پنی آ شاعرہ و بندغی حق آتا باسک مایا اینجلو اولی سیاہ فام نیاڑی ءِ ہرا نا پن ئٹ یاتگاری سکہ امریکی حکومت شینک کرینے۔

خبر تروک ادارہ اے ایف پی نا پاننگ ءِ کہ امریکی محکمہ خزانہ دوشنبے نا دے پوسکنو سکہ اس شینک کرینے ہراڑا مایا اینجلو نا دروشم کندہ کروک ءِ۔

داڑ آن بیدس درزن آ کتاب آتا نوشتکار مایا اینجلو اولیکو شخصیت ءِ ہرانا پن ئنا سکہ جنوری 2021 ٹی منظور مروکا قانود نا رد ئٹ شینک کننگانے۔ دا قانود نا رِدئٹ تیوہ غا پِنی آ امریکئی نیاڑی تا پن ئنا یاتگاری سکہ شینک کننگو۔

امریکئی محکمہ خزانہ نا بیورو آف منٹ نا رِدئٹ 25 سینٹ نا سکہ غا پنی آ امریکئی شاعرہ نا دروشم کندہ کننگانے و سکہ غاتا اولیکو لوڈ راہی کننگانے۔

بیورو آف منٹ نا نائب ڈائریکٹر وینٹرس گبسن نا پاننگ ءِ کہ امریکہ نا تاریخ ٹی قابل ذکر کڑدار ایسر تروکا نیاڑی تا شرف ٹی سکہ شینک کننگ آ اودے فخر ءِ۔

’امیریکن وومن کوارٹر پروگرام‘ نا رِدئٹ بیورو آف منٹ سال 2022 آن 2025 نا نیام ئٹ ہر سال پنچ جتا امریکئی نیاڑی نا پن ئنا یاتگاری سکہ شینک کرو ہرا راج اکن گچین کڑدار ایسری تسونو۔

امریکئی سیکریٹری خزانہ جینٹ ییلن نا پاننگ ءِ کہ اودے فخر ءِ کہ دا سکہ غاک امریکہ نا کل آن لائخ آ نیاڑی تا خذمت آتے اریسہ اوفتا شرف ٹی شینک کننگانو۔

مایا اینجلو سال 1928 ٹی ریاست میسوری ٹی ودی مسوسس۔ او شاری حق آتا تحریک ٹی مارٹن لوتھر کنگ و میلکم ایکس تون اوار گچین کڑدار ایسر تسوسس۔

مسکوئی صدر بل کلنٹن نا سوغندی دود نا مجلس نا وختا نظم خوانوکا مایا اینجلو نا کذیت سال 2014 ٹی مس۔

کراچی پریس کلب نا مونا ہڈ تروک وائس فار بلوچ مسنگ پرسنز نا کیمپ ءِ اینو سئے شمبے نا دے 11 جنوری آ 4555 دے پورو مس، است ہسونی نا درشانی کروک آتیٹ بلوچ یکجتی کیمٹی کراچی نا کنوینئر بانک آمنہ بلوچ، ماہ گنج بلوچ، صابرہ بلوچ و ایلوفک اوار ئسر۔

وی بی ایم پی نا وائس چیئرمین ماما قدیر بلوچ وفد تون مخاطب مریسہ پارے کہ 2000 آن ہلیس اینو اسکان جہد برجاہ ءِ ہرا ٹی زالبول تا بھاز بھلو ندری ارے اوفتا ندری تا دا لڑ اینو ہم برجاء ءِ، دا وخت پرامن جہد اسہ اندن ءُ  ہند ئسے آ مخالف آتون اوار تضاد و پروشت ودی کننگ نا کوشست تون اوار دژمن نا پارہ غان بھاز آزمائش تون برجاہ ءِ، خاص وڑ ئٹ مذہبی و قبائلی عناصر آک پرامن جہد نا بر خلاف کننگ ءُ۔ اوار پاکستان تیوہ جنگی اصول آتے پامال کریسہ اینو لس آباتی تیا بمباری چنا و زالبول تے شہید کننگ تون اوار زورٹ بیگواہ کریسہ گم کیک ہرافتا رد ئٹ اسٹ ءِ ہم سما اف کہ ہراڑے و ہرا حالیت ٹی ءُ، نن اسہ  وحشی دژمن اسیتون مون پہ مون اُن ہرا بندغی اقدار نا ہد ءِ گدریفینے۔

