جیل ئٹ اسہ چنکو ردی اس | رضا براہینی – خالدہ بلوچ

جیل ئٹ اسہ چنکو ردی اس

 تخلیق: رضا براہینی
اردو: خالد سہیل | براہوئی مٹ: خالدہ بلوچ

دی بلوچستان پوسٹ

ای 1981 نا مُد سہیل و 1982 نا بنائی دے تیٹی قیذ کننگاسٹ۔ ہمو جیل ئٹ بند ئسوٹ ہرا شاہِ ایران نا وخت ئٹ عقوبت خانہ نا ردئٹ کاریم اٹ ہتنگاکہ۔ خمینی نا اسلامی حکومت دانا در ءِ دوارہ ملاسس۔ ہراڑے ای قیذ ئسوٹ اوڑے کیہی پین نیاڑی تے ہم قیذ کننگاسس۔ جیل نا برانڈہ ٹی ہرا قیذیک ئسر اوفتا خن تیا پٹی تفنگاسس۔ اوفک ہموڑے کُنگرہ، خاچارہ و ودار کریرہ۔ کنے دا حوصلہ پرغوک حالیت آتیٹی 22 دے تخنگاسس۔ اوکان پد کنے بڑزی آ مزل نا یکہ انگا قیذ ئٹی گدرینگ مس و اولی وار کنا خن تیان پٹی ءِ دھڑفینگ مس، اسہ تُو ئسے آن پد کنا خن تیا دوارہ پٹی ءِ تفنگا و کنے کار ئسیٹی تولفسا ایوین جیل آ گدرینگ مس۔ او جیل ئٹ اسہ نن شیفا نوشتوک تدینی مس؛

او دے ئکن ہڑدے نا وڑ کنے اسہ بان اسیٹی دیوال نا پارہ غا مون ءِ کرفوک تولفنگاسس و کنے آن کیہی سوج و ورندی تے کننگاسس۔ پیشیم نا وخت کنا جرح ایسر مسوسس و ای دا ودار ٹی ئسوٹ کہ کنا خن تیا پٹی تفنگ مرو، کنے برانڈہ غا دننگ مرو، و کنے پاننگو کہ مونی آ قیذی نا کوپہ غا دُو ءِ تخ و کنے آن پد ئنا قیذی ءِ پاننگ مرو کہ اود کنا کوپہ غا دو ءِ تخہ۔ پدا نن غٹ قیذی تے پاننگ مرو کہ نن شیف نا دالان نا کنڈ آ روان مرین ہراڑے اسہ بس ئس نن کن ودار ئٹ مرو و او بس ننے ننا جیل نا تارمہ غا بان آتے اسکان درو۔

جیل نا رکھوال آتا بننگ اسکان شام مسوسس۔ اسہ نگہبان اس بننگ تون کنا خن تیا پٹی اس تفے۔ کنے ہندن محسوس مس کہ نپہ نگہبان پین اسہ قیذی اسیتون ہم ہندن کریسس۔ پدا او نن تومکا تے برانڈہ نا پارہ غا ہننگ کن پارے، و ایلو قیذی تا کوپہ آتیا دو تے تخنگ کن پارے۔ کنے ہچ گمان الو کہ اوڑے اخس قیذی ئسر۔ کنے شیف نا مزل آن ٹوہو آتا چیہانٹ، کوکار و قیذی تے خُلیفنگ تڑی تننگ نا توار بننگ ئس۔

