تربت ٹی سلہہ بند بندغ آک پولیس چوکی آ جلہو کریسہ اوفتا سلہہ و گڑاتیا کوزہ کریر ۔
شابیت احوال تا ردئٹ تربت ٹی پرانا چونگی پولیس ناکہ نمبر 15 آ جلہو کریسہ سلہہ بند بندغ آک پولیس کارندہ آتے بند کریسہ اوفتیان سرکاری سلہہ تون اوار واکی ٹاکی سیٹ و گیشتر سرکاری گڑاتے کوزہ ٹی کرینو ۔
سرکاری ذرائع نا ردئٹ سلہہ بند جلہو کروک آک موٹر سائیکل آتیا مسوسر و کاروائی آن گڈ جنگل نا پارہ غا پیشتمنگ ئٹ سر سہب مسر ۔
ایرانی میڈیا نا ردئٹ تہران ٹی سم کاری نا اسہ تدینی ئسے نا سوب ٹی سپریم کورٹ نا ارا جج کسکر و اسٹ ئس ٹپی مسونے ۔
ایران نا ذرائع تا رپورٹ آتا ردئٹ تہران ٹی 29 جنوری ہفتہ نا دے سہب انصاف محل نا مونا مروک دا سم کاری ٹی سپریم کورٹ نا ارا جج محمد مقیصی و علی رزینی کسک، مری پنی اسہ پین جج ئس ٹپی مس ۔
پاننگیک کہ ہرا بندغ دا ہر مسہ جج آتے سم خلکس او تدینی آن گڈ خودکشی کرے ۔
محمد مقیصہ و علی رازینی ایران نا ارا پنی عدالتی بندغ ئسر ہرافک بندغی حق آتا برخلاف فیصلہ برجاء کننگ ئٹ اہم کڑدار ئس ادا کرینو ۔
ہر مسہ جج بر خلاف طاغت آتے سزائے موت نا بابت آن پنی ئسر ۔
شہید غنی عرف بلال جان سنگت تو مہر مابت نا چیدہ ءِ
نوشتہ کار: بارگ بلوچ
دی بلوچستان پوسٹ
شہید غنی بلوچ عرف بلال جان تو کنا اولی مِلنگ ہموتم مس ہراتم نن اسہ جاہ ئسے کہ ٹریننگ ہیل کننگ ئسن ازدے نن وتاخ نا سنگت آک ٹریننگ کرین واپسی وتاخ آ بسن تینا وتاخی کاریم تے کرین تولوک ئسن منہ سنگت بسر بلوچی رواج ئٹ سلام دعا مس سنگت آک چاہ ہم کنگو تو او سنگت آتے تو منہ سنگت پوسکنو ئسر تو او پوسکنا سنگت آتے تو ای شہید غنی بلوچ عرف بلال جان ءِ خناٹ او پوسکُنا سنگت آتے شہید فدائی سنگت محمد بخش عرف خالد جان وتاخ آ ہیسک فدائی خالد آسک سفری ئسر دا سنگت آتے ہیسر پدا ہِنار تو شہید بلال جان ننتو ٹریننگ سینٹر آ سلیس ٹریننگ ءِ بِنا کرے تو منہ وخت ٹریننگ کرے ننتو شہید بلال بدن ٹی پزور ئس ولے ٹریننگ ٹی ننے آن کُل آن سخت تیز ئس، سخت زو ٹریننگ ہیل کرے پدا شہید بلال ءِ تنظیم پین کاریم اسیٹ پینتین رادہ کرے۔
ہر سنگت داڑے اسہ انقلابی فکر سوچ اسیتونے ہر سنگت لمہ باوئی ءُ مہر تیک اُست اسُل پاپک سنگت اس جتا مرے ولے شہید بلال ءِ تنظیم پین کاریم اسیٹ زو درے ای پاریٹ کاش کے دُن انگا سنگت آک بندغ آن جتا مفس دا سنگت آتا جتائی سخت ءِ تو منہ تُوہ شہید بلال ننے آن جِتا مس۔
