بلوچستان نا ضلع قلات ئٹ نادرست بندغ آک سنگ مرمر آن پُر ءُ ٹرک ئسے ہشار اندن موبائل ٹاور ئسے بھس کریر۔

حوال تا رد ئٹ استو قلات نا علاقہ منگچر بازار نا ہند آتیٹ نادرست بندغ آک سنگ مرمر دروک ٹرک ئسے ہشیسہ نرّار۔

ایلو پارہ غا اینو قلات نا علاقہ پارود ئٹ نادرست بندغ آک موبائل ٹاور ءِ تراکی مواد کڈ کریسہ بھس کریر اندن مشینری ءِ ہشار۔

پن کروک ہڑتوما جلہو تا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا سرمچار آک قلات ئٹ اِراجتاء کاروائی تیٹ مڈی دروک گاڑی و حوالکاری کمپنی نا ٹاور ءِ بھس کریر۔

ترجمان پارے کہ بی ایل اے نا سرمچار آک استو منگچر بازار آن خڑک مڈی دروک ٹرک ءِ ہشار اندن ٹرک ڈرائیور ءِ خبڑدار کننگ آن گڈیلہ کننگا۔

او پارے کہ ایلو پارہ غا اینو قلات نا علاقہ پارود ئٹ یوفون موبائل کمپنی نا اسہ ٹاور ئسے تراکی مواد کڈ کریسہ بھس کننگا و ٹاورمشینری ءِ ناکارہ کننگا۔

جیئند بلوچ پارے کہ پن کروک ٹاور کوزہ گیر پاکستانی لشکر نا پاننگ آ ٹہیفوک ٹاور آتیان اسٹ اس ئس۔

او پارے کہ بلوچ لبریشن آرمی پن کروک ہڑتوما جلہو تا ذمہ واری ءِ ارفک۔ کوزہ گیر پاکستانی لشکر و اوڑتون اوار مروک آتیا ننا جلہوکبرجاء مرور۔

بلوچستان نا ضلع نوشکی آن اِرا ورنا زوراکی ئٹ بیگواہ کننگار۔ ہڑتوما بندغ آتے درو نوشکے بازار آن پاکستانی لشکر دزگیر کننگ آنگڈ نادرست جاگہ آ درینے۔

بیگواہ مروک آتا چاہنداری خرم ولد عبدالصمد بادینی و سعود ولد عبدالباقی بادینی ہند کلی بادینی نوشکے نا پن تیٹ مسنے۔

بیگواہ مروک آتیٹ سعود ءِ ہموتم دزگیر کننگا ہراتم او اسکول آن چھٹی کریسہ اُرا غا ہننگ ئس اندن خرم کلی سردار بادینی نا ہندیئسے و پیشہ ئٹی مزور ئسے۔ ہرادے درو دزگیر کننگ آن گڈ بیگواہ کننگا۔

خیال ئٹ مرے کہ پن کروک بیگواہ مروک آتیان سعود نا ایلم سلال احمد ءِ اکتوبر 2022 ئٹ دزگیر کننگ آن گڈ خاران ئٹ مُسہ پین بندغتون اوار دروغ نا مونتس ئٹ خون کسفنگا۔

یاتی مرے کہ اکتوبر ئٹ سی ٹی ڈی چار بندغ ءِ دروغ نا مونتس ئٹ کسفنگ نا دعویٰ کریسس اندن اوکان گڈ مونتس ئٹ خون مروک آتاچاہنداری مالو آن بیگواہ مروک بندغ آتا وڑ ئٹ مسوسس۔

اوفتیٹ سلال احمد ہم اوار ئس۔ سلال ولد حاجی عبدالباقی بادینی ہند نوشکی ءِ 6 اکتوبر 2022 آ کوئٹہ نا علاقہ بروری روڈ ریلوےکالونی آن اُرا غا چھاپہ خلیسہ دزگیر کننگ آن گڈ بیگواہ کننگاسس۔

سلال بادینی ءِ داڑان مالو 5 مارچ 2022 آ لاہور آن زوراکی ئٹ بیگواہ کننگا و اگست ئٹ یلہ کننگاسس اندن ارٹمیکو وار آ زوراکی نابیگواہی آن گڈ سلال ءِ دروغ نا مونتس ئٹ کسفنگا۔

یورپی یونین پاکستان تون اوار کیہی ملک آتے خبڑدار کرینے کہ اگہ او تینا بے قانودی تارکین وطن ءِ پدا خواہفتوس گڑا اوفتیا ویزا رکھ خلنگو۔

