سلمان بلوچ نا آجو مفننگ و زوراکی نا بیگواہی تا برخلاف برانز ریکارڈ کننگا۔

خضدار آن حوال تا رد ئٹ اِرا سال مُست بلوچستان نا بنجائی شار کوئٹہ آن پاکستانی لشکر نا دو آن زوراکی نا بیگواہی تا گواچی مروک سلمان بلوچ نا خاہوت نا کنڈ آن اینو شار ئٹ برانز اڈ تننگا و ریلی کشنگا۔

دا وختا چُنا نیاڑی و نرینہ غاک شہید پروفیسر رزاق چوک آن آزادی چوک اسکان اسہ ریلی ئس کشار و زوراکی نا بیگواہی تا برخلاف نعرہ خلکر۔

خضدار برانز نا وختا اسہ وار ئس پدا پولیس نا بھلو کچ ئس برانزی تا رہا تعینات کننگا و شار ئٹ موبائل و انٹرنیٹ سروس بند کننگا ہرادے برانز آن گڈ ملنگا۔

دا وختا ریلی ٹی زوراکی ئٹ بیگواہ کننگوک سلمان بلوچ نا خاہوت تون اوار زوراکی ئٹ بیگواہ کننگوک آصف و رشید بلوچ نا ایڑ سائرہ بلوچ، بیگواہ چنگیز بلوچ، ذاکر بلوچ و طیب بلوچ نا خاہوت آتتون اوار بلوچ یکجہتی کمیٹی نا باسک آک ہم اوار اسر۔

برانز ئٹ تران کرسا زوراکی ئٹ بیگواہ کننگوک سلمان بلوچ نا لمّہ نا پاننگ اس کہ کنا مار سلمان ءِ اِرا سال مُست کوئٹہ ہزار گنجی آن زوراکی ئٹ بیگواہ کننگا و اِرا سال آن تینا مار ئنا آجوئی کن برانز و عدالت آتیا ہِننگ آن بیدس ہم سلمان بلوچ ءِ آجو کننگ متنے و نئے کہ ننے دائسکان دا پاننگانے کہ اودے انت ڈؤہ ئسے ٹی بیگواہ کننگانے۔

بیگواہ غا سلمان بلوچ نا لمّہ حکومت و بندغی حق آتا ادارہ تیان خواست کرے کہ اوفتا مار ءِ پھاش کننگ و آجو کننگ ئٹ کڑدار ادا کیر۔

ایلو کنڈ آن بیگواہ کننگوک سلمان بلوچ نا زوراکی نا بیگواہی ءِ اِرا سال پورو مننگ آ خاہوت نا کنڈ آن چاگڑدی حوالکاری میڈیا ایکس آ کیمپین نا پڑو کننگاسس خاہوت بلوچ سیاسی و بندغی حق آتا باسک آتیان دا کیمپین ئٹ بشخ ہلنگ و توار بڑز کننگ نا خواست کریسس۔

بلوچستان نا ضلع ڈیرہ بگٹی و کیچ آن پاکستانی لشکر اِرا بندغ ءِ دزگیر کریسہ بیگواہ کرینے۔

بیگواہ کننگوک آتا چاہنداری ارشاد و خان محمد بگٹی نا پِن تیٹ مسنے۔

اوفتیان خان محمد بگٹی ءِ پاکستانی لشکر تدوکا دے تیٹ ڈیرہ بگٹی نا علاقہ پھیلاوغ آن اونا دکان آن دزگیر کریسہ بیگواہ کرینے ہراڑان پد او بیگواہ ءِ۔

اندا وڑضلع کیچ نا علاقہ بلیدہ پشت کور نا ہند آ پاکستانی لشکر ننکان چھاپہ خلیسہ ارشاد ءِ بیدادی نا گواچی کریسہ بیگواہ کرینے۔

بلوچستان نا علاقہ تربت آن پاکستانی لشکر ننکان چھاپہ خلیسہ زالبول و اونا ایلم ءِ دزگیر کریسہ نادرست ہند آ دریر۔

