بلوچستان نا ضلع نوشکی ٹی پاکستانی لشکر نا اسہ چیک پوسٹ ئسے آ جلہو نا حوال رسینگانے۔
حوال تا رد ئٹ نوشکی نا مشی آ علاقہ ہژدہ خول ئٹی ایف سی نا چیک پوسٹ آ درو شام ئنا نادرست آ بندغ آک جلہو کرینو۔
خیال ئٹ مرے کہ نوشکی و ایب کیب ئٹی بلوچ آجوئی دوست سلاہ بند تنظیم آک متحرک ءُ و پاکستانی لشکر و سرکاری ماڑی تیا جلہو کیرہ۔ واہم دا جلہو نا بارو ئٹ دائسکان عسکری ذرائع تا کنڈ آن ہچ ہیت متنے۔
بلوچستان نا بنجاہی شار کوئٹہ و ضلع کیچ آن پاکستانی لشکر اِرا وکیل تون اوار پنچ بندغ ءِ زوراکی ئٹ بیگواہ کرینے۔
بلوچستان نا بنجاہی شار کوئٹہ غان پاکستانی لشکر اِرا وکیل ءِ زوراکی ئٹ بیگواہ کرے ہرافتا چاہنداری ایڈووکیٹ فدا احمد دشتی و ایڈووکیٹ صلاح الدین مینگل نا پن تیٹ مسنے۔
حوال تا ردئٹ ایڈووکیٹ فدا احمد دشتی ءِ کاؤنٹر ٹیررزم ڈیپارٹمنٹ (سی ٹی ڈی) و ایلو نادرست مول کروک سلہہ بند بندغ آک استو کوئٹہ نا علاقہ اے ون سٹی ٹی اوفتا اُرا غان زوراکی ئٹ بیگواہ کریر۔
اندا وڑ بلوچستان واشک نا علاقہ ناگ آن تعلق تخوک ایڈووکیٹ صلاح الدین ولد محمد ایوب مینگل ءِ پاکستانی لشکر استو دوانزدہ بجہ نا وخت آ کوئٹہ نا بروری روڈ گولی مار چوک آن زوراکی ئٹ بیگواہ کرے۔
خن خنوک شاہد آتا ردئٹ فورسز و ڈھکوک ادارہ تا کارندہ غاک مُسہ ویگو گاڑی تیٹ سوار ئسر، ہرافک صلاح الدین ءِ زوراکی ئٹ بیگواہ کریر۔
وکیل آتا زوراکی نا بیگواہی آ چاگڑدی و سیاسی کڑدہ غاک خُلیس نا درشانی کننگ ءُ۔
صحافی کیّا بلوچ نوشتہ کرے کہ اسہ بندغ اس ہرا تینا زند نا پنچ، شش سال تریسہ قانود ءِ خوانک و پہہ مریک و پدا تیوہ غا زند قانود نا رکھ اکن جنگ کیک، اودے منہ بندغ، ہرا قانود آن اسُل واخف مفسہ، بیدس قانود ارفسہ اودیم کیرہ، و پدا دا دعویٰ کیرہ کہ نن ڈیہہ ئٹ قانود خوائنہ۔
ایلو پارہ غان بلوچستان نا ضلع کیچ آن پاکستانی لشکر مُسہ بندغ ءِ دزگیر کریسہ بیگواہ کرینے۔ بیگواہ کننگوک بندغ تا چاہنداری نصیر نا مار اکرم، راشد علی نا مار عبدالمالک، و شیر محمد نا مار صلاح الدین نا پن تیٹ مسنے۔
ہندی حوالکار تا ردئٹ پن کروک بندغ آتے شش ستمبر آ پاکستانی لشکر ضلع کیچ نا تحصیل بلیدہ نا علاقہ چب ئٹ چھاپہ خلیسہ دزگیر کرینے ہراڑان پد پن کروک بندغ آک بیگواہ ءُ۔
بلوچستان نا علاقہ بولان، چمالنگ، راڑہ شم و ایب کیب ئٹ پاکستانی لشکر نا لشکر کشی برجاء، گن شپ ہیلی کاپٹر آتیٹ شیلنگ و تراک آتا حوال رسینگانے اندن ضلع کیچ، قلات و مستونگ نا جتا علاقہ تیٹ ہم لشکر کشی برجاء ءِ۔
حوال تا ردئٹ استو آن چمالنگ، راڑہ شم و بغاؤ نا علاقہ تیٹ پاکستانی لشکر نا بھلو کچ اس پند آ و گاڑی تیٹ بننگ ءُ اندن دا وخت آ ہیلی کاپٹر آتا بال ہم برجاء مسنے۔
علاقائی حوالکار آک ٹی بی پی ءِ پاریر کہ فوجی کارندہ تا بھلو کچ اس چمالنگ آ سر مسنے اندن ہیلی کاپٹر آتا بال برجاء ءِ۔
ایلو پارہ غا راڑہ شم و بغاؤ نا علاقہ غاتیٹ فوج پترینگسہ ءِ۔
حوال تروک آک پاریر کہ کوہلو ٹی فوجی سامان تیتون اوار کارندہ تا مُچ مننگ نا حوال آک اریر واہم دائسکان ہیلی کاپٹر آتا ہن و بر خننگ ئٹ بتنے۔
ایلو پارہ غا بولان نا جتا علاقہ کھوسٹ، شاہرگ، کمان، بزدار، ترکڑی، جمبرو، پُڑ، چکی واڑ و ایب کیب نا علاقہ غاک لشکر کشی نا پلویڑ ئٹی ءُ۔
علاقائی حوالکار تا پاننگ ءِ کہ درو ہندی بندغ تا اُرا تے گن شپ ہیلی کاپٹر آک شیلنگ ئٹ ٹک کریر واہم جانی نسخان تا حوال اف۔
ایڑے بلوچستان نا ضلع کیچ نا علاقہ ہوشاب، تجابان و گورکوپ ئٹ لشکر کشی برجاء ءِ۔
ہندی حوالکار تا پاننگ ءِ کہ پن کروک علاقہ تیٹ بھلو کچ اسیٹ فوجی کارندہ غاک پیہنگ آ خننگانو۔ اندن جتا ہند آتیا ناکہ بندیک برجاء ءُ و مَشی آ لڑ تیٹ ہم فوجی کارندہ غاک پترینگنگ آ خننگ ئٹ بسنو۔
واہم لشکر لشکر نا بابت کوالخواہ تا ہیت دائسکان مونا بتنے۔ نئے کہ لشکر کشی نا وخت آ دزگیری و جانی نسخان تا حوال رسینگانے۔
ایلو پارہ غان بلوچستان نا ضلع مستونگ نا علاقہ اسپلنجی و قلات ناگاہو ٹی ہیلی کاپٹر آتا بال خننگ ئٹ بسنے و لشکر کشی برجاء ءِ۔
خیال ئٹ مرے 25-26 اگست آ بلوچ لبریشن آرمی آپریشن ھیروف ئٹ کروک جلہو تیٹ تیوہ بلوچستان ئٹ پاکستانی فوجی کارندہ، ذیلی فورسز، تھانہ و ایلو فوجی و اقتصادی تنصیبات آتے ٹک کریسس۔
آپریشن ھیروف نا کل آتیان زیات بھلا کارروائی ءِ بیلہ ئٹ بی ایل اے مجید برگیڈ سر تس ہراڑے مجید برگیڈ نا ہفت جند ندر پاکستانی لشکر نا بنجاہی ہیڈکوارٹر ءِ جلہو ئٹ ٹک کریر اندن جنگجوک بیست گھنٹہ اسکان ہیڈکوارٹر آ کوزہ کننگ ئٹ سرسہب مسر۔
بیلہ جلہو ئٹ مجید برگیڈ نا زالبول جند ندر ماہل بلوچ عرف ذلان کرد بارود آ پُر گاڑی ءِ گیٹ ئٹ خلیسہ جلہو نا بناء ءِ کرے۔ ماہل بلوچ مسٹمیکو بلوچ زالبول جند ندر ءِ ہرا دا جلہو ءِ گیشتر جتا کیک۔
بی ایل اے دا جلہو ئٹ پاکستانی فورسز، و ڈھکوک ادارہ تیتون اوار ایلو پاکستانی فورسز آتا 130 کارندہ مرگ ئنا گواچی کننگ نا ذمہ واری ارفیسس۔
ہمو کہ بلوچ آن مذمت کن خواست کننگ ءُ دیہاڑ آن سبخ ارفر
میر محمد علی تالپور | مٹ : برناز بلوچ
دی بلوچستان پوسٹ
دنو کیہی تدینیک اریر ہرافک پاکستان نا بے جارات صوبہ بلوچستان نا ساڑی آ بحران آتیٹی تینا بشخ ءِ شاغانو و بلوچ الس نا ذہنیت و رویہ آتے اسہ صاف ءُ دروشم اس ایترہ۔ دافتیٹی گڑاس اہم تدینی تیٹ اوار اریر:
ہندا زوت آتیٹ، 21 ستمبر 2023 کن اسلام آباد ئٹ بیگواہ بندغ تیکن برانز کروکا خاہوت آتا برخلاف واٹر کینن، آنسو گیس و لٹ نا کارمرز: 27 جولائی 2023 کن مستونگ مارچ ئٹ ساڑی بندغ تیا سمکاری، و 28-29 جولائی کن گوادر ئٹ پرامن برانزی تیا بددروشم آ جلہو آک الس نا غاؤ آتے پین گیشتر کرینو۔ داڑتون اوار ننے صبا دشتیاری، توتک ئٹ پاش مروکا اشتماعی قبر آک، کامریڈ غلام محمد و اونا سنگت آتے، حیات بلوچ، و پین کیہی بلوچ باتی تا پن تے یاد تخنگ مرے ہرافک تینا ساہ تے تسنو۔
