تدوکا دے تیٹ بلیدہ غان پاکستانی لشکر نا دو آن زواکی ئٹ بیگواہ مروک اِرا ورنا، سخی داد نا مار وہاب و سمیر آجو مسنو۔

ہڑتوم آ ورنا تے شکار نا وخت 11 نومبر آ فورسز آک دزگیر کریسہ بیگواہ کریسر۔

خاہوت نا ردئٹ ہڑتوم آ ورنا تے فورسز آک میتاپ نا علاقہ غان دزگیر کریسہ تینا کیمپ آ دریسر، و اوکان پد اوفتا بابت ہچو حوال اس رسینگتوسس واہم استو ہڑتوم آ ورناک یلہ کننگانو۔

دا تدینی بلوچستان ئٹ زوراکی نا بیگواہی تا برجاء غا لڑ ئنا بشخ ئسے، ہراڑے چرجوئی ئٹ کیہی بندغ آک پاکستانی لشکر نا دو آن زوراکی ئٹ بیگواہی نا گواچی کننگانو۔

برجاء سال نا اکتوبر ئٹ 127 بندغ نا زوراکی ئٹ بیگواہی نا رپورٹ آک مونا بسر، ہرافتیان کیہی بندغ آک دائسکان بیگواہ ءُ۔ نومبر ئٹ دائسکان 33 بندغ نا زوراکی ئٹ بیگواہی نا تدینیک رپورٹ مسنو۔

بلوچ یکجہتی کمیٹی و وائس فار بلوچ مسنگ پرسنز دا زوراکی نا بیگواہی تا ترند مذمت کریسہ جہانی ادارہ تیان دمدستی کاروائی نا خواست کرینو۔

ہڑتوم آ تنظیم آک تینا بیان تیٹ پارینو کہ بلوچستان ئٹ نہ بیرہ بلوچ الس ریاستی تادی تون مون تننگ ءِ بلکن داڑے نا شاری تا زند ہم بھیم نا گواچی ءِ۔

دا تنظیم آتا پاننگ ءِ کہ بلوچستان ئٹ دنو اسہ خاہوت یا اُرا اس اف ہرا ریاستی تادی و زنک ایسری آن زیمی متنے۔

اوفک جہانی برادری آن خواست کرینو کہ اوفک دا بھلا بندغی بحران آ چپ مفس و دمدستی بلوچستان ئٹ برجاء زوراکی نا بیگواہی تا برخلاف گام ارفر۔

بلوچستان ئٹ برجاء دا نیستی آ جہانی بندغی حق آتا ادارہ تا چپی آ سوج آک بش مریسہ ءُ، و بندغی حق آتا باسک آتا پاننگ ءِ کہ ہراتم اسکان دا زوراکی نا بیگواہی تا برخلاف جُوان کاروائی کنگتنے ہموتم اسکان بلوچستان ئٹ ایمنی ہتنگ مننگ کپک۔

سمارٹ فون ننا زند ئنا المی بشخ اس جوڑ مسنے ولے جانجوڑی آ اونا منفی زیم آک ہم تمنگ ءُ۔ سمارٹ فون (موبائل) تُغ ئٹ خرابی و اسٹریس نا سوب ہم جوڑ مننگ ءِ۔

اسہ جرمن ماہر نفسیات ئسے نا اسٹریس کم کننگ کن منہ سَلاہ:

سنگت آتیتون حوالکاری ٹی مننگ، ویڈیو یا حوال آتے اوننگ، اپوائنمنٹ آتا خیال تخنگ و وار وار وخت ءِ اوننگ۔ اینو نا وخت ئٹ سمارٹ فون ننا ہڑدے ئی زند ءِ جوڑ کننگ ءِ۔ بھاز آ بندغ آتیکن سمارٹ فون کاریم ئٹ ہتنگ بھاز زیات مریک، ہرانا منفی زیم آک تمرہ۔

