اِرا دے ئٹی تیوہ بلوچستان ئٹ پاکستانی لشکر فرنٹیئر کور، لیویز فورس، کوسٹ گارڈ آتیتون اوار مڈی دروک گاڑی و گیس پائپ لائن آتے اِرا درزن آن زیات جلہو تیٹی ٹک کننگانے۔

استو اورماڑہ و پسنی نا نیام ئٹ کوسٹل ہائی وے آ سلہہ بند بندغ آتا بھلو کچ اس مُسہ جتا ہند؛ جعفری کور، خواری چیک پوسٹ و چائی نا ہند آ کسر تے بند کریر۔ دا وخت آ ہنوک بروک گاڑی تے پَٹار۔

علاقائی حوالکار تا ردئٹ اندا وخت آ کوسٹ گارڈز نا کیمپ ءِ سلہہ بند بندغ آک ترند حالیت نا جلہو ئٹ ٹک کریر ہرانا سوب آن فورسز آتا جانی نسخان ارفنگ نا حوال آک رسینگانو اندا وخت ئٹ پولیس نا پوسٹ ءِ جلہو ئٹ ٹک کریسہ کوزہ کننگا۔

تدوکا اِرا دے ئٹ بلوچستان نا جتا علاقہ مستونگ، تربت، خاران، گورکوپ، ہوشاب، ڈیرہ بگٹی، مشکے، بولان، بلیدہ، زامران، ہیرونک، پنجگور، بارکھان، آواران، دکی، کوہلو، تمپ و گوادر ئٹ سی آن زیات جلہو کننگانو۔

دا جلہو تا ذمہ واری ءِ دائسکان ہچو تنظیم اس ارفتنے واہم حوالکار آک ٹی بی پی ءِ پاریر کہ بلوچ سلہہ بند آجوئی دوست تنظیم آک اواری ئٹ دا کاروائی تے سر تننگ ءُ۔

خیال ئٹ مرے 25 و 26 اگست نا نن بلوچ لبریشن آرمی ”آپریشن ھیروف“ نا ردئٹ بلوچستان نا 13 ضلع ئٹ کاروائی کریسہ بنجاہی کسر تے تینا کنٹرول ئٹ کریسس اندن دا وخت آ عسکری تنصیبات، فورسز پوسٹس، ریلوے ٹریکس و پول، مڈی دروک گاڑی تے ٹک کننگا اندن لیویز و پولیس پوسٹس آتیا کوزہ کریسہ اوفتا سلہہ و گولہ بارود آتے دوئی کننگاسس۔

بلوچ لبریشن آرمی نا آپریشن ھیروف ئٹ ترند حالیت نا جلہو اس بیلہ ئٹ کننگا ہراڑے بی ایل اے مجید بریگیڈ نا جند ندر آک پاکستانی لشکر نا بیلہ ہیڈکوارٹر آ جلہو کریسہ اوڑا کوزہ کریر۔

بلوچستان نا ضلع خاران آن پاکستانی لشکر اسہ بندغ ئسے دزگیر کریسہ بیگواہ کرینے۔

بیگواہ کننگوک ورنا نا چاہنداری سعید احمد نا مار وسیم نا پن ئٹ مسنے۔

پن کروک بندغ پوریا نا ردئٹ قصاب ئسے ہرادے درو پیشیم نا دوانزدہ بجہ غا پاکستانی لشکر خاران گواش روڈ آن اونا دکان آن دزگیر کریسہ بیگواہ کرینے۔

پارہ خیسُن اڑزان مس
داڑا غریب حیران مس
وا ہم وسّان تیرے ننا
یاراک خیالے کیرے ننا
ہرمَش خیسُ ریکو نا ڈِک
گوادرسوئی ہم زر شندِک
مچّی ،کولا ،مر مر داڑے
گنج آ تاہر جا کاںڑے
نعمت رب تس دزاک لُٹّار
ننے کُنپس؟ خنک تا سِٹّار
مُختے تفِن ، جنگا لانچپن
کڈّے پا نا ؟ ہمہ خُتپن
خیسُن ، تا نی ھیتے کپّہ
ارف تینے زُو کر نی ڈپّہ
داسہ ہوشے ہوشا ایسُن
ننا او کُل خیسُن پیہُن