فرانسیسی حوال تروک ادارہ اے ایف پی نا رد ئٹ سویڈن نا وزیر برائے تارکین وطن پنچ شمبے آ پارینے کہ یورپی یونین نا وزرائے داخلہ تا نیام ئٹ دا ہیت آ امنائی کننگانے کہ تینا بے قانودی تارکین آتے پدا نہ خواہفوک آ ملک آتیا یورپ نا ویزا تا بارو ئٹ رکھ خلنگو۔

دا سخت پالیسی نا دروشم یورپی کمیشن نا سروک ارسلاوان ڈیر لیین نا کنڈ آن پنچ شمبے آ یورپی یونین نا باسک ملک آتا راہشون تے رادہ کروک چٹھی ئسے ٹی خننگانے۔

ارسلاوان ڈیر لیین تینا چٹھی ٹی پاکستان، بنگلہ دیش، مصر، مراکش، تیونس و نائجیریا کون آ ملک آتا ذکر ءِ کرینے۔ دا چٹھی یورپی یونین نا 9 و 10 فروری نا ہمو سروکی مجلس آن مُست رادہ کننگانے ہراٹی دا ویل ئنا زی آ ہیت کننگو۔

ارسلاوان ڈیر لیین پارے کہ یورپی یونین نا باسک ملک آک برجاء سال ئنا اولیکو ششماہی ٹی اسہ پائلٹ اسکیم ئسے آ دستخط کننگ کیرہ تاکن تارکین وطن نا بندغ آتیکن اسکریننگ و سیاسی باہوٹ نا وڑ تے ترند کننگ مرے و ہرا داڑکن لائخی تخپسہ اوفتے زوت واپس کننگ مرے۔

او پین پارے کہ او خواہرہ کہ یورپی یونین خطہ نا رکھوک ملک آتا لڑ تیار کے و بحیرہ روم و دے کہی بلقان نا ہمو کسر تیا سرحدی خیالداری ءِ ترند جوڑ کے ہرافتے تارکین وطن آک یورپ آ ہننگ کن کاریم ئٹ ہتیرہ۔

ارسلاوان ڈیر لیین پارے کہ یورپی یونین پاکستان، بنگلہ دیش، مصر، مراکش، تیونس، و نائجیریا کون آ ملک آتون اوار تارکین وطن نا بارو ئٹ گپ و تران کننگ نا منصوبہ جوڑ کرینے تاکن واپسی نا عمل ءِ جوان جوڑ کننگے۔

ایلو پارہ غا یورپی یونین نا ہوم افیئرز نا کمشنر یلوا جوہانسن پارینے کہ تدوکا سال 10 لکھ ئنا خڑک سیاسی باہوٹ نا خواست آتا رسینگ انگ نا سوب آن کیہی یورپی ملک آتیا بھاز زور ارے۔

او پارے کہ روس ئنا یوکرین تون جنگ آن گڈ 40 لکھ یوکرینی تارکین وطن نا بننگ نا سوب آن ہم یورپی ملک آک ویل آتا گواچی ءُ۔ یورپی ملک آتیا مون کروک بندغ آتا پدا ہننگ نا کچ ئٹی بھاز کمبتی خننگانے۔

سال 2021 ئٹ مُسہ لکھ 40 ہزار و پنچ بندغ ءِ یورپی ملک آتیان واپس ہننگ نا حکم تسوسر ولے اوفتیان بیرہ 21 درسد تینا ملک آتیا پدا رادہ مسوسر۔

بلوچستان نا ضلع کوہلو نا علاقہ کاہان ئٹ بلوچ لبریشن آرمی نا سرمچار آتا بھلو کچ اس پیہانے اندن جتا ہند آتیا سلاء بند بندغ آتاگشت برجا ءِ۔

پک کروک علاقائی ذرائع غاک ٹی بی پی ءِ پاریر کہ کاہان ئٹ جتا ہند آتیا بلوچ آجوئی دوست سلاء بند بندغ آتے خننگ مریک۔ ہراعلاقائی بندغ آتون اوڑدہی تون اوار بنجائی سڑک آ گشت کننگ ءُ۔

ذرائع تا پاننگ ءِ کہ سلاء بند بندغ آتا تعلقداری بلوچ آجوئی دوست سلاء بند گل بلوچ لبریشن آرمی آن ءِ۔ ہرافتا بھلو کچ اسیٹ بننگ نالڑ اِرا دے مالو بناء مسوسس۔