بی ایل اے نا جلہو و “مذمت” کن خواست آک
بلوچ الس نا پارہ غان مونتس زلم و زوراکی تا دیہاڑ ءِ تیوہ وڑئٹ خن تیان چپ کرسہ، پاکستان نا زانتکار آک، سول سوسائٹی نا چندی تپہ آتتون اوار، دا وخت ڈاکٹر ماہ رنگ بلوچ آن “مذمت کننگ کن” خواست کننگ ءُ ہرا کہ جبر نا برخلاف جہد نا کسرشونی ءِ کننگ ءِ۔ دا خواست بلوچ آجوئی پسند آتا پارہ غان زوت ئٹ مروکا جلہو آتیان پد کننگانے۔
25 و 26 اگست کن، اسہ گچین و ویل آرگنائزڈ جلہو ئسینا وخت، سلہہ بند لشکر بلوچ لبریشن آرمی (بی ایل اے) تیوہ بلوچستان ئٹ پولیس اسٹیشن، ریلوے لائن و بھلا کسر تے ٹِک کرے۔ دا جلہو نا نتیجہ ئٹ بی ایل اے نا 21 سلہہ بند جہدکار آتتون اوار پین کم و ود 73 بندغ مرگ نا گواچی مسر۔ آجوئی پسند لشکر بیلہ ئٹ فرنٹیئر کور کیمپ آ جلہو تون اوار پولیس اسٹیشن و لیویز پوسٹ آتیا جلہو تا ذمہ واری ءِ ارفے۔ ودیک، اوفک بولان ئٹ اسہ ویلوے پل ئسے تراک ئٹ دنز تسر، بلوچستان نا کیہی ہند آتیا کسر تے بند کریر، گاڑی تے خاخر تسر، و پنجاب نا سرحد تون تفوک موسیٰ خیل ئٹ چندی بندغ آتے دزگیر کریر۔ زہمی تے اوفتا شناختی کارڈ آتے ہُننگان پد کسفنگا، ہراڑان معلوم مس کہ اوفتا سیالی پنجاب نا صوبہ آنے۔ حکومت نا پاننگے کہ تدینی نا ورندی ئٹ 21 سلہہ بند خلنگانو، و گڑاس جشوک جون آک خضدار و حب آن خننگار۔ چندی لاش آتا پجار ءِ اوفتا خاہوت آک بیگواہ مروک بندغ تا دروشم ئٹ کریر۔ وزیراعظم شہباز شریف، آرمی چیف جنرل آصف منیر و وزیر داخلہ محسن نقوی غٹ دننگا تدینی تا مون تننگ و حکمت عملی جوڑ کننگ کن صوبائی دارالحکومت کوئٹہ نا دورہ ءِ کریر۔ بی ایل اے نا جلہو تا کچ، کڑمبی و وخت تنیا حکومت نا رکھوک نزوری و بے سہبی تے پاش کتو بلکن بلوچستان ئٹ سلہہ بند لشکر تا ودوکا لائخی تے ہم درشان کرے۔ ہنتس کہ لس وڑئٹ “لس” سرپند مننگک اونا بنداوی وڑئٹ سرپدی تخوکا ہر بندغ منّینگ کیک کہ تدینیک تنیائی ٹی مفسہ۔
انت نی بی ایل اے نا مذمت ءِ کیسہ؟
ہرا وڑ بلوچ کارکن آتیا آجوئی پسند آتا مذمت کن زور تننگانے حالانکہ او اسہ وخت ہم بیدادی نا مخ تفی ءِ کتورہ او کنے ساڑی آ جہانی تدینی نا یات شاغفک۔ تدوکا سال 7 اکتوبر کن مزاحمتی لشکر حماس نا فلسطینی جنگجوک اسرائیلی سرحد نا برخلافی ءِ کریر و فوجی تنصیبات و شاری علاقہ آتیا جلہو بناء کریر۔ نتیجہ ئٹ، اسرائیل ءِ 1100 و 1200 نا نیامٹ نسخان ارفوئی تما، ہراٹی کیہی بندغ تے دزگیر کننگا انتئیکہ حماس نا ایلو جنگجوک غزہ نا کنڈ آ دوارہ پدی ہڑسینگار۔
جہانی برادری جلہو آتا بربریت آ تینا ڈکھ ئنا درشانی ءِ کرے۔ تیوی جہان نا حکومت آک — ہرافتیٹی دیمروی کروک، ترقی پزیر و پدماندہ ڈیہہ تا حکومت آک، داڑاسکان بیرہ پن ئنا مسلم امت — حماس نا ارفوکا گام تا بھاز ترندی ئٹ مذمت ءِ کریر۔ بھلو کچ ئسیٹ سوختئی اس خننگ ئٹ بس، کیہی بندغ آک دادے اسہ اہم ءُ ناانصافی اس سرپند مسر۔
واہم، بین الاقوامی برادری نا پارہ غان حماس نا دا مذمت نا نتیجہ ئٹ فلسطینی تا برخلاف بیدادی نا کاروائی تیٹی ودکی مسنے، ہرا اینو دے اسکان بیدس اڑاند برجا ءِ ۔ منہ ٹِک آتو اوار، جہانی ردعمل بھلو کچ ئسے اسکان چُپ مس، ہراڑان اسرائیل ءِ صاف ءُ موکل اسیتون فلسطینی تے کھسفنگ، ٹپی کننگ، بِین آن کھسفنگ، بے اُرا کننگ و دہشت زدہ کننگ نا موکل تننگا، دا عقیدہ نا بنیات آ کہ حماس نا ارفوکا گامک دہشتگردی ءِ ودی کریر، ہرا کہ تینتون تینٹ اسہ خار ئسے۔
1948 ئٹ اسرائیل نا ہڈ تننگ آن پد ئنا سے فلسطین نا الس تون ظلم، کھسفنگ بٹنگ، ہنپ بٹ و زمین نا نمن، ربیدگی و زرگزرانی زنک ایسری ءِ گیشتر وخت خن تیان چپ کننگک انتئیکہ حماس 1100 اسرائیلی تے مرگ نا گواچی کرے۔ جہان نا ضمیر ہڑدے تینے امر خوڑتی ئٹ ہُننگ کیک و 7 اکتوبر 2023 آن بیرہ غزہ ٹی 40,000 آن زیات بندغ تا موت آ 1948 آن فلسطینی تا مشکل آتے خن تیان چپ کرسا امر مطمئن مننگ کیک ؟
دا وخت غزہ ٹی ظلم و زوراکی تا مذمت ءِ کروکا تیا اول حماس نا مذمت ءِ کننگ نا زور شاغنگانے۔ ہندا وڑ، پاکستان ئٹ حالیہ بی ایل اے نا جلہو آتیان پد، بھلو کچ ئسیٹ خار اس خننگ ٹی بریک ہراٹی ڈاکٹر ماہ رنگ بلوچ و اونا پن آ “بلوچ” تون اوار پین اسٹ ئسینا پارہ غان معافی و وضاحت نا خواست کننگانے۔ معافی خواہنگ نا اومیت نزور آ دشمن کن مخصوص معلوم مریک، و طاغتور زیمی آتا حالیت ءِ اڑزانی ئٹ خن تیان چپ کننگک۔
انت اسہ سیاسی کسرشون یعنی نواز شریف، شہباز شریف، آصف زرداری، بلاول بھٹو یا عمران خان وختس ہم “کھسفنگ و بٹنگ” نا پالیسی، توتک نا اشتماعی قبر، بیدس قانودی کاروائی کھسفنگ نا باقاعدہ معافی خواہانو؟ برانز کروکا بلوچ نیاڑی تا برخلاف لاٹھی چارج مگہ بیگواہ بندغ تا سیال ءُ؟ اوفک احتساب آن تینے رکھنگ کن بھاز طاغتور ءُ ۔ اوفک 1971 ئٹ بنگلہ دیش ٹی مروکا زلم و زوراکی تیکن معافی خوائتور، ہرافتے جہان و گیشتر پاکستانیک بھاز زُو گیرام کرور، دا اومیت ئٹ قالین نا شیف ءِ اڑزانی ئٹ برش کننگاسس۔
26 اگست آ مروکا جلہو آتیان لار کروک اخس بندغ وختس بلوچ باتی، داڑے ئسکان کہ اسلام آباد و لاہور نا یونیورسٹی تیٹی مرگ و برمتہ آتا برخلاف مذمت لوز ءِ مونا ہیسنو؟ تنیا بلوچ آتے انتئے بیدادی نا مذمت کننگ مرے ، و ایلوفک دا فرض آن دو خلاس ءُ؟ منہ بندغ تا کھسفنگ ءِ افسوزناک انتئے سرپند مننگک و ایلوفتا کھسفنگ ءِ قابلِ قبول سرپند مننگک ؟
انت بلوچ نودربر آک ہرافتے تُو تا تُو تھانہ آتیٹی تخنگک، تنیا پدان یلہ کننگک، اوفتے جنگجو سرپند مننگک ؟ ایلو دا کہ ہراتم اوفتے یلہ کننگک گڑا کیہی بندغ آک پھل آتا دروشم ئٹ رہینگرہ۔ اسہ بیگواہ مروک بندغ ئسینا مسڑ ہرادے تھانہ ئسیٹی وخت گدریفنگ آن پد یلہ کننگاسس، کنے پارے کہ اود تینا باوہ ءِ درست کتو انتئیکہ او 75 سال ہناس معلوم مریک۔ بھلو وخت ئسیان اونا زہنی حالیت چنا تا وڑ ئس۔ بیگواہ بندغ تا خاہوت آتے انت تکلیف و صدمہ سگوئی تمک و یلہ مروکا تا خاہوت آک تینا بندغ نا حالیت ءِ خننگ آن پد انت تادی رسینگک؟ انت بدلہ ہلنگ نا اُست خواہی و انصاف کن اُست دیر مننگ دا سیال آتا زہن ئٹ ودی مروف ہرافک داخس در تکلیف ٹی ءُ؟
