بلوچستان نا ضلع کیچ ئنا بنجائی شار تربت ئٹی تراک، پنچ بندغ ٹپی۔
پولیس تدینی ءِ پک کرسا پارے کہ نیشنل بینک چوک ئنا خڑک مسنے۔
پولیس نا رد ئٹ تراک ئٹی پنچ بندغ ٹپی مسنو۔
ٹپی مروکا تیٹ ملک آباد نا ہندی روشن نا مار ظفر، کوشقلات نا ہندی مولابخش نا مار نصرت، کوشقلات نا ہندی رسول بخش نا مار اویس، ڈاکی بازار نا ہندی عزیر نا مار عدن، و آپسر نا ہندی محمد نا مار ظریف اوار ءُ۔
نوکنڈی شار آن قطب نا پارہ غان پنچ کلو میٹر مُر میدانی علاقہ آن اسہ بندغ ئسے نا کیہی دے متکن جون اس خننگانے۔
لیویز نا ردئٹ باجری ہتوکا گاڑی لیویز ءِ جون ئنا خننگ نا حوال تس۔ لیویز نا پاننگ ءِ کہ جون بھاز متکن مسنے و درست کننگ مفک۔
سوراب نا ہندی زوراکی ئٹ بیگواہ کننگوک سیف اللہ رودینی نا ایڑ فرزانہ رودینی پارینے کہ کنا ایلم سیف اللہ رودینی پولیس کانسٹیبل اس ئس و اودے 22 نومبر 2013 آ سوراب آن خضدار آ ڈیوٹی آ ہِننگ نا وختا زوراکی ئٹ بیگواہ کننگا، ہرا دائسکان بیگواہ ءِ۔ بلوچستان پولیس اونا آجوئی کن گھام ہرفنگ نا جاگہ غا اودے نوکری آن کشا و اونا تنخواہ ءِ بند کرے، ہرا نا سوب آن ننا خاہوت معاشی ویل آتا گواچی مس۔
او ودیک پارے کہ سیف اللہ ننا خاہوت نا اسٹ انگا کھٹیا کروکا بندغ ئس، و اونا زوراکی نا بیگواہی آن پد نن بھاز معاشی ویل آتا گواچی مسونن ہرا کہ اشتماعی سزا نا بیم تروک دروشم ءِ۔
فرزانہ رودینی چیف جسٹس سپریم کورٹ، آئی جی پولیس بلوچستان و بندغی حق آتا تنظیموں آتیان خواست کرے کہ او سیف اللہ رودینی نا تنخواہ تے ایتر و اونا آجوئی کن گھام ارفر تاکہ ننت دا دڑد آن لنجات رسینگِہ۔
بلوچستان نا ضلع خاران ئٹ گرلز نا خوانندہ غاک کالج ئٹ ایف سی کیمپ نا جوڑ کننگ نا برخلاف برانز ریکارڈ کریر۔
برانز ئٹ خوانندہ غاک کالج ئٹ کیمپ ئنا جوڑ کننگ نا برخلاف ترند نعرہ خلکر۔
برانز کروک آتا پاننگ ئس کہ کالج ئٹ کیمپ ئنا جوڑ کننگ آن خوانندہ غاک بھاز زیمی ءُ۔ اوفک پاریر کہ کالج ئٹ کیمپ ئنا جوڑ کننگ آن تعلیمی زند بھاز زیمی مسنے۔
اوفک پاریر کہ زالبول تا تعلیمی ادارہ تا تہٹی کیمپ جوڑ کننگ بلوچ دود آتا برخلاف ءِ ہراڑان مسن تا خواننگ زیمی ءِ۔
خیال ئٹ مرے داڑان مالو ہم بلوچستان ئٹ اندا وڑ فورسز آک تعلیمی ادارہ تے تینا کیمپ آتیٹ بدل کرینو ہرافتا سوب ہمو جاگہ نا تعلیمی کاریمک تیوہ زیمی مسنو۔
دزگیری بنجاہ تیٹ سلہہ بٹوکا تتون اوار ہندی بندغ آتا سلہہ بند ٹولی تے ہم کاریم ئٹ ہتنگ نا فیصلہ مسنے۔
