گوادر نا دے ٹکی پارہ غا اِرا بندغ سمندر ئٹ ڈبینگار ہرافتیان اسٹ ءِ بچفنگا۔

ضلعی بست و بندی کوالخواہ تا ردئٹ ہفتہ نا دے گوادر نا سمندر ئٹ ڈبینگوک اِرا بندغ آن اسٹ اس بچفنگانے و ایلو بندغ نا پٹ و پول برجاء ءِ۔ ڈبینگوک ہڑتوما بندغ آک ہندی مچی ہلوک ئسر و تینا کشتی ءِ ساحل آ دیخہ مُر لنگر خلنگ آن گڈ آب بازی کریسہ واپس بننگ ئسر۔

سمندر ئٹ تُرند چُلک و تہو نا سوب مچی ہلوک آک ڈبینگار۔ نیوی نا کوسٹ گارڈ و ہندی آب باز آک مچی ہلوک آتا پٹ و پولی آپریشن ئٹ گٹ ءُ۔

بلوچستان نا علاقہ لسبیلہ، حب ئٹ روڈ شکست نا جتا ویل آتیٹ 4بندغ مرگ نا گواچی، و 3 بندغ ٹپی مسونو۔

حوال تا رد ئٹ لسبیلہ کوسٹل ہائی وے کنڈ ملیر گولڈن بپچ نا خڑک کار ئسے ترند ہننگ نا سوب آن روڈ ئنا کنڈان سلوک ڈمپر ٹرک لگا ہرانا سوب آن ویل ئٹی کار ئٹی سوار مسہ بندغ ہند آ مرگ نا گواچی مسونو۔

مرگ نا گواچی مروکا تیٹ کرسٹل بیچ و باڑھ نا مینیجر حسن تون اوار 3 بندغ اوار ءُ، جوْن آک ہسپتال آ سر کننگانو۔

اندن پین حوال ئسے نا رد ئٹ تدوکا  دے حب نورانی کراس نا خڑک روڈ شکست نا ویل ئٹی اسہ بندغ اس مرگ نا گواچی 2 بندغ ٹپی مسونو۔

ایدھی حوال تا رد ئٹ حلیم الدین نا مار عبیداللہ مرگ نا گواچی مسونے  اندن ارا بندغ ٹپی مسونو۔ ٹپی آک سول ہسپتال حب آ سر کننگانو ہراڑے اوفک دوا درمان کننگ آن گڈ کراچی آ رادہ کننگانو اندن تعلقدار پولیسں المی کارروائی آن گڈ جوْن ءِ خاہوت نا دو ٹی تسونے۔

مسہ سال ئنا سفر، سربلند عرف عمر جان تون اوار

نوشت: زورین اسلم بلوچ
مَٹ: سمعیہ بلوچ

دی بلوچستان پوسٹ

ہرا وخت اولیکو وار او کنے خنا، کنتون اوڑدئی کرے، سنگتی مس، او بھاز زیبا ءُ دے ئسر۔ منہ وخت گدرینگ آن گڈ  عمر جان کنے پارے کہ “سنگت کنے استاد اسلم تون اوڑدئی کروئی ءِ۔” ای ہم پاریٹ جی آھو۔ مسہ دے آن گڈ موقع رسینگتون ای استاد اسلم ءِ پاریٹ کہ اسہ سنگت اس نیتون اوڑدئی کننگ خوائک۔ استاد پارے کہ المی توار کر سنگت ءِ۔ ای ہم خوش مسوٹ کہ داخس بھلو سنگت اس کنے پارے اوڑدئی  کیوا نا سنگت تون، ای رومب ئٹ عمر جان نا رہی آ ہناٹ و پاریٹ تا نے استاد توار خوائنگ ءِ خننگ کن، گڑا او ہم خوشی آن بشخندہ کریسہ بش مس و کنتون سر ہلک۔

