بلوچستان نا جتا علاقہ ڈیرہ بگٹی، ہرنائی، آواران و گوادر آن پاکستانی لشکر ہشت بندغ ءِ زوراکی ئٹ بیگواہ کرینے۔
بلوچستان نا ضلع ڈیرہ بگٹی نا علاقہ زین آن پاکستانی لشکر پنچ بندغ ءِ دزگیر کننگ آن گڈ بیگواہ کرے ہرافتیٹ او جی ڈی سی ایل نا اِرا کاریم کروک ہم اوار ءُ۔
بیگواہ کننگوک بندغ آتا چاہنداری علی گل ولد سیف دین بگٹی، نیاز ولد مسکان بگٹی، نصیر ولد ٹھارہ بگٹی، پیر بخش ولد جلال بگٹی و جورک ولد جان محمد بگٹی نا پن آن مسونے۔ پن کروک آک کل بگٹی قبیلہ نا شاخ چندرازائی آن تعلق تخیرہ و زین کوہ نا ہندی ءُ۔
اندن ہرنائی نا علاقہ میاں کور نا ہندی صوبدار ولد گلزار ٹینگانی ءِ پنچ دے مالو پاکستانی فورسز و ڈھکوک ادارہ آتا کارندہ آک دزگیر کریسہ بیگواہ کریر ۔
علاقائی ذرائع تا ردئٹ پاکستانی فورسز و سادہ پچ بینوک بندغ آک پن کروک بندغ ءِ ہرنائی بازار آن ہمو وخت دزگیر کریر ہرا وخت او سودا ہلنگ ئٹ اختہ ئس ۔
اندن پاکستانی فورسز کارندہ آک دریابی شار گْوادر آن اسہ بندغ ئسے دزگیر کریسہ بیگواہ کریر ۔
بیگواہ کننگوک بندغ نا چاہنداری کمالان ولد گل محمد نا پن آن مسونے ہرا دشت کنچتی نا ہندی ئسے ۔
ذرائع نا پاننگ ئس کہ پن کروک بندغ ءِ پاکستانی فورسز کارندہ آک ستمبر آ دزگیر کریر ، ہراڑان گڈ او پاش متو ۔
ایلو پارہ غا بلوچستان نا ضلع آواران تیرتیج آن پاکستانی فورسز آک اسہ بندغ ئسے بیگواہ کریر ۔
شابیتی حوال تا ردئٹ تدوکا دے پاکستانی فورسز رسول بخش ولد موسیٰ ہند وہلی پنی بندغ ئسے ہمو وخت دزگیر کریسہ زوراکی ئٹ بیگواہی نا گواچی کریر ہراتم او تینا ملک آتیٹ کاریم کننگ ئس ۔
ذرائع نا پاننگ ئس کہ پن کروک خاہوت ءِ پاکستانی فورسز وہلی ندی ٹی 2015 ٹی اسہ آپریشن و بمباری نا وخت اوکان ہمپ و لڈ کرفیسر اندن ہمو آپریشن ٹی درزن آ نیاڑی چنا و پیرنگاک مرگ ئنا گواچی مسوسر ۔ درزن آ بندغ آتے دزگیر کریسہ زوراکی ئٹ بیگواہ کننگاسس ہرافتیٹ منہ بندغ جتاء وخت آتیٹ آجو کننگار و منہ بندغ دائسکان بیگواہ ءُ۔