بلوچستان نا ضلع نوشکی ٹی پاکستانی لشکر آ جلہو ئس مسنے، تونکا کنڈ آن جانی نسخان تا حوال ارے۔

شابیتی حوال تا رد ئٹ نوشکی نا علاقہ قادر آباد نا ہند آ نادرست آ سلہہ بند بندغ آک پاکستانی لشکر نا کاروان ئٹ اوار گاڑی تے ٹک کرینو۔

فورسز نا مُسہ گاڑی جلہو نا دک ئٹ بسر ہرافتیٹی اسہ گاڑی ئس ناکارہ مننگ نا حوال ارے۔

پولیس نا رد ئٹ تومکا کنڈ آن سم کاری ئٹ اسہ جلہو کار ئس خلنگانے و ایلو کنڈ آن پاکستانی لشکر نا کیہئ کارندہ مرگ ئنا گواچی و ٹپی مسنو۔

واہم کوالخواہ تا کنڈ آن فورسز تا کہنگ نا بابت ئٹ ہچو تران مونا بتنے۔

ہندی حوال تروکا تا پاننگ ءِ کہ سم کاری اسہ ساعت ئسے آن زیات برجاء سلیس و جلہو آن گڈ ہند آ ایمبولینس آک ہِننگ آ خننگ مسر۔

تولوک برانز ئٹ چنا و زالبول آتون اوار بندغ آتا بھلو کچ ئس اوار ءِ۔

برانزی تا پاننگے کہ پاکستان لشکر نا ننا اُرا تیا قوضہ ءِ اوفک بش مننگ نا پنے ہلنگ افس، نن داسا پین سلنگ کپنہ۔

اوفتا پاننگ ئس کہ ننا اُرا تیا قوضہ کننگا و داسا اُرا تا مون ئنا ڈغار آتون اوار ایلو جاگہ غاتیا قوضہ کننگ نا کوشست کننگو۔

برانزی تتون ہندی کالخواہ تیان بیدس زبیدہ جلال نا ہیڑ رحیمہ جلال و ایلوفک گپ و تران کرسہ برانز ءِ چٹفنگ نا خواست کریر۔

واہم برانزی تا پاننگے کہ ہراتم اسکان پاکستانی لشکر ننا اُرا تیان پیشتمپک نن ہنداڑے رہینگون۔ اوفک علاقہ نا بندغ و بلوچ آتیان خواست کرینو کہ اوفک ننتون اواری تیر و ریاستی بیدادی تا برخلاف توار ارفر۔

زوراکی نا بیگواہی تا برخلاف بلوچ اسٹوڈنٹس ایکشن کمیٹی نا پارہ غان جتا شار تیٹ برانز مریسہ ءِ۔

بلوچستان یونیورسٹی نا خوانندہ سہیل بلوچ و فصیح بلوچ نا زوراکی ئٹ بیگواہی ءِ مُسہ سال پورو مننگ آ اینو نوشکے ٹی بلوچ اسٹوڈنٹس ایکشن کمیٹی نا پڑو آ خوانندہ تا پارہ غان ریلی کشنگا و برانز ریکارڈ کننگا۔

دا وخت آ برانز کروک آک نوشکے پریس کلب نا مونا تولوک برانز کریر و بیگواہ بندغ تا آجوئی کن نعرہ خلکر۔

نوشکے برانز ئٹ تران کروک آتا پاننگ ئس کہ بلوچ ورنا تے تعلیمی ادارہ تیان بیگواہ کریسہ اوفتا مستقبل ءِ خراب کریسہ ءُ اگہ ننا بندغ آک ڈوہ اس کرینو گڑا اوفتے عدالت آتیٹ ہتیسہ ٹرائل نا وار ایتر و دوبہ غاتے پاش کیر بیدس اسہ پروسیس ئسے آن ننا بندغ آک کیہی سال زندان تیٹ بند کننگرہ۔

دا وخت آ برانز مُچی ٹی سال آتیان نوشکے آن زوراکی ئٹ بیگواہی نا گواچی کننگوک بندغ تا خاہوت آک و چناک ہم اوار مسر ہرافک دو تیٹ تینا بندغ آتا عکس آتے ارفیسر و اوفتا آجوئی نا خواست کننگ ئسر۔

