شعور کسپک

کرک نی گٹو
نی خن تے کشہ
نی بےگوہا کر
نی بے ارا کر
نی بے چنا کر
نی کیسہ پورو کہ دشمنی نا
دا ہر سے گرجء
چناے چاسہ،نہ پیرو بزگ
نہ چاسہ نیاڑی تا ننگ او عزت
نن ہم تو چانہ ارینے طاقت
کہ نا دا طاقت تو اچس افک
کہ مون آ سوگو ضمیر اسے نا
خلیسہ نی بس شعور اسے آن
نی مرگ ایتہ دا بندغ آتے
شعور کسپک

یوسف عجب بلوچ

محکمہ موسمیات نا رد ئٹ بروکا 24 سائت ئنا نیام ئٹی بلوچستان نا بھاز آ ضلع آتیٹ مُد یخ و بارن مننگ نا گمان ءِ۔

گیشتر حوال تا رد ئٹ بلوچستان نا دارالحکومت کوئٹہ تون اوار بھازا ضلع آک زیات یخ ءُ، اندن بروکا 24 سائت ئنا نیام ئٹی بھاز ضلع آتیٹ مُد یخ و بارن مرو۔

محکمہ موسمیات نا پاننگ ءِ کوئٹہ و قلات ٹی یخ ئنا کچ 2 ریکارڈ، زیارت ٹی 4، گوادر ٹی 7 ڈگری سینٹی گریڈ، سبی ٹی 4 اندن نوکنڈی ٹی یخ ئنا کچ 5 ڈگری سینٹی گریڈ ریکارڈ کننگانے، ایلو کنڈان کوئٹہ ٹی تئو ئٹی نمبی نا کچ 20 فیصد، گوادر ٹی 41 فیصد، سبی 29 نوکنڈی ٹی تئو ئٹی نمبی نا کچ14فیصد ریکارڈ کننگانے۔

مستونگ برانز ئٹ چُنا و زالبولک ہم اوار ءُ۔ ہراف بھلا کسر ءِ بند کرینو۔

بلوچستان نا ضلع مستونگ ئٹ کلی چکل کلوزئی نا مخلوق گیس نا آسراتی تا مفرنگ آ برانز کننگے، مخلوق برانز کریسہ کوئٹہ کراچی بھلا کسر آر سی ڈی ءِ ہر وڑ ئنا اِن و بر کن بند کرینے۔

علاقئی حوالکار تا ردئٹ چُنا زالبولک ہم برانز ئٹ اوار ءُ ہرافک کسر آ خل کسیسہ بند کرینو۔ کسر بند مننگ نا سوب آن گاڑی تا قطار لگانے۔ دا وخت اسکان ہچو حکومتی کوالخواہ اس مخلوق تون اوڑدئی کن بتنے۔

یاتی مرے سیڷ نا بننگ تون بلوچستان نا جتا علاقہ تیا برانز ہم بناء کیک۔ زیات مخلوق گیس و بجلی نا آسراتی تیکن برانز کیک۔

پڑو ادبی کچاری نا اسہ خاص ءُ اجلاس اس پوسکنا سال 2021 نا نا رد ئٹ چیئرمین سعید نور نا صدارت ٹی پڑو ادبی کچاری نا آفس ئٹ ہڈ تننگا، اجلاس ٹی “وائی سی ایس ایف” تون اوار پوسکنا سال ئنا بننگ نا خوشی ٹی “کتاب میراث جہد” نا رد ئٹ، کتاب میلہ ہڈ تننگ کن آئندہ نا کاریمک ٹہینفگا۔

اجلاس ٹی ٹیہفنگا کہ 2020  آنبار 2021 نا بخیر ہم کتاب میلہ ءِ خلیسہ کتاب کلچر نا مونی دننگ تون اوار مرو تاکن ایلو راج آک ہم دا دے ءِ کتاب کلچر نا مونی دننگ آن بار گدریفر خاص وڑ اٹ پد ماندہ راج خوشی و ایلو وڑ آتیٹ پوسکنا سال ئنا خوشی تے کننگ نا جاگہ آ کتاب تون اوار خوشی کریسہ بشخ ہلیر و شعور یافتہ مننگ نا ثبوت ایتر۔

