خاران واپڈا روڑ آن بیگواہ مروک نوشاد سیاہ پاد پنی ورنا نا خاہوت جوژان ٹی پریس کانفرنس کریسہ پاریر کہ 29/11/2021شام 8بجہ نوشاد نا برمتہ مننگ نا حوال سوشل میڈیا غا ننے رسینگا ہرانا سوب آن نن بھاز ذہنی فریشانی تا گواچی مسون۔

او پاریر کہ نوشاد برمتہ مننگ آن اسہ شام اس مست خاہوت تون شکائست کریسس کہ سی ٹی ڈی کنا رند ئٹ ءِ، لمہ نا دلاسہ تننگ آن گڈ نوشاد شام ئنا تینا کاریم ئسے کن بازار آ ہنا تو واپڈا روڈ نا خڑک ہڈ تروک اسہ دکان آن سی ٹی ڈی نا کراندہ آک بے دادی کریسہ موٹر سائیکل تون اوار برمتہ کریسہ زوراکی ئٹ تینتون اوار دریر۔

او پارے کہ نوشاد سیاہ پاد نا برمتہ مننگ آن گڈ ننا خاہوت بھاز ذہنی ٹارچر نا گواچی ءِ، تیوہ آ ارا نا اسہ سیبو نوشاد اس وزیراعظم، چیف جسٹس، آرمی چیف وزیرداخلہ و ایلو قانود نا ٹہیفک ادارہ آتیان بھاز خواست کینا کہ او نوشاد نا یلہ کننگ کن پورو وڑ ئٹ تینا کڑدار ادا کیر تاکن ننا خاہوت دا ذہنی بے دادی آن پیشتمنگ کے۔

حوال تا رد ئٹ تیوہ آ پاکستان ئٹ کورونا وائرس آن 24 گھنٹہ نا نیام ئٹی پین شش بندغ مرگ نا گواچی مسونو۔

نیشنل کمانڈ اینڈ آپریشن سینٹر نا پارہ غان شینک کروکا بیان نا رد ئٹ تدوکا 24 گھنٹہ نا نیام ئٹی تیوہ آ پاکستان ئٹ کورونا نا پک مننگ کن 45 ہزار 307 ٹیسٹ کننگانے ہرافتیٹ 372 بندغ ٹی کورونا وائرس پک مسونے۔

تدوکا دے دا دین پین شش بندغ ءِ مرگ نا گواچی کرینے، اندن مثبت کیس آتا کچ 82 – 0 فیصد ریکارڈ مسونے، داڑان بیدس854 ناجوڑی تا حالیت خلیس ٹی ءُ۔

ترکی سیکیورٹی ادارہ غاک صدر رجب طیب اردوغان آ مرکی آ جلہو نا سازش ءِ بے سہب کریر۔

جہانی حوال تروکا ادارہ تا رد ئٹ ترکی نا صدر رجب طیب اردوغان آ صوبہ سیرت ئٹ بم جلہو نا کوشست ءِ ترک سیکیورٹی فورسز بے سہب کرے۔

ترکی نا میڈیا نا پاننگ ءِ کہ طیب اردوغان صوبہ سیرت ئٹ اسہ ریلی اسیٹی اوار اس، دانا نیام ئٹ پولیس نا گاڑی ہرا ریلی نا رکھنگ کن سلوک ئس، سیکیورٹی فورس آک گاڑی نا شیف آن بم ئس کشار ہرادے دمدستی تون بم ڈسپوزل اسکواڈ ناکارہ کرے۔

ترک میڈیا نا رد ئٹ ویل آن گڈ فرانزک ٹیم آک گاڑی ءِ گھیرا ٹی ہلیسہ ہور تا نشانک و ایلو شاہدی تے دوئی کرینو اندن دا رد ئٹ پین پٹ و پول نا بناء کننگانے۔

ایلو پارہ غان رجب طیب اردوغان ہفتہ نا دے سیرت ئٹ اسہ ریلی ئسیٹی پارے کہ ترکی نا بروکا وخت ئٹ دہشت گردی کن اسہ جاگہ اس اف۔ نن ملک نا اسہ ہم ورنا ئسے دہشت گرد آتا بشخ مننگ کن ہلپرون۔