بساک نا پارہ غان سہیل و فصیح بلوچ نا زوراکی ئٹ بیگواہی نا مُسہ سال پورو مننگ آ بلوچستان نا جتا علاقہ تیٹ برانز آتا لڑ برجاء ءِ ہراڑے ملخدو کوئٹہ ئٹ درو خضدار، تربت و اوتھل ئٹ خوانندہ غاک برانز ریکارڈ کریسہ بیگواہ بندغ تا آجوئی نا خواست کریر۔

بلوچستان نا علاقہ چمالنگ ئٹی نادرست آ سلہہ بند بندغ آک کوئلہ آن لوڈ ٹرک آتے خاخر تسر۔

لیویز نا رد ئٹ ٹرک آتے سم کاری کرسا خاخر تننگانے، ہرافتان اِرٹ کوئلہ آن لوڈ مسنو و اسٹ ہورک مسنے۔

لیویز فورس تدینی آن گڈ ہند آ سر مرسا پٹ پول بناء کرینے۔

مستونگ بمب تراک و مرک آتا برخلاف شاری تا برانز، انصاف نا خواست۔

بلوچستان نا ضلع مستونگ نا ہندی تا اینو سہب ئنا کوئٹہ کراچی بھلا کسر آ تولوک برانز، برانز کروک آک درو نا مستونگ ئٹ مروک بمب تراک نا تدینی نا برخلاف برانز ریکارڈ کریر۔

مستونگ برانز ئٹ شاریک و بمب تراک آن زیمی مروک خاہوت آک اوار مسر و تدینی نا برخلاف ترند نعرہ خلکر۔

تولوک برانز نا سوب کوئٹہ کراچی بھلا کسر ہن و بر اکن بند کننگا۔

دا وخت آ برانزی تا پاننگ ئس کہ درو بمب تراک ئٹ اسکول نا چناک کسکنو، اندن مستونگ ئٹ دن انگا تدینی تا مننگ و وار وار مننگ بلوچ زنک ایسری و اسہ افسوسناک کاریم ئسے اندن سرکار دا بابت بے ذمہ واری نا درشانی کننگ ءِ۔

برانزیک حکومت و بڑزکو کوالخواہ تیان خواست کرینو کہ او تدینی ٹی اوار مروک بندغ آتا دمدستی نشاندہی کریسہ اوفتا برخلاف کاروائی کیر، نئے گڑا مستونگ نا ہندیک ترند برانز آ بیوس مرور۔

یاتی مرے درو بلوچستان نا ضلع مستونگ ئٹ سول اسپتال و گرلز اسکول چوک آ پولیس موبائل آن خڑک تراک نا سوب اسکول نا 5 چنا تون اوار 9 بندغ کسکر اندن 15 غان زیات ٹپی مسر۔

مستونگ نا ہندی و بلوچ سیاسی تنظیم آک دا تدینی ءِ بلوچ زنک ایسری گوندسہ جہانی ادارہ تیان خواست کرینو کہ او دن انگا تدینی تا توننگ کن گام ارفر۔

پاکستانی لشکر اسہ بندغ ئسے دزگیری آن پد نادرست ہند آ درینے۔

حب چوکی آن حوال تا ردئٹ 22 اکتوبر نا نن پاکستانی لشکر حب شار ئنا الہ آباد ٹاؤن ئٹ اسہ اُرا ئسے آ چھاپہ خلیسہ ظفر گشگوری پنی ءُ بندغ ئسے دزگیر کریسہ تینتون درے۔

حوالکار تا ردئٹ محکمہ ماحولیات نا ملازم ظفر گشگوری پاکستانی لشکر نا دو آن دزگیری آن پد دائسکان مونا ہتنگتنے۔

بلوچستان ئٹ زوراکی نا بیگواہی تا تدینی تا لڑ برجاء ءِ ہراڑے درو دئے بلوچ خوانندہ ءِ راولپنڈی آن زوراکی ئٹ بیگواہی نا گواچی کننگانے اندن داکان مالو اکتوبر ئٹ زوراکی نا بیگواہی تا کچ 80 آن تدینگاسس۔