آپریشن ہیروف نا سنگت آک تیاری مسر تینا کاریم آ ہِنار پدا بسر اوفتے تو شہید بلال واپسی بسس تو شہید بلال تو ننا مِلنگ مس تو خوش مسن گُڑا منہ دے ننتو مس شہید بلال پدا ننے آن جِتا مس منہ وخت مس سنگت آک ہرکس تینا گشت آ ہِنا ہر سنگت تینا گشت ئتو ئس ازدے نن رینج آن خُڑک مسن تو تیرہ نومبر نا دے ہم ئس، بولان نا چرک ئٹی شہید آتا دتر نا خوش گند ئس بولان نا مشک ناز ئٹ فخر کریرہ او دے آ وطن نا بوچ بوچ و درخت آک خوشی آن گل ئسر کہ شہید آتا دے ءِ خاک ناز ئٹی ئس اینو کنا فرزند آتا دے ءِ اینو وطن نا وارث شہید آتا دے ءِ۔
تو گُڑا منہ سنگت ءِ راہی کرین رینج آ ڈیھ ئنا حوال ءِ ہلنگ کے تو نن ناز ئٹی ئسن اینو شہید آتا دے ءِ اینو ورنا تا دے ءِ اینو ننا سنگت آتا دے ءِ خوشی آن گل و بال ئسن پدا اسہ سنگت اس واپسی بس پارے شہید بلال ننے آن جِتا مس تو نن اسہ کُنڈ آ ناز ئٹی ئسن ایلو کُنڈ آ شہید بلال نا جتائی ننے مونجا کرے انتئے کہ شہید بلال اندُنو سنگت اس ئس ہرا نا جتائی باز سخت ءِ انتئے کہ او باز مہروان اس ئس باز مہر تِروکو سنگت اس ئس، او مہر محبت نا خواجہ ئس تو نن سنگت آن ہریفین کے بلال جان امر شہید مسونے تو قصہ کرے دُن دُن سنگت آک جنگ اس کرینو دژمن تون مون پہ مون جنگ ئٹی شہید مسونے۔
شہید بلال نا یاداک شہید بلال سخت نرم لہجہ والو سنگت اس ئس شہید بلال باز سگی ءُ سنگت اس ئس، شہید بلال ہر وخت مخیسہ ہیت کریکہ، شہید ہر کاریم ٹی مخلصی کریکہ ہر کاریم تو محنت کریکہ شہید بلال اسہ دین دارو سنگت اس ئس پنج وخت نماز خواناکہ نن ہر وخت نماز خوانانہ تو شہید بلال ننے نماز جماعت تسکہ، شہید بلال ایلمی ءُ مہر اس تسکہ سنگت آتے، اسہ دے منہ سنگت تولوک ئسن توفک ساف کرین شہید بلال ہم ئس و ننا مہر ئنا کچاری برجاء ئس تو اسہ سنگت اس پارے کہ بندغ تینا پلین ئٹ دژمن تون جنگ کے گُڑا شہید مرے اگر پاکستان شوم تینا آپریشن ٹی بس شہید کرینے تو نا دژمن ءِ فائدہ مریک دژمن ءِ فائدہ تروئی اف تو شہید بلال اسہ پر مہر توار اسیٹی سنگت ءِ مخیسہ جواب تِس پارے کہ یار نن دعا کینہ دژمن آ نن کان یا او برے مون پہ مون مرین جنگ کین تو تہ تینا ایڑ لمہ تا بدلہ ءِ ہلین ننا ایڑ لمہ تے روڈ آتیا خوار کرینے اوفتا چنا تے لاپتہ کرینے یا نن تینا استاد اسلم نا قربانی تے زوال مننگ اِلپن اوفتا بدلہ ءِ دژمن آن ہلین۔ شہید بلال اسہ بہادر دلیر ءُ سپاہی اس ئس جنگی ہُنر ئس توتہ ٹیکنیکل سنگت اس ئس سخت لائخ ءُ سنگت اس ئس شہید بلال ننا بروکا نسل آتا چیدہ ءِ۔ شہید بلال نا جوزہ ہمت ننا حوصلہ ءِ، شہید بلال نا فکر و یاداک ننکے خوڑدہ ءُ شہید بلال کونا سنگت آتا کڑدار ننا لوز آتا آئری اف بس شہید نا منہ یاد ئسر ہموفتے ای نُم کہ بیان کریٹ۔
