بلوچستان ئٹی مقتدر تپہ آتا نمائندہ نگران حکومت
ٹی بی پی سرگپ
بلوچستان ئٹی حکومت و سیاست نا فیصلہ ساز ادارہ آک پاکستان نا مقتدرہ لشکری طاغت آکو و او بلوچستان ءِ اسہ سیاسی آزموندہ جاہ اس جوڑ کرینو۔ مالو نا گچین کاری آن مُست بلوچستان عوامی پارٹی ءِ جوڑ کرسا اوفتے حکومت ءِ تسُر و داسنا نا گچین کاری آن مُست ذمہ وار تپہ آتا کمک ئٹ نگران حکومت جوڑ کننگا تاکہ گچین کاری ئٹی اندافتا پالیسی تے عمل ئٹ ہتنگ مرے۔
بلوچستان ئٹی بلوچ راجی سیاست و سیاسی عمل آ بے پڑو کروک رکھ ارے ولے دا حالیت ئٹی ہم کم کچ آ سیاسی مزاحمت برجاء ءِ۔ پاکستان نا ذمہ وار تپہ آتا کوشست ءِ کہ بلوچستان ئٹی عملی وڑ آ نیشنلزم نا سیاست ءِ ایسر کننگ مرے ہراڑکن مصنوعی سیاسی شخصیت و پارٹی بلوچستان آ چٹی کننگ مننگ ءِ۔
بلوچستان ئٹی راجی آجوئی نا سیاست کروکا ادارہ آتیا رکھ خلوک ءِ ولے راج دوستی نا سیاست نا دعویٰ کروکا تپہ آتا مصنوعی سیاسی شخصیت آتا بلوچستان نا سیاست آ چٹی کننگ آ چُپی سوج ئنا نشان ئسے۔ نیشنل پارٹی نا ذمہ وار تپہ آتا نمائندہ انوار کاکڑ ءِ پاکستان نا نگران سروزیر گچین کننگ ءِ خوش آئند پاننگ بلوچستان و اوفتا سیاست کن زہر خون ثابت مننگ کیک۔
بلوچستان نیشنل پارٹی نا مقتدر تپہ آتا نمائندہ آتا بلوچستان نا سیاست آ چٹی کننگ آ توار بڑز کننگ خوش آئند ءِ ولے بلوچستان نیشنل پارٹی قدوس بزنجو نا بلوچستان عوامی پارٹی نا حکومت ءِ ساہ بشخنگ ئٹی اوار ءِ۔ بلوچستان نیشنل پارٹی ءِ پُہہ مروئی ءِ کہ قدوس بزنجو و صادق سنجرانی کون آ شخصیت آتا مُخ تفی کرسا او بلوچستان نا سیاست ئٹی مقتدر طاغت آتا کسر ءِ توننگ ئٹی سرسہب مننگ کپسہ۔
بلوچستان ئٹی راجی سیاست نا کسر نا بند مننگ آن بیرہ اسہ فکری تپہ اس زیمی مروف بلکہ داڑان نیشلزم نا بنداو آ سیاست کروکا تا کسر بند مرو۔ بلوچستان ئٹی کاریم کروک سیاسی پارٹی تے اسٹ ایلو نا برخلاف محاذ ملنگ نا جاگہ غا مقتدر تپہ آتا کنڈ آن بلوچستان آ چٹی کننگ آ مصنوعی سیاسی شخصیت و تپہ آتا کسر ءِ توننگ کن اوڑدئی گھام ہرفوئی ءِ۔