ای خن تا پٹی نا شیف آن منہ ویل چیئر خناٹ، ہرافتیٹی اوفک تولوک ئسر و اوفتا نک پِروک و دتری ئسر۔ کنا خف تیٹ پُس پُس و یخ آسڑد آتا توار تمنگ ئس۔ ننے شیف ئنا مزل آ ہننگ نا پرمان مس، ولے چارمہ کنڈ آ ہنداخس ءُ مچی اس ئس کہ مُستی ہننگ ڈکھیا ٹی مننگ ئس۔ ای تینا مون ئنا قیذی نا کوپہ آتے و کنے آن پد ئنا قیذی کنا کوپہ آتے ترندی ئٹ ہلک۔ ننے خُلیس ئس کہ دا مچی ٹی نن گوہنگپن۔ ای ہندن مارینگ ئسوٹ نپہ دا نن تدوکا نن تیان جتا ئس۔ نن بھاز مشکل و کوشست آتیان پد شیف نا مزل آ سرمسون۔

کنے ہندن لگنک ئس کہ دنکہ کنا چارمہ کنڈ آ لکھ آ بندغ آک ئسر و ننے دھکہ تننگ ئسر۔ دا دھکہ آتیٹی ننا دوک اسٹ ایلو نا کوپہ آتیان کشکنگ ئسر۔ پدان ہندن محسوس مس کی نن ہر مسٹ انگا قیذیک چِر آن کِشکاسن۔ ناگمان ای ماراٹ کہ کنا کوپہ نا دُو گوہنگانے و بیرہ نن تومکا رہینگوک اُن ہراکہ اسٹ ایلوڑتون تفوک ئسون ولے ایلو جہان آن خن تا زی آ پٹی تا سوب آن کشکوک ئسون، پدا کنا دو ہم ایلو قیذی نا کوپہ آن کشکا و ای دا تارمہ غا ہند ئٹی یکہ مسٹ۔ او ساعت ای تینے آن سوج کریٹ کہ؛

مگہ ای اسٹیج آ سلوک اسٹ انگا اداکار اُٹ ہرادے ہروکاک گیرام کرینو؟
مگہ دا کنا زند نا کسہ نا گڈیکو ندارہ ءِ؟
اگہ ای کور ئسے اُٹ گڑا کنا لٹ ہرادے؟
مگہ ای یونانی دیومالا نا بے سہب مروک کور اوڈیپس اُٹ؟

ہچ سما اف ای اوڑے اخس وخت سلیسٹ۔ پدان کنے حاکمی ءُ توار اس بس، تینا دو ءِ مون ئنا قیذی نا کوپہ غا تخ و مستی ہن، دا توار ءِ بننگ آن کنا ساہ ئٹی ساہ اس بس و ای اومیتی مسوٹ کہ داسا ای بیست منٹ ئٹی تینا جیل نا بان ءِ سر مروٹ۔ مچا دے ئنا کوشست آتیان پد کنے دا مارشت مس کہ ای تینا جرح کروکا ءِ منفیسٹ کہ ای غدار اس افٹ۔ ای گمان کننگ ئسٹ کہ تینا بان ئٹی ہننگان پد بروکا دے ئنا جرح نا تیاری تے بناء کروٹ۔ ای زو تینا دو ءِ ارفیٹ و مونی آ قیذی نا کوپہ آتیا تخاٹ و کنے تینا پد ئنا قیذی نا دو تینا کوپہ غا محسوس مس، و نن کل مونی روان مسن۔

مُد یخ ئس ولے یخ ترند الو۔ ای گمان کریٹ کہ آسمان ئٹ استاک گروشک تننگ مرور و اگہ کنا خن تیا پٹی تفوک متوکہ تو ای اوفتا زیبائی ءِ خناٹہ۔ ہراتم ننے ہننگ نا حکم مس گڑا نن مستی گام ارفسا کرین۔ نن غٹ قیذی تا مُخک سختی و ڈکھ آتا باریم آن ہُڈ مسوسر ولے ننا خن تیٹی ہمو دے نا اومیت ئس ہراتم نن سیدھا سلنگ کرون و کاٹم ءِ بڑزا کرسا گمر ئٹ آسمان نا پارہ غا ہُننگ کرون۔ پدان کنے خیال بس کہ بس آک ہراڑیکو؟ نن داخس اُرے آن انتئے ہننگ ئٹی اُن؟ کنے ہندن گمان مس کہ بھلو گوجالنگ اس مسنے، چارمہ کنڈ چھپی و تارمئی ئس۔ پدا آسمان آن روشنائی برسا خننگا دنکہ استاک پنوک مریر یا جیل ئنا دیوال آتیا بھلو بلف لگنگ مریر۔ ہراتم کنے حالیت آتا ترند مننگ نا مارشت مس گڑا کنا ذہن ئٹ اسہ سوج اس ودی مس؛