ذرائع غاک ٹی بی پی ءِ پین پاریر کہ پن کروک بندغ آک بازار و بنجائی سڑک تون اوار شہید بالاچ مری قلعہ، نواب مہر اللہ خان قلعہ وفوجی چھاؤنی تون اوار ایلو ہند آتیا ساڑی ءُ۔

واہم بلوچ لبریشن آرمی نا ترجمان جیئند بلوچ دائسکان دا بارو ئٹ ہچو بیان اس شینک کتنے۔

یاتی مرے کہ کاہان ئٹ بلوچ آجوئی دوست سلاء بند بندغ آتا کنڈ آن پاکستانی لشکر ءِ کیہی جلہو آتیٹ ٹک کننگانے اسہ ترند حالیتئسے نا بمب جلہو اس تدوکا سال ئنا گڈیکو دے تیٹ کننگا ہرا ٹی پاکستانی لشکر نا کیپٹن تون اوار ہشت کارندہ مرگ ئنا گواچیمسوسر۔ دا جلہو نا ذمہ واری ءِ بلوچ لبریشن آرمی ارفیسس۔

اندا وڑ فروری 2021 ئٹی کاہان ئٹ پاکستانی لشکر نا 84 ونگ ئنا جامک و کوٹڑی پوسٹ آ بلوچ لبریشن آرمی ترند حالیت ئسے نا جلہواسیٹ ہفت کارندہ مرگ ئنا گواچی کننگ آن گڈ پوسٹ آ کوزہ کریسس۔

بلوچستان نا ضلع بولان نا علاقہ بھاگناڑی ٹی قبیلہ تیٹ دتری چک و تاڑ آن جانی نسخان مسنے۔

ہڑتوما قبیلہ غاتا سلاء بند بندغ آک سنگر ہلیسہ اسٹ ایلو آ سم کاری کریر ہرا نا سوب آن 5 بندغ کسکر۔

کہوک آتا تعلقداری لہڑی و ابڑو قبیلہ آتیان ءِ، ہڑتوما ٹولی تیٹ سم کاری نا سوب کیہی بندغ آک ٹپی مسر۔ جنگ ئنا سوب زمینی جیڑہاس پاننگک۔

تدینی آن گڈ علاقہ ٹی حالیت آک خراب و بندغ آتیٹ بیم و خُلیس خننگک۔

بلوچستان نا ضلع چاغی آن خڑک ڈک ئنا ہند آن اسہ بندغ ئسے نا کیہی دے متکنو جون اس خننگانے ہرادے چاہنداری کن ہندی اسپتالآ دننگا۔

چاغی پولیس بست و بند ئنا رد ئٹ جون ئنا بارو ئٹ حوال اسہ شوان اس تس ہراڑان گڈ پولیس جاگہ غا سر مس، جون ءِ آر ایچ سیاسپتال چاغی آ دننگا ہراڑے اونا چاہنداری پیرک ولد رئیس خان ئنا پن آن مس۔

بست وبند ئنا رد ئٹ واہم تدینی نا سوب آن سماء تمیتنو اندن ہندی پولیس پین پٹ و پول کننگ ءِ۔

خیال ئٹ مرے کہ برجا منہ دے تیٹ تیوہ بلوچستان آن پنچ جون خننگانو۔

بلوچستان نا ضلع قلات ئٹ تدوکا دے تیٹ پِر و برف آن گڈ یخ ئنا ترندی ٹی ودکی، پارہ منفی چار ریکارڈ ءِ ہرانا سوب آن ہڑدے ئی زند پدتمانے۔

ترند یخ ئٹ بندغ آک اُرا تے اسکان گٹ مسنو، قلات ئٹ گیس ئنا بند مننگ دائسکان برجا ءِ، اندن بجلی نا وار وار ٹرپنگ و ہن بر بندغ آتےپین فریشان کرینے۔

بجلی نا ٹرپنگ آن برقی آلہ آتا ہشنگ ہم ہڑدے نا کاریم اس جوڑ مسنے، ایلو ذریعہ غاتا بست و بند اف، سوختی پاٹ و ایل پی جی گیسہم کبینی نا سوب آن الس ئنا وس آن پیشن ءِ۔

بندغ آتا پاننگ ءِ کہ سوج کروک کس اف، السی نمائندہ غاک اودیم ءُ انتئے کہ اوفتے آسراتیک دوئی ءُ ولے غریب آ الس خوار و بنداویآسراتی تیان نیست ءِ۔

بندغ آتا پاننگ ءِ کہ عدالت نا کنڈ آن گیس بحالی نا حکم آتیا گیس کوالخواہ تا عملدر آمد کپننگ سوج ئنا نشان ئسے۔

