بے کس نیاڑی تیکن شیلٹر ہوم نا ٹہیفنگ، اُرا ٹی بیدادی، سیاہ کاری نا پن آ کسیفنگ نا برخلاف گام ارفنگہ – برانز آن حمیدہ نور و ایلوفتا تران۔

بلوچ یکجہتی کمیٹی نصیرآباد نا کنڈ آن جھٹ پٹ ٹی نیاڑی تے حق تننگ کن برانز و مچی کننگا، ہراٹی حمیدہ نور، ظہیر بلوچ، نورمیمن، حکیم بلوچ، مدیحہ نور، نادیہ، عاصمہ تون اوار ایلوفک بھلو کچ اسیٹی بندغ آک اوار ئسر۔

برانز ئٹ تران کریسہ حمیدہ نور پارے کہ نیاڑی تے حق تننگ المی مسونے، سرکاری و نیم سرکاری ادارہ آتیٹی بشخ تننگ، بے کس نیاڑی تیکن شیلٹر ہوم و دارالامان نا ٹہیفنگ، اُراٹی بیدادی و سیاہ کاری نا پن آ اوفتے کسیفنگ نا برخلاف گام ارفنگ المی ءِ اندن چناتے اسکول نا وڑ ئٹ بنماسی تعلیم تننگے، و نیاڑی تا خواننگ نا حق اکن عمل کرفیر ہراکہ ریاستی ذمہ واری تا بشخ ئسے۔

او پارے کہ نصیرآباد ڈویژن ٹی سردار بہادر خان وومن یونیورسٹی نا کیمپس ءِ ٹہیفنگ ءِ عمل ئٹ اتیر تاکن زیات آن زیات کچ اسیٹی علاقہ آتا مسڑک تعلیم ہلینگ کیر۔

او خواست کریسہ پارے کہ چُنکا عمر نا برام آتے توننگ کن قانود سخت کننگے و اوستہ محمد ٹی گرلز کالج نا بلڈنگ جوڑ کننگے۔

مہر

نوشت: شبیر بلوچ

دی بلوچستان پوسٹ

جواننگا سوچ و مخلصی نا  عمل آن پد مزل نا کنڈ نا خبر مرے یا کوئی رند ، سیخا یا آسرہ اس مرے تو انسان و کنڈا تینا ہر ممکن کوشست ءِ کرسا وختس پند تو وخت اس اُلاخ سے نا کمک اٹ رمب رمب یا بھاز جاہ ایشکامی اٹ ہمو مزل نا کنڈا سر ہلنگ کن تیاری کرسہ کیکک۔ ود نا کسر اٹ انت کہ سختی مرے و کل ودے ود نا گواچن آ کسر آن ہڑسنگ کننگ کپسہ۔ اگر ود گواچنی مزل ءِ پہہ مننگ نا  جوان ءُ نظریہ ئسے نا رندٹ ءِ، ود مزل ءِ سر مننگ ءِ زند نا  اصل مقصد سرپد و ہندا کوشست ٹی مریکک کہ مزل ءِ ہمر دوئی کیو تینے و بروکا تینا مخلوق ءِ فریشان حالی آن  بچفیو۔

بلوچستان نا دھرتی مہر ءِ پوہ مروک، اوکان پد مہر ءِ است دیری اٹ شون تروکا تا دھرتی مسنے دا دھرتی نا زیہا رہینگوکا ہر اسہ بندغ، ساہ دار، خل، مش و بوچ نا جتا و رنگ ئسے جتا جتا زند ءِ ہیل تننگ نا مہر تو اوار کسر ارے۔ و دا کل مہرستان نا وجود نا بشخ ءُ۔

بلوچ ڈیہہ وفا و مہر نا دھرتی مسنے و تینا ہر چنا ءِ دا کسر ءِ نشان ترسہ کرینے مہر ءِ پوہ مننگ اسہ جتاو عمل ئسے ولے مہر ءِ مہر اٹ ودی مروکا جوان پوہ مننگ کیکک۔