    شاہ بیگ شیدا

شہید سفر خان نا پنا

شاعر: بارگ بلوچ

ورنائی اے صدخہ کرینے یاسر جان
تینے اسلمی فکر اٹ تفینے یاسر جان

جنگ اٹ وطن آ نشان تس بہادری ءِ
ننا کسر تے اٹ پھل بٹینے یاسر جان

اینو زیبا کرینے درہ ءِ مولہ اے یار
مش ئنا ڈکھ آتے آن تدینے یاسر جان

نا شہادت ننا امید او حوصلہ ءِ یار
وطن اٹ او گواڑخ دسینے یاسر جان

نا گچینا ہیتاک یاد او ننے جانان پھل
او سرزمین کِن دتر وہے فینے یاسر جان

اینو زندہ کرینے پدا دلجان نا جوزہ ءِ
مہر حوصلہ نا ننکے سبخے یاسر جان

نوشکی اٹ مالو عزیز جان نا شہادت
جتائی نا ننے ہوش آن درینے یاسر جان

نوروز نا مولہ سینگار تولوک اس نیکے
نے آ اینو ناز ءِ میرین نا نوشکے یاسر جان

ایکا شار اٹ زراب نا سنگت آک نیتو
شہید مس عدنان نیتو اوارے یاسر جان

مشی آ تینا ایلم آتو ہم گام اے عدنان
تینا فرض اے ادا کریسہ زرابے یاسر جان

الوفن نن نا انقلابی آ توفک اے بٹینگ کِن
بارگ نا قول اے نیتو اندادے یاسر جان

بھیم بش کروک جلہو – ٹی بی پی سرگپ

نو نومبر نا سہب اکن بلوچستان نا بنجاہی شار کوئٹہ نا ریڈ زون ئٹ ریلوے اسٹیشن آ پاکستانی لشکر نا نان کمیشنڈ افسر آتا اسہ یونٹ اس کوئٹہ کینٹ ئٹ فوج ئنا اسکول آف انفنٹری اینڈ ٹیکٹکس آن تربیت پورو کریسہ تینا علاقہ تیا ہِننگ کن ہموڑے ساڑی ئسر کہ بلوچ لبریشن آرمی نا جند ندر یونٹ مجید بریگیڈ نا محمد رفیق بزنجو جند ندری جلہو کرے۔ دا جلہو پاکستانی لشکر نا دیہاڑ ئٹ اوفتیا اولیکو بھیم بش کروک جلہو ئس، ہراٹی فوج ئنا سی و یک نان کمیشنڈ افسر مرگ ئنا گواچی و پنجاہ غان زیات ٹپی مسر۔

آپریشن ہیروف آن پد کوئٹہ ئٹ پاکستان نا وزیر داخلہ محسن نقوی پاریسس کہ بلوچ سرمچار آک اسہ ایس ایچ او ئسے نا دو ئنا ءُ و ملخدو نا ریلوے اسٹیشن جلہو آن پد پاکستانی لشکر نا سروک عاصم منیر نا پاننگ ئس کہ راجی آجوئی نا تحریک نا برخلاف فوج ءِ الس نا مُخ تفی دوئی ءِ، دا بیان آک بلوچستان نا گواچن حالیت آتیان بے سمائی نا درشانی ءُ انتئے کہ اگہ بلوچ الس نا مُخ تفی بلوچ آجوئی کن کاریم کروک سلہہ بند تنظیم آتے دوئی متوکہ گڑا او پاکستانی لشکر آ پد مہ پد بھیم بش کروک جلہو کننگ ئٹ سرسہب متورہ۔