جرمنی نا ماہر نفسیات نکولا جانسن پائک کہ سمارٹ فون ءِ تینا جیب، دراز یا گڑا کاغد یا پیڈ ئنا شیف آ تخبو۔ دا ماہر نفسیات نا ردئٹ سمارٹ فون ءِ خن تیان مُر تخنگ جوان ءِ۔

نکولا جانسن نا جرمنی نا بریمر اپولون یونیورسٹی آف ہیلتھ اکنامکس ئٹ لیکچر تریسہ پاننگ ئس کہ اگہ نم پام و فکر ئٹ کاریم کننگ یا ہیل کننگ خوائرے گڑا موبائل ءِ تینے آن مُر تخبو۔

اونا ردئٹ کیہی مطالعہ تیان دا پاش مسنے کہ بندغ نا مِلی ہمو وخت ہم اسٹریس ہارمونز کشیک، ہراتم موبائل فون آ نوٹیفکیشن آک بریرہ و نم خن تے دیخس تر کریسہ اوفتے ہُریرے۔

خاچنگ وخت آ موبائل فون ءِ کوٹی آن پیشن تخبو!

اونا پاننگ ئس کہ تُغ ئٹ خرابی نا زی آ پولکار سائنسدان آک سیل فون ءِ ”خاچنگ نا کوٹی آن پیشن“ تخنگ نا سَلاہ ایترہ۔ نکولا جانسن نا پاننگ ئس کہ سال 2010 آن سال 2017 نا نیام ئٹ تُغ ئنا خرابی نا ویل آتیٹ 300 درسد آن زیات ودکی مسنے و پٹ و پول پائک کہ ڈیجیٹل میڈیا نا تالان مننگ داٹی اہم کڑد سر تسنے۔

پٹ و پول نا ردئٹ اگہ تُغ پورا متو و اسہ ہم بندغ اس ہراتم دے ئنا بنا ءِ کم طاغت تون کیک، ہمو وخت ہم اسٹریس ہارمونز آک پیشتمرہ، اندن ذہنی ناجوڑی تیٹ بھلو کچ ئسے آ ودکی مننگ نا اسہ اہم سوب اسٹریس ءِ۔

واہم نکولا جانسن نا گیشتر پاننگ ئس کہ اونا مسخت ڈیجیٹل میڈیا ءِ اسُل گندہ پاننگ اف بلکن اونا پٹ و پول نا مسخت اسٹریس ءِ کم یا اودے جوان وڑئٹ حل کننگ نا وڑ ڈول تے ودی کننگ ءِ۔

موبائل و ٹیبلیٹ نا نیلی روشنائی، تُغ ئنا دژمن

اندا ماہر نفسیات نا ردئٹ خواننگ آن سماء تمک کہ خاص وڑئٹ ورناک تینا خاچوک ہند ئنا رہی آ سمارٹ فون ئنا سوب آن فریشانی محسوس کیرہ۔ او پائک کہ سوشل میڈیا ءِ کاریم ئٹ ہتنگ تینے آ باور کننگ آ ہم زیم شاغک۔ ورناک سوشل میڈیا غا تینا تول ءِ ایلوفتیتون کیرہ و دا تول کننگ آن تینے رکھنگ داخہ اڑزان اف، اخس خیال کننگک۔

جانسن سَلاہ تس کہ تینا کوٹی تیٹ سمارٹ فون ئنا جاگہ غا گھنٹی خلوکو گھڑی تخبو و وار وار وخت ئنا ہُننگ کن ہم دو ئنا گھڑی کاریم ئٹ ہتبو۔

اسٹریس ئٹ کمبوتی کن موبائل فون ئنا گچین کروک وخت ہم کمکار مننگ کیک۔ مثیل ئسے نا نن ئنا ہشت بجہ غان پد موبائل ءِ کاریم ئٹ ہتپننگ۔ اندا وڑ نوٹیفکیشن آتے بند کننگ و پیہن و مون موڈ ءِ مَلنگ سمارٹ فون ئنا کاریم ئٹ ہتنگ ءِ کم کننگ ئٹ کمکار مریک۔