او پارے کہ  بلوچ چنا تا زورٹ برمتہ کننگ ہڑدے ئی جوڑ مسونے اندن کہ الجرائر ٹی سامراج فرانس و بنگلہ دیش ٹی اندن پاکستان نا داستان آک  پنی ءُ دژمن جائل متکنا بے فائدہ غا بست و بند ودی کریسہ نن تون زوراکی کریسہ  تینا  حاکمیت ءِ برجاہ تخنگ نا ہر کوشست کننگ ءِ، حاکم سرپد مریک کہ نن بیرہ  بے دادی سگنگ کینا ولے اینو بلوج راج  ثابت کرے کہ او پرامن جہد نا علم و شعور تون اوار کننگ کیک۔  پرامن جہد ٹی زالبول نا خاص  کڑدار مریک  اندا وڑ بلوچ راجی پرامن جہد ٹی بھلو کچ اسیٹ بلوچ زالبول آتا اواری بشخ الینگ ہم  تاریخ تا پنہ آتیٹ نوشت مننگ ءِ۔

جماعت اسلامی نا صوبائی جنرل سیکرٹری و “بلوچستان ءِ حق ایتبو تحریک” نا راہشون مولانا ہدایت الرحمٰن بلوچ پارینے کہ گوادر آن گڈ داسہ خضدار ٹی تحریک بناء کرون۔ ننا تحریک نا سوب آن بلوچستان ٹی مسہ سد چیک پوسٹ ایسر کننگار، 10لکھ آن زیات بندغ کوئٹہ ٹی مچ کرون، ہراڑے ننا اولیکو  خواست دا مرو کہ ایف سی ءِ بلوچستان آن کشر، دا بندغ آک بلوچستان نا بندغ آتون بے شرفی کننگ ءُ، نہ بیرہ داڑا بس کرینو بلکن اوفک حیات بلوچ و بی بی زینب ءِ شہید کرینو، و واپس پاریر کہ ردی مسونے ۔

او مُستی پارے کہ فورسز نا مونا بلوچستان نا ہشت سال ئنا چنا ہم  دہشت گرد ئسے انتیکہ بلوچستان نا ہشت سال ئنا چنا ءِ دہشت گرد  پاریسہ فورس شہید کرے، غریب صوبہ نا بیرہ سال ئنا ہفتاد ارب رپئی بیرہ ایف سی آ خڑچ کننگک و داڑے بندغ آک بین آن کہنگ ءُ، گیس  بلوچستان آن پیشن مریسہ ہزار آ کلومیٹر مر اسکان تننگک ولے بلوچستان قدرتی گیسں آن بے بشخ ءِ، گیس خیسن و چاندی نا مچ کروک صوبہ بے بشخی نا گواچی ءِ ہرا صوبہ ٹی سیندک، ریکوڈک، ساحل و سی پیک مرے اونا بندغ آتا نت تیٹ پازوار اس مف  اگہ دا بے دادی اف گڑا انت ئسے۔

اونا پین پاننگ اس کہ یونیورسٹی و اسپتال آتا جاگہ آ بلوچستان ءِ چیک پوسٹ تننگانے، ریمنڈ ڈیوس و کلبھوشن ءِ تو داڑے شرف تننگانے ولے بلوچستان والا تے شرف تننگ افس، نن شرف خونہ ننے کم آن کم تینا ڈیہہ  آ شرف اٹ زند کننگ نا حق تیر، خضدار نا اسپتال آتیٹ  پیناڈول اسکان ریسنگپک ولے خضدار ٹی نشہ اڑزانی اٹ رسینگک، کننگ نا دیر اف ولے  شراب اڑزانی اٹ رسینگک۔

مولانا پارے کہ دانا مطلب دادے  کہ سرپدی وڑ ئٹ بلوچستان تون بد سلوک کننگ ءُ ننے دا بےدادی نا بر خلاف پیشتموئی مرو داڑکن تیوہ  خضدار تیار مرے دا ہیت آتا درشانی ءِ او جماعت اسلامی خضدار نا پارہ غان ہڈتروک جلسہ آن ہیت کریسہ پارے۔

