اسرائیل آ حماس نا بے گمان جلہوک و اوفتیان پد غزہ ٹی بناء مروک جنگ ءِ اینو اسہ سال اس مس۔

اینو جنگ ئنا اسہ سال اس پورو مننگ نا دے اسرائیلی لشکر غزہ نا نیام ئٹ حماس نا جنگجو تے ٹک کننگ کن جنگی طیارہ تیٹ بمباری کرینے۔

غزہ نا بست و بند ءِ توروک سلہہ بند تنظیم نا حماس اسہ سال اس مالو اسرائیل نا جاندمی علاقہ تیا کروک جلہو تیان پد اسرائیلی فورسز و حزب اللہ نا نیام ئٹ ہم جنگ بناء مسوسس۔ دا جنگ ئٹ داسہ ترندی بریسہ ءِ ہراڑان پد خُلیس پاش کننگک کہ دا جنگ تیوہ خطہ ئٹ تالان مننگ کیک۔

اسرائیلی لشکر اسہ بیان اسیٹ پارینے کہ اونا جنگی طیارہ غاک لبنان ئٹ حزب اللہ نا ہند آتے ہم ٹک کرینو۔

اسرائیل نا لشکر جاندمی لبنان تون اوار بنجاہی شار بیروت ئٹ ہم کارروائی کرینے۔

ایلو پارہ غان لبنان نا سلہہ بند تنظیم حزب اللہ اسرائیل نا قطبی شار حیفا ءِ ٹک کرینے۔

اسرائیلی میڈیا نا ردئٹ حزب اللہ بھاز آ راکٹ آک حیفا شار نا جتا علاقہ تیٹ تمانو۔

رپورٹ آتا ردئٹ راکٹ جلہو آتیٹ کم آن کم 10 اسرائیلی شاری تا ٹپی مننگ نا حوال آک اریر۔

حزب اللہ دعویٰ کرینے کہ او جاندمی اسرائیل نا شار حیفا ئٹ اسہ فوجی اڈہ ئسے ٹک کرینے۔

ایلو پارہ غان اسرائیل آ جلہو و جنگ نا اسہ سال اس پورو مننگ آ اسرائیلی سر وزیر بینجمن نیتن یاہو درو لبنان نا سیم آ قطبی اسرائیل ئٹی فوجی کارندہ تیتون اوڑدہی کن دورہ کرے۔

دا وخت آ بینجمن نیتن یاہو نا دفتر آن شینک مروک بیان اسیٹ پاننگا کہ اسہ سال اس مالو اسرائیل ءِ اسہ بھیم بش کروک جھٹکہ اس لگا۔

اونا پاننگ ءِ کہ ہمو دے آن پد تدوکا 12 توہ ئٹ اسرائیل تیوہ غا نخشہ ءِ بدل کرینے۔

او گیشتر پارے کہ اسرائیلی لشکر تینا دژمن ءِ ہرا ٹپ آتے تننگ ءِ اوفتیا جہان گوڑینگانے۔ او اسرائیلی فوجی تے پارے کہ اوفک کَٹوکو نسل ئسے ءُ۔

داکان بیدس امریکہ نا صدر نا سرکاری جاہ و دفتر وائٹ ہاؤس آن شینک مروک بیان ئٹ پاننگانے کہ اسرائیل آ جلہو نا اسہ سال اس پورو مننگ آ مجلس ئٹ اوار مرون و دا وخت آ موم بتی ہم روشن کننگو۔

خیال ئٹ مرے کہ حماس ہفت اکتوبر 2023 آ اسرائیل نا جاندمی علاقہ تیا گمان کپروک دروشم ئٹ زمینی، آسمانی و دیری آ کسر تیٹ جلہو کریسس۔

اسرائیلی کوالخواہ تا ردئٹ دا جلہو تیٹ 1200 بندغ مرگ ئنا گواچی مسوسر اندن حماس کم و ود دو نیم سد بندغ ءِ بندی کریسس۔ اوفتیان نیمہ غان زیات ءِ نومبر 2023 ئٹ اسہ ہفتہ ئسے نا عارضی جنگ بندی نا معاہدہ نا ردئٹ یلہ کننگاسس۔