نکولا جانسن نا ردئٹ دا غٹ گام تیان اسٹریس نا کچ دمدستی کم مریک۔ اگہ نمے گمان مریک کہ نم تینا سمارٹ فون ءِ تینا اُست خواہی آن زیات کاریم ئٹ ہتنگ اُرے، گڑا نم اونا پین ذریعت اس پَٹنگ کیرے۔ مثیل ئسے نا نم کتاب خواننگ بناء کبو، ورزش کبو یا گڑا چرینگ کن پیشتمبو۔

ضلع کیچ نا علاقہ شاپک ٹی نا درست بندغ آک پاکستانی فورسز ءِ بمب جلہو ئٹ ٹک کرینو۔

ذرائع تا ردئٹ دا جلہو ئٹ فورسز ءِ نسخان رسینگانے اندن کوالخواک دا جلہو ٹی اسہ کارندہ ئسے نا ٹپی مننگ ءِ ہم پک کرینو۔

واہم جلہو نا ذمہ واری ءِ دائسکان کس ارفتنے ۔

خیال مرے کہ برجاء تُو بلوچستان ئٹی پاکستانی لشکر آ مروک جلہو تیٹ اسہ ترندی خننگک۔

تدوکا ہفتہ کوئٹہ ٹی اسہ خودکش جلہو اسیتون اوار پاکستانی لشکر آ بھیم بش کروک جلہوک مسونو، ہرافتیٹ پاکستانی لشکر ءِ بھلو کچ ئسیٹ جانی نسخان تون مون تروئی تمانے۔

قلات و ہرنائی ٹی ارا جتاء جلہو تیٹ اسہ میجر اسیتون اوار کم و ود اسہ درزن کارندہ مرگ ئنا گواچی و بیست ٹپی مسر ۔

ہرنائی جلہو نا ذمہ واری ءِ بلوچ سلہہ بند تنظیم تا سیوتی تنظیم ‘براس’ ارفے، اندن قلات جلہو نا ذمہ واری ءِ بلوچ لبریشن آرمی ارفینے ۔

بلوچستان نا ضلع قلات و مچھ ئٹ پاکستانی لشکر نا لشکر کشی برجاء، ہیلی کاپٹر آتا ہن و بر۔

درو آن قلات نا مَشی آ لڑ تیٹ پاکستانی لشکر نا لشکر کشی برجاء ءِ اندن علاقہ ئٹ حوالکاری نظام بند کننگانے۔

لشکر کشی ٹی پند آ کارندہ تیتون اوار ہیلی کاپٹر آک بشخ ہلنگ ءُ، کیہی ہند آتیا شیلنگ نا ہم حوال آک رسینگانو۔

اندا وخت آ بولان نا علاقہ مچھ ئٹ اینو مسٹمیکو دے ہم لشکر کشی برجاء ءِ۔

حوالکار آک ٹی بی پی ءِ پاریر کہ آب گم، گونی پرا، و ایب کیب نا علاقہ غاک لشکر کشی نا پلویڑ ئٹی ءُ۔

کوالخواک لشکر کشی نا بابت دائسکان ہچو شابیتی حوال فراوان کتنو اندن علاقہ تیٹ حوالکاری نظام نا بند مننگ نا سوب نسخان تا بابت حوال آتے اسکان سر مننگ ئٹ سختی تیتون مون تروئی تمنگ ءِ۔

خیال ئٹ مرے بلوچستان نا ضلع قلات نا علاقہ جوہان ئٹ شاہ مردان نا ہند آ بلوچ لبریشن آرمی نا سرمچار آک درے ننکان پاکستانی لشکر نا کیمپ ءِ اسہ جلہو اسیٹی ٹک کریر ہرانا سوب آن 7 فورسز کارندہ مرگ ئنا گواچی اندن 18 کارندہ ٹپی مسوسر۔

جلہو نا ذمہ واری ءِ بلوچ لبریشن آرمی ارفینے واہم بی ایل اے نا پارہ غان شابیتی بیان دائسکان شینک متنے۔

