عمر شریف نا نماز جنازہ کلفٹن ئٹ پارک ئسیٹی درو خواننگا۔ نماز جنازہ ءِ مولانا بشیر فاروقی خوانیفے۔ اونا دفن اونا است خواہی نا رد ئٹ عبداللہ شاہ غازی نا مزار نا رہی آ مسونے۔

داڑان مُست میت نا دننگ نا ہند سرد خانہ آن پیشن اونا ہڑتوم آ مار آک فواد، جواد، عمر شریف نا شہدائیک، سنگت و سیال آک بھلو کچ اسیٹ ساڑی ئسر، ہرا میت تون ہمراہ اونا رہینگوک آ ہند آ سر مسر، اندن عمر شریف نا اُراغا پڑس اکن سیاسی و ایلو زند ئنا جتا آ بشخ آتیان تعلقداری تخوکا شخصیت آتا بننگ نا لڑ ہم برجاء ءِ۔

عمر شریف نا میت درو نا دے 6 اکتوبر آ جہاز ئٹ پاکستانی وخت ئنا رد ئٹ سہب ئنا 5 بجہ و 35 منٹ آ کراچی آ سر مس۔ عمر شریف نا جنوزان زرین غزل و جرمنی ٹی پاکستانی قونصل جنرل امجد علی ہم اندا جہاز ئٹ کراچی آ سر مسر۔ کارگو ٹرمينل آ المی کاروائی آن گڈ میت خاہوت نا دوٹی تننگا۔

عمر شریف نا است خوائی تا رد ئٹ اودے بزرگ حضرت عبداللّٰہ شاہ غازی نا مزار نا رہی آ کڈ کریر۔

افغان قومی موومنٹ نا بیان ٹی پاننگ آ کہ ہمسایہ ملک آک پاکستان افغانستان و ایران سیم تا بند مننگ آن لس مخلوق  سخت خواری تون مون تروئی تمنگ ءِ، کاروباری گڑا تا ہن و بر کن آسرات پالیسی مونی ہتنگ تئو گڑا کاروبار نا بند مننگ نا سوب آن صوبہ نا لکھ آ غریب و نیامکو تپہ آک ہرا جتا وڑ ئٹ امپورٹ ایکسپورٹ نا کاروبار تون تفوک ئسر اِرغ اسیکن موتاج مرور۔

اوفک مُستی پاریر سیم آ کاروباری گڑا تا بند مننگ محکوم تے معاشی وڑ ئٹ کمزور کننگ نا چم بازی ئسے، نزور خارجہ پالیسی نا سوب آن ہر وخت پاکستان و ہمسایہ ملک اوغانستان و ایران نا تعلقداریک خراب مریرا، دا ملک آتا اسٹ ایلو آ تومت و بہتان حالیت ءِ پین خراب کرور ہرانا نہ فائدہ دا مسٹ انگا ملک آتا دژمن تے رسینگو، و تیوہ آتیان زیات نسخان دا سیم تا داپار ایپار رہینگوک کوالخواتے ارفوئی تمو۔

بیان ئٹ مُستی پاننگانے کہ سیم نا ہڑدے بند مننگ، چِک و تاڑ آن مالی نسخان تون مون تروئی تمنگ ءِ

پاننگانے کہ سیم آ سفارتی و اِرا کنڈان سیالی تے بحال کریسہ کاروبار و ہن و بر کن زوت آن زوت ملینگہ تاکن سیم آن رہینگوک ہڑتوما کنڈ آتیان مخلوق جوان زند گدریفے۔

بلوچستان نا علاقہ کوئٹہ، لسبیلہ ٹی جتا ویل آتیٹ چار بندغ مرگ نا گواچی و اندن 3 ٹپی مسونو۔

حوال تا رد ئٹ بلوچستان نا ضلع لسبیلہ نا تحصیل دریجی نا علاقہ امید آباد ٹی ماربل مائن آن خل کشینگ نا وخت آ مسہ خواری کش اسہ کبین ءُ خل ئسے نا شیف آن بسر۔

ویل ئنا سوب آن اِرا مزور کار محمد رمضان و محمد یاسین ٹپی آ حالیت ئٹ ہند آ مرگ نا گواچی مسر۔ اندن اسہ مزور کار اس بد حالیت ئٹ اسپتال آ سر کننگانے، ویل ئنا گواچی مروک مزور آتا تعلق دریجی آن  پننگسہ ءِ۔

اندن پین حوال ئسے نا رد ئٹ کوئٹہ نا علاقہ سریاب روڈ آ نادرست بندغ آتا سم کاری آن اِرا بندغ مرگ نا گواچی مسر و اسٹ ٹپی مس۔

ریسکیو آن رسینگوک حوال تا رد ئٹ سریاب نا علاقہ کیچی بیگ ٹی نادرست بندغ آتا سم کاری آن 2 بندغ مشتاق احمد و حاجی عبدالصمد مرگ نا گواچی مسر و اسہ کسری ئس ٹپی مسونے۔

گشتر حوال تا رد ئٹ ہرا دمدستی وڑ ئٹ سول ہسپتال کوئٹہ آ سر کننگار ہراڑے جونک المی کارروائی آن گڈ خاہوت نا دوٹی تننگانو، اندن ٹپی دوا درمان تننگا، ویل ئتون تفوک پین سر و سوج تعلقدار  پولیسں کننگ ءِ۔

انٹر سکولز لیگ فٹبال ٹورنامنٹ نا ردئٹ گورنمنٹ پائلٹ سیکنڈری سکول مستونگ نا ہند آاینو اِرا میچ گوازی کننگار۔ اولیکو میچ گورنمنٹ پائلٹ سیکنڈری سکول مستونگ نا ٹیم پائلٹ شاہین بمقابلہ ہائی سکول محمد شہی نا نیام ئٹی گوازی کننگا، ہرا کہ 0-0 آ برابر مس۔