دائسکان ہم کم و ود 100 بندی حماس نا دزگیر ئٹی ءُ۔ اسرائیلی فورسز آتا خیال ءِ کہ حماس نا دزگیر ئٹ ساڑی بندی تیان اسہ تہائی اس کسکنے۔

ایلو پارہ غان ہفت اکتوبر 2023 آ اسرائیلی فورسز آک غزہ ءِ پلویڑ کریسر و اسرائیل نا حکومت حماس نا ایسری و بندی تا آجوئی اسکان جنگ ئنا لڑو کریسس۔

اسہ سال ئسے آن غزہ ٹی اسرائیل نا حماس نا برخلاف برجاء جنگ ئٹ دریابی پٹی نا محکمہ جانجوڑی نا کوالخواہ تا ردئٹ کم و ود 42 ہزار فلسطینی کسفنگانو اندن ٹپی آتا کچ 97 ہزار آن تدینگانے۔

حماس نا بست و بندی غزہ نا جانجوڑی وزیر نا پارہ غان شینک مروک کچ و حساب ئٹ دا پاننگتنے کہ کہوک آتیٹ اخس سلہہ بند اوار ئسر۔ غزہ نا جانجوڑی وزیر نا پاننگ ءِ کہ کہوک آتیٹ نیمہ آن زیات چنا و زالبول ءُ۔

یاتی مرے کہ جنگ آن مُست غزہ نا آباتی کم و ود 23 لکھ ئس ہرافتیان 80 درسد آن زیات بندغ بے اُرا مسنو و اوفتے ہمپ و لڈ کروئی تمانے۔

خیال ئٹ مرے کہ غزہ نا سلہہ بند تنظیم حماس و لبنان نا سلہہ بند تنظیم حزب اللہ ءِ امریکہ، برطانیہ، یورپی یونین تون اوار اوفتا بھاز آ سیوتی ڈیہک دہشت گرد تنظیم گوندرہ۔

استو نن ئنا 11 نا وخت آ کراچی ایئرپورٹ آن خڑک اسہ ترند تراک اس مس ہرانا توار شار ئنا جتا علاقہ تیٹ بِننگا، تراک ئٹ چینی شاری تا قافلہ ٹک کننگا ہرانا سوب کیہیک ٹپی و مرگ ئنا گواچی مسر اندن دائسکان مرگ ئنا گواچی مروک 3 چینی شاری تا چاہنداری مسنے۔

پن کروک جلہو نا ذمہ واری ءِ بلوچ لبریشن آرمی نا جند ندر کڑدہ مجید برگیڈ ارفے۔

پولیس حوالکار آک میڈیا ءِ پاریر کہ ’اسہ گاڑی اس ایئرپورٹ نا پیشن نا کسر آ ہمو گاڑی ءِ ڈک خلک ہراٹی پیشن ملکیک سوار ئسر۔‘

حوال تا ردئٹ تراک نا سوب جانی و مالی بھاز نسخان مسنے ہرافتیٹ دائسکان مرگ ئنا گواچی مروک 3 چینی شاری تا چاہنداری مسنے۔

پولیس نا ردئٹ مرگ ئنا گواچی مروک آتا چاہنداری لی جون، وہ چون زن و لی زہااو نا پن تیٹ مسنے۔

پاکستان ئٹ چینی سفارت خانہ و قونصلیٹ جنرل نا ویب سائٹ آ شینک مروک بیان اسیٹ جلہو نا مذمت کریسہ پاننگانے کہ شش اکتوبر آ نن ئنا 11 بجہ نا وخت آ پورٹ قاسم اتھارٹی الیکٹرک پاور کمپنی ( پرائیویٹ) لمیٹڈ آن چینی کارندہ غاتے ہتوک اسہ قافلہ ئسے آ جلہو کننگانے۔

چینی قونصل خانہ پارینے کہ اوفتا پارہ غان اسہ ہلہلئی ڈٹ بندی اس کننگانے و پاکستانی کوالخواہ تیان خواست کننگانے کہ او دا جلہو نا جوان پٹ و پول ءِ کیر و ڈوہ دار بندغ آتے سزا تننگ تون اوار اوار پاکستان ئٹ جتا ڈٹ آتیا کاریم کروک چینی شاری تا رکھ اکن گامگیج کیر۔

