سوراب گدر گوندان ئٹی ۱۲ اگست آ پاکستانی جیٹ تا بمباری ٹی نیاڑی تیتون اوار ۲۰ آن بڑزا بندغ کسکرو ۱۶ ٹپی مسر۔ ٹپی و کہوک آ بندغ آتے پولیس و یندی مخلوق ڈی ایچ کیو ہسپتال سوراب آسر کریر ہراڑے اوفتے جانجوڑی کن کمک تننگ ئٹی ءُ۔
وسیلہ تا رد ئٹ کہیوک آتیٹی نیاڑی چنا و نرینہ غاک اوار ءُ۔ کہوک آتا چاہنداری رسول بشخ نا زائیفہ راج بی بی، نور خان نا زائیفہ صفیہ، جلال نا ۲ سال نا مار جلال، خداداد نا مار شبیر احمد، رسول بخش نا مار نور جان و رسول بخش نا مار کریم داد نا پن تیٹ مسونے۔
ٹپی آ تیٹی ۹ نرینہ و۲ نیاڑی و ہفت چنکو چنا مار و مسڑ اوار ءُ۔ ٹپی آ چنا تیٹی اسہ سال نا عاصم، مسہ سال نا رجیبہ، پنچ سال نا سادیہ، ہفت سال نا فاطمہ، ارا سال نا ضیاالرحمن ، اسہ سال نا امیر جان و چار سال نا حسینہ اوار ءُ۔
ہندی مخلوق نا پارہ غان کہوک آتا کچ داکان ہم گیشتر مننگ نا دعویٰ ہم کننگانے، تدینی آن سیکیورٹی سروک آتا پارہ غان دائسکان ہچ وڑ ئنا خاص ءُ گڑاس مون آ بتنے۔
تدینی آن پد کہوک آتا خاہوت آک و ہندی مخلوق جون تے سوراب بھلا چوک این ۲۵ آ ٹخیسہ کوئٹہ کراچی بنجاہی کسر آ تخیسہ برانز نا بنا کریر۔کسر نا زی آ ٹریفک نا ہن و بر زیمی مس و ہڑتوما پارہ غان لاری تا مرغنو رد آ لگار۔ برانز کروک آ خواست آتا امنائی اسکان برانز ءِ برجا تخنگ نا اعلان کریر۔
تدینی آ بلوچ یکجہتی کمیٹی سخت رد عمل نا درشانی کریسہ شاری آباتی و خاص کر نیاڑی و چنا تا کہنگ آ است ہسونی نا درشانی کرے و زموار آتا گٹ ئٹ ہلنگ نا خواست ہم کرے۔
ایلو پارہ غان بلوچستان نیشنل پارٹی نا سروک سردار اختر مینگل تدینی نا زی آ رد عمل تریسہ سوج کرے کہ انت چناک ہم شدت پسند خننگرہ؟ او پارے کہ دا معصوم ءُ چنا ءُ، دافتا انت ڈوءِ۔ انت چنا تے خلنگ آن وخت اس ایمنی بننگ کیک؟
سردار اختر مینگل مستی پارے کہ انت دا فلسطین ءِ؟ انت دا کشمیر ءِ؟ آخا دا بلوچستان ءِ۔
سوشل میڈیا نا تلہ ایکس آ تینا ردعمل ئٹی ساجد ترین اوڈوکیٹ ہم سوراب ئٹی بالی گراب آتا جلہو آتیٹی نیاڑی و چنا تیتون اوار ۲۷ بندغ نا کہنگ نا دعویٰ ءِ افسوز و شکی گری اس پاریسہ زیمی مروک آ خاہوت آتیتون اواری نا درشانی ءِ کرے۔