گودی حمیدہ بلوچ نا گُڈیکو کُلہوّ
”مِہر گُلزمین تون”
حمیدہ بلوچ | مَٹ: پُلھین بلوچ
دی بلوچستان پوسٹ
نن زگری اُن یا مسلمان دا المی اف ولے نن مِہر گُلزمین تون کینہ۔ تینا جند ئنا ڈغار آ عبادت نا جاگہ غاکو۔ سُجدہ نا جاگہ غاک چلتن آن بناء مریسہ آماچ، زندان، نرمُک، دشت پلیجی، دشت کوگدان، دڑامب، سیاہجی، شاشان، ہلوائی، کھیر تھر، ہربوئی، کوہ سلیمان، کوہ باتیل، کوہ مہدی و کوہ مُراد اسکان و ہلمند آن الیس مکُران (چھابہار)، قصرقند، دشتیاری، سرباز، نیکشہر، پشین مند و بلیدہ اسکان بُڑز، زیبا و گنوکی ءُ زباد نا گند ئتون تفوک ءُ۔ نن دا بُوچ و پَن آتا مِہر ئٹ خُلّوک اُن ہرا کہ کوہ مارّان آن الیس بولان، سنی شوران و ڈیرہ غازی خان اسکان اریر۔ نن دا درخت آتیکن مِہر بشخینہ ہراکہ ماراپ آن الیس ماشکیل و ہلمند اسکان بلوچ ڈغار نا سیم تتون تفوک ءُ۔ نن دا زیبا غا ریک و پُلک آتا عاشق اُن ہراکہ دالبندین آن الیس کھیر تھر و سندھ ئنا دریاب اسکان تینا زباد ءِ تالان کننگ ءُ۔ نن تینا دریاب تون اُست ئنا کُرمبی ئٹ مِہر کینہ ہراکہ اسہ باوّہ ئسے نا دروشُم ئٹ تینا سیخا ءِ ننا کاٹُم آ تخیسہ، مکُران آن الیس ٹھھٹہ اسکان ننا بےمٹ آ دہیاڑ ءِ درشان کریسہ ءِ۔!
نن امو زیبا تتون گنڈوک اُن ہراکہ دا ڈغار نا کُنڈ کُنڈ آن وار وار آ سوگوہی و جیرت ئتون تینا ”مِہر“ ئنا رَکھ کن ار ویل ئتون مون تننگ کن مُدام سَلوک ءُ۔
نن امو سُجدہ نا جاگہ کِن گنوک اُن ہراڑے کنا جغر نا ٹُکُر، کنا ایلُم میرل ”میرک“ سُجدہ کرینے۔ او ننا گچین و سوبّر آ سنگت ئس۔ میرک داسہ روح ئس جوڑ مس۔ لُمہ داسہ صغیر کِن فریشان مریکک۔ میرک تو مُدامی کِن سلیسَک۔ ہرا شادکامی ئٹ کہ میرک ءِ رُخصت کننگ ئسُرہ، ای اَم امو شرف ئنا خواہندار ئُٹ۔ ای ایھُن ءُ مرگ اس خواپرہ، کنے یکہ کہوئی اف بلکہ کنا کہینگ آ کنے شرف تننگے و کنا مرگ آ شادکامیک مریر۔ شاد و گل ئٹ ای مِزل نا نیمہ غا روان مریو، ولے ”نُگرا“ و ”زگرین“ کنا زند ئنا بشخ ءُ۔ ای امر کیوّ، ارا فیصلہ کنا حق ئٹی ءِ و ارا کنا چُناتا حق ئٹی ءِ و ارا سِٹ کنا راج ئتون تفوک ءِ۔
ای ویل ئسے نا پلویڑ ئٹی ئُٹ، اسہ لُمہ ئس مریسہ تینا اڑتوما چُنا تیان گر جِتا مریوّ گُڑا اوفک چوری پاننگِرہ۔ چوری تا حالیت کنا مون آٹے۔ ای صغیر ءِ امر تنیا اِلیو، صغیر داسہ اَم نن ئنا پاس آتیا بش مریک و چیہانٹ خلیسہ پائک کہ کنے دڑد تِفہبو، ای تو دا ڈغار تون یکہ مہر کرینُٹ، گواچنی ئٹ مِہر کروکا تون میرک ئس، امو میرک ہرادے لُمہ اسہ ساہت ئس اَم تینے آن مُر کننگ کتوکہ، امو میرک سُجدہ کریسہ تینا مُدامی آ مہر ءِ دُوئی کننگ کِن جون ئنا دروشُم ئٹ (جسمانی) نن تون اف ولے!
