اوغانستان نا قونصل جنرل، پاکستان نا وزارت خارجہ ءِ نوشتہ کروک آ چھٹی ئٹ خواست کرینے کہ بلوچستان نا علاقہ مچھ ئٹ مشی آ علاقہ ٹی دہشت گردی نا گواچی مروکا 11 کولا کانڑ مزور کار آتیان مُسٹ نا جوْن آک اوغانستان کن مون تننگر۔

کوئٹہ ئٹ وزارت خارجہ نا کیمپ آفس ءِ 5 جنوری آ نوشتہ مروکا اوغان قونصل جنرل نا چھٹی رسینگانے ہراٹی او تینا شاری تا جوْن آتے وطن کن مون تننگ نا خواست ءِ کرینے۔ او نوشتہ کرینو کہ “اندن نم چارے کہ بلوچستان نا علاقہ بولان، مچھ ئٹ دہشت گردی نا ویل اس مونا بس ہرادے ہڑتوم آ ملک آتا اسٹ آ دژمن کرینے و داٹی مسہ بندغ اوغانستان نا شاری ئسر۔”

او پارے کہ بیران مروکا بندغ آتا خاہوت آک جوْن آتے اوغانستان کن مون تننگ نا خواست ءِ کرینو۔ اوغان قونصل جنرل دفتر خارجہ آن پارے کہ نمے آن خواست کننگک کہ متعلقہ حکام تون حوال کریسہ پن کروکا مسہ جون ءِ چمن نا کسر اسپن بولدک آن اوغانستان کن مون تننگ نا موْکل ءِ ایتبو۔

یاتی مرے کہ 3 جنوری آ بلوچستان نا علاقہ مچھ نا کوئلہ فیلڈ ئٹ عالمی دہشت گرد ٹولی داعش 11 ہزارہ کولا کانڑ مزور کار آتے بیدادی ئٹ تڑیسہ کسفے۔ ویل نا برخلاف کوئٹہ ٹی ہزارہ برادری نا برانز اینو چھارمیکو دے ءِ برجاء ء. پاکستان نا وزیر داخلہ شیخ رشید و وزیر تیتون اوڑدئی نا بے سہبی آن گڈ وزیراعلیٰ بلوچستان جام کمال تون ہم اوڑدئی بے سہب مسونے۔ برانز کروک آک وزیراعظم پاکستان عمران خان نا بننگ اسکان جوْن تا تدفین آن نمن ءُ۔

بلوچ راہشون و بلوچ اسٹوڈنٹس آرگنائزیشن آزاد نا مسکوئی چیئرپرسن کریمہ بلوچ نا گمانی آ خوْن نا بر خلاف جرمنی نا شار گوٹگن ٹی برانز کننگا۔

ٹی بی پی نیوز ڈیسک رپورٹ نا رد ئٹ جرمن صوبہ ندر سگسن نا شار گوٹگن نا علاقہ ٹی نیاڑی، چنا تون اوار بلوچ سیاسی باسک آتا بھلو کچ اس دو تیٹ  پلے کارڈز و بینرز ارفیسہ شار ئنا کسر تیا چرینگسہ کریمہ بلوچ نا گمانی آ خوْن ئنا بر خلاف نعرہ خلیسہ کریر، بلوچ سیاسی باسک آتون ہم کوپہ ئی کریسہ جرمن لیفٹ نا سیاسی باسک، و سندھی سیاسی باسک آک ہم اوار مسر۔

برانز ٹی  بلوچ سیاسی باسک آتون اوار  نیاڑیک و  ایلوفک کریمہ بلوچ ءِ دروت ندر کننگ کن چراغ رژنا کریر، و  برانز کروک آک تران کریسہ پاریر کہ کریمہ بلوچ بلوچستان نا مسڑ و راجی جدوجہد نا بڑز بالاد سنگت اس ئسک اونا خوْن ءِ کننگا۔

او پاریر کہ بلوچستان تون اوار مچ جہان ئٹ رہینگوک آ بلوچ آک و اونا است خواک کینیڈا پولیس رپورٹ ءِ منیپسہ، خوڑتی و سوْگوی اٹ پٹ و پول ئنا خواست ءِ کینا۔

