کنا راج
(چارمیکو بشخ)
نوشت: حفیظ شہزاد
دی بلوچستان پوسٹ
“خوانفوک آ ادارہ غاک“
نن بیرہ دا ہد اسکان پاننگ کینہ کہ خوانفوک ادارہ اسکول کالج یونیورسٹی پین پین بھازاک اریر ولے دُن خبر اف انتئے اریر۔ انتئے کہ اگہ دنو ادارہ کس ملِک گڑا اسے مسخت اسیٹی، اسے سوچ اسیٹی، اسے فکر اسیٹی کہ داڑان ہمو راج خنی مرے، دا ادارہ غاتیان جوانو فائدہ ارفے، جہان ءِ پوہ مرے۔
ولے ننا راج ئٹ اگہ اسکول ئسے آن چُنا خواننگ نا بنا ءِ کیک تو مدان مدان اونا ڈُکھ ویل آک ہمو تینا غریبی نا دو آن ہد آن زیات مریرہ۔ اودے حالیت آک انداخس بیوس کیرہ کہ اُو خواننگ تون اوار اوار چُنک سن اٹ اسے وخت کاریم اس کیک کہ تینا ہمو کاپی قلم بستہ یا اسکول نا خواست آتے پورہ کیو۔
حالانکہ ایون چُناتے باوہ غاک کمک کیرہ گُڑہ دافتا زند امر مرو ہرافتے چُنک سنی ٹی باوہ و ایلم اف۔ ہرافک داسکان پوسکن ردوم ئٹی ءُ کہ ہمو ردوم ئٹی اوفتا امیت آک دیر مریرہ چُٹیرہ۔ ولدا اندا چُنک سنی ٹی اندا چناک تینا کوپہ تیا اندُنو باریم اس ارفرہ ہرادے داسکان ننا کماش آک خنتنو۔
سد ئٹی اسے اندنو چُنا اس پیش تمک داکہ ایکہ لُمہ ایڑک کیرہ اودے اندا امیت ئٹ کمک کرسہ کیرہ کہ ننا پگہ کے دا چُنا اسے کمک کار اس مرے۔ خوانک خوانک تینے خواننگ نا ہمو میار اسکان سر کیک ہراڑ اسکان سر مروئی اس تا۔ ولدا ہمو چُنا تینا خواری تون پوسٹ آتیا کوشست کیک نوا اسے سرکاری ءُ نوکری اس رسینگہ۔ ہڑدے نا اخبار آتے وختی اُرک کہ کنا وڑ نا پوسٹ اس برے تاکہ ای کوشست کیو۔ منہ وخت اندا ودار ئٹ تیر مریرہ نا امیت مرسہ تینا دُو ئنا کاریم اس ہم بناء کیک داکہ امیت تا ہم ارے کہ نوا پوسٹ اس برے ای ڈیوٹی آ لگیو۔
وخت اس اندُنو مریک کہ پوسٹ آک بریرہ تو اُرس ہفت پوسٹ بسونے اندا مار امیت آتون تینا زی آ باور کرسہ کائک کوشست کیک۔ انتیکہ اونا مڈول اندُن جوڑے کہ او سرپد مریک کمپیٹیشن ءِ ہرکس جوانو لمبر ہلکونے یا ہرکس خواری کرینے اودے اندا پوسٹ رسینگو۔ کاغذ آتے جمع کیک ولدا اندا ودار ئٹ کہ ہرا وخت ٹیسٹ انٹریوک مرور۔
منہ دے ئٹی بریک احوال تیٹی کہ فلان تاریخ آ ٹیسٹ انٹریو مرو، داخہ بجہ غا تینے سر کیرے۔ ٹیسٹ انٹریو نا خاطر کارہ لُمہ غان دُعا ارفرہ کہ اینو ننا سرسہبی نا دے ءِ۔ ایکان تینا راج ئنا چم و دروغ آتیان واخب افس انتیکہ اوفک تینا وڑ ایلو کُل جہان ءِ سرپد مریرہ۔