نن جنرل اسلم نا رہی آ سرمسون گڑا عمر جان و استاد نا اوڑدئی بناء مس، تنظیمی راز آتا رد ئٹ اوفتا ہیت و گپ بناء مس، مسہ گھنٹہ آن گڈ سنگت بابر مجید ءِ استاد اسلم توار کرے و پارے کہ اینو آن دا سنگت ننتون اوار مرو و دانا خیال ء تخیرے، اوکان گڈ عمر جان جنرل آن خدا حافظ  کرے و ہنا۔

ایلو دے 3:30 بجہ نا وخت اس کہ جنرل اسلم و سنگت آتیا دژمن نا جہلو مس و جنرل اسلم ننے آن ہر وخت اکن جسمانی وڑ ئٹ مُر مس۔

اِرا دے آن گڈ ای عمر جان ءِ اسہ ذمہ وار ءُ سنگت اسیتون اوڑدئی کرفیٹ و سنگت ءِ پاریٹ کہ استاد دانا خیال ءِ تخنگ کن پاریسس و دا ہم پاریسس کہ اینو آن گڈ دا ننتون اوار مرو۔

اندن ہنیسہ ہنیسہ عمر جان ہم تینا فیصلہ ءِ کریسس و عمر جان تینا فیصلہ آ سوگوی ئٹ سلوک ئس، اونا درشم آ ہر وخت بشخندہ تالان مروک مسوکا و سنگت آتون اندن اوڑدئی کریکا، دنکہ پِر ئنا وخت آ ڈغار خوش مریک، عمر جان نا مونا ہم ہمو خوشی خننگاکہ۔

سنگت نن تون اوار مسہ سال گدریفے، سنگت نا ہر ہیت یات بریک، اسہ اسہ ہیت آ سنگت ءِ بھاز یات کیوا اُست خوش مریک، عمر جان نا مخوک و خوش انگا مزاج کنے اُست کٹہ مننگ کن ہلتوکا، سنگت ننے ہمت حوصلہ تس و ہر بلوچ ورنا تیکن کہلو اس ہلا ای ریحان نا توفنگ ءِ سمبھالاٹ و بروکا ورناک کنا توفنگ ءِ سمبھالیر۔

منہ توہ اکن عمر جان آن مُر مسوٹ، او تینا مشن نا تیاری کننگ ئس ننے تنظیمی رازداری نا رد ئٹ ہچ سماہ الو کہ عمر جان تینا فیصلہ ءِ کرینے۔ اسہ دے کنے میسج بس، ای ہمو میسج خواناٹ گڑا او میسج کنا دوست انگا سنگت عمر جان نا ئس۔ ای عمر جان ءِ خننگ کن پاریٹ، ای ہم خننگ کن تا اسہ نیمون اس پٹاٹہ گڑا او پارے ای داسا نیتون  اوڑدئی کننگ کپرا ای اوڑدئی  کننگ کن تنک ئسوٹ۔ او پارے کہ اوڑدئی کروٹ نیتون، مچے کاریم تیٹ گٹ اٹ و رخصت اف اوارن پاننگ آن گڈ خدا حفظ کرے۔ ای ہم پاریٹ انشاللہ سنگت اوارن۔

کنے سماہ الو کہ ہمو دے آن عمر جان نا نمبر گڑاک بند مرور۔ منہ دے آن بے جاراتی گمان مسکہ کنے، ہچ پوہ متوٹا کہ بے آرامی نا سوب انت مننگ کیک۔ بس ای تینا موبائل اورینگ ئسوٹ ناگمان عمر جان نا ٹوئٹ ءِ خناٹ۔ ای مچے اریسکہ چپ مسوٹ و گوڑینگوک مسوٹ۔

رخصت اف اوارن سنگت، تیوہ آتا کسر اندادے۔ ای تو ریحان جان نا توفنگ ءِ سبھالانوٹ و ہر وخت زندہ مروٹ و داسا کنے یخین ءِ کہ کنا توفنگ ءِ کنا بروکا ورناک زنگ خلینگ کن ہلوفس۔