یونائیٹڈ ایجوکیشنل الائنس لورالائی نا سینئر نائب صدر محمد انور ناصر پارے کہ ضلع لورالائی ٹی تعلیم ٹی بے ضابطگی، کرپشن نا زوت نوٹس ہلنگے اگہ دن متو فروری ٹی یونائیٹڈ ایجوکیشنل الائنس نا اجلاس خواہفون و مونی نا لائحہ عمل نا پڑو کرون۔

دا خیال آتا درشانی اوفک یونائیٹڈ ایجوکیشنل الائنس لورالائی نا صدر جمال الدین کدیزئی، یونائیٹڈ ایجوکیشنل الائنس لورالائی نا جنرل سیکرٹری محمد اکرم تون اوار ایلو ہمراک دو شنبے نا دے کوئٹہ پریس کلب ٹی پریس کانفرنس کریسہ کریر۔

اوفک پاریر کہ لورالائی ٹی زیات تر ہائی اسکول تیٹ جونیئر ٹیچر آتے تعلیمی ادارہ آتا سربراہ جوڑ کننگانے و بھاز آ ادارہ آک داسکا ہم سربراہ تے آن محروم ءُ، ہنوکا سال لورالائی ٹی ٹیچنگ، نان ٹیچنگ سٹاف نا ٹیسٹ و انٹرویوک مسر، نان ٹیچنگ تے کن باقاعدہ اسہ کمیٹی اس جوڑ کننگاسس ہرانا چیئرمین ڈپٹی کمشنر، ممبران ٹی ڈسٹرکٹ ایجوکیشن آفیسر، ڈسٹرکٹ اکاؤنٹس آفیسر اوار ئسر۔ اڈ تروک کمیٹی و اوفتا کمک کار آک میرٹ نا جاگہ غا درجہ چہار و جونیئر کلرک آتا امیت وار آتے لکھ آتا، کروڑآتا پیسہ رشوت ہلیسہ قانود آن چپ اوفتے تخنگا و امیت وار و میرٹ ءِ اسہ وڑ نظر انداز کریر۔ ڈسٹرکٹ ایجو کیشن آفیسر لورالائی، سینئر ڈسٹرکٹ اکاؤنٹس آفیسر و اوفتا کمک آک ہرا 15 بندغ آتے تعینات کرینو اوفتا ثبوت ننتو ارے۔

او پاریر کہ ہنوکا شش تو ٹی چیف جسٹس سپریم کورٹ، چیف جسٹس بلوچستان ہائی کورٹ، چیئرمین نیب، ڈائریکٹر جنرل نیب، گورنر بلوچستان، وزیر اعلیٰ بلوچستان تون اوار ایلو اعلیٰ کوالخواک وار وار درخواست و شکائست رادہ کریسہ کرینو ولے بد بختی ءِ کہ کسس ہم ہچو پٹ پول کتنے بلکہ ننا خواست و شکائست آتے بے کار کاغذ تیانبار خسنگانے۔

او خواست کریر کہ ضلع لورالائی ٹی محکمہ تعلیم ٹی بے ضابطگی، کرپشن و میرٹ نا پامالی نا نوٹس ہلنگے نہ تو فروری ٹی اجلاس خواہفون و مونی نا لائحہ عمل ءِ ٹہیفون۔

حوال تا ردئٹ کوئٹہ بلوچستان ٹی ورنا ڈاکٹرز ایسوسی ایشن اسہ وار واپس 12 جنوری آن وزیر اعلیٰ ہاؤس نا مونا تولوک برانز نا پڑو کرینے، ینگ ڈاکٹرز ایسوسی ایشن نا چیئرمین ڈاکٹر حفیظ مندوخیل  پارے کہ خواست آک پورو  متیوس گڑا تیوہ آ ملک ئنا ڈاکٹرز آتے مچ کریسہ اسلام آباد نا پارہ غا ہنون۔

دا پڑو ءِ او کوئٹہ پریس کلب ٹی پریس کانفرنس کریسہ پاریر۔ ورنا ڈاکٹرز ایسوسی ایشن نا چیئرمین ڈاکٹر حفیظ مندوخیل و ایلو اوغہدیدار آک پاریر کہ وزیر اعلیٰ ہاؤس نا مونا تولوک برانز آ بست و بند نا پارہ غان بے دادی یا لٹ کُٹ کننگا گڑا حالیت نا ذمہ وار وزیر اعلی قدوس بزنجو مرو۔