اسہ توہ ئسے نا نیام ئٹ چین ئنا سرمایہ کار و پاکستانی لشکر نا کارندہ تیا مجید بریگیڈ و بی ایل اے نا انٹیلیجنس ونگ زراب نا دا ارٹمیکو بھیم بش کروک و سرسہب جلہو ءِ۔ پاکستانی لشکر نا پنجاب رجمنٹ، ناردرن لائٹ انفنٹری رجمنٹ، سندھ رجمنٹ، فرنٹیئر فورس رجمنٹ، بلوچ رجمنٹ، و آزاد کشمیر رجمنٹ نا سپاہی تیا درست معلومداری تا بنیات آ سرسہب جلہو، انٹیلیجنس نا بابت مجید بریگیڈ و زراب نا لائخی تیٹ پوسکنی نا پاش درشانی ءِ۔

دا جلہو دا ہیت ئنا شاہدی ءِ کہ بروک وخت ئٹ بلوچ لبریشن آرمی نا جند ندر یونٹ مجید بریگیڈ و انٹیلیجنس ونگ زراب نا چین و پاکستان نا عسکری و معاشی تنصیبات آتیتون اوار پیشن ملکی سرمایہ کار آتا مفاد آتیا بھیم بش کروک جلہوک برجاء مرور و پاکستانی عسکری کوالخواہ تا دعویٰ تیان چپ بلوچستان ئٹ بلوچ آجوئی نا جنگ ئنا تہوش ودو۔

بلوچستان نا علاقہ آواران و گوادر ئٹ نا درست آ سلہہ بند بندغ آک لیویز و کوسٹ گارڈ آ جلہو کرینو۔

حوال آتا رد ئٹ بلوچستان نا ضلع آواران ئٹ نا درست آ سلہہ بند بندغ آک لیویز آ جلہو کرسہ اوفتا سلہہ و مڈی تے تینتون دریر۔

لیوہز آ جلہو آواران نا علاقہ گیشکور ھور ئنا ہند آ مسنے۔

حوال تا رد ئٹ سلہہ بند بندغ آک ود و کم دہ توفک تینتون اوار دریر۔ واہم دا وخت آ ہچو جانی نسخان ئسے نا احوال رسینگتنے۔

تدینی نا ذمہ واری ءِ دائسکان کس ارفتنے۔

ایلو پارہ غا نا درست آ ٹالر آتیان کوسٹ گارڈ آ جلہو کرسہ میجر اسیتون اوار اِرا کارندہ ءِ ٹپی کرینو۔

گوادر آن احوال آتا رد ئٹ تحصیل اورماڑہ نا دریابی ہویل ئٹ کوسٹ گارڈ نا گشتی ٹیم ئسے آ سم کاری آن میجر، اسیتون اوار اِرا کارندہ ٹپی مسنو ہرافتے بھاز ٹپی آ حالیت ئٹ کراچی آ سر کننگانے۔

حوال تا رد ئٹ یک شمبے و دوشمبے نا نن نیمہ آ اورماڑہ و کلمت نا نیام ئٹ پاکستانی کوسٹ گارڈ نا پٹرولنگ ٹیم دریاب ئٹ گجہ ٹرالر آتا برخلاف پٹرولنگ کننگ ئسر کہ گجہ ٹرالر آک کوسٹ گارڈ ٹیم آ سم کاری کریر۔

سم کاری نا سوب کوسٹ گارڈ نا میجر جلال الدین تون اوار اونا اِرا پین سنگت سپاہی توصیف عمر و ابرار ٹپی مسنو۔

کارندہ و میجر ءِ اورماڑہ ٹی بناہی جانجوڑی کمک فراوان کننگ آن گڈ جمی وڑ ئٹ کراچی آ سر کننگا۔

استو فورسز کیمپ آ جلہو آن گڈ علاقہ ئٹ کرفیو نافذ ، ہن و بر نا کسرک بند ، ارا ورنا زوراکی ئٹ بیگواہ

بلوچستان نا ضلع کیچ نا علاقہ دشت کڈان آن حوال آتا ردئٹ استو فورسز نا کیمپ آ جلہو آن گڈ بھلو کچ ئسیٹ آپریشن بناء کننگانے ۔