صنعتی انقلاب آن مست ئنا یورپ

ڈاکٹر مبارک علی| مٹ: برناز بلوچ

دی بلوچستان پوسٹ

صنعتی انقلاب آن مست یورپی چاگڑد پدماندہی نا اسہ عکس اس ئس و اوٹی بے برابری تینا گڈیکو کچ آتے اسکان سر ئس۔ ولے ولدا ٹیکنالوجی نا بننگ و صنعت آتا جوڑ مننگ یکدم اونا بخت ءِ مٹ کرے۔

دیہاڑ ئٹ بھاز آ تدینیک ہنداخس اہم مریرہ کہ اوفک تدوکا و ساڑی آ وخت ءِ جتا کرسا اِرا بشخ کیرہ۔ تدوکا وخت قدامت پسندی نا چیدہ جوڑ مریک۔ ہندا وڑ ساڑی آ وخت دیمروی کن کسر پٹیک۔ صنعتی انقلاب نا اہمیت نا گمان ہمو وخت مریک ہراتم اوڑان مست یورپ نا چاگڑد نا سرجاچ ءِ ہلنگ مرے و اونا پدماندہی ءِ خوڑتی ئٹ اوننگ مرے۔ صنعتی انقلاب یورپ نا بیرہ زرگزرانی و چاگڑدی زند ءِ مٹ کتو بلکن ذہنی دیمروی نا سوب او تدوکا وخت آن آزات مرسا آخبت کن کسر گچین کرے۔ دا سرہال آ Carlo M. Cippolla تینا کتاب “Before The Industrial Revolution” یا صنعتی انقلاب آن مست، ئٹ یورپ نا ذکر ءِ کرینے۔

یورپ نا چاگڑد مسہ تپہ ٹی بشخ ئس۔ مذہبی اوغدہ دار، اُمراء و الس، اول اِرا تپہ مراعات یافتہ ئسر۔ ریاست نا بھلا اوغدہ آتیا ہندافتا تقرر مسکہ۔ اُمراء تیکن جنگ اسہ کاروبار اس ئس۔ انتئیکہ داٹی اوفک لُٹ و پل کرسا مڈی و دولت مچ کریرہ۔ دا تومکا طاغتور انگا تپہ غاک ہچو ٹیکس اس ہم تتورہ۔ ٹیکس ئنا بھلا باریم الس آ ئس۔ بے برابری نا سوب آن امیر و غریب نا نیامٹ بھلو فرق اس ئس۔ نیستی و لنگڑی نا سوب ڈوہ داری تیٹی ودّکی بسوسس۔ بھلا ڈوہ داریک فیوڈل لارڈز آتا کماشی ٹی اڈ تننگ مسرہ۔ دافتیٹی میڷ تا دزی قابلِ ذکر ءِ ۔

بےروزگار ورنا تیکن کاریم نا موقع غاک بھاز مچٹ ئسر۔ دافک ہمو بھٹی تیا کاریم کریرہ ہراڑے آہن تے دِیر کننگاکہ۔ موڷ ئٹی دم ہلنگ نا سوب آن اوفتا کُفت آک نزور مسرہ۔ گڑاس ورناک کوئلہ نا کانڑ تیٹی کاریم کریرہ ہراڑے صاف تہو نا کمبوتی مسکہ۔ گڑاس ورناک مویشی تا سِل تے صاف کریرہ۔ اندا خاطران اوفتیٹی ناجوڑیک لس ئسر۔ ڈاکٹر آتا کچ بھاز مچٹ مسکہ۔ علاج کن بھاز مچٹ پیسہ مسکہ۔ اسپتال ئٹی اسہ بیرم آ اِرا مریض اوار لیٹارہ۔ اندا خاطران ورنا تیٹی کہنگ نا کچ گیشتر ئس۔ چاگڑد ئٹ چرچ نا ادارہ تنیا طاغتور الو بلکن صاحبِ جائیداد ہم ئس۔ انتئیکہ اُمراک کہنگ آن مست تینا زرعی زمین نا اسہ بشخ اس چرچ ءِ تسرہ تاکہ دانا بدلہ ٹی اوفتے جنت رسینگہ۔ ارٹمیکو مذہبی ادارہ خانقاہ تا ئسک۔ داڑے راہب آک دے مچ عبادت ئٹی اختہ مسرہ۔ دا اسہ ہندنو ادارہ اس ئس ہراڑے وے لائخ و بیکار انگا ورناک راہب نا دروشم ئٹ تینا زند ءِ گدریفیرہ۔ خانقاہ تا خڑچ آتیکن ہم اُمراء تا پارہ غان ہندنو زمین تننگاکہ ہرافک زرخیز مسرہ۔ راہب آتا دا فرقہ غیر پیداواری ئس، ہرا چاگڑد نا زی آ زرگزرانی ردئٹ اسہ باریم اس ئسر۔