اوفک پاریر دا ویل اس اف بلکن ریاستی خوْن ئسے، ساجد حسین آن گڈ کریمہ نا مرگ و کینیڈا حکومت نا بے پامی اسہ پین سانحہ اس جوڑ مننگ کیک، پولیس تینا ہر وڑ ئنا وسائل تے کاریم اٹ ہتیسہ ڈوہدار آتے پاش کے۔

برانز کروک آک یورپ تون اوار کینیڈا ٹی بلوچ سیاسی باسک آتا رکھ ئنا خواست ءِ کریر، اوفک پاریر کہ بلوچستان ٹی سیاست رکھ خلنگانے، سیاسی باسک آتے زور اٹ بیگوائی نا گواچی کننگ آن گڈ اشتماعی قبر آتیٹ زندہ کڈ کیرا، داسا یورپ و کینیڈا آن بارینگا رکھوک آ ملک آتیٹ پاکستان تینا بد انگا کاریم تے کننگ ءِ۔

برانز کروک آک پاریر کینیڈا حکومت آن خواست کینہ کہ کریمہ بلوچ خوْن ئنا بابت کنڈان چمشانک ہلینگہ، اودے تڑی تننگاسس۔ اوفک پاریر کہ بلوچستان تون اوار جہان نا بلوچ آتا برانز نا لڑ برجا ءِ و ننا اسہ خواست ءِ کہ بلوچستان ءِ انصاف تننگے۔

یاتی مرے کہ بلوچ اسٹوڈنٹس آرگنائزیشن آزاد نا مسکوئی چیئرپرسن کریمہ بلوچ تدوکا سال 20 دسمبر آ کینیڈا نا اسہ شار ٹورنٹو آن بیگواہ مس و ایلو دے اونا جوْن اسہ دیر ئسے آن خننگاسس، بلوچستان تون اوار بھاز آ ملک آتیٹ تدوکا اِرا ہفتہ ءِ برانز نا برجاء ء۔

ہزارہ نسل کشی

ٹی بی پی سرگپ

گدرینگوک آ یک شنمبے نا دے بلوچستان نا علاقہ گیشتری مچھ ٹی سہب ئنا وخت آ کولا مزور کار آک تیوی دے سخت کاریم کننگ آن گڈ مزور کوارٹر آتیٹ دمدری ایسر کننگ ئسر ولے دافتیان بھازا مزور تیکن دا گڈیکو نن جوڑ مس۔

نن نا تارمئی ٹی فوجی پچ بینوک آ گڑاس سلاہ بند ءُ بندغ دا مزور آتا کوارٹر آتیٹی پیہار، و اسے گچین کروک زنک نا مزور آتے چاہنگ آن پد جتا کریسہ اوفتا دوتے تفیسہ خنتے تا ڈی تفیر اوکان پد اسے است ہسون ءُ تدینی اس مس۔ گڑاس تا کاٹم تے سم کاری کریسہ کسفیر ولے گڑاس تا بھاز بے دادی اٹ لخ آن تڑیسہ تڑنگار۔

تیوی یانزدہ مزور ءِ ناحق کسفنگا۔ دا غٹ مزور آتا سیال داری ہزارہ قوم آن ئس۔ ہزارہ قوم نا خوندی آ حق تیکن کاریم کروکا تنظیم آتا پاننگے کہ گدرینگوک آ 2 دہائی ٹی کم آن کم 3000 ہزارہ کسفینگانو۔ داسہ اوفتا چرینگ و پیش تمننگ چنکو علاقہ اسکان سلیسنگے، ہرا کہ ہمت کریسہ روزگار کن پیش تمرہ اوفتے بھاز بے دردی ٹی کسفنگک۔ فروری 2013 ٹی اسے اندنو جہلو سے اٹ ہزارہ قوم آن تعلق تخوکا 91 بندغ کسفننگار و 200 آن گیش بندغ ٹپی مسر۔ دا خونی کسفننگ آن پد ہزارہ آتا بھلو کچ اس ہمپنگ آ بیوس مس۔ ہرافتے کہ کمک اس اوفک آسٹریلیا یا ایلو دے تمنگ ملک آتیا ہنار ولے ہرافتے ہمپ و بٹ نا طاغت الو اوفتے تینا بے گنائی نا سزا رسینگسٹ ءِ۔