پاکستانی لشکر نا دو آن دزگیری آن پد بیگواہ کننگوک زالبول نا چاہنداری لال بی بی اندن اونا ایلم نا چاہنداری پھلیں نا مار نثار نا پن ئٹ مسنے۔

بلوچستان نا صحافی و تنظیم آک ہڑتوم آ بندغ آتا دزگیری ءِ پک کریسہ پاریر کہ فورسز آک اینو سہب ئنا لال بی بی ءِ سر و سوج و موبائل ءِ دوئی مننگ آن پد یلہ کننگانے اندن اونا ایلم دائسکان فورسز آتا دزگیر ئٹی ءِ۔

بلوچستان نا ضلع نوشکی ٹی سم کاری آن اِرا بندغ بیران و اِرٹ ٹپی مسر۔

بیران مروکا تا چاہنداری نوشکی کلی جمالدینی نا ہندی یاسر جمالدینی ولد میر ناصر جمالدینی و نوشکی بدلکاریز نا ہندی اسرار محمد حسنی نا پن تیٹ مسنے۔

سم کاری نا تدینی اسٹیشن نا ہند آ مس۔ پولیس نا رد ئٹ سلہہ بند بندغ آک پشین ہوٹل آ سم کاری کرسا پن کروک تومکا بندغ آتے کھسفیر و اِرٹ ٹپی مسر۔

واہم تدینی نا سوب دائسکان سما تمنگ کتنے، و تدینی نا بارو ئٹ پولیس ودیک پٹ پول کننگ ءِ۔

بلوچستان لبریشن فرنٹ نا ادارہ آشوب پبلیکیشن نا کنڈ آن ورنا تا فکری و نظریاتی تربیت کن توئی میگزین “اسپر” نا ارٹمیو میگزین شنگ مس۔

اسپر نا ارٹمیکو میگزین بی ایل ایف نا میڈیا سیل آشوب نا کنڈ آن شنگ مسنے۔

بی ایل ایف تینا شنگ کروک بیان ئٹ پارے کہ ارٹمیکو میگزین ئٹ بلوچستان لبریشن فرنٹ نا توئی کاروائی تا رپورٹ، تجزیہ، ڈاکٹر اللہ نذر نا کلہو، گوریلا جنگ ئٹی مورال نا اہمیت، شاری گوریلا جنگ و مخبر تا ایسری نا خواست کون آ اہم سرحالک اوار ءُ۔

او پارے کہ دا نوشت آک ورنا تے تینا جہد ئنا کسر و نظریہ غا تا کُڑمبی ءِ پُہہ مننگ کن کمک کرور۔

بیست و ہفت ستمبر آ دریابی شار گوادر آن پاکستانی لشکر نا دو آن زوراکی ئٹ بیگواہ کننگوک بندغ آک آجو مرسا تینا اُرا تے سر مسر۔

آجو مروکا تا چاہنداری مہراج نور و ایوب بلوچ نا پن ئٹ مسنے۔

خیال ئٹ مرے پن کروک بندغ آتون اوار پاکستانی لشکر نا دو آن زوراکی ئٹ بیگواہ کننگوک اعجاز ولد حسین و دودا خالد دائسکان بیگواہ ءُ۔

اوفتا خاہوت نا پاننگ ءِ کہ اوفتا ہچو حال حوال اف۔ نن کوالخواہ تیان اوفتا زوت آجوئی نا خواست کینہ۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارینے کہ بی ایل اے نا سرمچار آک نوشکی ٹی قادر آباد نا ہند آ کوزہ گیر پاکستانی لشکر نا اسہ قافلہ ئسے سنگر ہلیسہ جلہو اسیٹی ٹک کریر، ہرانا سوب آن کوزہ گیر لشکر نا کم آن کم دئے کارندہ ہند آ مرگ ئنا گواچی مسر اندن جلہو آن پد دژمن تون برجاء مرغنا جنگ ئٹ بی ایل اے نا اِرا دلیر سرمچار دلیری ئٹ جنگ کریسہ شہید مسر۔

