حوال تا رد ئٹ بیست سال گدرینگ آن گڈ ہم پنجگور نا خلقی اسکول آتیٹ المی مضامین تے خوانیفنگ کن استاد تخنگ نا بشخ  پورو مننگ کتئو ہرانا سوب آن بڑز تعلیم نا موقع نہ بیرہ زوال مس بلکن اندن سد آ خوانندہ آتا تغ آک ہم سلیسر ہرا ڈاکٹر انجینئر و ایلو بڑز اوغدہ تیا سر مننگ نا امیت ٹی ئسر۔

دا علاقہ آتیٹ ہراڑے پنجگور نا 40 فیصد آباتی ہندی ءِ دا علاقہ آتیٹ تحصیل پروم، تحصیل گوارگو، کلیکور نا اِرا یونین کونسل، سب تحصیل گچک و سب تحصیل کلگ اوار ءُ۔ اندن تپہ ئی بند و بست تعلیم لس مخلوق ءِ بھس کننگ ٹی ہچ ءُ وڑ ہلیتوسس و پین مُر انگا علاقہ آتا تعلیمی آسراتی تا رد ئٹ بے پام کننگ آن ناخواندگی ٹی پین ودکی مسونے۔

سب تحصیل کلگ ہرا چتکان شار آن بیرہ پانزدہ کلو میٹر نا مُری ٹی ءِ داڑے اِرا ہائی اسکول ءُ و تقریباً اِرا درزن نا کچ مڈل و پرائمری اسکول ہم ارے، ہائی اسکول آتا حالیت ءِ۔

ناروے ئٹ اسہ بندغ اس شاپنگ اسٹور ئٹ تینا مون مخلوق آ تیر ئنا پِر کرے ہرانا سوب آن پنچ بندغ مرگ نا گواچی مسر، و جلہو کروک ءِ دزگیر کننگا۔

امریکئی حوالکار ایجنسی ایسوسی ایٹڈ پریس نا ردئٹ پولیس چیف نا پاننگ ءِ کہ جلہو کروک و پولیس نا نیامٹ مِڑ تس مس ولے او دانا بابت شابیتی ئٹ ہیت کتئو۔

پولیس نا ردئٹ اِرا پین بندغ ٹپی مسر ہرافتا حالیت خُلیس ئٹی ءِ ہرافتیٹ اسہ پولیس افسر اس ہم ارے ہرا جلہو نا وخت آ شاپنگ اسٹور ئٹ ساڑی ئس۔

پولیس چیف اویونگ آس پارے کہ جلہو کروک ءِ دزگیر کننگانے و پین کس ئسے نا پٹ و پول اف۔ ننتون ساڑی معلوم داری تا ردئٹ بیرہ اسہ بندغ اس جلہو کرے۔

ناروے نا نگران وزیراعظم ایرنا سولبرگ جلہو ءِ بیم بش کروک پِن کریسہ پارے کہ جلہو نا پد ئٹ مسخت آتا بابت ہیت کننگ وخت آن مالو مرو۔

پولیس نا ردئٹ جلہو کروک علاقہ ئٹ پیری خلیسہ کرے و مخلوق آ تیر شلیسہ کرے۔ دائسکان جلہو کروک آن سر و سوج کننگتن ءِ۔

ناروے ئٹ دننگا تدینیک کم مونا بریرہ۔ 2011 ئٹ اسہ بندغ اس اینڈرز بریوویک اوسلو ئٹ بمب جلہو اس کریسس ہراٹی ہشت بندغ مرگ نا گواچی مسوسر۔ اوکان گڈ او اسہ جزیرہ ئسے آ 69 بندغ ءِ کسفے۔ دا بندغ ءِ بیست و یک سال نا کیز نا سزا بنفنگاسس و دا سزا ٹی ودکی ہم مننگ کیک۔

پنجگور: بلوچستان نا مسکوئی چیف سیکرٹری و بلوچی نا پنی آ ادیب میر عبدالحکیم کوئٹہ نا اسہ ہسپتال اسیٹی علاج مننگ ئس ہرا تدوکا نن کوئٹہ ہسپتال ئٹ کذیت کرے ہرا پنجگور ہند کننگو۔