مادر وطن بلوچستان اسہ وخت ئسے آن بہادرو فرزند ودی کرینے خاص وڑئٹ شال، ننا شال ئنا ورناک باز بہادرو ءُ فرزند ءُ نن ہُرن دُن کہ شہید مجید اول ہرا ظالم آ ذالفقار بھٹو نا خلاف فدائی جُلہو کرے اندن بہادرو پین مجید اس ودی مس شہید مجید ثانی شہید مجید اول نا ایلم مجید ثانی ہم دژمن ءِ باز جاگہ غا جوانو دھک خلکنے شکست تِسونے تہ یا نن مثال ءِ ہلین سریابی آ ورنا تا دُنکہ شہید کاشف جان ءِ یا شہید نادر جان ءِ بہادرو سپاہی مسنو اندن دافتیٹی اوار شہید بلال جان اوار ءِ۔ حوصلہ بہادری مہر و مابت شہید بلال آ ایسر مریک دا ہمو ورناک ءُ ہراتے خوش ءُ زند ارے اُرا ارے ایڑ لمہ باوہ ایلم سیال عزیز ارے ولے دا کُل ورناک خوشی و عئید آتے اِلیسہ بریرہ ساہ ءِ تینا قربان کیرہ دافتا قربانیک بروکا نسل ءِ آجوئی نا دروشم ئٹ رسینگوور دا ننا اُمیت ءِ دا سنگت آتا امیت ءِ شہید آتا امیت ءِ دا مادر وطن بلوچستان نا امیت ءِ دا ورنا تا قربانیک اسُل زوال مفسہ انشاءاللہ شہید بلال کونا ورنا تا دتر نا پُڑی آجوئی نا مزل ءِ خڑک کریسہ ءِ، دژمن ءِ خِجل شرمندہ کریسہ ءِ شہید بلال کونا سنگت آک ڈیھ ئنا فرزند آک ناز شان ئٹی گٹ ئنا زگرنگا دتر تے تیرہ اوفتا فکر جوزہ سخت پینگُن ءِ، اوفتا فکر ءِ دژمن نا تنخواہ خور آ فوجی پُلنگ کپک دا شہید آتا فکر داسا ننا نُما کوپہ ٹے دا شہید آتا توفک داسا ننا زمہ داری ءِ شہید آتا فکر و جوزہ ءِ دھرتی نا کنڈ کنڈ آ سر کین دا ننا نُما فرض ءِ، گُڑا دا فرض ءِ ننے ہر حال آ ادا کروئی ءِ، اسلمی فرزند آک ڈیھ ئنا گواڑخ تے دتر ئٹ رُدفینو اسلمی فرزند آک جنگ بارود بمب آتا توار ئٹی بھلن مسنو فکر جوزہ تو سخت بِسن مسنو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچستان نا قلات شار نا ہند آ پاکستانی لشکر نا ٹولی ٹی اوار مروک اسہ گاڑی ئسے بمب تراک ئٹ ٹک کرینو ۔
علاقائی ذرائع نا ردئٹ کسر نا کرک آ کڈ کروک تراک ٹی پاکستانی لشکر نا ٹرک گاڑی ئسے ٹک کننگانے ۔ اوفتا ردئٹ لشکری کارندہ آتیا جلہو ہمو وخت مس ہرا وخت او شار نا پارہ غا ہننگ ئسر ۔