ریاست نا بے سہبی
حکمران آک بلوچ آتا حق ئنا ویل آتے سرپند مننگ، بِننگ ، ہیت و گپ یا شرہ ٹی اختہ مننگ نا جاگہ غا طاغت تون حل کننگ نا کوشست کرینو۔ اوفتے دن کننگ نا وار بس ہراتم مئی 1972 کن بلوچستان ئٹ سردار عطا اللّٰہ مینگل حکومت جوڑ کرے، ولے اوفک اونا حکومت ءِ ایسر کرسا زیان کریر۔ اگرچہ سلہہ بند ٹولیک ستمبر 2008 ئٹ یکطرفہ جنگ بندی نا پڑو تسوسر، ولے اونا ہچو ورندی اس بتو، ہرانا سوب آن اوفک 2009 ئٹ دوارہ جنگ ءِ بناء کننگ کریر۔
وزیر داخلہ نا پارہ غان ہندا زوت آتیٹ مضحکہ خیز بیان ، ہراٹی دا دعوی کننگانے کہ بلوچستان ئٹ سلہہ بندی ءِ اسٹیشن ہاؤس آفیسر (SHO) نا وسیلہ ئٹ کنٹرول کننگ مریک، دا بیرہ مسخرہ وڑ ءُ ہیت اس اف بلکن سرکاری اہلکار آتا زہنیت نا ہم درشانی ءِ کیک۔ او دنو خیال تخنگ ٹی یکہ اف۔ 18 مئی 1973 ءِ ‘تندوری واقعہ’ غان پد، ہراٹی ہشت دیر اسکاؤٹس خلنگاسر، جنرل ٹِکا خان ریڈیو پاکستان آن اسہ کلہو ئسیٹی پڑو تس کہ “72 گھنٹہ ٹی شرپسند آتے دزگیر کننگ مرو۔” واہم، او 72 گھنٹہ 1977 و اوکان پد ئسکان ہم ودّار۔ ریاستی حکمران آک بلوچستان ئٹ زمینی گواچن آتتون احوال آن اسہ رنگ پیشن ءُ ۔
نئے 7 اکتوبر کن حماس نا گامک و نئیکہ 26 اگست 2024 کن بی ایل اے نا کاروائی تے تدوکا 75 سال ئٹی تومکا لشکر آتے زہمی کروکا بھلا دیہاڑی ندارہ آن جتا ہُننگ مرے۔ ہمو لیفٹسٹ آک ہرا حماس نا حمایت ءِ کرسا بی ایل اے نا مذمت ءِ کیرہ او سیاسی و نظریاتی ردئٹ متضاد ءُ۔ ہندا ہیت ہمو بندغ آتیا ہم بریک ہرا بلوچ آتے دہشتگرد پارسا کشمیری تے آجوئی پسند سرپند مریرہ۔
بیدادی، بیدادی ءِ ودشت ایتک، و دا حل اکن اسل ہم عمل نا لائخ کسر اس اف۔ بلوچ آک ہرا بیدادی تون مون تننگ ءُ او بیدادی ریاست نا پارہ غان مسلط کروک ءِ، و ہرافک جوابی کاروائی کرینو۔ گڑاس نیک نیت بندغ آک مشورہ تسنو کہ 26 اگست نا تدینیک بلوچ آتیکن پین جبر نا سوب جوڑ مننگ کیرہ۔ واہم، انت زند بلوچ آتیکن وختس ہم گلاب نا پھل اس مسنے؟ او اسہ بھلو وخت ئسیان تینا زند نا معمول نا بشخ ئنا ردئٹ بیدادی نا گواچی رہینگانو۔
26 اگست آ مروکا تدینی دا ملک ئنا انچارج آتیکن خن تے ملنگ نا کاریم کرو۔ کلّان مست و کلّان اہم انگا ہیت، او دا منّیر کہ دا بیدادی ہمو گام تیان ودی مریک ہرافتے او کاؤنٹر ٹیررازم ڈیپارٹمنٹ، کیہی ایجنسی و ریاست نا شیف کاریم کروک ڈیتھ اسکواڈز آتا وسیلہ ئٹ ارفرہ۔ ودیک دا کہ، او دے ئکن سلہہ بند آتا اوار مننگ، ایمانداری ئٹ غور و فکر آن، بلوچستان ئٹ تالان ناراضگی نا کچ ءِ مونا ہتیر۔ دا ناراضگی ورنا تے تینا ساہ ءِ خُلیس ئٹ شاغنگ و تینا سیال آتے خطرہ ٹی شاغنگ آ بےوس کیک، خاص وڑئٹ ہندنکہ پجار مروکا تے گیشتر و مسلسل اثرات آتے مون تروئی تمک۔
دا المناک تدینی ءِ بلوچستان ئٹ بندغ تا حق و زند آتا برخلاف بدلہ و بیدادی نا پوسکنو چول اسیکن بناء کننگ نا جاگہ غا سبخ اس سرپند مننگ مرے۔ بدبختی ئٹ ، ہندن لگیک دا سبخ ارفنگ مننگ اف انتئیکہ خضدار، بولان و ایلو علاقہ آتیٹ چندی بیگواہ بلوچ آتا جون آتا دریافت مننگ تون جبر نا گندہ ئنگا گواچنی مونا برسا ءِ ۔ ہرا بندغ آک دیہاڑ آن سبخ ارفپسہ اوفک اودے دہرائفنگ کن برباد مریرہ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بولان نا علاقہ ٹی ترندی تون ہنوک گاڑی سے نا درنگ ئسے ٹی تمنگ آن 7 بندغ ٹپی مسر۔
حوال آتا رد ئٹ بولان نا علاقہ ٹی بھاز پِر و سیلاب نا سوب کسر آتا حالیت خراب مننگ نا سوب ترند ہنوک گاڑی، ڈرائیور نا دو آن ہنیسہ درنگ اسیٹی تما ہرانا سوب آن گاڑی ٹی تولوک 7 بندغ ٹپی مسر۔
ٹپی آتے ہسپتال آ دننگا، ہرافتیان اسٹ نا حالیت ءِ بد پاننگو۔
ایلو پارہ غان کیچ ئنا علاقہ تربت ئٹ ترند ہنوک گاڑی ئس اسہ بندغ ئسے کھورا، پولیس نا رد ئٹ صلالہ بازار تربت ئٹ ترند رفتار پک اپ گاڑی ئس پشاور نا ہندی فران ولد فیصل ءِ کورسہ کھسفے۔
تدینی آن گڈ گاڑی ڈرائیور ہمو ہند آن نرنگ ئٹ سرسہب مس۔
مستونگ آن زوراکی ئٹ بیگواہ اِرا بندغ یلہ مسر۔
بلوچستان نا علاقہ مستونگ آن گدرینگوکا دے تیٹ پاکستانی لشکر نا دو آن زوراکی ئٹ بیگواہ مروکا صحافی ایلم تون اوار یلہ مس۔
صحافی ظہیر احمد مینگل و اونا ایلم محمد عامر اینو پنچ شمبے نا دے آ یلہ مرسہ اُرا غا سر مسر، صحافی ظہیر مینگل ءِ اونا ایلم محمد عامر تون اوار عدنان پنی او اسہ بندغ ئسے ہفت ستمبر نا سئے بجہ نا ننکان اوفتا اُرا کلی ٹنڈلان مستونگ ئٹ فورسز چھاپہ خلسہ اوفتے دزگیر کننگ آن گڈ تیتون اوار درے۔
خاہوت نا پاننگ ئس کہ فورسز کارندہ غاک اُرائی تیا بیدادی ہم کریر و موبائل فون آتے پُلاسر۔
واہم اینو صحافی ظہیر مینگل و اونا ایلم محمد عامر یلہ مسر، ولے عدنان پنی آ بندغ نا باروٹ دائسکان ہچو احوال ئس اف۔
بلوچستان نا بنجاہی شار کوئٹہ نا پولیس نا اسہ سینیئر کارندہ ئسے نا ردئٹ رسالت نا بے شرفی نا دوبہ ٹی دزگیر اسہ دوبہ دار ئسے پولیس کارندہ اس سم کاری کریسہ کسفینے۔
دوبہ دار عبدالعلی ءِ درو چاگڑدی احوالکاری تلہ غا اسہ ویڈیو اس تالان مننگ آن پد خروٹ آباد تھانہ نا پولیس نا پارہ غان دزگیر کننگاسس و اونا برخلاف تعزیراتِ پاکستان نا دفعہ 295 سی نا ردئٹ مقدمہ نوشتہ ئس۔
ویڈیو نا تالان مننگ آن پد خروٹ آباد پولیس اسٹیشن آن پیشن بندغ آتا بھلو کچ اس مُچ مسوسس و دا مچی دوبہ دار ءِ تینا دوٹی ہلنگ نا خواست کننگ ئس۔
کوئٹہ پولیس نا اسہ سینیئر افسر اس پارے کہ ’خروٹ آباد پولیس اسٹیشن برانز کروک آتا بھلو کچ ئسے نا ساڑی مننگ نا سوب آن رکھوک الو اندا خاطر دوبہ دار ءِ کینٹ پولیس اسٹیشن آ دننگاسس۔‘
