بلوچستان نا بنجائی شار کوئٹہ آن زالبول و چنک سن چنا تون اوار پنچ بندغ پاکستانی لشکر نا دو آن زوراکی ئٹ بیگواہ کننگانو۔

ٹی بی پی نیوز ڈیسک ءِ رسینگوک حوال تا رد ئٹ بلوچستان نا بنجائی شار کوئٹہ آن پاکستانی لشکر سرچ آپریشن نا وخت زالبول و چنا تون اوار پنچ بندغ ءِ دزگیر کننگ آن گڈ بیگواہ کرینے۔

پن کروک بندغ آتیٹ محمد رحیم زہری ولد چاکر خان زہری، اونا اسہ سالی مسڑ دعا زہری، چار سالی مار یحیٰ زہری، و اونا زائیفہ رشیدہ زہری و لُمہ بس خاتون اوار ءُ۔

حوال تا رد ئٹ پن کروک بندغ آتے 2 فروری آ گشکوری ٹاؤن، ناشناس کالونی آن سرچ آپریشن نا وخت دزگیر کننگ آن گڈ بیگواہ کننگا ہراڑان گڈ اوفتا بابت ہچ وڑ ئنا معلومداری رسینگتنے۔

خیال ئٹ مرے ہنوک وخت ئٹ بلوچستان ئٹ دا وڑ ئنا تدینیک مونا بسنو ہراڑے زالبول و چنا تے زوراکی ئٹ بیگواہی نا گواچی کننگانے۔

منہ دے مالو کراچی ٹی سنٹرل جیل ئنا مونا عدالت نا کنڈ آن یلہ مروک عبدالحفیظ زہری ءِ زوراکی ئٹ بیگواہ کننگ نا کوشست نا وخت ہم زالبول و چنا تے بے دادی نا گواچی کننگاسس۔

ترکیہ و شام ئٹ 7.8 نا ترند آ زمین جمب آن بھاز آ جاگہ آک بھس مسر ، امریکی جیولاجیکل سروے نا پاننگ ءِ سہب ئنا چار بجہ 17 منٹ آ 7.8 نا ترند آ زمین جمب مس ہرانا  کڑمبی غازی انتیپ شار نا خڑک 17.9 کلو میٹر ءِ۔

گیشتر حوال تا رد ئٹ  شام نا سرکاری ٹیلی ویژن پارے کہ حلب، حما، لطاکیہ و طرطوس نا شار تون اوار حکومت نا دوٹی مروک علاقہآتیٹ ہم زمیں جمب آن کم آن کم 239 زیات بندغ مرگ ئنا گواچی و 648  ٹپی مسونو، کمکی باسک آک پاریر کہ ملک ئنا  قطبی دےکہی علاقہ آتیٹ باغی تا کوزہ کروک علاقہ آتیٹ ہم بھاز آ بندغ آک مرگ ئنا گواچی و ٹپی مسونو ۔

ترکیہ نا بنجائی کوالخواک پاریر کہ ترکی ٹی داسکان 1000 زیات بندغ  مرگ ئنا گواچی و 500 ٹپی بندغ ہسپتال آتیٹ درمان مننگ ءِ،اندن 2840 جاگہ آک تیوہ یا نیما بھس بسونو حوال تا رد ئٹ اولیکو زمین جمب سہب ئنا 4 بجہ 17 منٹ آ مسوسس و ارٹمیکو زرسمست۔

‏اندن ترکیہ ٹی ہرا علاقہ آتیٹ زمین جمب مس اوفتیٹ خراب مد ئنا سوب آن کمکی  کاریمک زیمی مننگ ءُ۔ ترکی کمکی ادارہ آک زیمیعلاقہ آتیٹ کاریم  ءِ بناء کرینو ولے ترند یخ و برفباری نا سوب آن پریشانی تا گواچی مننگ ء۔

