بلوچستان نا دریابی شار گوادر ئٹ زوراکی ئٹ بیگواہی آن پد آجو مروک بندغ ءِ نادرست سلہہ بند بندغ آک سم کاری کریسہ کسفیر۔

کسفنگوک بندغ نا چاہنداری ذکریا زہیر نا پن ئٹ مسنے۔

پولیس نا ردئٹ پن کروک بندغ لیویز فورس نا ملازم اس ئس ہرا منہ وخت مالو پاکستانی لشکر نا دو آن زوراکی ئٹ بیگواہی نا گواچی کریسس ہرا پدان آجو مسوسس۔

بلوچ نیشنل موومنٹ نا بندغی حق آتا ادارہ غاک پانک بلوچستان نا شار گوادر ئٹ ذکریا زہیر نا ٹارگٹ کلنگ نا مذمت کریسہ پارے کہ ذکریا زہیر ہرا داکان مالو پاکستانی لشکر نا دو آن زوراکی ئٹ بیگواہ کننگاسس۔ او پارے کہ اودے 27 ستمبر 2024 آ برمتہ و پدان آجو کننگاسس۔

امریکہ نا شار لاس اینجلس ئٹ لگوکا خاخر آن دائسکان 10 ہزار نا کچ اُرا ہُشنگانو و اسہ لکھ 80 ہزار بندغ ہمپ لڈ کرینو و پین اِرا لکھ شاری تا علاقہ آن پیشتمنگ نا خلیس ارے۔

لاس اینجلس ئٹ سئے شمبے نا سہب آ لگوکا خاخر ءِ مُسہ دے مسنے ہرا پنچ جتاؤ جاگہ غا لگنگ ءِ۔

خاخر آن کُل آن زیات نسخان پیسیفک پیلیسیڈز نا جہی علاقہ و پیساڈینا کاؤنٹی نا علاقہ غاتے مسنے۔ ہرادے شار ئنا دیہاڑ نا غٹ آن زیات بھس کاری کروک خاخر پاننگک۔

پن کروک ہڑتُما علاقہ غا تیٹ خاخر نا سوب آن 34 ہزار ایکٹر زمین ہُشنگسہ ہِس مسنے و خاخر کھسفوکا ٹولی خاخر ءِ کھسفنگ نا کوشست کننگ ءِ۔

ہرا جاگہ غا تیا خاخر کھسفنگانے اوڑے دوارہ بروکا بندغ آتے ہِس آن بیدس ہچ دو بتنے۔

اندن خبر تروک ادارہ ‘رائٹرز’ نا رد ئٹ جتا جہہ تیا لگوکا خاخر آن ہفت بندغ نا کھئینگ ءِ کوالخواک پک کرینو۔ وا ہم دا رد ئٹ ودیک پٹ پول مننگ ءِ۔

اندن ریاست کیلی فورنیا نا شار کالاباسز نا خڑک پنچ شمبے نا دے خاخر لگانے ہرا تیزی ئٹ تالان مننگ ءِ۔

کالاباسز امریکہ نا نہادی آ شار تیان اسٹ پاننگ مریک ہراڑے کیہی سلیبریٹیک رہینگرہ۔

خضدار نا علاقہ زہری و ایب کیب ئٹ ڈرون طیارہ و ہیلی کاپٹر آتا بال برجاء ءِ۔

ہندی حوالکار تا ردئٹ علاقہ نا آسمان ئٹ شش ہیلی کاپٹر آتیتون اوار ڈرون طیارہ غاک خننگانو۔

خیال ئٹ مرے درو بلوچ لبریشن آرمی زہری نا علاقہ ءِ دہ گھنٹہ آن زیات تینا کنٹرول ئٹ تخاسس، پدان پن کروک بندغ آک نادرست کنڈ ئسے آ پیشتمار۔

درو ہم علاقہ ئٹ ہیلی کاپٹر آتا بال خننگا واہم ہچ کننگ متئو اندن علاقہ نا پارہ غا ہِنوک فورسز نا قافلہ ءِ بمب تراک ئٹ ٹک کننگ آن پد سلہہ بند بندغ آک جلہو کریسر۔

