ژوب ئٹ جیل روڈ آن خڑک اسہ تدینی اسیٹی چاگڑدی باسک و توحید ٹیکنیکل سینٹر نا انچارج مسرت عزیز ءِ اونا ایلم سم خلیسہ کسفے۔
پن کروک زالبول منہ وخت آن ژوب ئٹ زالبول آتیکن لائخی ہیل کاری سینٹر اس ٹہفیسس۔ ڈسٹرکٹ پولیس آفیسر (ڈی پی او) ژوب سید صبور آغا نا ردئٹ تدینی نا پٹ و پول برجاء ءِ۔ کوالخواک اسہ بندغ ئسے سر و سوج اکن دزگیر کرینو۔
ڈی پی او آغا باوری ترفے انصاف فراوان کننگو و دوبہ دار نا دزگیری کن کوشست آک برجاء ءُ۔
دا تدینی چاگڑدی حوالکاری تلہ غا بھلو کچ ئسے سوختئی ودی کرینے۔
بلوچستان نا ضلع کیچ نا بنجاہی شار تربت تون اوار اِرا ہند آتیا برانز برجاء ءِ۔
ظریف عمر و نوید حمید نا کسفنگ نا برخلاف تربت ئٹ برانز برجاء ءِ اندن زمان جان و ابوالحسن نا آجوئی کن ہوشاپ زیرو پوائنٹ آ سی پیک کسر دائسکان بند ءِ۔
تربت ئٹ پنچ دے آن اِرا جتا ہند آتیا برانز مریسہ ءِ ہرافتیٹ زالبول، چنا و لس شاریک اوار ءُ۔ شہید فدا چوک تربت ئٹ تدوکا پنچ دے آن تمپ ئٹ کسفنگوک ظریف عمر و بلیدہ ٹی کسفنگوک نوید حمید نا خاہوت و بلوچ یکجہتی کمیٹی نا برانزی کیمپ ئٹ ضلعی بست و بند و سکیورٹی فورسز آتا برخلاف برانز مریسہ ءِ۔ برانزیک شہید فدا چوک ءِ چارمہ کنڈ آن بند کریسہ ہن و بر ءِ بند کرینو۔
ایلو پارہ غان زمان جان و ابوالحسن کن ہوشاپ زیرو پوائنٹ آ سی پیک کسر چارمیکو دے آن بند ءِ دا وخت آ زالبول و چناک کسر آ برانز کریر و ہڑاند بش کریسہ ہن و بر ءِ ہم بند کرینو۔ اوفک زمان جان و ابوالحسن نا آجوئی اسکان تولوک برانز کننگ و کسر ءِ بند کننگ نا پڑو کرینو۔
یاتی مرے زمان جان و ابوالحسن ءِ 16 دسمبر 2024 آ تربت آن بیگواہ کننگا واہم سی ٹی ڈی نا ذریعت ئٹ اوفتا دزگیری درو یکم جنوری آ قلعہ عبداللہ آن پاش کننگا و اوفتیا کالعدم تنظیم آن تعلق تخنگ نا دوبہ خلنگانے۔
حب پولیس نا کنڈ آن اسہ ایف آئی آر ئس کننگانے ہراٹی دا پاننگانے کہ زبیر بلوچ نا آجوئی کن تولوک برانز کروکا برانزیک سرکار نا کاریم تیٹ ہڑاند شاغسہ پولیس تون جنگ تسنو، روڈ ءِ بند کرینو و پولیس کارندہ غا تے ٹپی کرینو۔
ایف آئی آر ئٹ زبیر بلوچ نا خاہوت تون اوار یکجہتی کمیٹی نا باسک و سیاسی کاریم کروک آتا پِنک اوار ءُ ہرافتیٹ عارف بلوچ، ماہ زیب بلوچ، جاوید، عبداللہ و ایلو کیہی زالبول آک اوار ءُ۔