پولیس کارندہ نا ردئٹ کینٹ تھانہ ٹی اسہ پولیس کارندہ اس سم کاری کریسہ دوبہ دار عبدالعلی ءِ کسفینے۔‘
خروٹ آباد پولیس اسٹیشن نا اسہ سینئر کارندہ ئسے نا پاننگ ءِ کہ عبدالعلی آ سم کاری کروک پولیس کارندہ دزگیر کننگانے ہراڑان سر و سوج برجاء ءِ۔
پولیس نا ردئٹ عبدالعلی نا جون ءِ سول اسپتال دننگ نا جاگہ غا ذمہ وار پولیس سرجن ءِ پوسٹ مارٹم کن اسہ رکھوک جاگہ ئسے آ خوائفنگانے۔
بلوچ لبریشن آرمی نا میڈیا ونگ ہکل “آپریشن ہیروف” ئٹی اوار بی ایل اے مجید برگیڈ نا مسٹمیکو زالبول جند ندر ماہل بلوچ عرف زیلان کرد نا خاہوت، راج و سنگت آتا پِنا ویڈیو کلہو ئس شنگ کرے۔
ویڈیو نا بناء ٹی مجید برگیڈ نا کیہی زالبول تے نادرست مشی آ ہند آ گشت کننگ آ خننگ مریک۔
ویڈیو کلہو ئٹی ماہل بلوچ کُل آن مُست تینا خاہوت ءِ کلہو ایتک ہراٹی او پائک کہ ای تینا خاہوت ءِ پاننگ خواہوہ کہ ہرا کسر ءِ ای گچین کرینُٹ دا کنا است خواہی مسنے کہ ای بلوچ جہد آجوئی نا بشخ مریو انتئے کہ نن قلم ئٹ جنگ کننگ کینہ ولے ننا دشمن بھاز تاغتور ءِ، او قلم ءِ پُہہ مفک، اوڑتون گولی، بمب، توپ ئٹ ہیت کننگ مریک۔
ماہل بلوچ پائک کہ کنے آن پد نُک اسل فریشان مفیرے و دا جنگ ئنا بشخ مریرے و ننا ایڑ ایلم تتون اوار مریرے۔
ماہل بلوچ پائک کہ ای تینا خاہوت ءِ اندا پاننگ خواہوہ کہ کنے آن پد تینا کاٹم ءِ شیف کپیرے بلکن تینا کاٹم ءِ بڑز کیرے و فخر کیرے کہ نُما مسڑ دا جنگ ئٹ بشخ ہلکنے، دشمن تون جنگ کرے و تینا ایڑ تے پاننگ خواہوہ کہ نُم ببو تینا ایلم تتون ہم کوپہ مریسہ جہد آجوئے نا جنگ ئنا بشخ مبو، تینا ڈیہہ ءِ آجو کرسا تینا راج ءِ شرحال ءُ مستقبل ئس ایتبو۔
ویڈیو نا ایلو بشخ ئٹی ماہل بلوچ گاڑی ٹی تولوک تینا ٹارگٹ نا کنڈ آ ہننگ آن منَہ منٹ مُست کلہو ئس رکارڈ کننگ ءِ۔
ماہل بلوچ پائک کہ بلوچ راج خاص وڑ ئٹ تینا لمّہ ایڑ تے پاننگ خواہوہ کہ ہرا وڑ کنے آن مُست ننا شیرزال و دلیر آک تینا ساہ و بدن تے راج و گلزمین کن ٹکر ٹکر کرسا شارل و سمو جوڑ مرسا دیہاڑ ئٹ ساندہ کن زندہ سلیسر ننے دا یخین ءِ دا باور و اعتماد، و کُل آن زیات دا جوزہ و شعور و دلیری تسر کہ جہان نا ایلو راج آتا وڑ بلوچ راج ئنا زالبولک ہم تینا ڈیہہ ئنا آجوئی کن خوشی خوشی تینا ساہ تے ندر کننگ ئٹ کس آن کم افس۔
او پائک کہ مجید برگیڈ نا سنگت آک دا فیصلہ کریر کہ ای تینا ایلو سنگت آتون اوار آپریشن ہیروف ئٹ بشخ ہلیو تاکہ ننا نیامٹ دا فرخ ایسر مرے کہ بلوچ شیرزال و فرزند آک اسہ مورچہ ٹی دشمن تون جنگ کننگ کیرہ۔
ماہل پائک کہ اندا فلسفہ قربانی تون اوار ای منَہ منٹ آن پد تینا مشن آپریشن ہروف آ ہننگ اُٹ۔ ای دشمن ءِ اندنو سبخ ئس یات کرفوٹ کہ اونا نسل آک یاد کرور کہ ننا سرزمین و خاص وڑ ئٹ ننا لمّہ ایڑک بےوارث افس کہ نُم اوفتیا بےدادی کبو۔
ماہل بلوچ پائک کہ دا اسلم نا کاروان ءِ، دا شارُل نا کاروان ءِ، دا سمل نا کاروان ءِ دادے توننگ پنجابی و چینی تا وس ئنا ہیت ئس اف۔
ویڈیو نا ایسر ئٹ ماہل بلوچ تینا سنگت آتے کلہو ایتک کہ کنا جلہو آن گڈ او فریشان مفس و سوگو مریر و دا جنگ ئٹ بشخ ہلیر۔
ویڈیو نا اسہ بشخ ئٹ ماہل بلوچ براہوی ٹی اسہ شئیر ئس خوانک و ویڈیو ماہل بلوچ بی ایل اے مجید برگیڈ نا فدائی سلمان حمل نا شئیر ئٹ ایسر کیک۔
احوال ھیروف
نوشت: برزکوہی
دی بلوچستان پوسٹ
زمین نا سربلندی و آجوئی کوْن آ بے نہاد و گچین آ دوئی کننگ کن تینے ندر کننگ نا عمل انفرادیت نا بے زیم آ ٹِک نا دامون ایمون پیری خلنگ آن دو خلاس مریسہ و اشتماعی فلسفہ نا بنماسی حس ءِ تینا کریسہ ساندہی رکھ ئنا مارشت نا رنگ آتیٹ اویڑدہ مریک۔ دا اسہ اندنو عمل ئسے ہرا وجودیت و بندغی زیست و زند، رکھ و چاہنداری نا برخلاف کُلف خلوک زنگی آ دَرغ ءِ پرغیسہ گواچنی زند ئنا تاج ءِ تینا پِن آ کیک۔ غلامی نا ذلالت آن رسینگوک بدحالیت و متکن ڈسکورس ءِ لتاڑنگ کن ندر مننگ نا سوگوْ و بِسون نمونہ ءِ مونا ہتیسہ زمین نا کُٹ آن پیشن مروک مڷ مرگ و زند ئنا تیوہ غا تخیلانہ و ربیدئی ڈوگماز آتے تینا عمل آن نیست و نابود کیک، و اسہ پوسکنو تصور و فلسفہ نا دیہاڑ نا ٹِک نگار اس جوڑ کیک۔ یخیناً اینو اگہ سارتر زندہ مسکہ گڑا تینا مونا ہتوک وجودی فلسفہ نا عملی نمائش آن گوڑینگوک و خوشی نا اوار احساس آتا پلویڑ ئٹ بسکہ انتیکہ چاہنداری نسیتی و وجود و رکھ نا بنماسی فکر و فلسفہ غان پُر و اجتماعیت نا سربلندی و سرسہبی نا مونا سلوک بے جاراتی و سرگڑدانی آن ہورک وطن نا جندندر شہزادہ و شہزادیک دیہاڑ نا پنہ غاتیٹ گچین آ لوز آتیتون ساندہی کن زندہ مننگ ءُ۔ آپریشن ھیروف نا جندندر آتا کسہ اندا ٹِک آتا داپار ایپار پیری کریسہ راجی و اشتماعی فکر و دانش ءِ اسہ بے نہاد ٹیکی اسیتون شرف ایتک، یعنی اشتماعی چاہنداری و رکھ اکن فناء مننگ و فناء مننگ آن گڈ رکھ ئنا ایسری روح تون اویڑدہ مننگ گواچنی زیست و زند ءِ۔
ہراتم دیگر نا سیخاک خیسن و گلابی رنگ آتا اواری تون گوادر ئٹ سمندر نا کرک تینا پرہ غاتے تالان کیک گڑا ہچو زی روح اس دا زیبدار ندارہ نا روحانی و جادوئی دوستی آن تینے مُر تخنگ کپک۔ کرک نا زی آ آجو چُک آک اندن خننگرہ دنکہ اسہ فنکار اس تینا شاہکار ءِ زیبدار کننگ کن آسمان نا کینوس آ رنگ آتا تِرمپ آتے تالان کرینے۔ چُلک آتا روانی چُپی نا سلوک روح ءِ سرگم و سُر ٹیکی کریسہ اسٹ ایلو تون ہیت کیرہ۔ خلکن و نمب آ مِش تیا تینا خلکن و نازرک آ نت تے تخوک ماہل، تینا خزمُلی آ خن تیٹ ہزار آ طوفان و تغ تے ارفیسہ وطن نا سیم آ مابت تون کرک آ تولوک ءِ۔ میکسم گورکی نا کتاب ”لمہ“ ءِ دوٹی ہلوک او کتاب نا بنجائی کڑدار پاول ولاسوف نا لمہ نا بے نہاد و گچین جدوجہد ءِ سرپد و چاہسہ تینا خزمُلی خن تے سمندر نا پارہ غا ہڑسک۔ مُر سمندر ئٹ اسہ کشتی اس پاش کیک، ہرا کرک آن خڑک مریسہ مریک۔ کشتی ئٹ سوار بلوچ مَچی ہلوک نا خن تیٹ مونجھائی و زبان آ امباء (مَچی ہلوک آتا باگل) و اُست ئنا درپہ ءِ سرپد مریسہ حوصلہ غاتا پیکر، شعور نا روح تون لگیسہ ماہل دیہاڑ نا روانی و چُلک آتیٹ بدلی ہتنگ نا سوچ خلیسہ بش مریک و زیست ئنا رکھ نا پٹ و پول ئٹ سر ہلیک۔ سرزمین نا مابت نا تخیلانہ و ربیدئی روح ءِ عمل نا لِواس بینفسہ ماہل ندر مننگ نا مارشت ءِ اُست ئٹ ارفوک چھپی تون سفر ئٹ مریک۔ دا سفر نا ایسری کرک اسکان ماہل نا فکر و فلسفہ ءِ دتر تیان آبات کروک مڷ آک بروک زنک آتیکن گل و بالی و وطن نا سربلندی کن پند خلوک مرور۔