ہزارہ قوم زیات تر اسلام نا شیعہ فرقہ تون تعلقداری تخرہ۔ اوفتا کسفنگ نا پد اٹ ام اندا مذہبی جنگ و جیڑہ تا سوب آتے پاننگک، اوفتیا زیات تر جہلو آتا ذمہ واری تے سنی عسکریت پسند تنظیم آک دنکہ لشکر جھنگوی و داعش ایلوفک ارفرہ۔ دا ام دعویٰ کننگ مریک کہ لشکر جھنگوی پاکستانی ڈھکوک ادارہ غاتا “اسٹریٹیجک اثاثہ” مسونے۔ و افغانستان ٹی طالبان آتون اوار “جہاد” ٹی ام اوار مسونے ولے گدرینگوک آ 2 عشرہ آن تینا پن ءِ مٹ کریسہ تینا توفک آتا مون ءِ کوئٹہ ٹی ہزارہ قوم نا پارہ غا کرینے۔

لشکر جھنگوی منہ وخت مست “دولت اسلامیہ خراسان پاکستان” ٹی اوار مسونے، اوکان پد اندا پنٹ کروکا کاروائی تے قبول کننگے۔ یک شنمبے نا دے مروکا جہلو ءِ ام اندا پنٹ قبول کرے۔

وا ام ہزارہ و بلوچ راہشونک دا ہیت آ شک نا درشانی کننگو کہ دا جہلو آک مذہبی فرقہ واریت نا سوب آن ءُ۔ ہزارہ راہشون طاہر ہزارہ 2018 ٹی دی بلوچستان پوسٹ تون ہیت و گپ کریسہ پارے کہ ہزارہ قوم نا کسفنگ بلوچ راجی تحریک آن پام ءِ مُر کننگ کن مننگ ءِ۔ و دا جہلو آک بلوچ آتا برخلاف آپریشن کن کسر ءِ صاف کننگ کن کاریم اٹ ہتنگسہ ءُ۔ او دا دوبہ ءِ ام خلک کہ پاکستان نا قانود رکھکوک آ ادارہ غاک ہزارہ غاتے مروکا جہلو تیٹ اوار ءُ۔

بلوچ آجوئی خواہوک آ سلاہ بند تنظیم بلوچ لیبریشن آرمی نا سرکماش بشیر زیب بلوچ یک شنمبے نا دے پاکستانی ڈھکوک آ ادارہ غاتیا دوبہ خلیسہ پارے کہ او مچھ اٹی مروکا جہلو آ اٹ اوار ءُ۔ او مونی پارے کہ “دشمن ریاست” بلوچ مزاحمت نا برخلاف ہزارہ قوم نا خون ءِ کننگے۔

ولے غٹ آن گوڑیفوک ہیت ہمو حالیت آکو، کہ ہراٹی دا جہلو کننگانے۔ 26 دسمبر آ بی ایل اے بولان ٹی پاکستان نا اسہ فوجی چیک پوسٹ ئسے آ جہلو کریسہ اودے کوزہ کرے۔ دا جہلو آن گڈ پاکستانی فوج ہمو تیوی علاقہ ءِ چارمہ کنڈ آن ہلیسہ اوڑے گن شپ ہیلی کاپٹر آتا کمک اٹ بھلو کچ اسیٹی لشکر کشی برجاء ءِ۔ دا علاقہ ٹی ہزار آتا کچ فوجی کنڈ کنڈ آ اریر ولے داکان ابید ام سلاہ بند بندغ آتا آسراتی ٹی بننگ مزور آتے چاہنداری آن پد کسفنگ پدا فوج نا خنتا مون آن پیش مننگ بھاز آ سوج آتے ودی کیک۔