حوال تا رد ئٹ بلوچستان نا ضلع قلات نا تحصیل منگچر نا ہند آ جوہان روڈ آن تدوکا دے سادہ پُچ بینوک سلاء  بند بندغ آک محمد عمرنا مار علی نواز پنی ء ورنا ئسے دزگیر کریسہ تینتو اوار دریر، پن کروک بندغ منگچر نا ہندی ئسے اندن علاقائی بندغ تا پاننگ ءِ اودےپاکستانی ڈکوک ادارہ آک و اونا ٹہیفوک سلاء بند ٹولی تا کارندہ آک بیگواہ کرینو۔

یاتے مرے  بلوچستان ٹی زورٹ بیگواہ تیٹ اسہ وار واپس ترندی بسونے تدوکا تو ئنا بناء ٹی پنج دے ٹی جتا علاقہ آتیٹ مُسہ ورنا  زورٹبیگواہ نا گواچی مسوسر داکان مست مُسہ فروری آ پاکستانی لشکر اِرا ورنا ءِ دزگیر کننگ آن گڈ  بیگواہ کریسس–

نوشکی آن زورٹ بیگواہ مروک آتا چاہنداری کلی بادینی نوشکی آن تعلقدار عبدالصمد بادینی نا مار خرم و عبدالباقی بادینی نا مارسعود نا پن تیٹ مسونے۔

بلوچستان ٹی زورٹ بیگواہ تا لڑ بھلو وخت ئسے آن برجاہ ءِ ہراڑے گڑاس بیگواہ بندغ تا اُرا تیٹ ہم گیڑا تے دُزانو داسکان بیگواہ بندغ تایلہ کننگ کن توار ارفوک تنظیم آتا رد ئٹ پین بندغ آک ہم زورٹ بیگواہ نا گواچی مسونو۔

گیسشتر حوال تا رد ئٹ زورٹ بیگواہ مروک بندغ آتا یلہ کننگ کن  جہد کروک تنظیم نا رد ئٹ بلوچستان ٹی جتا تپہ آتیان تعلق تخوک20 ہزار آن زیات بندغ  قانود آن چپ زورٹ بیگواہ نا گواچی مسونو ہرافتیٹ بھلو کچ اس سیاسی خوانندہ و راہشون تا ءِ۔

ایلو پارہ غان بیگواہ بندغ آتا خاہوت آتا تنظیم وائس فار بلوچ مسنگ پرسنز نا پارہ غان بین ہڑتالی کیمپ کراچی پریس کلب نا مونابرجاہ ءِ۔

بلوچستان نا ضلع خضدار ٹی روڈ شکست نا ہرا جتا ویل آتیٹ چار بندغ مرگ ئنا گواچی اندن چار ٹپی مسونو۔

اولیکو ویل خضدار ٹی زیر پوائنٹ آ مس ہرا وخت مزدا ٹرک گاڑی  خضدار کانک نا ہندی ارا بندغ ءِ لتاڑا ہڑتوما ورناک ہند آ ساہ تسر،ہرافتا چاہنداری عبدالحفیظ و نصیراحمد نا پن تیٹ مس اندن مزدا ٹرک گاڑی نا ڈرائیو نرینگ ٹی سرسہب مس بست و بند نا رد ئٹ ہراناپٹ و پول  برجاہ ءِ۔

اندن ایلو ویل خضدار ٹی وہیر نا ہند آ مس ہراڑے گاڑی ترند ہننگ نا سوب آن کلٹی مس ہرانا سوب آن ارا بندغ اسہ نرینہ و اسہ زالبولاس مرگ ئنا گواچی مسر ہرافتا چاہنداری حاجی احمد و مسما اسما نا پن تیٹ مس اندن دا ویل ئٹی چار بندغ ٹپی مسر ہرافتے ایم یآر سی 1122 والاک درمان کریسہ خضدار ہسپتال آ سر کریر۔