بلوچستان نا ضلع ژوب ئٹ گاڑی نا ڈکھ لگنگ آن موٹر سائیکل آ سوار بندغ مرگ نا گواچی مس اندن ارٹمی بندغ ٹپی مس۔

گیشتر حوال تا رد ئٹ ژوب نا علاقہ ڈی آئی خان روڈ سلیازہ آن خڑک گاڑی نا ڈکھ لگنگ آن موٹر سائیکل آ سوار احسان اللہ مرگ نا گواچی اندن شاہ محمد ٹپی مسونے، جون و ٹپی ہسپتال آ دننگانو، پین کاروائی تعلقدار کوالخواک کننگ ءُ۔

اندن دکی نا علاقہ ٹی ارا جتا ویل آتیٹ اسہ کانکن اس بیران اندن ارا کارندہ غاتون اوار 4 بندغ ٹپی مسونو۔

گیشتر حوال تا رد ئٹ دکی ٹی ارا جتا ویل آتیٹ اسہ کولا نا کانکن ئس بیران اندن ارا کارندہ تون اوار چار بندغ ٹپی مسر، اولیکو ویل ئٹ ہند کولا کانڑ ئٹ ٹرالی نا چٹ کشگنگ نا سوب آن ٹرالی نا کیرنگ آ بریسہ اسہ کانکن ئس مرگ نا گواچی ارٹ بھاز ٹپی مسر۔

ہسپتال نا رد ئٹ کہوک آ کانکن نا چاہنداری موسیٰ جان، شاہ بدین نا مار قوم کاکڑ، ہند قلعہ سیف اللہ نا پن آن مس۔ اندن ٹپی تا چاہنداری محمد اسحاق، شین گل نا مار و فتح خان، دارو خان نا مار، قوم سلیمان نخیل ہند کچلاک نا پن آن مس۔

ٹپی و کہوکا کانکن تے کولا کانڑ آن کشیسہ ہسپتال آ سر کریر۔

ایلو ویل ئٹ لاروائی روڈ آ باب دکی آن خڑک ویٹس گاڑی موٹر سائیکل آ سوار مروکا بندغ ءِ بچیفنگ ئٹ شکست نا آماچ مس، شکست نا سوب آن گاڑی روڈ آن شیف تما، گاڑی ٹی سوار محکمہ مائنز نا ارا بندغ ٹپی مسر۔

ٹپی بندغ آتا چاہنداری الیکٹریکل انسپکٹر آمین اللہ، ملا عبدالکریم نا مار، ہند قلعہ سیف اللہ و کلرک حیات اللہ، حاجی عالم خان نا مار پن آن مس۔ اسہ ٹپی امین اللہ سول اسپتال دکی ئٹ دوا درمان آن گڈ پین علاج کن کوئٹہ غا دننگا۔

اندن اسہ پین ویل ئسیٹی نوکنڈی نا آر سی ڈی کسر آ روڈ شکست آن اسہ بندغ اس ٹپی مس۔

نوکنڈی نا آر سی ڈی کسر آ موٹر سائیکل و پک اپ گاڑی نا نیام ئٹ بھاز بھلو شکست اس مس ہرانا سوب آن موٹرسائیکل آ سوار بندغ بھاز ٹپی مس و شکست تیزی ہننگ نا سوب آن مونا بس اندن ٹپی بندغ آر سی آیا کیو اسپتال نوکنڈی ٹی دوا درمان آن گڈ دالبندین کن دننگا۔

اندن اسہ پین تدینی ئسے ٹی تسپ نا علاقہ ٹی کرنٹ ہلنگ آن اسہ بندغ اس بیران مس۔

پنجگور نا علاقہ تسپ ئٹ بجلی نا کرنٹ ہلنگ آن فہد، عبدالکریم نا مار ہند تسپ، مرگ نا گواچی مسونے، خاہوت نا رد ئٹ فہد تینا ارا ٹی بجلی نا کاریم کننگ اس کہ بجلی نا کرنٹ ہلنگ آن مرگ نا گواچی مس۔

اندن کوئٹہ ٹی سم کاری نا ویل ئسے ٹی اسہ بندغ اس بیران مس۔

بلوچستان نا دارالحکومت کوئٹہ ٹی اسٹیوٹ روڈ آ گاڑی آ سم کاری نا سوب آن اسہ بندغ ئس بیران مس۔

