ایران ٹی پولیس نا دزگیری ٹی ورنا نیاڑی نا مرگ نا گواچی مننگ آ تیوہ ایران ٹی چارمیکو دے ہم برانز برجاء ءِ دا وخت آ بد امنی ناسوب آن 3 بندغ مرگ نا گواچی مسنو۔
ایران نا سرکاری میڈیا کہی شار تیٹ چُنک پیمانہ آ ہڈ تِروک برانز تا حوال تِس ہراٹی برانز کروک آک حکومت نا برخلاف نعرہ خلکُر ،پولیس کارندہ آتا اُلاخ آتیا خَل خسّار و الس نا اُراتے ہم نسخان مس۔
ایلو پارہ غان سوشل میڈیا ویب سائیٹ آ پوسٹ کروک ویڈیو تیٹ تیوہ ایران نا صوبہ آتیٹ برانز کننگ آ خننگ مریک ہرافتیٹ کہی اندُنواُرا ہم اوار ءُ ہرا داسکان بد امنی آن زیمی متنو ،واہم نوشتوک آک دا ویڈیو تا آزات پَک کننگ کتنو۔
کرد بندغی حق آتا ٹولی ہینگاو رپورٹ کرے کہ دوشمبے آ 13 شار آتیٹ برانز مسنے و 250 بندغ دزگیر کننگانو واہم نوشتوک آک دارپورٹ آتا آزات پَک کننگ کتنو۔
غُٹ آن زیات کردستان نا علاقہ آتیٹ حالیت خراب ءِ، ہراڑے سرکاری اوغدہ آک و رضاکار آتا ویب سائیٹ آک کم و ود مُسہ بندغ نا مرگنا گواچی مننگ نا شابیت حوال تِسنو۔
کرد بندغی حق آتا ٹولی ہینگاو نا پاننگ ءِ کہ مرگ نا گواچی مروک آ 3 بندغ آک سیکیورٹی کارندہ آتا سُم کاری آن بیران مسنو۔
مہسا امینی نا خون اخلاقی کارندہ آتا دزگیر کننگ ٹی کوما ٹی ہِننگ آن گُڈ مس، دا پولیس ایران ٹی تُرند قانود نافذ کیک ہرافتا ردئٹنیاڑی تے تینا پُژہ آتے ڈھکوئی ءِ و السی ہند آتیا تَنک او پُچ بینوئی اف۔
مہسا امینی نا لُمہ نا پاننگ ئس کہ اودے جانجوڑی نا ہچو ویل اس الو واہم پولیس کارندہ آتا دزگیر کننگ نا وخت اونا نَتیا ٹپ ئس، اوپولیس ءِ تینا مسِڑ نا خون نا ذمہ وار پارے ۔
اونا خون مننگ آن گُڈ کردستان ٹی بناء مروک برانز آک دوشمبے و سئے شمبے آ شمال مغربی ایران نا گیشتر صوبہ آتیٹ ہم تالان مس۔
پاش وڑ ئٹ گشیدگی ءِ کم کننگ نا کوشست کن ہم ایران نا سپریم لیڈر آیت اللہ علی خامنہ ای نا اسہ کُمک کار اس مہسا امینی ناخاہوت تون تعزیت کریسہ پارے کہ خامنہ ای اونا خون آن زیمی و ڈُکھ ٹی ءِ۔
آیت اللہ خامنہ ای نا کارندہ عبدالرضا پور زہابی ایرانی صوبہ کردستان ٹی مہسا امینی نا باوہ پیرہ ئی اُرا نا دورہ کریسہ پارے کہغُٹ ادارہ آک دا حق نا دفاع کِن کاروائی کرون ہرانا برخلاف مسنو۔