حوصلہ غاتا پیکر، خن تیٹ طوفان ارفوک ماہل اِرا سال مالو بی ایل اے ئٹ اوار مریک۔ اشتماعی رکھ و چاہنداری ءِ زندہ تخنگ کن اسہ سال ئسے آن گڈ تینا خذمت آتے مجید برگیڈ نا مونا تخک۔ رازداری و چھپی تون تینا شعور ءِ خنجر نا ڈول تیز کریسہ تینا مشن نا ودار ءِ کیک۔ ایسر ہراتم مشن ءِ پوروی کننگ کن اودے ھوال کننگک گڑا او بلوچ مزاحمتی دیہاڑ ئٹ پوسکنو ودشت اس کننگ کن آپریشنل کمانڈ ءِ پائک: ”کنا اُست خواہی ءِ کہ ای تینا مشن ءِ ایسری تننگ کن تنیا ہنپر، بلکن ای خواوہ کہ ای سنگت آتیتون ہمکوپہ مریسہ تینا ایسری مشن نا پوروی ءِ کیو انتیکہ ای سرپد مریوہ کہ ننے ٹی دا لائخی ارے کہ سنگت آتیتون اوار ہمکوپہ مریسہ دشمن نا گِمر، وقار، حوصلہ و طاقت ءِ مِش تیٹ کین۔“ لغویات آتیان پاک و شعور آن پُر دا لوز آتے سرپد مننگ کن تھیوریٹیکل فریم ورک ئٹ کُوکڑو کننگ نا جاگہ غا اگہ بلوچ راج نا نفسیات و اشتماعی فکر ءِ دیہاڑی رِدئٹ اُرین گڑا گواچن آک پاش مرور۔ بانڑی، گُل بی بی و ماہی بیبو نا فکر بلوچ سرزمین نا مسن تا مِلی تیٹ خوندی ءِ، ہرادے ہچو طاقت اس توننگ کپک۔ حمل جیئند نا مِش تا وارث آک نوآبادکار طاقت آتا برخلاف مون تریسہ تینے وطن نا آجوئی و سرخروئی کن ندر کیرہ۔ ماہل نا دا لوز آک مزاحمتی تحریک ءِ اسہ پوسکنو امیت، اسہ پوسکنو ٹہیفنگ و اسہ پوسکنو کسر اسیتون وَلد کیرہ۔ ولے لوز آتے عملی وڑئٹ ہتنگ کن شعور نا بھلا ہند اسکان سر مروئی تمک و مسخت تون ہر وڑئٹ واخف مروئی تمک۔ ربیدئی ہیت آتے بدل کننگ، جنگی محاذ ئٹ زنگ لگوک دَرغ ءِ ملنگ، تحریک نا تنبہ غاتا ٹہیفنگ ءِ ممکن کننگ و پوسکنی نا شابیت آ گچینی تے مونا تخیسہ ماہل آپریشن ھیروف ئٹ تینا ایلو سنگت آتیتون اوار مشن ءِ ایسری تننگ نا اُست خواہی تخوک مریک و سرسہبی تون تینا فرض ءِ پورہ کیک۔
دیہاڑ و تحریک تون دوستی، راجی تحریک ئٹ بدلی نا خواست و دیہاڑ ئٹ چاہنداری نا نیستی آن رکھنگ اونا خیال آتیٹ پاش مریک، یعنی ہراتم تنظیمی کوڈ پِن ئنا گچین کننگ نا ہیت بریک، گڑا او کردستان نا آجوئی کن سلہہ بند جہد کروک تنظیم کردستان ورکرز پارٹی (PKK) نا جندندر Zeynep Kinaci عرف زیلان کرد نا کوڈ پِن زیلان ءِ گچین کیک۔ کردستان نا آجوئی نا تحریک تون اوار ایلو مظلوم و محکوم راج آتیٹ Zeynep Kinaci مزاحمت نا چیدہ نا ڈول ئٹ چاہنگک۔ زیلان کُرد، کرد راج ئنا آزاتی کن ترکش لشکر نا سپاہی تا برخلاف 30 جون 1996 ئٹ جندندر جلہو کریسہ ساندہی کن زندہ مریک۔
کردستان نا مزاحمتی علامت تون چاہنداری، بلوچ راجی تحریک ءِ جہانی پِڑ آ ساڑی ایلو آزاتی دوست راج خاص وڑئٹ کرد راج ئتون چاہندار کننگ کن ماہل بلوچ زیلان کرد نا پِن ءِ گچین کیک۔ ہراتم اوڑان سوج کننگک کہ نی دا عرفیت ءِ انتکن گچین کرینس گڑا او پائک: ”ای کردستان نا آجوئی نا جدوجہد تون تفوک جہدکار آتے دا کلہو تننگ خواوہ کہ نن ہم اوفتیان بار دلیر راج ئسے اُن و آزاتی کن دشمن تون مون تننگن۔ ای اوفتے تینا عمل آن بلوچ راجی تحریک نا بابت چاہنداری تننگ خواوہ۔“ دا لوز آک اونا دانائی، علم و دانش، شعور و چاہنداری ءِ پاش کیرہ۔ ولے ہراتم لوز آک عمل تون گوفنگپسہ گڑا تینے اُست جم کننگ آن بیدس اشتماعی فکر و میدانِ جنگ ءِ رژنائی بشخپسہ۔ پنی آ برازیلیئن تعلیم چاہندار پاؤلو فریرے تینا کتاب Pedagogy of the Oppressed ئٹ ہم لوز و ڈائیلاگ ءِ Praxis (عمل) تون ہمگرنچ کننگ نا پائک۔ اونا بقول، ہراتم اسکان پاننگوک لوز آک سرسوج و عمل تون گنڈنگ مفسہ، گڑا انقلاب نا دوئی کننگ ممکن مفک۔ ماہل دا گواچن ءِ سرپد مریسہ ندر مننگ نا عمل نا رنگ ءِ ہلیک و ساندہی کن زندہ مریک۔
بلوچ راج ئنا نفسیات جنگ ئنا بنجاء نا دامون ایمون پیری کیک۔ دانا بنماسی سوب بلوچ راجی دیہاڑ ئٹ مروک تدینیک ءُ، ہراڑے نوآبادکار نا برخلاف جنگ ئٹ اوار مننگ کن وطن نا مڷ آک ساندہ مُخ تفوک مریرہ۔ اسہ پین سوب اس جنسی تفریق آن خلاسی مننگ ءِ۔ پانزدہمیکو صدی عیسوی ئٹ دہلی آ لشکر کشی نا وخت آ چاکر خان رند نا ہیڑ بانڑی ہم لشکر تون اوار سر ہلیک و دلیری تون دشمن تون مون ایتک ولے دوارہ انگریز آتا افسر سنڈیمن آن ہلیس پنجابی نوآبادکار آتے اسکان Colonial discourse مذہبی اسکولنگ و بینکنگ نظامِ تعلیم نا ذریعت ئٹ بلوچ راجی پجار، اشتماعی نفسیات، ربیدگ، آداب و دود آتے زیمی کیرہ۔ فرانز فینن نا بقول نوآبادکار تعلیمی بست و بند ءِ ٹریپ ہاؤس نا ڈول کاریم ئٹ ہتیک کہ محکوم راج نا فرزند آک تینا گواچنی پجار و نفسیات آن مُر مننگ کیر۔ مذہب نا رِدئٹ کینیا نا پنی آ مصنف و ناول نگار گوگی وَ تیانگو پائک کہ نوآبادیاتی بست و بند ءِ سوگو تخنگ و تینا لٹ و پُل ئٹ سرسہبی دوئی کننگ کن نوآبادکار دین ءِ سلہہ جوڑ کریسہ محکوم راج نا بنماسی فکر و فلسفہ ءِ مسخ کیرہ۔ ولے بلوچ مزاحمتی تحریک تون تفوک ورنا شعور تون سلہہ بند مریسہ دشمن نا تیوہ غا چم آتے مِش تا گواچی کریسہ ءُ۔ اندا درس گاہ تیان پیشن مریسہ دلیر آ بلوچ مسڑ ماہل کالونیل ڈسکورس نا تروک ٹیکی ءِ چغل ایتک و بانڑی، گل بی بی، سمو و شاری نا رند آتے ارفیسہ رادہ مریک۔ او دا ثابت کیک کہ مزاحمت ئٹ پوسکنو ٹہیفنگ و تُڑفنگ و بلوچ راج ءِ Decolonized کننگ کن ندر مننگ راجی وام و فرض ءِ۔
