غمخوار نا سیخا
نوشت: زائم بلوچ
دی بلوچستان پوسٹ
ای وختس تینا تہارا کوٹی ئٹ تموک تینا زند ئنا ہمو دے تے یات کیوا کہ ہرادے تیٹی ای بالی آ چُک آنبار آسمان اسکان بال کریٹہ و بسوٹہ ۔ کنا اُست آ ہمو ساعت آک بریرا کہ ہرا وخت ای تینا فکری آ سنگت آتون مزاحمت نا ترند آ کوکار ئٹ اوار ئسوٹ ۔ کنا ملی ٹی یکدم ہمو ندارہ غاک جوڑ مریرا کہ ہرا ندارہ غاک شال ئنا سڑک آتئے خاخری آ آہڑ و گوریچی آ یخ آتیٹ گدرینگاسر ۔ ای ہمو دے تے یات کرسہ پدا زند ئنا چس ءِ ہلیسہ اندن خیالی ءُ جہان ئسے ٹی کاوہ کہ ہرا جہان ئٹ بیرہ کنا ہمو یاداشت آکو کہ ہرافک مزاحمتی تلہ غا کنا سنگت، دوست خواہ و استاد آتون اوار گدرینگاسُر ولے دا کیفیت ئٹ ای گیشتر مننگ کپرا، کنے یکدم تہارا کوٹی نا مہونی تینا نیمہ غا چِکک و ولدا غلامی نا ہمو احساس کنا استٹ برسہ کنے دا خیالی آ جہان آن پیشن کیک۔ ای زوت ئس دا جہان آن پیشن مریوا و پدا ہمو تہارا کوٹی کنا کُل جہان جوڑ مریک کہ ہرا کوٹی کنے کنا مزاحمت کننگ نا خطا ئٹ رسینگانے ۔ ای دا کوٹی نا تہٹی زند کپرہ بلکہ بیرہ زند ئنا دے تے گدریفیوا ۔
دا کُل غلامی نا ہمو زنگ آکو کہ ہرافک کنے دا تہارا کوٹی نا گواچی کرینو۔ ننا چاگڑد ہم اندا غلامی نا زنجیر ئٹ تفوکے کہ ہرانہ تہٹی ہر ہمو بندغ کہ ہرا کاٹم ءِ بڑزا کیک گُڑا او مرگ ئنا گواچی کننگک۔ ننا دا پر خون آ چاگڑد ئٹ جوانو حوال ایہن اف کہ ہرافتے مون آ تچسہ نن تینا ضمیرے مطمئن کین، دا چاگڑد ئٹ ہڑدے ڈیھ نا باتی تہ بیگواہی، خلینگ و کسفنگ نا حوال آتا گمان ننا ملی ٹی جوڑے۔ ننا ہر شام اندا گڑتی ئٹ اودیم مریک کہ نوائے دا نہاراک ننے بیگواہ کرسہ زندان تہ گواچی کپس۔ دا گڑاتی ٹی تُنگان ہننگ آن پد چواختس نن سُہب ئنا تینے بیرم آ ولدا نہ خننہ تو ننا اُستان شُکر ئنا وِرد اس پیشن مریک ۔
تہارا کوٹی ئٹ خرینہ زند ئنا اسہ پین شام ئس گڑتی ئٹ اودیم مسوسُس۔ ای تینا بیرم آ ساڑی شُکر کشیسہ ئسوٹ۔ ای ہڑدے آنبار موبائل ءِ ارفیسہ رسانکدار ئنا حوال آتے ہلنگ کن گروپ ئسے آ ہناٹ تو کُل آن اولی حوال پروفیسر غمخوار حیات صاحب نا ئس کہ ہراٹی لکھوک ئس ” بدبخت آ نوشکے نا ہند اسیٹ براہوئی ادب نا غمخوار و بامڑد خواجہ غمخوار حیات ءِ ریاستی ڈیتھ اسکواڈ نا بندغاک سُم خلیسہ ننے آن آخوبتی جتا کرینو ” ۔ رسانکدار ئٹ دا حوال ءِ خننگ ان گُڈ کنا جون ہبّکہ مس و کنا ملی یچ تفے ۔ ای ہچ دا حوال ءِ جذب کننگ الوٹہ ۔ دا حوال ءِ بِننگ تون کنا کیفیت چَٹ بدل مس، ای ولدا ہمو خیالی آ جہانٹ تینے ریفنگ کن ہناٹ۔ کنے اندن لگاکہ کہ ای بلکہ تُغ ٹی اُٹ و تینا جون ئنا دمدری نا سوب آن دنو تُغ خنسہ اُٹ ۔ ای تینے تینٹ آسرہ ترسہ ریفیسہ ئسوٹ، کنا گمان ئٹ اندا خیال بریسہ ئس کہ ہرا بندغ نا ذکر گیشتر نا دوی آ مرے گڑا ہمو بندغ نا تُغ تیٹ گیشتر بریک ۔ ای ہم اِستو نا شام غمخوار ئنا کتاب “زندان ” ءِ خوانیسہ تنگان ہناست بلکہ اندا سوب ان ای غمخوار نا بابت دنو تُغ خننگُٹ ۔