مہر لس مفک کہ اِرغ دِیر یا ایلو آتیانبار بدل مرسہ کے۔ مہر اسہ خواست اس ہمو وخت ارے کہ نن بے مہر ودی مرین داتو مننگ کپپک ولے وجود نا بشخ ئسے، خواست نا لوز گڑا کم وجود نا بشخ زیات کاریم اٹ ہتنگک۔ و وجود زمین ءِ و زمین کل وفا و مہر آتیان برڑ انگا مہر ءِ۔ زمین گواچن آ وجود ءِ و وجود نا مرکز ءِ ہرا مہر ءِ اسہ جاہ سلنگ کہ بیوس کپک ولے انداخہ مہر ءِ مہر نا معیار ءِ بڑز کیکک کہ پین وا پوسکنو خواہش وختس مفک و داخہ در مہر نا تہٹی ہننگ کہ قبول کننگ نا ایسری حد ءِ سر مروئی مریکک۔

شاید کہ عملی جہان ٹی دا بیرہ ہیت و ایلو ہیتاتان بیدس ہچ مفس انتئے داڑے ہر کس تینا خواست نا خاص اٹ مہر ءِ اُرک۔ مہر ءِ بدل کننگ کہ جتاو بہانہ و سوب اس پٹنگ نا رند اٹ مریکک تو قبول کننگ مشکل مریکک کہ امر اسہ بندغ سے داخہ در قبول کیو کہ اوڑان بیدس پین کس نا خیال ام مف۔ دا ضد مف اگہ قبولیت مرے تو بھاز آسان ءِ۔

زمین نا مہر تو اندنے کہ ہراڑے ودی مرین و جاگہ ننا مہر نا ردئٹ اسٹ مریکک تو انتئے ننے ودی مروکا ڈیہہ کل ڈیہہ تیان زیات دوست بریکک و ہمو ڈیہہ نا رند اٹ تینے مِش کننگ کہ ہم تیار مرینہ زمین نا مہر اگر بندغ نا مہر ءِ ودے بدل کننگ کہ قبولیت نا ذہن ٹی ہم مفک حالانکہ زیبائی نا معنی ءِ جہان نا خن ٹی اُرس تو نا زمین آن بیدس پین جہان ٹی مچ زیبائی مریکک ولے نیکہ زیبا نا جند نا وجود نا مرکز مریکک تو وجود نا مرکز ءِ و نا تہہ اسکا پوہ مننگ کہ ہمو قبولیت مریکک ہراد نا سوب آن نا جند نا وجود نا ہر گڑا مریکک چاہے بارن پالن مرے ڈھکال و بشام ولے نیکہ کل آن زیات نا جند نا وجود نا مرکز مریکک۔

تو اندن اگر محبوب بندغ ہم زمین نا خاسٹ یا دن پان نا جند نا وجود نا خاسٹ خڑک مرے نے آن تو ود آن بیدس زیبا ءِ گوکہ نظر تو برو ولے قبولیت نا سوچ و حد ءِ سر مننگ کپرو اخس محبوب نا نیکہ و نی اخس تینا محبوب کہ محبوب اس۔

مہر نا شکل و صورت ایلو کبینی سبکی تو ہچ کاریم اس مفک مہر بس مس تو مریکک مہر کس نا مال دولت شان شوکت نا محتاج اف اسہ انسان سے آن ہلیس کہ بوچ درخت کل تو مہر نا جتا جتا ءُ رنگ مننگ کیک ولے مہر نا پیدا مرو کا روتہ اسہ نا اسہ جاگہ آ اسہ جاہ اندن مریکک کہ اوکان جتا کننگ نا تا کس سوچ ہم خلنگ کپک۔

مہر لپوسی نا علامت مس تو او مہر کم جوفہ زیات مریکک گڑا جوفہ پورا مس تو مہر مدا مدا مُری نا کسر نشان ترسہ کیک۔ مہر نا لوز اندا خاطرا آزموندہ کرینن کہ مخلوق اندا جوفہ ءِ انتئے مہر سرپد مریک۔

