ڈیرہ بگٹی ئٹ لشکر کشی
ٹی بی پی سرگپ
ڈیرہ بگٹی بلوچستان بھاز زیات پد تموک و شرہ ئی ضلع غاتیٹ مریک۔ فوجی آمر جنرل پرویز مشرف بلوچستان ئٹ دتری جنگ اس شاغا ہراڑان ڈیرہ بگٹی و کوہلو تیوہ غاتیان زیات زیمی مسر، لکھ آ بندغ آک باہوٹی مننگ آ بیوس مسر، ہزار آ بندغ آک زوراکی نا بیگواہی نا گواچی کننگار و سد آک کسفنگار۔ پاکستان ئٹ فوجی آمریت ءِ پانزدہ سال گدرینگا و پیپلز پارٹی، مسلم لیگ نون و تحریک انصاف نا حکومت آک جوڑ و ایسر مسر ولے ڈیرہ بگٹی نا بھیم بش کروک حالیت آتیٹ جُوانی بننگ کتئو۔
زوت دے تیٹ بلوچ لبریشن ٹائیگرز سوئی آن سبی آ ہنیسہ شش فٹ بال گوازی گر تے برمتہ کرے، ہراڑان گڈ ڈیرہ بگٹی ئٹ شابیت ءُ کچ ئسے آ لشکری کشی بناء کننگا۔ پاکستانی لشکر نا دوانزدہمیکو کور نا کمانڈر آصف غفور و آئی جی فرنٹیئڑ کور بلوچستان ڈیرہ بگٹی نا دورہ کریر و راج دوست جماعت آک خُلیس نا درشانی کننگو کہ پِن کروک افسر آتا دورہ لشکر کشی ءِ پین شابیتی تننگ نا سوب مرو۔
لشکر کشی ئٹ سوئی تحصیل نا جتا علاقہ غاتیٹ اُرا تیا چھاپہ خلنگسہ ءِ، کیہی علاقہ غاتیٹ اُرا تے ہشنگانے و مخلوق ءِ زوراکی ئٹ لڈ و ہنپ آ بیوس کننگ نا ہم حوال آک ءُ۔ ڈیرہ بگٹی نا جتا علاقہ غاک فوج نا پلویڑ ئٹی ءُ و کیہی بندغ آک زوراکی ئٹ بیگواہ کننگانو۔
پاکستان نا نگران وزیر داخلہ سرفراز بگٹی آ برجاء تینا برخلاف مروک آتیا طاغت نا بے کچ کاریم ئٹ ہتنگ نا دوبہ غاک لگیسہ کرینو و بلوچستان ئٹ نگران حکومت نا بننگ آن گڈ زوراکی نا بیگواہی تیٹ ودکی مسونے۔ لشکر کشی و بلوچ راج آ زوراکی آن بلوچستان ئٹ حالیت آتیٹ جُوانی نا جاگہ غا خرابی برو۔ بلوچ ویل ءِ زور و تادی تیان شیف خلنگ نا کوشست مالو ہم بے سُہب مسونے و داسہ ہم طاغت نا بے کچ کاریم ئٹ ہتنگ آن ویل آک ایسر مفرور بلکن زیات مرور۔