او پین پاریر کہ تدوکا مسہ تو ئنا ئسے برانز آ او وخت مسکوئی وزیراعلیٰ جام کمال تو اوار بھاز آ وزراء تون اوڑدئی ٹی مسکوئی وزیراعلیٰ تون اوار تیوہ آ وزراء آک خواست آتے جائز پاریسہ ایسر کننگ نا وعدہ کریر ساڑی وزیراعلیٰ قدوس بزنجو تون ہرا وخت اوڑدئی کرین او ہم ویل آتے ایسر کننگ نا پارے ولے خواست آتے پورو کننگ نا جاگہ آ ننا ڈاکٹر آتے دزگیر کریر۔

ڈاکٹروں آتے اسہ تو ئسے اس جیل کریر غریب ناجوڑ آک تدوکا مسہ تو ئنا سے درپدر ءُ، 12 جنوری آ وزیر اعلیٰ ہاوس نا پیشن تولوک برانز کرون ننے آ لٹ کُٹ مس گڑا حالیت نا ذمہ وار وزیر اعلیٰ مرو، ننا خواست آک جائز افس گڑا وزیر اعلیٰ اسہ وار میڈیا آ پائے کہ خواست آک ناجائز ءُ، اندن وائی ڈی اے نا چیئرمین پین پارے کہ خواست آک پورو کننگتوس گڑا تیوہ آ پاکستان ئٹ ڈاکٹر آتے مچ کریسہ اسلام آباد آ ہنون انتئے کہ اسپتال آتیٹ آسراتی اف مخلوق ننا زنچک ءِ الیک۔

خضدار بھلا روڈ آ ٹراما سینٹر نا ماڑی نا غیر فعالی کروڑ آ رپئی تا ڈبینگ نا گمان ءِ۔ خضدار بھلا روڈ چمروک نا ہند آ اسہ سال مست ٹراما سینٹر نا بلڈنگ تیار مس ولے داسکان ملینگ کن ودار ءِ۔ کروڑ آتیٹ جوڑ مروک بلڈنگ جِنی آ ارا آن بار خنگیک دا ہیت آتا درشانی ءِ خضدار نا سیاسی پارٹیک، مخلوق، چاگڑدی حلقہ آتا کنڈان سخت ردعمل نا درشانی کریر۔

اوفتا پین پاننگ اس ٹراما سینٹر ءِ اسہ سال اس مننگ ءِ کہ ماڑی تیار ءِ، روڈ شکست آتیٹ مخلوق ءِ آسراتی تننگ کن محکمہ جانجوڑی نا بے پامی راجی خزانہ آن کروڑ آ رپئی تیٹ جوڑ مروک ٹراما سینٹر فعالی نا ودار کننگ ءِ دائسکان بلڈنگ جنی آ اُرا اس لگیک ولے محکمہ جانجوڑی ہچ فرخ تمپک۔

اوغانستان نا علاقہ ننگرہار اٹ بم تراک ئسے نا تدینی ئٹ نو چُنا بیران و چار ٹپی مسونو۔

حکام نا پاننگ ءِ کہ اوغانستان نا دے ٹکی صوبہ ننگرہار نا ضلع لالپوری ٹی بارودی مواد آتا تراک ئنا سوب آن نو چنا بیران و چار پین ٹپی مسونو۔

ننگرہار نا میڈیا دفتر آن اسہ بیان اسیٹی پاننگانے کہ پیشیم آن گڈ مکئی نا اسہ سٹال ئسے نا مونا تراک اس مس ہرانا دامون ایمون چناک مچ ئسر۔

تدینی نا اسی عینی شاہد اس مشال ریڈیو ءِ پارے کہ کہوک آتیٹی اسہ خاہوت نا پنچ چنا ئسر۔

ٹپی مروک آتے ننگرہار ریجنل ہسپتال آ دریر۔ ننگرہار ریجنل ہسپتال نا حکام آک پارینو کہ ٹپی مروک آتا حالیت خطرہ آن پیشن ءِ۔

بلوچستان نا علاقہ پنجگور و خضدار زہری ئٹ روڈ شکست و سُم کاری نا جتا ویل آتیٹ ارا بندغ مرگ نا گواچی، اندن اسٹ ٹپی مسونے۔

حوال تا رد ئٹ بلوچستان نا ضلع پنجگور نا بنجائی  بازار چتکان ٹی دوشنبے نا دے  سم کاری آن  ارا بندغ مرگ نا گواچی مسر۔