 او ننے ہرانگ دننگ ءُ؟
ای تینا پد ئنا قیذی نا دو ءِ تینا کوپہ آ محسوس کریٹ ولے سلیتوٹ۔
ای دوارہ سوج کریٹ
ہرانگ؟ او ننے ہرانگ دننگ ءُ؟
کسس کنا سوج نا ورندی ءِ تتو و چھپی پین زیات مس۔
پدا کنے اسہ کچک ئسے نا غوْکنگ و کس ئسے نا جھکنگ نا توار بس۔ اسہ قیذی اس کنے آن سوج کرے
“مگہ نے سما اف؟”
آخہ! ای ورندی تسٹ۔ کنے ہڑدے جرح غان پد بس ئٹی تولفسا تینا جیل نا بان آ گدرینگ مریک ولے اینو بس بتو و نن اُرے آن پند آ ہننگُن۔
“اینو نن کل کمرہِ عدالت ئٹی ئسن و داسا نن پاہو نا تخت آ ہننگن۔”
انت پاریس؟ ای شش و پنچ مرسا سوج کریٹ
مگہ نی عدالت نا کمرہ ٹی الوس؟
آخہ! ای کمرہِ عدالت ئٹ الوٹ۔

کنے لگک گڑاس ردی مسنے۔ ای رد قیذی سینا کوپہ غا دو ءِ تخانٹ و نی ہم رَد ئٹ کنا کوپہ غا دو تخانس۔ او جاگہ غا بھاز ہڑدڑ ئس۔ دا حالیت آتیٹی ای بھاز شش و پنچ مسنوٹ کنا ملی بے ماروک مسنے۔ ای نگہبان آتے توار کننگ خوائوہ ولے کنا توار کنا گُٹ ئٹی کہینگ ءِ۔ کنا تیوہ بدن خید آن اسٹ مسنے۔ کنے توار بریک؛

‘مگہ او’ نا کُڑی تیا گڑاس نوشتہ کرینو؟
انت پاریس؟
‘مگہ او نا کڑی تیا گڑاس نوشتہ کرینو؟
آخہ!
او ننا کڑی تیا نشان خلسا و گڑاس نوشتہ کننگان پد تلہ نا پارہ غا روان کرینو۔
آخہ! کنا کڑی تیا ہچو نشان اس اف۔
گڑا انت ئسے نا ودار کننگس۔ کوکار خل و نگہبان آتے پار۔

ای کوکار خلکٹ؛ نگہبان آک! گڑاس ردی مسنے، ای اینو کمرہ عدالت ئٹ الوٹ۔ ببو کنا نت تا کڑی تے اُربو۔ اوفتیا ہچو لوز اس نوشتہ افک، ہچو نشان اس افک۔

 ‘بکواس ءِ بند کہ۔ چھپ مر۔ کوٹک ‘کافر’، اونا توار آن صاف درشان مریک کہ اود قیذی اس اف بلکن نگہبان ئسے۔

 قیذی کنا حوصلہ ءِ ودفے ‘کوکار خلسا کہ، چیہانٹ خلسا کہ’ و اوفتے پارسہ کر کہ نا نت تا کڑی تے اُریر۔
ای کوکار خلسا اُٹ۔ سما اف انت پاننگٹ، تینا ساہ ءِ رکھنگ کن کوشست کننگٹ۔
کنا ہمدڑد قیذی نا دوارہ توار بس، تینا بوٹ آتے کشہ، کوکار خل و اوفتے تینا کڑی تے نشان ایت۔