بلوچستان نا تحصیل مچھ ئٹ کولا کان مزور کار تا بیدادی ئٹ خوْن نا برخلاف ہزارہ مخلوق جوْن تیتون اوار نادرن بائی پاس آ مسٹمیکو دے برانز کننگے۔ تولوک برانز ئٹ چُنا، زالبول و بھلا عمر نا مخلوق اوار ءُ۔

تدوکا دے بجائی وزیر داخلہ شیخ رشید ہم برانز کروک آتون ہیت گپ کن کوئٹہ غا سر مس۔ شیخ رشید نا کماشی ئٹ وفد برانز آ تولوک مخلوق تون ہیت کرے، واہم او بے سہب مس۔

بنجائی وزیر داخلہ شیخ رشید تون ڈپٹی اسپیکر قومی اسمبلی قاسم سوری و صوبائی وزیر آک ہم اوار ئسر۔ برانز کروک آتا پاننگ ئس کہ بنجائی وزیر داخلہ نا سرکماشی ئٹ بروک وفد نا باور کننگ کپنہ۔

برانز کروک آک وزیر اعظم عمران خان نا برانز کروک مخلوق آ بننگ آ برانز ءِ ایسر کننگ نا فیصلہ کریسہ پاریر کہ ہراتم اسکان وزیراعظم عمران خان برانز آ بفک جوْن تیتون برانز برجاء مرو۔

ہزارہ راہشون سید محمد رضا نا پاننگ ئس کہ 22 سال آ ننا خواست ءِ کہ ننے زند ئنا حق تننگ مرے۔ صوبائی حکومت درو زیمی تا رہی آ بروس تو بلکن مخلوق دا است ہسونی اٹ داخس خوار متوکہ۔ ننا خواست ءِ کہ بلوچستان کابینہ دمدستی تون استعفیٰ ایتے۔ بیگواہ مخلوق ئٹ کس اگہ ڈوہدار ءِ گڑا اوفتے عدالت آ ہتنگہ و مچھ تدینی نا پٹ و پول کن جوڈیشل کمیشن نا پڑو کننگہ۔

بنجائی وزیر داخلہ شیخ رشید کوئٹہ ئٹ ساڑی ءِ۔ کوئٹہ بننگ آ حوالکار آتیتون ہیت کریسہ شیخ رشید نا پاننگ ئس کہ وزیراعظم تینا طیارہ ءِ تریسہ کوئٹہ غا کنے رادہ کرے۔ تدینی آ جوڈیشل کمیٹی نا پڑو ءِ کننگٹ، ہزارہ مخلوق ءِ بسٹ رکھ تننگو۔

داکان مالو بنجائی وزیر داخلہ نا صدارت تون مچھ تدینی آ الّمی مجلس مس۔ مجلس ئٹ صوبائی وزیر داخلہ میر ضیاء لانگو، صوبائی وزیرک عبدالخالق ہزارہ، میر سلیم کھوسہ، باسک صوبائی اسمبلی مبین خان خلجی، چیف سیکریٹری بلوچستان کیپٹن ریٹائرڈ فضیل اصغر، ایڈیشنل چیف سیکریٹری داخلہ حافظ عبدالباسط و رکھوک ادارہ تا کوالخواک ساڑی ئسر۔

یاتی مرے کہ بلوچستان نا تحصیل مچھ ئٹ کولا فیلڈ ئٹ 2 و 3 جنوری نا نن دہشت گرد آک گیشتری نا علاقہ ئٹ ساڑی ہزارہ مخلوق نا دے مزور کار تے خن و دو تے ڈی اٹ تفیسہ بیدادی تون تڑنگاسس۔ تدینی نا حوال یک شمبے 3 جنوری آ رسینگا، ہراڑان گڈ بنائی وڑئٹ جوْن تے مچھ ڈسٹرکٹ اسپتال و دوارہ کوئٹہ آ دننگا۔