بلوچ لبریشن آرمی نا سرمچار آک درو زہری علاقہ نا تھانہ، نادرا آفس، بینک و میونسپل کمیٹی آ کوزہ کریسر اندن دا وخت آ سلہہ بند بندغ آتا گشت برجاء مس و مخلوق تون تران کننگا۔

چاگڑدی حوالکاری تلہ تیا تالان مروک ویڈیو تیٹ بلوچ آجوئی دوست آتے کوزہ کروک گاڑی و موٹر سائیکل آتیا خننگ مریک۔

بلوچ لبریشن آرمی نا ترجمان جیئند بلوچ اسہ چنکو بیان اسیٹی جلہو نا ذمہ واری ءِ ارفسہ پارے کہ شابیتی بیان زوت شینک کننگو۔

بلوچستان نا ضلع کیچ آن پاکستانی لشکر اِرا بندغ ءِ دزگیر کریسہ بیگواہ کرینے۔ 

بیگواہ مروک آتا چاہ داری فیض ئنا مار کیا و بشیر نا مار کینگی نا پن تیٹ مسنے۔

پن کروک بندغ آتے استو پاکستانی لشکر بلیدہ نا علاقہ مینار آن چھاپہ خلیسہ دزگیر کرینے ہراڑان پد او بیگواہ ءُ۔

خاہوت نا ردئٹ فورسز آک اُرا غا چھاپہ خلیسہ اوفتے دزگیر کریر ہراڑان پد ننے سماء اف کہ او ہراڑے و انت حالیت ئٹی ءُ۔

خاہوت بندغی حق آتا ادارہ تیان خواست کریسہ پارینے کہ او ننا بندغ آتا آجوئی کن توار بڑز کیر۔

ضلع خضدار نا تحصیل زہری ٹی اینو سہب ئنا مالو سلہہ بند بندغ آک بھلو کچ اسیٹ پیہسہ لیویز تھانہ، بینک و نادراہ آفس تون اوار تیوہ علاقہ ءِ تینا کنٹرول ئٹ کرینو۔ اندن پن کروک کارروائی نا ذمہ واری ءِ بی ایل اے ارفسہ پارینے کہ سرمچار آک زہری ءِ تیوہ وڑئٹ تینا دوٹی کرینو۔

حوال تا ردئٹ اینو سہب ئنا سلہہ بند بندغ آتا بھلو کچ اس زہری ٹی پترینگسہ پولیس تھانہ، بینک و نادراہ آفس ءِ تینا وس ئٹ کننگ آن پد لیویز تھانہ و نادراہ آفس ءِ خاخر تسر و تھانہ نا سلہہ، گولہ بارود و ایلو سامان تے کوزہ کننگ تون اوار کسر تیا گشت ہم کریسہ کریر۔

کمشنر قلات ڈویژن محمد نعیم بازئی فون آ میڈیا ءِ پارے کہ جلہوکار آتا کچ 80 نا کچ ئس، ہرا پوسکنو سلہہ ارفسہ گاڑی و موٹر سائیکل آتیا بسوسر۔

جلہو نا بابت ڈی آئی جی خضدار پولیس سہیل خالد نا پاننگ ءِ کہ جلہو نا باروئٹ ہچ پاننگ مفک و دا بابت اسہ بڑزکو تلہ نا اوڑدہی اس مننگ ءِ۔

اندن زہری آن شینک مروک ویڈیو تیٹ سلہہ بند بندغ آتے ہندی مخلوق تون ہیت کریسہ ہم خننگ مریک ہراڑے اوفتے بِننگ کن بھلو مخلوق اس ساڑی ءِ۔

گیشتر حوال تا ردئٹ زہری نا علاقہ سنی آن خڑک پاکستانی لشکر و سرمچار آتا نیام ئٹ جھڑپ مسنے اندن علاقہ ئٹ تراک و سم کاری نا توار ہم بِننگانے۔

بلوچ لبریشن آرمی نا ترجمان جیئند بلوچ پارے کہ سرمچار آک اینو خضدار نا علاقہ زہری ءِ تیوہ وڑ ئٹ تینا وس ئٹ کریسہ، غٹ سرکاری ادارہ آتے تینا دزگیر ئٹ کریسہ پولیس تھانہ ءِ خاخر تسنو۔