اندن جلہو نا ذمہ واری ءِ بلوچستان ئٹ متحرک آجوئی دوست سلہہ بند گل بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا جند ندر کڑدہ مجید برگیڈ کراچی ٹی جناح ایئرپورٹ آن پیشتموک چینی انجینئر و سرمایہ کار آتا اسہ بڑزکو تلہ نا قافلہ ئسے شورہ غان پُر گاڑی نا کمک ئٹ جند ندری جلہو ٹک کریسہ کیہی چینی و اوفتا رکھ اکن ساڑی فوجی کارندہ تے مرگ ئنا گواچی کرے۔

بی ایل اے نا ردئٹ چینی شاری تا قافلہ ءِ بی ایل اے مجید برگیڈ نا جند ندر سرمچار شاہ فہد عرف آفتاب ٹک کرینے۔ بی ایل اے نا ردئٹ شاہ فہد بارود آن پُر گاڑی ءِ قافلہ تون خلیسہ شہادت ءِ ارفے۔ استو جند ندر شاہ فہد نا اسہ عکس اس ہم ہکل میڈیا نا پارہ غان شینک کننگا۔

نوبل داد ہلوک کیہی بندغ تا سیالی امریکہ، برطانیہ و جرمنی آنے۔ اوفتا مونا بیرہ ہشت چینی، دوانزدہ انڈین و اِرا پاکستانی بندغ ءِ نوبل داد تننگانے۔

دیہاڑ ئٹ اولیکو وار نوبل داد 1901 ئٹ بشخ کننگاسر۔ ہمو وخت آن اینو دے ئسکان دا ٹیکی ئٹ کیہی بندغ آتے شرف تننگانے، ہرافتان کیہی تا سیالی امریکہ، برطانیہ و جرمنی آنے۔ دا ڈیہہ تیان سیالی تخوک نوبل داد ہلوکا بندغ تا تیوہ کچ 663 ءِ۔

دانا مونا اینو اسکان بیرہ ہشت چینی، دوانزدہ انڈین و اِرا پاکستانی بندغ ءِ نوبل داد تننگانے۔

داکان بیدس، بیستمی کرن نا بناء آن اینو دے اسکان نوبل داد کھٹوک آتیٹی اوار نیاڑی تا کچ 15 درسد آن ہم کم ءِ۔

اندا سوچ ءِ مونا تخیسہ ناقدین آتا امنا ءِ کہ نوبل داد تا بشخ کننگ جانبدارانہ سوچ و رویہ آتیان آزات اف، ہرانا سواد ءِ امریکہ و یورپ آن تعلق تخوکا بندغ و خاص وڑئٹ نرینہ آتے رسینگانے۔

دا باروٹ بھارت ٹی صحت عامہ نا پروفیسر راجب داس گپتا نا پاننگ ءِ کہ نوبل داد گیشتر ہمو بندغ آتے تننگک ہرا اودے کڑزرہ، “واہم دا (بشخ نا عمل) ٹی سیاست نا عمل دخل ہم مریک۔”

ڈی ڈبلیو تون گپ و تران نا وخت اونا پاننگ ئس، “بھارت تون اوار کیہی ڈیہہ تیٹ ساڑی ادارہ آتے خن تیان چپ کننگک۔ و یخینی وڑئٹ نوبل داد تا کمیٹیک داخس جامع افس ہخس کہ اوفتے مروئی ءِ ۔”

او ودیک پارے کہ بھارت و ایلو ڈیہہ تیٹ ساڑی ادارہ آتے نوبل داد نا رمب ئٹ امریکہ و یورپ تون مقابلہ کننگ کن گیشتر سوگو مننگ نا گرج ارے، و بیرہ اندا دروشم ئٹ دا ڈیہہ تیٹ لائخ بندغ تا ساڑی مننگ ءِ یقینی جوڑ کننگ مننگ کیک۔

نوبل ٹیکی و سائنس تون دوستی

نوبل داد نا بابت دا سوج ہم ارفنگک کہ آیا دا بندغ، خاص وڑئٹ نودربر آتے سائنس نا کنڈ آ ہتنگ ٹی گڑاس کڑدار مونا ہتیک۔