25 اگست نا بیگہ غا ایس ٹی او ایس و فتح اسکواڈ نا ہشت سد دلیر فرزند پوسکنا جنگی لائخی و اٹکل آتیتون بلوچستان نا سینزدہ ضلع آتیٹ 44 ہند آتیا ساڑی جتا ٹارگٹ آتا پارہ غا سر ہلیرہ۔ پوسکنا سلہہ تیتون وطن نا دلیر و حوصلہ مند آ شہزادہ غاک Coordinative جلہو تیتون دشمن نا شابیتی ڈٹ بندی، ہیڈکوارٹرز، چوکی، مڈی دروک گاڑی، دشمن لشکر نا کارندہ اونا پیرا ملٹری نا اسٹیشن و چوکی تیا پد مہ پد جلہو کیرہ۔ بھلا کسر تے تفیسہ دشمن نا ڈھکوک کارندہ آتے مرگ ئنا گواچی کیرہ۔ اسہ وخت آ دا جلہو، کسر تفنگ و شابیت کاروائی تیان چَپ بیلہ نا مُد چھپی تون کڑمب ہورکی نا خمب ئٹ مریک۔ بند، چُک و ایلو ساہدارک تینا اُرا و کدام تیٹ ہندی اسہ پوسکنو لنگڑی، تدینی، بے شرفی و غلامی آ زلالت آن پُر دے اکن جارات نا پٹ و پول ئٹ سرگڑدان مریرہ۔ اسہ دم تون مُد ئنا چُھپی ترند ءُ تراک ئسے آن پنک۔ تراک و فائرنگ نا ٹکا تیان دشمن لشکر نا کارندہ غاک سورکو مریسہ زمین آ لَوڑی کنیرہ۔ جند ندر ماہل شش سد کلو بارود آن پُر گاڑی ءِ دشمن لشکر نا کیمپ ئٹ خلیک و ساندہی کن ڈغار مِش و تہو ئٹ اسہ ساندہی زباد ئسے نا ڈول ہمگرنچ مریسہ ساندہی کن زندہ مریک۔ منہ منٹ آن گڈ جند ندر رضوان ایلو پارہ غا چار سد کلو بارود آن پُر گاڑی ءِ دشمن لشکر نا کیمپ تون خلیک و دیہاڑ نا پنہ غاتیٹ گچین آ لوز آتیتون ساندہی چاہنداری ءِ پَک کریسہ ساندہی کن زندہ سلیک۔ ہبکہ غا دشمن رکھوک پوزیشن ہلنگ نا لائخ مفک کہ پنچ جندندر ایلو کسر آن کیمپ نا تہٹی پیہسہ ترند آ جلہو نا بناء ءِ کیرہ و کیمپ نا اسہ بشخ آ کوزہ کیرہ۔
بیلہ کیمپ آ جلہو آن مُست زند و مرگ ئنا گواچنی معنی ءِ پٹوک مڷ آک اسٹ ایلو تون مجلس کیرہ۔ پنجگور نا زیبا غا ندارہ، وشکوش پروم نا اُست ءِ دروک و زباد آن پُر تہو، چتکان نا آبات آ مِش نا ندارہ و بے نہاد و گچین آ مَش تا خمب آن پیشن مروک جندندر موند بلوچ عرف میرک ماہل تون پائک کہ: ”گودی، نم ننے آن مُست ساندہی کن زندہ مرورے، شہید سنگت آتا رہی آ سر مننگ تون اوفتے پارے کہ نن نما رند آتے ہلیسہ دشمن ءِ ترند ءُ دکّ خلیسہ زوت نمتون خمب ہلنگ کن سر مرون۔ ننا بخیر و جشن ئنا تیاری تے بناء کبو۔“
آپریشن ھیروف نا تیاری تا وخت آ برجاء و مرغن سفر ئٹ پنچ گھنٹہ پند کننگ و اِرا دے اسکان بیرہ پنچ گھنٹہ جارات کننگ آن گڈ ہم سار ئنا کڑمبی تیتون خزمُلی خن تیٹ طوفانی تہو و سرزمین و راج تون مابت نا یخ و اُست ءِ دروک چُلک آتے ارفوک جندندر ماہل جوڑ تیا بشخندہ و دروشم آ خوشی نا نور تون جندندر میرک تون پائک ”بس دعا کیس سنگت، کنا عمل آن بے گناہ اس شہید مف۔“ شعور نا ترازو ئٹ تول کروک لوز آک جندندر ماہل نا علم و دانش، فکر و سوچ نا دروشم ءِ پاش کیرہ۔ دا لوز آتیان روخ الدین بیبرز نا قول یات بریک کہ ”اسہ گواچنی جنجگو اس دا خاطر جنگ کپک کہ او تینا مونا سلوک مخلوق آن بد دیک، بلکن دا خاطر جنگ کیک کہ او تینا رند ئٹ سلوک مخلوق تون مابت کیک۔“ کوزہ گیر نا بیانیہ، شعور آن ہورک بیرہ پن ئنا تجزیہ نگار و دانشور آتیکن ماہل نا دا لوز آک چُھپی نا پوشاک ئٹ اسہ طوفانی کلہو ئسے، کلہو مابت نا، امن ئنا، آزاتی نا و بلوچ راج نا شناخت و تشخص نا۔
راجی آزاتی نا مسخت نا وخت آ بروک تیوہ غا دڑد، تکلیف، سختی تا مونا سوگوی تون مَش تا وڑ جِک سلوک جند ندر آک تینا خن تیٹ غلامی نا ہشنگ و سینہ غاتیٹ قابضین تیا بددننگ ارفوک سگ ئنا ایسری ہد اسکان سرمریسہ سر ہلیرہ و اسہ مرغن و سختی تیان پُر مشن ئسے نا تیاری تیٹ لگیرہ۔
تیاری تا وخت آ مستونگ ئٹ ٹارگٹ نا پارہ غا روان جند ندر آصف نیچاری عرف نوید و جند ندر محمد بخش سمالانی عرف خالد دژمن لشکر نا پلویڑ ئٹ گٹ مریسہ دلیری تون جنگ کیرہ و شہید مریرہ۔ مشن نا ایسری آن مالو جنگی لائخی، حوصلہ، و قربانی نا فلسفہ تون تفوک سنگت آتا مُر مننگ بھاز تکلیف تروکو ہیت ئسے۔ ہمو سنگت آک ہرا اوار آپریشن نا تیاری تا وخت آ دژمن تون جنگ کننگ کن پوسکنا منصوبہ تا جوڑ کننگ ئٹ اختہ مریرہ، اوفتیکن ناگمان آن اِرا اہم سنگت نا مُر مننگ سینہ تیٹ غم ئنا خاخر اس لگفک، ولے ہراتم شعور نا زراب اُست نا کڑمب سمندر ئٹ چُلک آک بش مریرہ، گڑا عمل نا در ملنگک۔ عمل غٹ تکلیف و سختی تے ایسر کننگ نا ابدی ذریعت اس جوڑ مریسہ وطن نا شہزادہ و شہزادی تے تیار کیک۔ اندا فکر نا سوب مسخت نا اہمیت و افادیت و جنگی حالیت آتیٹ مونا بروک تکلیف تروک تدینی تا علم آن واخب جند ندر ماہل زیبائی و حوصلہ تون جند ندر محمد بخش سمالانی عرف خالد نا بھلا ایلم، جند ندر غوث بخش سمالانی عرف طالب ءِ پائک: ”نن جنگ ئنا حالیت ئٹی اُن و جنگ آتیٹ دن انگا تدینیک مریسہ کیرہ۔ ننے ہمت ءِ پرغوئی اف بلکن تینا مسخت تون گنڈوک مشن نا پارہ غان پام ایتوئی ءِ۔“ جند ندر غوث بخش سمالانی دا لوز آتے بنسہ شہید مروک سنگت جند ندر آصف و تینا ایلم جند ندر محمد بخش سمالانی نا قربانی ءِ اُست ئٹ ہند کریسہ پائک: ”گودی، نم کون آ حوصلئی آ بندغ آک ننتون ہم کوپہ سلوک ءُ گڑا ہمت و حوصلہ نا پِننگ نا سوج ہی ودی مفک۔“ دا لوز آک اسہ روشن ءُ آخبت ئسے نا مستائی ءُ؛ دا لوز آک ہمت، حوصلہ، دلیری، خواری، قربانی و تنظیمی و راجی مسخت نا یکہ غا رنگ آتا شاہدیک ءُ؛ دا لوز آک عمل نا کینوس آ کشوکا نخشہ غاک ءُ، ہرافتے جہان نا ہچو طاغت اس ایسر کننگ کپک۔
آپریشن ھیروف ئٹ اوار دلیر آ جند ندر آتا کسہ زیبا و جتا غا قربانی نا شاہدی ایتک۔ وطن نا رکھ ئٹ تنظیم تون اوار مریسہ میشدار سمالانی اسہ جھڑپ اسیٹی شہید مریک۔ ولے ڈغار نا آجوئی نا مسخت نا باب انداکان ایسر مفک بلکن شہید میشدار سمالانی نا قربانی المی فکر ئسے نا وڑ اونا ہڑتوم آ مڷ جند ندر غوث بخش سمالانی عرف طالب و جند ندر محمد بخش سمالانی عرف خالد ءِ تینا باوہ نا گام تیا ہِننگ و بلوچ راج نا سربلندی کن ندر مننگ آ تیار کیک۔ راجی شعور و سوچ نا دا روانئی ہڑتوم آ ایلم تے تینا پلویڑ ئٹ ہلیسہ مسخت کن انتہا غا سر کیک۔
