فنکار حیدر علی بلوچ دیہاڑ اس جوڑ کرے۔ او یورپ ئٹی ہڈ ہلوک گٹ گیری (تھروٹ سنگنگ) نا دے آ جہانی دیوان نا وخت آ بلوچستان نا متکن و تینا مٹ تینٹ انگا فن نڑسر نا گوڑیفوک درشانی ءِ کرے۔ تینا دا اولیکو یورپی پیری نا وخت آ حیدر علی بلوچ منگولیا نا جہان ئٹ پنی آ تھروٹ سنگرز آتیتون اوار اسہ بے مٹ و دیہاڑی ءُ گڑئسے نا درشانی ءِ کرے۔
دا درشانی ٹی بلوچی نڑسر و منگولین شئیر پاروک آتا کرن آتا متکن انگا ڈول آتے اسہ جاہ کننگا ہرادے جہانی پڑ آ بنوک آک دوست تخیسہ بے کچ دوست تخار۔
محکمہ ثقافت بلوچستان نا رد ئٹ دا درشانی نا بنداوی مسخت ڈمب ہلوک آ خلقی باگل آتے پدی زندہ کننگ، جہانی پڑ آ بلوچ ثقافت نا درشانی و ہندی شئیر پاروک استاد آتے جہانی تلہ غئے بننگ نا وارخواہی تننگ ءِ۔ بلوچستان نا دا گچین آ فن گٹ ئنا پر و دمہ نا خاص وڑ ئنا ہڷ تور نا وسیلہ ئٹ خاص وڑ ئنا اوار سوار توار ودی کننگ کن تیوہ غا جہان ئٹ چاہنگک۔
یات سلے کہ بنماسی وڑ ئٹ نڑ سر ارا لوز آتیان جوڑ مریک نڑ ہنا مطلب بانسری و سُر ئنا معنہ شئیر۔ دا بلوچستان نا دود آتا اسہ متکن ءُ بشخ ئسے ہرا تدوکا ۳۰۰ سال آن پاننگسہ بننگے۔ نڑ سر ئٹ نئے بیرہ بلوچ مزاحمتی کسہ غاک ڈھکوک ءُ بلکن رسم دود و مہر میبت آتا داستان آتیان ہم پُر ءُ توار ئسے۔ داٹی بانسری خلوک ءِ ناڑی و شئیر پاروک ءِ سُری پارہ۔ دا بلوچ تہذیب نا اسہ متکنو بشخ ئسے دا خلقی باگل نا وسیلہ ئٹ بلوچ آک تینا ثقافت، تہذیب، و دیہاڑ نا رکھ ءِ کیرہ ہراٹی شاعر ، ناڑی و سری نا بھاز بھلو کرڈ ئسے۔
بلوچستان نا علاقہ کوہلو، ڈیرہ بگٹی، بارکھان، موسیٰ خیل و انتظامی رد ئٹ پنجاب نا علاقہ تونسہ، فورٹ منرو، کوہ سلیمان، کھرڑ بزدار ئٹی نڑ سڑ خلنگ نا رواج اسل گیشتر ءِ۔ ولے ہندی مخلوق نا رد ئٹ مالؤ نا نسبت داسا نڑسڑ خلنگ ئٹی بھلو کمبوتی اس بسونے ہرانا سوب چاہندار آتا رد ئٹ بلوچ ءِ انتظامی ردئٹ بشخ و چانٹ کننگ ءِ کہ ہرا سیم سری مخلوق ءِ اوفتا رسم و دود آتیان کشکانے۔ واہم جاگہ جاگہ دائسکان نڑسر خلنگ و سانگ برام و چنا تا ششہ و ایلو شادکامی تیا نڑسر نا دیوان آک ہڈ تننگرہ۔