السی کڑدہ غاک پاکستان نا چیف جسٹس، بنجائی #محتسب اعلیٰ و ایلو ذمہ وار آتیان گیس ئنا بند مننگ و بجلی نا ہن بر ئنا نوٹسہلنگ نا خواست کرینو۔

کراچی آن دزگیر مننگ آن گڈ بیگواہ محمد آصف نا ایڑ کراچی ٹی وائس فار بلوچ مسنگ پرسنز نا کیمپ ئٹ بریسہ بیگواہ ایلم نا یلہمننگ نا خواست کرینے۔

کراچی ٹی وائس فار بلوچ مسنگ پرسنز نا کیمپ آن ویڈیو بیان اس شینک کریسہ بی بی شیرین بلوچ پارے کہ او نا ایلم محمد آصف ءِپنچ سال مالو بلدیہ ٹاؤن مہاجر کیمپ کراچی آن زوراکی ئٹ بیگواہ کننگا ہراڑان گڈ محمد آصف پاش متنے۔

بی بی شیرین بلوچ نا پاننگ ئس کہ او دا نیام ئٹ تینا ایلم نا زوراکی نا بیگواہی نا کیس ءِ کراچی ٹی جمع کرفینے اندن بیگواہ بندغ تاکمیشن و جے آئی ٹی ئٹی ایلم نا بیگواہی نا شابیت آتے جمع کرفینے ولے دا تیوہ وخت ئٹ ہچو جاگہ ئسے آن اودے جوانو ورندی اسرسینگتو و نئے کہ اینو اسکان پاننگانے کہ اونا ایلم ءِ ہرا ڈوہ ئٹ بیگواہ کریسہ اراڑے تخنگانے۔

ایڑ ئنا پاننگ ئس کہ محمد آصف اُرا نا یکہ غا بندغ ءِ و اُرا ءِ سامبنگ کن کراچی ٹی خواری مزوری کننگ ئس اگہ اونا زی آ دوبہ اسارے گڑا اودے عدالت ئٹ ہتیسہ فری ٹرائل نا موقع تننگ مرے۔

بی بی شیرین بلوچ پین پارے کہ ای تینا ایلم نا رکھوک یلہ مننگ کن حکومت و بندغی حق آتا ادارہ تیان خواست کیوہ کہ او دا بارو ئٹگام گیج کیر تانکہ محمد آصف ءِ انصاف رسینگے۔

بلوچستان نا علاقہ دکی و ایب کیب ئٹ سورک دین تالان۔ جنوری نا تُو ئٹ شش چنا ساہ تسنو۔

دکی کلی شرنگ ناصر ئٹ سورک نا دین اِرا سالی مار ئسے نا ساہ ءِ ہلک، برجا سال دکی ٹی سورک آن بیران مروک چنا تا کچ شش مسنے اندن دائسکان ہم سورک آن سد آ بندغ آک زیمی ءُ۔

دین ئنا توننگ کن السی کڑدہ غاک محکمہ جانجوڑی و اعلیٰ کوالخواہ تیان ہلہلہی بنداو آ گام گیج کننگ نا خواست کرینو۔ السی کڑدہ غاک محکمہ جانجوڑی و اعلیٰ کوالخواہ تیان خواست کرینو کہ زوت سورک نا توننگ و چنا تے کہنگ آن رکھنگ کن ویکسین و گام گیج کننگے۔

داڑان مالو جنوری نا بناء ٹی محکمہ جانجوڑی رپورٹ شینک کریسہ پاریسس کہ دکی ٹی دائسکان ہم چِل چنا سورک آن زیمی ءُ۔

ایم ایس ڈاکٹر جوہر خان شادوزئی سورک آن رکھنگ نا خیالداری تا بارو ئٹ پارے کہ سورک دین ودی مروک اسہ ناجوڑی ئسے ہرا نا خاص ءُ دارو درمان اس اف سورک آن لس وڑ ئٹ ہِڷ، جکہ، خنتا ہشنگ و دانہ غاتا ناجوڑی ودی مریک سورک بھاز زو ایلو ءِ مریک اندا سوب آن سورک ءِ ایلوفتیٹ تالان کننگ نا جاگہ غا بھاز خیالداری نا گرج ءِ اندا خاطر آن تینا چنا تے زو یکہ کبو۔

بھاز کم کیس آتیٹ سورک نا ناجوڑ آ ءِ اسپتال ئٹ داخل کننگ نا گرج مریک رکھوک ٹیکہ خلنگ آن سورک نا ناجوڑی آن بچنگ مریک۔