بلوچستان ٹی روڈ شکست نا ویل آتا بنماسی سوب آک تنک و بد حالی نا گواچی کسر تیان بیدس ڈرائیور تا بے پامی ہم پاننگ ء۔

بلوچستان نا دارالحکومت کوئٹہ ٹی پاکستانی لشکر نا چیک پوسٹ نا خڑک ترند ءُ تراک اس مسونے تراک کوئٹہ ٹی فورسز کینٹ نا خڑک موسیٰ چیک پوسٹ آ مس، تراک نا توار مر مر اسکان بننگا، بنائی حوال تا رد تراک ٹی پنج بندغ ٹپی مسونو۔

گیشتر حوال تا رد  تراک آن گڈ پاکستانی لشکر نا بھلو کچ اس علاقہ ءِ داپار ایپار آن ہلکر، جلہو کروک آتا پٹ و پول ءِ بناء کریر۔ یاتی مرے کہ اینو کوئٹہ ٹی پاکستان سُپر لیگ “پی ایس ایل” ایڈیشن 8 نا اسہ نمائشی میچ اس ہم چلینگ ءِ ہرانا سوب آن شار ئٹی سیکورٹی پین سخت کنگانے۔

جلہو نا ذمہ واری تحریک طالبان پاکستان ارفینے۔ ٹی ٹی پی نا ترجمان محمد خراسانی شینک کروک بیان اٹ پارے کہ ننا مجاہد اس پاکستانی لشکر نا گاڑی تا قافلہ ءِ وت کش جلہو اٹ کرینے ہراڑان کہی پاکستان فوجیک مرگ ئنا گواچی و ٹپی مسونو۔

یاتی مرے تدوکا دے پشاور پولیس لائنز مسجد ٹی وت کشی تراک آن گڈ کوئٹہ تون اوار تیوہ بلوچستان ٹی سیکورٹی ہائی الرٹ کننگاسس۔ کوئٹہ شار نا تہی و پیشین ہڑتوما کسر تیا ہنوک بروک گاڑی تے سخت چیکنگ کننگ بناء کننگا اندن خاص سرکاری جاگہ آتا رکھ ٹی ہم ودکی کننگاسس۔

دا وخت قانود ٹہیفوک ادارہ آتا اسہ ہلہلئی مجلس اس ہڈ تننگا ہراٹی کوئٹہ تون اوار تیوہ بلوچستان ٹی سیکورٹی پلان، بگٹی اسٹیڈیم ٹی مروک نمائشی میچ نا سیکورٹی نا  پوسکن جاچ الینگا و بگٹی اسٹیڈیم نا ایب کیب ئٹ ہم سیکورٹی ءِ سخت کننگ نا پنت تننگا اندن۔

پاکستان نا مسکوہی صدر جنرل ریٹائرڈ پرویز مشرف دبئی نا امریکن اسپتال اسیٹ کسک۔

حوال تا رد ئٹ پرویز مشرف دبئی نا امریکن اسپتال اسیٹ مرگ ئنا گواچی مسنے اندن سفارتی ذرائع غاک اونا کہنگ نا پک کرینو۔

پاکستان نا مسکوہی صدر پرویز مشرف بھاز اُرے آن ناجوڑ ئس و کیہی سال تیان اونا دارو درمان مننگ ئس دا وار اودے خراب حالیتئٹی اسپتال نا آئی سی یو وارڈ ئٹ دننگاسس واہم او جانجوڑ متو و مرگ ئنا گواچی مس۔

متحدہ عرب امارات آن زوراکی ئٹ بیگواہ و پد آن پاکستانی نا دوٹی تروک عبدالحفیظ زہری ءِ پاکستانی ڈھکوک ایجنسی تا کارندہ تاکنڈ آن دوارہ برمتہ نا کوشست و خاہوت ءِ بے دادی نا گواچی کننگ نا برخلاف اینو کراچی پریس کلب نا مونا برانز کننگا۔