یورپ ٹی یانزدہ میکو کرن آن سینزدہ میکو کرن اسکان ہمو وخت مَٹی بس، ہراتم اوٹی شار تا بنداؤ تخنگا۔ رومی سلطنت نا ایسری آن پد فیوڈل لارڈز آک تینا جاگیری آ قلعہ آتیٹی رہینگارہ۔ داڑے اوفتا ملازم و فوج آک ہم رہینگارہ۔ مذہبی اوغدہ دار، تاجر و الس کن چنکو خلق مسکہ۔ ہرافتا آبادی بھاز مچٹ مسکہ ولے ہراتم تاجر آک ایلو ڈیہہ تیان تجارت ءِ بناء کریر گڑا امپورٹ مروکا سامان تیکن اوفک پانزدہ یا ہفت دے ئی بازار اڈ تسر۔ داڑے خڑک نا خلق و آبادی تیان بندغ آک بننگ بناء کریر۔ مدان مدان آ دا بازار آک مستقل منڈی تیٹی مٹ مسر۔ ہراڑے دکّانک مسرہ، ہرافک ضرورت نا ہر گڑا ءِ بہا کریرہ۔ دانا نتیجہ ٹی بوراژوازی تپہ ودی مس، ہرا ذہنی ردئٹ دیمروی پسند ئس، و فیوڈل لارڈز آتا مقابلہ ٹی بھاز عمل کروک و سرسہبی کن ہر موقع ءِ کاریم ئٹ ہیسکہ۔

شار آتا اہمیت ہمو وخت مس، ہراتم حکمران آک پوسکنا شار آتا سرپرستی ءِ کریر۔ شار آتیٹ آباد مروک تاجر آک جتا جتاؤ ادارہ جوڑ کریر، ہرافتیٹی میونسپلٹیک ہم اوار ئسر۔ میونسپلٹی تا کاریم شار ئٹ صفائی ءِ اوننگ و ڈوہ داری تے توننگ نا ئس و بندغ آتے اوفتا بنداوی حق و گرج آتے تننگ نا ئس۔ شار ئٹ دا وڑ تاجر آتا حکومت ئس و اگہ اسہ بزغر اس نرّیسہ شار آ بسکہ گڑا اودے دزگیر کننگتوکہ۔ اسہ جرمن وساعت اس ئس کہ شار ئنا فضا آزات کیک۔

شار آک اسہ پوسکنو دود ربیدہ اس ہم مونا ایسر۔ تعلیمی ادارہ آتیان بیدس ادب، آرٹ، ساز و زیمل و تعمیرات آتیٹی ہم پوسکنو فکر و خیال مونا ایسر۔

بورژوازی تپہ تینا سرمایہ، تعلیم و سیاسی آزموندہ آتا بنیات آ فیوڈل لارڈز آتا اثر ءِ ایسر کریر، ہراتم فیوڈل لارڈز آک شار آتا دیمروی ءِ خنار گڑا اوفتے مارشت مس کہ اگہ اوفک تینا جاگیر آتیا تینا قلعہ آتیٹی بند سلور گڑا اوفتا تسلط ایسر مرو۔ ہندا خاطران اوفک شار آتیٹ ہم تینکہ بھلو جاگہ تفیر، ہراڑے اوفک منہ وخت کن بسرہ رہینگارہ۔ ولے بورژوازی تپہ نا مونا اوفتا طاغت نزور مرسا ہنا۔