دا رِد ئٹ پروفیسر گپتا نشاندہی کیک کہ نوبل داد نا تننگ ءِ بھارت نا میڈیا بھاز شابیتی تون جاغہ ایتک۔ اونا پاننگے کہ دادے دوست تخنگ نا اسہ سوب بھارتی شاری، خاص وڑئٹ متوسط تپہ آن سیالی تخوک بندغ تا اسٹیم نوشت، یعنی سائنس، ٹیکنالوجی، انجینیئرنگ و پین حساب نا تعلیم نا کنڈا ودوکا رجحان ءِ ۔

داڑان بیدس بھارت ٹی نوبل داد نا حوالہ ئٹ معلومات خواننگجاہ (اسکول) نا نصاب ئٹ ہم اوار کننگانے۔

اندا وڑ اسہ برطانوی ہائی اسکول اسیٹی بائیولوجی نا استاد للی گرین ڈی ڈبلیو ءِ پارے کہ او تینا خوانندہ آتے نوبل داد نا دیہاڑ ہم خوانفک۔

اونا پاننگ ئس، “نن دادے سائنس نا بنداوی مفہوم ءِ سرپند کرفنگ کن کاریم ئٹ ہتینہ۔”

واہم او یقینی وڑئٹ دا پاننگ کپک کہ آیا نوبل داد نا دیہاڑ یونیورسٹی نا خوانندہ آتے ہم سائنسی خواننگ ءِ دوئی کننگ نا کنڈ آ دننگ ٹی کڑدار اس مونا ہتیک یا آخہ۔ دا خوانندہ آتا باروٹ اونا خیال ءِ کہ اوفتا دلچسپی بنیاتی وڑئٹ سائنس ٹی مریک نہ کہ نوبل داد اس کھٹنگ ٹی۔

تربت ئٹ سلہہ بند بندغ آک سم کاری کریسہ اسہ بندغ ئسے کسفیر ۔ سم کاری نا تدینی تربت نا علاقہ لال جان کالونی تربت ئٹ مس ۔

علاقائی ذرائع نا ردئٹ موٹر سائیکل آ سوار سلہہ بند بندغ آتا سم کاری آن کہوک بندغ نا چاہنداری ریاض ولد یار محمد سکنہ پنجگور نا پن آن مسونے ۔

ذرائع نا ردئٹ کسفنگوک او وخت زراعت کالونی ٹی ہندی ئس ۔

تربت پولیس تدینی نا پک ءِ ￵کریسہ پارینے کہ پولیس ڈوہدار نا پٹ و پول ئٹ ءِ۔ واہم تدینی نا سوب آک دسکان سما تمتنو۔

پاکستانی وزیر داخلہ پشتون تحفظ موومنٹ (پی ٹی ایم) آ رکھ خلنگ نا پڑو کرینے۔

وزیر داخلہ نا پارہ غان اینو شینک مروک نوٹیفکیشن ئٹ پاننگانے کہ ’پک شاہدی تا روشنائی ٹی پشتون تحفظ موومنٹ آ رکھ خلنگ نا فیصلہ کننگانے۔‘

وزیر داخلہ نا پارہ غان شینک مروک نوٹیفکیشن ئٹ پاننگانے کہ ’پی ٹی ایم ملک دژمن بیانیہ و انارکی تالان کننگ ئٹ اوار ءِ‘

وزیر داخلہ پی ٹی ایم آ رکھ ئنا نوٹیفکیشن باقاعدہ شینک کرینے ہراڑان پد اوڑا عملدرآمد کننگو۔

واہم پی ٹی ایم نا پاننگ ءِ کہ اونا کور کمیٹی نا مجلس برجاء ءِ ہراڑان پد دا معاملہ غا باقاعدہ بیان شینک کننگو۔

اِرا دے مالو چار اکتوبر آ پشاور ہائی کورٹ پی ٹی ایم نا پارہ غان ضلع خیبر ئٹ پک مروک ’راجی جرگہ‘ نا بابت پاریسس کہ ’جرگہ ءِ اِلیبو مرے اوکان پد ہرینہ کہ دا انت کیرہ۔‘