میر عبدالحکیم ایڈیشنل ایڈوکیٹ جنرال بلوچستان میر شہک بلوچ، شہے بہرام بلوچ، شیمزار بلوچ، شہے مرید بلوچ، شہے سعادت بلوچ، مراد بلوچ نا باوہ اندن میر احمد خان بلوچ و میر شبیر احمد بلوچ نا ایلم ئس۔ 

عزت اکیڈمی پنجگور نا پارہ غان کونسل ہال پنجگور ئٹ اسہ دے ئی ادبی مجلس اس ہڈ تننگا، پنجگور تون اوار بلوچستان آن پنی ادیب آتا اواری، دا میلہ ئٹ مقابلہ، پینل گپ تران، عزت داد، کتاب نا مون پاشی و مشاعرہ نا بشخ آک اوار ئسر۔

عزت اکیڈمی پنجگور نا پارہ غان کونسل ہال پنجگور ئٹ اسہ دے ئی ادبی مجلس اس ہڈ تننگا ادبی میلہ ٹی پنجگور نا چاگڑدی شخصیت آک، آفیسر آک، سول سوسائٹی نا باسک آک، شاعر، ادیب و خوانندہ تون اوار تیوہ مکاتب فکر ئنا بندغ آک بھلو کچ اسیٹی اوار مسر، پروگرام ئٹ بلوچی بولی نا پنی آ ادیب پروفیسر اے آر داد، بلوچستان یونیورسٹی ٹی بلوچی بشخ ئنا چیئرمین رحیم مہر، ڈاکٹر نعمت اللہ گچکی، فقیر محمد عنبر تون اوار کہی شخصیت آک اوار مسر۔

عطاء مہر تینا بنائی کلام آن باقاعدہ پروگرام نا بناء ءِ کرے و کمپئرنگ نا فرض آتے پورہ کرے۔ اولیکو سیشن ئٹ پروفیسر ڈاکٹر جاوید بلوچ ایماندار اشرف فضل نا یات ئٹ تینا خیال آتا درشانی ءِ کرے و پروفیسر اشرف بلوچ ءِ بلوچی ادب کن اونا بے بہا آ خدمت آتیا اودے داد تس۔

پروگرام نا ایلو بشخ ئٹ پنجگور نا تاریخ و ادب نا سرحال تیا پینل گپ تران ہڈ تنگا ہراٹی بنجگور نا پنی شخصیت عبیداللہ بلوچ ماڈریٹر اندن بلوچی بولی نا عہدساز افسانہ نگار ڈاکٹر نعمت اللہ گچکی و پروفیسر سجاد کوثر سرحال آ سوج آتا ورندی تے تسر۔

پروگرام نا مسٹمیکو بشخ ئٹ زال کمال نا پن آن پرنسپل گرلز کالج خدابادان پروفیسر ڈاکٹر فرزانہ ہاشم تینا تجربہ، خیال و صلہ تے مونا ایس۔

پروگرام نا چارمیکو بشخ ئٹ بلوچی بولی نا پنی پولکار و نقاد پروفیسر اے آر داد و پروفیسر رحیم مہر بلوچ ملا عزت نا زند و فن آ تینا مقالہ تے مونا ایس۔

پروگرام ئٹ عزت اکیڈمی نا پارہ غان بناء کروکا ایوارڈ عزت داد بشخنگا ہرانا حوال آک دن ءُ، شاعری نا ایوارڈ ءِ ملک ابرار دوئی کرے، مٹ ئنا ایوارڈ ایماندار اشرف فضل نا پن آ مس، افسانہ نا ایوارڈ ءِ ڈاکٹر نعمت اللہ گچکی دوئی کرے لائف ٹائم اچیومنٹ ایوارڈ ءِ فقیر محمد عنبر دوئی کرے۔

پروگرام نا پنچمیکو بشخ ئٹ مشاعرہ ہڈ تننگا ہراٹی شاعر آک تینا شعر آتے خوانار۔

پروگرام نا گڈیکو بشخ میر چئیرمن عزت اکیڈمی خدارحم شوہاز تیوہ اوار مروکا آتے منت وار پارے و باقاعدہ پروگرام نا ایسری نا پڑو ءِ کرے۔