 ای سوچیوہ او قیذی ہرا وڑ ئنا بندغ ئسے ہرا تینا ذات آن گیشتر کنا ذات نا باروٹ گڑتی ٹی ءِ۔

‘برک۔ کنا نت تے اُر’ ای دوارہ کوکار کیوہ ولے دن کننگ ڈکھیا آخہ بلکن مننگ ہی کپک انتئیکہ کنا دو کس ئسے نا کوپہ غا و کس نا دو کنا کوپہ آٹے۔ ای دا تارمئی ٹی امر کس ءِ تینا نت تے نشان تننگ کیوہ۔ دا مننگ کپک۔ دا مننگ کپک ‘ای تینتون تینٹ ہیت کرسا ئسٹ۔’

بے حوصلہ مفہ۔ کوکار خلسا کر و تینا ساہ ءِ رکھنگ کن چیہانٹ کرسا کر، او قیذی دوارہ سلاہ اہتک۔ نن تینا ساہ تے تو اسہ نظریہ ئسے کن تننگن، ولے نی انتئے مفت ئٹ تینا ساہ ءِ تننگس؟ کوکار کرسا کہ۔

ای دوارہ کوکار کیوہ، و سوچیوہ دا عظیم انگا بندغ نا ہمراہ ساہ ءِ تننگ گمر نا ہیت اس مرو۔

 پدا اسہ نگہبان ئسے نا ترندی تون توار بریک ‘نی بے باوہ، بے دین، نی سمجھسہ کہ کوکار خلنگ ئٹ تینا ساہ ءِ رکھوس۔ دئے منٹ آن پد ای نے تینٹ تینا دو تیٹ کھسفوٹ۔ ای دوارہ کوک خلکٹ ‘برک کنا نن تا کڑی تے تینا خن تیٹ اُر۔ ای اینو کمرہ عدالت ٹی الوٹ۔ کنے آن حاجی آغا حسینی تیوہ دے سوج و ورندی کرینے۔ دائسکان جرح پورو متنے۔ کنے پگہ دوارہ ہنوئی ءِ، نی کنا ہیت آتیا باور انتئے کپیسہ؟

 ‘دمدرینگپہ، کوکار خلسا کر’، کنا ہمدڑد قیذی کنے حوصلہ تس۔

 ای دوارہ کوکار خلنگ بناء کریٹ۔

 نگہبان کھرینگ ترسا ئس۔ آخر نن تینا مزل ءِ سرمسن۔

 داسا نن کل لڑزنگ ئسن۔ دا علاقہ ئٹ کیہی روشنائیک ئسر۔ کیہی بندغاک پس پس ئٹ ہیت کننگ ءُ ۔ مننگ کیک او جلاد مریر۔ مننگ کیک گڑاس تا سیل کروکو مریر۔ ہرا دا ہُننگ خوائر کہ اگہ اوفک تینا سنگت آتتون غداری کتور گڑا اوفتا حالیت انت مرو۔ او مرگ ئنا چہرہ ءِ خننگ خوائرہ تاکہ بروکا وخت ئٹ فیصلہ کننگ ٹی اڑزانی مرے۔

ای مدان آ توار ئٹ پاریٹ،
‘ایلم نگہبان! مہروانی کر و کنا خڑک بر و کنا نت تا کڑی تے اُر۔ نمے تینٹ اندازہ مرو کہ کنے پاہو تننگ نا سزا تننگتنے۔ ای بے ڈوہ ئسے اُٹ۔’

‘بکواس ءِ بند کہ!’
اسہ پین ترند ءُ توار اس گوْر ئٹ شیف دھڑا۔

کنے مر آن اسہ قیذی ئسے نا توار بس ہرا تینا گڈیکو است خواہی ءِ پاننگ ئس۔
‘کھسفنگ آن مست کنا خن تیان پٹی تے دھڑفبو، ای کہینگ آن مہالو تہران نا نن ئنا زیبا انگا ندارہ ءِ ہُننگ خوائوہ۔’
‘بھاز توار توار کپہ۔ چپ مر’ اسہ صاحب اس چیہانٹ ئٹ پارے۔