اکتوبر نا توہ ئٹ بلوچستان نا شار حب چوکی آن دا وخت اسکان شش بندغ نا زوراکی ئٹ بیگواہی نا حوال رسینگانے۔ حوالکار تا ردئٹ دا کچ بھاز زیات ءِ واہم بھیم و تڑی تا سوب کیہی خاہوت آک میڈیا غا بننگ خوائپسہ۔

ایلو پارہ غا بلوچستان تون اوار پاکستان نا ایلو شار تیٹ زوراکی نا بیگواہی تا برخلاف برانز آتا لڑ برجاء ءِ، برانز کروک آک بلوچستان ئٹ زوراکی نا بیگواہی تا تدینی تا توننگ و بیگواہ بندغ تا آجوئی نا خواست کننگ ءُ۔

چین ئنا خُلیس – ٹی بی پی سرگپ

پاکستان چین انسٹی ٹیوٹ نا سروکی ٹی ”چائنا ایٹ 75: اے جرنی آف پروگریس، ٹرانسفارمیشن اینڈ لیڈرشپ“ نا سرحال آ جہانی کانفرنس ئٹ تران کریسہ چین ئنا سفیر جیانگ زیڈونگ پارے کہ چین پاکستان اقتصادی راہداری نا کسر ئٹ رکھ کل آتیان بھلا ہڑاند ءِ و رکھوک و سوگوْ ماحول آن بیدس ہچس دوئی کننگ مفک۔

جہانی کانفرنس ئٹ پاکستان نا وزیر داخلہ اسحاق ڈار نا ساڑی گری ٹی چینی سفیر تینا خُلیس تے درشان کرے کہ چین اکن رکھ کل آتیان بھلا خُلیس ءِ و پاکستان ئٹ چین پاکستان اقتصادی راہداری نا کسر ئٹ ہڑاند ئسے و بیرہ شش توہ ئٹ اِرا وار چین ئنا زرگزرانی سواد و سرمایہ کار آتیا جلہوک ننکہ سگنگ نا لائخ افس، ہرافتیٹ چینی تے جانی نسخان ہم مسنے۔

چین ئنا حکومت بلوچستان ئٹ تینا زرگزرانی و عسکری ڈٹ بندی تا ایسری نا بابت بھاز فریشان ءِ ولے بلوچستان ئٹ راج دوست جماعت آک و آزادی کن کاریم کروک سلہہ بند تنظیم آک چین ئنا زرگزرانی سواد آتے لٹ و پل کروک منصوبہ گوْندانو، ہرانا سوب آن اونا مفاد آک چرجوئی ئٹ جلہو تا دک ئٹی ءُ۔

چین ئنا سفیر جیانگ زیڈونگ چین ئنا زرگزرانی و عسکری ڈٹ آتا مخالف آتا برخلاف کریک ڈاؤن کننگ آ زور تسنے ولے بلوچستان ئٹ اِرا دہائی آن زیات برجاء فوجی آپریشن و ریاستی بیدادی آن پد ہم، طاغت نا زور آ ہچس دوئی مننگ کتنے و بلوچستان ئٹ آزادی کن سیاسی و سلہہ بند جہد برجاء ءِ۔

طاغت نا زور آ بلوچ تحریک ءِ لتاڑنگ نا پاکستان نا ڈٹ بندیک مالو آن بے سہب مسنو و چین ئنا عسکری کمک تون ہم السی مُخ تفی ئٹ برجاء تحریک ءِ لتاڑنگ نا ڈٹ بندیک سرسہب مروفس۔ بلوچ ویل سیاسی ءِ، ہرا حق و آجوئی کن ءِ و بلوچستان نا راجی ویل آتیا حق و بلوچ راج ءِ آجوئی نا حق تننگ آن بیدس بلوچ ڈغار آ چین ئنا سرمایہ کاری رکھوک مننگ کپک۔