پروگرام ئٹ بھلو کچ اسیٹی کتاب آتا اسٹال خلوک ئسر ہراڑے اوار مروک آتا بھلو کچ اسیٹی کتاب آتے ہلکر۔

بولان پیر دوپاسی پُل آن خڑک نادرست بندغ ئسے نا جشوک آ جون خننگانے، ہرا چاہنداری کن سیول اسپتال ڈھاڈر آ دننگانے، پین کاروائی ڈھاڈر پولیس کننگ ءِ۔

اندن اسہ پین ویل اسیٹی کچھی ٹی سم کاری آن ارا بندغ بیران مسونو۔

کچھی نا علاقہ تحصیل سنی ئٹ جتوئی قوم ئنا نیام ئٹ سم کاری نا سوب آن اِرا بندغ بیران مسونو، و سیول اسپتال ڈھاڈر کن دننگانو، پین کاروائی ڈھاڈر پولیس کننگ ءِ۔

بلوچستان نا علاقہ قلعہ سیف اللہ و نوشکی ئٹ روڈ شکست نا جتا ویل آتیٹ 4 بندغ مرگ نا گواچی و 2 ٹپی مسونو۔

حوال تا رد ئٹ  قلعہ سیف اللہ ٹی نیشنل ہائی وے آ کار و ٹرک نا ڈک لگینگ نا سوب آن 4 بندغ مرگ نا گواچی مسر، بلوچستان نا ضلع قلعہ سیف اللہ ٹی نیشنل ہائی وے آ ٹوڈی کار و ٹرک ڈک لگار ہرانا سوب آن زالبول تون اوار 4 بندغ مرگ نا گواچی مسر۔

گشتر حوال تا رد ئٹ ویل ئنا حوال رسینگتون پولیسں و ریسکیو نا ٹیم آک ویل ئنا ہند آ سر مسر و کارروائیاں بناء کریر، لیویز کوالخواک تا پاننگ ءِ کہ ٹوڈی کار پشاور آن کوئٹہ آ ہننگ اس کہ کسر ئٹ ویل ئنا گواچی مس۔

پین حوال ئسے نا رد ئٹ بلوچستان نا علاقہ نوشکی ٹی سلطان چڑاھی نا خڑک ٹرک و کار نا ڈک لگینگ نا سوب آن ارا بندغ نا ٹپی مننگ نا حوال ءِ، ویل ئنا رد ئٹ داسکان گیشتر حوال رسینگتنے۔

اوغانستان نا شار قندوز نا اسہ مسیت اسیٹ تراک اس مسونے ہرانا سوب آن 60 بندغ مرگ نا گواچی و 147 ٹپی مسونو۔ فرانسیسی حوال تروک ایجنسی اے ایف پی خن خنوک شاہد آتا رِدئٹ پارے کہ تراک نماز جمعہ نا وختا مس۔

اوغان وزارت داخلہ نا ترجمان قاری سید خوستی اے ایف پی تون ہیت کریسہ تراک نا حوال ءِ پک کرے واہم او دا بابت پین شابیتی ئٹ ہیت کتئو۔

ہندی مخلوق نا پاننگ ءِ کہ او مسیت ئٹ نماز جمعہ خواننگ ئسر کہ دا نیامٹ تُرند ءُ تراک ئسے نا توار بننگ مس۔

طالبان ترجمان ذبیح اللہ مجاہد نا پاننگ ءِ کہ پیشیم تون قندوز نا ضلع خان آباد نا اسہ مسیت اسیٹ تراک مس ہرانا سوب آن بھازا بندغ آک مرگ نا گواچی و بھازاک ٹپی مسونو۔

یاتی مرے دا مسیت اہل تشیع نا ءِ و کہوک آک شیعہ مسلک آن تعلقد تخرہ ہراڑان گمان کننگسہ ءِ جلہو جہانی دہشت گرد تنظیم داعش نا پارہ غان کننگانے واہم دائسکان دا ردئٹ کس ئنا پارہ غان بیان مون آ بتنے۔