اسہ ایم فل سند تخوکو زالبول اس جند ندر جوڑ مرے گڑا سَوب اس تو ارے – پاکستان نا مسکوہی وزیراعظم

اسہ زالبول اس ہراڑتون ایم فل نا سند مرے، برامی مرے و چنا تا لمہ مرے، اونا ارغ نا جوانو روزگار اس مرے و دا زالبول تینٹ ہم جوانو تنخواہ ہلوک اس مرے، دا زالبول نا لمہ باوہ تعلیمی ادارہ تیٹی مریر و جند تہ جند ندر جلہوکار اس مریک تو اسہ ہندنو سوب اس الم ارے، نظام نا تہٹی خرابی اس ارے۔

دا خیال آتا درشانی ءِ پاکستان نا مسکوہی وزیر اعظم شاہد خاقان عباسی ‘بلیک ہول’ نا مجلس ئسے نا وخت آ کرے۔

مسکوہی وزیراعظم بلوچ جند ندر شاری بلوچ نا حوالہ تریسہ پارے کہ اونا جند ندر بمبار اس جوڑ مننگ نظام ٹی بدحالی نا سوب آن مسنے۔

خاقان عباسی مستی پارے کہ نن دا ہیت آن نمن ان، نن نمن ان کہ دا ویل اس ارے یا اف، کنا خیال ئٹی دا بھاز بھلو ویل ئسے۔ دا ویل ءِ ایسر کروئی تمک۔ دا ویل ئنا بنیات ہیت آک تینا جاگہ ولے فارم 47 پاکستان ئٹی ہژدہ غان بسنے ولے بلوچستان ئٹی 88 آن مریسہ ءِ۔

او پارے کہ ہراتم نی اسہ راج ئسے اونا موکشی نا حق آن پدماندہ کیسہ، اوفتا سَلاہ تے شرف تفیسہ گڑا او نے ہم شرف تفسہ۔ نن پٹیسہ کرون کہ دیر انت کرے، نن داڑے امر سر مسن، دانا ڈاکومینٹیشن ءِ کین، کل گڑا تا زمہ وار نن ان۔

یات سلے کہ بلوچ لبریشن آرمی نا مجید برگیڈ تون تفوک اولیکو بلوچ جند ندر زالبول شاری بلوچ 2022 ئٹی کراچی ٹی کنفیوشس انسٹی ٹیوٹ نا چینی کارندہ تے اسہ جند ندر تراک ئسے نا وسیلہ ئٹ ٹک کریسس۔ شاری بلوچ آن پد سمعیہ قلندرانی تربت ئٹ و ماہل بلوچ بیلہ ٹی جند ندر جلہو کریر۔

برجاء سال بی ایل اے نا ارٹمیکو آپریشن ہیروف نا وخت زالبول جند ندر آک و ایلو یونٹ آتیٹی بھلو کچ اسیٹی کوئٹہ، گوادر، نوشکے، پسنی، و ایلو علاقہ تیٹ بشخ ہلکر۔

بلوچ لبریشن آرمی نا زالبول کمانڈر شہناز بلوچ ہم مون آ بسنے ۔ بی ایل اے نا آفیشل میڈیا ہکل آ شینک مروک آ ویڈیو ٹی خننگا کہ شہناز بلوچ عرف سدو کیہی زالبول جنگول آتیتون اوار ئسک، او بلوچ راج ءِ تحریک نا بشخ مننگ تون اوار پاکستانی لشکر ءِ تڑی تریسہ کلہو ایتک۔