مسہ سال مست پاکستانی لشکر نا دو آن زوراکی ئٹ بیگواہ کننگوک جامعہ بلوچستان نا خوانندہ سہیل بلوچ و فصیح بلوچ نا یلہ مفنگ نا برخلاف بساک نا پارہ غان جامعہ بلوچستان ٹی اِرا دے برانز کننگا۔

بلوچ خوانندہ سہیل و فصیح بلوچ نا یلہ مفنگ نا برخلاف بساک نا پارہ غان اِرا دے ئی برانز پورو مس، برانز درو 31 اکتوبر بناء کننگا۔

سہیل و فصیح ہرا کہ نوشکی آن تعلقداری تخرہ اوفتے اِرا نومبر 2021 آ جامعہ بلوچستان آن زوراکی ئٹ بیگواہ کننگا ہرا دائسکان بیگواہ ءُ۔

یاتی مرے کہ سہیل و فصیح بلوچ نا زوراکی ئٹ بیگواہی نا برخلاف داکان مست ہم بلوچستان تون اوار کراچی ٹی برانزی مچی کننگا وختس کہ اوفتا زوراکی ئٹ بیگواہی نا برخلاف خوانندہ غاک کلاس آتا بائیکاٹ کرسہ برانزی کیمپ ہڈ تسر ہرا ہمو وخت نا کوالخواہ تیتون سلاہ غان گڈ ایسر کننگار وختس کہ ہڑتوما خوانندہ غاتا بیگواہی ءِ مسہ سال پورو مسنے ولے اوفک دائسکان یلہ متور۔

اینو جمعہ نا دے آ خوانندہ غاتا پارہ غان سہیل و فصیح بلوچ نا یلہ مفنگ نا برخلاف برانز کننگا۔ دا رِدئٹ بلوچ اسٹوڈنٹس ایکشن کمیٹی نا پارہ غان کوئٹہ ٹی برانز مچی و تولوک برانز کننگا۔

خوانندہ غاک بلوچستان یونیورسٹی آن کوئٹہ پریس کلب اسکان برانزی مچی ئس کشار و پریس کلب نا مون آ تولوک برانز کریر۔

کوئٹہ پریس کلب نا مون آ تولوک برانز آن تران کرسہ تران کروک آتا پاننگ ئس کہ بلوچستان بیگواہ ءُ استان ئس جوڑ مسنے ہراڑے داسکان ہزار آ بندغ آتے قانود و عدالت آن چپ دزگیر کرسہ بیگواہ کننگا و سال آتیان بیدس ٹرائل نا بلوچ ورناک ٹارچر سیل آتیٹ قیذ و بند بیدادی سہینگو۔

ہیت کروک آتا پاننگ ئس کہ بلوچستان ئٹ زوراکی ئٹ بیگواہی نا ٹِک مروک آتیٹ خوانندہ غاتیان ہلیس بزغر، استاد آتون اوار ہر تپہ غان تعلقداری تخوک آ ورناک اوار ءُ داڑے اسکان کہ بندغ آتے خواننگ جاہ تیان بیگواہی نا ٹِک کننگانے۔

زوراکی ئٹ بیگواہی نا گواچی مروک سہیل و فصیح بلوچ نا زوراکی ئٹ بیگواہی نا باروٹ برانزی تا پاننگ ئس کہ مسہ سال مست ہڑتوما خوانندہ غاتے اوفتا ہاسٹل نا تہہ آن پاکستانی فورسز زوراکی ئٹ بیگواہ کرے ہرا مسہ سال تدینگ آن گڈ ہم مون آ بننگ کتور۔

کوئٹہ برانزی تیٹ خوانندہ و شاری تتون اوار زوراکی ئٹ بیگواہی نا گواچی مروک آ بندغ آتا خوہوت آک ہم اوار ئسر و تینا بیگواہ مروک آ بندغ آتا یلہ مننگ نا خواست کریر۔