کنے مر آن اِرا نرینہ نا خِستنگ نا توار بس۔ اسٹ پاننگ ئس
‘یاخدا! دا کنا زند نا گڈیکو دیک ءُ’

اسہ نگہبان اس ننا کھیب آ بریک و کنے ایلو قیذی تیان یکہ کیک، ای تینا بوٹ آتے کشیوہ، و نت شپاد سلیوہ و ودار کیوہ۔

اسٹ اس ایلوڑان ہرفک ‘ہشت یا نوہ؟’
اسٹ اس ورندی ایتک ‘نوہ’
‘کنا خن تیان پٹی ءِ مر کبو، ہمو قیذی نا توار بس’
اسٹ اس ورندی ایتک ‘نوہ’

‘کنا خن تیان پٹی ءِ مر کبو’ دا ہمو قیذی نا توار ءِ ہرا کہینگ آن مست تہران نا زیبائنگا نن ءِ خننگ خواہک۔
اسہ پین توار اس بریک ‘دانا خن تیان پٹی ءِ مر کبو’

ای چپ سلوک مریوہ، نت شپاد، تینا بروکا وخت ئکن ودار کروک۔

پدان روشنائی نا لگنگ و کہینگ نا مارشت مریک۔ و ای گمان کیوہ مننگ کیک مرگ اکن ودار نا خُلیس مرگ ئنا خلیس آن ہم زیات مریک۔ بجلی نا روشنائی خڑک برسا و تالان مرسا مارینگک۔ اسہ بندغ اس بوٹ آتے کشِک۔ کسس اودے بوٹ آتے بیننگ کن پاہک۔ کنے بوٹ آتے بیننگ نا توار بریک۔

پدا کنا وار بریک۔ ای نگہبان ءِ پاننگ خوائوہ کہ کنا نت تا کڑی تے ہر تاکہ نے سما تمے کہ ای رَد ئٹ پاہو تننگنگ کن ہتنگانٹ، ولے داڑان مست کہ کنا ہیت پورو مرے، او ترند آن پاہک؛ ‘حسن! دا قیذی ءِ دوارہ کمرہ عدالت آ در سر کہ، اوفک دانا نت تا کڑی تیا نشان خلنگ گیرام کرینو’

ای دوارہ بوٹ آتے بینوہ، اسٹ اس کنا دوٹی ہلیک۔ و کنے تینا پاسوہی چِھکیک۔ او کنا خن تیان پٹی ءِ دھڑفپک۔ تینٹ ہم رمب کیک و کنے ہم رمب کننگ کن پاہک۔ نن تومکا مش آن شیفی نا وڑ رمب کینہ۔ او کنے آن ہچو سوج اس کپک ولے ای اودے پاننگ نا کوشست کیوہ کہ ای بے ڈوہ اُٹ۔ کنے ہندن لگک کہ ای ہلّی آنبار تینا مرگ ئنا کنڈ آ رمبسا ہننگٹ۔

کنا کڑی تیا منہ لوز آتا نوشتہ مننگ نا مطلب مرگ ءِ۔
منہ لوز اخس بیم بش کروک مننگ کیرہ، ای وختس ہم گمان کتوسٹ۔

او بندغ کنے خَلی آ شیفی آن رمب کرفسا دننگے۔ او چھپ ءِ، او کنے پاپک کہ ننے پین اخسو مُری اس ہنوئی ءِ ۔ ای ہم چھپ مریوہ۔