برانز ئٹ وائس فار بلوچ مسنگ پرسنز نا راہشونک، بیگواہ بندغ آتا خاہوت آک و جتاء تپہ آتیان تعلقداری تخوک زالبول و نرینہ غاک اوارمسر اندن برانزیک دو تے ٹی پلے کارڈ و بینر ارفیسہ ترند نعرہ خلکر۔

برانز ئٹ اوار مروک بیگواہ ڈاکٹر دین محمد نا مسڑ سمی بلوچ نا پاننگ ئس کہ کہ نم کل چارے کہ استو عبدالحفیظ و اونا خاہوت تونہرا تدینی مونا بس او کراچی کون آ شار تیٹ بلکن اولیکو یا ارٹمیکو وار مرے ولے بلوچستان ئٹ دا ہڑدے نا کاریم جوڑ مسنو ہراڑے زالبولنرینہ، خوانندہ و ہر تپہ نا بندغ آک دا ملک ئنا ہچو جاگہ ئسے آ رکھوک افس۔

او راشد حسین و عبدالحفیظ نا متحدہ عرب امارات آن زوراکی ئٹ بیگواہی و پد آن پاکستان نا دوٹی تننگ نا بارو ئٹ  پارے کہ متحدہعرب امارات کون آ ذمہ وار ملک ہم پاکستان نا ظلم و بے دادی و بلوچ آتا زوراکی نا بیگواہی تیٹ تینا کڑد بشخ ءِ شاغیسہ بسنے۔

برانز ئٹ ساڑی بیگواہ عبدالحمید زہری نا مسڑ سعیدہ حمید پارے کہ کنا ماما ءِ درو کورٹ ئنا کنڈ آن شرف ئٹ یلہ کننگا نن اودے اُرا غاہتنگ کن جیل آ ہنان تو مالو آن اِرا ویگو گاڑی پیشن سلوک ئسر و دئے پانزدہ بندغ جیل ئنا تہہ آن بریسہ کنا ماما ءِ بے دادی نا گواچیکریر و زی آتا مون ءُ پچ اس شاغار و اودے زوراکی ئٹ دزگیر کننگ نا کوشست کریر ولے نن مزاحمت کریسہ زور ئٹ اوفتا دو آنعبدالحفیظ ءِ کشان پدا و ننے آ سم کاری و بے دادی نا گواچی کریر۔ او پارے کہ ننے آ دا ریاست اخس بے دادی کے نن چُپ مفرون ننہیت کرون دانا بر خلاف۔

یاتی مرے عبدالحفیظ زہری ءِ تدوکا سال 26 و 27 جنوری نا نن اکن متحدہ عرب امارات نا انٹرنیشنل شار آن دزگیر کننگ آن گڈ بیگواہکننگاسس، خاہوت برمتہ نا رپورٹ ءِ ہموڑے نا پولیس تھانہ ٹی درج کرفیسس۔

اوکان گڈ متحدہ عرب امارات نا کوالخواک عبدالحفیظ زہری ءِ پاکستان نا دوٹی تسر۔ عبدالحفیظ نا زوراکی ئٹ بیگواہی نا برخلافکراچی تون اوار کوئٹہ و پیشن ملک آتیٹ برانز ہم کننگا۔

عبدالحفیظ زہری بلوچستان نا ضلع خضدار نا ہندی ئسے ہراڑے 2010 ئٹ اونا ایلم مجید زہری و 2011 ٹی اونا باوہ حاجی رمضانزہری ءِ پاکستانی لشکر شہید کریسس۔ عبدالحفیظ تدوکا دئے سال آن متحدہ عرب امارات ئٹ رہینگاکہ۔

تدوکا اسہ سال آن عبدالحفیظ زہری کراچی سنٹرل جیل ئٹی ئس درو اودے عدالت نا کنڈ آن یلہ کننگاسس اندن سنٹرل جیل ئنا پیشنپاکستانی ڈھکوک ادارہ تا کارندہ غاک اودے اسہ وار پدا برمتہ کننگ نا کوشست کریر و عبدالحفیظ تون اونا خاہوت آ سم کاری و اوفتےبے دادی نا گواچی کریر۔