لمہ وطن مرے یا محبوب یا خدا ہرا وخت و تا یامٹ پین مہر تروکاتا تا مہر استے دیر کرے تو و است نا خواہش اس مریکک کہ پوسکنا مہر ءِ تینا مہر تروکا تے جاگہ ایتک۔ و وخت دن پاننگ کینہ کہ ننے اسل و بندغ، سہدار یا زمین تو مہر مننگ کپک کہ ننا مہر بدل مرسہ کے۔

مہر نا رنگاک بھاز جتا ءُ و مہر اسہ اندنو جہان ئسے کہ اود نا ہر رنگ نا جتا و زند ئسے ولے بھاز جاہ لپوسی مہر ناعلامت مفک و نقصان ہم ایتنگ کیکک۔ و مہر ءِ بدنام ہم کننگ کیکک۔ و مہر کم خواست زیات مریکک نن مون پہ مون تینا خواست ءِ کس ءِ پاننگ کپنہ تو مہر نا پن ءِ بدنام کینہ و خواست ءِ ہلنگ آن پد و مہر تروکا آن مر مرسہ کینہ۔

مہر اسل رنگ ءِ زند نا، مہر وفا ءِ و مہر ہی فنا و فدا نا درجہ ءِ ایتک۔ مہر ہی مریکک ہرانا زند نا مقصد ءِ تینے مِش کننگ اس کا جوڑ کیک۔ ہمو مہر ہی اسل مہر ءِ گڑا ثابتی اٹ ہمو مہر اٹ رہینگنگ ہی مہر نا اصل تعریف مننگ کیک۔

مہر ءِ ضد اٹ توننگ نا جاگہ غا قبول کروئی مریکک، قبول کننگ اندن کہ اونا ہر ہر زرہ نا تہہ اسکا ودے پوہ مننگ نا کہ گڑاس جوفہ اسٹ تو گڑاس ایلو آن و گڑاس ءِ نا انتظار اٹ زند ءِ مچ گزریفنگ۔

پین جاگہ تا مہر آن اوخس  واقف افٹ ولے لمہ وطن اسہ سبخ اس تسنے کہ مہر ءِ قبول کر کل جاہ تا کل نا زیبائی ءِ قبول کر، کل تو جوان رہینگ ولے نیکہ فنا و فدا مروکا بندغ، خیال یا زمین یا نا وجود نا بشخ اسٹ مریکک۔

مہر لکھنگ اٹ واضح مننگ کپک مہر ءِ پوہ مننگ کہ جواننگا عمل نا جہان نا بشخ جوڑ مروئی تمک اوکان پد خلوص وار مرے اتون تا تو و پین سوگہو کننگ مریکک اوکان مستی اگہ جوانو خیال اس وار مرے تو و سوگہوی ءِ کس پرغنگ کپک دا کل نا مننگ آن پد فدا و فنا نا درجہ ملنگ کیکک۔ فدا مننگ ہیت اٹ مفک و ہیت کننگ اٹ کس فدا مفک خیالی جہان آن پیشن ہم جہان اس ارے ہرادنا تہٹی اسل مہر ءِ ہراکان پدا محبوب زمین و نظریہ بدل مفک چاہے یا مٹ انت کہ لالچ و خواست مرے یامٹ انت کہ پین ہیت مرے کسر اسٹ و ہمو کسر نا کاریم تیکن سہب شام وضو تو سلوئی تمک ہراد نے پین کنڈ آتیا لپوسی آن بچفک ہم و مستی کل کہ کسر یلہ تیکک۔

بھاز جاگہ آ دن خوڑت سلینگ ءِ ضد پارہ ولے اگہ دا مثبت ءُ ضد ئسے تو انقلاب اندادے و اندا بدل کننگ کیک۔ است خلکنی جوانو عمل سے انسان دوستی نا علامت ءِ ولے کسر نا جواننگا خبر مرے مزل خبر مرے مزل وجود مرے مہر و مزل اسٹ مریر تو مہر و مزل ایسکا زندہ اُس بدل مننگ کپسہ ہرا وخت روح بچا تو بہ تاریخ نا بشخ جوڑ مننگ کیک۔