پاکستانی بنجائی حکومت دا زوت ئٹ بلوچستان ئٹی سیکورٹی نا حالیت نا بارو ئٹ بھلو فیصلہ کرینے دا فیصلہ تیٹ پاکستانی لشکر و ایلو سیکورٹی ادارہ آک ہم شاری تے شک ئنا بنداو آ دزگیر کننگ و مُسہ تُو بیدس عدالتی کاروائی یا مقدمہ آک بندی تخنگ کیرہ۔
حکومت و پاکستانی لشکر نا کوالخواک بلوچستان ئٹی پین دنو پوسکنو حراستی بنجاہ اڈ تننگ نا فیصلہ کرینو ہراڑے شکبر آ بندغ آتے کم آن کم مُسہ تُو اسکان بیدس عدالتی کاروائی آن بندی تخنگ کیرہ۔
ایکسپریس ٹریبون نا رد ئٹ صوبائی حکومت نا بندغ آک پارینو کہ 25 و 26 اگست نا بلوچ لبریشن آرمی نا جلہو تیان گڈ بنجائی کوالخواک اہم اسٹیک ہولڈر تتون سیکیورٹی حالیت نا جاچ ہلکر و ورندی گھام ہرفنگ کن حکمت عملی اڈ تسر۔
حوال تروکاک پاریر کہ پاکستانی لشکر تون اوار سیکیورٹی فورسز آتے 2014 ٹی پشاور نا آرمی پبلک اسکول آ جلہو آن گڈ خیبر پختونخوا ٹی انسداد دہشت گردی ایکٹ نا رد ئٹ تروکا خاص اختیار کون ءُ اختیار بلوچستان ئٹی پاکستانی فورسز آتے تننگ مرو۔
دا اختیار آتا رد ئٹ پاکستانی لشکر و ڈھکوک ادارہ آک زکبر شاری تے شک ئنا بنداو آ بیدس ایف آئی آر و عدالتی پیشی آن مُسہ تُو اسکان بندی تخنگ کیرہ۔
حوال تروکاک پاریر کہ دا پوسکنا حراستی بنجاہ مننگ کروک وڑ ئٹ خیبر پختونخوا ٹی اڈ تننگ تروک جہہ تا وڑ اڈ تننگانو، ہراڑے آپریشن نا وختا دزگیر کروک بندغ آتے تخنگاکہ، اندنو حراستی بنجاہ بلوچستان ئٹی اڈ تننگو داکان مُست دنو جہہ قطب و جاندمی وزیرستان، سوات، و ایلو جنگ زدہ غا علاقہ آتیٹ کاریم ئٹ ہتنگ مسنے۔
حوال تروکا تا رد ئٹ دا حراستی بنجاہ تیات بیرہ بندی تے تخنگ مروف بلکہ سلہہ بٹوکا تتون اوار ہندی سلہہ بند ٹولی اڈ تننگ کن ہم کاریم ئٹ تنگ مرور ہمر کہ پشتون علاقہ آتیٹ طالبان نا برخلاف امن فورس اڈ تننگاسس۔
حکومت نا دعوی ءِ کہ دا گھام نا مسخت بروکا وخت ئٹ بے دادی نا تدینی تے توننگ ءِ ولے نغدکار تا پاننگ ءِ کہ دا بنجاہ تیٹ گیشتر شاری تے و خاص وڑ ئٹ سیاسی باسک آتے بیدس دوبہ آن دزگیر تخنگ کن اڈ تننگانو، ہراڑان بلوچستان ئٹی بندغی حق آتا پین زیات لتاڑ مرو۔
بلوچستان نا بندغی حق و سیاسی تنظیم آک حکومت نا دا گھام تیا نغدکاری کرسا پارینو کہ بلوچستان ئٹی سیکورٹی اختیار آتا پِنا زوراکی نا بیگوائی تا عمل ئے قانودی جوڑ کننگ نا کوشست مننگ ءِ ہرا نا نن سخت مذمت ئے کینہ و دانا برخلاف سخت برانز ہم کرون۔
سمّی دین بلوچ چاگڑدی حوالکاری ویب سائیٹ آ پوسٹ ئس کرسا پارے کہ درو جناح انٹرنیشنل ایئرپورٹ آ اودے سفر کننگ آن توننگ نا برخلاف سندھ ہائی کورٹ ئٹی آئینی خواست ئس تسنے۔