سنگت عمر جان کن کنا قلم و کنے ٹی داخس طاغت اف کہ سنگت نا قربانی و شہادت آ نوشت کننگ کیو۔ داسا ہم کنا دوک لڑزینگ ءُ کنے بشخیس سنگت ای نیکن ہچ نوشت کننگ کتوٹ نی زندہ اس و ہر وخت زندہ مروس۔

حوال تا رد ئٹ امریکا اوغانستان ٹی ڈرون جہلو کریسہ کابل بالی پٹ بمب تراک نا منصوبہ کروک آتے کسفنگ نا دعویٰ کرینے، پیشن ملکی خبر ایجنسی نا رد ئٹ امریکی ڈرون جہاز اوغان صوبہ ننگرہار ٹی اسہ کسری گاڑی ئسے آ ڈرون جہلو کرینے۔

گیشتر حوال تا رد ئٹ گاڑی ٹی اِرا بندغ سوار ئسر اوفتیان اسٹ مننگ کروک وڑ ئٹ کابل بالی پٹ آ جہلو نا ماسٹر مائنڈ اندن ایلو اونا سنگت ئس، جہلو ٹی ہڑتوماک مرگ نا گواچی مسونو۔

امریکی سینٹرل کمانڈ نا کیپٹن مبل ارین افغانستان ٹی کروک ڈرون جہلو ءِ پک کریسہ پارے کہ بنائی شاہدی تیان سماء تمیک کہ ڈودار آتے کسفینن۔

یاتی مرے 26 اگست آ کابل بالی پٹ آ وت کش بمب تراک ٹی 13 امریکی فوجی آن بیدس 70 آن زیات اوغان شاریک مرگ نا گواچی مسوسر، امریکا تینا شاری تے کابل بالی پٹ نا دروازہ آتیان مُر مننگ نا وارننگ شینک کرینے۔

اوغانستان ئٹ بلوچ باہوٹی تا اُرا تیا طالبان تا جلہو و کوزہ

دی بلوچستان پوسٹ – تیدری

میران مزار

اوغانستان آ طالبان نا کنٹرول آن گڈ کندھار شار نا نیامٹ ئٹ ہندی بلوچ باہوٹی عبدالغنی بنگلزئی اوغانستان ئٹ ہندی بلوچ باہوٹی تا بدحالیتی نا بابت ٹی بی پی تون ہیت کریسہ پارے کہ “منہ دے مالو درزن آتا حساب آ طالبان جنگجوک ننا اُرا ٹی پیہار و اُرا ءِ خالی کننگ نا حکم تسر۔ ننا اُرا ٹی ساڑی اسہ گاڑی ئسے آ طالب آتا اسہ ذمہ وار مولوی نصیب کامران کوزہ کریسہ تینتون درے و دا وخت آ ہم ننے کشیسہ آن گڈ ننا اُرا غا درزن آتا حساب آ طالب آک تینا تڈہ کرینو۔

قطر ئٹ طالبان و امریکہ نا نیامٹ معاہدہ آن گڈ طالبان ترندی تون اوغانستان نا تیوہ غا بھلا شار تیا کوزہ کریسہ معاہدہ نا گڈی تاریخ آن مُسہ ہفتہ مُست 15 اگست آ اوغانستان نا دارالحکومت کابل ئٹ پیہا۔ ہرانا سوب آن حکومت بُھس مس، اوغان صدر اشرف غنی ءِ ہشتاف اٹ ملک ہلوئی تما و طالبان تیوہ غا اسلامی امارات نا ہڈتس نا پڑو کرے۔ انداڑتون امریکہ نا اوغانستان ئٹ بیست سال آن برجاء کبین نرخ آ جنگی ہندی مننگ تینا ایسری آ سر مس۔