’راجی جرگہ‘ نا برخلاف دائر خواست ئنا پیشی جمعہ غا پشاور ہائی کورٹ نا جسٹس سید ارشد علی و جسٹس وقار احمد آ تالان اِرا باسکی بینچ کریسس۔

پی ٹی ایم نا ’راجی جرگہ‘ نا برخلاف ضلع خیبر نا ہندی خاطراللہ پشاور ہائی کورٹ ئٹ خواست دائر کرینے ہراٹی جرگہ ءِ توننگ نا خواست کننگانے۔

خواست گار نا ہیت ئس کہ پاکستان جوڑ مننگ آن پد ڈیہہ ئٹ عدالت آک ساڑی ءُ و ضلع تیٹ ہم عدالت آک ٹہفنگانو۔

’پی ٹی ایم نسل پرستی ءِ تالان کریسہ ضلع خیبر ئٹ ’پشتون نیشنل کورٹ‘ نا پن ئٹ متوازی عدالت اس ٹہفنگ خوائک ہرانا دعوت نامہ غاک ہم شینک کننگانو۔‘

خواست گار نا پاننگ ئس کہ ’جرگہ و پنچایت آتا فیصلہ بے بندغی سزا تیا مریک اندا خاطر عدالت پی ٹی ایم نا 11 اکتوبر نا جرگہ ءِ تورے۔‘

داڑان مالو یکم اکتوبر آ پی ٹی ایم نا پاننگ ئس کہ سئے شمبے نا نن پشاور پولیس ضلع خیبر نا علاقہ جمرود ئٹ ’پشتون راجی جرگہ‘ نا جلسہ جاہ غا چھاپہ خلک اندن پدان پولیس و پی ٹی ایم نا باسک آتا نیام ئٹ جھڑپ آک ہم مسر۔

پی ٹی ایم نا سروک منظور پشتین تینا شینک کروک اسہ بیان اسیٹی دعویٰ کریسس کہ پشاور پولیس نا چھاپہ نا وخت آ سم کاری و شیلنگ ہم کننگانے ہراڑان کیہی باسک آک ٹپی مسنو اندن خیمہ غاک ہم کشنگانو۔

منظور پشتین نا بیان ئٹ پاننگا کہ اوکان پد جرگہ نا بست و بند کروک آک خیمہ تے دوارہ خلکوسر ہرافتیا پدان پولیس گمانی شیلنگ و سم کاری کرے، ہرانا ویڈیو آک ہم سوشل میڈیا غا ئسر۔

پی ٹی ایم 11 اکتوبر آ ضلع خیبر ئٹ تیوہ صوبہ ٹی برجاء بد امنی نا برخلاف ’پشتون راجی جرگہ/عدالت‘ نا پن ئٹ اسہ جرگہ اس اڈ تننگ نا ڈٹ بندی کریسس۔

دا جرگہ کن خیبر پختونخوا و بلوچستان آن غٹ سیاسی جماعت آتا راہشون، راج دوست و ایلو جتا راہشون تے اوار مننگ نا دعوت تننگاسس۔

دا جرگہ مُسہ دے برجاء مننگ ئس ہراڑکن باقاعدہ شیڈول نا ہم پڑو تننگاسس ہراٹی ہر مُسہ دے خوائفنگوک جرگہ نا باسک آتا پارہ غان جتا نشست آک مرور و او علاقہ نا ویل آتیا ہیت کرور۔

جرگہ کن خیبر نا علاقہ ریگی للمہ ئٹ خیمہ خلنگاسس۔

منظور پشتین چھاپہ آن پد شینک کروک بیان ئٹ پاریسس کہ ’جہان نا غٹ طاغت آک اوار مریسہ ہم ننا جرگہ ءِ بے سہب کننگ کپسہ و نن جرگہ کرون۔‘

او پاریسس کہ ’غٹ باسک آک سامان و بیرم تیتون اوار جرگہ جاہ غا سر مریر و پولیس نا پارہ غان چھاپہ نا ترند مذمت کینہ۔ پولیس بھاز آ ناجوڑ باسک آتے ہم دزگیر کرینے۔‘