کاہک ٹیسٹ انٹریو ایتک پیش تمنگ تون انداخہ خوش ءِ کہ نی پاس اونا پن لسٹ ئٹ بریک۔ ولدا تینے کاریم ئسے آن بٹک اندا امیت اٹ کہ ہرا وخت میرٹ لسٹ لگو کنا پن مرو۔ او اندا تکانے کہ کنا پن بریک۔ اودے تینا زی آ امیت ءِ خواری کُنگونے۔
منہ دے آن پد لِسٹ لگا تو گل و بالی ٹی دا کائک لسٹ نا اُوننگ کے۔ خنک کہ ہفت اندُنو پِن لسٹ ئٹ بسونے ہراتے دیخس ءُ لائخی اس ہم الو۔
ولدا اِرا مُسے گھنٹہ ہموڑے تولک بیرہ افسوز ارمان کیک، ٹک خلیک کہ دا امر مس؟
کُل ادارہ غا تیان مایوس مرسہ اسے تینا اُراغا کاہک اُرا والاک ودار ئٹی ءُ کہ ایلم یا مار برے اسے جوانو احوال اس ہتے۔ مار تون بیوسی مایوسی آن بیدس پین ہچ بچتنے اُو اندا سوچک کہ اگہ اُراغا پاریٹ کنا پِن لسٹ ئٹ بتنے تو اُو کنے انت سرپد مرور۔ او دا تپسہ کہ انت انت پالیسیک ءُ، اسے پوسٹ اخس پیسہ غا سودا مریک۔ او بیرہ تینا چُنا یا ایلُم نا ہمو دیتے اُستا ہتیرہ کہ ہرا وخت لُمہ مزوری کریکہ ہیڑ پُچ گنڈاکہ ایلوتیکن کہ گڑاس پیسہ دُو برے ایلُم ءِ خوانفن۔ اُو اندا امیت ئتون مار نا سرسہبی ءِ تینا مقدر سرپد مسرہ۔
مار نا ملی ئٹ اندا کل گڑاک ئسر اندا سوب آن مایوس ئس کہ اگہ ای پاریٹ او اندا سوچور دا خوانتنے دا بیرہ تینا وخت و ننا پیسہ غاتے پوک کرینے۔
مار اسے اندُنو وختس اُراغا بریک کہ اُو وخت کُل خاچوک مریر کنے کس خنپ۔ تینے اندن انگا وخت اُراغا سر کیک تینا کمرہ ٹی کائک اوغک پِٹک تینا مقدر آ ہرا اودے اسے اندُنو امتحان ئسے آ ایسنے کہ اُونا بیوسی ءِ اللہ آن بیدس پین کس تپک۔ نن ءِ مُچ اوغسہ گدرینفگ تون ایسر ٹی اُونا ملی و اُست اودے اندا فیصلہ ءِ ایترہ کہ نیتون زندہ مننگ نا پین ہچو کسر سلتنے۔ گڑا سہب نا وخت چِٹ اس تفک پنکھا غا تینا زند نا ایسری ءِ ہموڑے کیک۔
سہب ئتون اُرا والاک اُونا مُبارکبادی نا خاطر کارہ اُونا کمرہ ٹی اودے خننگ تون کُل اُرا والاتا وجود ارمان و خوشیک ہموڑے ایسر مریرہ۔ اسے اندُنو کسہ اس بے سوب مریک ہرانا سوب لمہ ہیڑ ایلم کُل ئنا خوشیک تفوک ئسر۔
مار بیرہ تینے دا سوب آن ایسر کرے انتیکہ او اگہ زندہ سلوس تو اُمیت اس ئس ہرانا پورہ کننگ اُونا وس آن تیر مسوسس۔
کنا راج ئٹی اسے دنو کسہ آخہ بلکے ہزار کسہ غاک مریرہ ہرانہ بیرہ وڑ و رنگ آک بدل ءُ۔
دا راج ہمو راج ءِ ہرانا پیسہ و سرمایہ ٹی اخس مُلک سیر کرینو کننگ ئٹی ءُ۔ دا راج ئٹی اگہ کہ کس مفلس ءِ غریب ءِ، مایوس ءِ۔ او بیرہ اندا راج ئنا باتیک ءُ یعنی بلوچ آک ءُ۔
برجاء۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