ہیت کروک آتا مستی پاننگ ئس کہ اسہ وار ئس ولدا بلوچستان ئٹ زوراکی ئٹ بیگواہی تیٹ ترندی ہتنگانے ہراڑے بلوچستان و ایلو علاقہ غاتیٹ بلوچ خوانندہ غاتے زوراکی ئٹ بیگواہی نا ٹِک کننگو، بیرہ اکتوبر نا تو ئٹ 70 آن زیات بندغ زوراکی ئٹ بیگواہ نا ٹِک کننگار ہرافتیٹی گیشتر خوانندہ ئسر و اوفتے اوفتا ہاسٹل و اُرا تیان بیگواہ کریر۔

خوانندہ غاک خواست کرینو کہ جہانی راج، بندغی حق آتا ادارہ غاک پاکستان نا خوانندہ گل آک دا زوراکی ئٹ بیگواہی تا برخلاف بش مرسہ ریاست آن سوج کیر و بلوچ خوانندہ غاتا یلہ مننگ کن کڑد سر ایتر۔

استو آئی جے پی میٹرو اسٹیشن راولپنڈی آن خڑک پاکستانی لشکر اسہ فلیٹ ئسے آ چھاپہ خلیسہ فلیٹ ئٹ ہندی غٹ بلوچ خوانندہ تے نادرست ہند آ دریسہ بیگواہ کرے۔

بیگواہ کننگوک آتا چاہنداری عارف علی نا مار سلیم عارف ہند تربت بی بی اے ششمیکو سیمسٹر نا خوانندہ، فدا احمد نا مار بالاچ فدا ہند تربت بی بی اے ہشتمیکو سیمسٹر نا خوانندہ، عبدالقادر نا مار خدا داد ہند تربت دشت دادے آئی آر ہشتمیکو سیمسٹر نا خوانندہ، سومار نا مار خلیل احمد ہند آواران تیرتیج آئی آر ہفتمیکو سیمسٹر نا خوانندہ، اقبال نا مار خلیل احمد ہند ڈندر تربت آئی آر ہشتمیکو سیمسٹر نا خوانندہ، سید محمد نا مار حمل حسنی ہند آواران آئی آر ہفتمیکو سیمسٹر نا خوانندہ، عطاء نا مار بابر عطاء ہند پنجگور آئی آر ہفتمیکو سیمسٹر نا خوانندہ، مہیم نا مار نور مہیم ہند پنجگور آئی آر پنچمیکو سیمسٹر نا خوانندہ، اعظم نا مار افتخار اعظم ہند آواران ایجوکیشن ہفتمیکو سیمسٹر نا خوانندہ و اکبر نا مار احسام ہند پنجگور نا پِن تیٹ مسنے۔

بلوچ اسٹوڈنٹس کونسل اسلام آباد نا پاننگ ءِ کہ نن اوفتا رکھ ئنا بابت بھاز گڑتی ٹی اُن و ہر اسٹ آن اوفتا رکھوک یلہ کننگ ئٹ کڑد سر تننگ نا خواست کینہ۔

اونا پاننگ ئس کہ اگہ ننا باسک آتے رکھوک یلہ کننگتو گڑا نن زو تینا گامگیج نا پڑو کرون۔

بلوچ لبریشن آرمی نا ترجمان جیئند بلوچ میڈیا غا شینک کروک اسہ بیان اسیٹی پارینے کہ ننا سرمچار آک استو دکی ٹی کوزہ گیر پاکستانی لشکر نا اسہ پوسٹ ئسے جلہو ئٹ ٹک کریر۔

ترجمان پارے کہ سرمچار آک دکی شار ئٹ ٹہیفوک کوزہ گیر پاکستانی لشکر نا اسہ پوسٹ ئسے گرنیڈ لانچر ئٹ کیہی گولہ خلکر و بھلا سلہہ تیٹ جلہو کریر، جلہو ئٹ دژمن لشکر نا اسہ کارندہ اس ہند آ مرگ ئنا گواچی مس اندن دژمن ءِ گیشتر جانی و مالی نسخان تیتون مون تروئی تما۔

ترجمان پارے کہ بلوچ لبریشن آرمی دا جلہو نا ذمہ واری ءِ ارفک و دا ارادہ نا درشانی کیک کہ بلوچستان آن کوزہ گیر پاکستانی لشکر نا تیوہ پیشتمنگ اسکان ننا کاروائیک برجاء مرور۔