او تینا کلہو ئٹی پارے کہ اینو سہب ئنا نن سندھ ہائی کورٹ ئٹی پٹیشن تسن کہ درو کنتو کراچی ایئرپورٹ آ انت کننگا و کنا ہن و بر آ ہرا وڑ رکھ خلنگانے، محکمہ داخلہ و بلوچستان حکومت نا کنڈ آن کنا پن ایگزٹ کنٹرول لسٹ (ای سی ایل) ئٹی شاغنگ نا حکم نا بارو ئٹ خواست ئس تسن، ہراڑان کنے سفر کننگ آن توننگا۔
او پارے کہ عدالت ئٹی کنا کیس پگہ سہب ئنا بِننگ مرو۔ او ودیک پارے کہ نن ہر وار ریاستی جبر نا برخلاف قانودی جنگ کرینن ولے داکان بیدس ہم ننتو اسل انصاف متنے ہراڑان ننا تیوہ باور بحال مرے ولے اسہ شاری ئسے نا حیثیت ئٹ نن ساندہ عدالت آتیا ہنانن و دا وار ہم دا بارو ئٹ قانودی جنگ کرون۔
بلوچستان نا ضلع کیچ ئنا تربت یونیورسٹی نا خوانندہ ئس خودکشی کرینے۔
پولیس نا رد ئٹ بشیر احمد نا مار ندیم احمد خود کشی کرینے ہرا تربت یونیورسٹی نا خوانندہ و گیشکور نا ہندی اس ئس۔
پن کروک ورنا استو ننکان چوگان کنڈ تربت ئٹی کوارٹر ئسیٹی خودکشی کرینے۔
جون ءِ ٹیچنگ اسپتال تربت آ رادہ کننگانے۔ واہم خودکشی نا سوب دائسکان سما تمتنے۔
پیپلز یونائیٹڈ ریوولیوشنری موومنٹ استنبول ئٹ اسہ جلہو اسیٹی شیلی پلازہ ئٹ سروس گاڑی تے ٹک کرے و تیوہ غا پلازہ ءِ خاخر تس۔
ترکش میڈیا نا ردئٹ سلہہ بند بندغ آک اسہ سرکاری ماڑی اسیٹی پترینگسہ ہموڑے سلوک گاڑی و ایلو گڑاتے بھس کننگ آن پد نرّانو۔
کرد و ترک چپ دو نا گروپ آتا سیوت ”ایچ بی ڈی ایچ“ نا پارہ غان شینک کروک بیان ئٹ تنظیم نا کنڈ آن دا آپریشن نا ذمہ واری ارفنگا، دا ہیت پاش کننگانے کہ دا کارروائی ریاستی تادی و کرد راہشون عبداللہ اُجلان نا دزگیری نا برخلاف اونا شابیت مزاحمت نا بشخ ئسے۔
دا گروپ پاش ڈول ئٹ دا جلہو ءِ بلوچستان ئٹ متحرک آجوئی دوست سلہہ بند گل بلوچ لبریشن آرمی نا پن آ کریسہ بلوچ لبریشن آرمی نا جندندر ماہل بلوچ عرف زیلان کرد و رضوان بلوچ عرف حمل نا قربانی تے دروت ندر کرینے۔
پیپلز یونائیٹڈ ریوولیوشنری موومنٹ نا دا آپریشن اندنو وخت ئسے آ مونا بس ہراڑے تدوکا توہ بلوچ لبریشن آرمی اسہ بھلو آپریشن ئسے نا ردئٹ بلوچستان ئٹی آپریشن ھیروف ئٹ پاکستانی لشکر و تنصیبات آتے ٹک کریسس۔
پن کروک جلہو ئٹ بشخ ہلوک جندندر رضوان بلوچ و زالبول جندندر ماہل بلوچ عرف زیلان کرد اوار ئسر، بلوچ لبریشن آرمی نا ردئٹ ماہل بلوچ زیلان کرد نا پِن ءِ کرد آجوئی دوست زینپ قناسی آن زیمی مریسہ گچین کریسس۔
