سلہہ بند ڈیتھ اسکواڈ آتا کارندہ غاک اودے اونا اُرا نا خڑک آ سم کاری کرسا خلکر۔
بلوچستان نا ضلع نوشکے آن حوال تا ردئٹ نوشکے کلی مینگل نا ہند ئٹ حکومتی مخ تف سلہہ بند ٹولی ”ڈیتھ اسکواڈ“ آتا سم کاری نا سوب آن براہوئی بولی نا پنی آ شاعر، نوشتکار و دانشور پروفیسر غمخوار حیات بیران مس۔
غمخوار حیات براہوئی افسانہ نگار، مٹ کار، شاعر و انشائیہ نگار اس ئس ہرا جتا ادب نا صنف آتیٹ خذمت سر تسوسس و بیست کتاب نوشتہ کرینے، او راسکوہ ادبی دیوان و اوتان کلچر اکیڈمی نا جوڑ کروک آ بندغ آتیان ئس۔
گورنمنٹ بوائز ڈگری کالج نوشکے ٹی اسسٹنٹ پروفیسر نا دروشم ئٹ فرض سر تروکا محمد خان عرف غمخوار حیات اینو تینا اُرا نا خڑک آ کلی مینگل ئٹ پاکستانی مخ تف ڈیتھ اسکواڈ آتا سم کاری آن بیران مس۔
غمخوار حیات نا خون آ جتا سیاسی، چاگڑدی، نوشتکار، شاعر و غمخوار حیات نا خوانوک آک بھاز غم و افسوز نا درشانی کننگ ءُ۔
اوفتا پاننگ ءِ کہ غمخوار حیات نا شہادت آن نہ بیرہ براہوئی ادب بلکہ علم و دانش نا کڑدہ غاتے ہم بھاز نسخان رسینگانے۔
اندا ردئٹ بلوچ اسٹوڈنٹس ایکشن کمیٹی تینا اسہ بیان اسیٹی پارینے کہ بلوچستان ئٹ استاد، شاعر، سیاسی جہدکار، نوشتکار، خوانندہ، و صحافی تیتون اوار جتا فکر ئنا پرامن بندغ آک ہرا قلم و کتاب نا وسیلہ ئٹ علم تالان کننگ نا کوشست ئٹی مسنو، ساندہ ظلم ئنا گواچی مرسا کرینو۔
بیان ئٹ پین پاننگا کہ بلوچ چاگڑد اسہ اندنو وخت ئسے آن گدرینگنگ ءِ ہراڑے پرامن و قلم نا بولی ءِ ہم سگنگپک، ننا ہر ہمو بندغ ہرا سوچ خلیک و چاگڑد نا جوانی کن جہد کیک اودے خُلیفنگک و تڑی تننگک یا پدا بے دڑدی ئٹ کسفسا اونا توار ءِ چپ کرفنگک۔ ولے ہمو طاغت آک تپسہ کہ علم و سوچ اسہ توفک ئسے نا سم آن ایسر مفک بلکہ گشیتر سوگو و طاغتور مرسا کیک۔
”پروفیسر غمخوار حیات براہوئی بولی نا اسہ استاد، ادیب و دانشور اس ئس ہرا تینا قلم نا وسیلہ ئٹ نہ بیرہ براہوئی ادب و بولی ءِ شونداری تننگ ئٹ جہد کرے بلکہ تینا چاگڑد ئٹ علم ءِ تالان کننگ کن کوشست کرے ہرا اسہ گواچن ءُ استاد ئسے نا آدینک ءِ۔ اودے سوچ خلنگ، نوشتہ کننگ، خوانفنگ، لمئی بولی ءِ شونداری تننگ و خوانندہ غاتے علمی کسر آ شاغنگ نا سزا تننگا ہرا سوچ خلنگ و علم دوئی کننگ آ رکھ خلنگ نا بے سہب ءُ کوشست ئسے۔ اونا براہوئی ادب ئٹ کاریم اسہ مسیحا ئسے آنبار ءِ ہرا لمئی بولی ءِ شونداری تننگ ئٹ تینا راجی کڑد ءِ سر تس۔ اسہ پرامن و علم دوست استاد ئسے نا دا وڑ بے دڑدی ئٹ خون بلوچستان نا تیوہ علمی سرکل آ اسہ جلہو ئسے۔“