آخر نن سلینہ و کمرہ عدالت ئٹی پیہنہ۔ کنا کاٹم پیری کیک و کنے اُلٹی بریک۔

‘داڑے انت مننگ ءِ؟’ کنے لگک، بندغ آک سوپ کُننگ ءُ۔
کنے ہمو دے یات بریک ہراتم جرح کننگ ٹی اُرے تماسس و ننے سوپ تننگاسس۔
کنے سوپ نا باروٹ ہمو مخُوک ہم یات بریرہ ہرا ہلٹن ہوٹل نا بھلا مزور کار بنفیسس، ہرادے قیذ کننگاسس۔

 ای زورانکا چیہانٹ خلیوہ، ای بے ڈوہ اُٹ۔

 ای کمرہ عدالت ئٹ مستان ہچ بتوسٹ۔ حسن اسٹ ئسے توار کیک کہ او کنا نت تا کڑی تیا گڑاس نوشتہ کے و نشان خلے،

 او نرینہ خڑک آ بریک، کنا پن ءِ ہرفک،
پدان او اسہ فائل اسیٹی کنا پن ءِ پٹنگ نا کوشست کیک
‘دادے تورس’ او دا پارسا پیشن کاہک۔

 منہ ساعت آن پد کمرہ عدالت نا پیشن ہڑدڑ نا حالیت ودی مریک۔ اسٹ اس کل ءِ چپل آتے کشنگ نا حکم ایتک۔

 پدا کنے چاپ ئسے نا توار بریک۔ آخہ دا چاپ ئسے نا آخہ، دا کس ئسے نا مون آ چپانٹ اس خلنگ نا توار ءِ۔ کنے لگک ہندنکہ کس ئسے بھاز خلنگ ءُ، گڑاس بندغ نا نرّنگ نا توار بریک۔

پدان اسٹ ئسے کنا مون دھکہ تننگک، اسہ پین توار اس بریک
‘اودے الیبو و دادے ہلبو’
کنا دوٹی ہلوکا کنا دو ءِ یلہ کننگ آ کنے مارینگک
ای دا پوسکنا بندغ نا دروشم ءِ ہُننگ خوائوہ۔ او کنا جاگہ غا تلہ غا دننگ مرو۔ او بندغ تَھسّنگ ءِ۔
او منہ ساعت کنا مون آ سلوک مریک۔ کنے اونا باء آن سوپ ئنا گند بریک۔
پدا نن جتا مرینہ، ای یکہ سلوک مریوہ۔

منہ ساعت آن پد اسٹ اس کنا دوٹی ہلیک، کنے اسہ کنڈ ئسیٹی دیک و تولنگ کن پاہک، خن تا پٹی تا شیف آن ای سوپ نا پیالہ و اوٹی گلٹ نا اسہ چمچہ اس خنیوہ۔ کنے ایلو بندغ تا کُننگ و ہیت کننگ نا توار بریک۔ کنا خڑک آ سلوک امبل منہ ساعت ودار کیک و پدان پاہک

 ‘کُن’
ای چمچہ ءِ ارفیوہ، سوپ آن پُر کیوہ و باء آ دیوہ۔
پدان کنے سمکاری نا توار بریک و ای دوارہ چمچہ ءِ سوپ نا پیالہ ٹی تخیوہ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یاتی: رضا براہینی 1935 ئٹ ایران نا شار تبریز ئٹی ودی مس۔ او اسہ شاعر اس ہم ارے و نثر نوشتکار ہم۔ اونا کیہی ناول و افسانہ آتا مجموعہ غاک چھاپ مسنو۔ او تہران یونیورسٹی ٹی شعبہ انگریزی نا پروفیسر ہم ئس۔ او برطانیہ و امریکہ نا یونیورسٹی تیٹی ہم خوانفینے۔ او شاہ ایران نا وخت ئٹ و خمینی نا اسلامی حکومت نا وخت ہم قیذ کننگاسس۔ یلہ مننگ آن پد او کینیڈا غا ہنا ہراڑے اود اسہ وخس ئسے آن PEN CANADA نا مسکوہی صدر ہم مسونے _____ خالد سہیل