یات مرے، حب چوکی آن زوراکی ئٹ بیگواہ کننگوک زبیر بلوچ نا خاہوت حب بائی پاس آ اِرا دے ئسکان تولوک برانز کرسا اونا آجوئی کن برانز کریسس۔
ڈیرہ بگٹی نا علاقہ پیرکوہ ٹی بیست و دو سالی زالبول وخت آ دارو درمان مفننگ نا سوب خیرٹ مننگ وخت آ چنا تون اوار بیران مس۔
یاتی مرے ڈیرہ بگٹی ٹی گائنالوجسٹ یا زالبول ڈاکٹر مفننگ نا سوب آن زالبول آتے خیرٹ مننگ وخت آ دو سد کلو میٹر پنجاب نا علاقہ رحیم یار خان و صادق آباد آ دننگک ہراڑے کسر ئٹ زالبول آتا چناک ودی مریرہ اندن بھازی زالبول و چناک ہمو وخت آ بیران ہم مریرہ۔
ضلع ڈیرہ بگٹی مُسہ تحصیل تیا تالان مُسہ لکھ آن زیات آباتی تخوک علاقہ اس مننگ آن پد ہم اوٹی اسپتال، اسکول و ایلو بنداوی آسراتیک افس۔
میٹرنل مورٹیلٹی سروے نا ردئٹ پاکستان ئٹ خیرٹ مننگ وخت آ مرک آتا کچ کل آتیان زیات بلوچستان ئٹی ءِ ہراڑے خیرٹ مننگ وخت آ اسہ لکھ آن 298 لمہ ساہ ایترہ۔
بلوچستان ئٹ اسکلڈ برتھ اٹینڈنٹ یعنی اسہ تربیت ہلوک جانجوڑی کارندہ ئسے نا ذریعت ئٹ خیرٹ مننگ نا کچ بیرہ 38 درسد ءِ۔ نا تجربہ کار و تربیت ہلپروک جانجوڑی کارندہ غاک مرک آتا کچ ئٹ ودکی نا سوب جوڑ مننگ ءُ۔
یاتی مرے مرک آتا ارٹمیکو بھلا سوب بنیاتی و ٹرشری ہیلتھ کیئر نا نظام ئٹ ساڑی نزوریک ءُ اندن مسٹمیکو بھلا سوب اسپتال آتیٹ بندغی طاغت نا کمبوتی ءِ۔
بلوچستان لبریشن فرنٹ نا ترجمان میجر گہرام بلوچ میڈیا غا شینک کروک بیان ئٹ پارینے کہ سرمچار آک کیچ ئنا علاقہ بلیدہ ٹی ڈیتھ اسکواڈ نا کارندہ حلیم ولد سلیم ءِ سم کاری کرسہ مرگ ئنا گواچی کریر۔
ترجمان پارے کہ سرمچار آک اکتیس دسمبر نا دے دوانزدہ بجہ غا الندور بلیدہ ٹی سم کاری کرسہ ڈیتھ اسکواڈ نا کارندہ و ریاستی ایجنٹ ءِ مرگ ئنا گواچی کریر۔ پن کروک قومی ڈوہ دار منحرف سرمچار و ڈیتھ اسکواڈ نا کارندہ ناصر پن کروک بھرام ولد عبدالکریم نا سروکی ٹی کاریم کننگ ئس، علاقہ ٹی بلوچ ورنا تا شہادت، دُزی،مخلوک ءِ پلنگ تون اوار ایلو چاگڑدی گندہی تیٹ پاش پاش ڈوہ دار ئس۔
او پارے کہ اوڑتون اوار اسہ لس او شاری ئس ایاز ولد نبی بخش ٹپی مسنے نن اونا خاہوت تون دڑد تخنہ، و نن کہیی وار خبڑدار کرینن کہ اوفک تینے پاکستانی لشکر و اونا جوڑ کروکا ڈیتھ اسکواڈ و اونا مخ تف آتیان مر تخر، تانکہ سرمچار آک ہر جاہ و ہر وخت اوفتے ٹِک کننگ کیرہ۔