ترجمان پارے کہ درو دوانزدہ بجہ نا وخت آ بلوچ لبریشن آرمی نا سرمچار آک نوشکی آن پنچ کلو میٹر مُری آ قادر آباد نا ہند آ کوزہ گیر پاکستانی لشکر نا اسہ قافلہ ئسے سنگر ہلیسہ جلہو اسیٹی ٹک کریر، ہراٹی دژمن لشکر نا 10 کارندہ ہند آ مرگ ئنا گواچی و کم آن کم چار ٹپی مسر۔

او پارے کہ کوزہ گیر لشکر تون مُرغن جنگ ئٹ بلوچ لبریشن آرمی نا اِرا سنگت سرمچار عدنان بلوچ و یاسر بلوچ لمہ وطن ءِ جیرت و دلیری ئٹ رکھیسہ شہادت ءِ ارفیر۔ شہید عدنان بلوچ دژمن نا اسہ سُم ئسے نا لگنگ آن ٹپی مسوسس ولے او ٹپی حالیت ئٹ ہم تینا سنگر ءِ خالی کتو ولے او اسہ گھنٹہ ئسے آن زیات دژمن لشکر تون مون تس و تینا یونٹ ءِ رکھوک کسر تریسہ شہید مس۔

ترجمان پارے کہ کوزہ گیر لشکر آ دا جلہو نا وخت آ، بی ایل اے نا اسہ پین سرمچار سنگت اس، یاسر بلوچ ہم دژمن تون بھلو وخت اس مون تریسہ ٹپی مس، دژمن ءِ گوڈ خلنگ آ بیوس کننگ آن پد او ٹپی حالیت ئٹ تینا رکھوک ہند آ سر مننگ ئٹ سرسہب مس، واہم زیات دتر وہنگ نا سوب او شہادت نا بڑزکو ہند ءِ دوئی کرے۔

او پارے کہ شہید سنگت عدنان بلوچ عرف سفر خان ولد وزیر احمد نا تعلق نوشکی نا علاقہ کلی مینگل آن ئس۔ انٹرنیشنل ریلیشنز ئٹ بی ایس نا خوانندہ عدنان بلوچ 2023 نا بناء ئٹ بلوچ لبریشن آرمی تون تفوک ئس۔ او راجی آجوئی نا دوئی کننگ کن اسہ شاری گوریلا ئسے نا دروشم ئٹ تینا خذمت آتے سر تننگ ئس۔ دا وخت ئٹ او نوشکی شار و ایب کیب ئٹ جتا کاروائی تیٹ تینا لائخی تا عملی دروشم ئٹ درشانی کرے و دژمن آ کیہی تُرند ءُ دکّ خلک۔ او جیرت، دلیری و مخلصی نا بھلو مثیل اس جوڑ کریسہ دژمن ءِ کیہی جنگ آتیٹ مات تس و ایسر ئٹ اسہ دلیر شہادت اس تینا پِن آ کننگ ئٹ سرسہب مس۔

او پارے کہ شہید سنگت یاسر بلوچ زہری عرف ماسٹر سفر خان ولد لال جان زہری خضدار نا علاقہ مولہ غان تعلق تخاکہ۔ بیست و ہفت سالی یاسر بلوچ اسہ میکینیکل انجنیئر اس ئس، او 2018 ئٹ بلوچ لبریشن آرمی نا بشخ مس و راجی غلامی نا برخلاف شاری و مَشی آ محاذ آتیا تینا فوجی خذمت آتے تس۔ سنگت یاسر بلوچ بولان، ناگاہو و شورپارود (قلات) نا محاذ آتیا کیہی اہم جنگ آتا بشخ مریسہ دژمن لشکر ءِ مات تننگ ئٹ پاش ءُ کڑد اس سر تس۔ او مخلصی، دلیری و خواری کشی تون اوار تینا دے و نن ءِ بلوچ راجی آجوئی کن ندر کریسس۔ او بی ایل اے نا اسہ بھاز دلیر و ذہین ءُ سپاہی اس ئس۔

