بلوچستان نا علاقہ بسیمہ ٹی اسہ چُنک سن مار ئسے نا خون کننگا اندن گوادر و کیچ آن مسڑ ئسے تون اوار اِرا بندغ خود کشی کریر۔
شابیتی حوال تا رد ئٹ چنک سن مار برمتہ مننگ آن پد خون کننگانے و مارکو نا جون مش تیان خننگانے۔ ہندی حوال تا رد ئٹ چُنا ناکاٹُم آ کبین ءُ خل اس خلیسہ خون کننگانے۔
ہندی بندغ آتا پاننگ ءِ کہ تدوکا دے سہب ئنا چُنا کُھر خوافنگ کن پیشتماسس، ننکان اُرا غا بتو تو چُنا نا وارث آک اودے پٹنگ بناء کریر۔اینو سہب ئنا چُنا نا جون زیک نا مش تیان خننگانے، چنا ءِ کبین ءُ خل خلیسہ خون کننگانے۔
ہندی بست و بند چُنا نا جون ءِ سول ہسپتال بسیمہ آ سر کرے ولے خون ئنا سوب نا بابت ئٹ ودیک گامگیج کننگ متو تو خاہوت تینا کمکتینٹ ئٹ جون ءِ پوسٹ مارٹم کن کوئٹہ آ دننگ نا فیصلہ کرے۔
ایلو نیمہ غان بلوچستان نا ضلع کیچ و گوادر ئٹ جتا تدینی تیٹ اسہ مسڑ ئسے تون اوار اِرا بندغ خود کشی کرینو۔
شابیتی حوال تا رد ئٹ ضلع کیچ ئنا علاقہ ہوشاپ ئٹ 17 سالی صباء بنت ولی محمد پنی ءُ مسڑ اس اُرا ٹی خود کشی کرینے۔
تدینی ءِ پک کریسہ پلیس نا پاننگ ءِ کہ پن کروک مسڑ اُرا ٹی خودکشی کرینے، پولیس نا پاننگ ءِ کہ دا بابت ئٹ ودیک پٹ و پول مننگ ءِولے ہندی حوال تا رد ئٹ خودکشی نا سوب اُرائی جیڑہ مننگ کیک۔
اندن بلوچستان نا دریابی شار گوادر آن حوال رسینگانے کہ اسہ ورنا اس خودکشی کریسہ تینا زند ءِ ایسر کرینے۔
خودکشی کروک آ ورنا نا چاہنداری خوانندہ معید سکنہ کلانچ نا پن ئٹ مسنے۔ خودکشی نا سوب سما تمتنے۔
یاتی مرے کہ دا منَہ وخت آن تیوہ بلوچستان آن اسہ وڑ خودکشی نا تدینیک مونا بننگ ءُ۔
دی بلوچستان پوسٹ نا مُچ کروک کچ و حساب نا رد ئٹ برجاء سال خودکشی کروک آتا کچ پنجاہ آن زیات مسنے۔