ترجمان پارے کہ زہری دائسکان بلوچ سرمچار آتا وس ئٹی ءِ۔ دا جلہو نا زمہ واری ءِ بی ایل اے ارفک و شابیتی بیان میڈیا غا زوت شینگ کننگو۔

مننگ کروک وڑ ئٹ پاکستانی لشکر نا راہشون نا تربت آ بننگ نا رِدئٹ ایف سی و آرمی نا تعلیمی چوک آن ڈی بلوچ اسکان کسر تیوہ بند کننگانے، کس ءِ شار نا پارہ غا ہننگ نا موکل تننگ افس ۔

پاکستان آرمی و ایف سی دوشمبے نا سہب تعلیمی چوک آن ہلیس ڈی بلوچ اسکان کسر ءِ تیوہ وڑ ئٹ بند کرینو داڑان اوورسیز و سیٹلائٹ ٹاٶن نا تیوہ ہند گھیرہ ٹی ءِ اندن شاہی تمپ ، بہمن ، ڈنک و گوگدان نا علاقہ تیٹ سد آتا کچ لشکری کارندہ آک گھاٹ تننگو ۔

لشکری کارندہ غاک کسر تیا گھیرہ خلیسہ ہن و بر کروک آ بندغ آتے کسر آ توریرہ ہرانا سوب آن سد آتا کچ تربت شار آ بروک بندغ آک خوار ءُ ، نمائندہ نا ردئٹ ڈی بلوچ نا کسر آ سفر کروک آ گاڑی تا مرغنو چِر ئس لگوک ءِ ہرافتیٹ نیاڑی ، چنا و بیمار ہم سوار ءُ ۔

اسہ احوال ئسے نا ردئٹ اینو پاکستانی لشکر نا سربراہ میجر جنرل عاصم منیر مننگ کروک وڑ ئٹ تربت آ بننگ ءِ و او ہمو ہند آ ہم نظر شاغو ہراڑے ارا دے مالو بی ایل اے جند ندر جلہو ٹی پاکستانی لشکر نا ٹولی ءِ ٹک کریسہ کم و ود 47 کارندہ آتے مرگ ئنا گواچی کریسس ۔

ذرائع نا ردئٹ آرمی چیف مننگ کروک وڑ ئٹ ٹپی کارندہ آتا خوش آمدی ہم کرو ۔

بلوچستان نا ضلع کیچ نا علاقہ زامران ٹی پاکستانی لشکر ءِ آئی ای ڈی جہلو ئٹ ٹک کرینو ۔

احوال آتا ردئٹ اینو سہب زامران نا علاقہ پوگنزان ٹی پاکستانی لشکر نا ٹولی ٹی اوار مروک اسہ گاڑی ئسے بمب جلہو ئٹ ٹک کننگانے ہرانا سوب آن لشکری کارندہ آتے جانی نسخان تون مون تروئی تمانے ۔

علاقائی ذرائع تا ردئٹ جلہو آن گڈ علاقہ ٹی ارا ہیلی کاپٹر سر مسونو ۔

کوالخواہ تا پارہ غا تدینی ءِ پک کریسہ پاکستانی لشکر نا اِرا کارندہ سپاہی نجم شاہ و اطہرالدین تون مرگ ئنا گواچی مسونو و اسہ کارندہ اسیتون اوار اسہ کمکار اس تا خلنگانے۔

  زامران ئٹ بلوچ سلہہ بند تنظیم آک ساڑی ءُ ہرا پاکستانی لشکر ءِ جتاء وڑ ئنا جلہو آتیٹ ٹک کریسہ کریسہ کرینو۔

خدو ایسری دے تیٹ کیچ نا علاقہ گورکوپ و دشت ٹی ارا بمب تراک ئٹ پاکستانی لشکر ءِ ٹک کننگانے ہرافتیٹ جمعی وڑ ئٹ کم و ود ہشت کارندہ مرگ ئنا گواچی مسر  ۔