او پارے کہ بلوچ لبریشن آرمی شہید سنگت یاسر بلوچ و شہید سنگت عدنان بلوچ نا، جیرت و دلیری و بلوچ وطن تون وفاداری ءِ منّیسہ، شہادت آ اوفتے دروت ندر کیک و دا پک ارادہ کیک کہ بی ایل اے تینا شہید آتا عظیم کڑد ءِ اسُل گیرام کننگ اِلوف و اوفتا قربانی نا بدلہ ءِ راجی آجوئی نا دروشم ئٹ الم دوئی کرو۔

زوراکی ئٹ بیگواہ کننگوک خضدار نا ہندی سلمان بلوچ نا خاہوت نا کنڈ آن شنگ کننگوک بیان ئٹ پاننگانے کہ 7 نومبر 2024 آ شام 3 بجہ غا شہید عبد الرزاق چوک آن آزادی چوک اسکان برانزی ریلی کشنگو۔

برانزی ریلی سلمان بلوچ نا زوراکی نا بیگواہی ءِ اِرا سال پورو مننگ نا رد ئٹ اڈ تننگو۔

سلمان بلوچ ءِ 13 نومبر 2022 آ کوئٹہ ہزارگنجی آن زوراکی ئٹ بیگواہی نا گواچی کننگاسس۔

بیان ئٹ خاہوت بندغ دوست سیاسی و جاگڑدی باسک، وکیل، خوانندہ، صحافی، و زند ئنا ایلو شعبہ تیان تعلقداری تخوک بندغ تیان خواست کرے کہ او ریلی ٹی اوار مریر۔ او پاریر کہ ننا مسخت السی شعور ءِ بیدار کننگ و زوراکی نا بیگواہی تا تدینی تا برخلاف توار بُڑز کننگ ءِ۔

بیان ئٹ پاننگا کہ داڑتون اوار 7 نومبر آ نن ئنا 8 بجہ غان 12 بجہ اسکان ایکس (X) آ اسہ کمپین ئس ہم چلفنگو، نُما اوڑدئی و مُخ تفی ننے دا جہد ئٹ پین حوصلہ ایتو۔

بلوچستان نا علاقہ چمالنگ، قلات و آواران نا ہند کولواہ ئٹ چار جتا جلہو تا ذمہ واری ءِ بلوچ آجوئی دوست سلہہ بند تنظیم بلوچ لبریشن آرمی و بلوچستان لبریشن فرنٹ ارفینو۔

بلوچ لبریشن آرمی نا ترجمان جیئند بلوچ میڈیا غا بیان اس شینک کریسہ پارے کہ ننا سرمچار آک چمالنگ و قلات ئٹ مُسہ جتا جلہو تیٹ کوزہ گیر پاکستانی لشکر و بلوچ راجی مڈی تے لُٹوک گاڑی تے ٹک کریر۔

ترجمان پارے کہ بی ایل اے نا سرمچار آک استو چمالنگ ئٹ ٹریپل موڑ ئنا ہند آ کوزہ گیر پاکستانی لشکر نا اسہ گاڑی ئسے ریموٹ کنٹرولڈ آئی ای ڈی جلہو ئٹ ٹک کریر، تراک نا دک ئٹ بننگ آن گاڑی ٹی سوار اسہ کارندہ اس مرگ ئنا گواچی و کم آن کم مُسٹ ٹپی مسر اندن گاڑی ءِ بھاز نسخان رسینگا۔

او پارے کہ داڑان مُست درو بلوچ لبریشن آرمی نا سرمچار آک چمالنگ ئٹ پن کروک ہند آ مڈی لُٹوک مُسہ گاڑی ءِ ہُشیسہ بھس کریر۔

اونا پاننگ ئس کہ ایلو پارہ غا اینو بیگہ نا وخت آ بلوچ لبریشن آرمی نا سرمچار آک قلات ئٹ مہلبی نا ہند آ مڈی لُٹوک اسہ گاڑی ئسے سلہہ بند جلہو ئٹ ٹک کننگ آن پد ہشیسہ بھس کریر۔