اندن دا میچ ئنا گچین آ مہمان گورنمنٹ ہائی سکول محمد شہی نا استاد صاحب خان ئس اندن ایلو چس کروک میچ گورنمنٹ پائلٹ سیکنڈری سکول مستونگ نا ٹیم پائلٹ اقبال بمقابلہ ہائی سکول غلام پڑینز گوازی کننگا۔

گیشتر حوال تا رد ئٹ دا میچ ئٹی گورنمنٹ پائلٹ سیکنڈری سکول مستونگ نا ٹیم 1 نا مون ئٹ 2 گول آن سر سہب مس۔ دا میچ ئنا گچین آ مہمان نیشنل پارٹی مستونگ نا سینئر راہشون میر سکندر خان ملازئی ئس ہرانا ہڑتوما ٹیم آتا کھلاڑی تیتون درستی راستی ہم کرفنگا۔ گچین آ مہمان میچ ئنا ایسری آ کٹوک ٹیم کن 3000 رپئی زر تس۔

حوال تا رد ئٹ تیوہ آ پاکستان ئٹ کورونا وائرس آن 24 گھنٹہ نا نیام ئٹی پین 38 بندغ  مرگ نا گواچی مسونو۔

نیشنل کمانڈ اینڈ آپریشن سینٹر نا کنڈان شینک کروکا بیان نا رد ئٹ تدوکا 24 گھنٹہ نا نیام ئٹی  تیوہ آ پاکستان ئٹ کورونا نا پک کننگ کن 46 ہزار 477 ٹیسٹ کننگانے ہرافتیٹ 1212 بندغ ٹی کورونا وائرس پک مسونے۔

گیشتر حوال تا رد ئٹ تدوکا دے دا جہانی دین آن پین 39 بندغ مرگ نا گواچی مسونو، اندن مثبت کیس آتا کچ 60.2 فیصد ریکارڈ مسونے، داڑان بیدس 3079 ناجوڑی نا حالیت خلیس ٹی ءِ۔

بلوچستان نا بنجائی شار کوئٹہ و پنجگور آن پاکستانی فورسز تا دو آن دزگیری آن گڈ بیگواہ مروکا مسہ بندغ یلہ مسر۔

یلہ مروکا منیر احمد زہری ءِ تدوکا توہ سی ٹی ڈی و ایلو سیکورٹی ادارہ غاک برما ہوٹل کوئٹہ آن ہموتم دزگیر کریسہ بیگواہ کریسر ہراتم او ہمو جاگہ غا ہندی ئس۔

استاد منیر نا یلہ مننگ نا پک ءِ علاقائی حوال آک کرینو۔

گیشتر حوال تا رد ئٹ تدوکا توہ کوئٹہ آن زوراکی ئٹ بیگواہ مننگ نا گواچی مروکا ضلع خضدار نا تحصیل زہری نا ہندی استاد منیر احمد یلہ مریسہ اُرا غا سر مسونے۔

بلوچستان ئٹ زوراکی وڑ ئٹ بیگواہی نا ویل آک بھاز وخت رپورٹ کننگانو۔

خضدار زہری نا ہندی ارا ورنا عرفان زہری و قادر کنول ہم تدوکا توہ زوراکی ئٹ بیگواہ مننگ نا گواچی مسوسر ہرا داسکان یلہ کننگتنو۔

پین حوال ئسے نا رد ئٹ چار ستمبر آ کوئٹہ آن فورسز آتا دو آن بیگواہ مروکا منیب بڑیچ یلہ مریسہ ارا غا سر مسونے۔

منیب بڑیچ ءِ چار ستمبر آ پاکستانی فورسز آک کوئٹہ سریاب روڈ آ بلوچستان یونیورسٹی نا مونا شفیع کالونی آن اسہ اُرا ئسے آ چھاپہ خلیسہ دزگیر کریسہ بیگواہ کریسر۔

منیب علی کوئٹہ ڈگری کالج ئٹ ایف ایس سی نا خوانندہ ئسے۔

اندن اسہ پین حوال ئسے نا رد ئٹ نجیب بلوچ ہم یلہ کننگانے۔

یانزدہ اگست آ پنجگور آن بیگواہ مروکا نجیب بلوچ یلہ مریسہ ارا غا سر مسونے۔

اہلخانہ نا رد ئٹ نجیب عرب امارات ئٹ کاریم کریکہ ہرا چھٹی تا ایسر مننگ آن گڈ واپس ہننگ اس کہ فورسز آک اودے پنجگور آن دزگیر کریسہ بیگواہ کریسر۔

نجیب بلوچ نا لمہ و ہیڑ اسماء اونا بیگواہی آن گڈ برانز کننگ ئسر۔

یاتی مرے نجیب بلوچ بیگواہ جمیل بلوچ نا مار ء ہرادے 29 اپریل 2013 آ بلوچستان نا ضلع آواران آن پاکستانی فورسز آک اغواء کریسہ بیگواہ کریر و داسکان بیگواہ ء۔

بلوچستان ئٹ بیگواہ بندغ آتا مسئلہ غاک دے پہ دے بد و حالیت اختیار کننگ ءُ۔

بلوچستان نا سیاسی جماعت و تنظیم آتا پارہ غان بیگواہ بندغ آتا یلہ کننگ کن تدوکا بھلو وخت ئسے آن کوشست آک برجاء ءُ و داڑتون اوار کوئٹہ پریس کلب نا مونا اسہ سال آتیان بیگواہ بندغ آتا خاہوت آک ہم برانز کننگو۔