حوال تا ردئٹ ، جلہو آن گڈ علاقہ ئٹ دکان و خوانندہی ادارہ غاک بند کننگار و کرفیو نافذ ءِ ۔

علاقہ نا ہن و بر کسرک بند کننگار اندن موبائل نیٹ ورک ہم بند کننگانے ، ہراڑان بندغ آتیٹ خلیس تالان مسونے ۔

ہندی ذرائع نا پاننگ ئس کہ علاقہ ئٹ ہیلی کاپٹر آتا بال کننگ برجاء ءِ و بھلو کچ ئسیٹ لشکر تالان ءِ۔

دشت فورسز آپریشن نا وختا، ارا ورنا ءِ دزگیر کریسہ نا درست ہند آ دننگ آن گڈ حوال آک مونا بسر ہرافتا چاہنداری طلال ولد عمر و عامر بلوچ ولد ابراہیم نا پن ئٹ کننگار ۔

دزگیری تا بابت آن گیشتر حوال دوئی کننگتو ۔

شابیت مرے کہ تدوکا نن سلہہ بند بندغ آک دشت کڈان ئٹ پاکستانی فورسز نا کیمپ آ جلہو کریسر ہراٹی اسہ کارندہ نائیک سیف اللہ مرگ ئنا گواچی و 8 ٹپی مسر ، جلہو آن گڈ فورسز علاقہ ءِ گھیرہ کریسہ سرچ آپریشن نا بناء کرے ۔

پن کروک جلہو نا ذمہ واری دسکان اسہ ہم ٹولی ئس ارفتنے ، آزاتی دوست تنظیم آتے اندننگا جلہو تیٹ اوار سمجھیرہ ۔

علاقہ ئٹ برجاء آپریشن و کرفیو نا سوب شاری تا زند زیمی مسونے و مواصلاتی نظام نا بندی نا سوب گیشتر شابیتی حوال اسکان سر مننگ مشکل ءِ ۔

جیش العدل استو، دے کہی بلوچستان نا علاقہ ساراوان ئٹ ایرانی بسیج نا کارندہ غاتیا جلہو آن بے چکاری نا درشانی ءِ کرسہ پارینے کہ پنچ بلوچ بیسج آتا کھسفنگ سارچائی و سیاسی مسخت تون اوار حکومت نا سیکورٹی ادارہ غاتا چم ءُ کاروائی ئسے۔ انجا نن اُلس ءِ باوری ئٹ پامدار کینہ کہ دا پنج کارندہ آئی آر جی سی انٹیلی جنس آرگنائزیشن نا دو آن خلنگانو۔

بیان ئٹ پاننگانے کہ دا وخت آ بلوچستان نا جہادی مزاحمت نا برخلاف وڑ وڑ ئنا چم آک مننگو، دا چم آتا پوسکنا دروشم سیم سری علاقہ سرکان ئٹ بلوچ بیسج آتا کھسفنگ ءِ، بیدس شک آن دا غٹ چم آتا اوار لائخیک جیش العدل گًل ئنا پنی مننگ ءِ ٹک کننگ و لس اُلس نا نیام ئٹ مری ودی کننگ نا کوشست ئسے۔

بلوچستان نا ضلع نوشکی ٹی پاکستانی لشکر نا پوسٹ ئسے سلہہ بند بندغ آک جلہو ئٹ ٹِک کرینو۔

پاکستانی لشکر نا پوسٹ ءِ درو ننکان ہشت بجہ نا وخت آ زرین جنگل نا ہند آ ٹِک کریر۔

ہندی حوالی تا رد ئٹ ہرے اسکان سم کاری نا لڑ برجاء مس۔

کالخواک دا باروٹ دائسکان ہچو احوال ئس مونا ہتتنے۔ پن کروک علاقہ ٹی آجوئی دوست سلہہ بند گًل آک متحرک ءُ واہم دا جلہو نا ذمہ واری ءِ دائسکان کس ئس ارفتنے۔