تدینی نا مقدمہ اِرا دے آن گڈ نوشتہ کننگا۔ مقدمہ ایس ایچ او مچھ پیر بخش بگٹی نا ساڑی مننگ ئٹ نادرست دہشت گرد آتا برخلاف نوشتہ کننگا۔ مقدمہ ئٹ خوْن و دہشت گردی تون اوار ایلو دفعات آتے اوار کننگانے۔

برطانوی عدالت وکی لیکس نا سرکماش جولین اسانج ءِ امریکہ ءِ تننگ نا امریکئی خواست ءِ نمن کرے۔

وکی لیکس نا سرمکاش جولیان اسانج نا امریکہ ءِ تننگ آ برطانوی عدالت فیصلہ بنیفے۔ جولین اسانج آ دئے سال مالو ڈھکوک امریکی فوجی کاغذ شینک کننگ نا دوبہ ءِ و امریکا جولیان اسانج نا دوئی مننگ کن برطانوی عدالت اٹ خواست کریسس۔

لندن نا اولڈ بیلی نا عدالت جولین اسانج نا تننگ کن امریکی خواست آ فیصلہ بنیفے، دا وخت آ جولین اسانج نا مخ تفی ئٹ پئیر کوربن آند بیدس مخ تفی کروک آتا بھلو کچ اس ساڑی ئس۔

جولین اسانج آ جمعی وڑئٹ ہژدہ دوبہ خلنگاسر، جولین اسانج آ کمپوٹر ہیک کننگ و دفاعی معلومداریتے  پاش کننگ نا ہم دوبہ ئس۔

جولین اسانج ءِ بھاز رکھوک ءُ جیل ایچ ایم پی بیلمارش ئٹ تخنگانے۔

جولین اسانج 2010 ئٹ وکی لیکس نا کمک ئٹ امریکی فوج نا 5 ہزار ڈھکوک فائل تے آن لائن شینک کریسس ہرافتیٹ اوغانستان و عراق ئٹ امریکی فوج نا کاروائی تا بابت شابیتی حوال اوار ئس۔

جولین اسانج ءِ اگہ امریکہ ءِ تننگا گڑا اوڑے اودے 175 سال نا سزا مننگ کیک۔

پروفیسر رمضان بامری صدر، سلمان احمد بلوچ کار گشاد گچین مسر۔

کراچی ئٹ سید ظہور شاہ ریفرنس لائبریری نا سال 2021 نا گچین کاریک مسر ہراٹی پروفیسر رمضان بامری صدر، سلمان احمد بلوچ کار گشاد گچین مسر۔ دا گچین کاری تیٹی سرسہب مروکا ذمہ وار آتا پڑو ء گچین کاری کمیٹی نا باسک آک اسحاق خاموش، حمل بلوچ و ہارون بلوچ کریر۔

مونی حوال نا ردئٹ 3 جنوری 2021 یعنی درو نا دے ملیر ٹی سید ظہور شاہ ہاشمی ریفرنس لائبریری نا گچین کاریک گچین کاری کمیٹی نا کماشی ٹی اڈ تننگار ہراٹی غٹ ذمہ وار آک بیدس مون تس آن گچین مسر۔ اندن پروفیسر ڈاکٹر رمضان بامری ارٹمیکو وار کماش گچین کننگا۔ نائب کماش کن اقبال ہاشمی و پروین ناز، کارگشاد سلمان احمد بلوچ، مالی سیکرٹری ظریف محمود، احوال کاری سیکرٹری شرف شاد، آفس سیکرٹری غلام رسول، رابطہ سیکرٹری کامریڈ واحد بلوچ و مجلس عاملہ نا باسک کن نازین بارکزئی، قدیر مجید، عاصم زہیر، نواز فتح، شبیر رخشانی گچین کننگار۔

دا دیوان ٹی مسکوئی کماش و داسہ ولدا گچین مروکا کماش ڈاکٹر رمضان بامری ہیت و گپ کریسہ پارے کہ سید ظہور شاہ ہاشمی ریفرنس لائبریری نا سرسہبی شہید صبا دشتیاری نا تغ ئسے ہراڑکن ننے و نمو غٹ ء دا بابت تینا کڑد ء ادا کروئی ء.

