بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارینے کہ بلوچ لبریشن آرمی نا یونٹ، فتح اسکواڈ نا سرمچار آک استو پنجگور ئٹ بی ایل اے انٹیلی جنس کڑدہ زراب (ZIRAB) نا فراوان کروک ڈھکوک معلومداری تا بنداو آ پروم، دِزگٹ ئٹ پاکستانی لشکر و ڈھکوک ادارہ تا جوڑ کروک ڈوہدار بندغ تا ٹولی بیرہ پِن ئنا ڈیتھ اسکواڈ آتا اسہ ہند ئسے آ بھلو کچ اسیٹ جلہو کریر۔
او پارے کہ سرمچار آتا جلہو ئٹ چار ڈیتھ اسکواڈ کارندہ ہند آ مرگ ئنا گواچی مسر اندن اوفتا اسہ سنگت اس تینا سلہہ تے خسا و نرّا۔ اندن مرگ ئنا گواچی مروک کارندہ تا سلہہ و ایلو فوجی سامان تیا سرمچار آک کوزہ کریر۔
ترجمان پارے کہ اندا وخت آ سرمچار آتا اسہ پین ٹولی اس جلہو نا ہند ئنا پارہ غا گام خلوک ڈیتھ اسکواڈ نا سروک بجار شمبے زئی نا ایلم ظاہر شمبے زئی ءِ جلہو ئٹ ٹک کرے، ہرانا سوب آن او جاگہ غا مرگ ئنا گواچی مس اندن اونا اِرا سنگت ٹپی حالیت ئٹ نرّار۔
او پارے کہ اندا وخت ئٹ سرمچار آک اندا جاگہ غا استحصالی پروجیکٹ نا اِرا کریش پلانٹ و ایلو بھلا مشینری تون اوار ہمو ہند ءِ ہُشیسہ تیوہ بھس کریر۔
او پارے کہ پنجگور نا علاقہ پروم ئٹ منہ راجی غدار تینا ذاتی مفاد آتا خاطر کوزہ گیر لشکر و ڈیتھ اسکواڈ آتا کمکار جوڑ مسنو، و بلوچ راجی تحریک نا برخلاف متحرک ءُ، و دژمن ریاست پاکستان نا لشکر کن مخبر و کمکار نا کاریم سر تننگ ءُ۔ او مکروہ کاریم تیٹ بلوچ ورنا تا مخبری، دژمن لشکر کن راشن دننگ، ڈھکوک ادارہ تا افسر آتے تینا ذاتی گاڑی تے تننگ، دژمن لشکر کن کیمرہ و سولر سسٹم خلنگ کون آ کمکاریک اوار ءُ اندن دا غٹ بلوچ دژمن کاریم تے فوج ئتون بیرہ پوریائی تعلق نا پِن تریسہ سر تریسہ ءُ۔
ترجمان پارے کہ پنجگور ئٹ منہ خاص ءُ بندغ ٬لائن٬ نا پِن ئٹ سادہ غا بندغ آتے دژمن لشکر کن مخبری آ بیوس کننگ ءُ۔ پن کروک بندغ آک فوج اکن کمکاری نا داد ئٹ لائن انچارج گچین مسنو، اندن گولڈ سمڈ لائن آ تیل ئنا پوریا کن دژمن لشکر اوفتے اسٹیکر فراوان کیک۔ پِن کروک بندغ آک لس بلوچ آتا معاشی بیوسی آن سواد ارفسہ اوفتے مخبری نا بدل آن اسٹیکر نا جوفہ ایترہ۔ اندن گڑاس بے سلہہ بند مخبر شکار، سیل و سوات و ساہدار تا خیالداری نا بہانہ غا مَش تیا مون کیرہ و سرمچار آتا ہند و کسر تے پَٹنگ نا کوشست ئٹ اختہ ءُ۔
او پارے کہ بلوچ لبریشن آرمی پاش کیک کہ ننا انٹیلی جنس ونگ پِن کروک غٹ بندغ آتیا نظر تخوک ءِ، اگہ پن کروک بندغ آک تینا راجی دژمن کاریم تے یلہ کتور گڑا اوفتے عبرت تروک ایسری اسکان سر کننگو۔