یاتی مرے کہ تدوکا سال پڑو ادبی کچاری، وائی سی ایس ایف و نشست آن لائن کتاب میراث جہد نا ردئٹ پوسکنا سال ءِ گدریفنگ کتاب کلچر ءِ مونی دننگ کن سریاب ٹی تاریخی کتاب میلہ ءِ ہڈ تس، ہراٹی چُنا و بھلا تیان بیدس جتا زند ئنا بشخ آن تعلقدار کتاب دوست آک اوار مریسہ زیبدار کریسہ اسہ تاریخی کتب میلہ اس جوڑ کریر۔

اجلاس ٹی شبیر آجو، سگار بلوچ، امیر عباس، یارجان زیب و خواجہ مزمل ہم اوار ئسر۔

بلوچستان نا علاقہ کوئٹہ و ضلع کیچ ئٹ پاکستانی فورس آ جلہوک کننگانو، ہرافتا ذمہ واری تے بلوچ سلاہ بند تنظیمک بی ایل اے و بی ایل ایف ارفینو۔

دارالحکومت کوئٹہ ئٹ بروری نا علاقہ ئٹ عیسیٰ نگری آ فرنٹئر کور نا کانوائے آ بم تراک جلہو اس مس ہراڑان فورس ءِ جانی نسخان ارفنگ نا گمانے۔

کوالخواک جانی نسخان تا بابت ہچ پاتویس۔

جلہو نا ذمہ واری ءِ بلوچ سلاء بند تنظیم بی ایل اے ارفے۔

بلوچ لبریشن آرمی نا ترجمان جیئند بلوچ بیان ٹی پارے کہ بی ایل اے نا سرمچار آک کوئٹہ ٹی بروری نا علاقہ مسلم ٹاون عیسیٰ نگری ٹی کوزہ گیر پاکستانی لشکر نا فرنٹیئر کور نا اسہ کانوائے ءِ آئی ای ڈی جہلو ٹی ٹک کریر، جہلو ٹی کوزہ گیر فوج نا بھاز آ کارندہ آک کسکر و ٹپی مسر، اندن دھماکا ٹی اوفتا گاڑی ءِ بھاز نسخان مس۔

او پارے کہ ننا جہد آجو وطن نا دوئی کننگ اسکان برجاء مرو۔

ایلو جلہو نا ذمہ واری ءِ بی ایل ایف ارفے، بی ایل ایف ترجمان میجر گہرام بلوچ میڈیا ٹی بیان شینک کریسہ پارے اینو جمعہ نا دے سہہ بجہ و بیست منٹ نا خڑک گومازی نا علاقہ اپسی کہن ٹی بان پیر کنڈگ آ ٹہیفوک پاکستانی لشکر نا چوکی ٹی اسہ کارندہ اس اسنائپر تون ٹک کریسہ کسفین۔

او پاریے کہ پاکستانی فورسز آ جہلو بلوچستان نا آجوئی اسکان برجاہ مرو۔

بلوچستان نا ضلع خضدار نا تحصیل وڈھ آن نادرست بندغ آتا دو آن برمتہ مروکا بندغ نا چاہنداری محمد جان گرکناڑی نا پن ئٹ مسونے، ہرانا تعلقداری بلوچستان نیشنل پارٹی (مینگل) آن پننگ ءُ۔

محمد جان نا برمتہ نا بر خلاف وڈھ ئنا ہند آ بی این پی نا سد آ باسک آک ٹیر ہشیسہ کراچی کوئٹہ نا ہن و بر نا بھلا روڈ ءِ بند کرینو ہرانا سوب آن روڈ ئنا داپار ایپار گاڑیک سلوک ءُ و مسافر آک بھاز سختی تا گواچی مننگ کیرا۔

دا وخت آ برانز کروک پاریر کہ اسکان محمد جان ءِ یلہ کتنو ننا برانز برجاہ مرو۔

برانز کروک آک تُمت خلیسہ پاریر کہ محمد جان ءِ ریاست نا مخ تفی رسینگوک ہندی ڈیتھ سکواڈ برمتہ کرینے۔

ورنا غا شاعر حفیظ شہزاد نا اولیکو کتاب مستاگر شیوان ادبی کاروان نوشکے نا پارہ غان چھاپ و شینک مس۔

شیوان ادبی کاروان ڈاک نوشکے نا بنداو 2010 ئٹ تخنگا ہرانا سرکماش شیخ عتیق حسرت مینگل ءِ۔ شیوان ادبی کاروان نا پارہ غان دا وخت اسکان دئے کتاب شینک کننگانو و اندن ہر سال گل نا پارہ غان بلوچ ربیدگ دے ہڈ تننگ تون اوار مجلس آک ہڈ تننگرہ۔

