عکس منتواری تون: کارلوس زورتوزا
دی بلوچستان پوسٹ ءِ حوال رسینگانے کہ بھاز آ بلوچ آک، ہرافک بلوچستان نا ساڑی آ حالیت آتیان بیوس مریسہ افغانستان کن لڈ و ہنپ کرینو، داسہ بیم بش کروک کچ اسکان بے رکھئی تون مون تننگ ءُ۔
گیشتری حوال آتا رد ئٹ، بلوچستان ئٹ برجاء آ جنگ بھاز آ بلوچ آتے بیوس کریسہ باہوٹی مننگ کن افغانستان ئٹ لڈ و ہنپ کرفینے۔ افغانستان جہان ئٹ بلوچ آتا بھلا آباتی ءِ جاغہ تسونے ولے دا بلوچ آتے بیم بش کروک کچ ئسے اسکان بے رکھنگ تون مون تروئی تمنگ ءِ و اسہ بیوسی، بیدادی و جبر ئنا زند اس مونی دننگ ءُ۔
بندغی حق آتا تنظیم آتا پاننگ ءِ کہ بلوچستان ئٹ بغاوت نا پنچمیکو چُلک نا سوب آن ہزار آک بیگواہ مسونو، ہزار آ جشوک آ جون آک جتا آ علاقہ تیٹی تموک خننگانو۔
پاکستانی فورسز آتیا دوبہ ءِ کہ او بلوچستان ئٹ برجاء جنگ ءِ تورنگ کن سخت ءُ گام ہرفنگ ءُ و دا کاروائی تا سوب آن جنگ زدہ آ علاقہ تیان ہزار آ اُراک سندھ، دیکی بلوچستان (ایران) و خاص وڑ ئٹ افغانستان کن لڈ و ہنپ کننگ ءُ، و داسہ ہم ہزار آتا کچ ئٹ بلوچ آک افغانستان ئٹ زند ءِ گدریفنگ ءُ۔
بلوچستان و افغانستان بیرہ اوار ءُ سیم اس تخپسہ بلکن سدا سال متکن ءُ تاریخ اس ہم تخرہ۔ تیوہ تاریخ ئٹ، ہراتم ہڑتوم آ ملک آتے اسہ سختی سوری سیتون مون تروئی تمانے، گڑا آجوئی تون اسٹ ایلو نا ملک ئٹ باہوٹ ہلکنو ولے ٹی بی پی ءِ حوال رسینگانے کہ تدوکا منہ سال ئٹ، خاص وڑ ئٹ اشرف غنی نا دور ئٹ بلوچ باہوٹیک برجاء بیدادی، بیوسی و بے رکھنگ آن گدرینگسہ ءُ، باہوٹیک زیات ڈھکوک آ ایجنسی تا جلہوتا گواچی مریرہ۔
ٹی بی پی ءِ رسینگوک گیشتری حوال آتا رد ئٹ، افغانستان نا اِرا صوبہ، نیمروز و قندھار ئٹ بلوچ باہوٹی تا اسہ بھلو کچ اس جاغئی ءِ، و اندا باہوٹیک پاکستان نا ڈھکوک آ ادارہ تا پارہ غان بھاز وخت کسفوک جلہو تا گواچی مننگ ءُ۔ باہوٹی کارڈ نا مفرنگ نا سوب آن بلوچ باہوٹیک ہروخت افغان فورس نا پارہ غان سرسوج و بیدادی تیتون مون ایترہ۔
رسینگوک آ حوال آتا رد ئٹ، اسہ بلوچ باہوٹی خاہوت اس نیمروز آن پیشن علاج کن سفر کننگ ئٹ اس کہ نیام کسر آ افغان فورسز تا پارہ غان تورنگا، دزگیر مرسہ اوفتا گڑاک زوراکی ئٹ پلنگار۔
ٹی بی پی بلوچ نیشنل موومنٹ نا حوالکار سیکرٹری دلمراد بلوچ تون حوال کریسہ بلوچ باہوٹی تا حالیت آتا رد ئٹ سر سوج کرے۔ او پارے کہ بلوچ آتا بھلا کچ داسہ افغانستان ئٹ جاغئی ءِ ولے نہ اقوام متحدہ، نہ ہائی کمشنر باہوٹی تیکن، و نہ ایلو انٹرنیشنل ریفیوجی تنظیم آک بلوچ باہوٹی تا ویل آ پام تننگ ءُ، و نہ کمک نا دو ءِ مونی کننگ ءُ۔
دلمراد بلوچ پارے کہ افغانستان تینٹ تدوکا چار دئے یک آن اسہ بے رحم ءُ جنگ اسیٹی ڈب ہلوک ءِ۔ پاکستان نا ظلم و بیدادی، سدا بلوچ آتے بیوس کرینے کہ تینا اُرا و جائیداد ءِ ہلیسہ افغانستان کن لڈ و ہنپ کیر۔
او پارے بے رکھنگ و زرگزرانی نا سختیک بھلا ویل آک ءُ کہ بلوچ باہوٹیک اوفتیتون مون تننگ ءُ۔ بلوچ باہوٹیک اقوام متحدہ ئٹ رجسٹر متنو و اوفتے ہچ وڑ نا آسراتی دوئی متنے۔
بی این ایم نا راہشون پارے بلوچ باہوٹی تے سخت انگا حالیت آتیتون مون تروئی تمنگ ءِ، اوفتے نئے جوانو کُن خور رسینگک، و نئے اوفتا چناک بنماسی تعلیم دوئی کننگ ءُ۔ دلمراد بلوچ پارے تاکہ بلوچ آتے اوفتا بندغی آ حق رسینگتنے، اوفتا بروکا و تدوکا وخت ئنا حالیت آک برجاء بے یخینی ئٹ مرور۔
ٹی بی پی سلام صابر تون افغانستان ئٹ باہوٹ ہلوک آ بلوچ آتا بد آ حالیت نا رد ئٹ ہیت کرے۔ صابر پارے کہ ہر ملک ئنا تینا مفاد آک مریرہ کہ ہر وخت بدل مریرہ، نن دا ہیت ءِ مون آ تخن کہ افغانستان تینٹ جنگ ئٹی ڈب ہلوک ءِ و دننگا ملک ئٹ زند ئنا حالیت ہر وخت بے رھکوک و بے یخینی ءِ۔ کل آتیان مست، بلوچ آک اشرف غنی نا حکومت آن ہچ وڑ نا امیت تخپس انتیکن اونا حکومت بلوچ باہوٹی تا حالیت ءِ پین بدحال کرینے۔
صابر مونی پارے کہ بلوچ سیاسی تنظیم آتا اولی زمواری اندادے کہ اقوام متحدہ نا پام ءِ بلوچ باہوٹی تا بد حالیت نا پارہ غا کیر۔