ترجمان پارے کہ بلوچ لبریشن آرمی دا ہر مُسہ جلہو تا ذمہ واری ءِ ارفک۔

اندن بلوچستان لبریشن فرنٹ نا ترجمان میجر گہرام بلوچ میڈیا غا شینک کروک بیان اسیٹی پارینے کہ سرمچار آک درو 3 نومبر آ آواران نا علاقہ کولواہ ئٹ مرہ شم و کنیچی نا نیام ئٹ عبدو بازار نا ہند آ کوزہ گیر پاکستانی لشکر آ سنگر ہلوک پوسکنا سلہہ تیٹ جلہو کریر، جلہو انداخہ ترند ئس کہ شش فوجی کارندہ ہند آ مرگ ئنا گواچی اندن کیہیک ٹپی مسر۔

او پارے کہ پاکستانی لشکر نا دا قافلہ آواران و ایب کیب ئنا علاقہ تیٹ لشکر کشی نا غرض ئٹ پیہاسس ولے بی ایل ایف نا انٹیلیجنس ٹولی نا حوال آ تنظیم نا اسپیشل اسکواڈ گشتی ٹولی تون اوار مریسہ اوفتیا ترند جلہو کرے۔

ترجمان پارے کہ بی ایل ایف ساڑی آ وخت ئنا جنگی خواست آتے پام ئٹ تخیسہ تینا حکمت عملی ءِ گیشتر مؤثر و پوسکن جوڑ کرینے۔ دا حکمت عملی نا ردئٹ تنظیم نا انٹیلیجنس ٹیم، اسپیشل اسکواڈ و قربان یونٹ ہر محاذ آ ساڑی ءُ و دژمن آ اندنو ضرب کاری کننگ ءُ ہرافتا دژمن ءِ ہم گمان اف۔ بروک وخت ئٹ پاکستانی لشکر و اونا اہم تنصیبات آتیا جوانو و گوڑیفوک جلہو کننگو، ہرافتیان دژمن لشکر نا طاغت ءِ نزور کریسہ ہدف آتے ایسری اسکان سر کننگو۔

او پارے کہ پاکستان بلوچ ڈغار آ کوزہ کریسہ نہ بیرہ بلوچ راج ئنا دیہاڑ و دور و ربیدہ ءِ لتاڑنگ نا کوشست کرینے بلکن تینا ظالم آ کاروائی تیٹ ظلم و تادی نا اسہ پوسکنو دیہاڑ اس نوشتہ کرینے۔ ولے بلوچ راج ئنا دلیر آ مڷ آک ہر محاذ آ، خاص وڑ ئٹ سلہہ بند جہد ئٹ، دژمن ءِ چرجوئی ئٹ مات تننگ ءُ، ہرافتا سوب آن دژمن نفسیاتی زوال و اُست کُٹئی نا پودگل ئٹ پاسینگانے۔

ترجمان پارے کہ بلوچستان لبریشن فرنٹ دا جلہو نا ذمہ واری ءِ ارفک۔ پاکستانی لشکر نا پیشتمنگ اسکان بلوچستان ئٹ سلہہ بند کاروائیک برجاء مرور۔

غزل

منتظر بلوچ

سِخت ئنا نن پراد بشخنگن
عقل ئنا جائیداد بشخنگن
وہم ئنا نن خلینہ موکو تہ
خلق پاہک الحاد بشخنگن
نن ندارہ چَٹ ایتنہ دنیا
نےکہ آمخ !! فساد بشخنگن
نسلِ آدم نا بادوی کن نن
پُرّ چَنکَٹ نا یاد بشخنگن
مَرک،کونٹو پراد و ماتم کن
لیلڑی تا مراد بشخنگن
پورہ واری کہ نا وجودٹ نن
ذرّہ ،ہستی ، بُراد بشخنگن
بیرہ ہمت نا بج دسہ تینکے
تیشہ دوٹی فرہاد بشخنگن
ساہءِ کُڑسانٹی تخوکا کہ
شش گِدِستی و لاد بشخنگن