جون ء دوئی کریسہ ہسپتال آ دریر، پولیس علاقہ ء گھیرا ٹی ہلیسہ کاروائی ء بناء کرینے۔

بلوچستان ئٹ کورونا وائرس نا 15 پوسکنو رپورٹ، زیمی بندغ آتا کچ 32 ہزار 498 مس۔

محکمہ جانجوڑی نا کورونا وائرس آپریشن سیل نا شینک مروکا رپورٹ نا رد ئٹ بلوچستان نا 6 ضلع آن کورونا وائرس نا 819 ٹیسٹ کننگار ہرافتیان 15 بندغ ئٹ کورونا وائرس خننگا اندن 86 بندغ نا نتیجہ غاک سلوک ء۔

رپورٹ نا رد ئٹ تدوکا 24 گھنٹہ نا نیام ئٹ بلوچستان ئٹ کورونا وائرس نا گواچی اسہ مریض اس ہم جانجوڑ متو اندن بلوچستان ئٹ کورونا وائرس نا مریض تا کچ 48 ء ہرافتیان مسٹ ہسپتال ئٹ علاج مننگ ء دا بندغ تیان مسہ بندغ ء ہائی آکسیجن فلو آ تخانو۔

رپورٹ نا رد ئٹ بلوچستان ٹی کورونا وائرس 83-1 فیصد ریکارڈ مس، رپورٹ نا رد ئٹ بلوچستان ٹی داسکان کورونا وائرس آن 360 مرگ مسونو۔

بلوچستان نیشنل پارٹی نا سرکماش سردار اختر مینگل پارینے کہ گوادر ئٹ فورس رادہ کننگ خاخر لگفنگ نا وڑ ءِ، گوادر نا ہزار آتا شاریک ناانصافی تا برخلاف سڑک تیا پیش تمانو۔

چاگڑدی حوالکاری ویب سائٹ ٹوئیٹر آ تینا کلہو ئٹ سردار اختر جان مینگل پارے کہ گوادر ئٹ پین فورس رادہ کننگ برانز نا نیام ئٹ خاخر ءِ زیات کننگ نا وڑ ءِ، ہزار تا شاریک سال آتیان برجاء نا انصافی، بے برابری و محرومی تا برخلاف سڑک آتیا پیش تمانو۔

بلوچستان نا ضلع پنجگور ئٹ سم کاری نا اِرا جتا ویل تیٹ اسہ بندغ اس مرگ نا گواچی و اسٹ اس ٹپی مسونے۔

سم کاری نا ویل آک پنجگور نا علاقہ گرمکان و بونستان ئٹ مونا بسونو۔

گرمکان ئٹ سم کاری آن منظور پنی اس، شفیع نا مار بیران مس اندن بونستان ئٹ سم کاری نا ویل ئٹ ندیم، بالاچ نا مار ٹپی مسونے۔

داسکان ہڑتوم آ ویل تا سوب آک درست متنو۔

تربت بوائز مڈل اسکول میر آباد نا استاد آتے اسکول ئٹ تخنگ نا جاگہ ایکٹنگ ایل سی کننگ نا برخلاف خوانندہ تا برانز و کلاس آتا بائیکاٹ کننگا۔

برانز کروک آک خواست کریر کہ ہرا وخت اسکان ننا استاد آتے واپس ننا اسکول آتیٹ تخپسہ یا اوفتا بدل ئٹ پوسکنو استاد تخپسہ ہمو وخت اسکان نن کلاس آتا بائیکاٹ ءِ کینا۔

برانز کروک آک محکمہ تعلیم نا دا کاریم ءِ خواننگ نا دژمنی پاریسہ پاریر کہ خواننگ نا جوانی کن محکمہ پوسکنو استاد ایتے ولے داڑان بیدس تینا علاقہ نا استاد آتے ایکٹنگ ایل سی جوڑ کریسہ اوفتے کاریم آن نجات ایتنگ کن سیاسی سفارش آتے کاریم اٹ ہتیسہ ءِ اگہ ننا استاد آک بدل متور نن تینا کلاس آتا بائیکاٹ ءِ برجاء تخینہ۔