حوال تا رد ئٹ لاطینی امریکا نا ملک چلی ٹی ترند باسنی نا سوب آن جنگل آتیٹ لگوک خاخر آن داسکان 6 بندغ ہشنگیسہ مرگ ئنا گواچی مسونو۔

گیشتر حوال تا رد ئٹ خاخر نا سوب آن 19 ہزار 700 ایکڑ نا کچ جاگہ ہشنگیسہ بھس مسر اندن صد آ جاگہ آک ہم ہشنگیسہ ہس جوڑ مسر داڑان بیدس 39 ہند آتیا خاخر توننگ مننگ اف، فائر بریگیڈ نا ٹولی خاخر ءِ کسفینگ ٹی گٹ ءِ۔

اندن کوالخوا تا رد ئٹ خاخر ارجنٹائن آن بروک بارون و باسن تہو تا سوب آن لگانے یاتی مرے کہ تدوکا دے ترند بانسی نا سوب آن جنگل آتیٹ خاخر لگینگ آن گڈ کوالخواک ریڈ الرٹ شینک کریسر و خاخر چلان پنی ء علاقہ اسیٹ لگاسس کوالخوا نا رد ئٹ مونی خطرہ مننگ نا گمان آ جہندمی علاقہ آتیٹ ہفت پارک ءِ ہم ہسکان کن بند کننگاسس۔

لسبیلہ ٹی بس ئنا بیم بش کروک تدینی
ٹی بی پی سرگپ

لسبیلہ نا بیم بش کروک تدینی ٹی چِل و یک بندغ کسکنو و مُسہ ٹپی کراچی نا اسپتال ئٹ دارو درمان مننگ ءُ۔ لسبیلہ نا بیم بش کروک تدینی اولیکو اف بلکن کوئٹہ – کراچی، پنجگور – کوئٹہ، تربت – کراچی، و پنجگور – کراچی سڑک آتیا چرجوئی تون بیم بش کروک تدینیک مریسہ بریرہ، ہرافتیان ہزار آ مرگ آک مسنو۔ اسہ اندازہ ئسے نا رد ئٹ دا سڑک آتیا مروک تدینی تیان سال ئٹی ہفت ہشت ہزار مرگ آک مننگ ءُ۔

لسبیلہ تدینی ٹی ٹپی مسافر نا پاننگ ءِ کہ بس ئنا خرابی آن بیدس و مسافر آتا منت کننگ آ ہم سفر برجاء تخنگا اندن سفر نا وخت آ اسہ مسافر اس تینا خاہوت ءِ میسج کریسہ حوال تسوسس کہ ڈرائیور ترندی ئٹ بس ءِ چلیفنگ ءِ و ٹرالر آتے کراس کننگ ءِ۔ بس ئنا خواجہ و ڈرائیور آتا بے پامی آن کیہی تدینیک مونا بسنو ولے حکومت تدینی تے توننگ کن عملی پالیسی جوڑ کننگ نا جاگہ غا بیان بازی تے اسکان رہینگانے۔

حکومت آ دا دوبہ خلنگک کہ بلوچستان ئٹ اخس کہ سڑک جوڑ کننگانے، گمانی وڑ ئٹ او غٹ نوآبادیاتی پالیسی تا بنداو آ جوڑ کننگانو تاکن بلوچستان ئٹ مڈی تا “لُٹ و پل” آن گڈ پاکستان نا ایلو بشخ آتے اسکان اوفتا دننگ اڑزانی ئٹ مرے۔ کوئٹہ – کراچی سڑک شست ئنا دہائی ٹی جوڑ کننگاسس تاکہ نوکنڈی و جھالاوان نا سنگ مرمر و ایلو مڈی تے ارزانی ئٹ کراچی آ دننگے۔