او مونی پارے کہ سید ظہور شاہ ہاشمی ریفرنس لائبریری نا باسک آتیان خواست کہ او تینا مالی و جانی کمک ء کیر تانکہ نن تینا کاریم آتے اندن سرسہبی ٹی مونی دریسہ کین انتیکہ باسک آتا کمک آن ابید نن تینا کاریم تے او وڑ مونی دننگ کپنہ ارا وڑ ننے دروئی تا.

بلوچستان نا علاقہ کوہلو نا پنی آ بلوچی خلقی شئر پاروک میر احمد مری تینا باوہ پیرئی آ علاقہ کوہلو ٹی است ہلنگ نا سوب آن کذیت کرے، او بلوچستان ئٹ چِل سال اسکان تینا فن ئنا درشانی ءِ کرینے۔

میر احمد مری نا  زیمل نا دھن آک نہ بیرہ بنوک آتے چس تسرہ، بلکن  بلوچستان ئٹ تینا گچین آ ہند اس تخیرہ۔ او یک شمبے نا دے است بند مننگ آن کذیت کرے و بھاز آ شہدائی تے تینا مونجھا ہلا۔

پنی آ بلوچی خلقی شئر پاروک میر احمد نا نماز جنازہ اونا باوہ پیرئی آ علاقہ کوہلو ٹی کننگا، ہراڑے  بلوچستان اسمبلی نا باسک میر نصیب اللہ مری تون اوار سرکاری افسر آک، قبائلی راہشون تون اوار بھلو کچ اسیٹ مخلوق اونا نماز جناز ٹی اوار مسر۔

کریمہ بلوچ نا گمانی آ مرگ و بلوچستان نا جتا علاقہ آتیٹ برانز کروک آتے تڑی تننگ نا بر خلاف کوئٹہ ٹی اسہ برانز ئس کننگا، بند و بستی کوالخوا تا کنڈان برانز کروک آتیکن سختی جوڑ کریسہ برانز آتے توننگ نا کوشت کننگا۔

پنی آ بلوچ نیاڑی راہشون و بلوچ اسٹوڈنٹس آرگنائزیشن آزاد نا مسکوئی چیئرپرسن کریمہ بلوچ نا گمانی آ مرگ نا برخلاف بلوچستان تون اوار پیشن نا ملک آتیٹ برانز و مچی نا لڑ برجاہ ء۔

بلوچ یکجہتی کمیٹی نا خواست آ درو ہفتہ نا دے بلوچستان نا دارالحکومت کوئٹہ ٹی بلوچستان نا ایلو علاقہ آک آواران، مند، دشت، نوشکی ٹی پاکستانی فورسز و ڈھکوک ادارہ آتا  کنڈان برانز کروک آتے توننگ نا بر خلاف اسہ برانز اس کننگا۔

کوئٹہ بند و بستی کوالخواک پریس کلب آ ساڑی برانز کروک آتے توننگ نا کوشت کریر، برانز کروک آک پولیس نا تیوہ آ سختی تیان گڈ ہم  ہائی کورٹ نا مونا سر مسر۔

برانز نا راہشونی کروک ڈاکٹر ماہ رنگ بلوچ نا پاننگ ئس کہ کوئٹہ پریس کلب آن ہائی کورٹ اسکان برانز ریکارڈ کروئی ئس ولے بند و بستی کوالخواک ریڈ زون نا نیمون ئٹ ننے توننگ نا کوشست کریر۔

ہائی کورٹ کوئٹہ نا مونا نیاڑی، چنا و خوانندہ آتا بھلو کچ اس دو تیٹ تینا زمزیر و خن تیا مونو ڈی تفیسہ تینا برانز ریکارڈ کریر۔

دا وخت آ ڈاکٹر ماہ رنگ بلوچ تران کریسہ پارے کہ بلوچستان ٹی ریاستی زور ئنا دا حالیت ءِ کہ توار ارفوک آک ٹارگٹ کننگرا نیاڑی تے برمتہ کننگ نا تڑی تننگیک۔