بلوچستان نا استاد و دانشور آک ساندہ جلہو تا پلویڑ ئٹ برسا کرینو ہراڑے حکومتی مخ تف ٹولیک بلوچ آتا کیہی استاد آتے بے دڑدی ئٹ کسفسا اوفتا سوچ و توار ءِ شیف شاغنگ نا بے سہب ءُ کوشست کرینو۔ استاد صباء دشتیاری آن ہلیس غمخوار حیات اسکان ہمو علمی کاروان ءِ ہرادے علم نا ڈیوا روشن کننگ نا سزا تننگا، پروفیسر صباء نا سریاب ئٹ و غمخوار حیات نا نوشکے ٹی شہادت بلوچ راج نا فکری سوچ آ جلہو ءُ۔ دا علم ئنا ہمو مسافر آک ئسر ہرافک چپی نا جاگہ غا نوشتہ کننگ، سوچ خلنگ و علم تالان کننگ ءِ اہمیت تسر، اینو اوفتان بار انگا علم دوست استاد آتا سوب آن بلوچستان ئٹ علم نا ڈیوا روشن ءِ۔ اوفتان بار انگا استاد آتے ٹک کننگ نہ بیرہ بھلو ڈوہدار ءُ عمل ئسے بلکہ بندغی سوچ ءِ کسفنگ نا برابر ءِ۔“
ترجمان پارے کہ نن پروفیسر غمخوار حیات نا بے دڑدی ئٹ خون ءِ نہ بیرہ شیف خلینہ بلکہ غٹ استاد آتیان خواست کینہ کہ دن انگا بھلا ڈوہدار آ عمل نا برخلاف بش مریر و جوانو ردعمل اس شان ایتر تاکہ علم آ رکھ خلنگ نا دا ڈوہدار آ کوشست آک بے سہب مریر۔ و ذمہ وار آ ادارہ غاتیان خواست کینہ کہ دا ڈوہدار آتے سزا تننگ ئٹ تینا کڑد ءِ سر ایتر۔
اندن بلوچ اسٹوڈنٹس آرگنائزیشن پروفیسر غمخوار حیات نا خون آ ردعمل بیان اس ترسا پارے کہ براہوئی بولی نا پنی آ شاعر، استاد غمخوار حیات نا نوشکے ٹی سلہہ بند بندغ آتا سم کاری آن شہادت بلوچستان نا علمی، ادبی و فکری وجود آ اسہ پین بھلو ٹپ ئسے۔ دن انگا قلم نا خواجہ غاک ہرا تینا لوز آتا وسیلہ ئٹ بندغی ڈکھ، راجی مارشت و چاگڑدی دڑد ءِ زبان ایترہ، اوفتا چپی بیرہ اسہ بندغ ئسے نا نسخان مفک بلکہ تیوہ غا فکری منظرنامہ نا ماتن مریک۔
ترجمان پارے کہ شہید شاعر ہمو حساس و شعور تخوکا توار آتیٹ اوار ئس ہرافک براہوئی بولی، بلوچ تہذیب و بندغی مارشت آتے تینا قلم نا وسیلہ ئٹ معنہ تسر، اونا شاعری بیرہ لوز آتا شون الو بلکہ پدماندئی، امیت، مزاحمت و زند ئنا ڈکھ آتا فکری درشانی ئس۔ او اسہ استاد ئسے نا دروشم ئٹ ورنا غا زنک ءِ بیرہ تعلیم تتو بلکہ شعور، سوج و چاگڑدی ہمگرنچی نا مارشت ہم تس۔
بیان ئٹ پاننگا کہ بلوچستان وختی آن تعلیمی نیستی، فکری جمود و بے رکھوک کون آ ویل آتا گواچی ءِ، دن انگا وخت ئٹ ادیب، شاعر و علمی بندغ آتا خون اسہ بھیم بش کروکو حالیت ئسے نا شاہدی ایتک۔ ہمو چاگڑد آک ہراڑے کتاب، قلم و فکر ئتون تفوک بندغ آک رکھوک مفس ہموڑے اشتماعی شعور مدان مدان آ زوال نا گواچی مریک، علم نا خواجہ غاک چاگڑد نا ہمو ڈیواک مریرہ ہرا تارمہ غا وخت آتیٹ ہم امیت، ہیت و گپ و فکری باسنی ءِ زندہ تخرہ۔ بی ایس او نا بنجاہی ترجمان خواست کرے کہ تدینی نا صاف پٹ و پول کرسا ذمہ وار آ بندغ آتے قانود نا مونا ہتنگہ و بلوچستان ئٹ علمی، ادبی و خوانفوکا بندغ آتا رکھ اکن سوبر ءُ گامگیج کننگہ۔