دا آزموندہ غان ہندا گمان مریک کہ ہمرو چاگڑد اس مرے اوڑے مَٹی تینتون تینٹ بفک بلکن اودے ہتنگ کن چاگڑد نا ذہن ءِ مٹ کروئی تمک، ہرا دا منّے کہ متکن انگا روایات آتیٹی دیمروی مننگ کننگ کپک، دیمروی کن پوسکنو خیال و فکر و ٹیکنالوجی نا گرج مریک۔ یورپ نا چاگڑد ئٹ دا گرج ءِ پوسکنا ٹیکنالوجی پورو کرے۔ خاص وڑئٹ واٹر مِل ہرا بندغی خواری تے کم کرسا اودے آسراتی تس۔ دا نقطہ نظر ئٹ ہراتم صنعتی انقلاب ءِ خواننگ مرے گڑا ننے اونا اہمیت نا گمان مریک کہ اود جہان ءِ مٹ کننگ ٹی انت کڑدار اس مونا ایسنے۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارینے کہ بی ایل اے نا سرمچار آک قلات ئٹ کوزہ گیر پاکستانی لشکر نا کیمپ ءِ جلہو ئٹ ٹک کریر۔ دا جلہو نا ذمہ واری ءِ ارفنہ ترجمان پارے کہ دا بابت شابیتی حوال زوت میڈیا غا شینک کننگو۔

یاتی مرے بلوچستان نا ضلع قلات ئٹ استو نادرست بندغ آک پاکستانی لشکر نا اسہ کیمپ ئسے ترند حالیت نا جلہو اسیٹی ٹک کرینو۔

کوالخواک جلہو ئٹ ہفت کارندہ نا مرگ ئنا گواچی مننگ و ہژدہ نا ٹپی مننگ ءِ پک کرینو۔

کوالخواہ تا ردئٹ قلات نا علاقہ شاہ مردان ئٹ ننکان نادرست بندغ آک جتا پارہ غاتیان پاکستانی لشکر نا کیمپ ءِ بھلو حالیت ئسے نا جلہو ئٹ ٹک کریر۔

مرگ ئنا گواچی مروک کارندہ تا چاہنداری نیک بخت زمین، غلام اسحاق، عبدالقدیر، رضوان، وقاص، علی عباس، و ثاقب رحمان نا پِن تیٹ مسنے۔

جلہو ئٹ ہژدہ کارندہ ٹپی ہم مسنو ہرافتے کوئٹہ سی ایم ایچ آ دننگانے۔

خیال ئٹ مرے بلوچستان ئٹ برجاء ہفتہ ئٹ مروک جلہو آتیٹ اسہ وار آ ودکی خننگ ئٹ بننگ ءِ۔ برجاء ہفتہ بلوچستان نا جتا علاقہ تیٹ چِل و پنچ آن زیات جلہوک رپورٹ مسنو۔

بلوچ سلہہ بند تنظیم آتا سیوت ”براس“ درو اسہ بیان اسیٹی چِل و پنچ جلہو تیٹ میجر تون اوار بیست کارندہ ءِ مرگ ئنا گواچی کننگ نا ذمہ واری ارفیسس۔

بلوچستان ئٹ پولیو نا کیس تیٹ چرجوئی ئٹ ودکی مریسہ ءِ، ہراڑان جانجوڑی نا کوالخواہ تیٹ خُلیس خننگک۔

نیشنل انسٹی ٹیوٹ آک ہیلتھ نا پولیو ریجنل ریفرنس لیبارٹری نا رپورٹ نا ردئٹ، بلوچستان دا سال کل آتیان زیات پولیو آن زیمی مسنے، ہراڑے 24 کیس رپورٹ مسنو۔ سندھ ئٹ 12، خیبرپختونخواہ ئٹ 9 و پنجاب و اسلام آباد ئٹ اسہ کیس اس مونا بسنے۔

