پاکستان فلور ملز ایسوسی ایشن نا مسکوئی چیئرمین بدرالدین کاکڑ تیوہ آ پاکستان ئٹ تیوہ آتیان زیات بلوچستان ٹی غلہ نا تخنگوک نرخ آ خلیس نا درشانی کریسہ پارے کہ حکومت نا نزور پالیسی و درکار غلہ نا نہاد نا ساڑی مفرنگ نا سوب نہ بیرہ بلوچستان ٹی ملک ئنا ایلو صوبہ آتا مون ئٹ سد کلو نت ئنا نرخ7 سد رپئی زیات ءِ بلکن بروکا وخت آتیٹ داٹی پین ودکی نا خلیس ءِ۔
تینا بیان ٹی او پارے کہ پنجاب، سندھ و خیر پختونخوا ٹی وزیرا عظم عمران خان نا پڑو نا رد ئٹ اسہ من غلہ نا تخنگوک نرخ 1950 رپئی ءِ بلکن اوڑے سوگو ْ پالیسی ہم ساڑی ءِ۔ دا وخت آ تیوہ آتیان زیات پد ماندہ صوبہ بلوچستان ءِ ہراڑے غلہ نا نرخ اسہ پاچک تخنگوک نرخ 5 ہزار 5 سد 50 رپئی ءِ ہرانا سوب آن غلہ نا اسہ پاچک نرخ 7 ہزار اسکان سر مننگ ءِ، ہرا پاکستان نا ایلو صوبہ آتا مقابلہ ٹی اسہ پاچک 7 سد رپئی زیات ءِ۔
او پارے بے دادی نا زی آ بے دادی اندادے کہ بلوچستان ٹی غلہ نا مچ کننگ تیوہ آتیان زیات ءِ ولے بلوچستان تون مخلوق نا 6 تو ئنا آسراتی تے پوری کننگ کن غلہ نا نہاد ساڑی مرے ولے داڑے دن ءُ ہچ اس اف۔
او پارے ونڈ ئٹی اوپن مارکیٹ ٹی غلہ نا اسی کلو نرخ تقریباً 70 رپئی اسکان سر مسونے، و دانا 80 رپئی اسکان سر مننگ نا گمان ارے ہرا غریب صوبہ کن غریب مخلوق تون اوار ظلم وزیادتی آن بیدس ہچ اس اف، ولے دا تیوہ آ حالیت آتیا صوبائی حکومت و محکمہ خوراک نا کر دار چپی سلوک اروک آن زیات ہچ اس اف۔
او پارے اگہ اندا حالیت مس گڑا بلوچستان ٹی غلہ و نت ئنا نرخ آتیٹ پین ودکی مننگ کیک ہرا بدحالی ہتو، او پین پارے کہ پامداری تون درشانی کریسہ بلوچستان نا لس مخلوق ءِ ریلیٹ و سبسڈی تننگ کن گام ارفنگہ تاکن لس مخلوق ءِ اڑزان نرخ آتیٹ غلہ رسینگ کے و فلور ملز انڈسٹری بھس مف۔