تراک ئٹ نسخان آتا بابت آن کوالخواہ دائسکان ہچو شابیتی احوال ئس بیان کتنے ۔
تدوکا بیست و چار گھنٹہ نا نیام ئٹ قلات پاکستانی لشکر آ دا ارٹمیکو جلہو ءِ ۔ تدوکا دے نیچارہ نا علاقہ ٹی پند آ مروک لشکری کارندہ آتا تراک آن گڈ گھیرہ خلسہ سلہہ بند بندغ آک جلہو کریسر ۔
پن کروک جلہو نا ذمہ واری بلوچ لبریشن آرمی ارفیسس۔ تنظیم نا ترجمان جیئند بلوچ بیان ئٹ پارے کہ جلہو تیٹ پاکستانی لشکر نا ہفت کارندہ مرگ ئنا گواچی مسر ۔
اینو نا مروک جلہو نا ذمہ واری ءِ دائسکان کس ارفتنے ۔
بلوچستان نا ضلع کیچ آن پاکستانی لشکر اِرا چُنک سن مار دزگیر کننگ آن گڈ بیگواہ کرینے۔
شابیتی حوال تا رد ئٹ درو ننکان پاکستانی لشکر کیچ ئنا علاقہ گومازی آن اِرا چُنک سن مار دزگیر کننگ آن گڈ بےڈس ءُ ہند ئسے آ درینے۔
تومکا تا چاہنداری یوسف ولد قاسم و شاہو ولد حبیب نا پن ئٹ مسنے۔
پن کروک چُنا تیان یوسف ءِ ولدا یلہ کننگانے ولے قاسم دائسکان پاکستانی لشکر تون ءِ۔
ہلہلہی ہفتہ – ٹی بی پی سرگپ
اِرا ہزار بیست و پنچ ئنا بنائی اِرا ہفتہ ہلہلہی مسنو۔ چار جنوری آ تربت ئٹ پاکستانی لشکر نا قافلہ غا جند ندری جلہو مس، و منہ دے مُست ضلع خضدار نا تحصیل زہری نا شار آ بلوچ لبریشن آرمی نا فتح اسکواڈ و ایس ٹی او ایس بھلو جلہو اس کریسہ کوزہ کریر۔ جلہو نا وخت آ لیویز تھانہ ءِ خاخر تننگا، توفک آتیا کوزہ کننگا، و دہ گھنٹہ اسکان شار آ کنٹرول برجاء تخنگا۔ دا کوزہ ءِ آپریشن ہیروف نا ارٹمیکو بشخ ئنا ہیل کاری گوندنگا۔
پاکستانی لشکر بی ایل اے نا دا بھلا جلہو آن پد ہر وخت آنبار زہری شار آن سینزدہ بندغ ءِ زوراکی ئٹ بیگواہ کرے۔ دا بندغ آتا خاہوت آک زہری کراس و سوراب ئٹ بنجاہی کسر ءِ بند کریسہ تولوک برانز کننگ ءُ۔ دا برانز نا سوب منہ زوراکی ئٹ بیگواہ بندغ نا آجوئی ممکن مسنے۔ کیچ نا بنجاہی شار تربت ئٹ ہم کیہی دے تیان شہید فدا چوک آ زوراکی ئٹ بیگواہ بندغ تا آجوئی کن تولوک برانز برجاء ءِ۔
بلوچستان ئٹ دا اِرا ہفتہ ئٹ زوراکی نا بیگواہی تیٹ ودکی مسنے، و بلوچ راج دوست جماعت آک خُلیس درشان کننگ ءُ کہ ریاستی ادارہ غاک مالو آن دزگیر کروک بندغ آتے کسفسہ اوفتے بلوچ سرمچار گوندنگ کیرہ۔ بلوچستان ئٹ زوراکی ئٹ بیگواہ بندغ تا آجوئی بیرہ برانز ئٹ ممکن مننگ ءِ، اندا خاطران مخلوق بھاز سخت و سوگو برانز نا ذریعت ئٹ زوراکی ئٹ بیگواہ بندغ تا آجوئی و ریاستی تادی نا برخلاف تحریک برجاء تخانو۔