بھلا سلاء تیتون طالبان جنگول آک دارالحکومت کابل ئٹ ہر پارہ غا خننگار، اوفک ہورک آ صدارتی ماڑی آن ہلیس ٹریفک نا بست و بند اسکان تینا دوٹی ہلکر۔ اسہ ہفتہ ئسے اسکان کابل بالی پٹ آ چِک و تاڑ برجاء مس، بالی گراب و جاز آک برجاء بال آتیا تالان امریکی فوجی و امریکی فوج نا اوغان کمکار آتے اوکان کشنگ ئٹ گٹ مسر۔ سم کاری و جاز آتیا درنجوک نرنگ نا تدینی تیٹ بھازاک کسکر۔

بندغی حق آتا جہانی تنظیمک و زالبول تا حق ئنا جتا تنظیمک دا خلیس نا درشانی کریر کہ طالبان نود نا وخت نا ڈول تُرند ءُ حکومت اس ٹہیفسہ زالبول آتیان اوفتا آجوئی ءِ پلیرہ و بیر ہلنگ نا کاروائی تا بناء کریسہ اسہ پوسکنو زنک کُشی اس کیرہ۔ دافتا ورندی ءِ طالبان ترجمان ذبیح اللہ مجاہد پریس کانفرنس کریسہ تس، او دا خلیس ءِ رَد پاریسہ پارے کہ طالبان داسہ بدل مسونے۔

اسہ بیم بش کروک ءُ ویل اس ہرا دائسکان جہانی میڈیا و بندغی حق آتا جہانی ادارہ غاتا پارہ بے پام مریسہ ءِ، او اوغانستان ئٹ باہوٹی بلوچ آتا ویل ءِ۔ تدوک بیست سال آن بلوچ آجوئی خواہوک سلاء بند گل و پاکستانی فوج نا نیامٹ جنگ و ترند فوج کشی تا سوب بھلو کچ اسیٹی بلوچ لڈ ہنپ کریسہ اوغانستان ئٹ باہوٹی نا زند گدریفنگ ءِ۔ ہیومن رائٹس کمیشن آف پاکستان نا اسہ رپورٹ ئسے نا ردئٹ بیرہ سنہ 2006 ئٹ فوج کشی ئٹ بلوچستان نا بیرہ ڈیرہ بگٹی و کوہلو نا ضلع آتیان پنجا ہزار آن زیات بندغ لڈ و ہنپ کننگ آ بیوس مسوسر۔

اوغانستان ئٹ بلوچ باہوٹی تے رجسٹر کننگ نا ہچو وڑ ڈول اس ساڑی اف ولے اسہ گمان ئسے نا ردئٹ دا وخت کم و وَد بلوچستان نا جتا علاقہ آتیان فوج کشی نا سوب ہفت ہزار آن زیات خاہوت اوغانستان نا جتا صوبہ آتیٹ باہوٹ ہلوک ءُ۔

ہفتاد نا وخت آ ہراتم بلوچستان ئٹ فوج کشی ئٹ ترندی بس گڑا کم و وَد ہشتاد ہزار بلوچ اوغانستان ہنپ کریسہ باہوٹی نا زند گدریفنگ آ بیوس مسوسر۔ ولے نود نا وختا اوغانستان آ طالبان نا کنٹرول آن گڈ دا بلوچ باہوٹی تیا ہڑدے ہی بنماس آ جلہوک بناء کننگار ہرانا سوب آن اوفتے ساہ ءِ دلدستہ آ تخیسہ واپس بروئی تما۔ داسہ تاریخی مالو نا ندارہ و طالبان و پاکستان نا مننگ کروک خڑک سیالی تے اُریسہ اوغانستان ئٹ ہندی بلوچ باہوٹیک تینا رکھ نا سوب اسیکہ وا بیم نا گواچی ءُ۔

