بلوچستان نا ضلع دکی ٹی پاکستانی لشکر نا لشکر کشی، فورسز آک چھاپہ خلیسہ اُرا تے پَٹار۔
دکی ٹی پاکستانی لشکر بھلو کچ اسیٹ لشکر کشی ٹی اختہ ءِ۔ حوالکار آک ٹی بی پی ءِ پاریر کہ زمینی فورسز آک علاقہ ئٹ بھلو کچ ئسے آ لشکر کشی کننگ ءِ۔
لشکر کشی نا پلویڑ ئٹ رباط، پوڑی، کورانی و ایب کیب ئنا علاقہ غاک ءُ اندن دا وخت آ فورسز آک کیہی اُرا تیا چھاپہ خلیسہ اُرا تے پٹانو۔
دزگیری تا بابت دائسکان معلومداری رسینگتنے۔ داکان بیدس علاقہ ئٹ ترند سم کاری نا حوال ہم رسینگانے۔
کوالخواک دا بابت شابیتی حوال فراوان کتنو۔
حوال تا رد ئٹ اورماڑہ قلات و خضدار ئٹ روڈ شکست نا جتا تدینی تیٹ پنچ بندغ بیران و کیہک ٹپی مسنو۔
تربت آن کراچی آ ہنوکا مسافر کوچ بسول نا ہند آ تدینی نا گواچی مس اسہ بندغ ئس بیران و کیہیک ٹپی مسر۔
مکران کوسٹل ہائی وے آ بسول نا ہند آ تربت آن کراچی آ ہنوکا بس تدینی نا گواچی مس۔ تدینی ٹی اسہ بندغ ئس بیران و کیہیک ٹپی مسنو۔
تدینی ٹائر ترخنگ نا سوب آن مسنے۔
تدینی نا حوال رسینگ آن گڈ کمکی ٹولی (ریسکیو ٹیم) ہند آ سر مس و ٹپی مروکا تے ایمبولینس ئٹ پی این ایس درمان اسپتال آ رادہ کرے۔
اندن قلات کوہنگ ئٹ پک اپ گاڑی روڈ شکست نا گواچی مس ہراڑان اسہ بندغ ئس بیران مُسٹ ٹپی مسنو۔
ایلو کنڈ آن خضدار ئٹ ایم ایٹ کسر آ فیروزآباد نا ہند آ اِرا تیل دروکو گاڑی ڈک کنگر۔
تدینی ٹی مُسہ بندغ بیران و اِرٹ ٹپی مسنو۔
پاکستانی سیکورٹی کوالخواک دعویٰ کرینو کہ سندھ پولیس، سی ٹی ڈی و حساس ادارہ غاک کراچی ٹی بھس کاری کروک ڈٹ ءِ بےسہب کرسا اِرا خودکش جلہو کار دزگیر کرینے۔
او ودیک پاریر کہ کراچی ایئرپورٹ نا خُڑک جلہو نا ماسٹر مائنڈ ءِ ہم بلوچستان نا علاقہ وندر آن دزگیر کننگانے۔
عسکری ذرائع نا رد ئٹ دزگیر مروک خودکش جلہو کار تیان خودکش جیکٹ، چغلی بمب، سلہہ و واکی ٹاکی ہم دوئی کننگانے۔
خیال ئٹ مرے وندر نا ہندی جاوید بلوچ ءِ پاکستانی لشکر 16 اکتوبر 2024 آ وندر آن بیگواہ کریسس و اینو اونا دزگیری پھاش کننگانے۔
بلوچستان نا ضلع ڈیرہ بگٹی آن پاکستانی لشکر اسہ بندغ ئس دزگیر کننگ آن گڈ بیگواہ کرینے۔
بیگواہ کننگوک بندغ نا چاہنداری شاہ مراد بگٹی نا مار دوستین نا پن ئٹ مسنے۔
حوال تا رد ئٹ پن کروک بندغ ءِ پاکستانی لشکر درو سوئی ٹی اوفتا اُراغان دزگیر کرینے ہراکان گڈ اونا ہچ ڈس اف۔
خاران نا ہند گواش ئٹ اینو سہب ئنا پاکستانی فورسز نا اسہ گشتی ٹیم ئسے آ مروکا جلہو نا ذمہ واری ءِ بی ایل ایف ارفے۔
بلوچستان نا ضلع خاران نا علاقہ گواش ئٹ نا درست آ سلہہ بند بندغ آک پاکستانی فورسز نا موٹر سائکل گشتی ٹیم ئسے جلہو ئٹ ٹِک کریر، جلہو نا سوب اسہ کارندہ ئس مرگ ئنا گواچی وختس کہ اسٹ ئس بھاز ٹپی مس۔
حوالی نا پاننگے کہ گواش روڈ آ سلہہ بند بندغ آک ایف سی نا گشتی ٹیم ءِ ہمو وخت آ ٹِک کریر ہراتم اوفک موٹر سائکل آتیا پیری کننگ ئسر۔