بلوچ لبریشن آرمی نا بھلا و غنجل جلہو آتیٹ ترندی تون اوار ریاستی تادی تیٹ ہم ودکی مسنے۔ ریاستی ادارہ غاک بلوچ سلہہ بند تنظیم آتا بھلا و مرگ ئنا گواچی کروک جلہو آتے توننگ ئٹ بے سہبی نا رد عمل ئٹ لس بندغ آتے زوراکی ئٹ بیگواہ کننگ ءُ و مالو آن دزگیر کروک بندغ آتے کسفنگ ءُ۔ واہم ریاستی تادی نا برخلاف راجی تحریک الس ءِ سوگو کرینے، و داسہ الس دا ظلم آتا برخلاف چپ مننگ نا جاگہ غا ریاستی ادارہ تا برخلاف ترند برانز نا کسر ءِ ہلنگ ءِ۔
کیچ نا علاقہ دشت شے زنگی ٹی پاکستانی لشکر نا گاڑی ءِ بمب جلہو ٹی ٹک کننگانے ۔
بمب تراک استو تربت بنجائی کسر آ پاکستانی لشکر نا کارندہ آتیا مس ۔ ہندی ذرائع نا ردئٹ تراک ٹی کارندہ آتے جانی و مالی نسخان تون مون تروئی تمانے ۔
جلہو آن گڈ لشکری کارندہ آتا بھلو کچ ئس علاقہ ءِ گھیرہ کریسہ لشکر کشی ءِ بناء کرے اندن جلہو نا ذمہ واری ءِ دائسکان کس ارفتنے ۔
نظم: راجی مچی بیست پنچ جنوری (دالبندین)
مزدک
سال انا دا جنوری نا بیست و پَنچ آ دے اکے
دالبندین نا دغار آ سر مرینَک ڈیھ اکے
لُمّہ غاتا آہ تیان گُھٹ آک بارُن مسّونو
کوپہ سیکے ایڑ اسینا خَنک خیسُن مسّونو
سیاسر آتا انتظار ئٹ خُشک پیہُن مسّونو
چوچہ غاتا باوہ کے دڑد آک پَینگُن مسّونو
گُمگار آتیکے مَش کُلبر مرینَک ڈیھ اکے
بھاز مَسّک خِسکہ اوغنگ پَنجہ جَلِّنگ بھاز مس
درپدَر رُلِّنگ پین تا نَت تیا تَمِّنگ بھاز مس
مون اٹی تادی تا مُستی جوڑتا مُوغِنگ بھاز مس
حق انا آزان آ خَف ٹی پَمبہ تِنِّنگ بھاز مس
جوژ ایتن داتے بہ گوھَر مرینک ڈیھ اکے
اٹ و مٹ پین لَنگڑی و بینگُنی نا زندگی
اٹ و مٹ پین خَن لُڑونجی پا سلے شرمندگی
اٹ و مٹ پین ہَست اٹی دا نیستی دا بیوسی
اٹ و مٹ پین بُت پرستی بےحِسی بےبندَغی
دا بلا تا مون آ یک سنگَر مرینَک ڈیھ اکے
یاد بر کین گُلگُلآب آتے ہرا مسُّر ندَر
دا چمن نا او ہتم کے تِسُّرَک گُھٹ آن دتَر
مُخلصی کننگے داتا مُخلصی آ چٹ گھمَر
دا امو شاہزادہ غاکو دائمی مسُّر امَر
دِلرُبا دِلدار دُن دِلبَر مرینَک ڈیھ اکے
بر نشاں سیال آتے ایتن داسکا نن زندہ ھون
زندہ ھون ہر گُگ تہار آتیٹی پھل تابندہ ھون
بھاز حیرانے امر نن دڑد اٹی بشخندہ ھون
او بروکا دؤر اٹی دا راج انا آئندہ ھون
راج ئکے بادوفر و رہبر مرینَک ڈیھ اکے
ہَرف جَت بَت نا نی بیرَک حق انا دو ٹی الَم
جُنز انا دا بشخ مر نا باغ تیبہ کے وسَم
زُلم انا زَالم نا مظلوم آتِکے کر سرقلَم