او پارے کہ کوئٹہ ٹی ننا پرامن و سوگوْ آ برانز ءِ پد شاغنگ نا کوشت کرے، اگہ کوئٹہ ٹی دا حالیت ءِ گڑا نم سوج کبو بلوچستان نا مُر انگا علاقہ آتیٹ فورسز انت کننگ کیک۔

او پارے کہ گوادر تون اوار بھاز آ علاقہ آتیٹ برانز کروک آتے تڑی تننگ برجاہ ءِ، ننا  راہشون ءِ شہید کننگ آن گڈ اوفتے لگیک بلوچ چپ مرو۔

او پارے کہ کوئٹہ شار ٹی ہم میڈیا بلیک آؤٹ ءِ ہرا وڑ ننا باہ آ کلف خلوک ءِ، اندا وڑ ہائی کورٹ آ ہم کلف خلینگے، دا اسمبلی نا باہ ئٹ چلیںکگ۔

کوئٹہ ٹی بلوچ یکجہتی کمیٹی نا ریلی ٹی پشتون تحفظ موومنٹ نا مرکزی راہشون آغا زبیر، نیشنل ڈیموکریٹک پارٹی نا سرکماش ڈاکٹر حئی بلوچ، چاگردی باسک حمیدہ نور، وکلاء راہشون خالدہ ضیاء تون اوار جتا تپہ آتیان بندغ آتا بھلو کچ اس اوار مسر۔

بلوچستان نا ضلع کچھی نا علاقہ مچھ ئٹ کولا فیلڈ ئٹ سلاء بند بندغ آتا جلہو ئٹ یانزدہ کانکن بیران و دئے ٹپی مسونو۔

اسسٹنٹ کمشنر مچھ سمیع آغا میڈیا ءِ پارے کہ تدینی ہفتہ و یک شمبے نا نیامئی نن کوئٹہ آن ہشتاد کلومیٹر مُر مچھ ئٹ گیشتری نا ہند آ مس ہراڑے نادرست شدت پسند آک کولا کان ئٹ کاریم کروک کانکن آتیا ہمو وخت جلہو کریر ہراتم اوفک خاچوک ئسر۔

او پارے کہ جلہو کروک آک کوارٹر آتیا ساڑی کانکن آتے چاہنداری آن گڈ جتا کریر و نت دو تے تفیسہ اوفتے تیز آ ازباب آتیٹ بے دادی تون کسفیر۔

اسسٹنٹ کمشنر نا ردئٹ کہوک آتا تعلقداری ہزارہ برادری آن ئس۔

او پارے کہ دا ہند سڑک آن دئے کلومیٹر مُر مش تا تہٹی ءِ۔ جلہو آن گڈ جلہوکروک آک نرار۔ لیویز، پولیس و ایف سی نا ٹیم آک ہند آ سر مسر۔ جوْن تے سول ہسپتال مچھ آ دننگا۔

ایلو پارہ غان تدینی نا برخلاف تدینی آ ہزارہ برادری نا مخلوق برانز ہم کننگے۔

مچھ بلوچستان نا کولا نا مڈی تیان پُر علاقہ ءِ ہراڑے کولا کشنگ کن سد آ کاڑ آتیٹ ہزار آ کانکنک کاریم کیرہ۔ ہزارہ برادری آن تعلقدار کانکن آن بھلو کچ اس ہم داڑے کولا کشنگ نا کاریم ءِ کیک۔ 

یاتی مرے بلوچستان ئٹ داکان مالو ہم مذہبی شدت پسند آتا پارہ غان ہزارہ برادری آن تعلقدار مخلوق ءِ بم تراک و سم کاری کریسہ خلنگ نا تدینیک مریسہ کرینو ہرافتیٹ دا وخت اسکان ہزار آ بندغ آک بیران مسونو۔

ہزارہ برادری آ جلہو تا تدینی تا برخلاف بھلو کچ ئسے آ برانز آک مریسہ کرینو واہم کوالخوا تا باوری آ برانز آک ایسر کننگانو ولے جلہو تا لڑ برجاء ءِ۔