ترجمان پارے کہ بلوچ لبریشن آرمی نا سرمچار آک کیچ ئنا علاقہ ہوشاب تل ئٹ مُسہ دے مالو اسہ کاروائی اسیٹی گواران نا مار مقصود ہند ہوشاب تل سر ءِ دزگیر کریسر۔
او پارے کہ پِن کروک مخبر و کمکار سر و سوج نا وخت آ منّا کہ او پاکستانی لشکر نا کرنل میران تون ہوشاب کیمپ ئٹ اوڑدہی کریسس و پدان اونا پاننگ آ بیرہ پِن ئنا ڈیتھ اسکواڈ کارندہ بہروز نا مار شہداد نا سروکی ٹی مخبر و کمکار نا دروشم ئٹ کاریم کننگ ئس۔
جیئند بلوچ پارے کہ مخبر مقصود منا کہ او ہمدرد نا دروشم ئٹ سرمچار آتا راشن تیٹ ”ٹریکنگ چِپ“ ڈھکیسہ سرمچار آتا کیمپ اسکان سر کریسس، ہراڑے دژمن لشکر جنوری 2023 ئٹ اسہ ڈرون جلہو اسیٹ سرمچار آتا کیمپ ءِ ٹک کریسہ جلہو بناء کریسس و دژمن تون جھڑپ آتیٹ سیوتی تنظیم نا مُسہ سرمچار عامر خان عرف عابد جان، یحییٰ جان عرف کمبر جان، رضا عرف گزین و بی ایل اے نا سنگت قاضی نا مار ممتاز عرف ملا یاسر شہید مسوسر۔
او پارے کہ مخبر کمکار مقصود تینا ڈوہ تے منّنگ تون اوار تینا ایلو سنگت آتا پِن تے ہم پاش کرے۔ راجی غداری نا ڈوہدار مننگ آ بلوچ راجی عدالت نا فیصلہ نا ردئٹ آلہ کار مقصود ءِ سرمچار آک مرگ ئنا گواچی کریر، اندن زراب پن کروک نیٹ ورک نا ایلو مخبر آتا پد رندٹ ءِ، ہرافتے زوت اوفتا ایسری اسکان سر کننگو۔
ترجمان پارے کہ ایلو پارہ غا بلوچ لبریشن آرمی نا سرمچار آک اینو سہب ئنا کوئٹہ نا علاقہ کلی قمبرانی ٹی اسہ انٹیلی جنس بیسڈ کارروائی اسیٹی کوزہ گیر لشکر نا ڈھکوک ادارہ ملٹری انٹیلی جنس (ایم آئی) نا اسہ اہم کارندہ کریم بخش نا مار سید حان بگٹی ءِ سم کاری کریسہ مرگ ئنا گواچی کریر۔
او پارے کہ پاکستانی لشکر نا ملٹری انٹیلی جنس نا کارندہ سید حان کوئٹہ ئٹ کوزہ گیر لشکر کن مخبری تون اوار بندغ آتے ڈھکوک ادارہ تیٹ مخبر نا وڑئٹ بھرتی کننگ ئٹ اوار ئس۔ پن کروک آلہ کار نا اصل ہند محمد کالونی سوئی ڈیرہ بگٹی ئس اندن ساڑی آ ہند کوئٹہ کلی قمبرانی ئس۔
ترجمان پارے کہ غٹ معلومداری و شاہدی تیان پد بلوچ لبریشن آرمی نا سرمچار آک اینو سہب ئنا کلی قمبرانی کوئٹہ ئٹ آلہ کار سید حان ءِ سم کاری کریسہ مرگ ئنا گواچی کریر و اونا سلہہ تے دوئی مسر۔
ترجمان پارے کہ بلوچ لبریشن آرمی دا غٹ جلہو تا ذمہ واری ءِ ارفک، و گیشتر دا پاش کیک کہ بلوچ راجی تحریک و مفاد آتا برخلاف ہرکس متحرک مس، چاہے اونا تعلق ہرا ہم راج، نسل، مذہب و فرقہ غان مس اودے اسہ دژمن و غدار ئسے نا دروشم ئٹ اونا ایسری اسکان سر کننگو۔