امر کہ ارے او ڈغارے کنا

نوشت: حفیظ شہزاد

دی بلوچستان پوسٹ

تینا خاک  تینا مِش تینا ڈغار تون مہر کروک ہرکس  مریک ولے گڑاس بندغ اندن ءُ ہم اریر ہرا تینا ڈغار نا مِش و تینا خاک ءِ تینا وجود تکرہ۔ ہرافتیٹ اندا احساس ارے کہ دا خاک ہرا شہیداتا خاک پاننگک ہرا خاک اکن ننا ورناک تینے ندر کننگ ءُ بھلو وخت ئسے آن  اینو اسکان ندر مننگ ءُ۔

ای امو ڈیہہ ئنا مفکر ئسے نا ذکر ءِ کیوا ہرانا پن شرفدار حمید عزیز آبادی ءِ، ہرا ہچ ءُ سفت ئسے نا محتاج اف ولے امو احساس و امو استخوائی تینا کسر شون کہ گڑاس نوشت کننگ تینا حق و فرض سرپد مریسہ امو جوزہ غاتے اُست آن دوی اسکا ولدا قلم نا نوک آن کاپی نا پنہ غاتئے نوشت کننگ ءِ بِناء کرے۔

کہ لگوک ءِ  ہر جاگہ آ خاخر زراب
امن  کن  اروک ءِ  کنا   دا ڈغار

تینا  ڈغار تون میر کروکا  آبادی صاحب تینا عنوان و ٹائٹل تون اوار تینا غزل آتیٹی ہم امو ڈغارے نوشت کرینے  ہرا جنون ہرانا زباد اونا ہر شعر آن پیشن مریسہ مُچا راج ءِ  پلویڑ کیک:

پند برجاہ   لڑ مُستی  روان
عاشق آتہ  قافلہ   مُستی  روان

واپسی نہ  کُل  کشتی تے  اوشن
مسونے   دا  فیصلہ   مُستی روان

تینا مخلوق و تینا ورناتے جوزہ بشخسہ اندا کلہو ءِ درشانی کرینے کہ نُما پند خواریک نُما امو میہر ءُ عشق نا کسہ آتے بیان کیرہ کہ  دا فیصلہ ننا بُن پیرہ غاتئے کہ کشتی ءِ اُشبو ولدا بروئی اف منزل اسکا سر خلوئی ءِ:

لُوچ لنگڑ  خوار زار  آتا وطن
لُمہ نا  اے گُم  گار  آتا  وطن

سیا انگا  جمرّ تفوک ءِ کاٹم آ
سیل نا نن گُگ تہار  آتا وطن

                                                   *

سرزمین نا  کنا  اَر چُنا نت شپاد
بے گڑر بینگُن  ءِ خوار زار انتظار

ای ئسے دڑد ئس باز کُڑمبی ئٹ محسوس کیوا  ہرا  عزیز آبادی صاحب استا اُست ئٹی ارے یقیناَ شاعرے راج ئنا آدینک اندا وجہ غان پارینو کہ اُو تینا راج ئنا ڈکھ فریشانی لنگڑی ملاسی تا کسہ غاتے امو سامراج اسکا  سر کہ ہرا ننا پیہن و خیسُن تا نیام ئٹ ننے لوچ و لنگڑ تخانو۔

محترم تینا فکر نا کُڑمبی ءِ بیان کرسہ راج ئنا باتی تیان سوج ئس کرینے کہ:

نے لُوچ لنگڑ  شپاد  لکھیو
ہرا تم اسکان  پراد  لکھیو ؟

قوم ئنا ورنا امیت ءُ جوزہ غاتے  ہرا وخت اسکان خاچوک ہلوس بے وخت ئس نن پارینا کہ نوجوان تیٹی علم نا کمی مسونے  پُہہ متنو داسہ شُکرے خنی مسورے زانت و تعلیم آن واخب مسورے داسہ ہم نن نُمے لوچ لنگڑ شپاد لکھن یا دا شپادی ءُ لنگڑی ئے ایسر کیرے؟