ولے دا کُل گمان آک کنا ہمو خیالی آ جہان ئنا ئسر کہ ہرافتیٹی راستی الئو بلکہ راستی اندا ئس کہ ہرا کنے رسانکدار ئنا حوال آتیٹ خننگ ئٹ برسہ ئس ۔ آؤ راستی اندا ئس کہ ادب نا غمخوار ننے آن آخوبتی جتا مسوسس۔ دا حوال ءِ جذب کننگ آن گُڈ کنا کیفیت چٹ پین ئس ۔ ای ولدا ہمو تہارا کوٹی نا تہٹی تموک بے جارات ئسوٹ ۔ نہ کنتو لوز آک بسورا کہ ای گڑاس نوشت کننگ کروسُٹ، نہ کنا خڑینک آک بسورہ کہ ای تینا تہہ نا لارہ ءِ کشوسُٹ، و نئے کہ ای دُن آزاد ئسوٹ کہ ای اصل قاتل آتیک گڑاس لکھنگ و شینک کننگ کروسٹ ۔
ای پدا ہمو تہارا کوٹی ئٹ تینتو تینٹ ہم کلام مسوٹ ۔ ای تینے آن تینٹ سوج کریٹہ و تینا سوج آتا تینٹ ورندی ءِ تسوٹہ ۔ کنا حالیت ولدا ہمو ئس ، ای ولدا ہمو ساعت آتے یات کرسہ ئسوٹ کہ ہرا ساعت آک کنا و غمخوار ئنا اواری ئٹ گدرینگاسُر۔ کنا اُست آ ہمو دیوان آک برسہ ئسر کہ ہرا تیٹ ای و کنا سنگتاک غمخوار ئنا نوشت ” راہشون امر مرے ” آ اسٹیڈی سرکل ہڈ تسوسُن و غمخوار ننا دیوان ئٹ مہمان ئس ۔ کنا ملی ئٹ ہمو مجلس نا عکس اک جوڑ ئسر کہ ہرا مجلس ئٹ غمخوار شال ئنا ہند ئٹ ننکن استاد صباء دشتیاری نا ادبی و سنگت ذاکر مجید ئنا سیاسی آ جدوجہد ئنا بابت گپ و تران کریکہ ۔ کالج نا ہمو چمنی کہ ہراٹی نن گڑاس سنگت دیوان کرینہ ہراٹی بشخ الوکو پین اسہ ہم استاد اس الئو بیرہ غمخوار ئس ہرا ننے سیاسی عمل ءِ برجاہ تخنگ کن ہمت تسکہ ۔ نن وختس خلیس ئنا گواچی مروسن و تینا کاریم تیان چَپ تموسن گڑا غمخوار ئس کہ ہرا ننے ولدا ہمت تسکہ ، ننے ولدا کسر تے رماغاکہ و ننا جوزہ غاتے زبان تسکہ ۔ ای اندا خیال آتیٹ گم ہمو یاداشت آتے یات کرسہ ئسوٹ کہ ہرافتیٹ غمخوار نا کمک ننتون اوار ئس ۔ ای اندا کیفیت ئٹ ئسوٹ کہ کنا موبائل آ میسج اس بس ۔ ای اتفاقاً اِستو نا شام تینا سنگت ئسے کن غمخوار ئنا غزل ئس رائی کریسُٹ ۔ اونا ورندی ءِ ترسہ اینو سہب ئنا غمخوار نا مرگ آن گڈ ہمو سنگت لکھاسس کہ غمخوار ہنا ننے آن ۔ ای دا میسج ءِ خنسہ تینا است ئنا لارہ تے کشینگ کن و سنگت تون تینا است ئنا ارمان تے بناء کریٹ و تینا جون ءِ سُبک کننگ کن گڑاس خڑینک خلکُٹ ولے او سنگت کنا ارمان تے خنسہ کنے تسلی تننگ کن پئے ” زندگی اندن ءِ پھل ” ۔ کنے سنگت نا دا ہیت ہچبر دوست بتئو ای یکدم اودے ورندی تریسہ پاریٹ کہ دا زندگی اف ، بلکہ دا غلامی ءِ کہ ننے آن دُنو دُر پُلسہ درسہ ءِ ۔ دا ہمو زوراک ءِ کہ ہرا ننے آن ننا بامڑد آتے پُلسہ ءِ ۔۔ او سنگت ہچو ورندی ئس تتّو ۔۔ ای ساعت ئس ودار کننگ آن گُڈ ولدا ہمو تہارا کوٹی ئٹ تینا خیالی آ جہانٹ نَت تخاٹ ۔۔
کنا گمان ئٹ پدا ہمو یات آک، ہمو ساعت آک برسہ ءُ کہ ہرافتیٹ ننکونہ نابود آتے کسر شان ترسہ غمخوار مستی دریکہ ۔ نن تینا سیاسی گَل آتیٹ براہوئی بولی و ادب نا بابت بھازا کاریم آتا ذمہ واری ءِ ارفینہ ننا اُست جم ئس کہ ننتو کمک اکن غمخوار ارے ، ہرانہ سیخا ٹی مدام نن تینا کاریم آتے سرجم کرینہ ، ولے اینو ہمو سیخا ءِ ننا زی آن دا زوراک آک ایسر کریر و ننے پدا غلامی نا شغانے خلکر ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