اوغانستان آ طالب آک کوزہ آن گڈ جنوبی صوبہ کندھار ئٹ بلوچ باہوٹی تا اُرا تیا چھاپہ تا لڑ بناء کرینو، دا وخت اسکان حوال تا ردئٹ کم و وَد اِرا اُراتیان زالبول و چُناتے زوراکی ئٹ کشیسہ طالب آک بلوچ باہوٹی تا اُرا تیا کوزہ کروک ءُ۔ داڑان بیدس پنچ پین اُراتیا چھاپہ و پٹ و پول آن گڈ چار گاڑی تینتون درینو۔

کندھار نا ضلع تختہ پل ئٹ مہاجرت نا زند گدریفوک عبدالولی مری ٹی بی پی تون ہیت کریسہ پارے کہ “تدوک بھاز دے آن برجاء، موٹر سائیکل آ بروک طالبان جنگول آک ننے تینا اُرا تے یلہ کننگ نا پاننگ ءُ و ہراتم نن دا طالب جنگول آتیان سوج کرین کہ نمے دیر رادہ کرینے گڑا اوفک تینا چاہنداری مولوی خلیل نا سنگت آتا ڈول ئٹ کریر و ننے اسہ وٹس ایپ نمبر اس ہم حوال کن تسر ہراکہ پاکستان نا یوفون کمپنی نا نمر ئسے و پاریر کہ نم مولوی خلیل تون حوال کبو و زوت آن زوت کندھار صوبہ آن پیشن مبو۔”

ٹی بی پی اسہ پین بلوچ باہوٹی حاجی محمد جان بلوچ تون دا بابت حال احوال کرے گڑا او پارے کہ “کنا اُرا ٹی بروک طالب تینا پن ءِ حافظ نثار پارے و اُرانا پٹ پول آن گڈ گاڑی آ کوزہ کریسہ تینتون درے۔”

دا بابت نن بلوچ نیشنل موومنٹ نا کماش خلیل بلوچ تون حوال کریسہ اونا ہیت آتے بننگ نا کوشست کرین، او پارے کہ “دا وخت بلوچ باہوٹی تا تیوہ غاتیان زیات کچ اوغانستان ئٹ آبات ءِ۔ ہراڑے اوفتے مالو آن بے کچ سختی تیتون مون تروئی تمنگ ءِ، ہراٹی جہانی ادارہ غاتا و اوغان ریاست نا کمک، بنماسی آسراتی تا مفرنگ آن بیدس رکھ آن ہورکی اوار ءُ۔ داسہ طالب آتا بننگ اوفتا سختی و بے جاراتی ئٹ بھاز ودکی کرینے۔”

او مُستی پارے کہ “اوغانستان نا ارٹمیکو بھلا شار کندھار ئٹ سلاء بند بندغاک ہرا تینا چاہنداری ءِ اوغان طالب نا دروشم ئٹ کننگو، اوفک باقاعدہ بلوچ باہوٹی تا برخلاف منصوبہ بند کاروائی تا بناء کرینو۔ سلاء بند طالبان آک زالبول و چنا تے اُرا تیان کشیسہ اُرا تیا کوزہ کننگو، مخلوق ءِ بیم نا گواچی کننگو و مال و اُراتے لُٹنگ ءُ، دا سلاء بند بندغاک ایلو گڑا تیان بیدس کم از کم چار گاڑی کوزہ ٹی ہلیسہ تینتون درینو۔”

خلیل بلوچ دا حالیت ءِ بیم بش کروک پاریسہ پارے کہ “دا بھاز بیم بش کروک و امیت مفروک ءُ حوال ئسے انتیکہ بلوچ باہوٹیک اوغان راج نا مہمان ءُ، ہرافتا رکھ اوغانستان نا راجی و ملی ذمہ واری ءِ، جہان ئٹ بھاز گڑا مٹ کننگ مریرہ ولے ہمسایہ غاک مٹ کننگ مفسہ، بلوچ و اوغان راج نا نیامٹ سد آ سال تیان ایلمی سیالیک ءُ، ہرافتے بھاز آ طاغت آک نسخان تننگ نا کوشست کرینو ولے دا سیالی وخت ئنا ہر امتحان آ سلامت گدرینگانے۔”