پن کروک قومی ڈوہ دار حلیم ءِ مرگ ئنا گواچی کننگ آن گڈ سرمچار آک اونا سلہہ ءِ تینا قوضہ ٹی ہلسہ تینتون اوار دریر۔
بیان ئٹ پاننگانے کہ دا ٹیم ئنا سروک و کارندہ غاتیا ننا انٹیلیجنس نظر تخانے و اوفتے بھاز زوت ٹِک کننگو۔
ترجمان ایسر ئٹ پارینے کہ بی ایل ایف ریاستی کارندہ ءِ مرگ ئنا گواچی کننگ نا ذمہ واری ءِ ارفک و غٹ ڈیتھ اسکواڈ نا کارندہ و ریاستی مخ تف آتے خبڑدار کینہ کہ اوفک تینا دا وڑ تے یلہ کیر نہ تو اوفتا پد ہم اندن مرو۔
ارا ہفتہ مست ڈیرہ مراد جمالی ٹی دشتار نا دو تیان کھسفنگوکا زالبول نا جون پٹ فیڈر کینال آن خننگا۔
زالبول نا جون پٹ فیڈر کینال بیدار پل نا خڑک آن جوں اس خننگا، سٹی پولیس جون ءِ اوکان کشا۔
پولیس جون ءِ پوسٹ مارٹم کننگ کن سیول ہسپتال ڈیرہ مراد جمالی آ درے، سٹی پولیس نا مستی پٹ و پول برجا ءِ۔
دفعہ 144 – ٹی بی پی سرگپ
متنازعہ صوبائی حکومت تیوہ بلوچستان ئٹ دفعہ 144 نافذ کرینے تاکہ زوراکی نا بیگواہی و دزگیر ئٹ کسفنگ نا برخلاف برجاء برانز و تولوک برانز آتے ایسر کننگ کے۔ زبیر بلوچ نا زوراکی ئٹ بیگواہی نا برخلاف سوگو السی برانز نا سوب او آجو مس ولے ظریف بلوچ و نوید بلوچ نا خاہوت تینا بندغ آتا دزگیر ئٹ کسفنگ نا برخلاف ضلع کیچ نا بنجاہی شار تربت ئٹ شہید فدا چوک آ تولوک برانز کننگ ءُ۔
ظریف بلوچ ءِ تمپ ئنا علاقہ دازن آن اونا اُرا ٹی خاہوت نا مونا فرنٹیئر کور نا سپاہیک بیدادی کریسہ زوراکی ئٹ بیگواہ کریر و اسہ دے ئسے آن پد اونا جشوک جون دازن ئٹ خننگا۔ ظریف بلوچ نا خاہوت ءِ برانز آن توننگا و اوفتے تڑی و بیوس کریسہ ظریف بلوچ ءِ دفن کرفنگا۔
ضلع کیچ ئٹ ظریف بلوچ ءِ دزگیر ئٹ کسفنگ نا برخلاف مروک برانز اولیکو اف بلکن شہید فدا چوک آن بالاچ بلوچ نا دزگیر ئٹ کسفنگ آن اسہ تحریک اس بناء مسوسس، ہراڑان ریاستی تادی نا برخلاف تیوہ بلوچستان ئٹ سوگو السی برانز آک مسر و اسلام آباد ئٹ دیہاڑی تولوک برانز کننگا ولے ریاستی مقتدر ادارہ غاک دائسکان ہم پہہ مننگ افس کہ اوفتا بے قانودی گام آتیان بلوچ راجی توار چپ مننگ کپک۔