پن کروک جلہو نا ذمہ واری ءِ بلوچستان لبریشن فرنٹ نا ترجمان میجر گہرام ارفسہ پارینے کہ سرمچار آک اینو سہب ئنا تنظیم نا انٹیلیجنس کڑدہ نا احوال آ خاران نا علاقہ گواش ئٹ دژمن لشکر، فرنیٹر کور نا گشتی ٹیم ئسے آ جلہو کرسہ اوفتے ٹِک کریر ہرافک دروشم بدل کرسہ سادہ پُچ ئٹ خاران شار ئنا پارہ غا موٹر سائکل آتیا تولوک ہننگ ئسر، اسہ موٹر سائکل ئسے آ تولوک کارندہ غاک جلہو نا دَک ئٹ بسر ہرافتیان اسٹ ئس ہمو ہند آ مرگ ئنا گواچی وختس کہ ارٹمیکو بھاز ٹپی مس۔
ترجمان پارے کہ سرپد آ اُلس آن خواست کینہ کہ اوفک دژمن فورسز نا ہن و بر نا وخت آ تینا رکھ ئنا سوب اوفتیان مر مریر انتئے کہ چچرو آ دژمن سرمچار آتیان دَک کننگ آن گڈ سرمچار آتیتون جنگ کننگ نا جاہ بزگ آ بندغ آتے ٹِک کیک۔ ہندا سوب آن تینا رکھ ءِ کننگ نا سوب قوضہ گیر پاکستانی لشکر آن مر مریسہ بلوچ سرمچار آتون اواری ایتر۔
ترجمان گڈ سر ئٹ پارے کہ بلوچستان لبریشن فرنٹ دا جلہو نا ذمہ واری ءِ ارفک و بلوچستان نا آجوئی اسکان پاکستانی لشکر، فوجی مڈی و لٹ و پلی ڈٹ بندی تیا جلہو آتے برجا تخون۔
بلوچ لبریشن آرمی تینا میڈیا چینل ہکل آ کوئٹہ جند ندر جلہو کار نا عکس ءِ شینک کرے۔
ہکل میڈیا بی ایل اے نا جند ندر جلہو کار سرمچار نا فائل عکس ءِ شینک کریسہ پارینے کہ 9 نومبر آ ریلوے اسٹیشن آ جند ندر جلہو ئٹ انفنٹری اسکول کوئٹہ ٹی تربیت پورو کروک آ پاکستانی لشکر نا بیست آن زیات نان کمیشنڈ افسر ءِ مرگ ئنا گواچی و چل آن زیات ءِ بھاز ٹپی کروک آ مجید برگیڈ نا جلہو کار محمد رفیق بزنجو پن کروک وشین ءِ۔
ایلو پارہ غان تراک نا باروٹ احوال آتا رد ئٹ دائسکان کہوکا تا کچ 31 مس، 60 ٹپی وختس کہ کہوکا تیٹ 19 فوجی کارندہ و ایلو ادارہ غاتا بندغ آک اوار ءُ۔
جلہو نا ذمہ واری ءِ بلوچ لبریشن آرمی ارفے۔ترجمان جیئند بلوچ بیان ئٹ پارے کہ دا جلہو ءِ بی ایل اے نا مجید برگیڈ کرینے وختس کہ جلہو نا ٹِک انفنٹری اسکول آن کورس پورو کننگ آن گڈ پدی ہنوکا کارندہ غاک ئسر۔
بلوچ لبریشن آرمی نا ترجمان جیئند بلوچ میڈیا غا شینک کروک گؤنڈ ءُ بیان اسیٹی پارینے کہ اینو سہب ئنا کوئٹہ ریلوے اسٹیشن ئٹ پاکستانی لشکر نا اسہ ٹولی ئسے آ ہمو وخت جند ندری جلہو کننگا، ہراتم او انقٹری اسکول آن کورس ایسر کننگ آن پد جعفر ایکسپریس نا وسیلہ ئٹ پدا ہِننگ ئسر۔
جیئند بلوچ نا پاننگ ءِ کہ جلہو ءِ بی ایل اے نا جند ندر کڑدہ مجید بریگیڈ سر تس۔ او پارے کہ شابیتی حوال آک زوت میڈیا غا شینک کننگور۔
بلوچستان نا ضلع کیچ نا علاقہ تمپ، کوہاڑ ئٹ نادرست سلہہ بند موٹر سائیکل سوار آک سم کاری کریسہ اسہ بندغ ئسے کسفیر۔
کہوکا بندغ نا چاہنداری مصدق نا پِن ئٹ مسنے۔
حوالکار تا ردئٹ نادرست سلہہ بند موٹر سائیکل سوار آک پِن کروک بندغ ءِ اونا اُرا نا پیشن سم کاری کسفیر و نرار۔
