمر ءِ گدریفینٹ، ای تینا جند ءِ ہموڑے ہلانٹ ہراڑے کنا چنکی گدرینگانے، ہراڑے ای تینا ہیٹ تے خوائفیٹہ، ہرا جاغہ نا مشک و تلاف آک کنے دوست ئسر و ہراڑے داسا کنے ہننگ نا ہم موکل اف کنا خدا نی کنے انتئے دا معصوم آتا جاگہ تینے آ دتویس، او تینا خنتے شیف کیک و واپس تابوت آتا کنڈا اُریک گڑا گلہ نا جاگہ آ اونا است ئٹ سوختہ و نفرت آن پُر مریک کہ دا امر شومئی ئٹ بھلن مسونو کہ اوفتیٹ داخس ہم بندغی الو کہ او دا معصوم آتے بھاز دڑد ئٹی خلیسہ تینا خلوک مارٹر نا ٹکر تے مچ کریسہ واپس ہنار۔
دا سوختہ ئی و نفرت ترند یخ آن بیدس اونا بند ءِ باسنی آن پُر کریکہ او سوختہ ئی ٹی بریک کہ آخہ بس داکان گڈ بس، داسا بس ای بھاز سگاٹ، ای داسا چپ مروفٹ دا شار کنتون اوار مرے یا مف، بلوچ ہرانا اجتماعی سزا نا ای تنیا پد مہ پد گواچی مسوٹ، او کنتون اوار مریر یا مفس، میر و سردار آتا غیرت بش مرے یا مف، کنے یکہ ہم جنگ کروئی مرے ہم ای جنگ کروٹ و ایسری ساہ اسکان کروٹ۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