بی این ایم چیئرمین طالبان راہشون تیان دا ویل ءِ ایسر کننگ آ زور شاغیسہ پارے کہ “ای اوغان طالبان راہشون تیان خواست کیوہ کہ کندھار ئٹ مروک تدینی تا پٹ و پول کیر و اوغانستان ئٹ ساڑی بلوچ باہوٹی تا جان و مال نا رکھ ءِ یخینی کیر۔”

یاتی مرے کہ اوغانستان آ طالبان نا کوزہ آن مُست ہم اوڑے ساڑی بلوچ باہوٹی آتیا بھاز وار جلہوک مسونو، ہرافتا سوب آن درزن آتا بلوچ باہوٹیک بیران مسونو۔ بلوچ سیاسی جماعت آک و باہوٹیک دا جلہو تا دوبہ ءِ پاکستانی ڈھکوک ادارہ و اوفتا مننگ کروک پراکسی گروہ تیا خلیرہ۔ ڈیہہ ئنا حالیت آ چمشانک تخوک آک داسہ دا خلیس نا درشانی کننگو کہ ساری حالیت آن فائدہ ارفیسہ بلوچ باہوٹی تیا ساہ ہلوک جلہو تا لڑ ئٹ ودکی مننگ کیک۔

بلوچستان آن تعلقدار صحافی “باہوٹ بلوچ” اوغانستان ئٹ ساڑی حالیت آ ٹی بی پی تون ہیت کریسہ پارے کہ “اوغانستان ئٹ بلوچ باہوٹی تے طالبان نا پارہ غان بیم نا گواچی کننگ، بے اُرا کننگ و اوفتا اُرا و گاڑی تیا کوزہ کننگ بھاز نا مناسب، غیر اسلامی و غیر انسانی کاریم ئسے، طالبان راہشون تیکن الّمی ءِ کہ او دننگا بندغ تے تورر ہرا اِرا ایلم راج و ہمسایہ تا نیامٹ بدی و مُری ودی کننگ نا کوشست کننگو۔”

او مُستی پارے کہ “اوغانستان ئٹ بلوچ باہوٹی تے بیم نا گواچی کننگ، بلوچستان و سندھ ئٹ اوغان باہوٹی تیکن سختی تا سوب مننگ کیک۔”

طالبان بیست سال نا مُرغن آ جنگ آن گُڈ جائی بدل مسونے یا بلوچ باہوٹی تیتون اوفتا رویہ ہمو مرو ہرا نود نا وختا ئس؟ بلکن دا سوج ئنا ورندی بروک آ وخت اٹ رسینگہ ولے اوغانستان نا ساڑی سرگڑدانی ئٹ بلوچ باہوٹیک تا بھلا ویل آن بے پام مننگپک و دا ہیت پاش مرے کہ بلوچ باہوٹی تا رکھ نا گواچنی ذمہ وار یو این ایچ سی آر ءِ۔

بلوچستان نا ضلع زیارت ئٹ لیویز نا گاڑی آ بمب تراک نا سوب آن شش کارندہ مرگ نا گواچی مسونو۔ جلہو نا ذمہ واری ءِ بلوچ لبریشن آرمی ارفینے۔

بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسٹ پارے کہ بلوچ لبریشن آرمی نا سرمچار آک زیارت ٹی کوزہ گیر پاکستان نا لیویز فورس نا کارندہ آتے اسہ بمب جہلو اسیٹ ٹک کرینو۔

ترجمان نا رد ئٹ جہلو منگی ڈیم نا علاقہ ٹی کننگانے تراک نا سوب آن فورسز نا گاڑی پوروی وڑ ئٹ بھس مس ہرانا سوب آن لیویز فورس نا شش کارندہ  مرگ نا گواچی مسر ہرافتیٹ لیویز میجر زمان زندرہ، نائب رسالدار مدثر، سپاہی زین اللہ و ایلو ہم اوار ءُ۔