تینا دھرتی نا باتی تا دڑداتے  آتے خن تیٹی خننگ آن پد اُست نا لار ءِ کشیسہ نوشت کرینے:

اُشیسہ نی   کنے یکا   خلیسہ  نی کنے کاسہ
کنا دا اُست ءِ نادان آ بلوچستان سمجھانُس

                                     **

راج ئنا ئسے اندنو بیوسی و لاچاری ئس مونا ایسُنے ہرا ننا مخلوق نا ہر بندغ تون مرسہ کرینے و مننگ ئٹی ءِ ہرادے بیوس آ راج ئنا باتیک چُپ چُپ گدریفنگ ئٹی ءُ:

کنا  خلق ئٹ کنے  پاہک
ہرادے  نا  شناختی کارڈ

یقیناَ دا اُست نا امو لارے ہرادے ہر بندغ محسوس کیک ولے امو خُلیس و بیم آن کشنگ کپک تا ولے شاعر آدینک مرسہ نشان ایتک۔ ایلو راج ئنا شاعر تون مخاطب مرسہ پاہک:

معتبر دانشورے شاعر ولے
جونی آتے راج ئنا دستار کیک

نی راج ئنا سفیر اُس روشن آ چراغ اس ولے امو خونی آ سردار نا حیثیت ءِ ایتسہ؟

ہسمفر  ہورہ  و  گروک آتا
کانہ نن مون آ اے بروک آتا

نم بفیرے   نما  خدا حافظ
انتظار اف  ننے سلوک  آتا

وطن تون مہر کروکا شاعر تینا راج ئنا غازی تون مابت نا درشانی راج ئنا باتی تون کریسہ پاہک نن ہورہ گروک آتا امو کڑد آن خوش ہرادے او برجا تخانو نن یکا اوفتا کڑدئے جوانو نظر ئسے ئٹ اُرانن اُو ارون نن کسر شون آ سنگت آکو پارینے نم بریرے یا بفیر نن اوفتا بخیر آ ضرور کانا۔

وطن نا شاعر حمید عزیز آبادی صاحب نا پین کتاب آک ہم شنک مسونو ایلو کتاب آک کنا نظر ان گدرینگتنو دا کتاب ءِ ہراتم ای خواناٹ کنے اندا احساس مس کہ آھو وطن تون مابت کروک ءُ شاعر داسکا ارے ہرا تینا خیال سوچ و فکرے بیرہ وطن کہ وقف کرینو ہراتے ہچو وہم و خلیس ئسے نا چُڑت اف ہراک بیرہ تینا قلم نا نوک ءِ وطن کہ سدخہ کرینو حمید عزیز آبادی صاحب کن مون مسُستی دعاگو اُن کہ اونا قلم پین اندن ءُ موتی ئتے ہراتا خوشبو آن کنا ڈغار نا وجود ترو تازہ سلے۔ اسہ نظم اسیتون تینا ہیت آتے ایثر کیوہ:

اے کنا لمہ وطن نے انت پاو؟
نے ہرا پن تیٹی ای نازفیو پا
یا نے نوشت کیو پارخمار آتا وطن
یا سفت ئٹ پاو نے کوہ ہسار آتا وطن
زیبا وطن یا نے نوشت کیو
گم گاراتا وطن؟

کوئٹہ نا علاقہ سریاب روڈ آ سم کاری آن بندغ اس بیران مس۔ تدینی سریاب روڈ طارق ہسپتال نا خڑک آ مسونے۔

ایدھی نا پاننگے کہ دُز آتا سم کاری آن کرانی روڈ آ ہندی آ سعید عمر کھیازئی نا ہژدہ سالہ آ مار سعید طارق تدینی ٹی بیران مسونے۔