سی و نو ہفتاد چِل و ہشت نا ٹپ ءِ کر ملَم
بر مرید گہرام چئے چاکَر مرینَک ڈیھ اکے
ہلبو سر نُم اُستمان نا او حقیقی حق اکے
چُست چَسپان گامے ہرفبو گُلزمین نا رَک اکے
شُور شال بولان کہکان مکّران سیندَک اکے
ڈیھ انا دیوانہ غا مَستانہ غا مزدَک اکے
زمغ او بولان ئنا اِسپَر مرینَک ڈیھ اکے
تربت ئٹ استو پاکستانی لشکر اُرا تیا چھاپہ نا وخت آ اِرا بندغ ءِ زوراکی ئٹ بیگواہ کرے، زہمی مروک خاہوت آتا ردئٹ فورسز آک اِرا گھنٹہ آن زیات زالبول و چنا تیا بیدادی کریر۔
بلوچستان ئٹ زوراکی نا بیگواہی تا لڑ دائسکان برجاء ءِ ہراڑے دا تدینی تا برخلاف سوراب و تربت ئٹ مُسہ جتا ہند آتیا تولوک برانز مریسہ ءِ۔
ضلع کیچ نا بنجاہی شار تربت آن استو پاکستانی لشکر پین اِرا بندغ ءِ زوراکی ئٹ بیگواہ کرے۔
علاقائی حوالکار تا ردئٹ استو کم و ود 2 بجہ غا تربت نا علاقہ نیو بہمن ڈھنک ئٹ پاکستانی لشکر فرنٹیئر کور جاوید کریم بلوچ و ہمسایہ تا اُرا تیا چھاپہ خلک، دا وخت آ جاوید کریم بلوچ نا ایڑ ئنا مار بلال بلوچ ولد حیدر علی و ہمسایہ اسماعیل ولد حیر محمد ءِ دزگیر کریسہ نادرست ہند آ درے۔
حوال تا ردئٹ فورسز آک اِرا گھنٹہ آن زیات اُرا تے پٹار و زالبول و چنا تیتون اوار ایلو بندغ آتیا بیدادی کریر۔
پن کروک ہڑتوم آ بندغ آتا بابت دائسکان ہچ وڑ نا معلومداری رسینگتنے۔ ضلعی کوالخواک دائسکان دا بابت ہچو ہیت اس مونا ہتنو۔
بلوچستان نا ضلع کوہلو آن پاکستانی لشکر چار بندغ ءِ زوراکی ئٹ بیگواہ کرے ۔
احوال آتا ردئٹ پاکستانی لشکر بالاچ لوہانی ءِ تینا کیمپ ئٹ خوائفیسہ زوراکی ئٹ بیگواہ کرے ۔
علاقائی ذرائع نا ردئٹ بالاچ لوہانی نا ارا مار ءِ ارا تُو مالو پاکستانی لشکر زوراکی بیگواہ کرے، کوالخواک بالاچ لوہانی ءِ مار تا آجوئی نا بابت ئٹ کیمپ آ خوائفیسہ اودے ہم بیگواہ کریر ۔
داڑان بیدس مسہ دے مالو یار خان جلمبانی ءِ اونا اراغان دزگیر کریسہ بیگواہ کننگا اندن مسہ دے مالو کوڈے ولد میشدار لوہارانی و جمعہ شاہیجو ءِ کسر آن دزگیر کریسہ زوراکی ئٹ بیگواہ کننگا ۔
بلوچستان ٹی زوراکی ئٹ بیگواہی تا تدینیک دے پہ دے ئنا بنیات آ مونا بننگو ۔
ہنوکا دے خضدار نا تحصیل زہری آن 12، ڈیرہ بگٹی آن 9، خاران آن 2 و نوشکی آن 2 بندغ ءِ زوراکی ئٹ بیگواہ کننگا ۔
زوراکی ئٹ بیگواہی تا برخلاف سوراب نا ہند سی پیک روٹ آ ارا دے اسکان تولوک برانز کننگا اندن تربت ٹی ہم برانز نا لڑ برجاء ءِ ۔