بلوچ لبریشن آرمی نا ترجمان نا رد ئٹ نن داکان مست بھاز وار و ایسری وار ہشت اگست آ میڈیا ٹی شینک کروک اسہ پریس ریلیز ٹی دا پاش وڑ ئٹ ہشار کرین کہ پولیس و لیویز آن بار انگا بلوچ آک فورسز کوزہ گیر پاکستان و اونا فوج نا پاننگ آ بلوچ تحریک آجوئی نا مونہ اڑاند جوڑ مننگ آن مر مریر نہ تو اوفتیا ہم بھاز نوعیت نا جہلو مرو۔

جیئند بلوچ نا رد ئٹ ننا وار وار ہشار کننگ آن بیدس دا فورسز آک کوزہ فوج نا کمک کننگو و بلوچ تحریک نا برخلاف کاریم کننگ ٹی اوار ءُ۔

جیئند بلوچ پارے کہ نن اسہ وار واپس لیویز فورس و پولیس ءِ وارننگ تینا کہ وہ اشتماعی و انفرادی رد ئٹ بلوچ راجی تحریک نا مونا اسہ وڑ ئنا ہم اڑاند جوڑ مننگ آن مر مریر نا تو فورسز تیا پین ترندو جہلو کننگو۔

حوال تا رد ئٹ وزیر تعلیم سندھ نجی سکول ایسوسی ایشن نا وفد  تون اوڑدئی کننگ آن گڈ سندھ ئٹی 30 اگست آن 100 فیصد ویکسینیشن والا اسکول و کالج آتے ملینگ نا پڑو کرینے، پگا آن عملہ ءِ خوائفنگ نا موکل ہم تننگا۔

وزیر تعلیم سندھ سردار شاہ نا پاننگ اس کہ صد فیصد ویکسی نیشن والا تعلیمی ادارہ آک ملینگور، عملہ و استاد آتا ویکسی نیشن رپورٹ مچ کننگ المی مرو، اسکول پنجا فیصد ساڑی تون اوار ملون۔

داکان مست سندھ حکومت نا اسکول آتے بند کننگ نا فیصلہ آ خوانندہ چنا، استاد و باوہ لمہ  آک کراچی ٹی بھلو برانز اس کریر، ڈی اے چورنگی نا ایب کیب نا کسر تیا اسکول آتا بند کننگ نا بر خلاف نعرہ خلیسہ کریر۔

وزیر تعلیم سردار شاہ حالیت آتا نوٹس ہلیسہ پرائیویٹ اسکول آتا ایسوسی ایشن نا راہشون تیان خواست کریر و 30 اگست آن اسکول آتے ملینگ نا پڑو ہم کریر۔

نصیر آباد ٹی ارا جتا ویل آتیٹ اسہ بندغ اس مرگ نا گواچی، 2 بھاز ٹپی مسونو۔

حوال تا رد ئٹ نصیر آباد پولیس تھانہ نا حدود گوٹھ عبدالصمد بنگلزئی ٹی طالب حسین نا کشت و کشار تیٹ ٹریکٹر کلٹی مس ہرانا سوب آن طالب حسین ہند آ سر مرگ نا گواچی مس، جون المی کاروائی آن گڈ خاہوت نا دو ٹی تننگا۔

اندن پین حوال ئسے نا رد ئٹ روڈ شکست نا سوب آن ارا بندغ ٹپی مسونو.

گیشتر حوال تا رد ئٹ نصیر آباد نا علاقہ نوتال نا خڑک مزدا ٹرک و
موٹر سائیکل نا ڈک لگینگ نا سوب آن شکیل احمد تون اوار ارا بندغ بھاز ٹپی مسونو ہرا ہسپتال آ سر کننگار۔