یاتی مرے درو مستونگ ئٹ سم کاری نا تدینی ئٹ ورنا اس ٹپی مسوسس۔

حوال تا ردئٹ کھڈکوچہ تحصیل نا رہی آ نادرست بندغ آک پرچون نا دکان آ سم کاری کریر ہراڑا جاوید شاہوانی پنی آ ورنا ٹپی مس، اودے غوث بخش رئیسانی ہسپتال آ دننگا۔

دائسکان ہڑتوم آ تدینی تا سوب آک سما تمتنو۔

اِرا ہزار بیست نا نوبیل داد کن پن کروک امریکئی شاعرہ لوئیز ایلزبتھ گلک کیمبرج میساچیوسٹس امریکہ ئٹ تینا اُراٹی اسہ سادہ و چُنک مجلس اسیٹی تینا نوبیل داد ءِ دوئی کرے۔

کووڈ نوزدہ نا بیم نا سوب دا سال نوبیل داد کٹوک آتے داد ءِ اوفتا اُرا تیا تننگ مریسہ ءِ، اندن آن لائن مجلس الفریڈ نوبیل نا سال دے آ دئے دسمبر آ ہڈ تننگو۔

سویڈش اکیڈمی نا سیکریٹری داد نا پڑو ءِ کریسہ پاریسس کہ دا داد اونا داشمندی آن پُر شاعرانہ آ توار کن ءِ، ہرا پلویڑ کروک زیبائی ئٹ بندغ نا وجود ءِ آفاقی کیک۔

گلک 1943ء ئٹ نیویارک ئٹ ودی مس، اونا پیرہ، بلہ نا تعلقداری ہنگری نا یہودی خاہوت آن ئس ہرافک امریکہ غا ہنپیر، گلک نا باوہ خاہوت نا اولیکو بندغ ئس کہ ہرانا ودشت امریکہ ٹی مس۔ گلک نا لمہ ویلسلے کالج آن گریجویٹ ئس۔ گلک پائک کہ چنکی ئٹ اونا لمہ باوہ اودے یونانی اساطیر نا تعلیم تسر و گلک چنکی آن شاعری نا بناء ءِ کرے، او دا وخت ییل یونیورسٹی ئٹ انگریزی نا پروفیسر نا دروشم ئٹ خدمت آتے ایسری تننگے۔ شاعری تون اوار اونا شاعری نا بابت نوشت آتا کتاب آک ہم شینک مسونو۔

اونا شاعری نا اولیکو کتاب “فرسٹ بورن” 1968ء ئٹ شینک مس و 1993ء ئٹ اونا کتاب “دا وائلڈ آئرس” کن اودے پلٹزر داد تون شرف بشخنگا۔ 2014ء ئٹ گلک نیشنل بک داد ءِ کٹا۔ گلک نا دا وخت اسکان شاعری نا دوانزدہ مجموعہ شینک مسونو۔ اکیڈمی نا باسک اندرز اولسن’ گلک ءِ ایملی ڈکنسن تون ہم گرنچ سرپد مریک۔ 2016ء ئٹ صدر اوباما’ لوئیز ایلزبتھ گلک ءِ “نیشنل ہیومینیٹز میڈل” ءِ تس۔ 2003 ئٹ ہراتم گلک ءِ امریکہ نا پوئٹ لاریٹ پن کننگا تو اوڑان سوج کننگا کہ نا خوانوک آتا کچ زیات مرو گڑا نی امر محسوس کروس؟ گلک پارے “خوانوک و بنوک آتے زیات کننگ تون کنے ہچو ہڷ تس اس اف، و ای تینا اروک آتے “کم، بیدار و پرجوزہ دوست تخیوہ۔”

گلک 1993ء ٹونی موریسن نا نوبیل داد آن گڈ اولیکو امریکی زالبول ادیب ءِ ہرا دا داد ءِ کٹانے۔ نوبیل داد نا 120 سالہ تاریخ ئٹ لوئیز ایلزبتھ گلک شانزدہ میکو زالبول ءِ۔ داڑان مُست نوبیل داد ءِ کٹوک زالبول تا پنک دادو:

1909ء سیلما لیگرلوف (سویڈن)
1926ء گرازیا ڈلیڈا (اٹلی)
1928ء سگرڈ انڈسیٹ (ناروے)
1938ء پرل ایس بک (امریکہ)
1945ء گبرئیلا مسٹریال (چلی)
1966ء نیلی ساخس (جرمنی-سویڈن)
1991ء نڈائن گورڈیمر (جنوبی افریقہ)
1993ء ٹونی موریسن (امریکا)
1996ء وسلاوا سزمبورسکا (پولینڈ)
2004ء الفریدی جیلینک (آسٹریا)
2007ء ڈورس لیسنگ (برطانیہ)
2009ء ہرٹا میولر (رومانیہ-جرمنی)
2013ء ایلس منرو (کینیڈا)
2015ء سویتلانا الیگزووچ (بیلاروس)
2018ء اولگا توکارچک (پولینڈ)
2020ء لوئیز ایلزبتھ گلک (امریکہ)

بلوچستان نا علاقہ اورماڑہ، ہرنائی، و بولان ئٹ روڈ شکست آتیٹی، مُسہ بندغ بیران و 4 بندغ ٹپی مسونو۔

احوال آتا رد ئٹ گوادر آن اورماڑہ ہنوک آ پک اپ سبزی تیان پُر ئس، ٹائڑ ترخنگ نا سوب آن ماکولہ نا خڑک کلٹی مس، گاڑی ٹی سوار گوادر آن تعلقدار کریم بخش تینا اِرا مار اتون اوار ٹپی مس، ہرافک دمدستی وڑ ئٹ ٹراما سینٹر آ سرکننگار۔

اندن لیویز کوالخواہ تا پاننگ ءِ بولان ٹی درینجن نا خڑک چھڑک نا ہند آ اِرا گاڑی تینپتین ڈک لگانو ہرانا سوب مُسہ بندغ غلام رسول، عزت اللہ و محمد گل ہند آ بیران مسر اندن چار بندغ محمد عمر، نور اللہ، مسلم خان، محمد ایوب ٹپی مسر۔

لیویز جون آتے ٹپی آتون اوار ہسپتال سرکرے ہراڑے المی کاروائی آن گُڈ جون آک خاہوت آتا دوٹی تننگار اندن بھاز ٹپی آک کوئٹہ آ رادہ کننگانو۔

پین حوال ئسے نا ردئٹ ہرنائی آن کوئٹہ آ ہنوکا ٹماٹر آن پُر ڈاٹسن شاہرگ نا علاقہ امبو نا ہند آ ٹرک تون ڈک لگانے، ہرانا سوب ڈاٹسن ڈرائیور بھاز ٹپی مسونے۔  ٹپی ڈرائیور نا تعلقداری ءِ زیارت آن پاننگ ءُ، ہرا دمدستی وڑ ئٹ ہستپال آ سرکننگانے۔

یاتی مرے بلوچستان ئٹ روڈ شکست نا ویل آتیٹی ہردے بھاز آ بندغ آک ٹپی مریرا و بھاز آک مرگ نا گواچی مریرا۔

تدوکا دے دارالحکومت کوئٹہ ٹی نواں کلی محافظ کالونی نا ہند آ دیر ئنا ٹینکر ٹریکٹر کشکا یلہ مس ہرانا سوب آن اِرا ایڑ و ایلم 18 سال ئنا احمد اللہ، حاجی اکرم کاکڑ نا مار و 6 سال ئنا بی بی عاصمہ، حاجی اکرم کاکڑ نا مسڑ مرگ نا گواچی مسر۔

بلوچستان ٹی روڈ شکست نا ویل آتا اسہ بھلو سوب ئس بھلا روڈ آتا سنگل مننگ ءِ پارا اندن ڈرائیور آتا کنڈان ٹریفک قانود آ عمل کپرنگ ہم دا سوب آتو اوار ءِ، اندن حکومت قانود آ عمل کرفنگ آ بے سوب خننگک۔