مجید بریگیڈ ءِ تینا خذمت آتے تننگ آن پد آپریشن ھیروف نا تیاری تا وخت آ ہڑتوم آ ایلم تا اُست خواہی مریک کہ اوفک اوار تینا گڈیکو مشن ءِ سر ایتر و ہڑتوم آ ایلمک دو پہ دو مریسہ وطن آ اوار ندر مریسہ دیہاڑ نا پنہ تیٹ قربانی نا اسہ ایسر مفروک باب ئسے نا ودکی کیر۔ اوفک مجید بریگیڈ نا آپریشنل کمانڈ نا مونا تینا دا اُست خواہی نا مسخت ءِ بیان کریسہ پارہ کہ ”نن ڈغار نا غٹ مڷ آتے باور کرفنگ خوائنہ کہ آجوئی نا خاطر ندر مننگ نا عمل بے کچ مریک۔ دا مسخت ءِ دوئی کننگ کن باوہ، مار، ایلم، ہیڑ غٹ ءِ تینا بشخ ءِ شاغوئی تمک۔ انتیکہ دا بھلا مسخت ہر اسٹ آن اسہ رنگ قربانی نا خواست کیک۔ جند ندر خالد سمالانی مشن نا ایسری آن مالو سنگت آتیان جسمانی وڑئٹ جتا مریک۔ ولے دا تدینی آن آپریشن ھیروف نا آپریشنل کمانڈ جند ندر طالب سمالانی نا حوصلہ غاک پننگ نا جاگہ غا گیشتر سوگوْ مریرہ۔ او تینا باوہ شہید میشدار سمالانی و ایلم شہید جند ندر محمد بخش سمالانی عرف خالد نا گام تیٹ ہنیسہ ساندہی کن زندہ مریک و دیہاڑ نا پنہ تیٹ قربانی نا کسہ نا اسہ پوسکنو باب اس نشخ کیک۔
جان فوسٹر ڈیلس پائک کہ جہان ئٹ ہر وخت ایمنی ہموتم اسکان مفک ہراتم اسکان بندغ آک گچین آ لائخی تے عملی پوشاک بیرفپس۔ ایمنی جنگ نا وڑ نظریہ، قربانی و اسہ گواچن و متحرک ایمان ئسے نا خواست کیک۔ دا لوز آتا عملی تشریح ننے مزاحمت نا ڈغار نوشکے آن تعلق تخوک جند ندر سنگت طیب عرف لالا نا قربانی نا لازوال کسہ ئٹ رسینگک۔ او غلامی نا ذلالت، دژمن لشکر نا بے شرفی، چھاپہ، دزگیری، جشوک جون، ظالم آ ادارہ تے خنسہ ایف سی نا نوکری ءِ ہلیسہ پیشن ڈیہہ آ کائک۔ ولے مقبوضہ بلوچستان ئٹ دژمن لشکر نا پارہ غان کننگوک بے دادی تا یات آک، و ڈغار تون مابت نا اُست خواہی اونا ذہن آ کڑمب ءُ نشخ ہلیک۔ اینش و جارات نا زند ءِ ہلیسہ جند ندر طیب 2022 ئٹ بی ایل اے نا بشخ جوڑ مریسہ مَش تیکن مون کیک۔ اسہ سال ئسے آن پد مجید بریگیڈ ئٹ اوار مریسہ سگ ئٹ تینا گڈیکو مشن کن ذہنی وڑئٹ سوگوی دوئی کیک۔ آپریشن ھیروف نا تیاری تا وخت آ او متکنا تدینی تا یات آتے چنڈیسہ پائک کہ ”کنکہ اشتماعی بے شرفی، جشوک جون تا کوڑ، برمتہ کننگ، آپریشنز و غلامانہ عمل تا ڈول سگنگ نا لائخ الور۔ پاکستانی لشکر ءِ ہلینگ آن پد ہم دا تدینیک کنے پیشن ملک ئٹ جارات و آسراتی ئٹ رہینگنگ کن ہلیتورہ۔ اندا خاطر ای فیصلہ کریٹ کہ ای جنگ نا بشخ جوڑ مریسہ تینا عمل ئٹ دا تکلیف تروک یات آتے پرغوٹ تخوٹ و لمہ ڈغار نا کاریم ئٹ بروٹ۔“ اشتماعی پجار نا ویل ءِ رکھنگ، راجی بیرک ءِ آسمان ئٹ پیری تننگ و فتح ءِ یقینی جوڑ کننگ نا عمل ئٹ تینا بے مٹ آ بشخ ءِ شاغیسہ طیب ساندہی اکن اسہ اندنو کسہ اس نشخ کریسہ جسمانی وڑئٹ جتا مسنے ہراڑان بروکا زنک آک سواد ارفور۔
اسہ پارہ غان ماہل دژمن نا اُست آ ضرب کاری کریسہ جنگ نا بناء ءِ کیک، ہموڑے مسخت تون ویڑوک جند ندر رضوان عرف حمل حرکت ئٹ بریک۔ اونا ہر گام اسہ چپ ءُ عہد اس مریک، اونا ہر دم ڈغار تون اسہ سوگوْ سوغند اس مریک۔ او چائک کہ دژمن نا نظر تیز ءِ، مُستی نا کسر بھیم آن پُر ءِ، پدا ہم او بے صبری ئٹ مونی کائک۔ اونا بدن پین اونا مفک، بلکن اونا بدن داسہ ارادہ نا مصلوب ئٹ اسہ سلہہ اس جوڑ مریک۔ تینا اُست ئنا ہر درپہ تون، او تینا جند ءِ دا مسخت کن مونا ہتیک، و دژمن نا کیمپ نا ایلو پارہ غا اسہ تراک اس مریک و رضوان، دا غلامی نا طوفان ئٹ اسہ چنکو زراب اس جوڑ مریک، ہرا اوڑان پد رہینگوک آتیکہ کسر روشن کننگ کن چراغ اس جوڑ مریک۔
دیارِ شہید سفرخان زہری و ننا ٹِک تیر ضیاء عرف دلجان نا ڈغار زہری نا اِرا بے مٹ نگینہ، و شہید جند ندر حافظ زیشان نا تاتہ مار جند ندر جنید زہری عرف کامی و جند ندر فضل گل زہری عرف شاہویز ہم ھیروف نا جند ندر آتا کاروان نا بشخ مریرہ۔
تینا اوار آ ودشت جاہ زہری نا چُپ انگا خمب ئٹ اسہ مِش ئنا اِرا مار کامی و شاہویز اسہ اندنو سفر ئسے آ رادہ مریرہ، ہراکان او چائسرہ کہ او پدا اسُل بروفس۔ دتر نا سیالی ٹی تفوک، تہو تیان ہرا اوفتا خلق ئٹ گوئی کنگکہ، و اسہ اندنو ڈغار اسیتون مابت ہرانا اُست ئنا درپہ اوفتا جند ئنا تہہ ئٹ توار کریکہ، او سیال آک اسہ گڈیکو مشن اسیٹ روح جوڑ مریرہ۔ اندن کہ جنگ ئنا مون انگا جھمر آک مُچ مریرہ، اوفتا ہمت جاڑی آ استار آتا وڑ گروشک تریسہ، گگ تہاری تا برخلاف سلک۔ کوپہ تون ہمکوپہ مریسہ او ہڑتوم آک دژمن تون مون ایترہ، و تینا ساہ تے تینا پدئٹ رہینگوک آتیکن ایمنی و آجوئی نا سوگوْ سوغند ئٹ پیش کیرہ۔ اوفتا قربانی اسہ چیہانٹ اس الو بلکن اسہ مدان ءُ ہیت اس ئس، ہرا اوفتا باوہ پیرئی خلق زہری نا تہو تا گوئی ٹی ساندہ بِننگو۔
ناکہ بندی نا وخت آ مستونگ نا علاقہ کھڈکوچہ ٹی فتح اسکواڈ نا سرمچار سنگت شفقت وطن نا رکھ ئٹی شہیدی نا بڑزکو ہند ءِ دوئی ءِ۔ کیہی جنگی محاذ آتیٹ تینا خذمت آتے سر تروکا جنگجو شفقت وطن نا سُروکا فصل تا، اُست آتے وڑوکا مَش تا، خلق آتا، جنگل و گیاوان و کل آتیان زیات دا ڈغار آ رہینگوک راج ئنا خاطر غٹ خواہش آتے ہِلیسہ ساندہ زندہ سلنگ نا مثیل ءِ مونا ہتیک۔ اینو ناگ ئنا خاک ناز ئٹی ءِ و واشک نا تہو ٹی گِمر نا خوش گند مارِنگ مننگ کیک؛ ناگاہو نا سوگوْ مَشک تینا جنگجو نا یات ئٹ استار آتیتون دیوان کیرہ؛ جو و چشمہ غاک شہید شفقت نا بشخندہ تیان پُر کسہ تا شیرینی ءِ یات کریسہ کڑمب آ چُپی ءِ پرغسہ اسٹ ایلوڑتون ہم کلام مریرہ۔ درخت آک تینا سیخا ٹی خاچوکا وطن نا مار ئنا خوش گند ءِ ماریسہ تہو تون رقص کیرہ۔ یخین ئٹ دیہاڑ ئٹی بلوچ راج نا دلیری، خواری، قربانی و حوصلہ نا کسہ غاک جہان نا مظلوم و محکوم راج آتیکن کسر شان تروک مرور۔