داڑان بیدس دا تدینی تا مننگ نا اسہ بھلو سوب اس دادے کہ وخت اتون اوار اوار بلوچستان نا سڑک آتیا ہن بر ودنگ ءِ ولے داڑان بیدس بلوچستان ئٹ اسہ ہم چار رویا سڑک اس ساڑی اف، وار وار ئنا السی خواست آتیان پد ہم آر سی ڈی سڑک ءِ دعویٰ تیان بیدس چار رویا جوڑ کننگ متو، ہرانا سوب آن تدینی تا کچ ئٹ دے پہ دے آن ودکی مریسہ کیک۔

دا تدینی تیٹ مرگ آتا اسہ بھلو سوب اس، ایمبولینس و ایمرجنسی سروس آتا کمبتی ہم ارے۔ اگہ بلوچستان نا سڑک آتے چار رویا جوڑ کریسہ، ایمرجنسی سروس آتے جوان کننگے و مسافر بس آتے ریگولیٹ کننگے گڑا بھاز آ بے بہا غا ساہ تے رکھنگ مریک۔

بلوچستان یوتھ اینڈ سول سوسائٹی (بی وائے سی ایس) نا کنڈ آن بلوچستان ئٹ ٹریفک شکست آتا بارو ئٹ شینک مروک کچ و حساب نا رد ئٹ جنوری 2023 ئٹ بلوچستان نا سڑک آتیا شکست آتا لڑ توننگ متو۔

رپورٹ ئٹ پاننگا کہ تدوکا تو جنوری ٹی بد بختی آن چرجوئی ئٹ بلوچستان نا جتاء سڑک آتیا 693 شکست مونا بسر ہرافتیٹ 970 بندغ ٹپی 106 بندغ ساہ تسر۔

کوئٹہ، مستونگ، پشین، قلات، بوستان، کچلاک ئٹ 127 شکست مونا بسر ہرافتیٹ 181 بندغ ٹپی و 13 بندغ بیران مسر۔

خضدار، سوراب، لسبیلہ، حب، وندر و اوتھل ئٹ 324 شکست مونا بسر ہرافتیٹ 392 بندغ ٹپی و 57 بیران مسر۔

قلعہ سیف اللہ، کان مہترزئی، لورالائی، قلعہ عبداللہ، زیات، مسلم باغ، ژوب، شیرانی ٹی 106 شکست مونا بسر ہرافتیٹ 190 بندغ ٹپی و 19 بندغ بیران مسر۔

سبی، بولان، مچھ، ڈیرہ مراد جمالی، صحبت پور، نوتال، بختیار آباد، کوہلو، سوئی و بارکھان ئٹ 106 شکست مونا بسر ہرافتیٹ 170 بندغ ٹپی و 3 بندغ ساہ تسر۔

تربت، پنجگور، گوادر، مکران، کوسٹل ہائی وے کیچ ئٹ 13 شکست مونا بسر ہرافتیٹ 13 بندغ ٹپی و 6 بندغ بیران مسر۔

دالبندین، چاغی، نوشکے، خاران، بسیمہ و نوکنڈی ٹی 17 شکست مس ہرافتیٹ 24 بندغ ٹپی و 8 بندغ بیران مسر۔

دا کہوک آتیٹ جتاء خاہوت آتا کیہی بندغ آک ساہ تسنو ہرافتیٹ اسہ خاہوت نا 6 بندغ ہم اوار ءُ، ہرافتا تدینی بیلہ ئٹی مسوسس۔ اسہ پین خاہوت ئسے نا 5 بندغ بیران مسر ہرافتا تدینی زیارت کراس آ مسوسس۔ اسہ پین خاہوت ئسے نا مُسہ بندغ بیران مسر ہرافتا تدینی بیلہ ئٹی مسوسس۔ اسہ پین شکست اسیٹ اِرا حقی ءُ ایلم ساہ تسر ہرافتا تعلقداری قلات آن ئس۔