یاتی مرے پیپلز یونائیٹڈ ریوولیوشنری موومنٹ کرد و ترکش چپ دو نا گروپ آتا اسہ سیوت ئسے ہراٹی ترکی تون اوار شام و عراق ئٹ متحرک کرد آجوئی دوست پارٹی و ترکی نا چپ دو نا سوشلسٹ تنظیم آک اوار ءُ۔
اینو کوئٹہ ئٹ زوراکی ئٹ بیگواہ جہانزیب بلوچ نا آجو مفننگ نا برخلاف خاہوت نا پارہ غان برانز کننگا۔
برانز ئٹ وائس فار بلوچ مسنگ پرسنز، بی وائی سی، خوانندہ تیتون اوار بلوچ بیگواہ بندغ تا خاہوت آک ہم اوار مسر۔
برانز کروک آک بینرز، پلے کارڈ و بیگواہ بندغ تا عکس آتے ارفسہ شار نا کسر تیا چرینگسہ زوراکی نا بیگواہی تا برخلاف نعرہ خلکر۔
دا وخت آ خاہوت پارے کہ جہانزیب بلوچ ءِ 3 مئی 2016 ئٹ کوئٹہ آن بیگواہ کننگاسس۔ او درزی اس ئس۔ جہانزیب بلوچ تون اوار غٹ بیگواہ تا آجوئی نا خواست کننگا۔
خاہوت پارے کہ زوراکی ئٹ بیگواہ جہانزیب بلوچ کوئٹہ شار ئٹ سریاب نا ہندی ئسے و پیشہ ٹی درزی ئسے۔ او برامی ءِ و اونا مسڑ اس ہم ارے ہرا ودی مننگ تون برانز کننگ ءِ۔
جہانزیب نا لمہ پارے کہ معصومہ اونا مار مار ئنا اسٹ آ چنا ءِ، ہرا وخت جہانزیب ءِ بیگواہ کننگا تو او وخت معصومہ نا سن بیرہ شش توہ ئس۔
گل سیمہ پارے کہ تدوکا ہشت سال آن نہ بیرہ او بلکن اوفتا خاہوت نا غٹ بندغ آک اسہ تادی ئسے نا گواچی ءُ۔
’ننے آن تُغ پُلنگانے، نن ناجوڑ مسونن و داسہ بس دارو تا وسیلہ ئٹ زندہ اُن۔‘
ایسر ئٹ برانز کروک آک پاریر کہ اگہ او ڈوہ اس کرینے گڑا اودے عدالت ئٹ ہتنگ مرے۔
بلوچستان ئٹ ٹرین آتا بند مننگ آن ریلوے کوالخواہ تے ہڑدے 15 لکھ روپئی نا نسخان مننگ ءِ۔
کوئٹہ آن بلوچستان نا تہہ ئتون اوار پاکستان نا ایلو شار تیکن ٹرین سروس 14 دے آن بند ءِ، ٹرین سروس دوزان پول نا تمنگ آن بند ءِ۔
ریلوے کوالخواہ تا ردئٹ سبی ہرنائی کن ٹرین سروس 23 جولائی آن بند ءِ، ہرنائی ٹی ریلوے ٹریک نا جوڑ کننگ یک و نیم توہ ئٹ ہم مننگ کتو، کوئٹہ تفتان ریلوے سیکشن ہم 15 دے آن بند ءِ اندا وڑ چاغی ئٹ وہوکا ریلوے لائن جوڑ کننگتنے۔
کوئٹہ چمن ٹرین سروس ءِ بند مروک 10 دے مسنے، شیلا باغ سرنگ نا جوڑ کننگ ئٹ پین 15 دے لگنگ کیرہ ریلوے کوالخواہ تا ردئٹ ٹرین آتا بند مننگ نا سوب ریلوے ءِ ہڑدے 15 لکھ روپئی نا نسخان مننگ ءِ۔
یاتی مرے اِرا ہفتہ مُست بلوچ لبریشن آرمی آپریشن ہیروف ئٹ مروک جلہو تیٹ بلوچستان نا کیہی بنجاہی ریلوے لائن آتے بولان، مستونگ، ڈیرہ مراد جمالی، نوشکے، و کوئٹہ ٹی ٹک کریسس۔ جلہو تیٹ بولان ئٹ دوزان نا ہند آ بنجاہی پول ءِ ہم بھس کننگا۔
ریلوے کوالخواہ تا پاننگ ئس کہ جلہو آتیان پد چاغی و ایلو ہند آتیا ریلوے لائن ءِ پِرک ہم زیمی کرینو ہرانا بحال مننگ ئٹ وخت لگو۔