تیوہ جہان ئٹ پوسکنا سال بناء جشن آتیٹ کننگک ولے بلوچستان ئٹ پوسکنا سال نا بناء دفعہ 144 نا سیخا و دزگیر ئٹ کسفنگ آتا برخلاف برانز آتیٹ مننگ ءِ۔ زبیر بلوچ نا زوراکی ئٹ بیگواہی آ سوگو السی برانز آن پاش ءِ کہ دفعہ 144 خلنگ آن السی برانز توننگ مننگ کپک و داسہ ریاستی تادی آ چپ مننگ نا جاگہ غا بلوچ راج برانز نا کسر ءِ ہلیک۔
حب چوکی ٹی برجاء تولوک برانز آ پولیس و فورسز آک برانز کروک آتا برخلاف ترند کریک ڈاؤن بناء کرینو۔
پولیس آنسو گیس و گولہ بارود کاریم ئٹ ہتنگ ءِ و کیہی برانزی تے برمتہ کننگانے۔
بلوچ یکجہتی کمیٹی نا ردئٹ پرامن برانزی، زالبول، چنا و پیر انگا تا حالیت نا بابت گڑتی ٹی اُن۔
او پارے کہ پرامن برانزی تیا دا ڈول نا تادی بلوچ راج ئنا دہائی تیان برجاء زنک ایسری نا شاہدی ءِ ایتک۔ دا نازرک حالیت ئٹ نن بلوچ راج آن خواست کینہ کہ او سلوک مریر و مزاحمت کیر انتئے کہ ننا ہزار آ بندغ آتا ساہ بھیم ئٹی ءِ۔
بلوچ یکجہتی کمیٹی نا پاننگ ءِ کہ نرینہ، زالبول و چنا تا برخلاف دا بے بندغی کاریم نا ترند مذمت کینہ۔
بلوچ یکجہتی کمیٹی تربت و حب برانز کروک آتون ہم کوپئی کن اینو کوئٹہ ٹی برانز نا پڑو کرے ۔
بیان ئٹ پاننگا کہ بلوچ یکجہتی کمیٹی شال زون نا پارہ غان تربت ئٹ شہید ظریف نا خاہوت نا برانز و حب چوکی ٹی زبیر بلوچ نا خاہوت نا برانز نا ہم کوپئی کن اینو دیگر نا بلوچستان یونیورسٹی نا مونا برانز کننگو ۔
گیشتر پاننگا کہ ریاستی زوراک سیکورٹی ادارہ غاک حب و تربت ئٹ برجاء برانز آتے ایسر کننگ نا تڑی و گیشتر چم آتے کاریم ئٹ ہتنگو ۔ بلوچ الس تینا لمہ و ایڑ تا رکھ ئکن کسر تیا پیشتمانو ۔
بی وائی سی نا بیان ئٹ پاننگا کہ نن کوئٹہ نا الس آن خواست کینہ کہ اینو بیگہ تون 4 بجہ بلوچستان یونیورسٹی آن کشنگوک برانز ئٹ اوار مریسہ شہید ظریف بلوچ و زبیر بلوچ نا خاہوت تون اوات ہم کوپئی نا درشانی کیر ۔
مستونگ نا علاقہ اسپلنجی ٹی درو آن اختہ پاکستانی لشکر ءِ سلہہ بند بندغ آک جلہو ئٹ ٹک کرینو۔
علاقائی حوالکار تا ردئٹ اینو سہب ئنا پاکستانی لشکر آ سلہہ بند بندغ آک ہمو وخت جلہو کریر ہراتم او مرو آن خڑک گام خلنگ ئٹ اختہ ئسر۔ جلہو نا وخت ترند سم کاری و تراک آتا توار بِننگانے۔
کوالخواک دا بابت دائسکان ہچو شابیتی حوال فراوان کتنو۔
اسپلنجی و ایب کیب ئٹ بلوچ سلہہ بند آجوئی دوست گل آک متحرک ءُ ہرا پاکستانی لشکر آ مروک جلہو تیٹ اوار مسنو واہم اینو نا مروکا جلہو نا ذمہ واری ءِ دائسکان کس ارفتنے۔