جانجوڑی کوالخواہ تا ردئٹ بلوچستان ئٹی پولیو نا ترندی ئٹ تالان مننگ نا بھلا سوب لمہ باوہ غاتا پارہ غان ویکسین نا بابت رد خیال و ویکسین کُنفنگ آن نمن کننگ ءِ، داڑان بیدس گڑاس علاقہ ئٹ پولیو ورکرز آتا جوان وڑئٹ کاریم کپننگ ہم رپورٹ مریسہ ءِ، ہراڑے چنا تے بیدس پولیو کُنفنگ آن اوفتا پنڈی تیا پولیو کُنفنگ نا نشان آک خلنگسہ ءُ۔

ورلڈ ہیلتھ آرگنائزیشن (ڈبلیو ایچ او) دا ویل آ خُلیس نا درشانی کننگ ءِ۔

ڈبلیو ایچ او نا ردئٹ پنڈی تیا دروغ نا نشان آک پاکستان ئٹ پولیو نا ایسری نا کوشست آتیٹ کل آن بھلا ہڑاند آک ءُ خیبرپختونخوا و بلوچستان ئٹ جعلی نشان خلنگ نا تدینیک مونا بسنو، ہرافتا سوب آن ویکسینیشن نا رپورٹنگ و اونا کاریم کننگ آ سوج آک بش مننگ ءُ۔

ڈبلیو ایچ او نا ترجمان مریم یونس نا ردئٹ، دا سال پاکستان ئٹ 49 پولیو نا کیس رپورٹ مسنو، ہرافتیان 24 بلوچستان آن ءُ۔

او پارے کہ جعلی پنڈی تا نشان آک ویکسینیشن نا کاریم ءِ نسخان تسنو، انتئے کہ دافک اصل کچ ءِ ڈھکنگ نا سوب جوڑ مننگ ءُ۔

بلوچستان نا نیشنل اسٹاپ ٹرانسمیشن آف پولیو نا صوبائی ٹیم لیڈر ڈاکٹر آفتاب کاکڑ پارے کہ جعلی پنڈی تا نشان خلنگ، کم ویکسینیشن مہم آک و نزور انگا چناک دا کیس آتا ترندی ئٹ تالان مننگ نا بنداوی سوب آک ءُ۔

یاتی مرے کہ پاکستان ئٹ پولیو نا ایسری نا مہم 1994 ئٹ بنا مسوسس، و اوکان پد پولیو نا کیس آتیٹ کمبوتی بسنے، 2018 ٹی پولیو نا بیرہ 8 کیس رپورٹ مسوسر، واہم دا سال کیس تا کچ دوارہ ودانے۔

ڈبلیو ایچ او پولیو نا ایسری نا مہم ءِ ودفنگ کن خاص وڑئٹ دا چنا تیا پام تننگ نا گرج آ زور شاغانے ہرا آپریشنل ویل، ویکسینیشن نا لپڑزہی، رکھ ئنا سختی و بائیکاٹ نا سوب آتیان چرجوئی ئٹ خن تیان چپ مننگ ءُ

وائس فار بلوچ مسنگ پرسنز نا ردئٹ آواران آن زوراکی ئٹ بیگواہ حاصل خان نا شابیتی حوال تے اونا ایلم تنظیم تون جمع کرینے۔