گیشتر حوال تا رد ئٹ  ویل تار آفس چلڈرن پارک نا خڑک مسونے  ہراڑے نادرست بندغ آتا موٹر سائیکل آ سوار سم کاری نا سوب آن  سیف اللہ و حضور بخش مرگ نا گواچی مسونو، داسکان ویل ئنا سوب آک سما تمتنو۔ پولیس  ویل ئنا ہند ءِ داپار ایپار ہلیسہ پین سر و سوج بناء کرے۔

اندن پین حوال ئسے نا رد ئٹ خضدار زہری ٹی ترند ہنوک کار گاڑی موٹر سائیکل سوار ءِ لتاڑا ہرانا سوب آن موٹر سائیکل تیوہ بھس و بندغ ٹپی مسونے، کار ٹی سوار بندغ آک سلامت ءُ٫

حوال تا رد ئٹ کار گاڑی ٹی جے یو آئی نا مسکوئی صوبائی وزیر صحت عین اللہ شمس ہم سوار اس او ویل ئٹی گوڑیفوخ وڑ ئٹ سلامت مس۔

گیشتر حوال تا رد ئٹ مسکوئی صوبائی وزیرا تینا سنگت آتو اوار  تحصیل زہری ایم پی اے میر یونس عزیز نا ملہ ماجدہ نا خوشامدی آ اُست ہسونی و دعا کن ہننگ اس او ویل ئٹی کلہ اسیٹ بچا، اندن پین حوال ئسے نا رد ئٹ خضدار محلہ گڑگی ٹی دیوار تمنگ آن چار بندغ ٹپی ہرافتیٹ مسہ چنا ہم اوار ء ارا دمدستی وڑ ئٹ  ٹیچنگ ہاسپیٹل آ سر کننگار۔

امریکا نا نیویارک شار نا برونکس علاقہ ٹی اسہ بھاز منزلہ ماڑی اسیٹی خاخر لگنگ آن کم و وَد 19 بندغ بیران مسر، اوفتے ٹی نو چُنا اوار ءُ۔ پین درزن آ بندغ آک ٹپی مسونو۔

نیویارک شار نا میئر ایرک ایڈمس پارے کہ خاخر لگنگ نا دا تدینی شار نا برونکس علاقہ ٹی ٹوئن پارک اپارٹمنٹ ٹی یکشمبے نا دے سوب تون کم و وَد یانزدہ بجہ آ مس۔ دا سانحہ ٹی 19 بندغ بیران مسونو۔ او پارے کہ ہرا 19 منزلہ ماڑی ٹی خاخر لگا اوڑے گیمبیا نژاد بندغ آک بھاز کچ ئٹ رہینگارہ۔

محکمہ فائربریگیڈ نا حکام نا پاننگ ءِ کہ خاخر اسہ بجلی نا ہیٹر ئسے آن بناء مس و زوت تاریخ ئٹ دا تینا نوعیت نا خاخر لگنگ نا بدحالیت آ تدینی ءِ۔

نیویارک نا میئر ایرک ایڈمس کم و وَد 19 بندغ نا بیران مننگ ءِ پک کرینے۔

حکام نا ردئٹ خاخر اسہ اپارٹمنٹ اسیٹی بجلی نا ہیٹر ئسے آن بناء مسوسس و زوت ماڑی نا ایلو و مسٹمیکو مزل اسکان تالان مسوسس۔ محکمہ فائربریگیڈ نا کمشنر ڈینیئل نیگرو اسہ پریس کانفرنس اسیٹ ہیت کریسہ پارے کہ حالانکہ خاخر بلو کچ ئسے اسکان بیرہ درغ تے اسکان ئس ولے اونا موڷ عمارت نا غٹ منزل آتے اسکان تالان مسوس انتیکہ بھاز سنگا کمرہ آتا درغ آک ملوک مسوسر۔

ایرک ایڈمس نیوز چینل سی این این تون ہیت کریسہ پارے دا ننا تاریخ ئٹ خاخر لگنگ نا بدحالیت آ تدینی تیان اسٹ ءِ۔ دا نیویارک شار کن بھاز گوڑیفوک و بھاز تکلیف دہ و وخت ئسے۔ بیران مروکا تا کچ بھاز بیم بش کروک ءِ۔”