شیوان ادبی کاروان نا دا وخت آ مسہ ہنکین ڈاک، بحرین و دبئی ٹی ٹہیفنگانو۔ کالخواہ تا پننگے کہ اوفک شاعری، نثر آ کاریم کننگو ہرافتیٹ پٹ و پول آ ہم کاریم مننگے۔

بلوچستان نا ضلع پنجگور ئٹ گرمکان نا علاقہ ئٹ گیس سلنڈر آن لیکیج نا سوب آن ساہ بند مننگ آ اِرا چُنا بیران مسر و اَرغ زائیفہ بیہوش مسونو۔

بیہوش مروک آتے ڈسٹرکٹ ہیڈکوارٹر پنجگور ئٹ بنائی جانجوڑی کمک تننگسہ ءِ۔

ہسپتال کوالخواہ تا ردئٹ سعید اللہ نا اِرا چنا عبدالحمید و صبا گیس نا سوب ساہ بند مننگ آ بیران مسونو اندن اوفتا لمہ باوہ عبدالواحد نا مار سعید اللہ و زالبول “ص” ءِ بیہوشی تون بد حالیت ئٹ ہسپتال آ ہتنگا۔

حوال تا ردئٹ تدینی ترند آ یخ نا سوب گیس سلنڈر خلنگ و لیکیج نا سوب مسونے۔

بلوچستان نا علاقہ بولان و کولواہ ئٹ بلوچ سلاہ بند تنظم آک جہلو کرینو ہرافتا ذمہ واری ءِ بی ایل اے و بی آر اے قبول کریر۔

بولان جلہو ٹی پاکستانی لشکر نا کارندہ ءِ کسفینگ نا ذمہ واری ءِ قبول کیک بی ایل اے ارفے۔

بلوچ لبریشن آرمی نا ترجمان جیئند بلوچ بیان ٹی پارینے کہ بی ایل اے نا سرمچار آک بولان نا علاقہ سانگان ٹی سفری نا ہند آ کوزہ کروک پاکستانی لشکر نا اسہ چیک پوسٹ ئسے ٹک کریر، ہرا نا سوب آن فورسز نا اسہ کارندہ اس ہند آ مرگ نا گواچی مس، اندن جہلو ٹی پوسٹ ءِ بھاز نسخان مس۔

جیئند بلوچ پارے کہ بی ایل اے دا جہلو نا ذمہ واری ءِ قبول کیک، و دژمن فوج آ ننا جہلو آک برجاء مرور۔

یاتی مرے منہ دے مست مستونگ ٹی نادرست بندغاک ریلوے ٹریک ءِ ٹراک ئٹ نسخان تسر، دا جلہو نا ذمہ واری ءِ ہم بی ایل اے مناسس۔

مستونگ جلہو نا ردئٹ بلوچ لبریشن آرمی نا ترجمان جیئند بلوچ پارے کہ بی ایل اے نا سرمچار آک مستونگ ٹی سُنگر نا خڑک ولی خان نا علاقہ ٹی ریلوے ٹریک ءِ آئی ای ڈی آئی ای ڈی تخیسہ تراک ئٹ بُھس کریر۔

اندن کولواہ نا علاقہ ڈنڈار ٹی پاکستانی فورس آ جلہو نا ذمہ واری ءِ اسہ پین بلوچ سلاء بند تنظیم بی آر اے ارفے۔

بلوچ ریپبلکن آرمی نا ترجمان بیبگر بلوچ بیان اس شینک کریسہ پارے کہ تدوکا دے ننا سرمچار آک کولواہ نا علاقہ ڈنڈار ٹی پونزگ سُنٹ نا ہند آ پاکستانی آرمی نا پوسکنو جوڑ مروکا چیک پوسٹ آ جہلو کریسہ اِرا کارندہ ءِ کسفیر۔

او مُستی پارے کہ جہلو نا نیام ئٹی فورس سرمچار آتے داپار ہیپار ہلنگ نا کوشست کرے، نیم سائت اسکان د اِرا پارہ جنگ ئٹی سُم کاری نا برجاء مس و ننا سرمچار آک حفاظت ئٹ پیشتمنگ ٹی سرسہب مسر۔