وائس فار بلوچ مسنگ پرسنز نا شینک کروک بیان نا ردئٹ ظفیر احمد پارے کہ اونا ایلم حاصل خان ولد یارو خان ءِ برجاء سال 26 اپریل آ پاکستانی لشکر پنڈی چیک پوسٹ آرمی مشکے آواران آن فون کریسہ پاریر کہ بر پیشی ءِ نا گڑا کنا ایلم تینا تاتہ مار ئتون چیک پوسٹ آ ہِنا فورسز نا اسہ کارندہ اس سلیم تون پارے کہ دکان آن ننکہ گڑاس سودا ہڷ سلیم سودا ہلنگ آن پدا ہراتم چیک پوسٹ آ بس گڑا حاصل خان اوڑے ساڑی الو ہراتم سلیم آرمی والا تیان سوج کرے کہ حاصل خان ہرادے گڑا آرمی والاک پاریر کہ حاصل خان ءِ سر و سوج کن درینن سر و سوج آن پد اِلون تہ۔ ہفت توہ تدینگ آن پد نہ حاصل خان ءِ اوفک اِلار و نئے کہ اونا بابت خاہوت ءِ معلومداری فراوان کننگانے ہرانا سوب اونا خاہوت بھاز ذہنی ازیت نا گواچی ءِ۔

او پارے کہ تنظیمی تلہ غا ظفیر احمد ءِ باوری ترفنگا کہ اونا ایلم حاصل خان نا کیس ءِ حکومت، بیگواہ بندغ تیکن جوڑ کروک کمیشن و اقوام متحدہ نا زوراکی نا بیگواہی تیکن کاریم کروک گروپ ءِ تننگو و اونا رکھوک یلہ کننگ کن ہر تلہ غا توار ارفنگو۔

نصراللہ بلوچ حکومت آن خواست کرے کہ حاصل خان آ دوبہ اس ارے گڑا اودے مونا ہتیسہ عدالت ئٹ پیش کننگہ و اگہ بے ڈوہ ءِ گڑا اودے دمدستی یلہ کریسہ اونا خاہوت ءِ تیوہ زند ئنا ڈکھ و تادی آن خلاسی تننگہ۔

بلوچستان نا دریابی شار گوادر و خاران آن پاکستانی لشکر مُسہ بندغ ءِ دزگیر کریسہ بیگواہ کرینے۔

بیگواہ کننگوک آتا چاہنداری سردار لیاقت نا مار نصرت اللہ، عصاء نا مار منیر، و منشی عبداللہ نا مار محمد حسن نا پِن تیٹ مسنے۔

اوفتیٹ نصرت و محمد حسن ءِ خاران نا کلان آن و منیر ءِ گوادر آن دزگیر کریسہ بیگواہ کننگانے۔

بلوچستان نا علاقہ زیارت ئٹ درو ننکان سلہہ بند بندغ آتا بھلو کچ ئس کسر ءِ تفیسہ گاڑی تا پٹ و پول ءِ کرے۔

ناکہ بندی نا وخت آ سم کاری ہم کننگا، وختس کہ ہندا وخت آ سلہہ بند بندغ آک اِرا بندغ چاہنداری آن گڈ تینتون اوار دریر و پدان اوفتے کھسفیر۔

ایلو پارہ غان اینو سہب ئنا پن کروک علاقہ ٹی سر مروکا پاکستانی لشکر نا بکتر بند گاڑی ءِ تراک ئٹ ٹِک کننگا۔

تراک ئٹ میجر اسیتون اوار اِرا بندغ مرگ ئنا گواچی و کہیک ٹپی مسر۔

بلوچستان نا علاقہ زیارت ئٹ مروکا جلہو ئٹ مرگ ئنا گواچی مروکا میجر نا چاہنداری مس۔

حوالی تا رد ئٹ زیارت مانگی ڈیم نا ہند آ مروکا جلہو ئٹ پاکستانی لشکر نا میجر حسیب و حوالدار نور محمد مرگ ئنا گواچی مسنو۔

زیارت ئٹ درو ننکان سلہہ بند بندغ آتا بھلو کچ ئس ناکہ بندی کرسہ گاڑی تا پٹ و پول ءِ کریر۔ اینو سہب ئنا پن کروک علاقہ ٹی رسینگوکا پاکستانی لشکر نا بکتر بند گاڑی ءِ تراک ئٹ ٹِک کننگا۔

یاتی مرے کہ اِرا دے نا تہٹی تیوہ بلوچستان ئٹ فورسز تون اوار مڈی دروکا گاڑی و گیس پائپ لائن آتیا 40 آن زیات جلہو رپورٹ مسنے۔