منظور پشتین نا ردئٹ: ’نن جرگہ پشتون ڈیہہ ئٹ بد امنی ءِ توننگ کن کننگ اُن ولے لج ئنا ہیت ئسے کہ نن نعرہ خلینہ کہ الس و پولیس اسٹ ءُ ولے پولیس جرگہ نا بست و بند کروک آتیا ہمو وخت چھاپہ خلک ہراتم او خاچوک ئسر۔‘

فرانس نا صدر ایمانوئیل میکرون اسرائیل ءِ سلہہ تننگ ءِ بند کننگ نا خواست کرے۔

غزہ نا حالیت آ میڈیا تون ہیت کرسہ فرانس نا صدر ایمانوئیل میکرون نا پاننگ ئس کہ ساڑی آ حالیت ئٹی ننے سیاسی حل ئنا کنڈ آ ہننگ بکار ءِ۔

‎ ایمانوئیل میکرون نا پاننگ ئس کہ غزہ ٹی جنگ کن اسرائیل ءِ سلہہ تننگ آ رکھ خلنگ ءِ ترجیح تروئی تمو، فرانس اسرائیل ءِ ہچ وڑ ئنا سلہہ تفرو۔

فرانس نا صدر نا بیان آ اسرائیلی وزیر اعظم نیتن یاہو پارے کہ اودے تینا دا بیان آ لج برے، اسرائیل اوفتا سلہہ تیان بیدس دہشت گردی نا برخلاف جنگ ءِ کھٹو۔

ضلع مستونگ آن پاکستانی فورسز نا دوتیان زوراکی ئٹ بیگواہ کننگوک ارا بندغ آجو کننگار ۔

شابیت حوال تا ردئٹ آجو کننگوک اسہ بندغ ئسے نا چاہنداری مستونگ نا ہندی حافظ محمد اسحاق نا پن آن مسونے ۔

پن کروک بندغ ءِ￵ 17 اکتوبر 2023 ٹی فورسز کارندہ غاک دزگیر کریسر ۔

بیگواہ کننگوک بندغ سرکاری ملازم و معلم القرآن ئسے ہرادے داکان مالو ہم زوراکی ئٹ بیگواہ کننگاسس ۔

اندن اسہ پین بندغ ئس فہیم ولد کمال خان ءِ ￵ ہم اسہ سال مالو پاکستانی فورسز کارندہ غاک بیگواہ کریسر او ہم آجو مریسہ اُرا ءِ رسینگا ۔

ضلع کیچ ئنا بنجاہی شار تربت ئٹ سلہہ بند بندغ آک ایف سی ہیڈ کوارٹر ءِ جلہو ئٹ ٹِک کریر۔

حوال تا رد ئٹ نیم روچ نا وخت آ تربت شار ئٹ ٹہیفوک ایف سی ہیڈ کوارٹر آ سلہہ بند بندغ آک جلہو کریر۔کیمپ ئنا تہٹی ہشت آن زیات تراک آتا توارک بننگار۔

 جلہو ئٹ فورسز ءِ نسخان ارفنگ نا حوال ءِ واہم کالخواہ تا ہیت دائسکان مونا بتنے۔

جلہو نا ذمہ داری ءِ بلوچستان لبریشن فرنٹ ارفینے۔

پاکستانی لشکر چیک پوسٹ آن اِرا بندغ زوراکی ئٹ بیگواہ کرے۔

بلوچستان نا دریابی علاقہ گوادر آن پاکستانی لشکر دورو کنڈگ چیک پوسٹ آن اِرا بندغ ءِ دزگیر کننگ آن گڈ بے ڈس ءُ ہند ئسے آ درے۔

پن کروک آ بندغ آتا چاہنداری شعیب ولد مراد محمد دشت ئنا ہندی و کمال ولد حاجی داد محمد دشت ئنا ہندی نا پن تیٹ مسنو۔

پن کروک بندغ آتے ہمو وخت آ دزگیر کننگا ہراتم اوفک تینا اُرا نا پارہ غا سفر کننگ ئسر۔

یاتی مرے کہ تدوکا کہیی دے تیان دشت و گوادر نا علاقہ غاک فوجی آپریشن آتا دک ئٹی ءُ ہراڑے آباتی تیا چھاپہ خلنگانے وختس کہ زوراکی ئٹ بیگوائی تا تدینی ہم رپورٹ مسنے۔