ای ہراتم کہ کولواہ غا کاوہ گُڑا اسہ کُوکار ئس بریک و مَش تیٹی پِنیسہ کیک کہ، داسہ برک نن تون اوڑدہ مر، نن نا وڑ اِنگا لال آتون مِلنگ کِن بیقرار اُن۔ میرک اندا مَش تا چُنا ئس۔ مشکے گجّلی آن نوکجو مہیی اسکان شپّاد آ نتّ تون سفر کریکہ بلکہ او تو باضو اَر دامن ءِ دُروت ہلینگ نا اُست خواہی تخاکہ، اخس کہ مِہر کروئی ئس کرے و داسہ روح ئنا وار ءِ، روح بیقرار مریک جون ئتون اوار مننگ کِن ولے داکان اَم گیشتر شادکامی سرسوب آ مرگ ئکن مریک۔ نی اَم برک ولے صغیر پیر اِنگا لُمہ، حمیدہ زگرین و نُگرہ کِن ارٹمیکو زند ءِ تدیفنگ ءِ، امر کین اندا تو زند ءِ۔!
ای دا لُمہ ءِ امر تنیا اِلیوّ کہ ارا میرک نا وڑو لال ئس ودی کرے، دُنو لال چندی تیٹی اسِٹ ئس مریک۔ دُن انگا لال آتا لُمہ غاتیکن ندّر مریوّ کہ تینا پِڈ آتیٹی نُہہ تُو اسکان دا دلیر آتے تخیرہ۔
ای فلسفہ چاؤک ئس افٹ کہ خیربخش مری ءِ چِرِک آتیٹی بال ایتوّ و پدا بریو تینا زند تدیفنگ بناء کیوّ۔ ای حمیدہ اُٹ صغیر، میرک نا اِیڑ، میرک اسہ عمل کروکو سپاہی اس ئسک۔ کنے دا سنگت تون اوّار مروئی ئس و ای مننگ کتوّٹ ولے ای اَم عملی پِڑ آ عمل کریسہ تینا بشخ ئنا کاریم ءِ کریٹ۔ ای گواچن ئٹ داسہ ودی مننگ کِن ہننگ ئُٹ، کنتون گر اوڑدہ مننگ نا اُست خواہی مس گُڑا اندا مَش تا سنگتی ءِ ارفیسَک، ہراکہ میرک نا کسر ئس۔ ای تینٹ دا پاپرہ کہ کنے مُدام سلوکا مِہر دُوئی مریک یا آخہ ولے ہرا خاخر کہ کنا پِڈ ئٹی روتہ خلنگ ءِ، او اسہ دے نہ دے ئس کنے جون ئنا دروشُم ئٹ(جسمانی)نُمے آن جِتا کیک۔ داسہ نُگراہ و زگرین تینا اِلہ تون کانفرنس کال آ اوّار مننگ کپرور ولے پنچ سال مہالو نُگراہ و زگرین نا خیالداری نا زمہ واری ءِ اودے تِسونُٹ۔
ای ہِننگ ئٹی ئُٹ، کنے داسہ داکان کسّس توننگ کپک۔ کنے امو گواچن آ لُمہ نا خُمب ئٹی کاٹُم تِخیسہ، تینا مُچا گِلہ غاتے مُر کروئی ءِ، ہرا نا پِڈ ئٹی میرک تون اوار ننا ایلو جغر نا ٹُکُر آکو۔ لُمہ جان، صغیر جان، نُگراہ و زگرین جان تینا خیالداری ءِ کیرے۔ ای داسہ امو دامن ئٹی ہِننگ ئُٹ ولے تختی و قلم نا سنگتی ءِ اَم ہچبر اِلپیرے، دا ام اسہ سِلاہ / تُوفک ئسے۔ ای و میرک (ہنینا ایلم و سنگت) ہراڑے تُوسُنن داڑے اسہ تختی ئس ام ارے۔ نُم کُل دا تختی نا سنگتی ءِ اسُل الپیرے۔ ای امو نیمہ غا گام خلِنگ اُٹ کہ ہراکان جون ئنا دروشُم ئٹ پدا ہچ بننگ اف ولے کنا روح آواران تون اوار مُچا گُلزمین ئٹ گون مریک۔ ای تینا مُستی نا جُہد ءِ میرک و ایلو سنگت آتون اوار بناء کیوہ۔
سلامتی نُم کِن، نُما ہنینا حمیدہ بلوچ
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