ہندی حوالکار تا پاننگ ءِ کہ خونی تا تعلق سرکاری مُخ تف سلہہ بند ٹولی آن ءِ۔
بلوچ راج دوست کڑدہ تا پاننگ ءِ کہ تیوہ بلوچستان ئٹ پاکستانی لشکر بلوچ راجی تحریک ءِ ایسر کننگ کن سلہہ بند ٹولی جوڑ کرینو ہرافتے آسان لوز ئٹ ڈیتھ اسکواڈ پارہ۔
اوفتا پاننگ ءِ کہ پن کروک ٹولی بلوچ آتے کسفنگ و بیگواہ کننگ آن بیدس ایلو چاگڑدی گندئی تیٹ اوار ءُ اندن پاکستانی لشکر اوفتے تیوہ آزاتی تسنے۔
کاؤنٹر ٹیررازم ڈیپارٹمنٹ (سی ٹی ڈی) انٹیلی جنس بیسڈ آپریشن ئٹ 2 شکبر بندغ ءِ کسفنگ نا دعویٰ کرینے۔
سی ٹی ڈی نا دعویٰ نا ردئٹ خضدار ئٹ حساس تنصیبات آتیا مننگ کروک جلہو ءِ بے سہب کننگ کن کروک آپریشن ئٹ اِرا بندغ ءِ کسفنگا۔ کہنگوک بندغ تا چاہنداری مشکے نا ہندی بار جان و سوراب نا ہندی عبدالخالق نا پِن تیٹ مسنے۔
سی ٹی ڈی نا ردئٹ پن کروک ہڑتوم آ بندغ آک ہنوک وخت ئٹ قلات ئٹی جلہو آتیٹی اوار ئسر۔
سی ٹی ڈی نا ردئٹ آپریشن نا وخت آ شکبر بندغ آک سم کاری کریر، ہرانا سوب آن سی ٹی ڈی ورندی کاروائی کریسہ اوفتے خلک۔
فورسز آتا دعویٰ نا ردئٹ آپریشن ئٹ فورسز آک تدینی نا ہند آن میگزین تون اوار اسہ SMG، 8 کلوگرام C4 تراکی مواد، اسہ مقناطیسی IED، الفا فائر سسٹم، اِرا ریموٹ کنٹرول ڈیوائسز، اسہ چغلی بمب اس، اسہ موٹر سائیکل اس و اِرا موبائل فون ہم دوئی کرینو۔
یاتی مرے بلوچستان ئٹ سی ٹی ڈی نا کاروائیک ساندہ شکبر مسنو ہراڑے اوڑا دوبہ ءِ کہ او مالو آن دزگیر مروک بندغ آتے کسفسہ مونتس نا پِن ایتک۔
تدوکا دے تیٹ سی ٹی ڈی دعویٰ کریسس کہ موسیٰ خیل نا ہند آ اسہ مونتس اسیٹی چار بندغ کسفنگانو ہراڑے پدان کسفنگوک بندغ تا خاہوت آک اوفتا چاہنداری ءِ کریسہ پاریر کہ پن کروک بندغ آک مالو آن فورسز آتا دزگیر ئٹ ئسر۔
تدوکا دے تیٹ سی ٹی ڈی نا دو آن خلنگوک مُسہ بندغ نا چاہنداری محمد نواز بزدار، غلام بزدار و جعفر مری نا پِن تیٹ مسنے ہرا مالو آن زوراکی ئٹ بیگواہ کننگاسر۔
تدوکا ہشت دے آن مند ئنا علاقہ مہیر ئٹ پاکستانی لشکر نا زوراکی و بی بی منیرہ نا اُرا تیا کوزہ نا برخلاف برانز برجاء ءِ۔
تولوک برانز ئٹ چُنا نیاڑی و ہندی مخلوق تا بھلو کچ اس اوار ءِ۔
برانز کروکاک پارینو کہ نن مند ئنا مخلوق آن خواست کینہ کہ بریر و تینا چُپی ءِ پرغِسہ برانز ئٹ اوار مریر و تینا راجی زمہ واری تے پورو کیر۔
او پاریر کہ اینو دا ویل بیرہ مہیر ئٹ بی بی منیرہ نا اُرا تیا کوزہ نا ویل اف بلکہ ننا نُما کُل ئنا چاگڑد نا ویل ءِ۔ اگہ اینو نن نُم بے توار مسُن دا بندغ آتتون اوار متون گُڑا پگہ دے ننا نُما جند ئنا اُرا و جاگہ غاک اندا وڑ کوزہ کننگور و ننا کمک کن کس ساڑی مروف۔
جوانی چُپی ءِ پرغنگ و مزاحمت کننگ ئٹی ءِ ببو ریاست نا زوراکی تا مونا سلین و تینا راجی ٹیوار و پدریچ ءِ رکھین۔