اسہ رنگ 20 گھنٹہ اسکان بیلہ کیمپ آ کوزہ کریسہ دژمن لشکر نا 68 کارندہ مرگ ئنا گواچی کننگ آن پد سرمچار جند ندر آک ساندہی کن زندہ سلرہ۔ و دوانزدہ گھنٹہ اسکان بلوچستان نا جتا کسر تیا ناکہ بندی برجاء تخنگ آن پد ایلیٹ یونٹ فتح اسکواڈ و اسپیشل ٹیکٹیکل آپریشن اسکواڈ نا سپاہیک دژمن لشکر نا کارندہ، ڈھکوک کارندہ، تزویراتی تنصیبات، فوج ئنا ہمکار پولیس و لیویز اسٹیشن آتیا سرسہب جلہو آتیان پد رکھوک ہند آتا پارہ غا رادہ مریرہ۔ جمعی وڑئٹ دژمن نا 130 کارندہ مرگ ئنا گواچی کننگ آن پد آپریشن ھیروف تینا ایسری آ سر مریک۔ ولے دا آپریشن بلوچ راجی تحریک ئٹ اسہ گچین ءُ باب ئسے نا ودکی کریسہ امیت آن پُر اسہ پوسکنو بشخ ئسے نا مستائی ایتک۔ بلوچستان آ دوارہ کنٹرول دوئی کننگ نا دا بشخ بروکا بشخ آتا پوسکنی و ترندی نا اسہ مثیل ئسے۔
جنگ ئنا ترندی بلکن شہادت آتیٹ ودکی نا سوب جوڑ مرے، ولے آجوئی نا مزل نا پارہ غا خڑکی نا سوب جوڑ مریسہ بلوچ راج نا گل و بالی ءِ ممکن جوڑ کیک۔ مدانی ئٹ دژمن تون مون تننگ تو مننگ کیک ولے جنگ ئنا دا ڈول مرغنی نا گواچی مریسہ مزل ءِ مُر کیک۔ اندا ٹِک ءِ رابرٹ ٹیبر تینا کتاب War of the Flea ٹی بیان کریسہ پائک کہ جنگ ئنا ترندی کنوینشنل وارفیئر نا پارہ غا روان مننگ نا اولیکو مرحلہ مریک، ہراٹی مخالف فریق کن دفاعی ہند دوئی کننگ آن بیدس پین کسر سلپک۔ و ہراتم مخالف فریق دفاعی ہند دوئی کیک گڑا پوسکنا جنگی لائخی و حکمت عملی تیان تیار آ گوریلا جنگجوک تینا مزل نا خڑک آ سر مریرہ۔ او السی ہمکوپئی و کمک تون مخالف فریق نا نفسیات آ زور تمرہ۔ اندا وڑ گوریلا جنگجوک فتح نا برم تیان سواد ارفرہ: انتیکہ جنگ ئنا ایسری مرحلہ حوصلہ و نفسیات نا طاغت آ تالان جنگ اس مریک، اسہ فریق نا حوصلہ غاک نزور مریسہ ایلو نا سرسہبی ءِ یخینی جوڑ کیرہ۔
آپریشن ھیروف پوسکنا جنگی مہارت، حکمت عملی و offensive فوجی مہم نا اسہ اندنو نمونہ ئسے، ہرانا مثیل پوسکنا بلوچ مزاحمتی تحریک ئٹ رسینگپک۔ سخت ڈسپلن، coordination، تزویراتی ڈٹ بندی، و فیصلہ کن گامک تنظیم نا طاغت نا اسہ زیباؤ دروشم ئسے ءُ۔ بقول سن زو جنگ آک سلہہ تیٹ آخہ بلکن مؤثر حکمت عملی، ڈسپلنڈ کمانڈنگ، وخت آ فیصلہ، خوڑتی ئٹ اُننگ نا زی آ تالان جلہو و رازداری تون جنگ کریسہ کھٹنگرہ۔ ہراتم دژمن ءِ کاری ضرب نا گواچی کروئی مس گڑا ہموڑے جلہو کر، ہراڑے جلہو نا گمان ہم مف۔ اندا ٹِک ءِ گیشتر درشان کریسہ رابرٹ ٹیبر نوشتہ کیک کہ گوریلا جنگ آتیٹ ہراڑے مخالف فریق ءِ ہراتم طاغت نا معاملہ ئٹ بڑزی دوئی مس گڑا گوریلا جنگجو تیکن گچین بست و بند، شعور آن تیار انگا قیادت، لچکداری و ہنر ایسری سرسہبی نا ضمانت ایترہ۔ آپریشن ھیروف دا لوز آتا عملی تشریح نا اسہ دروشم ئسے، ہرا ساڑی آ آجوئی نا تحریک ئٹ اسہ پوسکنو مرحلہ ئسے نا ودکی کیک۔
آپریشن ھیروف ایسری آخہ بلکن بناء ءِ، اسہ ترند حالیت ئسے نا مرحلہ نا بناء کننگ نا اولیکو مثیل ءِ۔ دا آپریشن دژمن نا مونا مؤثر طاغت نا اسہ جھلکی ئسے؛ پوسکنی و ترندی نا اسہ اندنو درشانی اس ہرا چرجوئی نا چِٹ ءِ ہَلیسہ کوزہ گیر دژمن نا حوصلہ تے مِش تا کرو۔ دا طوفان نا پد ئٹ دژمن نا کوزہ و اونا ہمکار سامراجی ارادہ تا تخت و تاج ءِ دڑفنگ و راجی پجار و بقا نا سربلندی ءِ ممکن جوڑ کننگ کن اسہ ترند حالیت نا سیلاب اس، خاخر و زراب نا وڑ لمبہ کننگ کن تیار ءِ۔ کوزہ گیر و اوڑتون تُد لٹ و پل کروک طاغت آتیکن اینو ہم نرّنگ نا کسرک ملوک ءُ۔ اگہ او تینا ارادہ تیا سلرہ و بیدادی نا کاریم ءِ گیشتر ودفرہ گڑا وطن نا رکھ ئٹی اشتماعی فکر و فلسفہ نا سلہہ ئٹ تیار و پوسکنا جنگی مہارت آتیٹ تیار مروک وطن نا مڷ آک ہر وخت جلہو کننگ کن رسینگور۔ او اسہ پوسکنو سہب ئسے نا مستائی ہتیسہ دژمن نا کوزہ نا مون انگا نن ءِ متکن ءُ کسہ اس جوڑ کریسہ دیہاڑ نا پنہ تیٹ یکہ ءُ ہند اس دوئی کننگ کن گڈیکو وخت اسکان مون ایتور۔ یخین ئٹ ایسری سرسہبی ننا مرو۔
آپریشن ھیروف نا بناء مننگ آن منہ گھنٹہ مالو، غٹ جند ندر آک تولوک تین پہ تین ہیت و گپ کننگ مریرہ، و جند ندر جنید زہری نا دا سوج ئنا ورندی ءِ تینا وڑئٹ تننگ ئٹی مریرہ کہ ”نمکن زند انت ئسے؟“ ایسر ئٹ جند ندر گودی ماہل بلوچ پائک کہ ”داکان مالو نا زند، زند اس الو، کنا تو زند اینو بناء مننگ ءِ۔“ پدا دیخس چپ مننگ آن پد ماہل پائک ”ای خوائیوہ کہ کنا گڈیکو خوراک، کنا اُست پسند آ بریانی مرے، ہرادے ای تینا دو تیٹ کیو و تینا غٹ جند ندر سنگت آتے ہم کُنیفو۔“ اوکان پد ماہل بشخندہ کریسہ بش مریک و بریانی ءِ کننگ بناء کیک، و غٹ جند ندر آک بریانی کننگ ئٹ ماہل نا کمک ءِ کیرہ۔ پدا کل مخیسہ و ہیت کریسہ تینا زند ئنا گڈیکو اِرغ، ماہل نا بریانی ءِ کُنیسہ، مشن آ پیشتمنگ نا تیاری تیٹ لگرہ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچستان نا ضلع مستونگ ئٹ نا درست آ سلہہ بند بندغ آک پاکستانی لشکر نا کیمپ ءِ جلہو ئٹ ٹک کرینو۔
ہندی حوالی تا رد ئٹ فورسز نا کیمپ ءِ مستونگ اسپلنجی مائی لالین نا ہند آ ٹِک کننگا۔
حوالی نا رد ئٹ جلہو نا وخت آ ترند سم کاری و تراک آتا توار بننگا وختس کہ حوالی نا پاننگے کہ جلہو ئٹ لشکر ءِ نسخان ارفوئی تمانے۔
جلہو نا ذمہ واری ءِ سلہہ بند آجوئی گل بلوچ لبریشن آرمی ارفے۔ ترجمان جیئند بلوچ نا پاننگ ئس کہ سرمچار آک پاکستانی لشکر نا بنجائی کیمپ ءِ راکٹ و ایلو بھلا سلہہ تیٹ ٹِک کریر ہراڑان کم آن کم اسہ کارندہ اس جاگہ غا مرگ ئنا گواچی و چار ٹپی مسونو۔
دا وخت بی ایل اے نا ترجمان مستونگ شار و اسلپنجی ئٹ مروک اِرا پین جلہو نا ذمہ واری ءِ ارفے۔
شینک کروک بیان ئٹ جیئند بلوچ پارے کے دو شمبے نا دے اسپلنجی ئٹ سرمچار آک پاکستانی نا کارندہ غاتے ہمو وخت بمب تراک ئٹ ٹِک کریر ہراتم اوفک لشکر کشی ئٹ گٹ ئسر۔ تراک آن اِرا پیدل کارندہ ٹپی مسر۔
ترجمان پارے کہ دو شمبے نا ننکان بی ایل اے نا سرمچار آک مستونگ شار ئٹ پاکستانی لشکر نا کیمپ ئنا رکھوک چوکی تیا گرنیڈ لانچر ئٹ کیہی گولہ غاتے خلکر ہراڑان کم آن کم مسہ کارندہ ٹپی مسر۔
